رواية عيون المها الفصل العشرون بقلم ظل الياسمين
الحياة قد لا تكون عادله
لكن الله عادل وهذا يكفي.
بقيت عد امي يومين وكلهم فرحانيين بيه حتى زوجهه
عدهه ثلث بنات واثنين ولد وكلهم احنان عليهه
اليوم الثالث كالت خل نروح للعشار عدهم سوك هناك
_يمه شنسوي رايحين اني ارد اشوفج واشبع منج وارجع لبيتي هناك جهال عمو سالم محد الهم
_مها يمه انتي ما مسؤله عن احد ولج انتي زغيره ومحمله نفسج مسووليه وتخافين على هذا وذاك
_فدوه اروحلج تره عمو سالم هواي ساعدني ما اكدر اتخله عنه وجهاله اني متعلقه بيهم
_هسه خل نروح وبعدين نحجي
رحنه لسوك جبير وكلشي بيه كبل ودتني لسوك الذهب اشترتلي محبس
رجعت جابتلي ملابس راقيه تخبل واحذيه وجنط وشالات وغراض كومه عطورات وشامبوات
_يمه ذني كلهن الي تره هواي
_ولج لو اطيج عمري الباقي احس مقصره 😓
_اسم الله عليج يا بعد عمري
_مها تعالي كدري هذا القمبص
_كافي يمه والله هواي صارن
طلعنه واني فرحانه اكول لو من زمان متواصله ويه امي ما صا بيه الصار
اني مثل عادتي اكعد الفجر اصلي قبل الاذان بين الغافيهه واسمع صوت ابتسام العلويه بونين/ليش ما رحتي لامي مو وصيتج مدت ايدهه الي واباوع لشعري صار ابيض
فزيت مخترعه وكمت طلعت بره يا ربي سترك وعفوك اشلون نسيت البت
باجر اروح ضروري ما بيهه مجال بعد
كمت توضيت وفرشت مصلايه واسمع صوت رجل امي يغسل وامي وراه يردون يتهيئون لصلاه
اذن وكملنه بقيت ساجده وادعي الله وخايفه من الحلم
_يمه مهاوي تعالي فكي ريكج ويانه
_يمه ما اشتهي من الصبح بس خل اجي يمكم
_صباح الخير
_هله بنيتي صباح الخيرات
_اكول يمه اني اريد ارجع لبيتي لان تعرفون عدي التزامات وانشالله ما اكطع بيكم
_يمه ابقي هنا فد سبوعين اشبع منج
بستهه وبجيت 😭
_يمه ادعيلي الله يجبر بخاطري
زوجهه سايق تريله كال
_بويه اني اوصلج
وامي اصرت تجي وياه وانطتني رقم تليفوون ارضي كالت يوميه تخابريني ههه اضن عد عمتي مره سمعته تخابر بيه
رجعت للبيت واني كلش خايفه ومقهوره
من الحلم
امي شافت وضعي واشلون عايشه تخبلت _مها انتي لازم تجين تعيشين وياي
_ما اكدر اني تربيت هنا والجيران كله تحبني وتحترمني
زوجهه كال/ عوفيهه براحتهه
عرفت من نبره صوته ما يريد يتحمل مسؤوليتي
اصريت اكثر وامي تعرفت بام صلاح وام علي واجت وصت عمتي عليه
وسلمت على عمو سالم وثاني يوم راحو
بوست الجهال اشكد مشتاقتلهم
من شافوني كامو يشبكون بيه عبالك سنه متفاركين بس عمو سالم جنه زعلان عليه
_عمو انته زعلان فدوه عمو خلي الجهال يمي اشبع منهم
_لا على شنو ازعل ما اريد ازحمج من حقج تشوفين حياتج ما افرض عليج شي
نتر ايد ابنه وطلع كام يصيح زيودي حاضني وما يقبل يروح كام يجر بيه
_يلله امشو بسرعه
انهضمت كلش يعني اني رجعت علمودهم ومتلهفه لشوفتهم
كلت خل يهداء واروح اعتذر ولو اني ما غلطانه
صبح الصبح ورحت ادور مكان بيت ابتسام العلويه ورحت لمنطقتهم وبقيت اسال عن امهه مله ومشيت هواي
يلله وصلت لبيتهم
_تفضلي يمه منو الترديه
_خاله ام ابتسام اكدر احجي وياج وحدنه كالت صار دخلتني واجت وراهه مره اني اشرتلهه وحدنه دارت وجهه كالت هاي اختي كتله ميخالف
راحت اختهه وكمت احجي وياه
_خاله ابتسام بلامن واني سمعت صوتهه
وكالت روحي لامي وكليلهم
المره كامت تبجي بصوت ناصي كالت
_قبل اشكد جنتي وياهه ابتسام انطتج عمرهه
اني فزيت مخروعه صدك يعني اني السبب ما اجيت الكم وبلغتكم بمكانهه
_لا يمه احنه نندل مكانه بس هذا امر الله
عذبوهه المايخافون الله وراحت شهيده
لا تلومين نفسج
خليت اديه على وجهي وكمت ابجي والمره شبكتني وبجت 😭
طلعت من يمهم كلبي معصور والوم بروحي اشلوووون نسيت اشلون ما رحت
رجعت مقبوض كلبي ❤️ متت قهر عرفت ليش صار شعري ابيض كلما يموت احد اتلمس شعري واشوفه بلحلم ابيض
نمت للعصر كعدت على دكه الباب ام صلاح
_هله بيج خاله تفضلي
_ولج مهاوي والله مكانج فارغ وحشه عليج تدرين جهال سالم يوميه يدكون بابج ويبجون خصوصا هذا الزغير لمن ابوه بسطه
طفرت من مكاني
_خاله امشينه لعمو انجيب جهاله
_لا خلاهم عد بيت خالتهم
_فدوه خاله اذ تندلين خالتهم خل اروح اني وياج تره كلبي مكطوع عليهم
كمنه واني كل شويه استعجلهه وهيه تمشي بطيئ
وصلنه ودكيت الباب طلع حمودي بس شافني شبكني وبجه شاورني
_مها اخذيني وياج
يا بعد روحي كمت ابوس بيهم
_تفضلي عيوني هله بيجن
_رحملله والديج زاد فضلج راح اخذ الجهال يمي من يجي عمو كليله اخذتهم مها
_لا ما يقبل لا تاخذيهم
ام صلاح/ يمه همه متعودين عليهه ما يكول شي بس كليله اخذتهم مها
همه بسرعه كامو لبسو واجو يركضون
رجعت وياهم كل شويه اشيل واحد وابوس بيهم وهمه فرحانين
دخلتهم وحميت المي سبحتهم وكلتهم وفرشت فراش وتمددت يمهم
حمودي اكو اثر ضربه ايد بضهره سالته
_مها راح اكلج بس لا تكولين
_كول حبيبي
_هاي خالتي ضربتني لان وكعت الجاي 😓
متت قهر كون كسر بيدهه
نرجوسه/خاله ما تخلينه نكوم وما تقبل نلعب وبسطت زيودي لان يبجي وجوعان
بلله هاي من عقله هيج مسويه بجهال
الله لا يوفقهه حوبه اليتامه تطلع بيهه
كمت توضيت وصليت اجو كلهم يمي يصلون وزيودي يتعارك على التربه ههه بعد روحي اشكد احبه يربي
اجه عمو دك الباب
_مها ليش ماخذه الجهال منو سمحلج اني ما اقبل تصرفين من عقلج
_عمو الجهال متاذيين بس اهداء خل افهمك تره اني متعلقه بيهم وهمه هم
_كام يجر بيهم ويصيح انتي ما دايمه الهم
خليني محتار بيهم لا كل شويه مبهذلتهم
اخذهم وراح
بقيت ابجي ليش عمو ماخذ موقف بس اريد افهم لان رحت لامي لو لان بقيت اربع ايام
ضليت بحيره يبقون جهاله ومالي سلطه عليه خل احاول محاوله اخيره واذ ما قبل اعوفهم كافي اهين نفسي
صبحت من ساعه 8دكت بابهم
طلع عمو بس شافني عفس وجهه
مبدل الهم وجاي ياخذهم لخالتهم
_عمو عوف الجهال بلبيت اني يمهم
_مها انتي ليش مصره تهينين نفسج كتلج محد دايم لاحد وانتي من اول موقف عفتيهم وشردتي
_على بختك عمو اني لا شردت ولا عفتهم اني رحت لامي وضل بالي يمهم واذ على الاهانه اني مستعده اتحمله لخاطهم جريت حمودي وطلعت ضهره شوف خالته الحنينه شمسويه بيه لان مبدي الجاي 😓
ظل صافن كام يستغفر خله وطلع وعافهم
بوستهم ودخلتهم سويت ريوك واكلنه وكمت انضف واصخر بيهم وهمه فرحانين رحت اشتريت الهم من المحل
قفلت الباب وجبتهم وياي للبيت
اجت عمتي دكت الباب على صوت الجهال
_اشلونج مهاوي
_هله بيج تفضلي
_اكلج هسه انتي محنبطه روحج بجهال وناسيه روحج ذبيهم على ابوهم هو يبتلي بيهم
_تحجين صدك ذول قطعه من روحي
يتامه مثلي ما افرط بيهم
_اكول عمه امي انطتني رقم تليفون وكالت اتصلي بيه
_اي تعالي اتصلي العصر بلكي تلكين
حراره
مرت الايام ومره الدنيا مطرت قوي واني والجهال كارصين بلبيت وما احس الا ام صلاح جايتني
_كومي مها خل اروح للطم السيد كتلوه😭
_يا سيد وين اروح والجهال اشلون
_ولج يمه مهاوي كتلو السيد الصدر هو وولده وكعدت بلكاع وكامت تبجي بنحيب
_خاله صدك هذا الشفناه بنجف
_اي خاله حسبي الله ونعم الوكيل بيهم
راح السيد اشلون خساره
لبست الجهال ورحنه لبيت ورانه زلم ونسوان تلطم وادك على روسهه
بقينه ساعه ورجعنه ميتين بجي
ثاني يوم طلعت ريم محمله لنجف والضاهر مرجعيهم لان صايره ضجه وممنوع وكله خايفه ومتوتره
كالو صلاة الجمعه بجامع الفلاني
كله راحت وصارت مصادمات بينهم وبين الامن ومره رحت اخابر لامي من بيت عمتي خيريه
اسمعهم يحجون عماد متصادم ويه المصلين ومكسرين اصابيعه
كلت بكلبي انشالله بعد وبعد
منعو الصلاه ومنعو العزيات بمحرم ومنعو الطبخ على الحسين ع
وبدو حمله اعتقالات اول ما بلشو اخذو ولد ام صلاح ولد ام عبد
والشارع الثاني تقريبا كله كرفوهم
ظلت الامهات تلطم وادك وام صلاح ما سكتت بواجي ونحيب على ولدهه
رحنه اني وياهه لعمتي خيريه
_فدوه اروحلج ولدي فقره ومالهم شغل باحد ليش اخذوهم بلكي اتشوفين ابوكم عده عرف يشوفهم
_لا تبجين خاله انشالله ماكو شي هاي الشباب طايشه جاي يسوون بلبله خل يادبوهم
_والله شكلج ولدي مؤدبين ومو من هاي الشباب اسالو عليهم
_اليوم احجي ويه ابونه وبلكي الله يطلعون
كمنه وطلعنه من يمهه واحنه مئيسين وخايفين اشلون منو بلغ عليهم منو جان يتربص الهم
بقينه ننتظر طلعتهم بفارغ الصبر وماكو كل خبر منهم وما يخلون احد يوصل الهم
اجت عمتي لبيتي وكالت صيحي ام صلاح
رحت اركض دكيت الباب طلعت المره مفزوعه وكالت
_ها يمه مها شعدج اول تالي هيج ادكين الباب
_خاله تعالي لبيتي عدي شغله ضروريه وياج
اجت خطيه اول ما شافت عمتي وكعت بلكاع
عمتي كالت /ام صلاح عيوني شجاج اذكري الله واهدائي
_يمه الولد بيهم شي
_لا وداعتج ما بيهم شي بس يحتاج صبر لا تخافين يكول كلشي ما بيهم اكو لجنه تحقيق وياهم بس تكمل يطلعوهم
راحت عمتي وبقت ام صلاح ادك وتلطم وتنعه ما خلت
