رواية ميراث الدم الفصل السابع والعشرون 27 بقلم ليان احمد

عينٌ واحدة،

لكنها تسكن الليل كلَّه،

ترقبُ الشروخَ على جدرانِ الروح،

وترسمُ بالصمتِ نشيدَ الناجين.

كم من نداءٍ دفنتهُ؟

كم من وجهٍ مرَّ فيها ثم تلاشى؟

هي لا تبكي...

لكن الحريق في حدقتها يروي ألف وجعٍ بلا دمعة.

في جفنها المقطوع،

حنينٌ قديم،

وغضبٌ محبوس،

وانتظارٌ لا يريد أن يموت.

--------------

طلعت من البيت .. من رأس الشارع اخذت تكسي 

وطلبت منه يوصلني لدائرة التسجيل العقاري.... 

قويت كلبي .. ورحت افتر بالدوائر وحدي ..واني كلي يادوب راح ادخل ال19 سنة .. بس الموضوع طلع مو بهاي السهولة .. مهما كنت وكحة لكن وكاحتي بداخل البيت .. بس الدنيا خارج البيت تختلف يراد الها شخص جبير وكون يعرف يتعامل وية الناس برة .. 

الشخص الي ما متعود يمشي بمعاملات ودوائر فعلا يضيع ويصير دربة مايندلة .. وهذا بالظبط الي صار وياي .. 

وكف بيه السايق يم الدائرة .. انطيته كروتة ونزلت .. 

دخلت امشي بخطوات متوترة .. الجنطة بأيدي .. خايفة على الأوراق الي بيها .. 

أتلفت على الناس الرايحة والراجعة وكلشي ما اندل .. 

صابتني رجفة .. وحلكي أحسه نشف .. وكفت بنص الدائرة افكر منين ابدي .. أولا لازم أسأل... 

وبعد ما سألت.. موضف .. كال لازم تروحين لقسم الطابو 

رحت متوجها لقسم الطابو مثل ما دلاني الموضف .. 

لكيت هم هواي ناس وسرة ولازم انتضر.. 

كعدت منتضرة دوري .. جنت اتوقع  الموضوع سهل وبسرعه راح يكولولي  كلشي تم .. خلال فترة انتظاري واني اتخيل.. 

راح أحاجي موضف الطابو .. وبمجرد ما اشوفه حجة العمارة .. فوراً راح اكدر اسيطر عليها وتصير الي ولاخواني .. بس نسيت احنه بالعراق واذا ما روحي تطلع مراح احصل على شيء .. وصل دوري بعد انتضار طويل .. 

وكمت حتى اقابل موضف الطابو .. 

السلام عليكم ؟ 

رد عليه رجال جبير تارس لابس نضارات وكاعد وره المكتب ومبين مستعجل يريد يكمل مني حتى يشوف غيري 

                                          

              

                    

وعليكم السلام .. تفضلي بشنو اخدمج .. 

كعدت اشرحله الاسطوانه نفسها .. ابوي متوفي وامي مريضة عقلياً .. و أخواني قاصرين واني الكبيرة .. وإلى آخره .. 

:اشوف سند العمارة 

: اي ..  

بسرعه طلعته السند .. وقدمته اله .. رجع طلب جنسيتي .. هم انطيتها اله 

وبكلبي اكول .. اي أخيراً.. بس ما طلع أخيراً.. طلع اولاً .. ورها لازم افر السبع فرات .. 

نزع نضارته ومسحها ورجع لبسها وطبك ورقة السند ورجعها الي هي والجنسية .وكال .. 

الحجة تثبت أن العمارة باسم والدج .. بس حتى تكدرين تكونين الوصيه عن العمارة وتكون تحت تصرفج لازم اولاً تجيبين شهادة وفاة ولدج .. 

تقرير طبي من المستشفى أن ولدتج مريضاً عقلياً ... 

بطاقة السكن .. اذا ما توفرت  جنسيه الاب المتوفي 

قرار وصاية .. لانج عمرج ما مقبط ال19 يعني كنتي قاصر .. واخوانج قصّر لازم قرار رسمي من المحكمة يثبت انج المسؤؤله و الوصية عنهم  .. وقرار لإسترجاع حقكم 

هويتج هوية اخوانج وبطاقة السكن .. واذا متوفرة وثيقه تثبت أن عمج مستولي عليها .. اذا ما توفرت مو مشكلة وجود شاهد أو شاهدين كافي .. 

كل هذني الي طلبتهم منج  يتخلن بملف .. وترجعين الي .. 

ولاتنسين بما أن ولدج متوفي .. عمامج يعتبرون ورثة بالعمارة  لأن هذه ورث من  اخوهم .. 

يحجي. اني فاتحه حلكي كل معنوياتي نهبطت .. 

اني شلون راح اكدر امشي بكل هذه الأمور .. ومنين الي فلوس حتى اكدر اتحرك .. صفنت صفنه ابو صابر من حيرتي .. ورجع نبهني صوته وهو يكول .. 

بس تكدرين تقدمين طلب رسمي لإيقاف اي تصرف بالعمارة .. مثلا بيع او اي تصرف بيها .. 

وبجميع الأحوال البيع يحتاج إلى طابو .. ومدام الطابو موجود عندج  ماراح يكدر يتصرف بيها  اذا مو بوكالة منج .. 

:زين بلا زحمة كل هذه الأوراق الي ردتها مني .. شكد تاخذ وقت حتى اكدر اوفرها.. لازم شهادة الوفاة .. وما موجود عندي واكيد عمي ماراح يقبل ينطيها الي .. 

: هنا عندج حلين .. يا اما تحاولين تأخذيها من عمج .. أو لازم تسخرجين نسخه منها .. من المكان الي صدرت منه شهادة الوفاء .. المحافظة.. القضاء .. وهذا هم عن طريق المحكمه..  وهم لازم تتوفر جنسيتج وجنسيه اخوانج وبطاقة السكن وايضا اذا ما توفرت .. جنسيه الاب المتوفي تكفي.. 

            

              

                    

: زين بعد ما كل هذه المعاملات تكمل .. راح اكدر استرجع العمارة.. 

: بنتي الطابو .. مجرد نسجل الملكية حسب الحجة الرسمية أما قرار .. ونكدر نوقف اي تصرف بيها من قبل عمج .. لكن الاسترجاع هذا لازم يتم بقرار المحكمة.. 

بهت وجهي.. ونهبطت .. تشكرت منه وكمت .. 

امشي بدون حتى ما اباوع للطريق .. شكد يرادلي وقت حتى اكدر امشي بكل هذه الإجراءات.. شلون اجيب شهادة وفاة ابوي وجنسيته اذا هن كلهن موجودات عد عمي .. طلعت من الدائرة الحيرة ماكلتني اكل .. 

ماكدامي غير بس تلث ايام .. ويرجع هذا العله عليه .. من كل عقلي عبالي خلال اسبوع راح اكدر ارجع حقنه .. 

هواي امور أبالي اريد امشي بيها .. بس الضاهر ماكو شي راح يجي بسهولة .. يرادلي وقت  ويرادلي فلوس .. واني ماعندي غير كم فلس من الي جابهم الي عدنان .. 

يمكن لو سامعة كلام عدنان وقابله نتزوج جان كل هذه الأمور سهلت .. على الأقل هو رجال ويندل ويعرف ويكدر يمشي ويساعدني بهواي امور .. بس هسه اني شنو اسوي .. 

اجيت اعبر الشارع واني صافنه .. 

رفعت راسي للسماء وكلت بتعب : يااااارب فدوة ساعدني وسهل اموري يا اللهي .. يارب كل ما جاي امشي بطريق جاي يصعب طريقي حيل .. 

بثولي وغبائي رافعة راسي واني بنص الشارع .. ماحسيت غير صوت هورن قوووي ...ونضربت ونشمرت وطحت بالكاع .. صرخت من ايدي الي طحت عليها .. 

: اخخخخخ .. صرخت والدنيا افترت بيه حيل دخت .. 

نزل السياق من السيارة وركض الي

: اسم الله اسم الله.. بويه صدددك جذب واكفه بنص الشارع .. ما تشوفين السيارة طايرة 

بثواني الناس التمت داير ما دايري... اني متت من وجع ايدي ومن الفشلة واني ممطولة بنص الشارع ..

والرجال يطمن عليه .. بيج شي بنيتي تاذيتي 

: ايدي ايدي يمكن نكسرررت ورجلي نلوت  .. حجيتها واني ابجي والوج من المي .. 

: كووومي وياي اخذج للمستشفى.. 

: ماريد اريد ارجع لبيتنه ... 

: لا لا بس خل يشوفون ايدج يمعودة لا صدك مكسورة كومي ومناك خابري اهلج  وشنو تردون اني سداد 

            

              

                    

باوعت اله رجال جبير وحتى سيارته تعبانه ومبين على باب الله .. اضطريت اكوم وياه لأن فعلاً ايدي احس صارت تضرب بكلبي من الألم 

صعدت بالسيارة واني ابجي وروحي رايحة .. وداسلها .. وكف يم اقرب مستشفى .. ساعدني انزل .. دخلنه للطوارئ..وبعد الأشعة طلعت ايدي مكسورة ولازم تجبيس 

.. يارب شلون بيه  هسه يضلون بقلق .. لا عندي تليفون. اخابرهم ولا اعرف رقم أحد بيهم .. 

بلشو يصبون بيها .. لو اني صرت اعيط بلا وعي روحي راحت واني وحدي  التفت دائري مدايري الرجال الضاهر ذبني بالمستشفى وطفر .. خايف على روحه ... 

نوب الدنيا افترت بيه واني كلشي ماشاربه ولا ماكلة .. وسكري صعد .. وحرت بروحي 

دخل عليه ممرض يلف ايدي بعد ما جبسوها .. وانطاني مسكن 

:خوية الرجال الي وياي وينه 

: اعتقد راح لأن بعد ما بين .. هو الي كاسرج ؟

: اي دعمني .. بس اكيد ما قاصد هم خطيه على باب الله مبري الذمة.. 

: وشلون هسه تبقين وحدج لو ترحين وحدج وانتي كلش تعبانه وعندج رض برجلج .. زين اتصلي بأحد من أهلج يجي ياخذج تره صعبه طلعتج وحدج انتي تعبانة

: ماعندي تليفون 

طلع تليفونه وقدمه الي .. هذا خويه جهاز اذا تعرفين رقم أحد اتصلي بي .. 

باوعت للجهاز .. هو اني ماعرف اي رقم غير رقم عدنان .. وكرامتي بعد ما سمعني اخر كلام مستحيل يخليني اتصل بي وأساساً هو منو يكول ابغداد .. واجبه يمكن خلص ورجع للبصرة .. 

حاول اوكف على حيلي. اطلع .. بس حيل جنت تعبانه 

كعدت بمكاني مقهورة مهضومة متوجعة .. بهذا عمري واني وحدي ومحد الي .. وحتى الوكت مو زين 

راح المممرض ورجع يفتر عليه .. 

: خويه شلون تبقين هيج .. كتلج اتصلي بأحد من اهلج .. كوليلي الصدك انتي شاردة من اهلج لو شنو بالضبط ؟ 

: نطيني الجهاز راح اخابر .. 

قدم الجهاز الي .. والضاهر مكتوب عليه افتر افتر وارجع على عدنان ... ضغطت رقمة واني حتى كارها روحي .. وخايفه يفشلني .. بس على الاقل ينطيني رقم محمد .. بلكي موجود عندة .. 

دك الجهاز دكة طويلة وقبل ما ينسد جاوب .. 

            

              

                    

: الوو 

بلعت ريكي فشلانة .. وكلبي دك بسرعه مجرد سمعت صوته .. الووو منووو 

: اني عدنان .. عدنان انت وين 

: جاي الم بملابسي باجر الفجر رايح للبصرة  .. ليش وبعدين هذا رقمن 

بجيت حيل بالتليفون.. وصوت البجي خلاه يفز ويكلي بلهفه عكس نبرته الباردة : بسمة شصااااير 

:عدنان اني بالمستشفى وحدي .. وماعندي رقم أحد اخابرة ولا اكدر.اروح وحدي  لان مكسورة وضعي تعبان 

: ياااا مستشفى شنوو. صاير جايج جايج 

نطيت الجهاز للممرض حاجاه وانطاه  اسم للمستشفى 

بقيت بمكاني دمعتي على خدي .. وحيل مهضومة . لأن ماردت اتواصل وياه بعد لو شما يصير .. بس الضاهر القدر مصر يخلي بطريقي ومصر يجمعني بي ويخليني افتر وارجع عليه .. 

اباوع على حالي .. بله هذا حال بنيه عدها أهل وعمام.. واني هنا وحدي محد بحالي .. وعدنان الغريب بس هو يركضلي ..  بعد ما اخذت المسكن عيني غفت 

وفزيت على صوت عدنان يمي .. الخوف تارس صوته 

: بسمله بسمتي  شكسرج 

باوعت عليه الخوف تارس عيونه ... نزلت عيوني من عيونه .. ودرت وجهي 

: اني اعتذر لأن اتصلت بيك .. بس ما اعرف رقم أحد غير رقمك .. والا اني حلفت بعد ما أنزل نفسي الك 

بعد ما كان خايف رجع وكف وباوعلي 

: لو لسانج مسكور بدل ايدج افضل .. بله لا تمضرطين واسكتي  تنزل نفسها الزركة  ام عطوب  شنو صايرة تدورين كرامة وياي من شوكت ؟ 

باوعت عليه ضايجه: شنو تمضرطين شنو زركة ام عطوب  احترم نفسك  ولاتحجي هيج وياي .. طبعا ادور كرامة.. لو نسيت كلامك  اخر مرة .. وهسه طلعتني زركة وتصنف على وضعي شحال لو ما جنت ميت عليه 

: عليمن ميت  شنو قحط نسوان .. وانتي هاي تزوجتي  وبعتيني .. الف وحده تتمناني 

روحي فارت منه : اني ولله صوجي طاحضني لأن حافظة بس رقمك .. صاير كلش ما تحترم

: هسه انتي مخابرتني شنو ترديين تطلعين حركة كلبج بيه  

لو نغثيتي لأن كتلج متزوجة قابل مجذب اني 

            

              

                    

درت وجهي مزعوجة: كتلك ما اعرف رقم أحد غيرك .. من قلة الخيل 

: فوووكاها .. ولج انتي شكد  ما يغزر بعينج .. اجيت روحي مفرفحه من الخوف عليج وتاليها هيج تكولي.. 

عمي انعم الله عليج .. اخخخ اخ شسوي لهذا كلبي الي يركض الج قبل جدامي .. 

: شكرا على جيتك اني بس اريد تساعدني تركبني سيارة اروح لبيته.. 

: وزوجج المصون ويه لعد .. غير افهم شكسرج ووين جنتي  ساچة .. 

: رحت للطابو.. علمود موضوع العمارة .. عبالي أكدر ارجعها.. بس طلعت السالفة طويلة ويرادلي كوم معاملات ومراجعات .. وطلعت مسطورة .. عبرت الشارع .. واني اعبر الشارع رفعت راسي ادعي .. و ماحسيت غير سيارة دعمتني .. والي دعمني جابني هنا وشرد 

احجي وباوعلة وكف فوك راسي متخصر ويستمع ... 

:ورايحه تفرفرين وحدج بالدوائر  انتي وكنازيعج هاي وثوبج الكلف  .. ولله عمي عرمة صدك ...وبعدين اكو اثول بنص الشارع ورافع رأسه ..  حصرج الادعاء الا بنص الشارع .. يعني اوكفي ادعي على الرصيف شيصير .. مايوصل الدعاء ؟.. 

: انتتت شنو جاي ترزلني لو تساعدني .. روح ولي حتى مساعدتك ما اريدها لاخلفه الله عليك ....اني لو عندي موبايل ما جان خابرتك بس حظي مخليني كل ماريد ابتعد عنك يفرني ويرجع يشمرني عليك 

ابتسم وحجى : شوفي القدر مصر يجمعنه بس انتي مصرة تفرقينه .. 

درت وجهي وابتسمت 

: زين انتي عشتو مو على.اساس عروس رجلج الشفية ليش تاركج طالعه وحدج .. وبعدين اكو عروس تطلع اول ايام عرسها .. ما خفتي تنجبسين 

: يااا قنادر ياعروس شبيك انت شنو كلام العجايز هذا تنجبسين  شنو طرشي اني وانجبس   .. تره اي شي من الي ابالك ماكوو. افهم .. وهو اصلا رايح لبيته مو يمي 

: هاااا  طلع مابي خير مع الاسف مو كتلج سابقا اذا افحصه الكاه منتهى الصلاحية  .. 

: استغفرالله ربي و اتوب اليك .. عدنان ولله تعبانه ورايدتك بس تساعدني اوصل للبيت كلشي ما اريد منك تساعدني لو لا ؟

            

              

                    

: لعد المن جاي اني ..  كومي بوية يله .. عمت عيني كون الكسر بجبرية ولا بيج 

:لاتحجي هيج وياي مو تكلي انتي مرة متزوجة وخوية خوية 

: غير اساعد اختي لعد .. اوكفلج هسه حتى تخدميني بيوم عرسي.. لعد الاصدقاء المن ينرادون .. 

وكفت بمكاني احس رصاصة وضربني بكلبي من كال هيج .. باوعت عليه بعيون مدمعة مهقورة .. بلعت غصتي وكتلة 

: أن شاءالله اكيد اوكفلك ... 

: وشرط تباتين يمنه بيوم بعرسي وتسويلي اني ومرتي ريوك بيدج .. 

من قهر كلبي احس روحي صارت تفور  كلامة وما الي عين ارد عليه بشي .. بقيت ساكته وهو كمل كلامه.. 

:اكلج انتي مو تصلين شلون لابسه ثوب لكف ومطلعه كراعينج .. هسه لو حلوات شسويتي  لبستي فوك من الركبه  يمكن .. 

:مالك شغل بيه عود من تتزوج تحكم بمرتك براحتك .. 

هسه طلعت كل هل عيوب بيه الله يرحم من جنت كاتل روحك عليه .. 

:هسه وبعد 

:شنو 

:اكول بسمة ست الحسن والحزن 

غلست على حجايته بس كلش حلو من حجاها و مشيت بتعب وهو يساعدني بلا ما يلزمني .. كوة امشي على رجلي وأيدي ماذيتني. ومشبكه منها .. مشينه لحد ما وصلنه السيارة .. فتحلي الباب الورة وساعدني اصعد وخله جنطتي بحضني جان شايلها هو .. 

:هاج جنطتج .. جنها جنطة الداية ام زكي .. شكبرها 

لخاطر الله شحاطه بيها .. يمكن اذا افتشها حتى فطايس اطلع منها 

: بلا لا تصنف مخليه بيها غراضي اوراق مهمة .. مو راح تذلني .. 

لم ضحكته وراح ركب بالسيارة هو يسوق مادري.اذا هاي سيارتة لو طالبها .. وماردت أسأله حتى لا يكول تريد تفتح مواضيع .. بقيت دايرة وجهي للجامة وهو حرك ومشي .. 

كسر الصمت كال وهو يسحب نفس ويشغل جكارة فتح الجامة .. مرتاحة وياه ؟ 

بلعت ريكي ورديت  

: ماشفت منه شي حتى أقرر مرتاحه لو لا .. كل الي اعرفه .. كارها الوضع كله ومنقرفه .. وافكر باي طريقة تطلعني من هل حال .. مجرد اباوع بوجها تلعب نفسي .. اول يوم .. كعد طول الليل يسكر بالحديقة.. وراد يتهجم عليه بس الحمدلله رب العالمين نقذني منه .. ثاني يوم من صبح راح لبيته .. خلصت من خلقته 

            

              

                    

:عاجبج هل وضع .. الي خليتينه بي .. بعنادج .. شوفي شلون الدنيا تريد تخلينه سوة بس انتي مصرة تخلينه كلمن بطريق... 

نزلت دمعتي بقهر

: بس أمن على خواني .. ماريد شي من دنيا ... وكل الي سويته هو لخاطرهم .. 

:راح اكولج شي .. واترك كبريائي وكرامتي على صفحه وراح اكلج الحقيقة الي احس بيها .. 

لو تتزوجين عشرة .. شايفة شنو عشرة .. ما راح اعتبرج غير بسمه حبيبتي  الي شوكت ما ترديني تلكاني حاضر يمها .. 

مراح اشوفج بيوم زوجة غيري .. مدام انتي بخيالي زوجتي وحبيبتي وكلشي الي .. لأن هذا مو زوجج بسمة زواجج منه باطل ثم باطل.. 

بقيت ساكته وبس عيوني تجري .. وكف السيارة يم صيدلية ونزل .. دخل الصيدلية شوي وطلع وخله علاكة بصفي .. هذه مسكنات ..  

:بيش صارن ؟ 

باوع عليه مستهزء وهز رأسه ما راضي 

: راح تروح للبصرة ؟ 

اتنفس بقوى: المفروض باجر .. والمصيبه احس روحي صارت هنا .. وخايف اروح وتحتاجيني وماكدر اكون يمج بسرعة.. 

:عدنان اريد أكلك شي .. اعتقد عمي صالح هو شامر التهديد بسيارة خالد أو يعني مكلف احد يسوي هيج 

ويه حجايتي داس بريك والتفت الي بسرعة ... شنووو 

: اي ولله .. بيوم الي خطبتني وره ما طلعتو ..هو كام يصيح .. كلعتهم منا وماخلصت منهم .. وقبلها بفتره هو كالي ادري بيج موكلة أميمة تساعدج ترجعين العمارة ..وحجى تلميحات استنتجت منها أن هو الي مسوي هيج .. 

: وليشش هيج يسوووي ليش .. شنو اذيتنه عليه .. جيران عمر احنه ..  شنو غايته ؟ 

: من عرف أميمة جاي تساعدني راح يطيرها هذا خصم الكلام 

دار وجها وصار عيووونه تطلع نار ..  وصفن كدامه  هز رأسه

:.. بسيطه.. بسيطه ياصالح العااار .. 

امي ليل ونهار تبجي. على بيتها .. ابوي تمرض من القهر .. اني تركت دراستي وصرت ادك.عماله .. اخوي من الخوف اخذ عائلة وشرد.لسوريا .. وبالاخير يطلع كل هذا سبب صالح .. بس ما اطلع رجال وشاربي مو على زلمة اذا ما طلعت هل سوالف من عينه .. 

:أكلك ردت اسالك وبطلت  خفت تكول تريد بس تسولف بس الفضول كتلني .. هاي سيارتك لو مشتريها .. 

            

              

                    

اشو هذا بعد كان عصبي نفجر من الضحك لدرجة صار يكح .. الحمدلله والشكر انفصام مو ستوة عصبي ..

:تره ما كتلك نكته .. سألتك سؤال 

مسح عيونه والضحكه بعدها بوجها

: شنو سيارتك لو مشتريها .. متأكدة من تدعمتي ما طحتي على راسج .. وبعدين من شوكت صايرة من تردين تسألني شي  تفكرين وياي بهل طريقة ..

:وهو اقصد.يعني سيارتك لو شنو 

:لا ماعندي سيارة هاي مال ولد ويانه بالدوام من اتصلتي بيه اخذتها منه .. 

: حاولو ترجعون لبيتكم .. مجرد أحسك قريب هل شي كافي يحسسني بالأمان 

:راح نرجع ولله نرجع .. والا اعلم صالح درس ماينساه 

الطريق صار كلش كصير لأن تمنيته ما يخلص .. بس للأسف خلص .. وصلت للبيت .. بس ما وكف السيارة كلش بالباب ..  بس فتحت عيوني من شفت سيارة سمير واكفة بالباب مال بيت .. طلعت مني فجاء .. 

: هذا شجابه مو كال بعد اربع ايام يله اجي 

باوع السيارة ورجع باوع الي

: شنو جاي للبيت 

: الضاهر هيج .. سيارته واكفة بالباب .. 

ياربي ماريد انزل وأشوف خلقته ولله 

: خل يولي لاتنزلين روحي لبيت جدج ودخلي بغرفتكم يم اخوانج 

: اخواني يمي بالبيت لازم انزل ..  بقى يباوع الي من المرايا .. وبقى ينافخ.. 

نزلت بصعوبه وعدنان بقت عينه وراي وطابك حواجبة .. وصلت لباب بيتنه وهو بعده واكف.. قبل ما افتح الباب وادخل باوعت عليه نضرة أخيرة.. 

دخلت للبيت محد موجود بس سمير كاعد بالاستقبال .. شافني من دخلت كام بسرعه واجاني عاقج وجها من شافني .. سألني 

:وووين جنتي دايحة ... شاف ايدي 

وهااي شبيج مكسرة 

رحت تمشيت للقنفه وكعدت متألمة

: جنت رايحه للسوك اجيبلي كم غرض .. بالطريق سيارة ضربتني .. وشوفت عينك.ايدؤ نكسرت وكل هذا الوقت اني بالمستشفى الناس الغريبه هي وكفتلي .. 

:ماااطلع عليه عرسسس هذا اسود ومصخم .. اول يوم عندج عذر وهسه مكسرة  وبعد شوف شكد يله تفتحين ايدج ...انتي مصايبج وياي متواعدة ؟ 

            

              

                    

: هذا كله عقاب من الله لان اخذتني غصب وصرتو تبيعون وتشترون بيه انت وعمي 

: عمج هو الي باااعج موو اني هل كلام اله كووولي مو الي .. ذبج علية  وكلشي ما مستفاد منج .. لعد ما انطاني اختج شو جنها جمارة وين جانت مضمومة .. 

فتحت عيوني مخترعة وصرت أتلفت .. سلوووى وين 

: اخذت اخوانج وراحت بس شافتني صارت ترجف وشردت .. 

:شجابك.انت.اليوم  مو كلت ما اجي فد اربع ايام 

راح شمر نفسه على القنفه مبين ماله خلك يتعارك : تعاركت بالبيت وطلعت.. اروح هناك ذيج تنك فوك راسي .. اجي هنا الكاج انتي كالبه الخلقة ومكسرة ...

تركته ورحت للغرفة سديت الباب وساعدت نفسي كوة يله كدرت أبدل ملابسي ورحت مددت على الجرباية  

حاولت اغمض عيوني .. ارتاحيت من سلوى ماخذة اخواني ورايحة ومابقت كدام هذا .. 

بس ارتاح اروح الهم ... غمضت عيوني من تحركت متألمة 

هسه منين طلعت الي هذا السالفة مال كسر .. ابد مو وقتها .. لازم اروح احاول اطلع تقرير طبي لأمي .. ولازم اكدر احصل على شهادة وفاة ابوي .. ولازم اكدر احصل على قرار وصاية .. وشلون اسوي كل ذني مجاي اعرف ..

يرادلي فلوس ويرادلي وقت .... لازم اكدر احصل على كل ذني قبل ما أقدم بلاغ ويوصل لعمامي .. حتى اكسب وقت .. الله يعلم يمكن كسر ايدي هذه هو رب العالمين اله بيها اردة .. حتى يكون الوقت بصالحي .. 

بس ارتاح يومين .. اروح للمستشفى .. الي بيها امي .. 

بس شهادة الوفاة شلون ؟ الاوراق المهمه كلهم بجنطة بغرفة بيت عمي صالح ..  لو بغرفة صادق ممكن بيها مجال واكدر اخلي محمد يجبيهن .. 

من بين صفناتي غفيت ... هم تعبانه وهم جسمي مكسر .. 

فتحت عيوني .. الغرفة ضلمة .. وصايرة الدنيا لليل .. واني كل هذا الوكت نايمة .. 

كمت طلعت من الغرفة اباوع بالبيت سمير ما موجود.. طالع .. باوعت الساعة ب8 وربع .. رجعت اخذت علاجي قفلت البيت وطلعت .. رايحه لاخواني .. أعرج من رجلي  وأيدي ملفوفة وجسمي كله يوجعني .. كوة وصلت للبيت ودخلت 

بوجهي لغرفتنه .. لكيت اخواني وسلوى كاعدين يتعشون .. بس شافوني طفرو بخوف 

سلوى: هاااي شنو بسمة شصايرلج .. 

كعدت تعبانه

: اسكتي يمعودة ندعمت واني طالعه من الدائرة .. وصار الي صار .. والرجال وصلني المستشفى واختفى 

            

              

                    

: وشنو ألي دعمج اعمة .. مايخاف الله عافج وراح .. 

: لا شبيج  هو مبين رجال فقير ويركض على العيشة وسيارته زين منها وتمشي تلكينه خاف  يتورط مبري الذمة.. اني هم غلطانه 

.. سودة عليه حبيبتي سلامتج .. مددي وارتاحي .. 

:لا اريد اتعشى جوعانه .. 

جرت الصينيه قربتها يمي وكعدت اكل .. وبعد الاكل شربت مسكن .. 

بسمة: شوكت رجعتو هنا 

:بس اجة رجلج .. ما بقينه.. بسمة ؟ 

:ها 

: رجلج يخوف.. تدرين يباوعلي هيج مدري شلون بس كلش نضراته مو نضيفة .. 

ركزت وياها وهي تحجي وسألتها:احجيلي شنو صار 

:من دخل اني تفاجئت لأن انتي كلتي ما يجي .. دخل من باب المطبخ 

سمير: منو انتي ؟ 

اني تفاجئت والصدك حيل ارتبكت ... اني سلوى اخت بسملة 

فصلني بنظرته من فوك ليجوة وعيونه تريد تطلع من مكانها 

: بسملة عدها هيج اخت وذبوها عليه .. اشو انتي ولا تشبهيها .. 

:شلون يعني .. 

: يعني انتي بيضة وحلوة وجهج بشوش عكسها هي الي كل ما اشوفها جنها أرملة شايلة هموم الدنيا على رأسها .. 

:ليش هيج تكول عليها بسملة حلوة .. 

:بس اني احلى بهوواي منها .. احتركت روح صالح  وين جان ضامج .. 

اني من هذا كلامه احس كلبي وكع برجلية طلعت فوراً من المطبخ وراح يمشي دخل الاستقبال .. 

اني بسرعه جريت اخواني حتى اطلع .. هذا صاحني من الاستقبال .. سلوووى 

باوعت عليه من الباب .. نعم 

:شنو وين رايحة. تعالي كعدي يمي بالاستقبال خل اتعرف عليج اسولف وياج 

:لا لا لازم نروح هسه .. 

خليته يصيح وراي وطلعت من البيت ركض احس كلبي وكع من الخوف ولله لو باقية أكثر يمكن حتى يسوي بيه شي .. الله يساعدج بسملة هذا شلون راح تعيشين وياه .. 

:الله لا يوفقة هل نكس.. زين سويتي من رجعتي بسرعة .. بلكي ينكلع واخلص منه .. 

بتت يم اخواني  ومارجعت للبيت .. الكل نام الا اني .. متأملة احصل على فرصة وحدة اكدر من خلالها افتح كنتور صالح .. وادور بالاوراق .. 

طلعت من الغرفة اتسحب .. بعد ما الكل راح بسابع نومة والي خدمني جبرية تنام بالاستقبال يم رجلها .. والغرفة تبقى فارغة .. صوت الشخير مال جبرية وصالح طالع من الاستقبال.. رحت اتمشى بهدوء حافية .. ودخلت غرفتهم بابها كان بس مردود.. 

وكفت بنص الغرفة أتلفت اريد ادور المفتاح مال كنتور .. بس ضحكت بلا صوت واني اشوفه معلك بالقفل ما باب .. وما مضموم ..

على كيف كلش وبحذر فتحت الخانة  بيها جنطة الاوراق ..  الكنتور خانه وحدة وتلث رفوف الرفين الجوة غراض مو مهمة والرف الاخير بي كوم اوراق وصور  وأكثر من جنطة .. صعدت على الخانه حتى اكدر اجر جنطة الاوراق .. والحمدلله طولي ساعدني وجريتها فتحتها  اتاكد قبل ما اخذها واطلع ..  طلعت الغرفة بسرعه ورجعت لغرفتنة سديت الباب وكعدت كومت كل الاوراق وبقيت اقرة بيهم وحدة وحده 

دورت أكثر من ورقة لحد ما وصلت للورقة الي أريدها .. بس كانت أكثر من ورقة مطبكات وحده بطن وحدة  شهادة وفاة ابوي  وجنسيته.. ورقة ثانية قريتها واتفاجئت منها .. 

جمهورية العراق

وزارة الصحة

دائرة صحة بغداد / الرصافة 

مستشفى للطب النفسي (الشماعية).. الخ 

بقيت اقرة واني متعجبة .. تقرير طبي لأمي يثبت أنها غير مؤهله لرعاية ابنائها أو أموالها .. 

عمي صالح .. يعني هو مطلع تقرير طبي لأمي.. زين ليش وشنو الفائدة شوكت .. 

هل ورقة الي قريتها دفعتني للفضول حتى ادور بعد بالاوراق... وبعد ما بقيت افتح بالاوارق  واقراهم .. عيوني أحسها طلعت من وجهي واني اشوف ورقة مكتوب بيها  .. 

... قرار وصاية ...