رواية تحت ظل السعف الفصل الثاني بقلم ميار
دنيا وراها الموت وانا اصفنلها شكثر ذلت ناس
. والله اله اذلها ...
دنيا تحلفت بيه وانا الها ورادت كون اطخلها
،وانا الها وحق سادت بني هاشم،
وانا اله ما اكول اخ لو تنطبك بيه
__♚___
للتعريف عن عوائل ابطالنا
اولاد سلمان (الجد)
جاسم
خالد
حمدان
محمد
ابتسام
وسهام
وبلقيس
عائله جاسم
فرات
عمر
عماد
مهى
رحاب
عائله خالد فقط ريام
عائله حمدان
فراس
غسان
ميسون
مسره
عائله محمد
وسام
وحامد
وحسين
وريتاج
ورباب
عائلة ابو جهاد
الاب احمد
الام ابتسام
جهاد
حارث متوفي
معاذ: متزوج بنت عمه
زياد
فاطمه تؤم حارث متزوجه ابن عمها
مروى
تبارك
___♛___
مروى:: كعدت على صوت الباب المطبخ كمت اشوف منو
دحكت على الساعه بالاربعه الفجر توه ادخل المطبخ وصار
جهاد بوجهي جفلت حطيت ايدي على گلبي خايفه هو راح
جاب كلاص مي ويشربني مي ويمسح على ظهري بخف
جهاد:: شجاج يا يابه شكعدج هسه
مروى:: كعدت على صوت الباب
جهاد:: يلا بويا روحي نامي
-وين رايح
- رايح للكيعان ويا الولد
مروى:: عافني وطلع بعد ماكدرت انام طارت نومتي كمت شفت امي عاجنه سويت الجاي وانتظرت يأذن حتى اصلي سمعته
يأذن كمت توضيت بين ما كمل الاذان وكفت اصلي
كملت صلاتي و شجرت التنور ورجعت شنكت
العجين بين ما يهفت التنور وطلعت اخبز توه يكشف
الجو والجو يخبل داير ما داير بيوتنا شجر ومن جهه
بيت جدي سلمان البستان الي جهاد روحه بيه دائما
نلكاه كاعد جوه الشجر كملت خبز وتوه اريد ادخل
سمعت صوت سياره شخطت وكفت عفت الخبز وركضت
اشوف من الباب مديت راسي ادحك اشوف نزل خالي
محمد و ابنه وسام واكو احد وياهم بس من وره السياره
ما اشوفه راح خالي على بيت خالي جاسم يدك بالباب
واعصاب ويغلط ويسب و وسام وبس يهدء بي وعلى صوته
شفت اخوتي وياهم حامد وفرات جو يركضون دخلت راسي
خفت يشوفوني علّى صوت خالي محمد وصوت خالي
جاسم والولد طلع ابوي يركض فتح الباب وركعه بقوه
وامي واكفه ادحك بخوف وتهمس صوت مو مسموع
بقو ساعه يتعاركون واصواتهم عاليه وما عرفنه شكو.
زياد: كعدنا اخونا العود جهاد من الفجر حتى نروح نشوف الكيعان ونساعد الولد طلعت گبله يارب جمعه
وما يخلونه نرتاح شويه ولحكني وصلنا لكيعانه جان
معاذ وحده الجو بارد وهذا رجليه بنص الساكيه
تعاونه كل واحد بجهه ولد خوالي كلمن وكاعه يشتغل بيها للسته يلا كملنا طلعنا تنمشى للبيت
جهاد يمشي گبالي والكرك حاطه على جتفه ويمشي
برهاوه جن الكاع كله لابوه ما مهتم لحكنه فرات
صار بسد جهاد يتمشون وهذا هم فد واحد كاره الدنيا
ويا ما وصلنا قريب من بيوتنا ونسمع صوت خالي محمد يعارك جهاد ذب الكرك وركض بكل حيله واني
وفرات نركض وراه نريد نعرف شكوو لكينه خالي محمد گاضبلك خالي جاسم ويعت بي ويغلط وابوي
وعمر و وسام يحاولون وياه بس وين فاقد وانوب هذا جسوم السانه زفر ما خله غلط ما غلطه وبس سب
خالي خالد ما نحس غير جهاد لطخه بوكس بنص وجهه انوب تعال حل السالفه كلها تعارك ومحد مفتهم شني السالفه لحد ما صرخت جديتي
الجده حسنه:: كااااافييي طيح الله حظكم كووايد
فضحتونه وانت محمد شجاكك انجلبت من الصباحيات
احمد:: ابو وسام خير شصاير ومنو هاي؟
زياد: التفتنا كلنه على ابنيه واكفه بسد السياره
متلثمه بشماغ وفوكاه العبايه بس عيونها امبينه واحد ظل يدحك بوجه الثاني ما مفتهمين شني صارت عيني على جهاد الي عيونه راح تطلع من مكانها همس
بشي مو مسموع درنه كلنه على خالي محمد نتفتهم
»«»»»»»»»
ريام: درت وجهي وفتحت عيوني وطلعت الشهكه من نص گلبي واني اشوفه كدامي عمي محمد عرفته لان يشبه ابوي
بشكل ركضت عليه وبلحظتها تخيلته ابوي هو فتحلي ايديه
ذبيت نفسي بحضنه اشهك وابجي بصوت احرر دموع من
اسنين ضامتها وخرني من حضنه يبوس راسي واجه غسان
وكفت مستعجل بس حط علاكه بيد عمي ودار عليه وحجه
غسان:: مثل ما كتلج خويه ديري بالج على نفسج
واذا جيه ابوي وسألكم على المستمسكات كولو
مو يمنه ريام خلي ابوج بعين عيونج انتي تندلين
الدرب الصح وين اختي الغالية في امان الله عمي
ريام:: عافنه ورجع يركض عيني عليه لحد ما صار بالظلمه
سحبني عمي يصعدني بالسيارة وصعد بسدي توه جر
ايده صحت متوجعه وسحبته منه وبيدي شماغ ابوي
محمد: شبيج عمي؟
ريام: عمي حمدان ضربني
محمد:: حجالي غسان سهله عمي بس خلي نصل البيت
اليوم احرك ابو غسان الجلب اسنين من دربونه لدربونه
وسام:: على كيفك يابه خلي نفتهم
محمد:: شتفتهم. ولللكك حتى گبر مسويلها عليش
شنو غايته لا هو حاب اخو ولا هو حاب بنته مشوفه
الويل بس بسيطه واذا ما طلع جاسم اله ايد عاتبني
شو بويا خلي اشوف ايدج وجهج دحكي عليه يوجعج
ريام: فتح گلوب السياره وجر ايدي يدحك مزركه وجهي
بس زراگ خفيف بس ما يدري جسمي صاير عباره عن
طگع زرگ جرني لحضنه حسيت بدفو وحنان من اربع اسنين ما شفته غفيت ما ادري شكد مشت بينه السياره
فتحت عيوني وادحك واكفين بسد مطعم رفعت راسي
شفت ابنه جاي وعمي كاعد يدحك من الجام السياره
عيونه حمر صعد وشغل السياره ومحد منا حجه شي
لحد ما وصلنا قريب القريه عدلت كعدتي وكلام غسان
يرن براسي ذبيت العبايه على جتفي وكوه كدر ارفع
اشماغ ابوي ولفيته فوك الحجاب والطرف الثاني
لفيته على وجهي الثام بس عيوني اتبين عبرت السياره
بين الشجر والرزع لحد ما وصلنا ساحه داير ما دايرها
بيوت وكف بسد باب بيت جبير ونزل عمي بعصبيه
وراح يدك الباب بقوه ويغلط ويحجي كلها التمت علينه
وشفت الولد جو يركضون ما عرفت منو لحد ما عمي جاسم سب ابوي و واحد منهم ضربه بوكس وصارت عركه
جبير اني كوه سندت نفسي على السياره جسمي يون من
الألم طلعت مره عجوز ما عرفت منو صارت تحجي عليهم
لحد ما زلمه يطلع بعمر 50سنه التفت عليه وسأل
احمد:: ما تحجي محمد منو هاي؟
محمد:: ريام بنت خالد
ريام:: ادحك بوجوهم كلها مصدومه واني عيني ادور
شخص واحد شخص جان دائما ابوي يوصيني بي لحد
ما صارت عيني بعين جهاد شفت صدمته لا تقل عن
صدمة البقيه واني بقيت ادحك بوجوهم وكلام غسان براسي ما احس جت العجوز شبكتني وتبجي وتعاتب بيه
-يايمه وين جنتي ابنية خالد يمااا روحيتي هذه ريحة الغالي عمت عيني عليك وليدي وينج جده وين جنتي
محمد:: جانت بيت حمدان ابنج العار
جاسم:: شلوون ولك مو كال ماتت
فرات:: عمي تره صطردتنه شسالفه وليش تهجمت
على ابوي شدخله وين جانت وشلون وصلتلها فهمنه
الجده:: ولك يمه ما تحجي تعالي يمه ابنيتي تعالي
ابنية الغالي
محمد:: اني احجيلكم بس ما اندخل المضيف
جاسم:: محمددد وكته هذا الحجي
احمد:: على كيفك ابو فرات نفتهم تفضل ابو وسام
نكعد ونتفاهم
ريام:: سحبتني وياها وهي كوه تمشي من طريقه كلامها
عرفتها ام ابوي دخلنا لمضيف وكعدت وكعدتني بسدها
التفتت عليه توه تمد ايدها على الثامي لزمت ايده ونترتها
الجده: خلي اشوفج
-مو اهنا حجيه حجيتها ورفعت عيوني كلها عيونهم
عليه ما افتهمت لان ما كلتلها جده لو مستغربين وجودي
محمد:: گبل جم يوم خابرني واحد افتح اتصال
ما يرد لحد ما اول البارحه جاوبته اريد اعرف منو
-انت منو وشتريد
غسان:: انت محمد السلمان ال....
-نعم وصلت تفضل
غسان:: عمي انت وحدك ماكو احد يمك
محمد:: ياهو انت وشتريد
غسان:: مو وكتها عمي اروحلك فدوه صير على صفحه اريد احاجيك المسألمه حياة او موت
محمد:: احجي بويا وحدي
غسان:: عمي احلفك ب الله ورسوله يظل بينه
اريد اعرف. منو وصي على املاك اخوك خالد
محمد:: وشعليك غير افتهم منو انت وشعندك
ويا خالد وشدخلك بأملاكه وشني وصي غير اعرفك
غسان:: اني محامي اخوك حمدان وكلني حتى ارجع
اسجل املاكه بأسم بنته الوحيده واني الي طلعتلها
الراتب
محمد:: يابه البنت ماتت وره ابوها بيومين شتحجي انت
غسان:: لا والله عايشه. وشفتها بعيني ابيته واني
بيدي طلعتلها راتب ابوها وعمي البنت معنفه
البارحه اخوك لازمها مورمها خافو الله بهليتيمه
وتعال اخذها بنت اخوكم راح تموت ويريد يزوجها
محمد:: وين هو تندل بيته شلون اوصله
غسان:: بيته بغداد منطقة...... بس تسأل ابو الاسواق هو عنده شراكه ويا ومعروف ابو فراس
فرات:: عمي شي ما يشيله العقل بعيني شفت
گبرها صدك جذب كل هاي السنين وتطلع عايشه
زين شنو مصلحته ضامه علينا ما جاي افتهم
جاسم:: حمدان سالفته ما تسولف تصل بي
اموت البت ومسويلها گبر بس حتى ما ناخذها
احمد:: زين شلون كدرت تاخذها؟
محمد:: المحامي ساعدني كال من تروح للمدرسه
وصدك بقيت انتظرها البارحه من رجعت اخذتها
وفهمتها بهيج وقت تطلع من البيت واني اخذها
الجده: حميدان لازم تحاسبونه ما ارضى عليكم
اذا ما جبتو لجوه رجلي فاااهمييين
ريام::شكد حجو بس كلامهم حسيته بارد بس عمي محمد
اشوفه اعصابه تلفانه وفرات هم درت وجهي انتبهت جهاد
ماكو رجعت نضري على فرات شكد متغير سكت الكل
كام عمي محمد وسحبني وياه والتفت الهم وحجه بنتر
محمد:: من هليوم محد اله حق على ريام تبقى
ابيتي حالها من حال بناتي والي يمسها بمي امسه
بدم
الجده:: لا تعيش يم جديتها هاي حصتي اريدها اداريني
محمد: عندج من يداريج هاا بابا ريوم تجين يمي
ريام:: هزيت راسي اي ولزمت ايده وهو ابتسم وجرني
وطلعنا واسمع اصياحهم بقى بالمضيف وبداخلي اتحلفلهم
دخلنا لبيت بسيط من جهه كن دجاج والجهه الثانيه خضراوت صوت البنات يضحكن حط ايده على ظهري
رفعت عيني عليه وجهه البشوش وعيونه الحمر من العصبيه
اشرلي امشي مشيت وره وكف اباب المدخل وصاح..
- ريتااااج ربابب وينجن
رباب:: هيانه يابه جيت
ريام:: طلعت بنت امبينه اكبر مني تلگت ابوها حبته
وبس انتبهت عليه تفاجئت وارتبكت جت سلمت
وتباوسنه وهي مستغربه التفت على ابوها تريده يحجي
ويا ما راد يحجي طلعت مره متوسط العمر متروسه
وراها بنتها تفاجئت بوجودي مستغربات وحده ادحك
على الثانيه واني خجلت من نفسي شكد استصغرت
روحي نزلت راسي وعمي ما خلاهن يلحكن يسألن
گبل جاوبهن و وجه الكلام لمرته
محمد:: ام وسام هاي ابنية خالد اخوي الله يرحمه
-شهكت بصدمه متفاجئه ومو مصدكه
امنه:: صدك عودينه هاي بنية خالد عجل مو كالو ماتت
محمد:: بعدين بعدين افهمج بابا رباب انت واختج
اخذن بنت عمج ترتاح وانطنها من ملابسجن بين
ما تطلع امج تشتريلها وانتي ام وسام لحكيني وحضرن
الريوك
امنه: صارر يابعد عيني رباب يمه حضري الريوك
وريتاج اخذ اخيتج ترتاح يلا يمه روحي ويا خيتج
ريام:: مشيت وره البنيه دخلت الغرفه مستحيه
وحتى ما اعرف احجي وياها بقيت واكفه انتظرتها
هي تكولي اكعدي انوب هي صافنه بوجهي تتفحصه
وما احس غير جرتني من ايدي تكعدني بحماس وتسولف
ريتاج:: كعدي كعدي سولفيلي وين جنتي ولج كل هاي
المده وخر الثامج اشوف خرررب بيومج عيونج تلسب
العقل يماااااي شكد حلوه وخري وخري الثامج شنو امبوشه انتي ويعني جنتج بالمكبره لو شنوو احجيلي
ريام:: انصدمت انهدت بيه بالاسئله سحبت الشماغ
من وجهي ورفعته وجهي ادحكلها بس شهكته خلتني
اشك حتى بروحي ردت فعلها خلتني انسى كلشي متت ضحك
ريتاج:: يااااا خرررب شكد حلوه صلوات صلووواتتت
بنت عمي ولج هسه ما يبقى واحد ما يخطبج خرب
حظي وين جنتي ولج شوفي ريمي من هسه بالاول
شكد عمرج حتى اعرف اتصرف ياااارب اكبر مني
ريام:: متت ضحك عليها شكد لغت عمري 17
ريتاج:: حلوووو العب بيها يابو سميره لعد رورو من
هسه شغل البيت عليج وعلى رباب انتن الكبار دللني
اني طالبه ثلاث متوسط وراي وزاري واخيتج الصغيره
والله ادللج اسويلج فد لفة كباب عروك الا بشده اتفقنا
-هههههه اتفقنا
ريتاج:: لا لا حبابه تعالي انطيني حبه من هل گيمرات
امححح قشطه وعسل وحليب هوايش وروبه وداعتهم
ريام:: هههههه والله انتي الحبابه شكرا على كلامج
ريتاج:: ادللي بس اشتغلي ابدالي
رباب:: ياا هاي بعدجن كاعدات ولج ريتاج عوفي البنيه ترتاح
ريتاج:: ما عليج غير هي تسولف وياي
ريام:: بقن يداهرن وجت رباب انطتني ملابس واخذت اختها
وطلعت حطيتهن بحضن وصافنه عليهن صح ملگاهم حلو
بس يابه والله ثجيله عليه اني وين جنت وين صرت لو ابوي
بقى عايش لو عندي ام لو عندي اخ حياتي ذل بذل ليش
بنت ما تعرف شكل امها من اصفن على روحي شلون عشت
واني بعيني شفت ابوي ينكتل جدامي والله حتى ما اتذكر شي من هل 4اسنين تنهدت وكمت قفلت الباب ونزعت العباه وبدلت شبه تعودت البس من احد رغم الدشداشة
الي انطتها الي رباب امبين مخيطه جديد لفيت شالي وشلت ملابسي اندك الباب فتحته صارت رباب بوجهي مبتسمه
رباب:: ابوي يكول خلي تجي تتريك
ريام: اي بس وين اخلي ملابسي
-جيبيهن انحطهن بالحمام عود وره الريوك نغسلهن
ريام:: اخذتهن مني وطلعنا لكيناهم كاعدين عمي ومرته
واكو ولد اثنين بس ما رفعو روسهم ودحكو عليه بس اني
ارتبكت وبقيت واكفه بمكاني لحد ما عمي دحك عليه
محمد:: تعالي عمي تعالي
ريام: -رحت كعدت بسده خجلانه منهم
-عمي هذا وسام عرفتي الي جيه وياي وهذا حسين
يا ولد هاي بنت عمكم خالد ومن هل يوم عينكم
على اخيتكم حالها حال خواتكم اريدكم الي يمسها
يمسكم وام وسام انتي والبنات ما اريد يوم اسمع
احد غاثها هاي عزيزة ابوها وبس هي بقتلي من
ريحته هالله هالله بيها وبابا ريوم هذا بيتج لا تتقيدين
وسام: لا عود عليش تتقيد ابدد والله هاي جدامج
ريتاج هم من تضوجين كفخيها انتي تنسعدين
ريتاج:: شنووووو وعليشش يابه تايهتلكم شفت شفت
حسين:: استللللم بعد ما تسكت عمي شعدنه
غيرج صدك جذب بصل فجل بيتيه بيذنجان
محمد:: هههههه ولكم عوفو رتوج هاي اخيتكم المدلله ما ارضي عليه يلا بابا ريوم تريكي ابنيتي
وسام:: واحنه نتريع وراج
-هههههههههههه
ريام:: عايلتهم تخبل مرحين كلش حتى امهم عدهم بس
رباب وحامد هادئين وره الريوك من جيه مدنك وكوه سلم
وطب بدل وطلع التهيت ويا البنات حبابات وعمه امنه نسمه هدوء وحنان كعدت على الصبه الخارجية ادحك
على السما الجو بي بروده صح مشمس بس هوى بارد
ادحك على النخل محاوطه بيوتهم جو القريه حلو ريحة
الاشجار هوى نقي بس وين اني احس هواها جاي يخنگني
من تخطر ابالي بهاي القريه انهان ابوي وانطرد اكثر من مره
واخر لحظاته جان بيها كلامه من رجع وهو يكول لحارث
ترن براسي مهضوم منهم والتعب عيونه الحمر وحتى مدمع
غمضت عيوني استذكر كلامه ولحظاتي الاخيره تواسيل
حارث لابوي
حارث: خالي فدوه والله مو هيج اتفاقنا والله غدرو
بيه بس تعال هاي هي لا تراضي ابوي مو كالو ارجع
لبيتك فدوه خالي امسحه بوجهي عيوني خالي
خالد: حارث ولك حاررث ولك هانوني اني اني يگولون
عليه **** ولك اني بنات عمي ما حطيت عيني بعينهن
همه ولك همه زوجوني لخاطر ارضي امي اذاني ابوك
اذاني حارث وسفه وحسافه ووسفه اخخ ولك يابوي
والله لو جاتلني ولا داز عليه جدام الاوادم روح ودير
بالك لا انت ولا جهاد تجوني بعد رووووحو انتهت ويا
ابوك انتهت
حارث: خالو والله من وراها هي وجديتي زوجتها
الك حتى تخرب بينكم لا تزعل دمعتك تحفر بگلبي والله
خالد:: هذاا عذررر ولك 14سنه يصد مني لان تزوووجتها عذررر هذا انا غلط مو عفتها لخاطره
ولك يريدني اذب بنتي وعمرها يووم ابوك ما بقى نفسه..
ريام:: فزيت من انحطت ايد على جتفي مسحت وجهي من الدموع والتفت عليها ابتسمت وكعدت بسدي
امنه:: شبيج يمه ليش تبجين وهاي شبيها ايدج
-ما بيه شي هاي عمي ضربني حجيته والغصه بلعومي وبنفس الوقت ما اريد ابجي جدام احد ما احس غير جرتني من ايدي وحطت راسي بحضنها الحضن الي
اسنين مفقدته شبكتني وتمسح على راسي واني بعد
ما سيطرت على دموعي كمت ابجي بقهر وهضيمه
شكو قهر جان مكبوت بصدري طلع اريد اسكت ما اكدر شعور مفتقدته جان حتى البجي محرومه منه بجيت
الا احس راسي انفطر وخرتني وبيدها مسحت دموعي
امنه:: كافي يمه ابنيتي لا تنقهرين ابد البيت بيتج
وعمج هم ابوج واليوم العصر اخذج ونروح للسوگ اشتريلج اهديمات هم بعد جم يوم خطوبة وليدي حسين حتى تفرحين لاخيج هاا يلا امي انتي ابد بعد ما اريدج اشوفج تبجين يلا يمه
دكومي يم البنيات حضرن الغده هسه يجون ابوجن واخوتجن
ريام: كمنا دخلنا للبيت جانن البنات واكفات بالباب ودموعن تجري ضحكت عمتي عليهن وهنه يمسحن عيونهن وجن حضنني
ريتاج:: متت بجي والله عفيه بعد لا تبجين
رباب:: اي والله انتي اختنا بعد لا تنقهرين ابد فدوه
ريام:: حياتي شكرا لكلامجن
امنه:: يلا بنياتي حضرن غداجن
ريام:: رحنا نحضر الغده واجو عمي و ولده وكعدنه نتغده وهمه خطيه محد يرفع عينه بس اني استحي لمتهم تخبل وكلي امل تتحسن حياتي
♡♡♡ ♡
مروى:: جنه كاعدين بالطرمه دخلت جهاد وجهه مختنك
كعد على الدجه مالت الحوض ورجع غسل وجهه فرك
وجهه امبين عصبي حيل ركضت جبتله مي وانطيته اخذي
مني بدون لا يحجي وكفت يمه دخل زياد جيه وكف يمه
زياد::جهاد شبيك عرفتها موو
- بعدما مجاوب جتي امي تركض تريد تفهم شكوو
ابتسام::ولك يمه شصار شبيهم خوالك شصار
جهاد: حجيت مو كتلكم والله عرررفت عرفت الجلللب حمدان وراه شي يفتررر من ديره لدديره
زياد::على كيفك جهاد
جهاد::ولكك هيج قباحه وحقاررره ماشفتت
عفيه گلب ولكم بنت اخوكم اسويلها گبر وهي عايشه
انعل....
مروى:: وكفنه اندحك جهاد نارر عصبيته تخوف وما افتهمنه على شنو يحجي دفر الباب وطلع وزياد راد
يلحكه وامي جلبت بي تريد تفهم منه شكو وصدمنه من كال..
زياد::خالي محمد اكو شخص مخابره وكايله
بنت خالي خالد عايشه ورايح شايفها وجايبها
ابتسام:: ياااا ولك يمه خاف جذب منو بنته
زياد::يمه رحمه على روحه ذاك الاب الطيب غير
جنها عيون خالي وداعت الله وجهاد گبل عرفها
مروى:: انصدمنه وامي مثل الما مصدكه زياد هز
بيده وطلع وبقت امي تحجي على خالي حمدان
ابتسام: ابتر ايدي اهاا مناي اذا ما طلعت
اسعيده هي الي ضمتها ياا اربع اسنين
كون الله شالها سعديه ام المشاكل ولجج
لا تصفنين روحي جيبي عبايتي خلي اشوف امي
مروى:: يمه وين رايحه خاف يجي جهاد ويزعل
-ولي ليش بكيف جهاد اروح اشوف امي يلا عابت هلوجه انوب يردون يحرموني من امي هسه انقهرت
مروى:: عفتها وركضت جبت عباتها اخذتها وطلعت طلعت
تبارك وبيدها النستله والكتاب وادحك بستغراب هاي
الدراسه راح تثولها جت وكفت يمي وتحرك بحاجبها ما رديت
تبارك:: وثول دحجي شكو شبيها ام جهاد طلعت تركض
وجهاد اسب وينعل بالاودام ولو خوالي بس مشاكل
مروى:: كعدت بالشمس وورفعت راسه كتلها بنت
خالج طلعت عايشه وجابها عمها محمد وجهاد زعل
تبارك:: شكو انتي كمتي تهذين يا خال يا بنت خال؟
-بنت خالي خالد ريام
تبارك: نعممممم جذبب شلون عايشه صدك والله
مروى:: بعدني ما راده ودك الباب بقوه ماكو احد بس من دكته عرفته ماكو غيره كمت افتح الباب وبس فتحه انصدمت بحامد ابن خالي محمد رديت گبل وره الباب
وبس مديت عين وحده وانوب غير لو اعرف احجي
حامد: احمم خويه جهاد موجود
مروى: هاا ممم.. ما موجود
-تعرفين وين راح
مروى: لا والله جان زعلان وطلع
حامد: هذا هو رحم الله والديج
مروى:: ما رديت وتوني اسد الباب دفره علاوي ابن فرات
صرنا وجه لوجه رفع عينه وعلاوي ذب جنطته ودخل نزلت
اريد اخذ الجنطه هو نزل صرنا فد مره قريبين ذبها مرتبك
وعافني توه يريد يمشي وجدمت بمكاني من سمعت صوته
-ولكك شتسوي هناي؟
