رواية عيون المها الفصل الثاني بقلم ظل الياسمين
الزعل الصامت يهوي الى القلوب فيحطمها 💔
هذا حال جدي حجي فلاح #عيون المها
البارت الثاني
ظل الياسمين
الزعل الصامت يهوي الى القلوب فيحطمها 💔
هذا حال جدي حجي فلاح
دائما كئيب وصامت وعده هاي الحديقه او المزرعه مخلي بيهه كل انواع الفواكه والخضروات وسبحان الله ايده بركه شنو يزرع يطلع بسرعه
عده سوابيط عنب وتين وعرموط وخيرات الله يكعد من الفجر يصلي ويقره قران ويكعد بيبي صفيه الي هيه كانت حبيبته بايام الصبا ومن ماتت زوجتهه راح لاخوهه وخطبهه وصارت من نصيبه عكب ما ترملت كان يتغزل بيهه كدامي حجي فلاح/اوووووف يا شطب ريحان
-حجي عيب منا لبنيه لا تسمع
-ولج عليتي افادي حبج خلاني متيه دربي _ربي يطول بعمرك ويخليك خيمه النه
-يا عمر هذا لخلص كله هموم واحزان ابني الانعدم وما ادري وين جثته لو البت لخالفتني وراحت اخذت واحد بعثي
منين اجيبه يصفيه ما اضن ترهم المهم الحمد لله على كل حال
صفيه/عمرك طويل وتربي هاي البت احسن تربيه
-كومي اخذجن لسوك واشترن الي يعجبجن وامر على صويحبي ابو حازم
-مهاوي بيبي كعدي خل نروح لسوك يلله بسرعه
_اشتريت قراصات وصدريه وقميص ودفاتر واقلام ومحفظه وجنطه واجواريب امشي فرحانه بيهن كامشتهن بثنين اديه خاف تضيع حاجه
وصلنه تعبانيين وبيبي سوالتنه حليب خاثر اكلنه ونمنه
صفيه/كوم يعزيزتي لا تتاخرين على المدرسه صاحت على بت جيرانه تمشطني ام علي عيوني مشطي كصايب وخليلهه قراصات
ام على/عيوني حجيه
صفيه راح اوديلكم حليب وخضره
ام علي/ ليش هزحمه حجيه ما نريد انكلفج
صفيه عيوني ماكو زحمه هذا الخير فايض
_تسلمين حجيه الله يبارك برزقكم
رحت للمدرسة ملابس جديده ودفاتر
الفرحه ما سايعتني والواهس اول ما دخلت تلكتني ست خلود ام عيون الخضر
وين كتبج كتلهه ما عدي كتب وكفتني قصاص كمت ابجي تالي كالت روحي للاداره رحت وشفت المدير كتله بخوف ورجفه استاذ اني نقل وما عدي كتب كال تعال وسلمني كتب قديمه انهضمت لان البقيه كلهم كتب جديده
المدرسه مختلطه واني اخاف اكعد يم ولد رجعت كعدت يم بنات اثنين كامت اتصيح البنيه تكول الرحله ما تكفي رجعت كعدت يم ولد اسمه حيدر بس ابد ما مرتاحه
وخلص الدوام ورجعت للبيت وتلكتني بيبي وجدو وسوالفت الصار بلمدرسه
هههههه وهمه يستمعون بكل اذن صاغيه ويضحكون
_الحجي/اشلون يصفيه هاي اليتيمه منو الهه بعدي
صفيه _حجي شجاك اليوم ذاكر الموت اسم الله
الحجي/اني يوميه اموووت من اذكر ابني الخير والمعدل اخذوه وعدموه وجابولي شهاده وفاه شنقا حتى الموت وكالولي ابنك اصبع خايس وكصيناه اخخخخخ يا بويه يابه 😭
-اذكر الله حجي ابنك شهيد وماوى الجنه _حتى فاتحه ما سويتله
_كوم حجي خل نقراله سوره الفاتحه ونهديه بثواب روحه
مشت الايام وكل يوم اتعلق بجدو وبيبي
عكب ما نسيت امي وحتى شكلهه نسيته
بس انقهر من وحده وياي تجيبهه امهه
اكول معقولة خلفتني ونستني
مشت الايام وكبرت وصرت صف اول وهنا صارت حرب الكويت وكعدنه من المدرسه والاوضاع تخوف وجدو يخاف علينه يطفي الفانوس يكول الطيارات تترصدنه وعشنه رعب وخوف وماكو مي وكهرباء
صادف شته وصارت هوسه بشارع وطلع جدو على رسله ولكه مجموعه شباب يبشرونه حجي خلصنه من حكم الطاغيه ويهوسون ضد صدام
رجع جدي للبيت فرحان
صفيه وينج تعالي ابشرج خلصنه من هذا الكذا والكذا من عرضه
استبشرو خير والوضع يزداد سوء لحد ما يوم احنه صيام بيبي تخبز بتنور طين ويمهه جيرانه ام علي ودخلو علينه جنود لابسين بساطيل حمر كالو وين حجي فلاح.٫٫٫بيبي انصكت كالت طالع
كامو يفتشون بلغرف ولكو دعاء زغير وصور مال الامام علي زغيره اخذوهن وطلعو وانتظرنه جدي يجي ماكووو
لليل ماكو
صبحت بيبي راحت لصديقه ابو حازم
مجاوبهه من وره الباب كالهه اخذوه ما ادري وين ولا تجيني بعد اجيبلي شبهه
بقت الطريق كله تبجي وتجر بيه والجو بارد رجعنه للبيت بس هلمره صارت الانتفاضه الشعبانيه وراحت بيهه شباب
واحنه اربع اشهر ما نعرف جدو وين
اكمل واريد تعلقون بين السطور منو المار بهيج وضع ❤️
