رواية سراج السادة الفصل التاسع والثلاثون بقلم غسق ادريس
جاييني انت بحزن "
كاطع درب طويل
درب النخل والبرد
بدربك تهل العين
تشكيلي من عشقگ قبل
ناجيت ربك دهر....تنسى بواحد غير...
" شعبالك انت الغير ؟ "
مو انا الانذل ب العشك
انا الاذلك من تجي
انا الاعوفك ب الدرب
انا مارخي الحبل
انا الاعوف الحبل
" انحب على فراگك وادك "
واشحصلت من هلعشك؟
الناس تاكل ب العثك
وانا اركض على الطايحة...
اركض على الطاحت واجد
تالي صفر ايدي ترد
بيدي زرعتك ياورد
ولغيري تنطي الرايحة
ريحتك فاحت للملا
وتحرمني يا ريم الفلا....
اللهم صلِّ على محمد وآل محمد
خلونا ويا السادة
♥.
حبيت انزل هذا البارت لان كامل وماعندي شي بي
بعد قرأتكم للبارت اتمنى منكم
التصويت والتعليق بين الفقرات واهم فقرة عندي ماريد كلام وسب يخص احد ابطال الرواية سواء كان لغل او لخلود
" قس
ابتسمت
_قس :: لاتكدر طلگتني او لا اني بعد الي سمعتة منك مستحيل اتقبلك ولا اقبل على نفسي اعيش ويا شخص عايش بذكرة غيري ويحاول ينسى غيري بية
حجيتها وكمت من مكاني ايدي ترجف
درت وجهي عنه
امسح على وجهي وعيوني الي بدت تتسابق ب الدموع جسمي كله يرجف احساسي من الداخل مهدوم
ما استاهل هيج يصير بية ما استاهل
سمعت صوت خطواتة خلفي وصوتة يصيح ب اسمي
مشيت متجاهلتة ومتجاهلة وجودة
حسيت ب ايدة صارت على ايدي
سحبني ب اتجاهه عيوني ب عيونة
صفن بعيوني الي جانت كلها دموع
مسح على عيوني يحجي بتوتر وخوف
باوعلي وحجة صوتة محتقن
_غل :: قس.... سمعيني
_قس :: ابتعد عني غل
_غل :: لا قس لا ماريدج تكرهيني قس.... هذا كله ماضي انا مستقبلي وياج وبس
ضحكت بوجهه عيوني بعيونة
حجيت والابتسامة ما مفارقة وجهي رغم الدموع الي بعيوني بس جنت مبتسمة
_قس :: لا تحاول تقنع روحك ب الوهم بعد السمعتة منك لو تصير روحي بي مستعدة اگتل روحي ولا اباوع لوجهك
حجيتها ودرت وجهي منة ابلع ريكي بحزن داخلي كلة يهتز
حجة غل يمسح على وجهي يحاول يبرر موقفة
_غل :: قسس لاهيج تسوين انا حقير اي حقير اجيت برجلي وحجيت ب الساني بس مو بيدي قس
سحبت ايدي منه بقوة باوعتلة وصحت بعصبية
_قس': غللل كافيييي مو بيدك لعد بيد منو....انت جايني بليل وبدرب طويل تعترفلي بحبك لغيري؟ شنووو ذنبي اتحمل هيج كلام منك شنووو ذنبي انيي انخذل هيج.... انت تعرف شسويت تعرف؟؟
قلت نبرة صوتي من العصبية للحزن والضعف
اشرت على كلبي وحجيت
_قس': انت دمرتني غل دمرتني انت هنت مشاعري واحساسي وحبي الك انت دمرت مشاعري بكلامك هذااا اذا انت من البداية ماجنت كدها ليشششش تبديها ليشششش
درت وجهي منه اريد ارجع لبيتنا مشيت كم خطوة ووكفت
التفتت علية وحجيت
_قس :: من اليوم ورقتي وورقتك انطوت واحتركت غل... بس قبل كلشي تدري شنو الي اتمنى واريدة منك ؟
جان يباوعلي بيأس وحيرة عيونة يلمعن ب الدموع
كملت كلامي ب ابتسامة
ابتسامة تحمل كل الحزن والانكسار
_قس :: اتمنى تحاول لخاطر خلود...
من حجيت هيج تغيرت نظراتة لصدمة والخيبة
رجعت كملت كلامي
_قس :: حاول لخاطرها يمكن حبها حقيقي اكثر مني... على الاقل حاول تصلح الي خربتة يمكن من اشوفك تحاول لخاطرها ارضا عليك
اذا كدرت تحصلها وترجعها الك راح اكول تستاهل كسرة خاطري منك..
حجيتها ودرت وجهي منه راجعة للبيت
بخطواتي للبيت جنت مكسورة ومخذولة حتى بعد الي صار مالحكني ولا رجع يحاول وياي عرفت وقتها مشاعرة وحبة لخلود يتوفق على حبة ومشاعرة الي
هنا عرفت اني جنت طرف ثالث بعلاقة بس اني ماجنت اعرف لو جنت اعرف هيج مافكرت اوافق واحبة مافكرت اتقبل ادخلة لحياتي..
كل طرف ثالث بعلاقة بين ثنين راح يخسر هواي
هواي راح يخسر والزمن راح يكون شاهد على خساراته راح يخلص عمرة كلة يخاف يبدي من جديد
شفت نضال واكفة بباب البيت تباوع من بعيد من شافتني اجيت اجت تركض ب اتجاهي معصبة تريد ترزلني
عفتها ودخلت للبيت
اجت نضال خلفي سحبتني من ايدي خارزتني بعصبية
من شافت حالتي... وكفت بمكانها تباوعلي بصدمة الدموع تارسة عيوني ووجهي جسمي كلة يرجف
قوست حلكي بحزن ابجي
مسحت دموعي بكف ايدي
باوعتلة وحجيت بغصة
_قس :: نضال گلبي يأذيني
_نضال :: يمههه قس شبيج بنيتي
اخذتني بحضنها ضامتني لصدرها
جنت ابجي بحضن نضال واشهك بقوة جنت منهارة ادك على گلبي
ماجنت ابجي على غل لا جنت ابجي على شي انطفئ بداخلي يمكن الفرح او السعادة و البهجة يعني
انطفت بهذا اليوم
هذا الموقف جان كفيل يطفي قس للابد...
مسحت نضال على راسي تريد تفهم مني وتريد تعرف الي صار
باوعتلي وحجت بخوف تبلع بريكها
_نضال :: ولج وين السيد شسوالج ليش تبجين
_قس :: ماريدة بعدد ماريدة
_نضال :: ولجج شبي شصار قس احجيلي لاتخوفيني
شهكت بحزن وحجيت صدري يصعد وينزل كوا اسحب النفس
_قس': مايحبني... مايحبني.. يحب غيري جايني يبجي لغيري تعبان لتعب غيري... نضال حاول ينسى غيري بية ماحبني بيوم
سكتت اشهك بدموعي وخيبتي
بيومها اختلطت المشاعر بين الحزن وبرودة الجو الي جانت ادب ب الجسم شكد جانت باردة وقتها لاكن داخلي جان محترك
جنت اشتعل من الداخل ماحسيت ببرودة الدنيا وقتها
سمعت صوت سيارة غل جاية من الخارج عرفتة مشة
مشة حتى بدون مايودعني لهل درجة هنت عليك يا غل؟
استمريت ب البجي والنحيب
جنت ابجي واشهك بقوة
حتى ماحاول لخاطري ماحاولللل..... !!!
مر الوقت والفجر طلع واني على نومتي
جنت نايمة بحضن نضال ب الحوش هيا تمسح على راسي واني ابجي بهدوء صافنة اباوع لسمة
ماحجت شي نضال ولا رادت تسمع مني اكتفت ب السكوت جانت تسمع لدموعي
باوعت لنضال تغمض بعيونها وتفتحهن ب الكوا جانت نعسانة ومستبردة
كمت من مكاني بدون ماحجي شي باوعتلي نضال بحيرة ماتعرف شتسوي
مشيت ب اتجاه البيت دخلت لصالة اصعد لغرفتي
اصعد الدرج رجلي يهتزن ماعرف شلون حملني ساعتها خطواتي جانت ثگيلة امشي بصعوبة
حزني ثکيل حتى رجلي ماتحملن يشيليني وقتها
فتحت باب الغرفة خليت راسي على المخدة
رجع براسي المشهد الي صار وكلام غل كلة رجع يتكرر براسي
بيومها نمت واني احارب تفكيري وداخلي جنت احارب كلشي بداخلي غمضت عيوني بعد ساعات من الحزن والتفكير
...
كعدت ب اليوم الثاني عيوني مورمة
اخذت التلفون اكلب بي جان عندي امل اشوف رسالة من غل مثلاً رسالة اعتذار؟
ماشفت شي منه وهذا جان سبب يخليني انهار واحترك ب الزايد
حتى وان كان مايحبني ومايريدني جان لازم يحاول لخاطري...
شمرت حيلي على الحايط صافنة ويا روحي
ماعرف شسوي شنو الي بيدي
تذكرت خلود بيوم الشفتها صفنت ويا روحي مستوعبة موقفها بيومها
بيوم شفتها ويا العلوية جهاد ثنينهن توترن من اجيت
ومن سألت العلوية جهاد بيوم سفرة البستان اتذكر كلامها ب الحرف الواحد العلوية جهاد جانت تعرف بخلود واكيد تعرف علاقتها ب غل
هيا ب السانها كالت راح يجي يوم وتعرفيها
معقولة جانت تعرف راح يجي يوم وغل يعترفلي بحبة الها معقولة العلوية جهاد جانت تعرف بكلشي وسكتت !!
سحبت ملابسي اجر النفس احاول استوعب الي صار
يعني العلوية جهاد جانت تعرف بكلشي وسكتت
جانت تعرف راح انكسر هيج وسكتت يعني جانت راضية بكسرتي لهل درجة هنت عليها؟
اني هنت على الكل... الكل هان عليه كسرتي
رجعت اتذكر كلام غل ومشاعرة وقتها وحبة لخلود
كعدت ارتب الاحداث بيني وبين نفسي
.... بعد ساعات طويلة من التفكير كدرت اوصل للصح
كمت من مكاني اباوع لوجهي ب المراية
ابتسمت لنفسي ب المراية اشجعها انتِ اقوة من هيج مو انتِ التقبلين الغلط لنفسج قس مو انتِ...
طلعت من الغرفة بس جنت مترددة
مترددة انزل واحجي ماجنت قوية لهل درجة
جانت اكو حرب جبيرة بداخلي
حرب تنتظر مني الصح
نزلت الدرج ايدي ترجف وگلبي اول مرة احس بهذا الشعور اول مرة گلبي يرجف
حسيت برجفة گلبي
شفتهم متجمعين ب الصالة عمي واخواني ونضال وابن عمي مجتبى وزوجات اخواني وخواتي واطفالهم الكل جان ب الصالة
نضال من شافتني نازلة كامت من مكانها تباوعلي صافنة علية
الكل التفت يباوعلي محد جان يعرف ب الي صار ولا يعرفون ب الي راح يصير
وكفت كدامهم عيوني ذابلة من الحزن والدموع
جانو صافنين يباوعولي ب استغراب من حالتي ووكفتي
باوعت لعمي صافنة
نطقت بعد حرب طويلة بيني وبين نفسي
_قس :: عمو اريد اطلگ
جانت الصدمة واضحة بوجوه الكل استغرابهم وصفنتهم لقراري المفاجئ
باوعلي عمي عاكد حواجبة ب استغراب
حجة
_محمد :: شنوو بابا قس شهل حجي؟
_قاسم :: خاف جاي تحلم؟
_ابتهال :: يااا قس.. هههه شبيج شنو تردين تطلگين
مانيطتهم رد فعل
رجعت باوعت لعمي وحجيت مكررة كلامي
_قس :: عمو اريد اطلگ اني وغل مانرهم نكون سوا
_باسم :: شبيج قس خوية يا طلاگ مو جنتي تكولين ماكو احسن من السيد غل شنو الي تغير هسة
سحبت نفس وحجيت موجهه كلامي لاخوي باسم
_قس :: جنت بس هسة لا.. اني هسة مصرة على الطلاگ واني وغل متفقين يعني هذا مو قراري بس
_قادسية :: قصدج حتى السيد غل مايريد يكمل وياج؟
هزيت راسي ب اي ساكتة
حجة ابن عمي محمد رافع حاجبة بعصبية
_مجتبى :: شمسوية ليش السيد مايريدج بعد ويريد يطلگج؟
باوعتلة ب ابتسامة كلها حزن ويأس
_قس :: لاول مرة ماسوي شي
التفتت منطيتهم ظهري اصعد لغرفتي
قبل لا اكمل صعدتي لدرج
التفتت عليهم وحجيت
_قس :: بس هل مرة اطلب منكم تفكرون بية وبكرامتي وتوكفون وياي وتكونون سند الي بس هل مرة اريدكم تصيرون اهل الي
كملت طريقي لغرفتي بمجرد ابتعادي عن نظراتهم انهاريت ب البجي والحزن
صعدت نضال وخواتي ونسوان اخواني حاولو وياي وحاولو يقنعوني ويهدوني
جنت رافضة اسمع لاحد
جنت مصرة على قراري
اخذت التلفون رحت على رقم غل ب الوتساب
كتبتلة رسالة
_💬 قس :: السلام عليكم غل.. اني انطيت خبر ل عائلتي والكل عرف بقراري الي هوا الطلاق
دزيت اله الرسالة امسح على وجهي
رجعت كتبت رسالة ثانية
_ 💬 قس :: قبل كلشي اتمنى منك تقرة هاي الرسالة وتفهمها
اني ما زعلانة منك لا ابد انت انسان عندك مشاعر والحب يجي مرة وحدة وانت حبيت وجان حبك ومشاعرك لانسانة وحدة الي هيا خلود... وانت ما مجبور.. تجبر مشاعرك على شخص ثاني وتحاول تحبب نفسك
انت غلطت اي وغلطك جبير جان لازم تصارحني من البداية بس انت فضلت تكتم مشاعرك بداخلك
دزيت الرسالة اسحب نفسي بصعوبة
رجعت كتبت
_💬 قس :: انت انسان طيب ومحترم رغم غلطك وياي وكسرتك الي بس اني ماشفت مثلك عشت وياك احلى ايام ومانكر ابد جنت كلشي ب النسبة الي
... والحد هاي الحظة حلقتك ب ايدي وارتباطنا مستمر الى الان.....
_💬 قس :: لهذا لا قبل لاتصير علاقتنة محرمة ونفسخ الخطوبة اريد اطلب منك طلب واحد واتمنى ماتردني بي
_💬 قس :: يا سيد غل اذا انت فعلاً تحب خلود حاول علمودها ... هيا انتحرت لان ماتحملت فكرة تصير لغيرها لهذا اني اتخليت عنك لخاطرها ولخاطر لا تعيش حياتها بحزن وجرح الفراق
_ 💬 قس :: حاول ترجعها الك وخلي الكل يعرف حبك الها وتمسكك بيها الي يحب يضحي.... ضحي مثل ماهيا ضحت بنفسها وماخافت تقتل نفسها لخاطرك.. حبها صادق وانت حبك صادق هيا ماتكدر تسوي شي لان مابيدها شي بس انت... انت بيدك كلشي اذا انت فعلاً تحبها واذا جنت فعلاً رايدها راح ترجعها الك واتمنى تصير كفو وتاخذها لان اذا ماكدرت ترجعها لحضنك انت هنا كسرتها وكسرتني وياها..
_ 💬 قس :: مبري الذمة على خاطري الكسرتة...
كتبت هاي الرسالة ومسحت الدموع من عيني
من شفتة يقرة ب الرسائل حظرت رقمة
وحظرتة من حياتي للابد
مرت الساعات وعرفت عمي منطي خبر لسيد عبد الرؤف والسيد معز ابو غل
التفتت على صوت رن التلفون شفت المتصل قدس
سحبت نفس بقوة
اخذت التلفون وفتحت الخط
" قدس "
سديت الاتصال من قس فاتحة عيوني بصدمة ما مستوعبة الي حجتة قس
شنو يعني تريد تتطلك؟؟
طلعت من الغرفه اركض التلفون ب ايدي
اصيح ب اسم غضنفر
نزلت الدرج ركض مامنتبهة على روحي
رفعت راسي على صوت عمتي رنا
صاحت عمتي بية تركض ب اتجاه الدرج فاتحة عيونها خازرتني بعصبية
_رنا :: ولجج قدسس بطنج.. انتبهي لاتوكعين
_قدس :: عمة غضنفر ويننن؟؟؟
_رنا :: ولجج شبيج ما تنتبهين على الي بطنج
_قدس :: عمة بسرعةةةة جاوبيني غضنفر وين؟
قبل لاتجاوب عمتي رنا
سمعت صوت غضنفر.. التفتت على صوته شفتة واكف بباب الصالة التلفون ب ايدة عاكد حواجبة بعصبية
ركضت علية احجي بقهر
_قدس :: غضنفر قس اتصلت علية تريد تطلگ ؟؟
_غضنفر :: اعرف غل حجة وياي
صفنت بوجه غضنفر ما مستوعبة
صاحت عمتي رنا ب استغراب وصدمة مافاهمة شي
_رنا :: منو يريد يطلگ؟؟
رفع غضنفر راسة يباوع لامه حجة وياها بحيرة
_غضنفر :: غل يريد يطلگ
_قدس :: قس ماتريد تكمل ويا غل
صرنا اني وغضنفر واحد يباوع بوجه الثاني وعمتي رنا تصيح بعصبية مصدومة من كلامنا
اخذت عمتي رنا تلفونها تتصل على غل واني وغضنفر ب الصالة كاعدين ثنينة صافنين
مانعرف شنو الي صار مصدومين بقرارهم هذا
باوعت لغضنفر وحجيت
_قدس :' يمكن تعاركو بينهم.... نكدر نصالحهم ونحل الموضوع بدون طلاق؟
_غضنفر :: يمكن....
التفتت اني وغضنفر على صوت عمتي رنا
شفناها طلعت من الغرفة التلفون ب ايدها
باوعتلنا وصاحت بعصبية
_رنا :: ولكم شصاير شبيهم هذول
_غضنفر :: خير شصار؟
_رنا :: ابوك اتصل يكول غل يريدنا نروح نطلگ
مسحت على وجهي بحيرة مافاهمة الي جاي يصير ليش هيج فجأة قررو ينهون كلشي بلحظات
طلع غضنفر من البيت معصب التلفون ب ايدة
وعمتي رنا كاعدة على القنفة تتصل على غل بس ماكو غل مايرد
حاولت اتصل على قس واعرف الي صار وافتهم يمكن نكدر نحل هاي المشكلة
محد جان يرد حتى نضال ترفض الاتصال
مرت ساعة كاملة مليئة ب التوتر والقهر
عمتي رنا جانت معصبة ومقهورة تريد بس تعرف السبب بكل مرة تسألني اجاوبها ب ماعرف وفعلاً اني ماعرف؟
سمعت صوت غضنفر وجادح جاي من الخارج
عدلت الشال على راسي
التفتت على الباب منتظرة دخلتهم
دخل غضنفر وجادح خلفة ثنينهم الانزعاج واضحة بوجههم
جادح صاك على ايدية بعصبية
وغضنفر مو اقل منة
باوع جادح على عمتي رنا وحجة بكلمات خلتني فاتحة عيوني من الصدمة
_جادح :: غل يريد يطلگ... حتى يخطب مرة ثانية
عكدت عمتي حواجبها ما مستوعبة كلام جادح
_رنا :: شنو يعني؟
_غضنفر :: استاذ غل يريد يرجع يتقدم لبنت ابو ناظم
طفرت عمتي من مكانها فاتحة عيونها بصدمة وعصبية
صاحت بغضنفر
_رنا :: قصدك خلود !!!!
_جادح :: نفسها
صاحت عمتي من مكانها تصرخ بعصبية
_رنا :: مسودنننن مسوودددنننن غللل مو نفسهم الطردونييييي يريد يرجع يتقدم يريد يفشلناااا !!!!!
جنت اباوعلهم ب استغراب مافاهمة شي منو خلود منو بت ابو ناظم ليش محد حجة بهذا الموضوع ليش !!!!
توا جادح يرد على عمتي رنا واستوقفة صوت التلفون
رفع التلفون.. عكد حواجبة مستغرب من المتصل
رفع الخط وحجة بهمة
_جادح :: هااا سيدد.....شنو.!!.. غل عندك؟.. سيد مو مثل مافهمك غل احنا مانعرف بشي واحنا مستغربين مثلكم..... ان شاءالله سيد... ان شاءالله.. الله وياك في امأن الله
سد جادح الاتصال عيونة يردن يطلعن من مكانهن
رفع راسة يباوع لغضنفر وعمتي رنا
حجة يهز راسة بحيرة
_جادح :: السيد عبد الروؤف اتصل
_غضنفر :: خير ان شاءالله
_جادح :: غل رايح لسيد وحاجيلة وهسة السيد طالبنا كلنا نجي
ضربت عمتي رنا على وجهه بعصبية وغضنفر وجادح ثنينهم كعدو يهزون رجلهم بتوتر مافهمت شي الى هاي الحظة ما مستوعبة !!!.
" مهجان "
بست السبحة امسح على وجهي واتحمد
لفيت السبحة على معصم ايدي وكمت من مكاني اشيل سجادة الصلاة
اخذت السجادة من الارض خليتها برف السجادات
ومشيت اطلع من المصلى
فتحت باب المصلى شفت عاتكة كاعدة ب الارض فاطمة نايمة بحضنها
وعاتكة تقرة دعاء كميل وتمسح على راس فاطمة
مشيت اكعد ب اتجاه القنفة عيوني على عاتكة وفاطمة السبحة ب ايدي اسبح بيها
مر الوقت بهدوء
البيت فارغ العلويات ب الحوزة بس اني وعاتكة والمحسنات ب البيت
بعد مرور ساعه تقريباً التفتت اني وعاتكة على صوت صياح السيد جاي من الخارج باوعتلي عاتكة عاكدة حواجبها
كمت من مكاني مافاهمة شي
مشيت اني وعاتكة ب اتجاه باب الصالة
صار كدامنا السيد عبد الرؤف والسادة محاوطي يحاولون يهدو وهوا منهار ب الصياح والرزايل
انتبهت كل هاي الرزايل المقصود بيها جان السيد غل !!
جان السيد غل واكف كدام السيد راسة ب الارض يسمع لسيد بصمت وهدوء ما انطه اي رد فعل غير السكوت
عكس السيد وهاي من الحظات النادرا الي اشوف السيد بيها عصبي
صاح السيد بعصبية وحركة كلب
_عبد الروؤف :: جهالل احنا كدامك سيد غل؟؟؟
_غل :: محشومين سيد
_عبد الروؤف :: لللاااا ماكو محشومين لو حاشمنا ماجاي هيج تحجي... انا السيد عبد الروؤف تالي عمري اكسر بگلب انسانة حتى ارضيك انت وغيرك !!!
هز غل راسة ب لا نافي كلام سيد
حجة غل يحاول يفهم السيد
_غل :: سيد انت مافهمتني هيا الي رادت الطلاق مو انا..
_عبد الروؤف ': طبعاً تريد الطلاق اكيددد اذا انت رايح الها برجليك تعترف الها.. ماخفت غل ماخفت من الله تكسر مشاعرها انت تعرف عاقبة فعلك شنو !
سكت غل محتار يدور براسة مايعرف شيحجي
صاح السيد بية
_عبد الرؤف :: احنا نكسر خاطرنا حتى خاطر غيرنا يطيب تجي انت تكسر خاطر وصية من وصيات رسول الله لخاطر تطيب خاطرك !!
كعد غل ب الارض ايدة على راسة جسمة كله يهتز جانت عيوني اني وعاتكة عليهم ثنينة مصدومات من الي جاي يصير مافاهمات شي ليش السيد يرزل ب غل منو البنية الي يقصدها السيد يخاف لاينكسر خاطرها
باوع لسيد لغل هز راسة بأسف والتفت يدخل للصالة
ابتعدنا اني وعاتكة عن الباب شابكات ايدينا
دخل السيد شافنا واكفات رغم عصبيتة ووضعه
ابتسم بوجهنا ودخل للمصلى
باوعت لسيد غل شفت السادة متجمعين حولة يحاولون يهدو ويحجون ويا
ابتعدنا اني وعاتكة من الباب محتارات ومستغربات شنو الي صار معقولة الموضوع يخص قس !!
رجعنا كعدنا اني وعاتكة على القنفة لا احنا النكدر نحجي ويا السيد نخاف نترزل ولا احنا الفاهمات الموضوع زين
مرت نص ساعه تقريباً... كمزنا اني وعاتكة على صوت عمتي جاي من الخارج
ركضنا نباوع من باب الصالة شفنا عمتي واكفة كدام غل الي جان مدنك راسة
صاحت عمتي بغل
_جهاد': حذرتك من البداية غل
_غل': جهادد مو بيدي !!!
_جهاد :: شنو الي مو بيدك؟؟ غل انت رجال اذا جنت رايدها من البداية ليش ماتعبت عليها ليش ما ضحيت ليش من البداية مافعلت جاي هسة تقدم افعالك؟
صاح غل من مكانة
_غل :: حاولتتت حاوولتت ماكوو اهلها جانو رافضين شنو الي بيدي ماجنت اعرف بنفسي رايدها الى من تأذيت لاذيتها
حجة ايليا ب انزعاج موجه كلامة لغل
_ايليا :: غل انت خاطب واكو انسانة بحياتك شلون تقبل تكسر بيها لخاطر مشاعرك
مسح غل على راسة ايدي يرجفن الكل جان صافن على غل نظراتهم عدم رضا بس محد حجة الكل جان يلوم غل ب نظراته بس
كام غل من مكانة مشة ب اتجاه باب المصلى الخارجي
فتح باب المصلى ودخل
مشو السادة خلفة وعمتي والعلوية لباب والعلوية زهراء خلفهم
اجت ملاك ب اتجاهنا تركض مافاهمة شي
باوعتلنا وحجت
_ملاك :: شصاير ولجن؟
_عاتكة :: مانعرف احنا نريد واحد يفهمنا
_مهجان :: هذا صوت السيد !!
ركضنا اني والبنات لباب المصلى على اثر صياح السيد
فتحت باب المصلى شفت غل كاعد ب الارض كدام السيد يحجي ويا ويتوسل بية
التفتت اباوع للبنات مصدومة
شنو الي جاي يصير السيد غل يبجي بحزن وقهر
والسيد كدامة يرزل بية منهار عليه ب الصياح
اتجمعو السادة حول السيد خايفين علية لا يتأذى ويطيح بسبب عصبيتة وانهياره بسبب غل
التفتت العلوية لباب على غل صاحت بيه بعصبية
_لباب :: غلللل كافيييي راح ينجلط عبد الرؤوف بسببك كافيييي
_غل :: عمة احتاج السيد وياي بس هوا يكدر يحلها
صاح السيد بغل
_عبد الرؤف :: اطلع من وجهي غل ماريد اشوفك ولاتحلم اوكف بيوم وياك على الغلط اطلععععع ماريد اشوف وجه...
سكت السيد ايده على كلبة متأذي التم الكل على السيد خايفين علية حتى غل كام من مكانة يشوف السيد خايف علية صاح السيد بيهم يبعدون غل عنه
التفت ايليا على غل يحجي ويا
_ايليا :: كافي غل كافي
_غل :: بس احجي ويا
_غضيمر :: على غير مرة غل من يهدء تكدر تحجي ويا حالياً كلامك راح يأذي ويأذيك ويأذي الكل
سكت غل صافن يباوع للولد
هز راسة ب اي والتفت يطلع من المصلى
دخلت اني والبنات للمصلى خايفات على السيد
عيوني جانت على السيد خايفة لايصير بيه شي
جان مغمض عيونة بوجع
حجة فقار ويا السيد يحاول يقنعة يمشي للمستشفى والسيد رافض
يكرر كلامة ب
_عبد الرؤف :: غل ماريد اشوفة ماريدد اشوف وجهه
_لباب :: طلع سيد طلع بس كول يالله لاتضغط على روحك لا يصير بيك شي
التفتت اباوع للكل اريد افهم ليش السيد عصب على غل شنو الي سوا غل حتى الكل منزعج منه
باوعت لعمتي صافنة تباوع للسيد
كل شوي تهز راسها بحيرة
طلعت اني والبنات من المصلى نترك السيد يرتاح وحدة
باوعت للبنات ب استغراب مافاهمة شي
_مهجان :: شنو الي جاي يصير ليش هيج السيد معصب والسيد غل ليش يبجي؟
_ملاك :: ماعرف اني هم مستغربة
_عاتكة :: ملاك احجي ويا فقار خلي يحجي الج
رفعت ملاك حاجبها فاتحة عيونها متذكرة
_ملاك :: اي صح شلون نسيت اني
مشت ملاك تصيح فقار واني وعاتكة واكفات بمكانة منتظرات جيتها ومتأملات بيها الخير
رجعت بعد خمس دقائق تهز ب ايديها
باوعتلها وحجيت ب حماس وفضول
_مهجان :: هااا بشري؟
_ملاك :: يا ابشر ماقبل يحجي
_عاتكة :: هاي عود متزوجة وبراسج الخير ماعرفتي تطلعين فقار ب الحجي
_مهجان :: وين هيبة المتزوجات
هزت ملاك ايدها ب انزعاج تباوعلنا صفح
كعدنا ب المطبخ نريد نفهم الي صار ماكو محد يحجي الكل ساكت ومفعل وضعية السكوت
مر الوقت والسادة ماطلعو من المصلى يحجون ويا السيد كل شوي اسمع صوت صياح السيد
كل مرة اسمع صوت السيد يجيني فضول اعرف الي صار شنو
اجه اليل واجت شاهيناز وحميدة وحوراء وحفيدات العلوية لباب كلنا تجمعنا ب المطبخ نتحاور بينة نحاول نفهم الي جاي يصير
التفتت على شاهيناز شفتها كاعدة بعيد عيونها ذبلانة ووجهه شاحب
باوعتلها وحجيت مستغربة حالتها
_مهجان :: شبيج شاهيناز؟
_شاهيناز :: مريضة
_عاتكة :: حرارتج مرتفعة مو؟
_شاهيناز :: اي وبلاعيمي تأذيني
ضربت ملاك ايد ب ايد وصاحت
_ملاك :: واني اكول ليش ماعرفنا السالفة كلها لان شاهيناز مريضة
_عاتكة :: شلون يعني؟
حجت عطاء تأشر على شاهيناز
_عطاء :: شاهيناز مثل الفارة اذا صارت سالفة تروح تحفر الارض حفر حتى تعرفها
رفعت شاهيناز راسها تباوع لعطاء صفح
_شاهيناز :: سكتي عطاء لاتتهميني اتهامات باطلة
_عطاء :: انتن مادري شلونجن مابيجن وحدة بيها خير تروح تعرف السالفة وتجي
هزت ملاك ايدها تباوع لعطاء
_ملاك :: يلا ام الخير خلينة نشوف طولج بلا وروحي شوفي شصاير
_عطاء :: لا اني شكو اسرار عائلة هاي
حجتها تاكل ب التفاحة تباوع النا بنص عين
حاولنا نتناسى الموضوع ب النهاية الكل راح يعرف بدون تعب وشقاء
طلعت من الغرفة على صوت قدس والبنات
ركضت انزل الدرج اشوف شصاير
شفت قدس والبنات كاعدات ب الصالة
حضنت قدس اسلم عليها
انتبهت عليها ضايجة ومالها واهس لشي
تصفن وتتحسر بقهر
حاولنا نفهم منها شصاير وهل الموضوع مرتبط ب قس لو لا
انصدمنا من بدت تسرد النا وتحجي الي صار
التفتت اني والبنات على صوت السيد من صاح ب اعتراض
_عبد الرؤف :: انا عبد الرؤف ما اخطي هيج خطوة واكسر بخاطر قس
" قس "
فزيت من نومتي على صوت رن التلفون
رفعت راسي من المخدة عيوني صارت على التلفون
شفت المتصل قدس
غلست على الاتصال ورجعت راسي على المخدة مرة ثانية صافنة على الحايط
رفعت راسي منزعجة من صوت الاتصال المتكرر
اخذت التلفون فتحت الخط وحجيت ب انزعاج وضجر
_قس :: شكوو قدس ترا مالي خلك وواهس لسوالف
_قدس :: ولج قس وينج ليش ماتردين
_قس :: نايمةة نايمةة
حجت قدس بهمة كوا تجر النفس
_قدس :: قس صارت مشكلة جبيرة هنا
_قس :: مايهمني قدس بعد مايهمني شي شنو الي يريد يصير خلي يصير
حجت قدس
_قدس :: قس السيد ما موافق يخطب البنية الي يريدها غل وهسة صارت مشكلة جبيرة غل يتوسل ب السيد والسيد معارض
عكدت حواجبي ب استغراب
حجيت
_قس :: ليش شصاير؟
_قدس :: السيد يكول اذا اوافق اروح ويا غل يعني انا وافقت اكسر خاطر قس واشارك بذنب غل
سكتت صافنة اسمع لكلام قدس والي صار ببيت السيد
حجيت
_قس :: بس اني موافقة قدس ليش ماحجيتو لسيد قس هيا الي ماتريد تكمل
_قدس :: ولج السيد معاند ومعصب ما جاي يتقبل الكلام من احد وغل متخبل شكد حاولو ويا السيد ماكو نتيجة تريدن الصدك قس؟
حجيت ب فضول اريد اسمع شنو راح تكول
_قس :: شنو؟
_قدس :: انقهرت على غل صح انتِ اختي وعزيزة عندي واني متأذية لهذا الموضوع ومقهورة بس غل حالياً كلش منهار ومتأذي
جنت اسمع لكلام قدس والي جاي يصير بغل وبيت السيد عبد الرؤوف
سديت الاتصال من قدس بدون ماودعها كمت على حيلي صافنة اتذكر كلام قدس الي ضل يدور براسي
جريت نفس وزفرتة بحيرة ماعرف شسوي كعدت امسح على وجهي محتارة ما اعرف القرار الي جاي يدور براسي صح لو غلط
كمت من مكاني بهمة وثقة
طلعت من الغرفة اركض نزلت الدرج شفت خواتي كاعدات على القنفة من شافني التفتن يباوعلي
نظراتهن حزن وقهر
باوعتلهن ادور نضال بينهن
سمعت صوت نضال جاي من المطبخ ركضت على المطبخ اصيح ب اسم نضال
طلعت نضال من المطبخ الجدر ب ايدها تباوعلي ب استغراب
_نضال :: هااا ولج شبسرعة تخطيتي وطلعتي من التوحد
_قس :: نضال مو وقتج هسة... اريدج تاخذيني لنجف لبيت السيد عبد الروؤف
فتحت نضال عيونها بصدمة
صاحت بية برفض
_نضال :: كعدي وسكتي وين رايحة بعد كل علاقة ماتربطج ببيت السيد
_قس :: نضالللل الله يخليج اني راح ابتعد عنهم بس قبل كلشي اريدج تاخذيني هسة
التفتت نضال تباوع لخواتي والبنات ب استغراب جنت اسمع صوت البنات ورفضهن من روحتي بس اني لا بالي كلة جان بموضوع واحد بس !!
باوعتلي نضال وحجت بهدوء
_نضال :: ولج قس وين رايحة يا بنيتي مو حلوة بحقج ترحين وانتِ على باب طلاق وحتى وان كانت روحتج للاصلاح مايصير انتِ ترحين هما الي يجوج مو انتِ.
مسحت على وجهي بعصبية
باوعتلها وصحت
_قس :: نضااللل ماريددد الصلاح اني ماريدة بعدد ماريددددة
_نضال :: شسوين رايحة بعد؟
_قس :: نضاللل شعليج تاخذيني لو اروح وحدي؟؟؟؟
سكتت على اثر صوت اخوي باسم جاي من خلفي التفتت على مصدر الصوت شفت باسم واكف يباوعلي عاكد حواجبة بعصبية
صاح بية خازرني
_باسم :: وين ترحين وحدج؟
باوعت لنضال خازرتني تريديني اسكت
رجعت التفتت على باسم
حجيت بثقة
_قس :: اريد اروح لبيت السيد عبد الرؤوف
_باسم :: لبيت السيد... شسويننن؟؟؟
_قس :: شكد تسألون ياناس مابيكم واحد يكلي امشي بدونننن ليش
حجيتها وكعدت على القنفة امسح على وجهي ماريد دمعتي تطيح حسيت بهاي الحظة كل الحزن تجمع بداخلي كل لحظة قهر دبت بقلبي
جنت ضامة وجهي ب ايدي ماريد دمعتي تطيح ويشوفوها ماريد يكولون ضعفت ماريد يكولون انكسرت !!!.
حسيت بشخص كعد كدامي
انسحبت ايدي من وجهي شفت اخوي باسم يباوعلي بحزن صافن بعيوني
حجة بحيرة يمسح على راسي
_باسم :: والله ياخوية مايهون علية اشوفج مكسورة هيج
_قس :: ما انكسرت اني !!
هز باسم راسة ب اي ساكت باوعت لنضال شفتها تباوعلي بحزن صافنة بوجهي من باوعتلها جرت حسرة ادور بوجهه
هزت ايدها وحجت تتأفف
_نضال :: احتركت روح امج كومي كومي يلا بدلي
كمزت من مكاني اباوعلها بصدمة
_قس :: صدك نضال؟
_نضال :: اي صدك... وشوفي ولج اذا روحتج لسالفة مصخمة مثل وجهج تشوفين هذا الجدر ب ايدي افلش راسج بي تفهمين لو لاا؟؟
ضحكت اهز راسي ب اي
ركضت اصعد لغرفتي ابدل ملابسي
توقفت بنص الدرج واني اركض
صفنت مستوعبة فرحتي لشنو
بلعت ريكي ومشيت اصعد للغرفة بهدوء ايدي ترجف
دخلت للغرفة اباوع للمراية عيوني مدمعة
كعدت ب الارض ابجي اي بجيت ماتوقعت هيج يصير بية ماتوقعت انغدر من غل بهل طريقة لو فاسخ الخطوبة اهون من اعترافة الي
مسحت ادموعي بقوة ارزل بنفسي قس ليش تبجين تبجين على شخص يحب غيرج؟ لاا قس لا مو انتِ التبجين لان واحد عافج انتِ الينبجي عليج
كمت من مكاني البس ملابسي عيوني تنهمر ب الدموع بكل مرة امسح دموعي ارزل نفسي اني ما استاهل ابجي على هيج سبب اني بس انكسرت اني انخذلت !!
طلعت من غرفتي بعد ما تجهزت جنت مرتبة نفسي وملابسي ماردت ابين لاحد اني حزينة
نزلت الدرج شفت نضال ب الصالة تكتل بعلي ابن اخوي لان شاك جورابها
رفعت راسها تباوعلي هزت راسها تتحسر
كعدت على القنفة اهز برجلي ماعرف روحتي صح لو غلط احساس بداخلي يكول صح واحساس معارضني قس لاترحين يمكن اكو امل ترجعون سوا.. !!
فتحت عيوني بقوة مصدومة من نفسي معقولة عندي هيج افكار براسي
مستحيل مستحيل اتقبل هيج فكرة بيوم مستحيل لو اعرف غل يرجع يتوسلي حتى نرجع ماوافق اني قس اتقبلها ادوس على كرامتي وكبريائي مستحيل !...
رفعت راسي على صوت نضال
_نضال :: يلا قس
هزيت راسي ب اي ساكتة
طلعت نضال واني خلفها ماعرف منو راح ياخذنا اني بس راح امشي خلف نضال
طلعنا من البيت شفت باسم اخوي واكف برا البيت منتجي على سيارتة صافن من طلعنا باوعلي بعدم رضا ما موافق على روحتنا
دنكت راسي اضيع نظراتة مني
اشرت نضال على سيارة باسم
صعدت نضال واني صعدت صعد اخوي باسم عرفت هوا الي راح ياخذنا
مشة باسم طالع بينة لنجف
بكل مرة اروح لنجف جان يصاحبني شعور حلو شعور الفرح شعور الهفة لنجف
لاكن هاي المرة لا جان اكو شعور ثاني شعور حزين شعور اليأس....
جنت صافنة عيوني على الدرب ماعرف روحتي صحيحة ماعرف راح استفاد ماعرف راح شسوي
فتحت التلفون اكلب بية ماعرف شسوي بس اريد اشغل بالي بغير غل
فتحت الفيس ايدي ماخذتني لحساب السيد معراج ماعرف ليش من بين كل الي ب الفيس السيد معراج الوحيد الي اهتم اشوف حسابة ونشرة
شفتة ناشر قصة فتحت القصة جانت صورة اله واكف وخلفة سيارة سودة بيدة كوب حليب يباوع للكامرة كاتب على الصورة
" توكل على الله في خطواتك القادمة "
" هوا عالم الغيب وهوا من يرتب لك الغيب "
صفنت على العبارة اعيدها اكثر من مرة حسيتها رسالة الي حسيت العبارة تحاورني
عبارتة اجت ب الوقت المناسب غلقت التلفون ورجعت صافنة على الدرج بالي يرتب كلمات العبارة توكل على الله فعلاً الله وحدة من يرتب الغيب النا
مر الوقت والسيارة تمشي بينا بكل مرة نقترب من محافظة النجف يدب الخوف بداخلي تلزمني رجفة وخوفة ماريد اروح ماريد
لا قس لا تذكرني انتِ متوكلة على الله لاتخافين دام توكلتي على ربج ف انتِ رابحة بخطواتج
......
بعد مرور ساعات على طلعتنا رفعت راسي على صوت نضال
دارت نضال تباوعلي نظراتها عدم راضا وقبول
التفتت اباوع لبيت السيد عبد الرؤف سحبت نفس بثقة
نزلت من السيارة اباوع للبيت كلني ثقة وأمل اطلع من البيت بكرامة وعز اعرف هذا فعلي راح ارفع من نفسي هواي
مشيت لبيت السيد عبد الرؤف خلف نضال واخوي باسم
طرق اخوي باسم الباب ووكف منتظر واحد يفتح الباب
باوعت لطريق متذكرة ذاك الموقف متذكرة لقائي الاول ويا خلود من دخلت للبيت وشفتها واكفة بنص البيت تحجي ويا العلوية جهاد
اخخخ يا زمن هسة رجعت برجلي حتى ارجع اخليها تدخل لهاي العائلة
انفتح باب البيت التفتت اباوع لسيد ايليا وصدمتة بجيتنا
دنك راسة غاض البصر عني وعن نضال ماعرف هيا نضال هم حرام الواحد يباوعلها
تسالمو اخوي والسيد ايليا
فتح السيد الباب يسمح النا ب الدخول
دخلت اني وخلفي نضال
اباوع للبيت واسحب نفس بصعوبة.. كلش صعبة علية وتصعب علية نفسي حيل بهاي الحظة
طلعت العلوية لباب ماتعرف بجيتنا من شافتنا فتحت عيونها مصدومة
حجت تباوعلي بتوتر
_لباب :: هلا يمة هلا بقس
بحجايتها هاي الكل عرف بجيتي
ماطلعن العلويات لان اخوي باسم جان موجود
اشرتلي العلوية لباب ادخل لصالة
هزيت راسي ب اي سلمت عليها من بعيد ودخلت لبيت
تحت نظرات الكل وصدمتهم
جنت اشوف الحزن بعيون البنات والقهر
صارت عيني على العلوية جهاد صفنت بوجهه صفنة حسستها بفعلها
يمكن اذا اكو شخص غلطان بعد غل ف هيا العلوية جهاد جانت تعرف خلود بس مافكرت بيوم تنطيني علم وتحذرني !! ..
انفتح باب المصلى التفتت اني والكل على السيد عبد الرؤف
الي فتح عيونة بدهشة
جان مصدوم وفرحان بجيتي
باوعلي وحجة ب ابتسامة وترحيب
_عبد الرؤف :: هلا ببنيتي هلا بوردتي قس
_قس :: هلا بيك سيد
الكل رحب بية بفرح وشوق لشوفتي رغم صدمتهم واستغرابهم من جيتي
كعدت قدس بصفي تحاول تفهم سبب جيتي
ماحجيت شي وبقيت ساكتة على طول كعدتي جنت اهز رجلي بتوتر عيوني على السيد عبد الرؤف
الي جان مبتسم بحزن يهز راسة بحيرة
رفعت راسي وحجيت موجهه كلامي لسيد
_قس :: سيد عندي موضوع وياك
_عبد الرؤف :: اي بنيتي اي تفضلي اسمعج
_قس :: اريد احجي على انفراد يعني بيني وبينك
الكل استغرب من طلبي وكلامي للسيد
هز السيد راسة ب اي
وكف السيد ياشرلي على المصلى
_عبد الرؤف :: تفضلي بنيتي
كمت من مكاني امشي خلف السيد للمصلى
فتح السيد باب المصلى دخل واني خلفة
محد جان ب المصلى جان فارغ بس اني والسيد
كعد السيد واشرلي اكعد كدامة
كعدت كدام السيد افرك ايدي بتوتر ماعرف منين منين ابدي وشلون راح احجي
حجة السيد يباوعلي
_عبد الرؤف :: تفضلي بنيتي قس احجي اسمعج
_قس :: احم.... اي سيد
سحبت نفس احاول اضبط انفاسي
باوعت لسيد وحجيت بعد دقائق من السكوت
_قس :: سيد اكيد انت تعرف قراري اني وغل؟
_عبد الرؤف :: قصدج قرار الطلاق
_قس :: اي سيد
_عبد الرؤف :: لاتشغلين بالج ب التفكير غل مايتزوج غيرج ومستحيل تجي غيرج بحياتة
حجيت بنفي نافية كلام السيد ومعارضتة
_قس :: سيد اني ماجيت اريد ارجع علاقتنة اني اجيت حتى انهي علاقتتة
سكت السيد يسمع لكلامي رغم الانزعاج والحيرة الي جانت واضحة بوجهه
كملت كلامي
_قس :: سيد اني قطعت درب طويل واجيت قاصدتك
عكد السيد حواجبة ب استغراب
حجة
_عبد الرؤف :: امريني بنيتي
_قس :: سيد اتمنى تسمعني للاخير وتفهمني وماتردني... سيد اني جاية حتى اطلگ من غل بس قبل لا اطلگ اريد اطلب منك طلب واتمنى ماترجعني خايبة
حجة السيد بهمة
_عبد الرؤف :: شلون ارجعج خايبة بنيتي احجيلي وانا وياج بكلشي تكولي واعتبري تم
سحبت نفس بهدوء وزفرتة
باوعت لسيد وحجيت
_قس :: سيد اني جاية اطلب منك توافق على زواج غل وخلود وتوكف وياهم وتسندهم
هز السيد راسة ب لا نافي كلامي
حجة بعصبية ماراضي على كلامي
_عبد الرؤف :: مستحيل اوافق انا هيج جاي اغلط بحقج
_قس :: لا سيد انت ماراح تغلط بحقي لان اني اريد منك هيج.. سيد اني سمعت غل ب اذني يشكي من حبه الها وشفتها بعيوني جانت منتحرة لخاطر غل ماتحملت فكرة البعد عنة هيا مافكرت بنفسها بكد مافكرت بغل
كملت كلامي
_قس :: سيد ثنينهم يبحون بعض حب صادق ثنينهم ماتحملو فكرة البعد عن بعض اني
اشرت على نفسي وحجيت بعدم اهتمام
_قس :: اني عادي يوم يومين شهر سنة انسى راح انسى غل وانسى ذكرياتة كلها لان اني ماوصلت ويا لمرحلة الحب الي بينة جان تقليدي اني حتى مالحكت احفظة بس خلود... لا خلود تحبة وهيا عابرتني بمشاعرها اني على يقين وثقة ب الله اعرف الله راح يعوضني ب الاحسن اما غل ف مايريد الاحسن لا هوا يريد خلود
جنت احجي عيوني على السيد جان صافن يسمع لكلامي ب اهتمام
كملت كلامي
_قس :: اني جيتي هنا غلط بس اني شجعت نفسي اجي وما اهتميت لمشاعري لخاطر حب غل وخلود لان اعرف حبهم حقيقي اعرف حبهم يستاهل نقدم الهم كلشي
سكتت امسح على وجهي
رفعت راسي باوعت لسيد وحجيت بنبرة عصبية
_قس :: سيد ما اسامحك اذا وكفت ويا غل
رفع السيد راسة يباوعلي بصدمة
هزيت راسي ب اي وحجيت
_قس :: اي سيد اي اذا غل وخلود ماصارو لبعض ف اني راح اخلص عمري زعلانة منك انت ماتريد تساند غل حتى لا تكسر بخاطري مو ؟
_عبد الرؤف :: اي بنيتي ماقبلها على نفسي
مسحت الدمعة الي طاحت من عيني ب ايدي الترجف
باوعت لسيد وحجيت صوتي محتقن من الغصة الي كاتمتها
_قس :: بس اني خاطري نكسر سيد
حجيتها وسكتت مدنكة راسي
رجعت رفعت راسي
ابتسمت بحزن عيوني على غل
حجيت
_قس :: اذا هامك خاطري وتريد تجبر كسرتي ف اني اتمنى تماشي غل وتوكف ويا... سيد خاطري ماينجبر اذا ماشفت خلود جنة بهذا البيت
هزيت راسي وحجيت
_قس :: سيد خاطري ينكسر منك اذا ماوكفت وياهم وخليتهم يصيرون لبعض... سيد اني خاطري مو مهم لان كتلك راح اتخطى بس خلود لا سيد انت راح تشيل ذنب حزنها وكسرتها
ملت براسي وهدئت نبرة صوتي
حجيت بهدوء اتوسل لسيد
_قس :: سيد والله اني ماراح احزن على زواجهم بكثر ماراح انقهر اذا ماصارو لبعض.... ارجوك سيد ارجوك حاول تجمعهم
بلع السيد ريكة بتوتر مايعرف شيحجي
هزيت راسي وحجيت
_قس :: اعرف مايهون عليك سيد... بس اتمنى ماترجعني خايبة اتمنى ارجع واني فرحانة لان كدرت اكون السبب برجعتهم لبعض
دنك السيد راسة يتحسر
هز راسة ونطق ب الكلمات الي جنت منتظرة اسمعها منه
_عبد الرؤف :: ان شاءالله اسوي الي اكدر علية واحاول اجمعهم ب الحلال
ابتسمت بفرح
جنت فرحانة وحيل فرحانة لاول مرة ردت اشارك بفرحة غيري حتى وان كانت هاي الفرحة على حساب حزني
حجيت ب ابتسامة مطمئنة
_قس :: شكراً سيد فرحتني
باوعلي السيد من شافني مبتسمة ابتسم لابتسامتي
حجة
_عبد الرؤف :: يا بنيتي انتِ انسانة نظيفة وصاحبة گلب ابيض متأكد وواثق الله راح يرزقج ب الانسان الصح الي راح يعيشج اميرة
_قس :: ان شاءالله
كمت من مكاني والسيد كام وياي باوعتلة جان متردد ب قرارة
باوعلي وهز راسة ب اي
مشة يطلع واني خلفة
فتح باب المصلى صار كدامنا غل جان واكف مكتف ايدة كدام باب المصلى التوتر والخوف بوجهه
من طلعنا رفع راسة يباوعلي
درت وجهي منة اضيع نظراتة ماريد عيني تصير بعينة بعد هذا الانسان مو الي
باوع السيد لغل
حجة السيد بعد تفكير طويل بينة وبين نفسة
_عبد الرؤف :: اشمر يمين الطلاق على قس
_غل :: سيد انا...
_عبد الرؤف :: يلا غل
باوعت لغل
جان صافن يباوعلي بحيرة مايعرف شيسوي
دنك راسة محتار
رجع رفع راسة حجة
_غل :: قس...قس انتِ.. طالق طالق طالق..
حسيت الدنيا افترت بية وقتها شكد جنت رايدة ينطقها ويطلقني بس من صارت صدك حسيت الدنيا وكفت بية
ماخليت عيني بعينة بعد بقيت مدنكة راسي اتوسل لنفسي واشجعها ب الصمود والوقوف
حجة السيد
_عبد الرؤف :: ابدو اتحظرو اذن
_لباب :: لشنو خوية؟
دنك السيد راسة
رفع راسة يباوعلي ابتسم بوجه السيد اشجعة ينطقها
اتحسر السيد وحجة
_عبد الرؤف :: مشاية لاهل خلود
انفتحت عيون غل بصدمة يباوع لسيد
باوعلي ما مستوعب الي حجاة السيد
حجيت ب ابتسامة
_قس :: مهناي سيد
" شاهيناز "
الكل جان مصدوم بطلاق غل وقس ومحد مستوعب الي صار
وصدمتنا الاكبر بموافقة السيد على غل وخلود بعد رفضة المستمر
عرفنا جية قس جانت لهذا السبب قس اجيت تطلب من السيد يوافق على زواج خلود وغل !!!
بموقف قس هذا كلش كبرت بعيني
رفعت مقامها وخلت معلومة عند الكل.. هيا ب ايدها تخلت عن غل
بنفس الساعه الي شمر غل بيها يمين الطلاق طلعت قس واهلها من البيت
حتى بعد الحاح السيد والكل على بقائهم رفضو يكعدون مشوو بنفس الحظة
كعدت اني والبنات ب الصالة وحدة صافنة بوجه الثانية كلنا مقهورات على الي صار
كلنا نعز قس ونحبها وكلنا منزعجات على الي صار بيها
بس قس جانت شجاعة ما جانت مهتمة لا جانت راضية بكلشي وهذا الشي الي مخليني مطمئنة عليها
ب اليوم الثاني بدو يتجهزون حتى يخطبون خلود من اهلها عرفت اهل خلود معارضين على زواجها وابوها جان رافض غل والصدمة الاكبر من عرفت رنا ام غل تعرف بكلشي وساكتة وهيا نفسها رايحة خاطبة خلود من اهلها
طلعت من الغرفة
شفت البنات كاعدات على القنفة كالبات وجوهن بعدم رضا وانزعاج
حجت العلوية لباب ب ابتسامة تلبس نقابها
_لباب :: ماتمشن وياي يمة خطية تكسرن بخاطر غل
حجت قدس ب ضجر
_قدس :: هاا ومو عيب يكسر بخاطر اختي؟
_شاهيناز :: علوية اني مستحيل اشارك بهذا العرس مستحيل اتقبل خلود هاي
_عاتكة :: احس روحي خاينة قس لو رحت للعرس
_مهجان :: شلون نفرح بعرس غل وقس مقهورة؟
طلعت عطاء من المطبخ كلاص الماي ب ايدها باوعت للعلوية لباب وحجت
_عطاء :: هاي خلود ماريد اشوفها بيوم لان شوفتها عقاب الها
سكتت العلوية لباب تباوع النا صفح
التفتنا كلنا على طلعة السيد من المصلى باوع النا عاكد حواجبة ب استغراب
_عبد الرؤف :: ها بنياتي ماتمشن ويانا؟
_لباب :: عوفهن خوية عوفهن لا ياكلنك ب السانهن
فتح عيونة السيد بدهشة يباوع النا
طلعت عمتي جهاد من الغرفة التلفون ب ايدها
باوعلها السيد وحجة ب استغراب
_عبد الرؤف :: هاا جهاد انتِ هم ماتمشين؟
_جهاد :: لا سيد
هز السيد راسة ب اي ساكت
اشر السيد للعلوية لباب حتى يمشون
طلعت العلوية لباب والعلوية زهراء ورنا والعلويات الكبار بس هنا الي راحن لبيت خلود
السيد اخذ مشية جبيرة من السادة عرف اهل خلود معارضين اخذ مشيتة كلها شيوخ وناس معروفة حتى يخجل اهل خلود ويخليهم كدام الامر الواقع
دخلت للمصلى اقرة قرأن
شفت عماد كاعد ب المصلى بحضنة قرأن صغير يقرة بي
باوعتلة مبتسمة
منظرة حلو وهوا يقرة القرأن رغم صغر سنة لاكن عقلة وداخلة جبير
كعدت كدامة اسمع اله شلون يقرة والي جذب انتباهي قرأتة جانت صحيحة بدون اغلاط
رفع راسة يباوعلي ابتسم بوجهي خجلان من نظراتي رجعتلة الابتسامة بفرح
حجيت
_شاهيناز :: عفية عماد عفية
_عماد :: بابا يكول القرأن صديقك وقت الحزن
عكدت حواجبي ابتسامتي بعدها بوجهي
حجيت
_شاهيناز :: ليش انت حزين؟
_عماد :: اي حزين
اختفت ابتسامتي اباوع لعماد
_شاهيناز :: ليش عماد ليش حزين؟
زفر نفسة ب حزن مدنك راسة
بحركتة هاي اثار فضولي ودهشتي مستغربة لحزنة
تقربت ب اتجاهه اباوعلة
_شاهيناز :: عماد شبيك حزين احجيلي اني يمك اسمعك
_عماد :: راح تزعلين مني
_شاهيناز :: لالا ماراح ازعل ليش ازعل
باوعلي بحيرة متردد يحجي شجعتة بنظراتي يحجي
اريد اعرف شبي ليش حزين؟
حجة مدنك راسة يلعب ب ايدية
_عماد :: انا حزين لان بابا حزين
_شاهيناز :: ابوك حزين ليش حزين؟
باوعلي يأشر علية ب اصبعة
_عماد :: بسببج
_شاهيناز :: اني؟؟
هز راسة ب اي مكمل كلامة
_عماد': اي بابا حزين بسببج وانا حزين لان بابا حزين
_شاهيناز :: بس اني ماسويت شي
_عماد :: لا شهودة انتِ تعرفين بمشاعر بابا بس انتِ مامهتمة
فتحت عيوني بصدمة من كلامة شنو جاي يصير معقولة هذا الكلام من عماد الطفل؟ عماد عماد يحجي هيج؟؟؟
ماحجيت شي من صدمتي بس عيوني جانت تحجي كلشي جانت تحجي صدمتي بكلامة واتهامة الي بحزن ابو وعدم اهتمامي
كمل كلامة يلعب ب اصابع ايديه
_عماد :: شهودة تدرين شنو اتمنى؟
_شاهيناز :: شنو؟
_عماد :: اريد يصير عندي اخو واخت صغار العب وياهم
_شاهيناز :: اي عادي يصير عندك اخوان ليش لا
قوس حلكة بحزن يباوعلي
_عماد :: بس بابا مايقبل يتزوج وانا اريد اخوان
_شاهيناز :: هاا... اي لعد اصبر حبيبي اكيد ابوك راح يتزوج ماراح يبقى عمرة كلة اعزب
باوعلي يرمش بوجهي ببرأة
حجة بخجل وتوسل
_عماد :: شهودة حبابة وافقي تزوجين بابا حتى يصير عندي اخوان
هنا ماعرف اوصف صدمتي واحساسي بكلام عماد جنت مصدومة فعلاً بكل كلامة ماعرف شسوي ماكدر ارزلة لان طفل وجاي يحجي على احساسة وامنياتة ماجان ب ايدي غير السكوت
اباوعلة رجع يقرة قرأن عايفني بصدمتي وصفنتي
مسحت على وجهي ماعرف شبية جسمي كلة يرجف كمت من مكاني طلعت من المصلى
رجعت كعدت على القنفة صافنة شحجي وشسوي
صفنت راجعة ب الزمن
متذكرة الي صار البارحه بعد ما السيد وافق على غل وخلود
جنت واكفة برا ب الحوش ايدي على حلكي اكح بخنكة بلعومي يأذيني بكل مرة اكح يزيد الوجع
سمعت صوت جاي من خلفي
التفتت شفت جادح واكف ايدية ب جيوبة عيونة ب الارض
حجة بدون مايباوع الي
_جادح :: سلامتج علوية
_شاهيناز :: الله يسلمك ابو عماد
_جادح :: مصخنة؟
_شاهيناز :: اي ماخذة برد
هز راسة ب اي ساكت
شفته انسحب لداخل البيت رجعت اكح مرة ثانية تعبانه اريد ارجع لبيتنا بس ماكدر اروح واترك الاكشن هنا
مر الوقت على وكفتي ماكدرت ارجع ادخل احس روحي مختنكة اريد اتفس رغم التنفس عندي ضعيف عيوني ينفتحن وينسدن من التعب
فزيت من مكاني على صوت جادح جاي من وراي
التفتت اباوع لجادح شفتة واكف ب ايدة كوب حليب
اجه ب اتجاهي ماد الكوب ب اتجاهي
اخذتة منه متشكرة اله
طلع من جيبة شريط كبسول منه ب اتجاهي
وحجة
_جادح': هذا علاج من تكملين الحليب اخذي
_شاهيناز :: تعبتك وياي ابو عماد مشكور
هز راسة ب اي ساكت
التفتت عنة منطيتة ظهري
سمعتة يتحسر من خلفي
التفتت اباوعلة يريد يمشي منطيني ظهرة
جاي ارجع ادور وجهي من
توقفت من سمعتة حجة
_جادح :: بس هذا التعب اليستاهل اتعب اله علوية
حجاها ومشة مبتعد مني
صفنت ما فاهمة كلامة ماعرف يمكن جنت فاهمة بس اني ماريد استوعب كلامة
سمعت صوت يكرر اسمي
_:: شاهيناز... شاهيناز... ولج شاهيناز
_شاهيناز :: ها جادح هاا
عوجت مهجان حلكها تباوعلي صفح
_مهجان :: يا جادح شبيج انتِ
_شاهيناز :: يا جادح
_مهجان :: شبيها هاي تسودنت كومي يمعودة
عكدت احواجبي مستغربة
_شاهيناز :: وين
_مهجان :: ولج ام داوود راح توصل
_شاهيناز :: وين توصل
_مهجان :: ولجج اجتتت تشوفننيي
حجتها ايدها على راسها متوترة
مسحت على وجهي مستوعبة الي حجتة ام داوود ااي راح يخطب مهجان جاية تشوف مهجان اي شكو بيها
" مهجان "
فركت ايدي متوترة ماعرف شسوي ام داوود راح تجي ياربي جسمي كلة يرجف من التوتر زين ليش راح تجي هيا ااايي غير تشوفج يا مهجان شبيج
باوعت لعمتي كاعدة تباوعلي مستغربة حركاتي العشوائية
باوعتلها وحجيت بصوت محتقن من التوتر
_مهجان :: عمة ماريد جنت اشاقة من كلت لسيد موافقة
_جهاد :: اي نلعب احنا
صحت ايدي على راسي مو وقتج ياخالة حتى محد موجود بس عمتي
صعدت للغرفة اجهز نفسي
لبست فستان سمائي مرصع ب ابيض مخصر من جهه الخصر اكمامة طويلة فتحت شعري ونزلت اجهز الضيافة
سمعت صوت عمتي وهيا ترحب من الخارج عرفت ام داوود وصلت بقيت كاعدة ب المطبخ ايدي على حلكي مامستوعبة الي جاي يصير
دخلت شاهيناز والبنات يباوعلي ب ابتسامة
شجعني البنات اطلع من المطبخ
اخذت صينية الضيافة وطلعت من المطبخ مدنكة راسي متوترة
سلمت عيوني ب الارض اسمعها تهلي بية وترحب
رفعت عيوني شفتها كاعدة على القنفة بصفها نية شابة مبتسمة بهدوء
كامت من مكانها اجت ب اتجاهي تبوسني
_زينب :: يمة هلا هلا ب العلوية مهجة صدك مهجة يا يمة فدوة اروحلج
اخذتني بحضنها تبوسني واني مستحية ارد عليها بهدوء سلمت على البنية الشابة وكعدت بصف عمتي افرك ب ايدي متوترة
من اصعب الحظات الي مرت علية وقتها هاي الحظة جنت متوترة وخجلانة ماعرف الي جاي يصير
جانت امة قمة ب الهدوء والطافة ماعرف اوصفها شنو رغم التعب الواضح على وجهه بس جانت تنطي ايجابية وتوزعها
بنفس الساعه الي طلعت من البيت باوعت لعمتي وحجيت بفرح
_مهجان :: عمة كلشش حبيتهاااا
_جهاد :: اي مبينة من اهل الله
جنت فرحانة وبنفس الوقت متوترة بس جنت راضية وبداخلي احساس مرتاححح
حتى بعد مارجعو السادة والعلويات وعرفت وقتها اهل خلود وافقو وبنفس اليوم عقدو لخلود وغل
جنت كاعدة اني وشاهيناز ب المصلى نسمع لسيد وعماد كاعد ويانا
باوعلي السيد وحجة ب ابتسامة
_عبد الرؤف :: مابقى شي واشوف مهجة روحي عروسة
دنكت راسي خجلانة من كلام السيدد
باوع السيد لشاهيناز وحجة
_عبد الرؤف :: اي شهودة يمتى نشوفج عروسة؟
_شاهيناز :: هاا؟
_عبد الرؤف :: منتظر اشوفج عروسة بنيتي
حجت شاهيناز تباوع لسيد
_شاهيناز :: سيد اني ما ابالي احد ولا ابالي اتزوج
حجة عماد يباوع لشاهيناز مبتسم
_عماد :: شهودة وبابا
_شاهيناز :: هاااا
_عماد :: ليش ما تزوجين بابا
رفع السيد حواجبة بدهشة يباوع لعماد
التفت عماد على السيد مبتسم
_عماد :: هااا سيد
_عبد الرؤف :: ها ابني
_عماد :: سيد اقنع شاهيناز
رفع السيد اكتافة بماعرف
التفت على شاهيناز
_عبد الرؤف :: ها بنيتي؟
_شاهيناز :: هااا سيد؟
_عبد الرؤف :: شنو رأيج دام جادح البارحه خطبج مني مرة ثانية
فتحت شاهيناز عيونها بصدمة تباوع لسيد طفر عماد من مكانة فرحان باوع لشاهيناز وحجة
_عماد :: وافقي شهودة وافقي سيدد اقنعها توافق
التفت السيد على شاهيناز كاتم ضحكتة
عيوني جانت على شاهيناز وصدمتها
رفع السيد حاجبة وحجة
_عبد الرؤف :: هاا شهودة؟
_شاهيناز ': ها.. هها سيد؟
_عبد الرؤف :: القرار ب ايدج
حجاها وغمز لشاهيناز
فتحت شاهيناز عيونها بصدمة وجهها محمر من الخجل
باوعت لسيد وحجت بصدمة
_شاهيناز :: سيد لاتغمز
_عبد الرؤف :: هاا.. احم اي بابا اي صح عيب مايصير اغمز... هسة انتِ شنو قرارج
شبكت شاهيناز ايديها بتوتر ماتعرف شتحجي تباوع لسيد وتباوعلي
نطقت شاهيناز كلماتها بتوتر وخجل
_شاهيناز:: م... موافقة اي
حجتها وطلعت من المصلى تركض
باوعت لسيد يضحك وعماد يطفر بمكانة فرحان
جنت مصدومة من الي صار مامستوعبة
طلعت من المصلى اضحك بصدمة
سألت البنات على شاهيناز كالن راحت لبيتهم عرفت من خجلها ماتحملت ورجعت لبيتهم
مر الوقت واني التهيت انظف البيت ويا البنات كل ماتذكر شاهيناز وصدمتها اضحك والي صدمني اكثر السيد نفسة الي جان رافض جادح هوا الي قنع شاهيناز هل مرة
تجمعنا اني والبنات ب الصالة شكد اتصلت على شاهيناز حتى تجي تكعد ويانا رفضت متحججة بمرضها عفتها تاخذ راحتها
مر الوقت على كعدتنا اني والبنات
التفتت اني والبنات على صوت باب الصالة
عكدت حواجبي ب استغراب
من شفت السيد ومفرقد داخلين للصالة وخلفهم عمتي
ماجنت مستغربة بيهم لا جنت مستغربة ب الي جان وياهم
شفت بنية شابة تمشي خلف عمتي مدنكة راسها للارض ايديها على بطنها
دخلو كلهم للصالة السيد ومفرقد عيونهم ب الارض مبتعدين عن جهه الابنية
التفتت عمتي على البنية اشرت على القنفة وحجت
_جهاد :: ارتاحي هنا مهرة
