رواية هو لا يشبههم الفصل الثامن بقلم تبارك الوائلي
«جمانه»
طبيت واني خايفه حيل من مكان مااعرف اي شي عنه وزوج مااعرفه بس مجرد ابن خالي وابن عمتي واني كاعده والعالم كلها فرحانه وتغني.. شفت عادل ابن خالتي جان فرحان وشايل كاميرا تصوير وكل شويه يأشر اليه انتبه على الكاميرا الي بيده وياخذلي صوره وشفت حميد هم.. كلت بگلبي الضاهر بس هل الاثنين جايين للعرس مالتنه واجتي عمتي وهيه فرحانه مدتت السفره وصبت العشه للعالم واني كاعده بس اباوع عليهم.. وجانت كاعده فرح وشهد وهم ياكلن وياهم كملن اكل واجني يمي كلتلهن بزعت من الكعده.. كالن تعالي انصعدج فوك بغرفتج احسن ارتاحي كمت وياهن وصعدت فوك واجني خواته كلهن جانن فرحانات حيل وكالن انزعي البدله ولبسي ملابس النوم وهنا اتذكرت من رحنه اشترينه ملابس عمتي
ماخذتلي بس سيت واحد مالت نوم وهم من غير روب وملابس حيل قليله وحتى العبايه كالت وره العرس اخذها ماعندي هسه وامي قبلت بكل شي ماادري ليش بس اني مافرحت بالعبايه لان مااعرف البسها ولا اريدها.. لبست الروب واستحيت ابقه هيج كدامهن رحت طلعت شال وخليته على اكتافي وبقن كاعدات كلمن تحجي شكل..(لا مو تخافين وصيري سبعه وهاي سنه الحياه ومن هل حجي الي مادخل راسي ولا عجبني بس مابيدي شي بس السكوت لان عيب البنيه تحجي او تجادل اهلها)..وهنا سمعنه الهلاهل وكالو زفو العريس وصعد هو وهنه باركن اله ونزلن كلهن واخته بقت اسمعها توصي بيه دير بالك عليها.. وقفل الباب عبالك قفل روحي واني كاعده اجه باسني من راسي وكال الف مبروك زواج الدهر ان شاءالله.. اني رديت بلكوه ويبارك بيك كام نزع القاط ولبس تراك وكعد بصفي كال هاي شنو خاله شال على اكتافج.. كتله اي مو جانن البنات هنا كال اي وهسه راحن جره وذبه على صفحه واني مااكدر افسر احساسي وبقه صافن بوجهي كال اشكد كرايب بس مافد يوم انتبهت عليج هيج حلوه بس من كالتلي امي عليج يله انتبهت الجمالج وخوش اختيار اختارت امي اليه واني بگلبي اكلها عفتي العالم وختاريتيني اني عمه.. سكت وكال أنتِ تعرفين كل اثنين متزوجين شنو طلباتهم المشتركه كلتله ها لا مااعرف.. كال اني افهمج هسه..... صار الي بينه واخذني.. ومن خلص طلع من باب الغرفه ويصيح على امه وتجي ويحجي وياها وتهلهل وتاخذ منه الي بيده وينزل هو.. وهيه اطب عليه وتبارك اليه وتجي فرح تحضني واني ابجي وخالتي ام حميد هم باتت يمي وكالت كافي خاله بجي راح تطلع روحج كافي كل العرايس هيج مرت بعد شكو واني ساكته ماحجيت بحرف وبقن كاعدات يمي وخواته يحاولن يسكتني.. وشوية صعدت حماتي ساره وبيدها صينيه العشه وكالت يله حبايب انزلن خلي العرسان براحتهم ويتعشون اني كلتله فرح مااريد عشه ابقي يمي لتنزلين عفيه هيه كالت شبيج جمانه عيب العالم تباوع عليج اسكتي وراح يصعد بسام تعشي ويا والصبح اجيج اني اصلن بايته جوه يمج.. يله حبيبتي يله عيني نزلو...
صعد هو طبك الباب واني كلي ارجف وخجلانه اباوع بوجه اجه وخله الصينيه بالكاع واجه جرني من ايدي وكال يله نتعشه كومي واني اكله لا مااشتهي مااريد كال لا كومي ويايه وتعشي شنو متريدين شماكله أنتِ.. يله اكلي واني من خجلي كعدت اكل بالكوه وهو ياكل بشراهه وكال شبيج اكلي كلتله لا كافي شبعت ماريد بعد كال شكلتي انتي هنه لكمتين كتله لا مااريد وكمت كعدت على الجربايه.. وهو بقه ياكل وكمل شال الصينيه ونزل جوه...وبعدين صعد وقفل الباب واجه تمدد بصفي وكال اي حجيلي عليج اني مااعرف اي شي عليج واني الخجل ماخذني مااعرف شلون احجي كلتله ها شتعرف يعني كال اي احجيلي على ايام مدرستج او حياتج كلتله لا اني نعسانه اريد انام أنتَ احجي واني اسمعك.. كال خوش راح احجي لج.. هو يحجي واني من التعب والخوف ماادري شلون نمت وكعدت بـ 3 بليل شفته نايم واني مااجاني نوم بس اتكلب بالفراش ومامتعوده انام بغير افراشي واني تنزل دموعي واكول هسه ابويه نام لا هسه هم فكد مكاني لا.. اني شجابني هنا شلون تغيرت حياتي ليش موجنت مرتاحه وعايشه يم اهلي شجابني هنا شفته.. كام يتكلب سويت روحي نايمة وانداريت على صفحه.. كعدت الصبح مالكيته بالفراش نازل باوعبت للساعة بـ 8ونص شوكت كعد ونزل.. كمت وجان تندك الباب وطبت فرح وزينه...
زينة: الف مبروك عروستنه صح النوم.
جُمانه: الله يسلمج..
زينة: اجونه خطار عمتي ام هدى تريد تبارك الكم نزلي تريكي ويانه.
جُمانه: اي نازله.
فرح: فرح اوكفي اخليلج مكياج.. شلون اذا رحت منو يخليلج مكياج.
زينه: لا طيبه تعرف اخليها اتعلمها شلون تحط مكياج.
فرح: ها هم زين تعرف طيبه يله نزلو.
ونزلنه وسلمت على الكل وهو جان كاعد ويشرب جاي ومبتسم.. اني كعدت بصف عمتي ام هدى.. كالت الف مبروك عمه زواج الدهر ان شاءالله..ورجعت عليها تسلمين عمه وتريكنه وكملنه ريوك.. انطتني عمتي ام هدى فلوس مباركه عرسنه واني اكللها لا مااريد عمه.. وخذتهن عمتي وخلتهن بيدي وكالت هاي نكوط عرسج الي ينطيهن الج اخذيهن هذه واجب واني ماشيه بي تره كلتلها اي عمه وسكتت.. وبعدين فرح لبست عبايتها وكالت راح اروح للبيت ويه عمتي ام هدى راح توصلني لبيتنه بطريقها واني ابجي وهيه تسكتني وتكلي والله اجيج وره كم يوم احنه مو غربه بيت عمتنه هذه.
وراحت فرح خذت گلبي وياها.. وبقن بس خواته كاعدات يسولفن كلام عادي وعن منو اجه للعرس وشلابسه فلانه وعلانه ومنو انطه واجب ويحجن واني ساكته بس اسمع الهن.. وهو اجه صديقه بالباب وطلع وره شويه كالو اجه سامر وصدك طب وسلم عليه وبارك اليه جان جايب ويا تراك وانطا البسام وكله روح انزع الدشداشة ولبسه وراح اخذ منه ولبسه جان لونه مشمشي وحلو..وعمتي كلتله ليش كلفت نفسك عمه.. وهو كال الها شلون بسام اخويه ماجايبله شي.. وراد يروح..وعمتي كالتله وين ابقه تغده يمنه وروح.. كال الها.. لاوالله مااكدر تدرين اليوم جمعه وعندي قرايه تعرفين السادس صعب ويريدله حيل.. وعمتي كلتله اي والله صدك سلملي على امك..وهو كلها الله يسلمج وطلع..
وحجت ساره...
سارة: شكو جايب تراك عود؟.
طيبه: والله ماادري ومنو عتب عليه هسه.
طب بسام كال كافي حجي زايد شنو هل حجي غير اخويه واجه يبارك اليه وجابلي ويا تراك شكو بيها.
طيبه: والله اني مااريد جيته.
بسام: كافي طيبه وسدي حلكج.
طيبه: اي سكتنه.
اني بس اباوع ما احجي وياهم بس رغم بسام اصغرهن بس جانن يخافن منه وعصبي وسكتن كلهن بس عمتي حجت.
أم بسام: اي يمه مابيها شي اخوك.. يله كومن صبن الغده.
وصبو الغده واني كاعده اباوع عليهن وكمت اكل وياهم وهمه يحجون بينهم على احداث العرس وبسام كال...
بسام: جمانه ماسمعنه صوتج.
جُمانه: ها شحجي اني قابل.
أم بسام: لتستحين عمه وسولفي ويا خواتج.
كلتله اي عمه.
أم بسام: بسام يمه البارحه ليش مزعل خالك ابو هدى؟.
بسام: هيج يمعوده.. يمه الخاطر ربج عوفيني من اخوج هذه اكبر بلوه.. ومعقد حيل يعني يفشلني كدام اصدقائي وميريدهم على مود شنو واحد من أصدقائي جان شارب.. شعلي هو يدخل بكل شي.. هو جاي يبارك ماله علاقه بيه خوش.. وعود احجي ويا اخوج تره اكلب البيت عليهم.
وعصب حيل وعمتي تكله لا عيني على كيفك خالك هذه كافي اسكت واني صافنه عليهم وخايفه من صوته العالي وعصبيته وبگلبي اكول ليش يحجي على عمي واني شكد احب عمي ونزلن دموعي وهو شافني و حجه...
بسام: شبيج جمانه ليش تبجين.. شكو.
جُمانه: ليش تحجي على عمي؟.
بسام: اسمعي مو بس عمج أنتِ..تره هو خالي واحجي بكيفي زين مالج دخل أنتِ.
وخله وطلع واني صافنه على تصرفاته.. وبعدين اجه كال لساره انطيني الحنطه الي بالمطبخ اريد اصعد اوكل الطيور..واخذهن وصعد واني صافنه عليهم..عمتي شافتني و كالت...
أم بسام: بنيتي لتزعلين منه تره هو هيج عصبي عوفي ولا تحجين ويا بنيتي.
جُمانه: زينه بسام صدك عنده طيور بالسطح؟.
زينه: اي خيه ماتدرين عنده برجين مال طيور.
جُمانه: لا والله وهسه عرفت منج.
أم بسام: اي واذا طير طيور هم يضوج ويتونس يمهن شكو بيها.. ساره شوفي الباب.
كامت ساره وطب زوج زينه سلم عليه وبارك اليه وراحت زينه تجمع ملابسها..و زوج زينه يباوع عليه من جوه ليجوه.. واني اكول بگلبي (شكد جان ابويه ينتقد العدهم طيور ويكول مو خوش ولد وميدري طلع ابن اخته مطيرجي) هذه شبيه يباوع عليه..اوفف يربي هذا يباوع وعينه زايغة.. و بسام ميحترم لاجبير ولا صغير ويتجاوز على عمي اني شجابني عليهم ماادري شكول عليج يمه.. نزل بسام وسلم على زوج زينه.. وراحت زينه لبيتها واني صعدت لغرفتي امدد ماكدرت انام.. الغرفة اباوع عليها مابيها مبرده بس البنكه وحاره جان صيف بشهر الخامس صعد هو اجه بصفي حضني وباسني كال زعلتي من كلامي اني احب خالي بس هو يتدخل هواي كلتله ميخالف غير علمود مصلحتك.. حجه لا اني مااحب احد يدخل بحياتي عوفينه من كل هل حجي وحجيلي عن نفسج كلتله شحجي يعني اكلك الغرفه حيل حاره شو مابيها مبرده كال...
بسام: مو امي كالت من تاخذ الراتب تجيب مبرده ماعدها هسه.
جُمانه: ها ماعدها .. زين اريد اسألك سؤال.
بسام: كولي.
جُمانه: شلون خطرت على بالك وخطبتني اني.
بسام: أنتِ اكيد تعرفين عندي علاقه بسرور بنت عمتي وتركنه بعض.
جُمانه: ليش انفصلتوا شنو السبب؟.
بسام: امي ماقبلت عليها ورفضت اتزوجها اليه وشكد حاولت وياها ماقبلت ابد وهيه اختارتج اليه.. واني الصدك لسه احب سرور ومانسيتها بس شسوي مااكدر اجبر امي عليها.
جُمانه: واني؟.. لعد ليش خطبتني اذا لسه تحب سرور وگلبك وياها.
بسام: ليش اضيع هيج فرصه مني عادي قبلت من كالتلي امي عنج وين الكه احلى منج وماوافق عليها.
جُمانه: بس مو گلبك ويه غيري.
بسام: عادي گلبي بمرور الزمن ينسه اكبر واحد.
جُمانه: أنتَ صدك تحجي.
بسام:اي وليش مستغربه؟.. خلي اصعد اطير طيوري احسن من ملحتج امبينه تلحين هواي أنتِ.. وسدي سالفه سرور بعد لان صارت ماضي.
وعافني وصعد.. اريد انام مااكدر حاره الغرفه نزلت جوه بالصاله لكيت عمتي وطيبه وساره كاعدات يسولفن ويضحكن وعمتي كالت...
أم بسام: ها عمه تعالي كعدي وين رجلج؟.
جُمانه: صعد فوك يم طيوره.
أم بسام: ها لعد اكعدي يمنه.
خليت المخده ونمت بالصاله على هوا المبرده..
وكعدت بالليل ومانمت لان تغير مكاني.. واسمع ساره تحجي ويا عمتي كالت....
ساره: يمه احجي ويا ابنج اكو عريس مكابل طيوره وكاعد وعايف عروسته وين اكو هيج بس كليلي.. كون هسه ابنج مايطلع من غرفته ومكابل جمانه.. المثلها ماتنعاف.. يمه تدرين شقصد اني.. ابنج امبين ميجوز من سوالفه ابد ولا يعقل.
أم بسام: كافي سدي حلكج لينزل ويسمعج.. مابينه حيل ليگوم يكسر البيت علينه لو يرجع على الجام يكسره.
ساره: اي سكتنه.. بس عيب تره لحد هيه ماجبتي مبرده خطيه حاره عليها.
اني اسمع ومصدومه شنو يگلب البيت عليهم شنو يكسر الجام بقيت خايفه منه وساكته صعدت نمت بغرفتي وهو ماكو.. بقيت بين الخايفه وحدي
وبين الافكر.. غفيت وكعدت الصبح لكيته نازل كلت الحمدلله احسن لا شفته ولا حجيت ويا.. نزلت جوه لكيت طيبه وساره يتريكن كالت ساره..
سارة: تعالي تريكي ويانه.
واني هم جنت حيل جوعانه وبس البنات اكلت براحه مااكدر اكل ويا احس حتى الكمه ماتنبلع كلت لساره..
جُمانه: وين عمتي.
سارة: اليوم راحت للمحل فتحته تعرفين متكدر تعوف رزقها.. صار 3 ايام من تزوجتوا
جانت معزلته.
جُمانه: اي خطيه لعد شسوي.. زين وبسام ماشفته يم طيوره.
سارة: طلع لشغله على باب الله قابل يبقه كاعد.
جُمانه: بس بعده ماصار اسبوع على زواجنه.. صالح اخويه من اتزوج بقه 10ايام ماراح لدوامه ولا طلع الباب البيت.
ساره: اي كلمن وطبعه.. حبيبتي جمانه اني هم خابر زوجي راح اروح بعد شويه وتبقين أنتِ وطيبه بالبيت.. ودير بالج عليها انتن خوات.. اني كلت لبسام لا يطلع لشغله يبقه بالبيت.. شو طلع استغربت منه...جمانه امبين ماكو شي صار بينكم بعد موو؟.
جُمانه: ياا ساره شبيج عيب هل حجي.
سارة: احنه خوات وبنات بيناتنه مابيها شي مو صح كلامي.. من عرسكم بعد ماصار شي بينكم.
جُمانه: اي صح.
سارة: يا هذا صدك يحجي.. العنده مثلج هم يعوفها.
جُمانه: لا عوفي احسن براحته خلينه هيج عفيه سدي السالفه اني مااحب احجي بهيج شغلات.
سارة: خلي اكوم اغسل الفراش وأنتِ اغسلي مواعين الريوك.
جُمانه: أنتِ طابخه.
سارة: اي خيه طبخت من راحت امي.. انطيني الصونده وفتحي البوري.
طيبه: منو بالباب اي جايه.. سارة اجه زوجج
سارة: تعالي جمانه أنتِ غسلي الفراش راح اروح اني البيتي.
جُمانه: اي الله وياج.
سارة: بعد ما اوصيج جمانه على اهلي واخويه.
جُمانه: اي ادللي.
راحت وبقت طيبه ترش ماي بالصونده واني اغسل شريت الفراش.. واني تعبانه مامتعلمه هيج شغل اسوي.. نشفت الطرمه وجان اشوف طيبه تعدل بشالها كلتله وين رايحة طيبة كالت...
طيبة: راح اروح البيت جارتنه بصفنه الحايط على الحايط اني اضوج بالبيت ومتعلمه اروح اكعد يمها ومن يأذن الظهر ارجع للبيت قبل لاتجي امي.
جُمانه: واني طيبه اخاف وحدي.
طيبة: ياا شبيج صرتي مره ومتزوجه مااتأخر عليج بس شويه وارجع.. جنت ملتهيه بعرسكم ومارحت عليها.
جُمانه: اوكفي طيبه بس احجي وياج....
طلعت بسرعه وطبكت الباب واني بقيت صافنه البيت مساحته 150متر بناء طابقين وخفت وحدي رحت كعدت بالطرمه جانت بيها شجرة نبگ وكعدت اباوع شلون الهوا يطير الورق مالتها واني ابجي واباوع للسما واكول ربي بس خلصني من هل بيت اني شجابني عليهم جنت يم اهلي محد يعوفني وحدي بالبيت افتقدت لمت خواتي وزوجه اخويه وابويه.. واني ابجي وكل شويه اسمع طگطگة بالبيت.. واني ارجف.. اندكت الباب ورحت اشوف منو...
جُمانه: منو؟.
بسام: اني بسام افتحي الباب.
بسام: هاي شبيج ليش عيونج هيج.. باجيه؟.
جُمانه: اي.. اني اخاف وحدي بالبيت وطيبه راحت يم جيرانكم.
بسام: وساره وين راحت.
جُمانه: اجه زوجها وراحت.
بسام:كافي ياعيني لتبجين هسه تجي طيبه واني اعرف شلون احجي وياها.. بعد ماتخليج وحدج بالبيت.. تعالي طلعيلي ملابس اريد اسبح.
باوعت على ملابسه شلون بيهن دهن وكلتله...
جُمانه: أنتَ وين جنت؟.
بسام: بالشغل.
جُمانه: اي شنو شغلك.. شتشتغل.
بسام: خلي اسبح ومن اطلع احجيلج.
طلع من الحمام كال تعالي نصعد بغرفتنه فوك واحجيلج.. كلتله لا هسه تجي عمتي وطيبه... كال لا ماتجي امي هسه تعالي.. تره عفتج كل هل ايام كلت تتعودين عليه تعالي وجرني من ايدي وصعدت فوك..
وصارت العلاقة بينه.. ومن خلصنه طبيت للحمام..
ومن طلعت سمعت الباب يندك.. اجت طيبة وسمعت عله صوتهم.. كال الها.
بسام: بعد متعوفيها وحدها بالبيت خوش.. من تجي امي يله عود اطلعين أنتِ... مفهوم كلامي.
طيبة: اي اي بعد ما اروح.. اني ماعبالي هيج تخاف.
اجتي عمتي وصبيت الغده كالت...
أم بسام: شبيه عمه عيونج منو وياج.
بسام: محد وياها جمانه تخاف تبقه وحدها بالبيت وطيبه عايفتها ورايحه يم بيت ابو زينب.
أم بسام: بعد متروحين طيبه وتعوفيها.. عود العصر روحي.
طيبة: اي افتهمنه يمه شبيكم خبصتوني.
أم بسام: كافي ليسمعج اخوج.
طيبة: باعي اكلج تره اني مااربط نفسي علمود بنت اخوج خوش.. اروح وبكيفي.
أم بسام: كافي اسكتي انطيني الجاي.. بنيتي سمعتيها اكيد صوتها يلعلع ميخالف عمه هاي خطيه لان معوقه وبقت بلا زواج من دون خواتها هيج صارت بيها شلون الحاله النفسيه.
جُمانه: لا خاله عادي مازعلت.
أم بسام: اي عفيه ببنيتي ام عقل الجبير.
جُمانه: بس والله عمه اخاف ابقه وحدي.
أم بسام: لا بعد مااخليها تروح ماعليج منها.
جُمانه: اكلج عمه البارحه بالكوه نمت بالغرفة حيل حاره.
أم بسام:اي تعالي جوه أنتِ وبسام نامي يمنه بالصاله مابيها شي.. احنه شعدنه انتو نامو وافرشي يم الشباك واحنه هنا بلكي.. نهايه الشهر اجيب مبرده الكم مابقه شي للراتب مال خالج بس 20يوم.. نامو مؤقتاً يمنه.. ولو انتو بعدكم عرسان بس ميخالف شنسوي الظروف تجبر الواحد.
اني سكتت وهم كيفت انام جوه يمهم اقلها مبرده وتليفزيون اباوع مسلسلات.. اجه بسام لكاني فارشه اله واليه يم الشباك.
بسام: امي كالت هنا انام.
جُمانه: اي بس شكم يوم على ماتجيب مبردة.
بسام: اي شكو بيها يله انام هنا.
وماحجه وجان مقتنع انام يمهم.. ثاني يوم كل معتاد طلع بسام وعمتي قبل لا اكعد وكعدت اتريكت اني وطيبه وكالت..
طيبة: روحي لهي نفسج نظفي البيت هسه اجيج لان امي طبخت قبل لا تطلع وكالت اليوم من تجي تعلمج تتطبخين
جُمانه: بس أنتِ مو كلتي مااعوفج.
طيبة: لا حبيبتي مااكدر اني اضوج ولتسويلي مشاكل وياهم.. تعلمي مو صغيره أنتِ.. الي تتزوج بعد تتعلم اي شي.
وطلعت واني انظف بالغرف والبيت واتلفت ورايه..
صارت عاده عندي اكعد وابجي وهمه يجون يشوفوني كامو ميحجون ابد.. كالت عمتي تعالي اعلمج هيج وهيج تطبخين وكالت راح اروح العصر اجيب شربت وكيك باجر السبعه مالتج ويجون اهلج شكد فرحت من سمعت يجون اهلي وتعلمت على الطبخ صح مو ذاك الطبخ بس هم زين ينوكل
وكالت عمتي جارتنه ام ضياء تعرف تخلي مكياج واسوي تسريحه راح اخليها اتحطلج مكياج وتسويلج تسريحه.. كلتله ليش منروح للصالون كالت لا ماعندي فلوس صالون هيه كم ساعه وتخلص كلتله زين وماالبس بدله؟ كالت لا ميحتاج البسي الطقم الي اشتريته الج مايحتاج.. اني سكتت بس بداخلي اكو غصه كلت ليش.. اشو اهلي ودو سندس صالون وبدله وصور يم المصور اني ماكو شي حتى صور العرس الي اخذهن عادل ابن خالتي كال احتركن سبحان الله ولا صوره اخذت بعرسي رحت سبحت ولبست الطقم جان تنوره زيتوني وقميص زيتوني حيل حلوات واني فرحانه بيهن واجتي جارتنه ام ضياء.. باركتلي..
أم ضياء: اكعدي احطلج مكياج.. فدوه تخبلين طلعتي..بس بعدج صغيره على الزواج
جُمانه: والله ماادري اهلي زوجوني.
أم ضياء: اكلج حبيبتي شعرج طويل حيل واسود راح اسحبه شويه الج لان هو سرح.
جُمانه: متسويلي تسريحه؟.
أم ضياء: لا مااعرف اسوي.. اني اجتني عمتج وكالت سوي الجنتي.
كتله بگلبي لعد سوتج تعرفين تسوين تسريحات وأنتِ متبرعة لزوجه بسام تسويلها طلعت عمتي هيه جايتج.. سكتت لان بوكتها جان مااعرف غير السكوت وفرحانه بجيت اهلي واجوي وبقيت احضنهم كلهم.. امي وفرح وشهد وسندس وجايبه التوم وياه وميوسه بنت ام ميس جارتنه تبوسني وتكلي جمانه صرتي عروسة كلتله اي حبيبتي وجانت جايبه امي بطانية هدية اليه وكلتله...
جُمانه: يوم ابويه حبيبي شلونه هم يذكرني من ياكل من ينام.
أم صالح: اسكتي كل يوم يتعارك ويايه ويكلي شلون قنعتيني وخليتيني ازوجها.
شهد: ولج البيت مو حلو بلياج جمانه.
جُمانه: حبيبتي شهوده.
وبقو للمغرب يمي...
سُندس: شلونهة بسام وياج جمانه.. اكيد متعبج.
كلتلها بگلبي بس هذا الشي مفضل بي عليه وخلصانه منه.
شهد: سندس تعرفين جمانه تخجل عوفيها.
سُندس: هسه شكلنه.
جُمانه: ها شهد هم بعدج تتناكرن أنتِ وياها.
شهد: اي عيني لعد شتريد من زود محبتها عندي اني اتعارك وياها.
أم صالح: يله يمه ان شاءالله بعد يومين وتجون يمي على الغده عازمتكم.
أم بسام: ان شاءالله ام صالح خيه نجي.
أم صالح: اي بسام بعد ما اوصيك على جمانه.
بسام: ادللي عمه بعيوني جمانه.
أم صالح: وكول لأخوك سامر يجي على الغده هم اريد اشوفة.
بسام: اي ادللي.
جُمانه: مع السلامة.
راحو اهلي واخذو گلبي وعقلي وياهم وكمت ابجي...
أم بسام: هسه عليمن هل بجي يا عمه كله خطوتين روحي بدلي ملابسج وسوي العشه.
رحت غسلت وجهي وبدلت وسويت الهم العشه استغربت عمتي متجيب لا لحم ولا دجاج ولا سمك سالتها كالت والله عمي اني انطلبت على عرسكم وماعندي اجيب لحوم اني.. كلتله لا عمه نعمه فضيلة بس اني سألت عبالي متحبوه ومتجيبين.. كالت لا شلون... سكتت والعصر طلع بسام استغربت مايسبح كل يوم ولا يبدل يطلع بملابس الشغل وهنه بيهن لكع الدهن شكد كلتله غيرهن بدل ماقبل الظاهر طبعه هيج وشكد سألتة شنو شغلك ميكلي ويغير الموضوع.. اندك الباب طب هو واخو سامر سلم وكعد.. اباوع سامر مبدل وعطره سابقه كلت بگلبي هذا مو اخوك الجبير ليش ماطالع عليه لاتبدل لا تتعطر.. سلم وراحو هو ويا.. بس سمعته بالباب كله..
سامر: ليش بسام متبدل..هاي ملابسك مو مال واحد يطلع بيهن.
بسام: اني ماعندي ملابس مال طلعه.. بس ملابس الشغل.
سامر: اي ارجع البس الاتراك الي جبته الك وامشي اشتري ملابس طلعه.. هسه أنتَ كبرت وتزوجت ولازم تهتم بمظهرك الخارجي.
بسام: اهووو سامر امشي يمعود عوفني براحتي امشي.
وطلعو سوه واجوي وره العشه جايب سامر تشيرت حيل حلو لونه نيلي البسام كلتله حلو والله كال هذا سامر اشتره اليه كلي باجر من تروح للعزيمة مال بيت عمي البسه وسلم وراح.
وصار وكت طلعتنا واني البس وارتب نفسي طبعاً طيبة علمتني شويه شلون اخلي مكياج..
وعمتي كالت روحو انتو واني من اعزل المحل اجي وراكم وجنت شكد فرحانه راح اروح اشوف ابويه واهلي وبيتي.. اوففف شكد اشتاقيت الهم هواي.. رحنه وهمه يمشون كدامنه واني وطيبه وراهم
وطبيت للبيت.. اخ بوستهم كلهم واخذت جهال اخويه ابوس بيهم.. امي كعدت بالصاله هيه وبسام و سامر يحجون.. واني طبيت جوه يم فرح وشهد
وسندس مابطلت اسألة من كعدت لحد ما كامت
حجت شهد....
شهد: شبيج جمانه شو احسج تردين بس سندس تكوم وتحجين.
جُمانه: اي والله شهد.
شهد: ها خير ليش البجي يا عيني فهمينه شكو.
جُمانه: اني هناك اخاف ابقه وحدي بالبيت وهمه يطلعون ويعوفوني وحدي.
فرح: اسكتي جمانه لتسمعج سندس وتشمتين الناس بينه اسكتي هسه واني احجي ويا امي اخليها تحجي ويا عمتي.. ليش وطيبه وين.
جُمانه: تروح البيت الجيران يوميه تكول اني متعلمه اطلع مو احبس نفسي علمودج.. طبعاً تحجي وراهم مو كدام عمتي وبسام.
فرح: كافي امسحي دموعج ابويه على جيه اني هسه اصيح امي بسكوت واحجيلها قبل جيت عمتي وافهمها من يجي ابويه ويلتهون الولد ويا اكلج سامر شجابه وياكم.
جُمانه: امي عزمته واصرت يجي وبسام كله تعال.
شهد: ها اكول عمره ماجاي علينه.
فرح: اي غير امي ماتتقرب لأمه تخاف لا تزعل عمتي.
اي بس فرح هو يجي مرات علينه عصريه على بسام وعرفت شغله بيهم بسام يحبه ويريد جيته..بس عمتي وبناتها ميردنه.
فرح: اي طبعاً ابن ضرتها العمتج اكيد متحبه.
فرح: اجه ابويه على كيفج جان وكعتي شكد ثوله جمانه نفس ثولها كومي خلي نصب الغده مدام ابويه اجه شهد كومي.
ابو صالح: هلا بعزيزه روحي.. يابه شكد مشتاق الج.
جُمانه: واني هم بابه.
ابو صالح: كافي بجي بنتي يله اكعد خلي اسلم على الشباب.. شلونكم شباب.
سامر: هلو عمو الحمدلله بخير.
بسام: هله خالي الحمدلله.
ابو صالح: وين امك شو ما كو.
بسام: هسه على جيه.
ابو صالح: يله سمو بسم الله واكلو.
أم بسام: اي عاشت ايدج فرحه على الطبخ.
فرح: بالعافية عمه عاد تتطبخلج جمانه لو بعدها ماتعلمت.
أم بسام: لا علمتها وهسه هيه الي تطبخ واجي الكه هدمتي نظيفه واكلتي الحمدلله والشكر بقه الخبز
ان شاءالله تتعلم عليه واعلمها.
جُمانه: ياا والله اخاف اني من التنور مااتعلم.
أم بسام: لا بنيتي اعلمج لعد اني قابل دايمتلج .
أم صالح: الج طولت العمر خيه ام بسام ان شاءالله تتعلم.. اكلج خيه قبل لايسمع اخوج ليش طيبه تطلع وتعوف جمانه بالبيت وحدها.. داده هاي جبانه وتخاف وتعرفيها بزر دلال.
أم بسام:هيه كالتلج.. والله خيه شكد احجي عليها ميفيد مو تدرين بطيبة مثل الحالة النفسية بيها.
أم صالح: اي خيهربس هاي هم مالها ذنب.
أم بسام: لا ان شاءالله احجي ويا طيبه.
أم صالح: داده هيه لان مقهوره حجت لخواتها.
أم بسام: اي ادللي خيه.
بسام: يله يمه خلي نروح.
جُمانه: بعد وكت.
بسام: لا عندي شغل يله كومن.
جُمانه: لو بس اعرف شغلك شنو اوفف والله بعدني ماشبعت منكم.
فرح: ميخالف احنه نجيج كل يومين والثالث علمود متضوجين.
جُمانه: اي عفيه فرح تعالو عليه فدوه.
فرح: اي حبيبتي.
بسام: اكلج يمه اني لكيت شغل حراسات ليلية بالسوك اروح بـ ( 12وارجع بل 7 الصبح).
أم بسام: بس بعدك عريس يمه شلون تنام بره البيت.
بسام: لا يمه شلون مااشتغل قابل ابقه كاعد بالبيت وشنو واذا عريس عادي.. وهم اني بعد تعبت من شغل العمالة خلي ارتاح بس باليل وبالنهار انام.
أم بسام: بكيفك وليدي.
بسام: جمانه سويلي العشه علمود اروح.
جُمانه: ها شغلك يبدي من اليوم.
بسام: اي من اليوم.
رحت سويت العشه واتعشينه وهو راح لشغلة..
واجه وجه الصبح وراد اسويلة ريوك.. بس اشتميت بيه ريحة موطيبة شكيت بالموضوع معقولة يشرب.. اوف يربي ناقصني هم مشكلجي ومطيرجي وفوكاها سكير..حطيتلة الريوك وطلب افرشلة حتى ينام.. آمنت لان هو نايم بالبيت..على الأقل اكو واحد وياي.. رحت نظفت البيت كله من فوك ليجوه كنستة ومسحتة وطبخت وطفيت الاكل.. ورحت غسلت ملابسه وملابس عمتي وطيبه كلهن بأدية لان ماعدهم غسالة وشريتهن.. واجتي عمتي وصبيت الغده وتغدينه وشربنه جاي وهوه نايم كعد العصر كال جوعان سويتله اكل وبدل اجاه سامر وطلعو هو ويا للسوك.. هل ايام يجي يوميه العصر سامر ويجون وره صلاه العشه سامر يروح البيته وهو يصعد لطيوره فوك يتعشه ويروح لشغله علاقتنة ماالها اي معنى لا يحجي وياي ولا يتشاقه ابد كلش ماكو عبالك اخوان.. اتذكرت ابوية شلون يتشاقة ويضحك ويه امي ورغم همه كبار بالعمر. واني احس نفسي عبالك جابوني مثل الخدامة بيتهم بس اطبخ وانظف واغسل ملابسهم.. ابد مالهم علاقة بيه..
وضلو مثل كل مره يرجعون المغرب هو وسامر..ومره اجه سامر لوحده وجان امبين حيل ضايج سلم علية وكال.. رحمه لخالج جمانه جيبيلي ماي.. اني حسيته يريد يحجي شي العمتي بس ميريدني اسمعه بس اني ذكيه رحت بسرعة وجبت الماي وكفت اتنصت عليهم.. وجان اسمع سامر يكول العمتي...
سامر: عمه ابنج يشرب معقوله متكدريله وتمنعي من الشرب كم مره نصحته وحتى عفت وقتي وكمت اجي اخذه وياي وافتر بي مثل الطفل علمود يعوف اصدقائه وبعد مايمشي وياهم.
أم بسام: والله يايمه كيفت من شفتك عايف وقتك وتجي يوميه عليه وتلهي علمود يعوفهم بس هو ميفيد بي الحجي اخوك شسوي عبالي ازوجه ويتغير ويعقل ويكعد بس لا نفس تصرفاته.
سامر: والحل عمه احجي ويا أنتِ.
هنا اني جمدت كل اطرافي واني اسمع..فتت عليهم وحجيت..
جُمانه: هااا عمه رحمه الله والديج يعني أنتِ
مزوجتني ابنج حتى يتوب من سوالفة.. شنو ذنبي اني وشلتي خطيتي.
أم بسام: لا ميشرب بطل.
جُمانه: والي سمعته هسه بينكم أنتِ وسامر اتضحكين عليه؟!!.
أم بسام: لا والله يتوب ويعقل بعده صغير بس أنتِ اصبري عليه وشوفي.
جُمانه: خوش راح اسكت واشوف اخرتها ويا ابنج شنو.
راح سامر وبسام كل معتاد تعشه وراح لشغله وضل يروح بـ 10 واني افرش بالصاله وانام يم عمتي وطيبه.. كعدت العصر وجنت كلش ضايجه..فـ كلت الطيبه راح اكول البسام ياخذنه يم اهلي اني وياج..
كالت اب واني رحت لبسام وهو وافق وكال بدلن.
طيبة: بس كليلي أنتِ شوكت تتعلمين تلبسين عباية.
جُمانه: مااعرف البس عبايه وبعدين عمتي لسه مااشترتلي عبايه.
اجه سامر ورحنه سوه.. شو بس كعدنه ساعة وكال يله امي لحت عليه نبقة للعشة بس هو كللها ان شاءالله يومين واجيبها تبات يمكم.. طلعنه..
ورحنه مشي لان بيت اهلي بيعد كم شارع من بيتنه.. واول مادخلنه بالفرع شفنه شباب تارسه الفرع وكلهم مسلحين.. واحد يرمي على الثاني..
اني جمدت من الخوف وحاطة ايدي على ذاناتي من صوت الطلق.. وبسام عافنه وراح يركض بنصهم
صاح سامر عليه..بس هو كله عوفهن ماعليهن شي خلب نروح نشوف ليش متعاركين.. وراح يركض وزاد الرمي علينه.. وسامر خطية دخلنة بمحل يبيع لوازم خياطه.. وهو وكف بالباب وكال لتخافن خلي بس يرحون واوصلكم للبيت.. لهناك وسكت صوت الرمي وكال اطلعن.. واني وطيبه نرجف جان تعله اصواتهم وصوت الطلق رجع.. وكال لتخافن تعالن نفوت من هذا الفرع.. وهو حاط ايده على كتف طيبه ومحاوطها ويكللها على كيفج لتوكعين واني كايدني من ايدي.. ومن عبرنه من الهوسه هد ايدي وطببنه للبيت وهو ضايج..تلكتنه عمتي..
أم بسام: ها يمه شبيكم هم شفتو العركه هذوله جيرانه سكاره ومتعاركين بينهم.
طب بسام وكال ها اجيتو كله سامر..
سامر: صدك أنتَ متستحي شلون تعوف زوجتك واختك وتروح بنصهم وهمه سكاره ماخفت عليهن.
بسام: هاي شبيك وشكو عليهن هسه مو جبتهن أنتَ.
سامر: ولك أنتَ ماتعرف شلون خفت عليهن لا احد يجرهن مني وكلهم سكاره.
بسام: يمعود ليش تكبرها ماكو شي.
راح سامر وهو يتلاطم من تصرف بسام واني شكد ضجت منه ومن تصرفه شلون انطا گلبة يعوفنة بالشارع والطلق فوك روسنه.. صدك ماعنده مسؤولية علينه.. لازم احجي ويا اليوم واكله اني عرفت بيك تشرب.. وبوقتها ياريت لو ماحاجيه اله...
جُمانه: بسام أنتَ تسكر؟..لان اني اشتم بيك ريحة شرب ولا تنكر.
بسام:لا أنتِ متوهمه اني مااشرب.
جُمانه: لا مامتوهمه وسمعت سامر يحجي العمتي ويكللها امنعي ابنج من الشرب.
بسام: وهو كال كدامج؟.
جُمانه: لا.
شو هذا تعصب وراح يم امة...
بسام: يمه شنو هل حجي.. سامر شنو حاجي عني.
أم بسام: ماحجه شي الرجال.
بسام: لا حاجي وجمانه هسه كالتلي.
أم بسام: اي قابل جذب أنتَ تشرب وجمانه سمعتنه بالغلط أنتَ توب وجوز من هل حجي.
طيبة: لدافعين عنه.. بسام ترا سامر متقصد يحجي كدام جمانه هو يريدها تعرف بيك تشرب.. مو كلتلك يكرهك وميحبنه على امه.. بس اوفف من هذا ابوك ميخاف الله وراح جاب ضره لأمي.
بسام: اني هسه راح اروح عليه.
طيبة: اي روح ومانريد طبته علينه.
أم بسام: ولك كافي تعال لتصدك بطيبه جذابه والله ماحجه هيج الولد حجه علمودك وميدري بجمانه تسمع.
بسام: لا اني رايحله ومااريد هل خوه.
جُمانه: يا ليش هيج طيبه سويتي ماخفتي من ربج جان يوميه ويا اخوج وينصحه ليش هيج تسوين.
طيبة: اي مااريد طبته للبيت..
كعدت ابجي على حضي المخربط.. حجي عمي وسوسن طلع كله صح بس امي جانت متصدك وشالت خطيتي ويا...
جُمانه: سامر المسكين راح تنكطع علاقته بأخوه من ورايه.
أم بسام: كافي عمه تبجين كافي عيونج راحن.. والله يكبر ويعقل بعده مراهق صدكي جان خالج قبل يدور نسوان يوميه وحده شكل ماادري شلون كدرتله ام سامر وتاب عليها وكعد وعقل.
جُمانه: لا عمه ليش حتى أنتِ هم ضلمتيني.
بسام: كافي لج كافي بجي.. وهذا سامر طرته وبعد ميطب للبيت هيج اخو ما اريده.
أم بسام: ولك ليش يمه مو اخوك.. هو ماغلط الولد يريد مصلحتك.
بسام: مااريد احد ينصحني عوفوني بحالي وشرب اشرب وبكيفي ومحد يمنعني فاهمه لتلحين عليه بنت** منج ومن الخلفوج.
جُمانه: يااا عزه عمه هذا سبج..
شلون تسب امك مو عيب صدك تحجي أنتَ باجر عكبه بزريتك هم يسبوك واني هم انسب منهم وبسببك.
بسام: كافي حجي زايد.
طلع وركع الباب.
أم بسام:يا يمه تالي عمري بسام يسبني.
جُمانه: اي عمه ليش تزعلين هاي تربيتج ودلالج هيج يتصرف... ليش عمه ابنج طلع يشرب اني شنو ذنبي ليش وهاي عود اني بنت اخوج.
أم بسام: كافي يا بنتي ارحميني اني عبالي يكعد ويعقل من ازوجه.
جُمانه:واني حاطتني للتجربه عمه ليش والله حرام عليكم.
أم بسام: كافي بنتي فدوه اصبري عليه وهسه تشوفينه يتوب ويكعد..زين سوي روحج زعلانه.
جُمانه: اي خطيه ابنج ميكدر على فراكي اشو هو عبالك اخوان اني ويا.. ولا جنه عنده مره باليل بالشارع على كولته يشتغل حراسات.. وبالنهار نايم لو يطلع ويا جماعته.. ويلي ياربي شكول عليج يمه من انطيتيني لأبن اخوج اخخ يابه تعال شوف دلالك طلع كله مني.
أم بسام: هسه كافي بنتي كومي غسلي وجهج.
كعدت الصبح كل المعتاد طيبة تروح ومآمنه عليه
لان اخوها عود بالبيت.. واني مااخاف صح بس احس حياتي واكفه مابيها معنى محد يحجي وياي
ابد اكمل شغل الطبخ والتنظيف واكعد اباوع مسلسلات.. ومرات تطفي الكهرباء انتظر يشغل ابو الخط بل 1 الضهر ويطفي بل 5 العصر..
اجتي الكهرباء وعلكت المبرده وكعدت على الهوا اباوع مسلسلات اجتي عمتي من وكت اليوم لان مالها خلگ شافتني كاعدة يم المبردة و كالت...
أم بسام: هاي منو مشغل المبرده؟.
جُمانه: اني عمه غير حاره.
أم بسام: ماكو ماي ماعدنه واخاف يخلص الماي وأنتِ مشغلة المبرده.. بنات القنادر يدورن مبردات.
جُمانه:يا عزه اسبيني عمه علمود مبرده.
أم بسام: يله هسه اني سابه اخويه.. وبعد ممنوع تشغليها بس وكت الغده خاف يخلص الماي ماشي.
جُمانه: بس اني من جنت يم اهلي يومية نعلك مبرده.
أم بسام: ماكو هذا الموجود.
جُمانه: اكلج عمه اليوم رحت اغسل المواعين على السنك فتحت البوري مالكيت ماي.. يمكن التانكي مزروف لان البارحة باليل ترسنا.
أم بسام: لا اني ساده الكاك من فوك مو هاي يمج اكدوره بالكاع اني تارستهن واغسلي.
جُمانه: شلون عمه اغسل هيج حتى الماعين هيج ماتتنظف غير على البوري.
أم بسام: ماكو هذا الموجود خاف يخلص الماي.
يا يمه تعالي شوفي بنتج وين حطيتيها ماكو هيج جلافه ابد ماشايفه..عفتها ورحت اسوي العشى...
أم بسام: اكلج عمه شسوين؟.
جُمانه: دا اسوي عشه.
أم بسام: وليش تگلين بتيته وطماطة مو بقه عندج تمن ومرك من الغده بعد شكو تسوين غيره شنو هل تبذير ها.. بس كليلي.
جُمانه: عمه فدوه اروحلج يا تبذير هيه بتيته وطماطة قابل شنو مگلين الكبب لو كباب.
أم بسام: هذه العندي عمه احنه اكلنه على كدنه.
جُمانه: اي ميخالف بس اشو أنتِ راح يصيرلي شهرين يمكم وماشفت لا لحم ولا دجاج ولا سمك ولا اي شي.
أم بسام: اي هذا اني مسواكي احمدي ربج اكو ناس ماماكله الكمه لا تتبطرين على نعمه ربج.
جُمانه: لا عمه ليش اتبطر لا تسمينه بطر هذه.
أم بسام: اي بطر بنات تالي وكت.. روحي شوفي الارضي يدك.
جُمانه: اي رايحه.. الو هلو فرح الحمدلله وانتو شلونكم.. اي شوكت بعد.. اسبوع اي اجي ان شاءالله.. الله وياج.
أم بسام: ها منو؟.
جُمانه: هاي فرح تكول امي طالبتلج زيارة الموسى الكاظم (عليه السلام) تزورني على الأسبوع الجاي.
أم بسام: اي الله كريم روحي عود.
بسام: وين ان شاءالله؟.
أم بسام: تروح ويا عمتك للزياره هيه ناذره اله زياره.
بسام: اي الله كريم منا لبعد اسبوع.
جُمانه: اكلك بسام.. هذه الحمام مااكدر اسبح بي والله كل مره اكلك وتكلي اي واجيب هسه شطالبة منك اني هو جيس اسمنت وصبه.
بسام:شكد تلحين أنتِ كافي.. اني عود اجيب هسه ماعندي.
اوفف خلي اصب العشه احسن واكسب راحتي منهم ربي فدوه اروحلك بس خلصني من هل بيت يارب بأي وسيله بس اريد اطلع من هل بيت كرهته هو والبي كلهم.
بسام: وين العشه جمانه فضيها.
اي اي جايه راح الدلال منج جمانه تركضين ومتلحكين عليهم.. صبيت العشه وراح بسام كل معتاد وعمتي قفلت الباب ونمنه وكعدت الصبح بس لكيت بسام مانايم كاعد كال روحي بالمطبخ راح اطبب صديقي فوك يشوف الطيور.. رحت بالمطبخ كعدت وهو صعد واني كمت نظفت البيت وطبخت وكملت وهنا اريد اهدر التمن وانكسرت بيدي الجداحه ونسيت صديقة عدنة.. كلت خلي اصعد عليه ادك باب البيتونه عليه بلكي ينزل هو واخذ جداحته.. رحت وجان اتفاجئ اشوف الباب مقفول بسلسلة وقفل.. يا ليش مقفول؟.. نزلت وره ربع ساعة مد راسه وكال سوي طريق ونزل الولد وطلع بالباب يحجي ويا بس انصدمت من سمعت كلام هز كل عظم بداخلي.. كعدت على الدرج من هول السمعته وجسمي كله كزبر.. طب كال شكو كاعده هنا كلتله لا هيج دايخه وكعدت.. هز راسه وكال راح اسبح واغسلي ملابسي اريد انام.. كلتله اي واني ارجف وخايفه منه.. طلع ولكه افراشه ونام.. ورحت اغسل ملابسه وتأكدت من العلامة الي شفتها بملابسة.. يعني الي سمعته بالباب صح مامتوهمه بس معقوله الي يسمع مني راح يصدكني؟. لا محد يصدك خلي اسكت احسن..
مرت ايام.. واجه بسام طب وبيده جهاز سيدي مشتريه ويباوع ومكيف ويعدل بالاقراص...
جُمانه: أنتَ مو كلت ماعندي اجيب جيس اسمنت وصبه للحمام.. اشو هسه مشتري اقراص سيدي بخمسين الف ليش متهتم أنتَ..بس گلي شلون الواحد يسبح.
بسام: اهوووو كافي كاعد تلحين هواي وامشي طبي بالمطبخ اريد اباوع افلام بالقرص اني واصدقائي.
طببني جوه بالمطبخ اني وطيبه وهو كعد بالاستقبال هو واصدقائة.. ماادري شكم واحد
بس هنا اتأكدت وعرفت هو شنو طلع..
طلع رجل شاذ وميحب النساء.. والهذا السبب هو مبتعد عني.. وقررت بس اروح لأهلي احجي كل شي لأبويه وبعد ماارجع ابد.. بس تخربطت والمصيبة الكبرى طلعت حامل زين شلون صرت حامل واني صارلي شهرين ونص يمهم بهل سرعة صرت حامل ياربي هذه هم حظي واني اريد اخلص منه انوب زاد الهم عليه..بس بقيت ساكته وماحجيت..لان اني راح اروح بله رجعه.. مر الاسبوع وصار موعد روحتي لأهلي.. واخذتني امي البيت خالتي الي شكد جنت مشتاقه الهم.. ومن سمعت بيه سرور جايه اجت عليه وكعدنه وحجينه وضحكنه بس جانت اكو غصه بگلبي ومااكدر احجي.. سألتني كواكب بنت خالتي وكالت شبيج ليش هيج متغيره حيل وشكلج تعبان اكو شي كلتله والله ماادري شكول.. كالت احجي جمانه احنه وياج لو الكل يعارضج وحجيت الها كل شي مريت وشفته وحسيت بي بهل مده الي عشت بيها وياهم.. ونجنت من كميت الحجي الي سمعته بس كالت شراح تسوين..كلتلها ماادري بس لازم بعد مااسكت واحجي لأبويه كل شي ولأهلي وخلي تعرف امي ابن اخوها شسوه بيه...
رجعنه من بيت خالتي واني فرحانه لان شفتهم واحس كواكب وسرور حيل يفهمني ويحسن بيه كعدنه وسوت فرح وشهد جاي وكعك وكعدنه نحجي ونسولف على الزياره واني احجيلهن كواكب وسرور يسلمن عليجن....
فرح: يا شلونهم اتونستي يمهم.
جُمانه: اي والله تونست حيل يمهم وكواكب خطيه حارت شطابخه من اكل بعد محد يلحكها بالطبخ .
فرح: اي والله صدك وسرور اجت.
جُمانه: اي خطيه اجت لان متفقه ويا زوجها اذا تجي خالتها تنطي خبر العمتها وتجي.. بس صدك كعدنه وتونسنه وسولفنه.
شهد:اي زين.
سُندس: اكلج عمه باجر اروح للسيد علمود الجهال يقرأ عليهم وينطيهم حجاب بالمخده مالتهم.
أم صالح: اي سندس عمه ان شاءالله باجر اخذج أنتِ وجهالج.. هاي من ماصار عندي جهال رحت عليهم وطلعت عندي جبسه وتابعة وانطوني ماي سبحت بي وحجاب وصار عندي صالح وكلولي حتى ولده تجيبيهم علينه ننطيهم حجاب. ناس وساده همه يشورون بيت سيد زوين معروفين بالدوره البعيثه.
جُمانه: يمه عفيه خلي اروح وياكم فدوه.
أم صالح: ولج جمانه شعندج رايحه ويانه تدرين همه بساتين وزرع وعدهم شجره الليمون ينطون للعالم منها علاج.
جُمانه: اي عفيه يمه اريد اروح اشوفهم هيج عاجبني والله اني ضايجه حيل واحس نفسي مخنوكه والله.
أم صالح: يا ليش البجي يايمه هسه يجي بسام من ياخذج وكليله اذا قبل تعالي ويانه.
حجيت بگلبي ( اني وارجع اله شبية ما رايدة روحي).
أم صالح: جمانه شو صفنتي؟.
جُمانه: ها لا ماكو شي يمه.. شهد الباب تندك روحي فتحيه.
بسام: السلام عليكم.
أم صالح: هلا عمه هلا بيك فوت.
بسام: لا والله مستعجل عندي شغل بس اوصل جمانه للبيت ومناك اروح.
أم صالح: يله جمانه كومي.. اكلك عمه باجر نروح لبيت سيد زوين يقرأون على جهال صالح وجمانه تريد تروح ويانه.. خليها تبات اليوم وباجر من نرجع صالح يوديها الكم.
بسام: لا لا عمه متروح وهيه شعدها رايحه هناك.. لا متروح يله كومي لبسي.. شبيج كاعده وصافنه بوجهي كومي.
جُمانه: بسام اني مااروح وياك بعد.
بسام: ليش عيني متروحين.
جُمانه: مااروح لان اني اريد اروح ويا اهلي للسيد.
بسام: اي واني ماقابل تروحين.
بسام: اي واذا متقبل أنتَ اني اريد اروح.
بسام: ها هيج يعني غصب عني ترحين.. يله عمه مع
السلامه رايح اني.
أم صالح: ياا اوكف بسام عمه اوكف يا هذه شبي راح ولا عبالك احجي ويا.
فرح: اي غير صوج بنتج الي حجته عيب بحق زوجها ومااحترمته.
جُمانه: فرح رجاءً كافي زين.. وبعد ما اروح وياه.
أم صالح: عيب هل حجي جمانه ليش يمه.
جُمانه: يمه اريد اروح وياج ليش هل ملحه هاي مااروح ويا بعد ابد.
أم صالح: كافي بنتي يله ميخالف.. خلي نروح باجر للسيد ومن ترجعين اخلي صالح يوديج.
جُمانه: الله كريم يمه.
سُندس: عمه اخذي مرتضى بس يبجي سكتي.
أم صالح: تعال بيبي حبيبي اسكت عيني خلي اطلع بي بالباب بلكي يسكت.
شهد: ها جمانه شتسوين.
جُمانه: اباع المسلسل.
شهد: لعد شبيج هيج وجهج تغير من شفتي بسام.
شهد: ماادري شهد كارهته حيل وروحي تنقبض من اشوفه.
شهد: يا ولج جمانه شلون عايشه ويا.
جُمانه: شهد شحجيلج على العايشته.. غير متدرين عيشتي يمهم شنو.. ولج اشتميت ريحه دجاج شوي.
شهد: اي سوينه للعشه.
جُمانه: اويليي شكد مشتهيته فدوه.
شهد: هاي نساتج على الدجاج.
جُمانه: لا يا نسه شهد من طلعت من يمكم ماطب بحلكي اي لحوم عمتي ما اطبب للبيت لا لحوم ولا فواكه ابد وانوب المرك والتمن الي نتغده
بي نفسه لازم نتعشه بي.. واذا اكلها عمه اريد اكلي شي تكول هاي بطر تتبطرن على النعمه ولج شهد حتى المبرده متقبل اشغلها اله وكت نومت الظهر واليل.. بس لان تخاف الماي يخلص لان هناك عدهم شحه بسحب الماي.. لو تقفل الكاك مالت التانكي وتخليني اغسل المواعين من الكدوره والملابس هم انكل الهن لو ابقه وحدي واخاف والله.. وطيبه تحجي من وره خشمها تكلي شلون احبس روحي علمودج وتروح وكدام عمتي وبسام متحجي هيج.. هم زين اشتغل حراسات وكام يجي الصبح وينام بالصاله واروح اشتغل.. لو عمتج الي ثالث يوم عرسي نزلتني جوه انام تكلي انتظري واجيب مبرده الكم وهاي صار شهرين ونص يمهم واستلمت الراتب وماشترت مبرده ولا شي تضحك علينه تكلي هسه رجلج يبات بره بالشغل والصبح ينام بالصاله علمود المبرده والظهر هم.. شلكم بيها.. يمكن خمس لو ست مرات صعدت فوك لغرفتي.. اموت واغلي من الحر وانزل بعد حزيران وماحجي عنه.. لو يروح ويجيب سيدي ويتفرج افلام ومن كتله الحمام يطلع صرصر مااكدر اسبح بي عفيه بس صبه يكلي ماعندي فلوس ولا هو سوا ولا عمتي.. ومره رحت اخذتني طيبه يم بيت ابو زينب سبحت هناك هنه بنات تدرين وحدهن وابوهن بالشغل بس استحيت وبعد مارحت ابد كمت اسبح بالتواليت ولا رحت.. ولو ولو وشنو بعد تردين احجيلج على كمية بخل عمتي يعني امي معقوله متعرف طبع حماتها لا ماصدك من انطتني الها.. لو احجيلج على بسام يسوي وشنو يتصرف.
شهد: كافي ولج كافي شنو أنتِ ماعندج كرامة وكاعده يمهم ولج أنتِ مدلله البيت كله ابويه يگلب البيت علينه.. كل هذا شفتي يمهم ليش ليش هيج امي شمرتج هل نصيب ولج الدنيا اتمنتج ورادتج ليش هيج صاير بيج واحنه مندري ليش. ولج ساكته ليش كليلي.
جُمانه: كافي شهد فدوه ابويه على جيه مااريد اغثه خاف امي تسمع ومتاخذني باجر وياهم للسيد ولج شهد احس نار مشتعله بصدري.. اسكتي فدوه اريد بس اشتم هوا نظيف وبمكان نظيف فدوه لتسمعج فرح وهسه امي تزعل مني ومتاخذني وياهم.
شهد: من ترجعين اذا ماحجيتي لأبويه والله ورح خالي اني احجيله.
جُمانه: اي والله اي بس نصي صوتج.
شهد: يايمة ليش هيجي سوده عليه اكول وجهج ذبلان والدمعه بعينج ثاري كل هذه الظلم شايفته وساكته شلون سكتي أنتِ مامتعلمة تسكتين على الظلم.
جُمانه: امي شهد كالتلي مااسمع منج شكوه وره العرس.. البنيه سنه يله تتعود على زواجها مو اشمتين الناس وعماتج بيه.
شهد: لا حبيبتي ماكو هيج حجي ابويه ميقبل على كل هذا ونحجيله شنو كم مره صاعده فوك بغرفتج
و ليش بسام ميتقرب الج بس كم مره.
جُمانه: حتى اني اكول شلون حامل صرت.
شهد: ليش شنو السبب؟.
جُمانه: ماادري خيه ولا عبالك زوجته ابد عبالك اخوان يكعد يتغده ويطلع للسوك ومن يجي يتعشه ويروح وابد ولا يحجي ولا يتشاقه ولا يكعد بصفي عبالك امه جابرته عليه.. وانوب يكلي اني حبيت سرور وامي ماقبلت تزوجها اليه ومن كالتلي عليج
مافوتت وحده مثلج.
شهد: لعد شلون فوتج كل هل شهرين ونص.
جُمانه: شوفي اكو شي بس اخاف احجي اخاف متصدكين بيه.
شهد: شنو هو كولي بعد اكثر من الي سمعته ماانصدم.
جُمانه: مره صعد هو وصديقة فوك للطيور وجان يقفل الباب لان صعدت ردت جداحة منه وين يله نزل وصعدت العصر فرشت بالسطح لان جان قبل يوم نمنه بالسطح.. جان المولد مالت المنطقه عاطل وهم كالو اليوم عاطل.. عمتي كالت لتشيلي الفراش لمي على صفحه ورحت فرشت وجان الكه المخدة كلها ريش مالت طيور والفراش مخربط عبالك احد فاتحه.
شهد: ياا عزه بعينك بسام يعني يدور هيج سوالف.
جُمانه: اي والي اكدلي اكثر من غسلت ملابسه وشفت علامه بملابسه.. ومره جاب صديقة بالاستقبال وخلاني اطب بالمطبخ وهم علكو اقراص سيدي وكال لتجين يم الاستقبال لان نباوع افلام اكشن ابقي كاعده بالمطبخ كلتله اي وشوكت يخلص فلمك ساعتين.. كلي اكعدي واسكتي.. كلتله اني ابقه اكعد بالمطبخ بالحر حتى بنكه ماكو.. بس خليته يروح مشيت على كيفي وتصنطت عليه ولمست الي فكرت بيه طلع صح.
شهد: يا دخيلك ربي هيج طلع بسام ونوب عنده طيور اكلج شو ما فد يوم سمعنه بي مطيرجي.
جُمانه: ماادري بس لتنسين عمي شكد نصح ابويه منه وكله مو مال زواج بس ابوية ماصدك بي.. وسوسن من اجت وكالت يشرب ويه اسامه هم ماصدكتوا.
شهد: اي وبس لا طلع هم يشرب؟.
جُمانه: اي خيه كلهن حاويهن ابن عمتج.
شهد: عزه بعينك بسام هيج احنه غشمه وماعرفنا.
فرح: ها خياتي خير منو الي ماعرفنا؟.
جُمانه: ها لا ماكو شي.
شهد: فرح طلع ابن عمتج مطيرجي.
جُمانه: خيه شهد اسكتي يمعوده لا تسمع سندس وتشمت بينه.
فرح: واذا مطيرجي قابل عيب يربي طيور.
شهد: لا عيني ليش عيب خلي اكوم احسن ما انفجر من الي سمعته لو انجلط.
فرح: اي كومن اجه ابويه وصبيت عشه.
جُمانه: يله كايمه.
ابو صالح: ها بابا حبيبتي شلونج شخبارج.. على كيفج لتغصين بابا.
جُمانه: اي يابه الحمدلله بخير.
أم صالح: عوفها خطيه لان تتنسه هيج تاكل بشراهه.
ابو صالح: اكلي بابا.. جبتلج بقلاوه الي تحبيها.
جُمانه: تسلم يابه حبيبي.
ابو صالح: يله اكوم اغسل.
أم صالح: ها ماكلت.
ابو صالح: لا والله اكلت خير من الله بس صاحبي جاب صمون حار واكلت منه واحنه بالطريق.
أم صالح: سبع عافيات عيني....
