رواية هو لا يشبههم الفصل التاسع بقلم تبارك الوائلي
وفي الصمت والهدوء الف كلام وحكاية ..
لنا حياة داخلنا تختلف تمااااما عن الحياة التي يرانا فيها الاخرون .. 💗
جُمانه: يله كايمه اني .
رحت طبيت للاستقبال بست ابويه من رأسه
وكعت يمه اكل بشراها .
ابو صالح: على كيفج لتغصين بابا.
جُمانه: اي يابه هو على كيفي .
أم صالح: عوفها خطيه لان تتنسه هيج تاكل بشراهه.
ابو صالح: اكلي بابا الف عافيه بس اخاف عليك لتغصين ، جبتلج بقلاوه الي تحبيها كملي واكلي
منها .
جُمانه: تسلم يابه حبيبي .
ابو صالح : يله اكوم اغسل .
أم صالح: ها ماكلت .
ابو صالح: لا والله اكلت خير من الله بس صاحبي جاب صمون حار واكلت منه واحنه بالطريق وشبعت .
أم صالح: سبع عافيات عيني .
طبت سندس واجتي كعدت يم امي وكالت .
سندس : عمه شوكت ناحذ الجهال للشيخ .
ام صالح: باجر أن شاء الله.
جمانه : يمه تره اني اجي .
ام صالح: بنتي شعندج مو رجلج مقبل وحتى زعل من وراج .
جمانه : مشكلته يمه معليه بي اني اجي مو تكولين .
ام صالح: الله كريم الباجر عود .
جمانه : ثاني يوم كعدنه و رحت وياهم وكعد الشيخ يحجيلهم شنو يسوون وامي تجاوبه .
ام صالح : أي سيدنه راح اخلي الحجاب بمخاد الجهال بس هاي بنيتي هم اريدك تشوفها تكول مخنوكه وضايجه .
جمان : اباوع الامي وعلى الشيخ فتح القران وكال
_ هاي البنيه محسوده حيل حيل ومهمومه حيل ومامرتاحه بحياته ولا راح ترتاح .
ام صالح : اشلون يعني سيد رحمه لهلك لا تخوفني.
_ هذا الي سمعتي وانتِ امها واعرف بلي كلته .
ام صالح : اي بس هيه مال محسوده اكيد لان هواي تمنوها ومصارت الهم بس ليش ماترتاح سيد .
_ مادري اني هيج شفت العلم يم الله .
جمانه : خاف اني جنت متكأبه وخايفه كلام الشيخ
خوفني فوك خوفي امي صاحت .
ام صالح : يله يمه نتوكل تسلم رحمه الله والديك سيد .
جمانه : طلعنه واني ساكته شربت ماء من الحب مالتهم حيل طيب طعمه اشكد ارتاحيت من قره عليه صدك راحه نفسيه بس كلامه خوفني ، كالت سندس
سندس : اكلج عمه ليش ماسالتي على جمانه اشلون
مترتاح يعني .
ام صالح: لا عمه اسكتي همه مايحجون هواي بس كلمتين دخيل بختهم .
جمانه : صعدنه السياره ورجعنه للبيت ورحت بوجهي نمت حتى ماتغديت اجا ابويه و اهلي متغدين كلهم ونايمين صيف حاره العالم تنام على هوه المبرده ، كعدت من النوم رحت حميت الغده وتغديت كعدت اشرب جاي كعد ابويه شافني كال .
أبو صالح: ها يابه كعتي يبعد ابوج .
جمانه : أي يابه كعدت تريد شي .
أبو صالح : اي والله بنيتي جيبيلي ركيه وخبزه وتعالي ناكل اني وياج عوفي الجاي شلج بي .
_ اي صار كايمه يابه .
رحت جبت الركيه وكعدت بصف ابويه كصكص الركيه وناكل اني ويا كعدت امي والبنات هم كعدن ياكلن ويانه .
أبو صالح : بابا فرح حضريلي الدشداشة اريد اطلع للكهوه .
فرح : اي يابه ثواني .
جمانه: ابويه سبح وبدل وطلع .
ام صالح : يمه جمانه مدام اخوج صالح سبح ويريد يطلع لسوك خلي يوصلج بدربه لعيالج لان عيب من عمتج هسه اكيد بسام حجالها و زعل منج .
جمانه : ذبيت شيف الركي من ايدي وكلتلها
_ لا يمه ما اروح للبيت اني .
ام صالح: ليش يمه اسم الله مترحين بعدج عروس جديده .
_ اي يمه اني بعد مارجع وماريد اروح ابد .
ام صالح : ياااا ليش غير اعرف السبب شنو .
_ شحجيلج مو سبب واحد هو .
صالح : شكو جمانه اشبيج احجي .
جمانه : صالح فدوه ماريد اروح بعد الهم ماريد عفيه لتضغطون عليه .
احجي وابجي اجه صالح كال .
صالح : اي لترحين بس على كيفج فهمينه ليش وشنو السبب .
هم يحجون واني الدموع عشره عشره ابجي
واشهك .
صالح : هسه غير نفتهم ليش البجي والله العظيم ماوديج وابقي براحتج هذ بيت ابوج بس هم اريد اعرف السبب .
شهد : اني احجيلك صالح مو سبب اسباب هنه.
ام صالح : وانتِ شهد شمدريج سدي حلكج احسلج .
شهد : لا صالح جمانه البارحه حجتلي كل شي والله يعينه عليهم ... بس كليلي يمه عمتي حماتج ماجنتي تعرفين هيه بخيله وتوكف بعينه حتى الكَمه .
ام صالح : ها ولج منيلج هل حجي .
صالح : يمه خليه تحجي خلي نسمع منها متشوفين جمانه منهاره وتبجي ومتكدر تحجي خلي تحجي شهد ونسمعه .
ام صالح : احجي شهد شحاجيه جمانه الج .
شهد : يمه حماتج ممبقيه سالفه ممسويتها .........
جمانه : شهد بدت تحجيلهم و اني اسمع كل تصرفات عمتي ويايه ودموعي تنزل مطر صدك ميعرفون شكد انصدمت بعمتي وتصرفاته مجنت اتخيلها هيج وحجت الهم على بسام واشلون يتعامل ويايه وكل تصرفاته استغربت شغله ماحجتها شهد هيه طبت اصدقائه وذيج الشغله الي حجيت الها عليها اني
هم بقيت ساكته ودموعي تنزل .
صالح : جمانه متأكده عمتي هيج تصرف بهل بخل وياج .
جمانه : اي والله العظيم وربي يشهد عليه ،
انصدمت من امي كالت .
ام صالح : صالح عوفنه من عمتك هسه شتريد منها بخيله هذا طبعها منكدر نغيره تتحمل نصيبه هذا قابل تعوف بيتها والله عمتها بخيله شلون حجي هذا .
صالح : لا ميصير اني مو همي عمتي بس كليلي صدك بسام يشرب وعنده مكسرات .
جمانه : مسحت دموعي وكتله ، اي والله يمه يشرب اني شميت ريحه الشرب بي وهو ينكر واخر مره اجه ايهم وسمعته يحجي ويا عمتي .
ام صالح: شبي ايهم شسمعتي باله .
جمانه : يمه والله سمعته حجه العمتي كلشي على بسام وحذرها تنتبه عليه ومن عرفت اني حجيت وياهم وعاتبت عمتي ومن عرف بسام اني سامعه من ايهم تخبل وكَلب البيت علينه وعصب و راح تعارك ويا اخو ومن عدها بعد ماطب علينه أيهم ، وطيبه تكَله هو أيهم سوه مشكله .
صالح : والله راح اتخبل بسام كل هل مصايب عنده واحنه منعرف .
جمانه : صالح اشبيك كلهم يعرفون بسام يشرب عمتي وخواته بس احنه انخدعنه بي ومنعرف عنه شي ومن حجه عمي ماصدكتو كلكم وشلتو خطيتي .
صالح : زين معقولة كل هذا يطلع من بسام وعمتي ساكته .
جمانه : اي والله مادري شكول اني ولتنسه ، انت هم ما عارضت على زواجي اصلن .
صالح : ليش جمانه احنه من شوكت نعترض كلمه
الابويه عود كَلنه عمتنه احسن من الغريب .
ام صالح : والله يمه اني كلت بيت وحدج لا اعيال ولا جناين .
جمانه : من قهر گلبي كلتلهم ، اي ليش عود متصوريني ماكدر اعيش ويا اعيال والله لو ماخذه عيال جان احسن من عيشتي وحدي كل النهار اقلها صوت وياي بالبيت .
ام صالح : والله ابوج ليش مانطاج الاهل سندس
لان عدها 8خوان وهم كومه بالبيت كال هاي مدلله متعيش وياهم .
جمانه : هسه خلي يجي ابويه ويصير خير إنشاء الله .
انسدت السالفه للعصر اجه ابويه نام شويه وكعد
صله المغرب وامي كالت .
ام صالح : ها عيني انصب العشه .
_ اي والله جوعان .
_ اي ادلل صبن يمه .
أبو صالح : ها جمانه بابا جبتلج بطيخ اعرفج تحبي .
_ صدك يابه وينه خلي اروح اكل منه .
_ لا انتضري اتعشي هسه .
_ لا خلي اضوكَه شويه .
_ شنو ماضايگته يابه اشبيج بنتي .
جمانه : هاا لا بس اشتهيته .
فشلت من نفسي وحجيت بكلبي ، والله لو تدري اختك مطبب غير بس الركي لان تحبه وغيره كلشي متجيب الركي وكل وين وين ياله تجيبه ، كملنه عشه وأجيت كعدت يم ابوية باوع
عليه وكال .
أبو صالح : شعجب مارحتي بنيتي .
_ بعد ماروح ابد يابه .
أبو صالح : ليش بنتي شصاير .
جريت نفس تشجعت وكتله .
جمانه : يابه بسام طلع يشرب وفوك كله هذا ميحترم امه ويجاوز عليها ومن يعصب حتى الجام البيت يكسره ويگلب لبيت علينه وميحترم أكبر واحد .
أبو صالح : على كيفج بابا زتيتيهن زت منين هل حجي كله .
_ خلي يحجولك هم كلشي يعرفون .
أبو صالح: يعني بس اني مااعرف فهميني شصايرررر ؟؟؟
جمانه : ابويه عصب وامي حاولت تهدي كالت اله .
ام صالح: لا عيني مو هيج الحجي جمانه كومي
طبي جوه يم اخواتج .
_ اي يمه كايمه .
طبيت جوه وبعد معرفت شصار .
ام صالح: جمانه حجت النه كل شي اليوم العصر
من كتلها خلي صالح يوديج لعيالج كامت تبجي وتحجي .
_ اي كملي لتبقين تصفنين .
.....
""""""
شهد : ها جمانه حجيتي الابويه .
_ اي بس مو كل الحجي امي كالت طبي يم اخواتج ومخلتني اكمل .
شهد : اي احجي الابويه كل شي لتسكتين .
_ اي شهد اكيد احجي بس ليش ماحجيتي كدام
صالح على سالفه بسام وصدقائه .
شهد : ياااااا ولج ما اكدر جمانه .
جمانه سكتت وكعدت انتضر امي تحجي الابويه .
"""""
أبو صالح : ولج شضامات عليه بعد احجي .
ام صالح: على كيفك عيني .
أبو صالح: لجج هذا كله طلع من ابن اخوج واحنه انطينا مره مغمضين اخخخخ اشلون ماعرفت بي ياربي .
ام صالح: تره هو ابن اختك هم .
أبو صالح: زين واني شدراني هيج اخلاقه .
أم صالح : بخل اختك ودلال ابنها دمر البنية وهي عروسه .
أبو صالح: بس انتِ ترحين عليهم على طول معقوله ماشفتي شي ابد .
_ لا والله ابد ماشفت شي منهم .
"""""
فرح : باعي جمانه ممنوع تحجين هيج كدام ابويه هسه بعدين نحجي خوش لان عيب هل حجي ماينحجي .
جمانه : وليش عيب خلي يعرف ابن اخته شنو من انطا مره وخلي امي هم تعرف ابن اخوها شنو .
فرح : كافي شهد ابويه يصيح كومن نشوفهم علت اصواتهم .
جمانه : طلعنه نشوف شكو ابويه كال .
_ تعالي بابا اكعدي اريد اسمع منج انتِ صدك الي سمعته صحيح .
_ اي والله يابه صحيح .
أبو صالح: زين اشلون يسب امه يعني تالي عمرنه زعطوط يسب ابويه الله يرحمه لا وامه ساكته.
جمانه : أي يابه يسبهم ويصيح وميحترم .
ابويه حيل ضاج من بسام وكال .
أبو صالح : هذا هو روحي نامي ورتاحي بعد ابد مترجعين الهم.
_ بست راس ابويه وكتله ، اي كايمه انام ،
شهد : ها ابويه مراح يرجعج مووو ؟
جمانه : هزيت راسي بفرح .
فرح : ياله هم زين راح تبقين يمنه بعد افرشي الها شهد بصفنه .
جمانه : فرشولي يمهم نامن شهد وفرح واني تكلب بالفراش و مادري شراح يقرر ابويه بعد ولا شراح يصير من تعرف عمتي اهلي عرفو ، فزت فرح وكالت
فرح : ها جمانه تفكرين اذا عرفت عمتي شراح
تكول مو .
جمانه : اي والله فرح مادري شنو مصيري واني حامل وهل طفل شنو ذنبه عنده هيج اب .
فرح : نامي حبيبتي الله كريم ربج يحلها .
_ اي ان شاء لله ، رجعت نامت فرح بس اني عقلي وكلبي يفكرن بمصيري شنو ماحسيت شلون نمت كعدنه الصبح نتريك لكيت ابويه طالع لشغله
كعدت سندس ومبين عرفت اني زعلانه كالت .
سندس : شوف صالح لو منطيها الاخويه جان دللها دلال والله العظيم هو و اهلي بس انتو ركبتو روسكم وماقبلتو بي .
صالح : كافي سندس سدي حلكج كل شي نصيب .
_ اي سكتنه ليش نكدر نحجي يم اهلك احنه .
صالح : كافي كلت خلي اطلع احسن من الحجي وياج ميفيد .
سندس : ياااا وشكلنه عاد احنه .
ام صالح: ها يمه صالح .
صالح : محتاجه شي راح اطلع يمه .
_ الله وياك ابني .
راح صالح واندكت الباب
شهد : اي عيني جينه لحضه هلا عمه تفضلي جوه.
ام بسام : ولج شهد ليش هيج تسلمين من وره خشمج .
شهد : لا عليمن من وره خشمي هذا سلامي من قبل .
ام بسام : ياااا قابل اني ماعرفج .
اجت امي خزرتني وكالت .
ام صالح : ولج شهوده شبيج ويه عمتج ، فوتي خيه ام بسام فوتي اجيتي بوكتج مادام محد موجود علمود نحجي براحتنه .
ام بسام : اي خيه مو ادري اني ابو صالح بالسكله هسه خطيه ولاكاني صالح بالباب ضايج شبي خو
ماكو شي.
ام صالح: لا خيه مابي شي بس بنته المدلله عنده نزوجه 3 اشهر وترجع علينه دمعته بعينه مهضومه وحامل عليمن ضايج كل هذا وتردي يفرح .
ام بسام : يا خيه على كيفج علينه ويايه شصار
قابل شو كلها قبل شربت ولعبو لعب وكبرو وتابو وبطلو وعقلو وفتحو بيوت واعيال و بسام بعده مراهق خيه يكبر ويعقل .
فرح : وليش لعد ماخليتي يكبر عمه ويعقل
وزوجتي لو هذا هم حضنه .
ام بسام: على كيفج عمه فرح جيتي تركضين
هاده عليه .
فرح : لا عمه مو هيج والله بس الي سوا بسام ماينسكت عنه ومايلبس عليه ثوب .
ام صالح : خيه ام بسام هسه اشلون خيه بعدهم عرسان .
ام بسام : والله يتعودون واحد على الثاني بس
خليها تتحمل وانطي صبر الهم
ام صالح : اني ما عليه بعد انتِ واخوج بعد مادخل بجمانه لو تدرين اخوج شسوه بيه يكلي مادريتي بي يشرب .
ام بسام: خيه ان شاء لله اجي العصر كليله
الابو صالح لا يطلع خلي ينتضرني .
جمانه : طلعت عمتي واني واكفه اغسل شافتني كالت
_ ها عمه اشلونج البيت اضلم بدونج .
جمانه : جريت نفس وكلتلها بكلبي ،قصدج خدامه البيت ماكو ، حمحمت وحجيت بصوت .
_ هاا عمه الحمدلله زينه .
ام بسام : ليش عفتيني ورحتي .
_ عمه بعد مارجع ابد ولا اريد بسام .
ام بسام: يا عيب هل حجي شتكول العالم على اخويه بنته مصارلها 3 أشهر متزوجه رجعت زعلانه الاهلها .
جمان : مالي علاقه بالعالم عمه ورجعه بعد مارجع اني ، اجت امي ورا عمتي وكالت
ام بسام : ياا ... خيه احجي انتِ وياها وعقليها .
ام صالح : والله حجيت ومن البارحه لليوم اني احجي بس مادري ابنج شمسويلها وكارهته هيج .
_ يله خيه مع السلامه اروح اني .
_ الله وياج .
_ سدت امي الباب واني طبيت ابجي اجت ورايه طبت جوه واني رحت يم البنات شافتني فرح كالت .
فرح:هسه ليش تبجين يا عيني .
جمانه : فرح هاي اني ماراح اخلص من بسام عمتي ماراح تسكت ولا امي تجوز مني اله ترجني واذكرج راح يجبروني ارجع والله العظيم مارجع لو اموت
احجي بصوت واشهك من البجي كالت .
فرح : اسم الله عليج حبيبتي كافي العصر تحجي هيه وابويه كافي وجهج صار اصفر نامي ورتاحي ادري بيج بالليل البارحه مانمتي اصلن .
جمانه : مسحت وجهي وهزيت راسي باي شويه وعافتني وراحت .
"""""
فرح : اكلج يمه جمانه راح تبقه هيج كل النهار تبجي حتى اعيونه راحت من البجي وكل نهار راسه يوجعه وهيه حامل ليصير بيه شي يمه تكلكم ماريده ليش مجلبين بيه .
ام صالح : اسكتي بنتي شتردين نهجم بيت اختج علمود مشاكل تصير بكل بيت وننفضح كدام العالم .
فرح : كافي يمه تره كلها عرفت بزعل جمانه وكل الي يجي تشرحيله السالفه والي يكول حقه والي يكول خلي تصبر .
ام صالح : شتصبر يمه كافي عاد ارحموها لهل مسكينه هاي ليش هيج يصير وياها فهميني
ليشششش .
ام صالح : لج فرح شتردين عيني اايدها و نروح انطلكها من بسام والعالم تاكل وجهنا .
فرح : شعلينه بالعالم .
ام صالح: شلون شعلينه هسه ميكولون بنيه شابه تزوج 3 اشهر وتطلك ليش وشنو السبب ولج محد يعرف بسام يشرب ومو خوش ادمي راح يكولون اكيد جمانه بيها شي وطلعت موووو بن... .
فرح : حجيت بحركه گلب ، اي اي عفيه عليج يمه كمليها ليش سكتي ها طلعت مو ابنيه وبيه شي مو
هذا قصدج .
ام صالح : اي لعد شعبالج وراح يكولون سترو السالفه وسدوها حتى لا ينفضحون .
سمعت حديثهم و كمت ابجي واحجي .
جمانه: كافي والله حرام عليكم مو الكل شافني وتاكد مني وبعدين منو هذا الي ميخاف ربه وهيج يحجي منو بس كليلي .
ام صالح: والله بنتي العالم اله الضاهر .
جمانه : شهكت شهكه شكت طلعت من كلبي
ضميت وجهي بايدي وابجي واني افكر بكلام امي شلون اذا صدك العالم حجيت وكالت عني مو بنت كلام امي رعبني لدرجه صرت افكر باشياء مستحيله كالت .
ام صالح: ولج كافي موتي روحج هل طفل شنو ذنبه صار شهرين يمنه زعلانه مارحمتي نفسج حتى القران صايره متقرين وهامله نفسج وهامله كلشي .
جمانه : والله مو بيدي من افتح القران و اقره كلبي
ينعصر و دموعي تنزل غصب عني ابجي ومن غوش عيوني ما اسيطر اقره ذنبي على بسام ، حتى هذا الطفل ذنبه بسام ابو .
ام صالح : اليوم تجي عمتج العصر حتى تشوفج
مو مثل كل مره متطلعين الها عيب بنتي .
جمانه : سكتت مرديت تمددت شويه وكالت شهد .
شهد : يمه اجت عمتي .
_ اي هلا بيها وينها خلي تفوت .
جمانه : همست الفرح شوفي امج لسه تهلي بيها
ولا همها حزني .
فرح : جمانه تره عمتي مالها علاقه بشي .
جمانه : لا فرح اني سمعتها تكول زوجته عبالي يعقل يعني عمتج تعرف ابنه يشرب ومو خوش ادمي وضلمتني ويا مفكرت هيه أمه مكدرت تصلحه شلون تريد مني اني اصلحه .
فرح : كافي ياعيني متملين انتي من البجي هيه شمدريها ،
جمانه : طبت عمتي كمت كعدت سلمت هيه
_ ها عمه جمانه اشلونج .
_ الحمدلله عمه زينه.
_ بنتي ما الله هداج وترجعين البيتج بعد .
_ لا عمه هذا بيتي اني .
عفتهم وطلعت صاحت ورايه .
_ يا وين كَايمه مو احاجيج .
ام صالح : عوفيه خيه ام بسام هاي عرفت علتها
شنو خيه هاي اكيد مسحوره مبينه من تصرفتها .
ام بسام : ياااا صدك عود .
ام صالح : بهمس ، أي خيه شوفيلنه شيخ سيد حتى ناخذها عليه لان كل النهار تبجي وساكته متحجي ويانه .
ام بسام : يا عود صدك تطلع مسحوره وترجع
تريد بسام .
ام صالح : اي خيه اني اعرف واحد بالمسيب خلي نطلع من الصبح ونروح عليه شتكولين .
ام بسام : اي خيه ناخذها ونروح الصبح شعدنه .
ام صالح : خوش باجر نروح .
ام بسام: لعد جيبيها المغرب وباتن يمنه ونطلع مناك اقرب النه الكراج مالت السيارات ها شتدكولين .
ام صالح: اي بس خلي يجي اخوج واحجيله .
جمانه : راحت عمتي وهاي اني مرت أشهر واني بعدني يم اهلي سمعت بسام متعين بالجيش ويروح يلتحق أيام ياله يرجع ، ماعرف اهلي وعمتي ليش مصرين انكمل سوه رغم لا اني رايدته ولا هو رايدني طبيت بالغرفه اسمعهم يسولفون .
أم صالح : ها عيني حضرن الاكل ابوج على جيه .
شهد : راحت عمتي .
سندس : اي راحت اكلج شهد سمعت عمتي تكول العمتج جمانه مسحوره عود صدك .
شهد : سكتي سندس منيلج هل حجي اسكتي اجه ابويه ليسمع .
سندس : اي عيني بس من تحجي سندس متردن .
أبو صالح : شهد بابا صبيلي الجاي .
_ أي بابا صار
ام صالح: كعدت وكالت ، اليوم اجتي اختك
_ أي هلا بيها .
جمانه :كاعده مسافه ردت اسمعهم شيحجون بعدها امي ممكمله كلامها صاحتني فرح .
_ أي اي أجبت
فرح : يله طلع المسلسل تعالي نشوفه سوه .
جمانه: رحت يمهن وكلت .
_ اكلج شهد تره سمعت امي من حجت وانتن صحتني علمود لا اسمعها ادري بيجن ، كل عقلها
امي هيج تفكر بس تريد ترجعني وتخلص .
شهد : والله مادري شكلج جمانه انتِ أدره .
فرح : ها اشبيجن تسبسن .
جمانه : اسمعن بنات اني راح اروح ويا امي وابات يم عمتي لان اعرف بسام بالدوام علمود شغله
فـ اني لازم لازم اروح .
شهد : اي شعندج ترحين .
جمان : اسمعني اروح علمود اجيب شغله مالتي يمهم لازم اجيبها باي طريقه لازم اجيبها لان هل
شغله بيها اثبت سمعتي وعفتي و المشكله بقت هناك .
شهد : يا عزه اشلون تفكرين جمانه .
جمانه : لا حبيبتي هذا تفكير امج والعالم
بس راح اجيبه هنا حتى اثبتلهم اني شنو .
أعرف تصرفي غلط بس طفله ما افتهم وعبالي
هذا الشي هو سلاح عفتي وطهارتي ولازم اني احتفض بي حتى ليكولون عني مو خوش .
"""""""""
أبو صالح: بعصبيه ،انتِ تحجين صدك عود .
ام صالح : اي يا رجال انت متعرف هل شغلات وبنتك الكل رادها وتمناها اتوقع اي احد راد يسوي سحر الها علمود تعوف رجلها خلي اخذها و اروح باجر الصبح اني وعمتها ونوديها للشيخ .
أبو صالح : والله مادري شكول بكيفكم اذا تقبل جمانه روحو .
جمانه: صاحني ابويه رحت يمه كل .
_ ها بابا جمانه ترحين ويه امج وعمتج للشيخ .
_ اي يابه اروح .
أبو صالح: بكيفج روحي بابا .
جمانه : أي يابه بس ماروح المغرب اروح بليل .
_ اي براحتج حبيبتي .
ام صالح : يله يمه روحي حضري نفسج .
جمانه : وشعندي احضر هيه صايه البسها .
ام صالح: براحتج يمه .
جمانه : هسه براحتي يمه ليش هسه ياله سمعتها منج هل كلمه ليش احجي بكلبي والغصه خنكتني خنك صاح ابويه على صالح .
أبو صالح: يله بابا صالح روح وصل امك واختك وتعال بسرعه .
صالح : صار يابه .
جمانه: طلعنه نمشي و احس الطريق صار شطوله عليه من كد ما افكر اخاف اشوفه اخاف يسمع بيه جايه ويجي ماريد اشوفه ياربي خلي اليوم يعدي
على خير وصلنه البيت عمتي فتحت الباب وكالت .
ام بسام: هلا هلا البيت نور بيج بنيتي .
جمانه : انقبض كلبي كوه نطاقت ، اشلونج عمه .
ام بسام : هلا يبعد عمتج ، تعالن خيه اكعدن طيبه نايمه وبسام بالدوام خطيه .
جمان : جريت نفس براحة وكلت الحمدلله من ما موجود بسام كلت الامي .
_ راح اصعد فوك بغرفتي اني عندي كم شغله اجيبها واجي.
_ اي يمه اصعدي براحتج .
ام بسام : راح افرشلج بصفي ام صالح .
_ براحتج عيوني ام بسام .
جمانه : صعدت وتذكرت اول يوم طبيت بي
بهاي الغرفه شلون جنت خايفه ومرعوبه وشلون طلعت وخلصت ، الحمدلله يارب صبرني مثل ما صبرت ايوب وانطيني القوه اواجه كل العالم فتحت الكنتور وطلعت ملابسي كلهن جمعتهن بجنطه وحده
أساسا هن قليلات مو هواي لا اهلي جابولي ملابس ولا عمتي جابتلي وجمعت غراضي هم صارن جنطه وعلاكه خليت نواعم بيه ولكيت الشغله الي جايه علمودها فرحت من شفتها لان مجنت اتوقع الكاها ضميتها بالجنطه دحستها ليجوه خاف احد يشوفها الحمدلله من لكيتها احسن شي اخليهن بالغرفه مانزلهن هسه اخاف احد يفتحهن ويلعب بيهن ويشوفها نزلت وتلكتني عمتي كالت .
ام بسام: ها عمه ماحنيتي الغرفتج .
جمانه : عقجت حاجبي معاجبني وكلت بكلبي واشلون غرفه عاد الخاطر ربج حتى البوب ماتنقفل ولا بيها شي زين ومال اوادم ، جريت نفس وكلتلها
_ راح انام نعست كلش والله .
_ اي يمه نامي .
_ ابيش الساعه نطلع .
_ من وكت بـ 6 احسن من الحر .
جمان : اي خوش لعد هم ياله انام .
وفعلا نمت بصف امي وكعدت الصبح على صوتها .
ام صالح: كعدي جمانه تريكي سوت عمتج ريوك .
جمانه : اي يمه كمت ، كعدت غسلت واجيت اتريكنه وبدلنه وجاي نطلع عمتي صاحت .
ام بسام: طيبه يمه اكعدي قفلي الباب ورانه هسه اخوج على جيه عود سويله ريوك .
طيبه : اي يمه كمت .
ام بسام : ها ام صالح نتوكل .
ام صالح : اي داده ياله ماعدنه شي.
جمانه : فزيت تذكرت الأغراض كلتلهن .
_بس دقيقه نسيت شغله بغرفتي اجيبها واجي .
صعدت ونزلت جنطتي والعلاكه بيها حتى صور الخطوبه كالت عمتي .
ام بسام : ااسم الله شلج بيهن هذني .
جمانه : اغراضي وملابسي عمه .
ام صالح : انتِ بس عوفيها خيه خلي انروح
للسيد عود من ترجع يرجعن وياها .
ام بسام : اي بس راح نركب سياره شلون نحير بالجنطه ويانه .
جمانه : مالكم دخل بيه اني اشيلها بحضني وانتِ كلتي بس سياره وحده عمه .
_ اي صح سياره وحده
ام صالح: يله خيه ام بسام عوفي جمانه خلي
نتوكل راح نتأخر .
جمانه : طلعنه مشينه مسافه و ركبنه بالكيات والجنطه خليتها يم رجليه والعلاكه بحضني خافه عليهن اكثر من روحي احس ذني بيهن اثبات عفتي وصلنه المكان المتوجهين اله نزلنه واني نزلت غراضي ويايه طبينه وخليتهن يم الباب فاتن امي
وعمتي سلمن على الرجال و ومره اكبار بالعمر طبيت وراهم كعدت كال الرجال .
_ اوكفي بابا هنا .
كمت وكفت وماعرف شنو يسوون وشنو مصيري راح جاب عوده وكعد يقره عليها ويمشيها على جسمي من فوك ليجوه واني حسيت لعبت نفسي وردت اتقيء وكارها هل تصرف بس اريد اطلع اخر شي كال .
_ قربي بابا عليه اكثر .
الرجال يجي بكد ابويه عمره جبير ذب لعوده وبدة يمشي أيده على جسمي ويقره واني احس جسمي كله اتشنج وتبنج من حركته وكلبي يدك سريع احس راح يطلع من مكانه مرر ايدة على كل مناطق جسمي اني راسا فزيت وخزرته قوي ونفسي عله كال .
_ اشبيج بابا اتحملي و اوكفي عدل انتِ مسحوره وعليج عمل احد يكرهكم ومسوي الج اصبري شويه
حتى تخلصين .
جمان : متحملت اكثر دفعت ايده بقوه و ب
خوف و صحت .
_ لالالالا مااريد عوفونيييي .
ركضت ارجف وكفت يم الباب عمتي كالت .
ام بسام : ولج عمه تحملي خلي يكمل شغله .
جمانه : هزيت راسي نافيه هل لعبان نفس وكلتلها
باصرار .
_ لالالالا عمه عفيه عوفوني بعد ماريد خلي نطلع منا .
حجه الشيخ وكال .
_ ياله كافي اخذوها كملت القرايه .
ومادري شنطاهم بخور مادري شنو واني كارهه حتى روحي من هل سوالف رجعنه للبيت واني الطريق كله العن بالساعة الرحت بيها للشيخ شسوي والله طاوعتهم واجيت بس علمود اخذ الشغلة الي بيت عمتي ، تعبت نفسيتي وماعرف شتصرف وصلنه البيت عمتي كالت .
ام بسام : نزلو يمنه .
جمان : لا عيني اني تعبت راح اروح للبيت ويه امي .
ام بسام : خيه ام صالح سوي مثل ماكلج السيد .
ام صالح : اي خيه طبعا .
جمانه : رجعت ويه امي للبيت واني مهدود حيلي وتعبانه رحت انطيت الجنطه والعلاكه الفرح وشهد وركضت ذبيت نفسي بالفراش و نمت من غير غده من التعب والخوف والتفكير بلي شفته هناك عبالك النوم الشي الوحيد الي ياخذني من الواقع المؤلم
روحتي للشيخ جانت أكبر غلط سويته بحياتي بس شسوي لازم اروح لان امي ماراح تبطل ملحتها عليه ولا راح تسكت واني هم جان كل همي اجيب الشغلة الرحت علمودها ومهمني غير شي .
مرت الايام
وكمت اشوف امي تنطيني شغلات اشربها وتكول هاي ماي مقري عليه ومرات تجي عمتي تجيب الها اشياء ويكعدن يبسبسن وتروح امي وعمتي علاقتهن قوت وكلبي يكلي جاي يحوكن شي اليه بس سكتت .
جنت نايمه تعبانه كعدت الساعه 4 ونص صبيت غده وتغديت و قررت احجي ويا ابويه واكله اريد اطلك وبعد مارجع كعد ابويه من النوم ورحت يمه وحجيتله كلشي وكتله .
_ اريد انفصل من بسام اريد اطلك تعبت .
ومن سمع كلمه طلاك عصب عليه حيلللل وصاح
أبو صالح : احنه ماعدنه بنات تطلك سمعتيييي
سدي السالفه وبعد متفتحيهاااا.
جمانه : طلع ابويه للسوك واني كعدت ابجي هذا
اسلاحي الوحيد هو البجي مابيدي شي ولا اكدر اسوي شي غير البجي امي كالت .
ام صالح : اييي يا جمانه هسه انتِ مو يمنه صارلج 3 شهر بعد شلج بطلاك يا بنتي .
جمانه : يمه ماريد اربط نفسي بعد بي خوش انتو ليش متحسون بيه فهميني والله حرام الجاي سوو
تره تعبت والله تعبت .
سندس : عمه اجه بسام يريد يشوفج .
ام صالح: هلا وينه صيحي.
جمانه : ركضت طبيت بالغرفه واني كلبي يدك سريع
يربي شاجبه هذا سمعته يكول الامي .
بسام : عمه بس اريد احجي وياها صارلها اشكد يمكم واني عفتها على راحتها و ماجيت بس من سمعت مسحوره نقهرت عليها وهسه جيت اريد اشوفها .
ام صالح : تعال عمه طب بالغرفه جمانه .
جمانه : خليت ايدي على كلبي ماريد اشوفه هسه
تذكرني صار اشهر اني يم اهلي مفكر عنده مره
شويه وطب مبتسم وكال .
بسام : ها عيني جمانتي اشلونج إخبارج .
جمانه : جاوبت برود ، الحمدلله بخير .
بسام : ليش هيج عفتيني ورحتي .
جمانه : تشجعت وكتله ، اني ماريد اشوف وجهك مو انوب احجي وياك خوش عوفني بحالي رجاءً شنو أنتَ ماعندك احساس .
بسام : لا عندي حساس بس انتِ زوجتي وحامل بطفلي بعد ليش هل بعد والجفه منج ارجعي البيتج واني اوعدج ماشرب بعد و اتوبه وراح تشوفيني بسام جديد .
جمانه : انت تضحك عليمن بكلامك هذا لتضحك عليه بسام لان مستحيل اصدكك بعد انت يوميه تشرب وماراح تبطل احسن حل نطلك وكل واحد يروح بطريقه ، ضاج من كلامي وكال .
بسام : بس اني ما اطلك ولا اهلج يقبلون نطلك فهمتي ولج ما صار النه كم شهر متزوجين .
جمانه : صح صار 6 اشهر من متزوجين بس اني
ممرتاحه وياك وانتَ حتى متكلف نفسك وتسال عليه.
بسام : مو امي تجي تشوفج.
جمانه : بس انت زوجي اتحداك تعرف اني هسه حامل بيا شهر .
سكت مرد عليه بس يباوع .
جمانه : تعرف اني بشهر الرابع و راح واطب بالخامس اكيد متعرف وصراحه اني هم ما اكدر اتحمل عيشتكم وبالاخص انت مو عبالك اني ماعرف
سوالفك تره اني كلش زين اعرفك واعرف بموضوع اصدقائك من اطببهم وشنو يصير بينكم بسامممم.
فتح عيونه مصدوم وصاح .
بسام : شنو ولج انتِ شجاي تحجين اشبيه اني
وهيجي تحجين اشايفه عليه والله اذا ماسكتي
وسديتي حلكج اعرف اشلون اسكتج بطريقتي
بنت ال..... جايه تعلميني بالصح والغلط .
جمانه : ادموعي كامت تصب اخخخ لو اعرف الزم نفسي وما اضعف بهيج أوقات جان اني بخير كمل كلامه وصاح عليه .
بسام : لا ترررررجعين يطبج مررررض فوك مرض .
جمانه : على صوت بسام طب ابويه على صوته
وكال .
_ شبيك بسام ليش تعيط ابيتي .
بسام : هلا خالي اشلونك اعذني صوتي على
بس جمانه غثتني متقبل ترجع .
التفت عليه ابويه وكال .
ام صالح: بابا جمانه روحي ويا زوجج يا بنتي
انتِ مسحوره ومتعرفين بنفسج شجاي تحجين .
جمانه : بس اني اريد اطلك يابه ماريده ارحموني
وخلصوني منه هذا الرجال ماريده بعد ، عصب ابويه وكال .
أبو صالح: اي والعالم شتكول عليه بنته عايبه تزوجت و كم شهر ستر عليها وزوجها ورجع طلكها شكول للناس اني وشلون اواجهم فهميييني .
جمانه : بجيت بصوت وابويه كال .
أبو صالح : ممنوع تطلكين احنه ماعدنه وحده بعشيرتنه اطلكت انوب تالي عمري بنتي تطلك
تردين اضحكين الناس عليه .
_ بجيت وكلت ، ماروح والله ماروحححح .
صاح على امي بصوت رج البيت رج.
أبو صالح: ام صالححححح جيبي الرشاشه خلي اكتلها واخلص منها .
اجت امي تركض صاحت. .
ام صالح : يا رجال على كيفك فدوه العينك .
جمانه : احس يبست بمكاني من الخوف و رجليه
ماعن ماكدر اوكف عليهن من ابويه طلع الرشاشه مالته من الكنتور وجها عليه ويريد يضربني دموعي شلال ويصب ومحد رحم بيهن ، مصدومه من موقف ابويه الي طول عمره ساندني وميقبل عليه الاذيه هسه اشلون هيج يريد يموتني ويفرط بيه كعدت بالكاع من الخوف ارجف وكلشي محجيت امي جيتت على ابويه هيه وبسام واخذو منه السلاح باوعت عليهم كلهم نضرت خذلان صاح .
ابو صالح : البسي وطلعي ويا رجلج يله فضيها
عادددد فرحححح تعالي لبسيها الجبه .
جمانه : اجت فرح لبستني وبسام ابتسم ابتسامه انتصار وكال .
