رواية هو لا يشبههم الفصل العاشر بقلم تبارك الوائلي
" احترس من الصابرين فإن نفد صبرهم، حرقوا " الموانئ لا السفن.🫂 "
مجنت ناويه انزل بارت اليوم بس طلب من البطله
انزل حتى تقره البارت وياكم لان متعرف تقرا اله
بكروب جمانه 😂 😜
بسام : ياله امشي ويانه خلي نروح للبيت شوفي خالي شلون عصب بسببج ليصير بي شي .
جمانه: باوعت عليه بحقد وسكتت مكدرت احجي
كل هذا واني صرت بايدهم لعابه يحركوني شلون
ميعجبهم لبستني فرح الجبه وشال وطلعنه اني وياها وبسام لحكتنه امي للباب كالت .
_ اي بنيتي روحي ويا اختج لتعوفيها وعود باجر رجعي بس خلي ابوج شويه يهداء .
فرح : اي يمه هو راح اروح وياها ، يله جمانه يله امشي اشبيج بالكوه تجرين برجلج .
جمان : انتهيت اني خلص انخذلت من اقرب الناس الي اجر تكسي بسام وكلساع يباوع عليه و هو مبتسم وصلنه البيتهم طبينه عمتي تلكتنه
كل هذا واني ماحاسه با اي شي عبالك بس جسد يمشي طلعت عمتي فرحت من شافتني وطيبه وياها كعدنه يمهم شويه وسوو عشه اباوع عليه يطب
و يطلع فرحان ومبتسم اني ساكته ومنطيت أي
رده فعل جابو العشه وماكلت فرح سوت لفه وحاولت وياي واني نفسي مسدوده
من ملحه فرح كوه اكلتها بعدها رحت نمت مادري بالدنيا كلها هو تعشه وطلع الدوامه فرشت فرح
الها والي نمت و احس البيت خانكني كعدت الصبح راسي مصدع من كميت الوجع والحزن والتفكير
اجت فرح كالت .
فرح : ها جمانه اشبيج صافنه .
_ ماكدر فرح اني مو اختج ليش متحسين بيه ماكدر احس البيت يخنكني وشوفة بسام بالذات احسها
تكطع النفس عليه .
_ اي شسوي شبيدي اني شفتي ابويه اشسوه البارحه .
_ وين حبه وخوفه عليه فرح مو علساس ميريد يشوف دمعه بعيني .
_ ولج ابويه رجال تفكيره بابت عرب ويستحي
تجي احجايه مايريد يكول عندي بنت مطلكه .
_ وليش هاي هيج تفكير العالم سيء يعني شنو بنضرهم المطلكه مو بشر وعدها احساس ، لو ما اني بنتكم وانتو تعرفون بسام شنو كلش زين ، مسحوره عرفناها والشرب مو يشرب وسوالفه التعبانه .
_ جمانه اني شعليه ابويه يكول يكبر ويعقل ويبطل
سوالفه لازم تنطي بعد فرصه مو من اول اختلاف بينكم تردين تطلكين .
_ ماكدر انطي دقيقه بعد مو نوب تردوني افني عمري اله ، ياله كومي نرجع للبيت واذا ماقبلو اهلي
ارجع ، اشرب سم واموت روحي ولا ابقه يم هيج ناس وبالاخص بسام ماينطاق ابد وكرهته وما اتقبله بعد والله ما اتقبله ونفسي متريده يا عالم ماريددده .
_ والعالم شتكول جمانه .
_ معليه الي يجي يحجي و يسال اني مااخجل اكول الحق والي شفته بعيني على بسام كلشي احجي
ومراح أخاف من شي .
_ جمانه تره البارحه سمعته من يكلج ماكو شي يثبت عليه ويا اصدقائي وسمعته من هددج وكال اسويها كعده عشاير وفضايح كدام الناس اذا حجيتي ، جمانه فدوه سدي هاي السالفه احسن كافي لتجيبين المشاكل الاهلي بسام واحد شراني ويدور مشاكل واحنه نخاف من المشاكل استري علينه عفيه.
جمان : غمضت عيني وجريت نفس بقله حيله وكلتلها.
_ هذا هو فرح يله خلي نروح للبيت بسرعه قبل لا يرجع بسام للبيت ماريد اشوفه .
طبت علينه عمتي شافتنه نسولف كالت .
ام بسام : ها كعدتو تعالو نتريك سوه .
جمانه : كمت لبست وكلتلها
_ راح نرجع للبيت ماشتهي عمه .
_ لعد ليش اجيتن اذا ترحن جمانه انتِ متزوجه وحامل اكعدي وتحملي .
_ ليش اتحمل يعني .
طيبه : جمانه هذا نصيبج لازم ترضين وسكتين .
جمانه : يعني لو وحده من اخواتج جان ماقبلتي
عليها هيج .
ام بسام : طيبه كافي سدي السالفه .
_ اني وفرح رايحين البيت اهلي عمه ، صحت ياله فرح اشبيج صافنه يله امشي .
وصدك طلعنه ورجعنه مشي نمشي سريع اني وفرح وصلنه وطبينه للبيت امي أول مشافتني خرطت خدها وكالت .
ام صالح: يا عزاااا هم رجعتي جمانه .
جمانه : نزعت الجبه شمرتها وكلتلها .
_ اي رجعت ومابقه بعد يمهم واريد اطلك وشيصير خلي يصير .
_ ولج يمه ليش تخزينه ويه العالم .
بجيت وصحت .
_ العالم العالم هذا همكم انتو ليش متحسون بيه تره مو شويه الي عشته ويا بسام والله ماكدر اعيش وياه يمه فدوه اروحلج احجي ويا ابويه هو ياخذ حجايتج .
احجي وارجف من الأعصاب والبجي حسيت امي شويه نقهرت عليه كالت .
ام صالح: كافي يمه هذا هو بعد محد يجبرج عليه ابقي يمنه الحد متجيبين بسلامه وقتها الله كريم بلكي يصفه الحال .
جمانه : اجت فرح حضنتني تهدي بيه وكالت
فرح : تعالي جمانه فدوه كافي تبجين باعي جسمج شلون يرجف يمعوده ليصير بيج شي منو يفيدج .
_ لا مابيه شي عفيه ماريد اروح يمهم بعد والله جزت نفسي منه والله والله من شفته ويا صدقائه
بذاك المنضر روحي لعبت منه .
_ كافي تعاي نامي انتِ الليل كله مانمتي بس تبجين ولج الطفل ماله ذنب وحرام عليج هيج تسوين بنفسج .
جمانه : حتى الطفل ماريده فرح ماريده هل طفل لازم انزله باي طريقه ماريد اخلف من بسام هذا وراء
وماريده يتكاثر وينتشر ، صدكي فرح حتى خلفته
راح تطلع عليه .
فرح : لا حبيبتي حرام شلون هيج تحجين ماله
ذنب هاي روح داخلج ولازم تحافضين عليها .
_ لا مو حرام عليه اني من باجر اصعد الدرج
واكمز منه لازم انزله الطفل واخلص .
اجت سندس كعدت يمنه وشاركتنه بالكلام وكالت .
سندس : ولج كافي خيه والله ماتستاهلين كل الي صار بيج جمونه حبيبتي دموعج غاليه علينه.
جمان : سندس انتِ هم عفيه احجي وياهم فدوه ماريد ارجع عليج الله احجي ويه صالح بالكي هو يحاجي ابويه.
سندس : اووف شكول عليك عمي والله حسن
اخويه مات عليج من شافج بس كلشي نصيب .
شهد : كافي سندس هيه شحصلت من ابن عمتها
محد عم عليها غير شكلها حلوه وحلوه وهذا حضها
كلشي متهنت بجمالها وبالاخير طلع حضها زفت المسكينه .
فرح : كافي اطلعن عوفنها تنام وترتاح .
جمان : تمددت وكورت نفسي وهمست بصوت
يرجف
_ غطيني شهد احس روحي بردانه .
شهد : ليش حبيبتي اشبيج يوجعج شي ناخذج للدكتور .
جمانه : لا مابيه بس خلي انام .
شهد : نامي يروحي الله لا يوفقه البسام الله يدري شسوه بيج وخلاج هيج كارهته .
طلعت الامي واني اغلي على حال اختي انمرد كلبي عليها واني اشوفها ذبلانه كدامي أجيت يم امي وكتلها
_ يمه بعد محد يحجي ويا جمانه زيننن ، حرام والله حرام عليكم هيج تسوون بيها .
ام صالح: كافي شهد سدو السالفه اني هم بعد ما ارجعها الحد ماتولد والله كريم بلكي الطفل يحنن كلبها على بسام .
شهد : انتِ صدك تحجين يمه صح اني اول شي جنت اكيف تزوج جمانه بس مو هيج يمه الي
شافته اكبر من عمرها ويشيب اكبر راس .
ام صالح: لا لتلحين كافي شهد .
شهد : لا يمه مو كافي فكروه بهاي المسكينه شويه ،
اجت فرح طبكت وياي وكالت .
فرح : يمه اجه ابويه احجي ويا اشلون هيج لبارحه
كَلبه طاوعه على جمان ويرفع بوجها السلاح والله للصبح مانشفت دمعتها مقهوره من ابويه شلون
شال سلاحه عليها عبالك داخلين جبها ليش هيج يمه .
ام صالح: حقجن متعرفن العالم ماترحم شدكول علينه من يسمعون جمانه اطلكت ولج بنتي محد يصدك صوج بسام هسه الف حجايه تنحجي عليها وعلينه .
شهد : معلينه يمه بالعالم جمانه مو اول وحده تطلك.
ام صالح : ولج بعدها يادوب 16سنه و تردنها تطلك حقه ابوج ما يقبل بالسالفه احنه بكل عشيرتنه ماعدنه بنيه تتطلك ابد هسه تالي عمرنه بتنه احنه تتطلك .
جمانه : اسمع كلام امي ويه خواتي وداخلي يتكطع يعني اخر همهم اني عدهم كلام العالم فوق كلشي وفوق سعاده بتهم حتى اجه ابويه واسمعه يكول .
ابو صالح: جمانه رجعت .
ام صالح: اي عوفه بعد خليها لحد ما تولد بلكي
هل سحر يروح منها بلكي من تشوف الطفل تبطل وتغير تفكيرها .
أبو صالح : خلي اروح اشوفها .
ام صالح : عوفها هسه نايمه .
أبو صالح : لا اريد احجي وياها ولحد يجي ورايه .
جمانه : طب ابويه اني متمدده من شفته راسا فزيت ودموعي ترسن عيوني اجه كعد بصفي وكال .
_ هاا بابا حبيبتي اسم الله اشبيج .
مسحت دموعي ورجعن نزلن من جديد شهكت
وكتله بصوت باكي .
_ لا مبيه شي بس والله والله يابه ماكدرت ابقه يمهم والله البيت يخنكي هو والي بي وبسام كارهته والله مو بيدي يابه .
أبو صالح : ليش بنتي شنو السبب .
_ السبب لان اني ادري بي ميحبني والله يكلي
امي اختارتج اليه وافقت عليج مجبور ، اني
جنت رايد وحده والله يابه نفسي جزت منه .
_ كافي كافي بنتي والله مصدكج كافي واني مادري البارحه شجاني وعصبت عليج يطبه مرض هو وين
يلكه مثل جمانه .
مسحت دموعي وفرحت بكلام ابويه كمل وكال .
أبو صالح: بس مو صوجه صوج امه الي اجتي وخطبتج هذا هو بس تولدين اطلكج منه وهل
طفل ماريده بس تولدينه انطي الهم .
جمانه: مسحت دموعي وكتله ، بكيفك يابه .
أبو صالح: لتبجين كافي عيونج رايحه من البجي حرامات تنزلين دمعه من عيونج علمودهم لا هو ولا امه يستاهلون هذا بيت ابوج ويبقه مفتوح الج وتبقين بنتي ومدللتي .
متحملت حنية ابويه بجيت بصوت عالي مسح دموعي وطبطب على ظهري وكال .
_ مو كلنه كافي بجي محد يستاهل تبجين عليه .
_ اي اي بعد ما ابجي هذا هو .
_ ياله كومي ناكل اني وياج مثل قبل من جنه ناكل .
_ اي كايمه بس اغسل وجهي ،
راح ابويه واني طلعت ورا غسلت وسمعت
سندس تسولف ويه امي .
سندس : عمه جمانه راح اطب بل خامس ولسه ماعرفنه شنو بيها .
ام صالح : اي والله باجر اخلي فرح تاخذها للمركز الصحي وتسوي سونار ونشوف وضعها و وضع الطفل شنو .
فرح : يمه راح اخذه العصر ليش باجر جمعه ميفتحون .
ام صالح : خوش اخذيها و روحي .
جمانه: اكلت ويه ابويه وخلصت شلت الصينيه
اجت ورايه فرح كالت .
فرح : حبيبتي جمانه البسي علمود نروح نفحص
يم الدكتورة .
جمانه : بالبداية مقتنعت اروح بس شفت نفسي تعبانه وفعلا محتاجه دكتوره وفعلا رحت لبست واني احس عبالك هم ونزاح مني من وافق ابويه على طلاكي كملت وطلعنه اني وفرح نمشي كالت .
فرح : ياله امشي نركب سياره لان تتعبين مشي .
جمان : بكيفج فرح ، طلعنه على الشارع وصار
بوجهنا اسامه ابن عمي اجه كال .
اسامه: هلو بنات اشلونكم .
فرح : هلو اسامه الحمدلله بخير .
اسامه: شلونج جمانه .
جمانه : الحمدلله بخير .
اسامه: وين رايحين .
فرح : للمركز الصحي نروح للدكتوره .
اسامه: وحدكم ترحون امشي اني اروح وياكم .
جمانه : راسا كتله ، لتكلف نفسك اسامه ماكو داعي احنه نروح كال .
اسامه : لا جمانه شكلف نفسي شعندي قابل اني .
جمانه : منطانه مجال نعترض على جيته بعد ، وكف تكسي وصاح .
اسامه: يله صعدن.
راح هو كعد بالصدر واني وره وفرح كعدت بصفي
صفنت اباوع من الجام ومادري وين راح ياخذني قدري ويوديني وهم يجي يوم اخلص من بسام مشت السياره مسافه وفززني صوت اسامه.
_ يله عيني انزلو .
فرح : اسامه اني ادفع .
اسامه : امشي فرح مو عيب هذا الحجي ، امشن جاي وراجن .
جمانه : اجه ثواني ولحكنه راح هو قبل فرح دفع فلوس الكشفيه مال الدكتوره خجلت من نفسي كلتلها الفرح .
_ على شنو هيج كلف نفسه فرح عيب انطي الفلوس .
جرت نفس فرح وكالت بابتسامه .
فرح : اي خيه ماتدرين ليش كلف نفسه يعني .
جمانه : اهووو فرح اني بيا حال رحمه الاهلج عوفيني بحالي واسكتي الولد اجه ليسمع شيكول علينه .
فرح : سكتنه خيه سكتنه.
شويه واجه وكف قريب من فرح وكال .
اسامه : ها فرحه شخباركم بالبيت .
_ والله الحمدلله زينين .
ذب حسره وكال.
اسامه: سمعت تردون اطلكون جمانه من بسام
صحيح .
فرح : اي ابويه كال بس تولد انطلكها .
بسام : الله الكريم ، ياله طبن صاحو اسمج جمانه .
جمانه : هزيت راسي وكمت اني وفرح فتنه على الدكتوره سلمنه وكالتلي .
_يله حبيبتي نامي فدوه للبنات الحلوات وصارن امهات .
_ ابتسمت الكلام الدكتوره ، بدت تسألني واني اجاوب شويه وكالت .
_ الف مبروك بيج بنوته ان شاءلله حلوه مثل امها .
_ تسلمين دكتوره .
_ يله حبيبتي نزلي على كيفج كملت .
_ طلعنه ، اسامه بعده كاعد بره رحنه يمه كال ها بشرو شلونها صحتج .
_ الحمدلله زينه وكالت بيه بنوته .
اسامه: ها الف مبروك يارب .
جمانه : تسلم .
رجعنه للبيت اسامه ويانه وصلنه على الشارع وراح واني امشي وافكر ، شون بهاي الطفله شنو ذنبها هم يا ترا يطلع حضج مثل حضي لا أن شاء لله احسن مني وشلون راح انطيج الابوج واني ماشايفتج وشلون راح تعيشين وعندج هيج اب مثل بسام نزلن دموعي مسحتهن احس نفسي ضلمتها لهل طفله من انكتبت باسم بسام جريمه بسام يصير اب وصلنه
للبيت وامي واكفتلنه بالباب .
ام صالح: ها بشري فرح .
فرح : بيها بنوته يمه .
ام صالح: ان شاءلله تجي بسلامه .
سندس : الف مبروك عيني جمانه .
_ الله يبارك بيج سندس .
ام صالح: ها يمه شو وجهج اصفر .
جمانه : لا مابيه بس تعبت ودخت من الطريق .
ام صالح : روحي تمددي ورتاحي .
جمانه : خلي اروح اصلي واجي حيل جوعانه .
فرح : ياله كملي ونتعشه ابويه على جيه .
جمان : أي رايحه ، رحت صليت وكعدت شويه واجه ابويه التمينه كلنه بالاستقبال كعدنه تعشينه خلصنه
وشهد صبت جاي كعدو يشربون واني كاعده وياهم بس بالي شارد بغير مكان دماغي يحجي ويفكر اشلون اذا جبت وشلون انطيهم البنيه الهم احس
نفسي خفت عليها وهيه بعدها ابطني اشلون راح يصير بسام ابوها معقوله على كلامهم يتوب بسام ويكبر ويعقل والله العظيم عندي احساس جبير
بسام عمره ماراح يتغير ولا يحاول يغير طبعه ابد
_ مرت الايام
واني بعدني يم اهلي وكل كرايبنه وعمامي عرفو
راح اطلك من بسام وصار الحجي اشكال الي ينطيني العذر ويكول حقج والي يكول اصبري بعده مراهق واني شنو ذنبي اصبر على المراهق حقهم ميعرفون كل سوالفه الهم الضاهر واني محجيت الشفته عليه
حتى الامي ولا البويه ولا الخويه ولا للعالم محد يعرف غير خواتي ، جانو مصورين الي حجيته شي بسيط وبمرور الزمن يتغير ، هنا امي همها الوحيد
صار تخاف يشمتن بيها عماتي وتكول يكولون مدلله ابوه وماصبرت على الرجال ويحجن بتربيتها
واني صرت اسمع واسمع واسكت بس الي جان منطيني القوه هو ايماني برب العباد ، كل يوم من اصلي اكعد واكول ربي صبرني كما صبرت ايوب والحمداله ربي يحبني وفعلا انطاني صبر محد اتحمله
عدت الايام _
اجه عمي ابو هدى على اهلي وحجه وياي وكال
أبو هدى : عوفي بابا مامجوره عليه خلي يولي .
جمان : فرحني كلامه عكس كلام اهلي لي دامن اسمعهم يكولون خلي تولد والله كريم جنت حيل اخاف ليرجعون يجبروني ارجع اله راح عمي أبو هدى ورحنه اني وفرح للدكتوره عندي موعد وياها
رحنه وشافتني وكالت كلشي طبيعي ورجعنه تلكتنه
امي كالت
ام صالح: ها بنيتي شكالت الدكتوره وضع الطفله
زين
ان شاء الله.
جمان : اي الحمدلله كلشي طبيعي .
ام صالح: خابرت كواكب باجر تجي خالتج علينه سامعه بسالفه طلاق جمانه .
فرح : اي يمه هلا بيها .
جمانه : فرحت من سمعت تجي خالتي ورحت نمت واني افكر ساعه اكول بس اولد انطي الطفل الابوه وساعه اكول ، ها لا ماكدر انطيه مادري اشلون نمت وكعدت الصبح اتريكت شويه و ندكت الباب اجتي خالتي وكل معتاد تجي محمله اشكال من يومها متجي ايدها فارغه ابد من شافتني كعدت بجت
_ ليش البجي خاله .
ام حميد : شوفي يا خيه ام صالح من ردتها الابني مانطيتيها وكسرتي كلبه وهسه طلع ابن اخوج هيج مسوي بيها .
ام صالح : وشمدريني يا خيه كل هذا يطلع منه
ومن امه .
جمانه: خاله حبيبتي لتبجين هيه حتى عمتي تعرف بسوالف ابنه كلهن وجانت متصوره عود من تزوجه راح يصير رجال ويبطل سوالف .
ام حميد : لا خاله الرجوله مو بزواج ولا كلمن
حط على وجها شارب صار رجال اخ اخ من امج
شكد حجو ولدي وكالوله بسام مو مال زواج مدلل امه بس ماصدكت با اي احد .
ام صالح : هسه اشلون تبقون تلومون بيه هذا
نصيبه بعد .
ام حميد : لا مو نصيبها انتِ الي جنيتي على بنتج انتِ بايدج ، شكد نصحناج و اخذتي نصيحتي ولا سمعتي من احد شلتي خطيت هل الطفله وانوب حامل هسه اشلون بيه فهميني .
ام صالح: هسه خلي تولد والله كريم منو يعرف
يجوز تتغير افكارها من تجيب .
جمان : يمه انتِ تحجين صدك عود تتغير افكاري
شنو هيه لعبه وتتغير.
شهد : يمه شنو بعدج نفس تفكيرج انتِ اشوكت تتغيرين .
شبعت بجي هاي اني صار كل وقتي بجي خالتي كالت .
ام حميد : كافي جمانه بجي كومي لبس اخذج يمي هاي منا لمن تولدين تاكل كلبج اعرفها اختي واعرف
سوالفها .
ام صالح: يا خيه وين ماخذتها .
ام حميد : وين يعني اخذها يمي خلي ترتاح البنيه اشويه عوفيه متشوفين شصاير بحالها .
ام صالح : أي خلي اشوف ابوها من يجي اذا قبل اجي اني وياها .
جمانه : اجه ابويه وتغدينه وكلتله امي واني بكلبي اتمنى ميرفض لان حيل مشتاقه للبنات ونفس الوقت مخنوكه من البيت وصدك قبل ابويه رحنه ويه خالتي وتلكتنه كواكب .
كواكب : هلا حبيبتي شلونج شخبارج ولج ليش هيج ذبلانه تعالي ارتاحي خلى ادك على سرور راح تفرح بجيتج .
جمان : ابتسمت الها وكعدت وهي راحت خابرت سرور وصدك اجتي وكعدنه اني وسرور وكواكب نحجي من اول يوم دخلت بي البيت عمتي وحجيتلهم على كلام اهلي كواكب وهاي خالتي
تخبلو من سمعو خالتي كالت .
ام حميد : من كل عقله ابوج يتوب بسام ويعقل لا ماصدك .
جمانه : شسوي خاله اهلي بعدهم نفس تفكيرهم ويخافون من حجي الناس .
سرور : جمانه ليش هيج مسويه بروحج تره انتِ
لا اول ولا اخر البنات تطلكين .
جمانه: حقج سرور سهله عندج بالكلام بس اهلي مو سهله عدهم تدرين امي شتكول .
_ شتكول خالتي .
_ تكلي شراح تحجي العالم عليج هسه ميكولون ليش وره 3اشهر من زواجه تطلك اله بيه شي ومعيوبه .
سرور : ياااا عزااا اشلون هيج تحجي خالتي عمي طزززززز بالعالم احنه نعرفج شنو ونعرف اخلاقج .
جمان : تدرين سرور من وره كلامهم اشسويت من رحت على بيت عمتي خلوني من الخوف جبت النيشان مال عرسي علمود خاف احد يحجي اشوفه علامه عرسي واسكته .
احجي وكوه تطلع الحجايه مني من القهر
والخذلان العشته كالت .
سرور : لا يعمري لتبجين ما مجبوره اشوفين الاي احد شي خاص بيج ، كلنه عدنه ثقه بيج .
كواكب : ولج خالتي والله ضلمتج بهل زواج مو رادج اخويه ليش هيج سوت بس شنكول كل شي نصيب .
جمانه : شسوي كواكب اهلي حكمو عليه بالمؤبد
ويه بسام .
كواكب : أي والله كلنه انقهرنه عليج من سمعنه
بيج جمان لترجعين ويا خالتي ابقي يمنه كم
يوم ارتاحي وغيري جو وامي ترجعج عود .
جمان : الله كريم اذا عليه ياريت ابقه والله كل ا
لنهار يحجون بسالفه بسام وماكو غير سالفة عدهم ،
كعدو البنات يواسون بيه امي وخالتي نامو من وكت شويه وكلت الهن.
_ راح اروح انام نعست حيل .
_ روحي حبيبتي .
"""""
ام حميد : ها خيه شعندج ليش باجر ترجعين .
ام صالح : اي والله الصبح ارجع علمود أبو صالح .
ام حميد : ابقي للعصر وروحي .
ام صالح : ما اكدر والله .
ام حميد : اخخخخ يا ام صالح شلون راح ويه جمانه .
ام صالح : ابوها يكول من تولد اطلكها .
ام حميد : بعتب ، لو مطيتها الابني سوده عليه
لهسه مقهور عليها وسمعت اخو حميد يكله اذا
اطلكت جمانه تزوجها تدرين شيكول الاخو ، ام
صالح يكله الاخوة اي اتزوجها واربي بتها هم
اذا مارادها بسام .
ام صالح: يااا اسكتي خيه هل حجي مو وكته عليج الله اسكتي .
ام حميد: انتِ شلتي خطيتها بعد مايفيد الحجي .
ام صالح : يوووو كافي فدوه كلها تلومني اني
شعليه هو هذا نصيبها .
جمانه: كل هل كلام دار بين امي وخالتي وهم عبالهم اني نايمه بس الحقيقة اني مجرد مغمضه عيني بدون ما اغفه وسمعت الحجي الي دار بينهن يعني معقوله كلام خالتي هيج ابنها بعدخ اله نفس بيه
حتى بعد ماطلك ، بس هم مايدرون بسام سد نفسي بجميع الرجال دعيت من كلبي ، الله يسعده بحياته ويلكه احسن مني لان اني بعد مستحيل افكر ارتبط.
""""
حميد : ها خاله نمتي .
ام صالح: لا خاله كاعده كول .
حميد : اكلج شنو سالفه جمانه صدك راح اطلكوها .
ام صالح : اي خاله ابوها يكول بس تولد بسلامه والله كريم .
حميد : اني اكول هاي مسحوره خاله .
ام صالح: صدك اشلون عرفت .
حميد : مبينه خاله مسحوره واني اعرف سيد كلها تحجي بي الي يزوره يصير زين انتِ شتكولين .
ام صالح: والله مادري خاله بكيفك .
حميد : باجر الصبح اوديكم عليه احسن بلكي نعرف القصه شنو .
ام صالح : الله كريم خاله ان شاء لله .
جمانه : اسمعهم يحجون كلت بگلبي هذوله يحجون صدك عود اني مسحوره زين وبسام وتصرفاته هم سحر يخلي يتصرف هيج ، لا واني مكيفه اكول ابقه كم يوم ارتاح ابيت خالتي وانسه سالفه بسام ، انوب طلعلي حميد يدور سيد وسحر خرب حضج جمانه حتى حميد ما خلصتي منه ، مادري شلون نمت وكعدوني الصبح تريكنه وطلعنه للطارميه هناك
شيخ يسمو شيخ جميل واجت ويانه كواكب رحنه
اباوع على المكان بي بس مقام مثل مراقد الامه عليهم السلام زرنا وطلعنه اباوع المكان بساتين ومناطق زراعيه حلوه وخضار والله تغيرت نفسيتي من رحنه اني تغيرت نفستي من المكان والخضار وهم عبالهم لان السيد قره عليه هههه رجعنه قبل الغده وتغدينه وامي كالت .
ام صالح: ياله يمه نرجع للبيت .
جمان : الصدك ماتمنيت ارجع للبيت لان هم راح يفتحون نفس السالفه كل النهار ونرجع البسام ومصايبه .
كواكب : خاله عوفيها يمنه كم يوم خطيه متشوفيها
تعبانه ،عود امي ترجعها .
ام صالح : والله ياا خاله اخاف ابوها ميقبل .
_ لا ليش ميقبل .
جمانه : البنات گوه قنعو امي وعافتني وراحت ماصدكت كواكب اخذتني وياها لسوك سوكهم
بعيد وماكو سياره عليه يعني لازم نمشي و الطريق كله نحجي اني وياها شفنه كشك يبيع جبس واني
شلون احبه وعبالك كواكب تقره افكاري وكفت اشترت الي ورحنه لسوك وصلنه و سوكهم حيل
حلو بالحريه كواكب تتعامل ويايه مثل بحذر عبالك
ام تهتم بطفلها وكفت اشترتلي عصير برتقال واكعدنه اني وياها بكافتريا صغيره بعدها رجعنه اشكد اتونست بهل طلعه من كل كلبي حسيت اني
بعدني طفله صغيره وكواكب تفتر بيه وكايدتني
من ايدي وتخاف عليه من العيون رجعنه وتعشينه وتعللنه وثاني يوم هم رحت لدكتوره وهم اخذتني وياها ورجعنه و بالليل بقينه سهرانين اجت سرور خطيه هم باتت يمنه وسهرت ويانه اباوع على بيت خالتي اشكد يحبوني ويهتمون بيه والبنات شايلات همي كلتلها .
_ ولج سرور عايفه زوجج وجايه من ورايه .
سرور : لا عيني خطيه حجيتله عليج وكلي روحي ابقي باتي يوم وتعالي .
_ ها الحمدلله ماريد الرجال يضوج .
سرور : لا خطيه مايمانع بجيتي .
جمانه: الحمدلله صدك تونست بس احس الاسبوع
ركض ركض كلهم يردون راحتي وكواكب حارت شتطبخ وشتسويلي كلتلها .
_ والله كل شي من ايدج طيب لتعبين نفسج .
خطيه اباوع عليها محتاره بيه تسوي الاكلات
الي احبها و اطلعني لو تسهر ويايه ونبقه نحجي ونضحك اما داوود اشوفه يجي يطب ويطلع
وعيونه ابد ميشيلها مني عيونه تحجي حجي مافهمته بوقتها لان عقلي صغير وهو هم ابد ما فكر مره يحجي وياي با اي شي هلكد ما جان محترم بس مره وحده من سمع بيه رحنه للسيد كال وهو فايت من يمي .
_ شعندج رايحه للسيد شنو مخبله
_ لا مو مخبله وماريد اروح بس همه ودوني .
_ اي لتروحين بعد شكو رايحه وياهم .
جمانه : عفته ومشيت لان ماعرفت شرد عليه بعدها اجت امي وقررت اروح وياها اجه حميد حجه ويايه اشويه بحديه وكال .
حميد : ليش مترجعين البسام وانتِ حامل وبعدج صغيره شنو بهل عمر تطلكين جمانه تره عيب البنية تطلككك .
جمان : متحملت راسا بجيت وكتله .
_ ما اكدر ارجع والله .
اجه اخو داوود وكله .
داوود : وليش ترجع مامجبوره عليه حميد
عوفها براحتها.
راح حميد ولحكه داوود واجه كعد يمي اخوهم الصغير كال .
عادل : ليش ضجتي اني واكف وياج محد يجبرج على بسام بعد اذا تردن اني اجي وياج البيتكم هم احجي ويا ابوج .
_ لا تسلم ميحتاج ، عفته ورحت جوه يم البنات اجتي بت خالتي خالده كعدنه نحجي اني وياها
فات حميد كالت .
_ اوف اليوم حميد معصب على داوود .
_ ليش خطيه .
خالده : نوب هم منا ميتحاجون اصلن .
جمانه : ياااا ليش ميتحاجون .
خالده: يعني متدرين انتِ .
جمانه : لا والله ما ادري ليش بلعكس انتو خوتكم حلوه واحد يحن على الثاني .
خالده: راح احجي بس لتكولين اني كلت الج .
جمانه : احجي يمعوده والله ما اكول .
خالده : الصراحة من وراج انتِ ميتحاجون .
جمانه : يااااا ، اني ليش شعليه اني بيكم .
خالده : مو تعرفين قبل داود رادج من خطبج بسام واهلج انطوج هو ضاج وحجه ويا خالتي وكللها افصخيها واني انتضرها كم سنه اتصير واخذها
بس حميد ما قبل وكله بسام ابن خاله ومنريد مشاكل و هسه من ردتي تطلكين من بسام هم
رجع داوود كال اريدها تطلك واخذها حتى كال الامي اذا طلكت مستعد اخذها واربي بتها .
جمانه : ياااا عزززاا عود صدك تحجين .
خالده: أي جمانه و حميد من سمع ضاج وزعل من داود وهسه ميحجي وياه لان يكول ، من تروح تخطبها و يسمع بسام شيكول عليك تاخذ طليقت
ابن خالك شنو نسيت
بسام واحد مشكلجي تريد تسوي عداوه ويا
ممنوع تتقدم الها ويجوز ترجع الرجلها البنيه .
جمانه : كملت كلامها واني صفنت وكلت بكَلبي
اكول البارحه اجه يحجي ويايه ويكَلي ارجعي الرجلج اثاري ، خاف لا اخو يفكر بيه ويخاف على اخو مني ، ياله هم حقه الرجال ، من عدها كلت
لا اني لازم ارجع البيتنه وبعد مابقه هنا دقيقه
شنو ذنبهم حميد وداود من ورايه ميتحاجون
رجعت واني مهضومه والدمعه بعيني ، حاولت كواكب تبقيني يمهم بس اني كلت مستحيل ابقى لازم ارجع وفعلا رجعت البيتنه وفرحن بيه
فرح وشهد من شافوني هو اسبوع بقيت ابيت
خالتي بس جان مينسي ابد ،
مرت الايام _
و بسام مابطل كل يوم يدز ناس من أقربائه عليه يريد بس يرجعني واني ارفض اخر شي متفق هو
و حميد ابن خالتي ورايح جايب عمامه و اولاد خالي بيهم بل 10زلم واجوي اندكت الباب بـ 11 الصبح
وطبو وكعدو ويه ابويه وهم فتحو سالفتي
وابقو يحجون ويا ابويه انو بسام راح يتعدل
ويبطل الشرب وحرجو ابويه حيل ، اهلي جهزو
الغده الهم لان صار وقت الغده وهم كالو البويه ماناكل من زادك اذا مانطيتنه كلمه ورجعت بنتك ويانه وابويه مقصر كلهم ابشرو اتغدو والي اجيتو بي تاخذو وتغدو وشربو الجاي واني ماسكتت من البجي اشلون هيج حجه ابويه يعني اقتنع بكلامهم
هاي هيه ، كالو هم راح يتكفلون بسام يتوب ويغير طبعه واني شنو ذنبي اذا كرهته وجزت نفسي منه
طب ابويه باوع عليه كال .
_ ماكو داعي احجي عيونج حجن قبلج وادري ماقابله بس لتصغريني كدام الناس واني نطيت حجايه .
_ بس اني بنتك واهم من الناس لتضلمني ويا
والله نفسي جازه منه والله ماكدر .
أبو صالح: بنتي انطي فرصه يصحح غلطه وياج
جمان : راح تجني عليه هيج .
طب ابن عم امي وسمعنه وكله الابويه .
_ لا ماقبلها لو على بنتي مستحيل اجبرها عوفها منريد انشيل خطيتها واحنه اكيد منعرف بسام بكدها .
أبو صالح : هذا هو راح اعوفها .
_ بس راح يزعلون منك الناس شراح تكول .
أبو صالح : بنتي اهم منهن .
_ خلص وصلني ردك .
راح وكال الهم يابه متكدر البنيه ترجع ومنريد نغصبها .
الكل علق وحجه بكيفه الي يكول محد احترمنه
والي يكول انطيتنه كلمه ابو صالح وكلمن فسر
بكيفه بعدها راحو وبقت امي تلوم بيه اشلون
صغرت ابويه كدام العالم وشلون طلعو عمامه زعلانين من عدنه
تحجي واني ساكته وصرت الوم روحي لان كسرت ابويه بس ماكدر احجي شي بس دموعي تحجي بسام كرهني بكل الدنيا مامل ولا بزع .
مرت الايام
وهو بعده يدز ناس اخر شي ايس ارجع اله وبعد مادز احد عليه ابد واني دخلت بشهري وبدت تصير عندي اوجاع وامي شالت همي اشلون راح اولد وخايفيه عليه هيه واخواتي اخر شي كالت .
ام صالح: اني ماكدر وحدي اولدها هنا راح اخذها
و اروح البيت ام حميد هناك كواكب وجنتها سباعيات اني ماكدر وحدي ،
جمان : اقتنع بكلامها ابويه وقبل اروح وطبعن
امي ماجهزت أي شيء للطفله غير قطعتين بس
رحنه اني وامي البيت خالتي والكل فرح بجيتي عليهم ورحبو بينه لان هاي طبيعتهم واخذتني كواكب وجنتهم زوجه حميد وسىرور جانت جايبه قبلي بعشرين يوم يم اهلها وهم راحت ويانه على لقابله يمهم بلمنطقه وفحصتني وكالت .
_ اعيوني هاي منا لليل او الباجر تصير عدها ولاده .
سرور كالت خلي نتمشه اشويه وصدك رحنه تمشينه بالسوك ورجعنه البنات حيل فرحانات بيه كواكب وسرور ومحتارات شيسون اليه كامت خالتي كالت الامي .
_ ام صالح خيه غير تنطين خبر الام بسام وتكليللها راح تولد جمانه .
ام صالح : والله يا خيه التهيت ونسيت عفيه خاله
كواكب دكي على بيت خالج احجي ويا ام بسام .
ودكت كواكب على عمتي وامي حجت الها وكالتلها
وعمتي كالت خلي تولد بسلامه واني حاضره
الكلشي خالتي كالت الامي .
ام حميد: وهسه هاي راح تولد جمانه وبعدين شتسوون ويا بسام .
ام صالح : انطلكها ونخلص وننطي بته اول ماتولد حتى منخليها ترضعها كبل ننطيها الهم .
جمانه : اني ماعرف ليش ضجت وهن من شافني ضجت سكتن كمت رحت يم البنات وبليل بل 3صار
عندي وجع خفيف وبقت سهرانه ويايه كواكب وسرور وكللي عادي هاي بدايه من اصير كل خمس دقايق ياله يعني ولاده و انوديج وصدك لل 6وصارت حيل قويه كل خمس دقايق وماتحملت الوجع وبس ابجي ما اكدر اصيح لان استحي كدام ولد خالتي ودوني ولد خالتي للمستشفى وصلنه وستلموني الممرضات وبديت اشوف الموت بعيني من الوجع ولادتي جانت حيل صعبه وبس ابجي بدون صوت
مخليت احد يسمع صوتي اجه عادل حجه ويه الممرضة اسمعه يوصيها ويكللها .
_ على كيفكم وياها واهتمو بيها وادلللو الي تردو انطيكم خطيه بعدها صغيره .
الممرضة : يمعود الي تزوج مو صغيره بس ادلل بعيونه انحطها .
جمانه : اني الوب من الوجع والحمد الله بعد معانات ويه الألم الولاده وصعوبتها كدرت اولد و جبت
ابنيه ، وره مارتاحيت بفتره مو طويله طلعنه
و كواكب كايدتني من ايدي وركبت بالسياره
وعادل شايل الطفله ويبوس بيها ويكلي .
_ بنتج تخبل كمر جمانه .
اني ساكته مادري من الوجع ماعرف خجلانه مادري طبينه البيت خالتي والكل اهتم بيه كواكب معافتني الاكل والعلاج وحتى الطفله هيه تبدل وتكمط وتسهر وياها سرور خطيه جابت الها ملابس من بنتها ولبسوها خالتي كالت .
ام حميد : جمانه خاله رضعي البنية خطيه .
جمانه : باوعت للطفله بقهر وخفت ارضعها
واتعلق بيها وبعدين ياخذها مني بسام .
_ ولج جمانه خطيه ماله ذنب تبجي جوعانه
رضعيه وخليها على ربج هو يفرجها عليج .
جمان : كلام مرت حميد حنن كلبي عليها واني اصلا جنت متلهفه عليها بحيث أول ما لزمتها وعفتها على صدري بجيت وصرت ابوس بيها واشمها بقيت ابيت خالتي وهاي الي اسبوع اني يمهم طلعت السبعه
ورجعت للبيت اني وامي ودعت خالتي والبنات
و تشكرت منهم لان صدك اهتمو بيه وبنتي وتعبو
ويانه رجعت لكيت فرح وشهد منتضرتن و فرحانات بجيتي أول مطبيت شالن البنية ومكيفات بيها فرح صارت تهتم بيها تلبسها وتكمطها وشهد تغسل ملابسها اجه الكل باركلي وفرحانين بيه
طبعاً اني ماعرف لا اكمط ولا ابدل ولا اغسل بس
ينطونياها بحضني ارضعها وياخذنها مني وره يومين اجتي عمتي ام بسام طبت باركت اليه وشافت الطفله وانطت الامي تكاليف الولاده
شويه و شفتها طلعت هيه وامي بالاستقبال
يتبسبسن ماعرفت على شنو من طبت امي وسالته.
_ شرادت عمتي منج اشوفها تبسبس وياج .
حجت مرتبكه.
ام صالح : هااا ، لا ،هيج تحجي على ابنها تريد
عود تحنن كلبنه عليه .
جمانه : هزيت راسي اي وسكتت بس ابد ماصدكت وحسيت عبالك اتفقن على شي يخصني ضجت بس مابيدي شي اسوي راحت عمتي والعالم كلساع واحد جاي علمود يشوفني ويشوفون البنوته شويه واجوي ، حسان واسامه وجايبين وياهم فواكه
سلمو عليه وباركولي اجه اسامه شال بنتي باسه وحضنها وكال .
اسامه : هاي شنو بنتج تخبل فدوه لهل خدود الحلوه .
باوع عليها ورجعها بفراشها شويه وكام سلم وطلع وبقه حسان كاعد يمنه يحجي ويه اهلي اني اغفيت بس حسيت على حسان يكول الامي .
حسان : عمه صدك راح اطلكون جمانه من بسام .
ام صالح : والله عمك گال اطلكها بعد مادري .
حسان : عمه تره اسامه حجه ويايه البارحه
وطلب احجي وياج واكلج اذا اطلكت جمانه من بسام يريدها ويكول حتى بتها مستعد اصير الها
اب واربيها .
ام صالح : ابني هسه مو وكته هذا الحجي .
حسان : والله عمه اني مثلج كتله مو وكته وتفاجات بطلبه و كتله اسامه معقولة حتى من تطلك بعدك تريدها عمه اخوي مكسور كلبه ويكلي ، والله العظيم الي نفس بيها اني ابن عمها واذا اطلكت اريدها .
جمانه : كلام حسان خلاني اصحه من نومي واجمد بفراشي بقيت مغمضه حتى ميحسون عليه شلون
هيج اسامه يفكر بيه يا ربي والله حاسبته حسبة صالح اخويه ، سمعت امي ضحكت بصوت وكالتله .
ام صالح : الله كريم عمه حسان يجي عمك واكله ويصير خير ميخالف عود .
جمان : راح حسان واني كعدت ضايجه و كلتلها ليش هيج تحجين يمه وتامليهم اني بعد ماريد
ازوج ابد ، ابن اخوج سوه عقده عندي .
ام صالح: لعد شكله بنتي ، هسه الله كريم منو يعرف
شنو راح يصير ذوله ولد عمج هيج يفكرون بكيفهم .
جمانه : كلامها خوفني كلتلها ، يعني شيصير مثلن خاف عبالج ارجع الابن اخوج ابد لو اموت مارجعله بعد .
ام صالح : كافي سدي الموضوع جمانه .
جمانه : عافتني وراحت طلعت من الغرفة بس
خفت من كلامها متأكده امي وعمتي اتفقن على شي
لان وكفاتهن سوه وتبسبسهن ممرتاح اله گلبي وصدك جان ضني بمحله ، صارت عمتي تجينه بكثره
وتجيب وياها شغلات تنطيها الامي وطبعا امي تجيب ماي وتخليني اشرب وتكول مقري عليه
وتعلك بخور وشغلات هوايه سوتهن هيه وعمتي
ومن اسال يكولن هاي ادعيه تحفضج من السحر
عدت الايام _
طلعت الاربعين مالت بنتي واني بعدني يم اهلي
امي كالت .
ام صالح: جمانه يمه ، روحي حفي وجهج شوفي شلونه كله شعر .
جمانه : ماريد يمه ماروح
ما اعرف شبيها امي اصرت اروح احف وجهي
رحت اني وفرح ورجعنه ولكيت خالتي جايه
سلمت عليها وكعدنه وجان امي كالت .
ام صالح: يمه اني دزيت على خالتج تجي علينه اليوم علمود نحجي وياج بسالفه .
جمانه : خير يمه كولي .
_ بنتي هذه الطفله مالها ذنب تعيش من غير اب ارجعي البيت خالج والعمتج الخاطر هل طفله وربوها سوه خطيه وبسام تاب وبطل كل سوالفه
هاي صار سنه انتِ يمنه زعلانه وصارت اله عبره
وكل الناس لامته على تصرفاته انطي فرصه ثانيه علمود بنتج جربي شكو بيها متخسرين .
جمان : سمعت كلام امي والي صدمني اني ساكته ومستمعه الهن امي ترفع وخالتي تكبس واني ساكته واسمع الهن بكل تمعن ومعترضت على كلامهن
مستغربه من نفسي قبل بس يحجون كلمه ابقه ابجي واصيح وماخلي احد يحجي ابد گبل اسد السالفه
اباوع عليهن ، مكيفات لان اني ساكته ونطلقن بالحجي والمدح ابسام هيج والمصيبه بعدني
ساكته اخر شي كالن .
_ ها شكلتي ترجعين الخاطر بنتج .
جمانه : جريت نفس و كتلهم ........
هلو بنات شلونكم ويه قفله اليوم وشنو توقعات كم
ليش جمانه ساكته معقولة الهدوء اليسبق العاصفه
لو ممكن تكون جمان اقتنعت بكلامهم وراح ترجع
شاركوني بأرأكم كلش تهمني تحياتي .
نهايه البارت انتضروني
