رواية تحت ظل السعف كامله جميع الفصول بقلم ميار
نخل كل عمري خير ورطب للجوعان
السعف نوعين ستر وحطب سووني
يوما من الايام في قرية في احد الازمان
ولدت فتاة جميلة عيناها کلؤلؤ يلمعان
وعاشت بأحضان والدها فكان لها الامان
حتى شبت وصارت ک شطب الريحان
ولكن لا يأتمن هذا الزمان فتركها تعاني
بين الألم والحرمان فكيف عاشت ريام
ريام:: فتحت عيوني على صوت مرت عمي تعيط علينا
حتى نكوم نخبز يااارررب شنو هل ازعاج من الصباحيات
سعديه:: ولجج ريااااام
ريام:: اي عمه كعدت كعدتت
كمت استغفرالله هسه ماكو غيري يخبز عود الا خبز
حار تاكلون سم فوك سم وكون بيدي احطه الكم جلاب
كمت من افراشي ادردم عليهم يشلعون الگلب طلعت من
الغرفه لكيت عمي نايم ومرت عمي كاعده متربعه مقابيل
الصوبه هي جنها فرس النهر تخوف من السمن وعابسه
الوجه وتحجي علينا رفعت عيني على الساعه كوه فاتحه عيني
سعديه:: هاا ولج خيرج يلا ولي خبزي هسه عمج يكعد
والله ما اخليج اداومين اذا ما خبزتي ونظفتي البيت
ريام:: اي هسه عمه بس اغسل وجهي نتشاهد حتى نشوف دربنه
- عابت هلشكول يلا ولييي
ريام:: الصبر الصبرر يا صاحب الصبر رحت غسلت
واخذت انجانت العجين وصعدت اخبز بالبيتونه
الجوو بارد ومغيمه ويا زخات المطر الخفيفه كعدت
ارگ باالعجين واخبز واسمع اصواتهم جوه كعدو لان
دوامات كملت ونزلت صار بوجهي ابن عمي وجه الفگر
واني امر من يمه وبيدي الخبز ما احس غير حط ايده
جوه ظهري فزيت خايفه وكع الخبز مني وهو ضحك
-شكووو شكسرتي يمصخمه
ريام:: م م.. ما كسرت شي عمه
دنكت الم الخبز وهو راح واني اريد الزم نفسي ما ارجف
الله لا ينطيك بهلصبح شلت الخبز وديته للمطبخ لكيت
ميسون بنت عمي تسوي ريوك دخلت حطيته على كونتر
وكعدت بالكاع اخذ نفس بلچي تروح الرجفه ما بقى بيه
حيل اكف
ميسون:: شبيج ريام صاير شي؟
ريام:: لا بس حيلي يرجف تعبانه
-اي يجوز ماخذه برد دكومي خلي نكمل حتى نروح
نبدل ونروح للمدرسه لا يفوتنا الامتحان يلا بسرعه
ريام:: هزيت راسي وكمت وياها صبينا الريوك وكعدنا
اني كوه ابلع اللگمه بس ارفع عيني الجلب يغمز جعل
عيونك بالعمى عفت الاكل وكمت بدلت ورتبت شالي
واخذت المكناسه كنست البيت كله وغسلت بقيت
انتظر ميسون ومسره يجن نروح للمدرسه اجن وطلعنا
نتمشى بداربين بغداد الكل يحبه ويشوفه جنه الا اني اكرها
ما شفت خير بيها من دخلتها مشينا اباوع للناس الي يفتح
محله لفتني شايب لازم ايد بنته صغيره لابسه ملابس المدرسه وتتدلع عليه اتذكرت ابوي شلون جان يوديني ويرجعني تحسرت وكوه بلعت العبره ودعيت الله يحفظه
لبنته او حفيدته وصلنا المدرسه واني عيني عليها انتي املي
الوحيد لازم اكمل دراستي حتى اخذ حقي من الكل..
في مكان اخر...
-صباح الخير
مروى:: صباح النور والسرور
جهاد:: هههههه هو هذا اجمل صباح شنريد من هاي
الدنيا اذا عندي هيج گمر يصبح عليه افيشش ابنيتي
مروى:: اكعد حتى اكمل الريوك بين ما يجي ابوي
جهاد:: امي وين
مروى:: هسه يجون شو كاشخ وين رايح
جهاد:: عندي شغل بغداد اكمل وارجع
مروى:: كملت الريوك وكلها التمت نتريك ساكتين
من يكون ابوي موجود دحكت على تبارك تحوس
ومعاذ سفگ ماعون البيض وجهاد مرتجي يدحك
وبيده استكان الجاي واني عيني عليهم زياد كوه مفتح
خالد:: يلا يابويا كملوو وراكم دوامات
زياد:: يابه بس اتخرج ثلث اسابيع ما اطلع من الغرفه
عليكم الله هسه بهذا البرد تعوف بطانيتك وتگابل
وجه معاذ وتبارك وانوب تروح للكليه تشوف وجه
تسد على النفس يااررب رحمتك وعفوك وغفرانك
جهاد:: شافعلك وجود ابوي ولا جان شوفتك الراحه
زياد:: حبيبي ابو الجود هو شمصبرني غير وجودك
-انجبب يلاا
زياد:: امرررك سيدي
-هههههههه
تبارك:: كاعده گبالهم وعيني على جيب ابوي وجهاد
بس لا ينسون المصرف اريدد اشتري من هذا الدفتر
بي فرو غير يموت كملنا واخذت جنطتي وادعي لا
ينسون بقيت افتر جدامهم بحجت ادور حذائي
جهاد:: توته
تبارك:: يسسس ابتسمت ابتسامة الانتصار ودرت
وجهي عليه أمࢪررني خوي ركضت يمه فتحت ايدي
جهاد:: اي جاهل خما جاهل يولي مو عمرج 15
تبارك:: علفلوس ما نكبر يلا حبيب ورق ورق
ضحك وفتح محفظته راد يجر خرده بس شافني
عيني على الخمسه جرها وانطاها الي اخذتها
واريد امشي سحبني من قمصلتي ورجعني گباله
جهاد:: ولج اصبري هذا مصرفج انتي واختج
تبارك:: لا عليك الله
-يلا بلا حجي زايد
تبارك:: عافني وطلع واني بگلبي احجي على مروى
وكفنه بالباب اني ومروى ننتظر رحاب ومهى بنات خالي وسناء بنت عمي جن يتمشن وصلن يمنه ومشينه سوه
ريحة البستان والرزع توه ماطره والطيور تصفگ جناحاتها
وكفنه بسد سياچ البستان ننتظر حجي محمود يوصلنه
رفعت عيني اتأمل الاشجار والنخل السما مغيمه وزخات
المطر تنزل على وجهي ريحت خبز مالت التنور الطين
فزيت على صوت مروى تصيحني لان جيه الحجي ركضت
وصعدت ارتجيت راسي على الجامه مبتسمه متأمله الاجواء..
وسام:: طلعت من باب الحوش رايح للگاع امشي
بالطريق واني عيني على بستان جدي والجو بارد
مطر خفيف وصار هوى يكص الوجه لفيت شماغي
على وجهي ومشيت وصلت الكاع واني ادحك ولدنه
واكفين ضحكت على منظرهم يتراجفون واني جيت
مترهي لان لكيتهم مگملين سگي الباجله والحنطه
فرات:: يا جلببب هسه جاي من اجي هسه انعل خيرك
-هاي شبيك حبيبي
فرات:: لا تحاجيني ابرود والله اجي انسيك حليب
امك ولكك كتلنه البرد وانت مدثر ونايم جنكك..
حامد:؛ جنه شنووو
وسام:: مالك شغل جني ورد صح حبيبي فرووت
فرات:: يلا وليي عابت هل شكول الزفره خر.... بيكم وبخوتكم
وسام:: ضحكت عليه اعصابه تلفانه واضح وعرفت
من جهاد مو وياه يعارك حتى ذبان وجهه طلعو من الزرع ومشينه نرجع للبيت اني وفرات وحامد بين
ما ولدنه البقيه راحو وحد عنه وصلنا شارع بيوتنا
و شفنا جهاد واكف والجكاره بيده ويتأمل مضيف
جدي الي صار بيد عمي بعد وفاة ابوه ادحك عليه
يدحك بحقد وكره فريت راسي لفرات لكيته وجه
محتقن واكف بمكانه وعينه على جهاد رجعت وكفت
يمه..
-شبيكك فرات
فرات:: واذا طلع شك جهاد بمكانه
-دكول ياالله جهاد مكسور خاطر تعرف اثنيهم اعزاز عليه
فرات:: اخسر روحي ولا جهاد.
وسام:: سكتت ما اعرف شحجي راح حامد للبيت واحنه مشينا وصلنا
بسد جهاد يلا التفت وشافنه ابتسم وجر فرات يحضنه
جهاد:: وين بقيت يابه
فرات:: غير جنت بالكاع وين رايح
جهاد:: يلا فرات خمس دقايق انت بالباب ورانه
طريق روحه و رده
فرات:: خير وين؟
جهاد:: لبغداد
فرات:: هسه بس ابدل واجيك
وسام:: راح فرات واني باقي واكف هسه بالجذب كول
امشي ويانه
جهاد:: روح البس نعالك وتعال
-هههههههه صارت قديمه ما تعبر علينه
هههههه..
وسام:: طلع فرات وصعدو السياره ومشوو واني طبيت للبيت وادري كلش زين روحتهم وراها شي....
ريام:: كملنا دروسنا ورجعنا للبيت بس دخلنا لكينه عمتي
سعديه طالعه وبس فراس القرد موجود دخلت للغرفه بدلت وطلعت دخلت للمطبخ وما احس غير انسد الباب
التفت واشوف فراس وراي جمدت توه اصرخ ويسد حلكي
بيده وبيد الثانيه يتلمس جسمي بهمجيه ادفر بي وما يفيد
هو ضخم بقيت ارافس شويه واندك الباب وخر مني يرجف
فراس:: اششش كلمه ما اريد
ريام:: ياااااكلببب يا قذرر
غسان:: ريااام خوياا فتحي الباب
ريام:: رجع عليه يضربني بقوه اريد بس افلت نفسي منه
والباب حديد ما ينكسر دفرت بقوه وركضت للباب ورجع
عليه اني ادفع وهو يدفع ضربته بجسع ايدي على بطنه وفتح الباب صارو غسان وميسون ومسره بوجهي عفتهم
وركضت للغرفه طبيت وسديت الباب جسمي يرجف واحس انهاريت الكلب صارر اسنين يتحرش بيه حجيت لامه
ضربتني خواته ما بيدهن شي عمي ما اكدر احجي وياه بس
غسان بقى فتره من يكون فراس بالبيت ما يطلع تمددت
ابجي بقهر غمضت عيوني واني اتذكر قبل 4اسنين جنت عايشه
ويا ابوي الي فتحت عيوني بس عليه ما اعرف امي وين ولا
اعرف اهل ابوي غير ولد عمتي ابتسام جهاد وحارث و ولد
عمي جاسم فرات وعمر اعرفهم لان الوحيدين يجون علينا
جان ابوي مدللني دلال حتى شعري يمشطه ومن كبرت جارتنا ام علي اداريني من يطلع ابوي ومن صار عمري
14 وبغلت هي الي علمتني جانت حياتي ونسه ودلال
الا بيوم من الايام اجه حارث المغرب على ابوي وجنه
مسوين عشه دخلت وجهه مخنوك كوه تعشه وطلعو
هو وابوي بالحوش يتسولفون اني وديت الجاي ورجعت يم
الشباچ اتصنت عليهم بالاول ما فهمت غير يحجون على
زعل ابو حارث وحارث يريد يحل المشكله حتى نرجع للقريه
حارث:: خالوو قربان وجهك خلي نحاجي ابوي ونفهمه يابه وغلاتك جانت كلها دستره من اخوك
خالد:: ادري خالي والله ادري بس شفت ابوك زعل
عليه 14سنه ولك ما خليت ما حلفتله تزوجتها كوه
حارث:: ادري خالي والله حجيت وياه ويمكن بي مجال
ويحبك والله جديتي زوجتك حتى تخرب بينكم بس تعال وياي واني والولد وياك نرجع نعيش سوه
خالد:: حارث والله ما مرتاح جاسم وحمدان من تالي
وكت يردون يصلحون بينا اني وابوك ما جاي تدخل دماغي خايف لا يسونلك شي يابه انت تدري بس ريام
بمعزتكم عندي
حارث:: هههههه وهاي والله اخليلك جهاد حارس لريومه
خالد:: هههههه ولك ما اطيقه اتكول جنه شيشي.
حارث:: هههههه خالي نذبحه لخاطرها اهم شي اصبح
بوجهك ونمشي بالبستان سوه والله اريد ارجع طفل
واركض وراك بالكيعان الله شمحلاها
خالد:: الله كريم خالو الله كريم
ريام:: عفتهم ورحت نمت وكعدني ابوي اسويلهم ريوك كعدت لبست حجابي وطلعت غسلت وجهي وخدرت الجاي وبين ما كملت الريوك شفت حارث كعد والفرح بوجهه شلت الصينيه وحطيتها جدامه وجيه ابوي هم كعد ويضحك
على حارث الي الابتسامه ما فاركته صبيت الجاي وانطيتهم
حارث:: خويه هسه ان شاء الله بس نرد ناخذج
وراح يصير عندج خوات والله عندي خوات عسل
خاصه فطايم هاي الجبيره هسه شوفي شلون
تصادقج وهي تعلمج على الطبخ والخياطه
خالد:: ولك اصبر هسه الي يشوفك يكول ابوك
راح ياخذني بالاحضان كول يا الله وليدي
حارث:: خالي بروح العزيز خليني فرحان
ريام:: بقينا فرحانين على فرحته ولهفته كملو وطلعو للحوش وابوي يوصي بيه ادحك بعيون ابوي ما اعرف قلق
خوف ما مرتاح لزم وجهي وباس راسي واصاني كن بعد ما يجي.
خالد: بابا انتبهي على نفسج واذا صار ما صار غير ويا عمج محمد وجهاد ما ترحين واضح وبابا عمج احمد
ابو جهاد هذا هو مكاني حتى لو بقى زعلان راح يكون اب حنون عليج زين بابا وحتى جهاد وفرات هذوله
همه يسندونج فرات من يكولج خيتي يكون كدها
ريام:: شبيك بابا ما راح ترجع؟
خالد:: ارجع بس جاي اوصيج يابابا افتهمتي
ريام:: هزيت راسي كرص خدي وطلع بقيت كاعده وحدي
خوف ما مرتاحه وره ساعتين اندك بابنا طلعت اركض
فتحت الباب وصار بوجهي جهاد وجهه عباره عن عصبيه
رغم عمره جان 22لو 23سنه الا عصبيته تخوف
جهاد:: خالي وحارث وين
-طلعو گبل ساعتين ليش؟
-طلعوو؟ وين
ريام:: راحو يراضون ابوك بس حجيتها عافني وركض للسياره سديت الباب واني اغم بي فد واحد ما يتحاجه
دوم من يجي نتعارك كعدت انتظر ابوي ادحك على التلفزيون لو اكل فواكه وللمغرب ابوي ماكو كمت صليت
واندك الباب كملت صلاتي ركض وفتح الباب صار ابوي
بوجهي حضنته فرحانه بعدنه توه ندخل نزل حارث من سيارته ودخل ويانه للحوش جاي يسولفون انوب طلعو
وكفو بالباب حارث يريد يروح وابوي يقنعه ما مقهور
وكفت اباوع عليهم حارث واكف جدام ابوي وكفت سياره
وره حارث نزل واحد منها رفعت عيني على ابوي فتح عيونه
بخوف وسحب حارث ويا ما سحب حارث ثارت طلقه غمضت عيوني واصرخ من صوت الطلق كعدت بالكاع خايفه ويا
ما فتح عيوني كام حارث يريد يشوف ابوي رمو صليي
وكع بالكاع وهمه شخطو السياره واني بقيت بالكاع
ارجف طلعو جوارينه يركضون وصوت سياره وكفت يمنه
نزل عمي حمدان وابنه فراس الي جان عمره 18سنه
ركضت على ابوي منين ما الزمه دم وفاتح عيونه ملخت
روحي كمت اريد اجر النفسي ما اكددر يجرونه مني ما احله
ابو علي:: كومي بويا كومي
ريام:: باااابااااا عوفوووني ارييد ابويييي باباااا لا تعوفنيي
حمدان:: كومي فراس اخذ بنت عمك
ريام:: شالوو ابوي واني بس اسمع صوتهم يكولون بي نبض
بس منو الي بي نبض ابوي لو حارث بعد ما حسيت على روحي ما اعرف شكد بقيت فاقده فتحت عيوني اني بالمستشفى يمي مرت عمي حمدان وجهه مگلوب
اجو فحصوني وعمي طلعني لبيته على مسؤليته وما اعرف
اي شي ابوي مات لو عاش بقيت ساكته يومين جيه عمي حمدان كعد گبالي ويسولف وياي واني كوه اركز ويا
حمدان:: عمي ابوج انطاج عمره وصاني اخليج يمنه
وعمامج وابوي جهاد ذبوج ما يردونج فابقي وبا بناتي
ريام:: ما اهتميت لكلامه ومرات اشهر واني على نفس سكوتي اكل شي قليل لحد ما عبرت السنه بدو بيت
عمي يتغيرون صارت تضربني مرت عمي وتكاوني وابنها
فراس بحجة الحنيه يبوسني بخدودي وبيوم جرني غسان
وضربني راشدي فتحت عيوني وخزرته وما خليت غلط ما غلطته عليه
غسان:: اي كافيي اصحي على نفسج ولج جاي يتحارش بيج وانتي ولا يمج ولج يردون ياخذون
املاك ابوووج اصحي مو حبا بيج خويا اصحي
ريام:: كعدت بالكاع ابجي منهاره هو ما يدري شيسوي
وبقى ينصح بيه ويعلمني ما اخلي فراس يتقرب مني
وفعلا بديت انتبه على نفسي رجعت للدراسه كوه
بعد ما غسان قنع عمي بحجة لا انهزم منهم قبل ما
يكملون معاملة الاملاك مرت السنين بيت عمي
بمر كل فتره مشيلنه من منطقة وما نعرف ليش يتحول من بيت لبيت الا بيوم سمعته يحجي بعصبيه لمرته ولده
على جهاد وما افتهمت لان الصوت بعيد رحت بالختله
اتصنت عليهم عمي اعصاب ويغلط على جهاد وفرات وعلى امه
حمدان:: ولج مووتني ما جاي يقتنع وديته للگبر
وكتله هذا گبرها ماتت وراه ابوها ابن.... ما يقتنع
سعديه: ادري شلون انظل متجهولين من وراها
فراس: يابه انت كلت بس تنقل الاملاك تزوجها الي
حمدان: اي بس والله اطينك اتجيسها ما الك شغل
بيها
فراس: هاي هيه انتظركك
ريام:: متت قهر واني افكر كل هاي السنين جهاد وعمي محمد ذبوني طلع گايللهم متت حتى گبر مسويلي سكتت
واني نارر بگلبي ومرته ما تخلينه وحدنه اتخاف لا انهزم
لحد ما أمنت بناتها وياي عشت بتعب وألم وحرمان اخاف انام لا يجي فراس حتى الاكل اتحاسب عليه ملابسي انتظر
البنات يشترن حتى ينطني القديمات.. فزيت على صوت الباب يندك بقوه ما اعرف شكد بقيت على هاي حالتي
رفعت راسي اسمع عمي يغلط ويسب ابوي كوه رفعت
نفسي وكمت بس فتحت الباب جاني مثل الوحش صفگني
براشدي وكعني بالگاع وهجم عليه ملخني ما اللحك احط
ايدي يكفخني وكعني بالگاع وظل يضرب دفرات احس كلاتي
انفجرن تفل عليه وطلع بقيت بمكاني اون جت مسره تكومني منين ما تلزمني اعيط ورم جسمي كوه كمت لفراشي والبنات عافني وطلعن لليل اني اون لا اكل ولا شرب رفعت راسي على فتحت الباب دخلت ميسون
بيدها ماعون وحطته بالگاع وجت تساعدني اكوم
ميسون:: ريام اسفه والله ما اكدر اساعدج
ريام:: مالج دخل ادري بيج اني ما ازعل منجن
ميسون:: يلا اكلي جتى انطيج حبايه مسكن
ريام:: هزيت راسي وكوه كدرت اكل لكمتين وانطتني الحبايه ونمت بقيت يومين على نومتي محد يجي يمي
بس من ينامون وحده من البنات يجيبن اكل ويطلعن
ثالث يوم احس خف الالم فتحت عيوني دحكت للساعه
ب1ونص توه اكوم ودخلت مسره تلهث واضح عليها
الخوف جت يمي ولبستني حجابي واني بس اريد افتهم
شبيها وما تحجيي راحت لكنتورها طلعت عبايه وحطته
بيدي واني صافنه بوجهه ما اعرف شجاي يصير
مسره: لا تصفنين يلا امشي
-وين شكو ولج؟
مسره:: اطلعي هسه غسان يفهمج
ريام:: سحبتني وطلعتني بالختله واني ما مفتهمه كل شي
لكيت غسان لابس الشماغ ولافه على وجهه متلثم بي
غسان:: يلا يلا خويا امشي امشي
-وين غير افتهم
مسره:: طلعي هسه مو وكتها وهاج
ريام:: حطت بيدي اشماغ ابوي وسحبني غسان من عبايتي
وطلعنا صعدني بالسياره تكسي ومشى بينه واني باقيه مثل
الاطرش بالزفه ما مفتهمه شي ادحك الجو بارد نص ليل
وين مودينه وصلنا مسافه مو حيل بعيده على بيت عمي
ونزلنا سحبني من عبايتي يمشي سريع اريد بس افتهم
هاي شبيكك غسان وين رايحين ما رد عليه وكفنه يم
هيكل قديم وكف يرتاح يريد ياخذ نفس دار عليه وكال
غسان:: حصلت عمي محمد هسه راح ياخذج
روحي ريام روحي لقرية عمامي اهناك أمن الج
ريام:: شجاي تحجي اروح على القريه الي بسببهم
ابوي مات لا مو صاحي انت وين موديني رجعني
غسان:: ريام انتي بالف رجال روحي چتال
ابوج بهذيج القريه وكعدتج يمنه ما بيها
غير الاذيه ابوي جاي يدور وره الوصي
الي خلاه عمي على املاكج بس جهاد يفتر وراه
روحي اخذي حقج من الي يتمج وخلاج ذليله
بيد واحد مثل ابوي كوني قويه وحگج جيبي
من حلگ السبع طلعت المستمسكات وكل شي
يخصج وهذا راتب ابوج وخلي ابالج شغله وحده
انتي بنت خالد السلمان مو انتي الي تسكتين عن
حگ ابوج حسافه ريام حسافه ابوج جوه التراب
وچتاله يشم الهوى يلا يا خويا مودعه باالله هذا هو
وراج ينتظرج
ريام:: درت وجهي وفتحت عيوني وطلعت الشهكه
من نص گلبي واني اشوفه كدامي........
