رواية علي حافة الوسادة ( كاملة جميع الفصول ) بقلم جمال الحفني

حسيت بإيد بتلمس جسمي وأنا نايمة, صحيت لقيت جوزي نايم في سابع نومه وللأسف دي مكانتش أول مرة تحصل معايا, صحيته عشان خفت وطلبت منه يجبلي مياه وقولتله معلش عشان خايفه ممكن تجبلي اشرب؟ قال حاضر وقام نزل من السرير واتمشى في الأوضة وجي عند الركن كدا وبص في الأرض وفضل ثابت بعدين جسمه صغر أو هو وطى على الأرض يجيب حاجه! مكنتش فاهمة بس فجأة بدأ يترعش ويتشنج وفجأة باب الأوضة اتفتح ولقيت جوزي جاي من بره..

انهرت من العياط وهو يسألني مالك فيه إيه؟ حصل إيه؟ وانا مش قادرة احكيله اللي حصل من ثواني وهو مش موجود, بعد ما هديت حكيتله اللي حصل إني صحيته يروح يجيبلي مياه لإني خايفه اقوم, لقيته بيقولي انتي مصحتنيش أنا اللي صحيت لوحدي ورحت الحمام ولسه راجع!

أنا متجوزة من خمس سنين, ومن بعد ما اتجوزت بدأت أنا وجوزي نشوف حاجات عجيبة بتحصل معانا في الشقة..

تخيلي إن جوزك يكون نايم جمبك وفجأة عينه تفتح وتبدأ تتحول للون الأسود لحد ما تبقى كلها سوده! هتعملي إيه؟؟

مش عارفة إذا كانت شقتنا مسكونة ولا العمارة كلها مسكونة, لإن من ليلة الدخلة وبدأت تحصل معانا حاجات مرعبة, يعني من تاني يوم جواز اتصلنا بأبويا وحكيناله اللي بيحصل معانا وهو كلم شيخ, الشيخ قاله خلّي العريس يقرأ سورة البقرة على لبن ويشربه, وفعلا جوزي عمل كدا وبدأت الدنيا تهدا معانا شويه..

في البداية كنت فاكرة لإن أنا إنسانة خوافه فاللي بيحصل معايا دي بسبب خوفي وإني بيتهيئلي حاجات وعشان كمان اتجوزت وسكنت في مكان جديد فممكن اكون متعودتش عليه, وكنت بحاول اقنع نفسي إني أنا السبب ودا كله خوف وحاجات عقلي بيصورهالي, لحد ما في يوم شوفت وأنا صاحية مش بحلم وفي كامل اليقظة, كنت بحاول انام وفتحت عيني شوفت جوزي نايم جمبي وجوزي تاني واقف وراه والاتنين لابسين نفس اللبس, بنطلون وفانله! واللي واقف ورا جوزي راسه موطيه كدا عليا من ورا جوزي ومركز معايا وبيتهز هزة خفيفة كدا يمين وشمال..

غمضت عيني بسرعة وقرأت قراّن وخفت اتحرك ولا حتى أصحّي جوزي من النوم, شوفت المنظر دا مرتين تلاته لحد في المرة الأخيرة لما لقاني مش بعمل حاجه راح لف ودخل الدولاب ومن وقتها مشوفتوش تاني..

أحيانا بكون واقفة في المطبخ والمح بعيني في الصالة اتنين بيجروا ورا بعض, زاوية الرؤية وأنا جوه المطبخ بتخليني كاشفه جزء كبير من الصالة, وفجأة بطرف عيني الاقي ظلين بيجروا ويختفوا مرة واحدة, ابص ملاقيش حاجه! فيه مكان صغير كدا في الصالة بين أوضة النوم والمطبخ كنت بشوف فيها الخيالات السودة دي, من أول ما سكنت الشقة لحد ما سبتها وأنا بشوف الخيالات السودة بتظهر مخصوص في المكان دا, مثلا تخرج من المطبخ تدخل في أوضة النوم, أو تخرج من أوضة النوم تدخل المطبخ, المهم إن أي خيال بيظهر ويختفي لازم يعدي من المكان المعين دا اللي موجود في الصالة!!

حاجات كنت أنا وجوزي بنحبها فجأة نلاقيها اختفت, زي مثلا كوبايات مياه بنحب نشرب فيها عشان شكلها حلو, فجأة نلاقيها اختفت من البيت, اسأله هل مثلا اتكسرت منك ورميتها أو حد من أصحابك اللي بيزوروك عجبته مثلا واديتهاله؟ يقولي لأ, والغريبة إن الكوبايات بتظهر بعد كام يوم, فاحنا عرفنا خلاص إن فيه عندنا حاجات بتختفي وبعد كام يوم هتظهر لوحدها.

أنا أصلا من بعد ما اتجوزت وأنا بحلم بحد بيقولي انتي غلطانة انك اتجوزتي جوزك دا, أنا بحبك أكتر منه ولو جيتي تعيشي معايا هخليكي أسعد واحدة في الدنيا, كنت بقوله لا أنا مش عايزاه غير هو..

الموضوع كان بيني وبين جوزي ومقولناش لحد بره الشقة, حتى في الأيام الأولى لما بابا اتصل بينا وقالنا ها الأمور بقت تمام قولناله اّه وخلينا اللي بيحصل معانا سر بينا.

لحد ما في يوم اضطريت أقول لأهلي, كنت وقتها متخانقة مع جوزي وقاعدة في بيت أهلي وحلمت حلم غريب وحكيته لأمي..

حلمت بواحدة عجوزة شكلها مخيف فتحت الباب وأنا نايمة وقالتلي الدور عليكي, وبعدك هيكون ابنك وبعد ابنك جوزك, الست دي كانت معروفة في بلدنا إنها بتاعة سحر وأعمال, وبعد ما حكيت لأمي قالتلي طب هنكلم قريبنا الشيخ الفلاني نخليّه يفسر الحلم دا.

قريبنا دا كان راجل محترم جدا وبتاع ربنا وبيفهم في المواضيع دا, اتصلت بيه وحكيتله الحلم وطلبت منه اعرف تفسيره أو سببه, لقيته قالي انتي بتحصل معاكي حاجات غريبة ومش طبيعية؟؟ 

قولتله أيوه وحكيتله كل حاجه بتحصل معايا, لدرجة إني حكيتله عن حاجه حصلت معايا ومحكيتهاش لجوزي, بكون نايمة وبحس حد نايم معايا, يعني بيحصل معاشرة زي اللي بيني أنا وجوزي.

قالي طب انتي مكلمتيش أهلك ليه وحكيتيلهم اللي بيحصل معاكي؟ قولتله إني وجوزي حكينا لأهل جوزي وهما قالوا إن ممكن اكون انا عندي مرض نفسي وأنا صدقتهم ومحبتش اشغل أهلي عليا, قالي لا يا بنتي الموضوع مش مرض نفسي ولا حاجه دانتي كدا وصلتي لمرحلة وحشه جدا...

الشيخ كمان سألني انتي بتشمي ريحة وحشة في الشقة؟ قولتله اّه أحيانا بشم ريحة وحشه جايه من المنور, قالي يا بنتي الشقة دي مينفعش تسكنوا فيها ولازم تسيبوها فورا, احنا فعلا مكناش ناويين نكمل في الشقة دي لإنها بتاعة أم جوزي, ورثها يعني وكنا قاعدين فيها مؤقتا كدا لإننا مقدمين على شقق في الإسكان ومستنيين دورنا ييجي..

خلصت مع الشيخ وقعدت مع أبويا وأمي وحكيتلهم كل اللي كان بيحصل معايا ومكالمتي مع الشيخ, أبويا اتصدم ومكانش مصدق لدرجة إنه افتكرني بكدب يعني عشان المشكلة اللي بيني وبين جوزي وعاوزه اسكن في شقة جديدة وحاجات كدا..

أبويا اتصل بجوزي واتأكد منه عن اللي كان بيحصل معايا واتخانق معاه إنه ازاي يسكت على كل اللي كان بيحصل معانا دا بدون ما يتحرك ويشوف حل ويخلي الموضوع يوصل للمرحلة دي!!

قصة حقيقية