رواية حكاية ترف الفصل الحادي عشر
كان الخذلان هذه المرة مختلفاً …
لم يكن مجرد ألم عابر ، بل صدمة هزّت قلبي من مكانٍ كنت أظنه الأشد أماناً .
وثقت بك بعينين مغمضتين ، وبقلبٍ لم يعرف الحذر يوماً …
فكان جزائي أن أستيقظ على حقيقةٍ قاسية :
أن بعض القلوب التي نحبها بصدق ، تجيد كسرنا أكثر مما تجيد احتواءنا .
لم أبكِ لأنك رحلت …
بكيت لأن الثقة التي منحتك إياها بلا خوف ،
عادت إليّ خذلاناً لا يشبهني ، ووجعاً لم أكن أتصور أن يأتي منك أنت ...! 🖤🥀
ترف
مرت ايام و آني عايشه على المسكنات بس حتى أنام..انام لو انسى لو أهرب من واقعي.
والي ابتلت بيه امي ..امي خطيه وكلساع تگلي خلي اوديچ للطبيب نشوف شنو حالتچ.. بس چنت ارفض واطمنها مابيه شي صداع عادي وجاي آخذ بندول
وماچانت توصل خبر مرضى لأي أحد من العائله حتى لا يضل بالهم خصوصا بيت عمو فارس لان حسب ماتگول ماما همه اكيد مشغولين هسه ومقبلين على خطوبة ابنهم شهم
بالاخير توصلت أمي أن حالتي هاي عين حاسده وصابتني وتسببتلي الأمراض والكآبة الجاي اعيش بيها
وطبعاً هذا الرأي هم ايدته مرت خالي ام أمجد وحتى طلبت من أمي تاخذني للشيخ هو يكشفلي ويقرالي ويطيني رقيه شرعيه وأدعيه وبخور الي كلها تعتبر مثل العلاج حتّى نتخلص من العيون النگسه..بس آني وهم أمي رفضنا رفض قاطع..شنو شيخ شنو يكشفلي...لكن بالأخير قررت امي تشغل القرآن الكريم يوميه بالبيت وخصوصاً سورة البقرة لان تطرد الشياطين وبلكي تنطرد وياها الأمراض والكآبة
احنا كلنا بالبيت ماچنا نعرف آخر أخبار بيت عمو فارس ولا التطورات بموضوع خطوبة شهم لأن مثل ما گلت ماما التهت بيَّ وبحالتي وبكآبتي
بس آني گدرت اعرف الاخبار عن طريق رهف
نزلت العصر يم اهلي.. وأمي من شافتني رأساً گالت
- ها توته شلونچ اليوم ، خوما يوجعچ شي
- لا ماما اليوم احس بنفسي شويه أحسن
- الحمد لله.. ألف الحمدلله والله الليل كله بس ادعيلچ
- گعدت يمها وحضنتها شكرا مامي.. وآسفه إذا شغلت بالچ
- لا مامه شنو هالحچي اصلا آني مرات اذب الصوچ بيَّ وأكول يمكن ماهتميت بيچ وقصرت وياچ
گعدت شويه وضليت مترددة اسأل امي لولا بعدين شويه تشجعت وسألت
- اي مامه شلونچ.. شلونهم بيت جدو.. والله مشتاقه الجدو والبيبي هواي
- الحمد لله زينين ، جدو هالايام عدهم بضاعة جديده وملتهين بيها.. وجاي يحضرون مخازن تكفي البضاعه.. وبيبيتچ خطيه تشكي من الضغط والفقرات وصايره گوه تمشي وياخذوها للأطباء بس ماكو فايده
- الله يشافيها.. شوكت نروح نشوفها
- على الجمعه الجايه.. ننجمع كلنا نروح الهم ونشوفها
- واخبار بيت عمو فارس
- ذكرّتيني.. خلي اخابر سعاد لأن صار مده ماشايفتها ، ولا شايفه واحد منهم حتى شهم الي چان يوميه يمر النا ، شو هالايام گطع فد گطعه
- (اي طبعاً يگطع بيا وجه يجي ونشوفه) أحچي ويه نفسي
خابرت امي أكثر من مرة بس بدون جواب
وآني ضليت النوب احوص.. آخر شي گمت جاي أصعد لغرفتي وأشرت بيدي لرهف حتى تجي ورايه بس بلا ماتعرف أمي
دخلت لغرفتي ودخلت رهف وگالت
- ها توته شنو ردتي مني؟؟؟
- اريدچ ترحين لبيت عمو وتسألين عن خطوبة شهم شصار منها.. بس بلا ماتعرف أمي
- وليش بلا ماتعرف أمي
- بعدين افهمچ ، وإذا شفتي شهم لا تفتحين الموضوع ولا تسألين عن اي شي.. وهم لاتگولين لعمه سعاد آني دزيتچ
چنت احچي وياها وآني ابچي وگوه الكلمه تطلع مني
هي استغربت وگالت اوكي اروح أسأل بس من أرجع اريد اعرف الحقيقة ، شنو هذا البچي وشنو هذا الحاحچ حتى تعرفين اخبار خطوبة شهم
نزلت فوفو (رهف) وآني بقيت بالغرفه..وره تقريباً أكثر من نص ساعة.. اجتي وجابت الخبر الي فاجأني وبنفس الوقت دمرني
رهف
نزلت من يم توته وآني مستغربه من حالتها وخصوصاً البچي من نجيب طاري شهم أو خطوبة شهم... ومع ذلك رحت لبيت عمو وسويت نفسي طبيعية
لگيت عمه سعاد بالمطبخ سلمت عليها وگعدت يمها وهستوني جاي اسألها فات إبن عمي تميم وهم سلمت عليه وگعد يمنا وصار لازم اسكت وما أسأل
وبقينا واحد يسأل الثاني شلونك والحمد لله
- وهسه عمه انتي شلونچ
- الحمدلله انتو شلونكم .. امچ شلونها.. صار كم يوم ماشايفتها
- والله عمه امي ملتهيه ويانا جاي نحضر قرطاسيه ولوازم مدرسيه.. لان بعد أيام راح يبدي دوام المدارس
- ياا شبسرعه خلصت العطلة
- اي والله عمه عبالك غمضي فتحي بدأ الدوام
بعدين تميم ضل يسألني بيا صف ويا مدرسه وشلون راح ترحين للدوام.. وآني أريد بس يگوم حتى استفرد بعمه سعاد واسألها عن خطوبة شهم
وچنت اجاوبه وهو هم يعلق ويه كل جواب...
بعدين گال تدرين انتي هسه صرتي چبيره مو زعطوطه الچنت اكتلها من أشوفها تلعب بالشارع
ضحكت وگلت اي صحيح بس هسه دير بالك مني لا اكتلك وأرگعك على التبليط وخلي الشارع كله يضحك عليك
احنا صح كلنا ضحكنا على هاي الحچايه بس چانت ضحكة توتر ونرفزه مو ضحكه طبيعية وعادية
وهمزين عمه دزته يجيبلها رصيد لان تريد تخابر حبايبها
-رهف: اي عمه شنو اخبار الخطوبه.. لأن نريد نحضر ونشتري ملابس حلوه
- عمه سعاد: أن شاء الله حبيبتي. شوفي هو الخميس الجاي راح تصير النظرة الشرعية ووراها نحدد يايوم تكون الخطوبه
- رهف يعني هسه نشتري هدوم لو ننتظر
- عمه سعاد: انتظروا خلي نشوف شلون تصير الأمور وبعدها من نحدد موعد أبلغكم وحتى كلنا نتحضر
[توضيح للقارئ من عمه سعاد : احنا صح اتفقنا بالبيت النظرة الشرعية راح تكون يوم الخميس وراح تكون شكلية لان أساسا شهم حسم الموضوع وقرر مايكمل الخطوبه بس آني ماگلت لأي واحد وبأمر من ابو شهم من گال ماريد أحد يعرف بالرفض المسبق لهاي الخطبه وخلي الأمور تمشي كأنها طبيعيه]
- رهف خوش يعني ننتظر الما تحددون موعد للخطوبه
- عمه سعاد اي صحيح مثل ما گلتي
- رهف: يله اروح آني.. تحتاجين شي عمه.. اساعدچ بشي ؟؟؟
- لا حبيبتي.. هسه ماعندي اي شي .. سلميلي على ماما وان شاءالله بالليل اخبارها
- تمام... باي
رجعت للبيت وصعدت رأساً لغرفة أختي ترف توته وحچيتلها مثل ما گالت عمه سعاد وچانت طول الوقت تسمعني تبچي ودموعها تتساقط وگالت
- يعني الخميس يروح يشوفها.. وراها يخطبها.. يعني على أساس هو ماشايفها گبل ولا هي شافته ولا بينهم حب وعلاقه..
- ماعرف ماگالت عمه بس يجوز على گولتچ بينهم علاقة ويسوون هاي النظرة مدري الرؤيه الشرعيه شي شكلي گدام العالم وبس
واستمرت ترف بالبچي وبچي وبچي
- هسه شوكت تخلصين بچي..اريد اعرف الحقيقة وشنو هذا البچي على خطوبة شهم
وهم بقت تبچي وماترضى تحچي أي شي
رهف: رحت بصفها وحضنتها وگلت:
تذّكرين من چنا زغار ، من توفى بابا.. وعرفنا بي راح للسما وبعد ما يرجع... شلون بيومها نمنا سوا ووحده حاضنة الثانية وأثنينا نبچي وقررنا.. نكون سوا..من نفرح نفرح سوا ونرفع راسنا للسما حتى بابا يشوفنا وأحنا فرحانين.. من چنا نأخذ الشهادة بآخر السنه چنه نرفع الشهاده للسما ونگول بابا نجحنا.. وحتى من چنا نزعل لو تتعارك چنا رأساً نتحاضن ونرفع راسنا للفوگ حتّى بابا يشوفنا متصالحات ومايشوفنا متزاعلات
- ترف: اي صحيح حتى بابا مايشوف دمعة بعين وحده من عدنا
- رهف: وهسه شتگولين من راح يشوف دموعچ
- ترف : بدون كلام وبس تبچي
- رهف : احچيلي شنو الصاير
- ترف: عافت حضن اختها وعدلت من گعدتها وگالت : بالمختصر شهم اوهمني بالحب
- رهف: يعني شنو مافهمت
- ترف: چذب عليَّ.. قبل أكثر من سنة اعترفلي بحبه الي وچان يوميه يگضي الليل كله يحچيلي عن حبه وعشقه إلي وما أنكر آني هم أحبه واموت عليه وماچان يفوت يوم إذا ما اشوفه واسمع صوته.. وقررنا بعد امتحاناتي نعلن عن هذا الحب ونكمله بالخطوبه والزواج.. لكن شنو سوه حبيب الگلب،، عافني وعاف حبي وراح يخطب ويتزوج غيري
- رهف بأستغراب.. معقولة.. شهم والي إسمه عليه هيچي يسوي.. الي الكل معجبه بشخصيته وهواي بنات تعتبره كاريزما هيچ يطلع منه .. يعني رغم الحب البيناتكم وراح يخطب غيرچ.. انتي متأكدة هو چان يحبچ لو انتي چنتي تفسرين اي تصرف أو أي حچايه منه حب
- ترف: بصوت شويه أعلى.. چان يگولي أنتي حبيبتي وروحي وگلبي والهوه والنفس الي اتنفسه. بعد تردين اطيچ أكثر ؟؟
- رهف: ياحقير ياخاين يا سافل... سكتنا شويه بعدين گلت..ومع ذلك هم لازم تخابريه وتسمعين منه شنو تفسيره للموضوع يجوز يطلع كله شغل عمه سعاد هي الي اختارت وهي الي راحت خطبت ويعتذر منچ وترجعون مثل الأول بس اذا اصر على الخطوبة معناها مايريدچ وحتى وراها تگطعين كلشي بينكم
- ترف اي صحيح لازم أخابره
بدت ترف تدگ على شهم بس چان ما يفتح خط..
- ترف: ماجاي يشيل الموبايل ..يجوز نايم..
- رهف: يله آني هسه أنزل وانتي كافي بچي وانسحب دموعچ وأبقي دگي عليه ..
بست اختي من راسها ونزلت
حتى تأخذ راحتها من تخابر السافل شهم
ترف.. رغم اختي فوفو اصغر مني بس چان حچيها ويايه عبالك حچي بنيه چبيره ونصحتني أخابر شهم وأفتهم منه الموضوع وحتى اقطع الشك باليقين
ضليت اخابر عليه بس مافتح خط وحتى گمت ادگ خفيف على الحايط الي بين غرفتي وغرفته مثل ما چنه گبل نسوي بس هم بدون جواب...دزيت كومه مسجات بس چانت توصل ومايرد عليها... من هاي التصرفات عرفت شهم مارايدني ولا يحبني... اكيد چان يضحك علىّ أو يجوز چان يقضي وقت ويايه فقط..
يوم وره يوم وره يوم... واليوم هو الخميس .. اليوم راح يروح حبيبي يشوف خطيبته حتى يتفق ويه أهلها على موعد للخطبه
بقيت العصرية كلها واگفه ورا الشباك الي بغرفتي بس حتى اشوفه
شفته من طلع هو وعمتي وراح يشوف حبيبة گلبه .. راح بسيارة عمو يمكن يريد يفيك عليها وچان لابس رسمي قاط ورباط وطلعت وراه عمه سعاد بلبسها الأنيق وچانت شايله علبة چبيره مال حلويات ومزينه بأشرطة هدايا ، صعدو وحركو سيارتهم وتوجهو لمقصدهم وعافوني ويه گلبي المجروح ينتظر اللاشيء عافوني بدموعي الحرگت كلشي بيه بقيت أنتظر وانتظر إلى أن رجع حبيبي ووكف بباب بيتهم ، نزلت عمه سعاد وهو بقه ينتظر شويه ياله نزل بس چان شكله غريب وگوه يمشي .. ماعرف الي جاي اشوفه صدگ هاي حالته لو آني جايه أفسر بكيفي...
💔🖤❤️🩹
حبيتك
وآنه ادري بدربي
ويه دروبك ما يتلاكَه
حبيتك
وآنه ادري بكَلبي
ما يكَدر يكتم اشواكَه
بس حبك قدري المكتوب ..
تدري شكَد حملني ذنوب
وكم مره لتبعد واغفر لك ..
متكَلي ليغفر كم مره ؟
طبعك صاير مره ومره
