رواية سداد وبنت الفصل الثاني عشر بقلم الزهيريه
اعتدل في كل شي
إلا في عزة النفس اطغى طغيان الكفار
ألق/ الي ما يربوا آهله تربي الدنيا واصعب شي بحياتك من تكون تتأمل على شخص انه هو راح ينتشلك من الهاوية وتكتشف آنه هذا الشخص إلي خليت كل أملك بي هو راح يدفعك وينزلك اسفل السافلين وكل خطوه بحياتنه نخطوها اذا ما تكون حاسب حساب هاي الخطوه لا تخطيها أبد بالتالي ثمنها راح يكون باهظ الثمن اني من طلعت من يم عمي نزار عندي آمل بحياة جديدة وإني أمنيتي بالحياة بيت يجمعني بأبويه وأخويه وأعيش مرتاحه ويه الأنسان إلي حبيته من كل گلبي وظنيت هذا الشي سهل تحقيقه ويه هيثم لكن ما خفي كان أعظم
من وصلني هيثم يم جميله على اساس هي قريبته ومزوجه وبعدها بيومين هم وصلت بنيه اكبر مني بسنتين وهم ولد قريب جميله خاطبها وأهلها ما يقبلون بي وهي مهزومه من أهلها ويا ومثل وضعي تنتظر حبيبها يجي الكفيل يدخلهم حتى يزوجون بأربيل نفس وضعي أول أسبوع جميله چانت زينه بعد الأسبوع تصرفاتها كلها مريبه يعني انتبهت عليها يجون زلم تتطلعلهم بنص الليل زين هيثم گلي مزوجه شو لا شفت زوجها ولا تحچي ويا بالموبايل ولا اجى أصلًا ولا تجيب سيرته اني بصراحة گمت أخاف وهاي البنيه إلي اجتي خطيه مبينه فقيره واسمها ورده وبالبداية چانت جميله لازمتنه دگ تحقيق واسئلة عن اهلنه وعن كل شي يخص حياتنه هسه عافتنه وصارت ما سولف ويانه ومر على وجودنه 3 اسابيع وآني اتصل على هيثم يگلي الكفيل بعده بس يريد يجي اني أكون موجود وكذلك ورده هم تتصل على حبيبها نفس كلام هيثم
واحنه هذا الوقت كله ملابس نلبس من جميله اني وورده بس بعدين گامت تحچي علينه
جميله/ عيني كل وحده بيچن تخابر الگوا.... مالتها يدزون الكم مصرف اكل و ملابس شامبو صار 3 اسابيع نايمات على گلبي وكله من جيبي شنو من چنتن عد اهاليچن الجوارين تصرف عليچن
الق / هسه اگول لهيثم يدزلي فلوس تدللين
اما خطيه ورده ظلت ساكته واني بس گمت من يمها ورحت طلعت للحديقة إتصلت على هيثم ومن جاوب
هيثم/ شبيچ ألق ثبرتيني ثبيره الكفيل بعده ما جاي شسويلچ انطي صبر شويه
ألق/ ترى جميله گامت تحچي وتريد مصرف وهي حقها يعني من اجيت الى هسه انت ما فكرت بيه ما گلت شلون تبدل ملابسها شلون تسبح شنو تاكل يعني الكفيل اذا تأخر بعد شهرين شلون ابقى على جميله
هيثم/ آسف حبيبتي والله ما خطر على بالي هذا الشي انتن البنات تنتبهن على سوالف احنه ما ننتبه عليهن احنه الشباب شگد يكفيچ حبيبتي
ألق/ هيثم انت ما منطيني من جيبك وما اريد من عندك آي فلس اريد من الفلوس إلي نطيتهن آلك
هيثم/ تدللين حبيبتي شگد يكفيچ وشي طبيعي آنه من فلوسچ بصراحة اني ما عندي فلوس غير بس الطيور قابل ادزلچ فلوس طير تشترين بيهن ملابس وشنو تحتاجين ليش الطير شگد سعره
ألق/ أريد 5 ورقات
هيثم/ شدعوه حبيبتي ترى هي 25 آلف كافي بهيچ حاله راح ينصرفن كلهن على شي ما يسوى
ألق/ ترى انت دى تنطيني من فلوسي ما ماخذه منك حتى شوفهن هوايه
هيثم/ تدللين طالما صارت فلوسي وفلوسك اليوم احولچ خمس ورقات
ألق/ ليش انت ما تجي اجيبهن إلي
هيثم/ وتردين أعبر القارات حتى أجيب الچ 5 ورقات لا هسه اليوم احولهن الجميلة على مكتب صيرفه وهي تنطيهن الچ
ألق/ وبعدني أريد احچي ويا بس غلق الخط بوجهي دخلت لگيت ورده تبچي ومن سألتها عرفت آنه حبيبها صار 3 أيام غالق موبايله وما تگدر توصله تعجبت شلون جابها هنا وبعد عافها وغلق خطه وللعصر طلعت جميله وبعدها رجعت وصاحتلي
جميله/ هيثم دز فلوس 5 ورقات 2 الي و3 الچ
ألق/ لا كلهن الي
جميله/ لا عيني هاي الفلوس اخذتهن حق هاي 3 اسابيع انتي تاكلين وشربين من عندي شنو آني فاتحتها موكب حتى كل شي بلاش وهسه انتي قابل دافعه من جيبچ شو كله من هيثم
الق / لا حبيبتي كله من عندي هيثم منين يجيب ورق
جميله/ آي وأنتي منين عندچ هاي الفلوس كلها
الق / وحچيت إلها كل شي شلون اخذت الفلوس مال عمي نزار وهنه موجودات عند هيثم بس ما صدمها غير المبلغ الموجود يم هيثم
جميله/ وليش ما گلتي من البدايه انتي الله من شنو خالقچ
ألق/ وعافتني جميله وطلعت للحديقة وچانت تحچي بالموبايل ويه منو ما أعرف بس بقيت واگفه اباوع عليها من الشباك ومبين عليها العصبيه وبعدها دخلت
جميله/ يله تعالي نطلع حتى نشتري ملابس وطلعنه واخذتني لسوگ وطبعًا هاي اول مره بحياتي يكون عندي فلوس وأشتري شنو احتاج وبقينه نفتر بالسوگ واي شي يعجبني أشتري ولليل يله رجعنه وخطيه لگينه ورده ميته بچي لان حبيبها والعافت الدنيا كلها على موده ما خطه مغلق وبعدها مرت الأيام وبالبداية چان الاتصال يوميه بيني وبين هيثم بعدها صار كل مرتين بالاسبوع وبعدها صار مره وحده ونتعارك بيها ومر شهر ونص على وجودي اني وورده يم جميله شهر ونص ضبط وورده چنت إني أسحب من هيثم وأصرف عليها ويايه
وبيوم بالليل چنت نايمه وگعدت احس حلگي يابس عبالك واحد چان يركض ورايه ورده نايمه ردت مي وسمعت جميله تحچي وچانت بالمطبخ بحيث فاتحه باب الثلاجة واگفه يمكن تريد تاخذ شي من الثلاجة بس معصبه لهذا ماخذه شي وفتحتها وواگفه بالبداية چنت اريد أنسحب بهدوء وأرجع للغرفة وهي أساسًا ما شافتني بس اضطريت اوگف أسمع شنو تحچي من ذكرت أسمي
جميله/ شوف مال عبالك تاخذ الفلوس وحدك تحلم وترجع تاخذ من جماعة أربيل وربك ابلغ عليك جماعة بغداد واخليهم يشيلوك وماكو واحد يندل دربك الفلوس اني وياك بالنص وعمولة جماعة أربيل بالنص مال ألق من يجي ياخذها الكفيل بلغه ينطيني الفلوس اخذ نص وانت احولك نص تگول لا شوف شيصير بيك صير مثل ضياء اني انطيته عمولته واخذت ورده الي من يجي الكفيل ياخذها وينطيني العمولة كلها الي
الق / رجليه گامن يرجفن يعني هاي حديثها ويه هيثم يعني شنو اني وگعت بيد عصابه بس صرت أكذب نفسي واگول عسى أكون غلطانه يا ربي وين أروح والفلوس يم هيثم رجعت للغرفة حتى عطشي نسيته واني ادگ على وجهي يا ربي لا اگدر ارجع بعد على عمي نزار ولا هيثم الچلب بعد ينطيني فلوسي احس هاي الدنيا بكبرها تضيق على صدري أحس قفصي الصدري راح يتكسر ظليت الوب ذاك الليل ما غمضلي جفن أبد الى الصبح آني نايمه بفراشي وعيني على السگف أريد حل لنفسي گعدت ورده وصبحت عليه وشگد انقهرت عليها هاي كم بنيه راحت ضحية حب كاذب كم بنيه نحكم عليها تموت حتى عديم الشرف يبيعها ويقبض الثمن تحت مسمى الحب هذا الوهم الكاذب وقررت آول شي أفتح الموضوع ويه ورده وثانيًا أتصل على هيثم واختبره اختبار اذا فشل بي ننهزم آني وورده
سداد/ اني صدمتي بوفاة أبني أيليا خلتني مثل المخبل يعني شبه الفاقد العقل وسألني الضابط سؤال فر راسي بي من سألني شلونها علاقتي بزوجتي گتله/ ما فهمت يعني شنو
فرقد/ يعني سؤالي لحضرتك واضح وهو شلونها علاقتك ويه زوجتك هي علاقة متوتره لو علاقه طبيعيه
سداد/بالعكس علاقتي بزوجتي جيدة جدا لان احنه ازوجنه عن طريق علاقة حب
فرقد/ والله احنه كل خوفنه من علاقات الحب المصايب كلها من وره هاي العلاقات
سداد/ الى هسه ما فهمت شنو المغزى شنو علاقتي بزوجتي بالموضوع
فرقد/ شوف سألت هذا السؤال لإن اكو هواي علامات أستفهام على زوجة حضرتك أهمها آنه اذا سلمنه انه الطفله قتلت أخوها الام وين چانت اذا نايمه ما معقوله هي تنام بمكان وتعوف أطفالها بمكان وحدهم وراح اجي وياك ما سمعت صوت الطفل عامةً اي طفل ينضرب گبل يصرخ مو يتعرض للخنگ أبد ما بچى الا تكون زوجة حضرتك أصلًا ما چانت بالبيت وهواي أسئلة عندي بدماغي واجاباتها كلها يم زوجة حضرتك لهذا اي شي هسه ما راح أفيدك بي الى ما يطلع نتايج التقرير الطب العدلي وساعتها راح أعرف وأقل شي لازم 10 ايام يله نعرف
سداد/ الله يخليك سيدي گلبي محروگ على أبني أريد من الله ومنك هواي 10 ايام أريد اقل من هيچ الله لا يحرگ گلبك على غالي وأريد أشوف بنتي وأبني
فرقد/ والله مو يمي يم أبو كرار وراح بيه ما بيه استعجله آما مال شوف بنتك مستحيل لانه تحت العناية المشدده ومستحيل اي احد يشوفها لما نشوف شنو حالتها إما أبنك مستحيل كذلك لان بالطب العدلي الى ان يعرف شلون توفى وبعدها يسلمك جثته والله يعينك والبقيه بحياتك
سداد/ طلعنه من المركز واني الدنيا سوده بوجهي رجعت للبيت الشرطة مطوقته ويطالبون آريا إلي چانت بعدها بالبيت هي ويبرق أن يطلعون منه الى أن يتم رفع البصمات وهي تطلب منهم ما تطلع إلا اجي آني ومن ردت أدخل حاولوا يمنعوني لكن كوجر بلغهم آنه بيتي وأريد اطلع زوجتي وبنتي ودخلت وشفت آريا حالها مو أحسن من حالي وطلبت منها تستر نفسها حتى نطلع من البيت وچان خلاص طلع الصبح ورحنه ويه كوجر لبيته وهو عنده طفلين ولد وبنيه وسبحان الله بنت كوجر بگد ابني أيليا شفت موقف ذكرني بكلام الضابط وهذا الموقف بنت كوجر أخوها بس سحبها من ملابسها گامت تعيط الطفله تذكرت كلام الضابط من گال يعني من خنگته ما عيط ما صرخ ما بچى شلون
في وقتها ما بيه حيل احچي وأحقق أريد أشوف نتائج التقرير الطب العدلي وصل الخبر لأهلي وأهلها ولليل وصلوا لبغداد واني چنت من هول الصدمه أبد نزلت دموعي بس من شفت أمي هنا نزلت دموعي وهي حضنتني وظلت تبچي ويايه وحتى جيهان أختي هم موجوده وياهم وبوقتها ما ظلينه بعد في بيت كوجر وعندي خالتي مزوجه في بغداد كلنه رحنه يمها وبعد يومين من الانتظار وهذا چنت اطول أنتظار أنتظره بحياتي وبلغنه الضابط فرقد انه نگدر نستلم جثة أيليا
ورحت آني وأخويه وكوجر وچان أصعب موقف آمر بي بحياتي دخلنه للمستشفى وقعت على أستلام الجثة ومن انطوه ألي ملفوف انهاريت حتى ما گدرت أخذه بيدي واحضنه استلمه اخويه وكوجر ومن رجعت بي لبيت خالتي طلبت منهم ادفنه بأربيل وبوقتها إتصل بيه
الضابط فرقد / اخ سداد بلا زحمه عرفت انت اليوم استلمت جثة ابن حضرتك الله يرحمه بس يا ريت تجي حضرتك وزوجتك نريد بصماتكم
سداد/ اني بعد شوية راح اطلع لاربيل أدفن أبني خليها لما نرجع
وعلى هاي اجابتي الضابط ما حچى شي واحنه كلنه طلعنه لأربيل حتى أدفن قطعة گلبي أبني ومن وصلنه لأربيل ومعارفنه واقربائنه كلهم موجودين وندفن أيليا بدون ما المسه حتى وبين اقامة العزاء في بيت اهلي وبين رجعتنه لبغداد وحتى البيت مالتنه الضابط گال تگدرون ترجعون اله ورحنه إني واريا أخذوا بصماتنه وروجيدا يمنعون منعًا باتًا آنه نشوفها وبعد ما مر 7 أيام تم استدعائي من قبل الضابط إني واريا وأول ما طلب يتحقق وياها آريا
فرقد/ تفضلي ست آريا طبعًا تم استدعائچ لان انتي في حالة وفاة ابنچ لهذا اجاباتچ إحتمال ما تكون راكزه لكن هسه لازم نفهم ملابسات القضية احچيلنه شلون صارت الحادثة
آريا/ اني اجيت لگيت روجيدا مخليه أيليا بحضنها اني عبالي نايم اجيت أخذه منها لگيت حتى نفس ما بي ظليت اعيط وجيرانه اجتي وهي بلغت زوجها وهو إتصل بالشرطة
فرقد/ بداية حديثچ گلتي اجييت ليش انتي وين چنتي واجيتي
آريا/ چنت بالحمام
فرقد/ العفو چنتي تقضين حاجه لو تسبحين
آريا/ لا چنت دى أغسل ملابس
فرقد/ طبعًا مو عجيبه انه انتي دى تغسلين ملابس بوقت متأخر من الليل هاي شي طبيعي يصدق بس مو معقوله تكونين ما سمعتي الطفل من صرخ او بچى لان إي طفل يتعرض اي عضو بجسمه الى لمس قوي يصرخ كيفما طفل چان يتعرض للخنگ هذا شي
آريا/ ما سمعت لأنه مشغله غسالة
فرقد/ راح اجي وياچ بكل شي گلتي واسوي نفسي مصدگه بس هو طفل صغير اذا يخنگه شخص چبير ما يطول بيده ثواني ويموت بس اذا طفله بعمر ست سنوات خنگت طفل بعمر سنتين ونص يحتاجلها وقت هواي يله تكون تقتله انتي هذا الوقت كله مگابله الغسالة ليش انتي دى تغسلين الهدوم بيدچ لو بالغسالة
اريا/ اني ما أفهم يعني اني متهمه
فرقد/ انتي المتهمه الوحيده هاي اقوالچ كلها تدونت بملف القضيه
سداد/ وبعد ما شفت الضابط وانطاني اقوال آريا قريته ما يصدق أبد أقوالها
فرقد/ بقت الطفله روجيدا أبد اني ما شفتها لهذا قررت أروح أشوفها ومن وصلت للمستشفى وقدمت هويتي دخلت شفتها چانت طفله تخبل حلوه ومن سالت الدكتور عليها گال / ننطيها علاج بس الظاهر متعرضة لصدمه قويه بحيث ما جاي تستعوب اي شي بس تردد كلمة الوحش
وطلبت منه أريد ابقى وياها وحدي وطلع الدكتور اجيت گعدت يمها ظلت تباوع عليه بنظرات تايهة وتكرر الوحش ردت أخلي أيدي على شعرها گبل عاطت طلعت من جيبي نستله
وانطيتها إلها سكتت
سألتها/ شلونچ روجيدا شبيچ حبيبتي
روجيدا/ الوحش اخذ ماما وهي تعيط
فرقد/ هاي الجمله تكررها شگد حچيت وياها بس تكرر هذا الشي ولازم أخلي طريقه أتبعها ويه روجيدا بحيث أسحب منها الحچي بدون ما تحس ورجعت بذاك اليوم تعبان منهك من التعب وبس دخلت للبيت سبحت ورحت نمت چفي على وجهي گد ما تعبان موبايل الشغل غلقته بقى بس موبايل البيت وما حسيت غير صايره ساعة 1 بالليل والموبايل يمي يدگ شفته چان احمد رديت عليه
احمد/ شلونك فرقد
فرقد/ ادخل بالموضوع احمد انت مخابرني وحارگ الموبايل عليه حتى تگلي شلونك
احمد/ شوف فرقد مال البنيه قاتله الطفل صحيح لآن البصمات الموجودة مال ايدها بس هي الظاهر مو بقصد تقتله مخليته بحضنها وظهره على صدرها ومخليه أيديها على رگبته ومن الخوف ضاغطه بكل قوتها عليه المسكينة ما تدري دى تقتله مو دى تحمي
فرقد/ راح اجي وياك هي قتلته النقطه الرئيسية وهي من شنو چانت مرعوبه الى هاي الدرجه بحيث من خوفها تصلبت أعصابها وقتلته
احمد/ فرقد اكو بصمات لگيتها مال ايد ما اعرف المن لا طابقت بصمات سداد ولا زوجته
سداد وبنت ألعرب
