رواية عشكت جنوبية الفصل الثالث عشر بقلم نسرين الاسدي
هنادي: دخلنه المحكمة وبعد ما كملنه الأوراق وكل الوثايق دخلونة على القاضي
انه حسيت بخوف ماعرف ليش بس يمكن لأن هاي أول مرة ادخل بيها دائرة حكومية
بدئ القاضي يسألني وانه مترددة بالجواب ضل يعيد السؤال مرتين وندسني ليث حتى اجاوبة
كملنا العقد وطلعنه وهو يريد ينفجر
صعدنه بالسيارة وهو يتأفف خذاله جكارة وشعلها انه ضليت ساكتة ما حاجيته لأن ادري بيه معصب هسة مبين من ملامح وجها
أخر شيء مليت خذيت نفس وگلت: ليث انته شبيك؟
ليش ضايج ...وكافي تدخين لأن اختنگت
باوعلي وخزرني وگال: اني جاي أحاول اضبط اعصابي حتى ما اضربج واطيح حظج ...لهلسبب خليني ساكت احسن
گلت : وليش هو انه شسويت ..گتلي جاوبي بس بنعم وجاوبت بعد شنو؟ !
ضرب الستيرن وگال: لج انتي ردتي تشككين القاضي بيه وكأني خاطفج وجابرج على الزواج
شلون تضلين ساكتة ..ليش ما جاوبتي بسرعة ها فهميني؟ !
گلت: لأن انه جنت خايفة وو...
ما خلاني اكمل وصاح: كافي لتبررين ..هسة راح نرجع للبيت حتى واهسي بالطلعة كسرتي ..انتي مو مال أهتمام ..بس صوجي اني الي منطيج اهمية
ولتگولين اي شيء بعد لأن صوتج مريد اسمعه
سكتت ونزلت راسي وفركت ادية انه هسة شسويت بروحي شيفگني منه بعد
**
لبنى: گعدنا بالمطعم طلبنا شوية عصاير وانحجي بمواضيعنه المعتادة
وريتاج ولوجين گاللي حتجي لارا النه اليوم فرحت كولش أكيد وجودها حيغث هنادي العوبة هاي
اندرايت للشبابيك وشفته ذاك الرجال الي جان گاعد بمكانه ..واكف يم سيارة حديثة ما تصورت هو شخص غني هيج بس هو گال منتضر مديرة معناتها السيارة مو اله
جان واكف ومنزل راسه شكد عبرت عليه بنات صاكات ولا كأنه منتبه ولاهتم الهن اصلآ
فاجأني هالشيء ..معقولة موجود هيج شاب مثله عيونه مازايغة؟ !
شوية وألتفت هو للواجهة ووكعت عيوني بعيونة هو بس انتبه اني اباوع اله نزل راسه بسرعة وألتفت للجهة الثانية انصدمت من تصرفه اني نضرتي متتقاوم وهو ولا يمه
فزيت على صوت لوجين وهي تگلي: لبنى ..لبونة هاي شبيج عيني ..صارلنه ساعة دنصيحلج
توترت وگلت: ولا شيء ..شنو گوليلي
ريتاج: لارا اتصلت وگالت هي وصلتكم يلا خلينا نروح الها
لبنى: يلا امشنا
هيثم: جنت انتضر استاذ وائل وهو اتأخر اليوم وية ماجنت منتضر مرت عليه هواي بنات بس اغلبيتهن ما محتشمات انه نزلت راسي حتى ما احصل حرام من ورا النضرة الحرام
شوية و التفتت للمطعم الي جنت گاعد بي وشفت ذيج البت الي گومتني هي وصاحباتها طلعت تباوع الي
انه مباشرتآ بعدت عيوني عنها شنو قصدها من هاي النضرات ..يعني جاي تستهزء بيه جا خذت الطاولة اصلآ عادي انه ولا هامني
شويه وطلع الأستاذ وگال: هيثم اني جدآ اسف لأن خليتك تنتضر
گلت: لا استاذ ولا يهمك انه بخدمتك
ربت على جتفي وگال: يلا خن نطلع لمطعم اني ميت من الجوع
گلت: صار استاذ يغدي عنك الجوع
أبتسم وگال: بس خلينا نشوف مطعم غير هذا لأن اني اليوم مشتهي سمج
ضحكت وگلت: عساك على سمج استاذ ..اذا ما حصلنا انه اشتري واسوي الك بيدي على طريقة امي ماينشبع منه
صعدنه وگال: اي ياريت والله
**
ليث: اليوم هنادي كولش عصبتني بس سيطرت على اعصابي كوة ومضربتها
أول ما دخلنا البيت جان أشوف لارا گاعدة بالصالة ويه لبنى والبنات
سلمنا وهنة ردن گامت لارا واجتي عليه مباشرتآ متجاهلة هنادي ولا كأنها تشوفها
لزمت أيدي وگالت: يا اهلآ بيك ليوثي متعرف شكد مشتاقتلك وربي
لك اذا گتلك بگد دگات گلبي هماتين اجذب عليك هيج تسوي بيه وتعوفني وتزوج مو حرام عليك تعذبني مكسرت خاطرك اني ؟!
حبيت احرگ اعصاب هنادي مثل ما عصبتني أبتسمت وگلت: وربي يا لارا اني كولش متأذي وداتعذب لأن تركتج ..بس هي جانت غلطة واني متندم عليها
انتي بنت خالتي وحليوة وتناسبيني وجيتي اعترفتيلي بحبج بنفسج بس اني جنت غبي ومميزت
انصدمت هي وبقية البنات ..درت عيني ألها وشفتها منزله عيونها ولا رفعتهن بس مبين من تنفسها السريع هي ضاجت ..ابتسمت
وكملت: لج لارا متتصورين شكثر اني مشتاقلج هواي علية هالأشهر لأن مشفتج بيهن
ووعد مني بس اطلگ هنادي راح ازوجج هي كلها فترة وتعدي تحمليها واني اتحملها
هنا هنادي رادت تصعد گالت وصوتها مبين راح تنفجر بالبجي: عن اذنكم انه تعبانة
لزمت ايدها حيل وگلت: لا وين هنودة ضلي ويانا بعدنا مخلصنا كلام ..يلا گوليلي انتي شنو رائيج ازوجها هسة لو بعد ما اطلگج؟ !
ابتسمت ..استغربت من ردة فعلها
باوعت الي ولارا وگالت: ما راح أكلك شنو رئيي لأن ابساطة انته جذاب
خزرتها والبنات انصدمن اكثر
كملت: جذاب لأنك تحبني وماراح تتزوجها لأن اصلآ ماراح اطلگني ..
وبعدين انته لو جنت تحبها صدك جان ازوجتها مو عفتها واجيت ازوجتني انه لأنك بكل بساطة ما تحب البنات الي يجن هنة ويعترفلك
سكتت معرفت شلون اجاوبها ..لأن صدوك صدمتني بهالجواب وضربت على الوتر
سحبت ايدها وگالت: من رخصتكم ..وهلا بيج لارا جنت متشوقة حتى اشوفج
صعدت واني ضليت حالي حال البنات
ألتفتتلي لارا وگالت: لك ليث شنو هاي شلون هي هيج تحجي گدامك وانته ساكت ..لك رد عليها طيحلها حظها ..هاي قليلة أدب ..انته اصلآ شلون متحملها حتى كلام متعرف مثل العالم ..وبعدين شنو هالأتهام اليه ..انته تعرف اني لو ما محترمتك ولعيونك انته جان مسكتتلها
گلت: اني اعتذر بالنيابة عنها يا لارا وهسة حروح اعاقبها على هالتصرف وحتشوفي
هنادي: دخلت للغرفة وانه محتارة افتر من صفحة لصفحة هسة انه شسويت وشحجيت؟ !
واصلآ المن هيج گلت؟ !
هو من البداية معصب و هسة راح يعصب اكثر ياربي شسويتي بروحج ياهنادي انتي شكد غبية
نزعت الشال والحذاء ردت ابدل بس بالي ما مرتاح يمكن يدخل بأي لحضة ويصيح عليه ويضربني مثل ذاك اليوم
شوية ودخل هو قفل الباب وأجه عليه صاح: لج هنادي شنو هالكلام الي حجيتي بالصالة؟ !
گلت وانه ارجف من الخوف: ليث اسمعني فدوة انه مو قصدي والله بس هي الحجاية مااعرف شلون طلعت مني ..انه اسفة وبعد ما اعودها ..فدوة ليث هاي اخر مرة
وگف گدامي وانه خفت اكثر مد ايده على شعري وسحبني اله وباسني انه فتحت عيوني مصدومة شنو يعني هو ما ضايج مني؟ !
بعد عني باوعلي ابتسم وگال: لج اني ممعصب منج اي صح جنت بس من رديتي هذا الرد على لارا عجبتيني والله طلعتي مو سهلة يا ملعونة ..
اي من البداية وهيج وين جنتي ضامه هاللسان ..تعرفين فرحتيني لأن اني اتعمدت احجي هيج حتى اشوف ردة فعلج
ولو جان ردج مثل ذيج المرة لا ساعتها صدوك جنت راح اطلع خبالي عليج بس انتي نقذتي نفسج
مد اديه اثنينهن وخلاهن على خصري وسحبني اله وهمسلي: لج تدرين شنو معنى هالشيء معناها انتي تحبيني وجاي تغارين عليه
دنگ على خدي وباسة ونزل لرگبتي
گلت: بس انته صدك راح اطلگني مو؟ !
باوعلي وتغيرت ملامحه بسرعة عرفته ضاج گلت متلاحگة الوضع: قصدي انته گتلها راح اطلگني صدك حجيك؟ !
أبتسم وگال: لا كذبت عليها ..لأن انتي هسة مرتي شرعآ وقانونآ ..مراح اتخلى عنج ابد
باسني بخدي الثاني وگال: يلا هسة غيري ملابسج ونزلي جوة ..ماريدج تتقيدين بشيء واي شيء يحجنه عليج تردين ولا تهتمين الهن ولا تخافين مراح أعصب ..ردي براحتج بس مو تجفصين يعني نص ونص
خله وطلع ..وانه خليت ايدي على گلبي واتنفست براحة ..الحمدلله عدت على خير
**
هيثم: مرت اسبوعين وانه هنا ولا مرة رحت وشفت هنادي رغم جمعت كل المعلومات عن بيتهم وأوقات طلعت الحقير ليث ورجعته بس ما اگدر اروحلها هسة وانه بعدني مامكمل الفلوس اريد طبتي عليهم هي الأولى والأخيرة
واستاذ وائل گلي كلها چم يوم وراح ينطيني اياهن
وذيج البت الي بالمطعم ضلت يومية تجي هي وصديقاتها ودايمآ تباوع عليه چنها تراقبني وانه عرفت هي اخت ذاك الگو...
بس مبين هي ما تعرفني ..وانه هم ما انطيتها وجه
جنت واكف بمكاني مثل كل يوم شوية وشفتها عافت صديقاتها يروحن لمكان وهي اجت عليه
وگفت وگالت: احمم...انته...ممكن ..احجي وياك
ألتفتت عليها درت عيوني للجهة الثانية وگلت: نعم اختي تفضلي
هي مبينة ضاجت ..گالت: اسمع اني ..سألت عنك ..
وعرفت ..انته مو من هنا اصلك بصراوي ..وبصراحة اني عندي قرايب هناك ..فحبيت اسألك اذا تعرفهم او تعرف شيء عنهم
هنا انه لعب گلبي وراح بالي على أهلي معقولة هي قصدها علينا لو عرفتني وجاي تجذب عليه
گلت: اي أكيد سألي بس انه ما اعرف هواي ناس يعني
گالت: لا اسمع. ..اني ..رايدة ...
خلت وجهة گدامي وگالت: انته لويش متباوع عليه واني احجي وياك ..ها؟!
انته مستصغرني لو شنو؟ !
گلت: لا العفو اختي مستصغرج شلون ..بس انه ما أگدر اباوع الج وانتي ما ساترة شعرج ..يعني بهاي الحالة انتي تنأثمين وانه هم
گالت: اه ..هيج الموضوع يعني ..ماشي ..شكرآ اني لازم اروح صديقاتي دينتضرني ..باي
گتلها: الله وياج
لبنى: مداصدوك نفسي اني شداسوي يعني اروحله بنفسي واعرض احجي وياه ..وبعدين شنو هالبرود برده عليه ..اني عمري كله متصرف وياي احد هيج
هو حتى مديباوع لوجهي ..
وصلت للبنات وضلن يلغن على راسي لويش تأخرتي ووين جنتي مجاوبتهن لأن مزاجي مو صافي
ركبنا بالسيارة واني كل افكاري يمه ..معقولة اني اهتم لأحد هيج؟ !
شنو السبب واصلآ هو شو الشيء الي ينحب بي ؟!
ميهمني هذا كله اني راح اخذ رقمه من اي شخص او حتى من ابو المطعم وراح اتواصل وياه واشوف اذا جان بالموبايل كلامه نفسه لو لا
هيثم: مر الأسبوع الثالث وحصلت لبنى الرقم وضلت تتصل بيه
جاوبتها أول مرة لأن ما تصورتها هي وگلتلي ان هي نفس،البنية الي حجت وياي أمس
حاولت اشرحلها ما أگدر اتواصل وياها وطلبت تمسح رقمي
بس هي أصرت واستمرت بالأتصالات واذا مارديت ادزلي رسايل
فكرت انه شوية وقررت استقل هالشيء لمصلحتي واعاقب ليث بأخته ..صح هي ماالها ذنب بس هنادي هم بله ذنب وهو غصبها عليه
وهيج صارت اخته لبنى من ضمن قراراتي وهي الي جابتها لروحها
**
هنادي: نزلت الصبح للصالة شفت ام وسام بالمطبخ صبحت عليها وگعدت يمها وضليت اسولف وياها شوية
وشفت لبنى نازلة من غرفتها وهي لازمه موبايلها ادز رسايل وتضحك انه ما هتميت وگلت شنو دخلني بيها يمكن هي تحجي ويه صاحباتها
بس شلون هي گاعدة من وگت هذا الي استغربته والأغرب لبسها لا لابسة فستان ولا اتراك لابسة تنورة وقميص ردن طويلة تفاجأت بس ما سألت
شوية ورفعت راسها من الموبايل اجت علينا وگالت: صباح الخير ام وسام
ام وسام: صباح الأنوار ..ما شاء الله اليوم مشعشعة ست لبنى
ضحكت هي وگالت: صدوك ام وسام انته شايفة هيج يعني مبين عليه؟ !
أم وسام: اي والنبي طالعة جنج چكليته
باوعت عليه وگالت: اكيد لعد شلون ..مثل هاي لسه ما صارلها نص سنة من ازوجت وچنها عجوزة بالخمسين لا لبس حلو ولا مكياج حلو ..كولشي ماكو
گلت: الحلى مو بالمكياج وألبس يا لبنى ..الحلى حلاة الروح والأخلاق ..بس هاي انتي وبنات خالتج ادورن بس المضاهر
ضحكت حيل وگالت: هههه منو هاي الي دتحجي لج بابا انتي كولشي متفتهمين ..شكد قديمة وبعدين منو الي گلج اني اخلاقي وروحي مو حلوات بالعكس اصلآ ينگطن عسل وربي
يلا اني لازم اروح عندي موعد ..مريد اخرب مزاجي وياج ..ولو اني من صبحت بيج بس الله يستر شنو راح يصير
سلام
أم وسام: الله وياج ست لبنى
ألتفتتلي وگالت: ولا يهمج حبيبتي هي هاي ست لبنى دايمآ هيج
گلت: لا خالة اصلآ انه اعرفها ومامهتمة لحجيها بس أگول يمته راح تتغير تصرفاتها وياي وتعرف انه ماعندي شيء وياها
ربتت على ايدي وگالت: راح يجي هاليوم بنيتي اني متأكدة ..بس يمكن يتأخر
هزيتلها براسي وگلت: يمكن
**
هيثم: الأستاذ وائل وعدني باجر يجيبلي،الفلوس وانه گلت اليوم لازم انهي كلشي ولازم تعرف لبنى حقيقتي صح صارت بيناتنا اتصالات لأكثر من اسبوع وهي اعترفتلي بحبها بس انه ابد ما سمعتها كلمة احبج لأن ماجنت ناوي اجذب عليها وحتى اسمي خليته هو نفسه
الشيء الوحيد الي ما تعرفه انه اخو هنادي واليوم لازم تعرف
بس طلبت منها تلبس شيء محتشم وياريت تلبس الحجاب
واتواعدنا نتشاوف بحديقة عامة واليوم الأستاذ وائل عنده اجتماع مارادني انتضر وخلاني اطلع
جنت گاعد افكر شلون ابدي الموضوع ..شوية وشفتها جاية من بعيد جانت لابسة ملابس طويلة وحجاب صح مطلعة گذلتها بس على الأقل ساترة روحها ..لوحتلي من بعيد وابتسمتلها
لبنى: من اليوم الي اخذت بي رقمه وتواصلت وياه واني اشوف نفسي جاي اتعلق بيه يوم عن يوم اكثر ويوم عن يوم يزيد حبي اله
يمكن هالشيء غريب بس نفسي جاي احبه واتعلق بي غصبآ عني ..يمكن السبب لأني شفت بيه شخص مختلف وأسلوبه حلو
اتواصلت وياه اكثر من اسبوع وهو ولا سمعني كلمة محلوة ولا قلل احترامه وياي لحضة وحدة
وكل يوم اطلب اشوفه بس هو يرفض ويتحجج بالشغل
وحتى من دزيتله صوري رفض وگلي لدزين بعد اي صورة وحذفهن ..كل تصرفاته تخليني اتعلق بيه اكثر واليوم لمن وافق نگعد سوة اخيرآ
طلب مني ألبس ملابس مستورة وحجاب يلا اجي واني وبسبب حبي اله وافقت على كل كلامه بدون ما اناقشه ..اجيت واني متأكدة راح يعترفلي بحبه اليوم ..وشكد حسيت بفرحة بداخلي
شفته من بعيد وتخربط كل كياني ياالله مداصدك اني هلكد احبه
هيثم: وصلت يمي وگالت: السلام عليكم ..مرحبا هيثم ..شلونك؟
ابتسمت وگلت: وعليكم السلام يا هلا بيج لبنى ..انه الحمدلله انتي شلونج ؟!
گالت: هسة اني تمام ..لزمت حجابها وگالت: شلونه يعني ما اعرف اني أول مرة اجربه ..شنو رايك؟ !
گلت: تفضلي ..طالعه حلوة ما شاء الله هيج هواي احلى
گالتلي: هيثم اني ماعرف شلون أكلك ..بس اني يعني صدوك تعودت عليك ..ومجاي اتخيل يمر يوم محاجيك بي ..
گلت: لبنى انه اريد أكلج شيء
ابتسمت ووردت خدودها باوعت الي وگالت: گول اني من زمان منتضرة هالشيء
گلت: انه آسف لبنى اعرف انتي ماالج ذنب ولا دخل بلي صار ..بس لازم تعرفين الحقيقية
باوعت عليه مصدومة وگالت: حقيقة شنو هيثم؟ !
هيثم: انه هو اخو مرت اخوج هنادي ..
فتحت عيونها مصدومة وگالت: اخو هنادي؟ ؟؟
