رواية عشكت جنوبية الفصل الرابع عشر بقلم نسرين الاسدي
لبنى: اخو هنادي؟ !
هيثم: اي وجيت لهنا هي عالمود اختي لأن راح اخلي اخوج يطلگها غصبآ عنه مستحيل اخليها وياه ولا دقيقة بعد هذا اليوم
لبنى: واني هيثم ..اني شنو جنت بالنسبة ألك ؟!
انته جنت تعرف اني اخته؟ !..لو هسة عرفت؟ !
فهمني فدوة هيثم ..اني شنو انته صدوك حبيتني لو جنت جزء من الخطة؟ !
هيثم: انتي سمعتي مني كلمة احبج؟ !
..لا ..انه اعترفتلج بهالشيء؟ !
..كتلج عندي مشاعر اتجاهج؟ !
لا ..
انتي الي اجيتي الي وعترفتيلي بحبج وانه ما سويتلج اي شيء
لازم تشكرين هسة لأن انه جنت اگدر أئذيج وانتقم بيج من اخوج بس ماسويتها لأن انه مو من هالنوع ولا تخافين ماعندي ولا صورة الج بالتلفون ..بس حبيت اكلج لأن ماضل شيء كلها يوم وراح اجي لبيتكم ..
بجت وگالت: بس اني حبيتك من صدوك وجنت مستعدة اغير نفسي لخاطرك انته ..اني صرت وحدة ثانية عالمودك ..شلون هيج؟ !
ليش تكذب عليه وتجرحني ..كله بسبب اختك الله ياخذها
صاح: هي انتبهي لكلماتج انه ما اسمحلج ادعين على اختي ..هنادي جانت ضحية واخوج هو المسؤول الوحيد عن كل هالشيء ليث واحد حقير وما يخاف الله ..رغم هو متأكد من برائتي راح سجني كله عالمود يضغط على اهلي وينطونه اختي
بس انه راح اندمه وعد راح اخليه يندم على الساعة الفكر بأذيتنه بيها ..وراح تشوفين
لبنى: تركني وراح ولا كأني موجودة ولا كأنه كسر گلبي ..واني الي بنيت احلام وردية بدون معرف منو هو ..شكد غبية انتي لبنى ..شلون خليت شخص مثله يكذب عليه ويلعب بمشاعري هيج؟ !
كله بسبب هنادي ..اليوم حموتج ياهنادي ..حموتج
**
هنادي: صار وقت الضهر وگعدت ويه خالة اسراء بالمطبخ وام وسام اجهز الغدة
گالت: حبيبتي هنودة انتي ليش تلبسين شالج گدام عمج هالشيء مو حرام
گلت: اي خالة اعرف بس متعودة مااعرف انزعه بس اذا جان البيت فارغ ..
ضحكت وگالت: هاي واحنة معدنة احد لو جان عندج حموين شحتسوين ساعتها
شوية اندفع الباب ودخلت لبنى بس مو نفس ما طلعت جانت عيونها مورمة من البجي وشكلها مبهذل
خافت امها وراحت الها بسرعة
اسراء: لج ماما لبونة انتي شصاير وياج؟ !
شنو هاي ليش شكلج هيج؟ !..
احد متعرضلج ؟ احد مأذيج ؟...لج احجي
بجت اقوه وگالت: ماما فدوة تركيني بحالي ..
وركضت لغرفتها
ما عافتها وراحت وراها عالسريع وانه هم گمت وراها رغم هي دايمآ تأذيني بالحجي بس خفت عليها وردت اتأكد ما بيها شيء
دخلت خالة وانه وراها
صاحت: ماما الله يخليج خليني لوحدي ..مالي خلك احجي اي شيء
صاحت عليها: لج لبنى احجي شصاير وياج ..اني مااتركج قبل لا تحجيلي كولشي ..لج ليكون احد لاعب عليج وماخذ شرفج واحنة مندري بشيء؟ !
والله ليذبحونج ليث وابوج ..دحجي يلا
مو شلعتي لگلبي
لبنى: ماما كافي ..كولشي مبيه ومحد متعرضلي بشيء بس خليني لوحدي
تقدمت عليها لزمتها من زندها وصاحت: لج ماتركج قبل لا تحجين كولشي
هي عافت امها وألتفتت عليه ضاجت وصاحت بعصبية: انتي السبب كولشي صارلي بسببج ..الله ياخذج ويريحني منج ..اليوم اله اقتلج ياهنادي
استغربت من حجيها وگلت: لبنى شنو صار ..انه شسويتلج ..والله ما اعرف تحجين عن شنو
صاحت امها: لج عوفينا من هنادي هسة واحجيلي انتي ...هنادي شدخلها ؟!
لبنى: لأن اخوها السبب ..اخوها هيثم ..هو موجود هنا ..ويعرف كولشي عنه ..وكذب عليه وخلاني احبه وو...
لزمتها اقوة وصاحت: وشنو لبنى ..لتسكتين كملي لا اني اقتلج بأيدي ..كملييي
بجت اقوة وضلت تناشق...گالت: هو ..راد يغتصبني
شهگنه بصدمة ..وگلت: لا مستحيل اخوي ما يسويها هيثم مو هيج ..هيثم مستحيل يسوي اي شيء حرام
انتي تجذبين عليه
ضربتها امها راشدي وصاحت: لج وتحجيها بكل برود هيج بهالسهولة ردتي تسلمين نفسج لواحد متعرفينه غير من ايام ..لج انتي شنو لبنى ..ابوج هو السبب انطاج مجال اكثر من اللازم ..بس بسيطة اصبريلي شوية ..اني حعلمج ..اليوم اربيج من جديد ..لج احنة انطيناج ثقتنه ترحين تكسريها هيج وبكل بساطة؟ "
صاحت: ماما هي السبب ..خليني اقتلها بأيدي وارتاح منها
گامت واجت عليه رادت تضربني ولزمت ايدها وگلت: اهدي لبنى ..هذا مستحيل يكون هيثم ..اخوي مو هيج انه اعرفه ..هو ما يأذي احد ..انتي غلطانة
صاحت: لج غلطانه شنو ..هو اخوج بنفسه گلي جاي بس حتى ينتقم من اخويه وبيه اني ..اخوج واحد حقير وسافل ..وراد يدمرلي حياتي
ولأن باب الغرفة جان مفتوح فجئ انصدمنه بصوت ليث وهو يگول: منو هذا الي اتعرضلج لبنى ..احجييي
خالتي ما عرفت شنو تحجي وانه حسيت روحي اتجمدت بمكاني
بس هي تقدمت عليه وگالت بدموع : ليوثي ..اني ..
ليث بعصبية: احجي بسرعة لبنى
لبنى: اخوها ..هيثم اخو هنادي ..هو موجود هنا ويريد ينتقم منك لهلسبب هو قطعلي الطريق وراد يعتدي عليه ..بس اني گدرت اشرد بمعجزة
بعدين حضنته وبجت اقوة
وگالت: جنت راح اضيع بسببه ليوثي ..اخوها راد يدمرني
حضنها هو وگال: اهدي لبنى ..والله ولي اسمه الله الا اندمه ..الا ابجيه دم ..اذا ذيج المرة طلع خلال عشرة ايام ..هالمرة حتصير عشرين سنة ..الا اخليك تتعفن بالسجن يا گو... يا ساقط ..
بس مو قبل لا اكسر اعضامة لأول
گلت انه: ليث لا تأذي هيثم ..هو مو هيج انه متأكدة هو ما يسويها ..هيثم يخاف الله وهو يعرف شرف البنية شكد غالي عدها ..اخوي مو ...
بعدها عنه واجه عليه عالسريع لزمني من شعري وصاح: اسكتي ..مريد اسمع صوتج ..بس خن احاسب اخوج وبعدين يجي دورج ..الا ما اندمه على اليوم الي صار بيه ..ميطلع اسمي ليث ..
ودفعني حيل خلاني اطيح للگاع وطلع عالسريع وعيونه صايرة بهامته
التفتت امها عليها وگالت: لج لبنى انتي شدسوين بالظبط ..تگوليلي شيء واخوج شيء ثاني ..شنو الصدوك ..لج بردي گلبي
مسحت دموعها وگالت: اريده يندم على الساعة الي فكر يأذيني بيها ويتركني واكيد ليث محيقصر بهالشيء
گمت انه وصحت: انتي وحدة جذابة وكل الي حجيتيه جذب بس حتى اخوج يأذيه ..ليش تتهمينة هيج اتهام ..حرام عليج
لزمتها امها من شعرها وگالت: لبنى اذا ما حجيتيلي الصدوك والله اني الي حندمج
گالت: تركيني ماما ..ححجيلج ..
گالت: يلا اني اسمع
گعدت وگالت: اني حبيته وهو محبني وگال كل تقربه مني بس حتى ينتقم من ليث لأن سجنه ضلم واخذ هنادي بهاي الطريقة ..بس مگدر يسويلي او يأذيني بشيء واعترفلي هو اخو هنادي وابتعد
و اني مگدرت اتخطئ هالشيء لأن كسر گلبي وجرح كرامتي لهلسبب حبيت ياخذلي ليث بثاري منه وماكو غير هالطريقة
انصدمت امها وضلت تضربها وتگول: لج انتي مو بنتي الي ربيتها ..انتي وحدة متستحي ..لج تتهمينه هيج اتهام بس لأن حجالج الصدوك ومستقلج ..لج انتي شنو من بشر ..ممصدكة انتي بنتي ..وهسة اخوج حيقتله ويدخل السجن بسبب كذبة واحتى لو مقتله حيسجنه وهو بريئ
گومي ..اتصلي بليث بسرعة وگوليله كولشي كذب يلا ..
**
ليث: رجعت اليوم واني ناوي نطلع باجر للبصرة حتى اخلي هنادي تشوف اهلها اكيد مشتاقتلهم ..بس انصدمت بلي سمعته ..لبنى تحجي عن شخص حاول يعتدي عليها ..والي صدمني اكثر هو هيثم ..انجنيت ممصدك هو عندة جرئه يجي ويحاول يأذي اختي
والله الا اندمك يا هيثم
رحت دورت بكل مكان توقعته بس مجان موجود شلون غلطت هاي الغلطة ومسألتها عن العنوان بس الي سمعته مخله عقل براسي
وين تروح عني يا ليث حلگاك وساعتها محيخلصك مني احد
صار نص الليل وملگيت شيء عنه رجعت للبيت واني اعصابي تلفانة
دخلت لگيت ماما وبابا بالصالة بس لبنى وهنادي لا
گلت: مساء الخير
بابا: مساء النور ابني وين جنت؟ ..تأخرت بالرجعة اليوم ..يعني بس لا رجعت لسوالفك المكسرة اعتقدت زواجك عقلك
گعدت وگلت: لا تخاف بابا مجنت بالنوادي اني جنت اريد...
خزرتني ماما وأشرت براسها بلا ..عرفت همه ما گايلين لبابا اي شيء وهالموضوع عصبني اكثر وگلت: جنت طالع ويه مروان ..وهسة تصبحون على خير لأن اني تعبان
گالوا: وانته من أهل الخير
وگفت عالدرج وگلت: ماما لبنى نايمة لو گاعدة لأن اني جايبلها هدية
ماما: مدري حبيبي بس هي تعبانة اليوم ويمكن نامت
طلعت وسمعت بابا يگللها: اسراء شديصير اشو ليث مو على بعضه اليوم؟ !
ولبنى من رجعت لحد الأن مشفتها ليش؟ !
صاير شيء واني ما اعرف؟ !
گالت: لا حبيبي كولشي مصاير بس لبنى اليوم تعبانة شوية ..تعرف مشكلة راس الشهر
هزلها براسه بس بداخله ممقتنع
**
هنادي: بعد ماعرفت جذبت لبنى تمنيت اعاركها واندمها على اتهامها لهيثم بس امها ماقصرت وياها من يوم الي دخلت بيه بيتهم أول مرة اشوفها تضربها وهيج تعصب منها
ومن ما رضت تتصل بليث طيحتلها حظها وانطتها فرصة لحد باجر اذا ما گالت الصدك راح تگل لأبوها عنها
وطلبت مني ما احجي ولا اخلي ليث يعرف لازم يعرف منها هي..بس ما أگدر ..لازم احجي لأن الله يعلم ليث شراح يسوي بهيثم ..أكيد راح يأذي وبسبب شنو جذبة؟ !
وية ما انه جاي افكر سمعت صوته وهو يدگ الباب على لبنى فتحت الباب شوية وردت اسمع شراح يگول ياربي كون هيثم بخير ومامسويله شيء لأن ماراح اتحمل يصيرله شيء من وراي
ما قبلت لبنى تفتحه ولا جاوبته بشيء سمعت صوت عمو يگله: اتركها بابا لبونة تعبانة اليوم ..باجر احجي وياها
عصب ليث بس مبين الهم هالشيء وبعد وتقدم عالغرفة انه ركضت بسرعة سديت الباب وگعدت عالجرباية
دفع الباب حيل رجف گلبي قفله واتقدم وگال: تعاي هنادي ..
بلعت ريگي خايفة وگمت وانه ارجف من داخلي گلت: ها
صاح صوت كمزني: وجعا ..انتي جنتي تعرفين بأخوج هنا وما گتيلي شلووون؟ ؟..ومن يمته؟ ! احجي ..ولا تضمين اي شيء ..مفهوووم
گلت: انه كلشي ما اعرف والله اصلآ ما دريت بيه موجود الا لمن گالت لبنى...
لزمني من شعري وسحبني اله وگال: لعد شلوون ؟! فهميني
لزمت ايده وگلت: ليث انته شبيك انه اصلآ تلفون ما عندي شلون راح اتواصل وياه واعرف هو هنا؟ !
ولو اعرف جان حبيت اشوفه واطمن عليه واسأل عن اهلي
جرني اقوة وصحت ..گال: لج بأحلامج هو حيدخل هالبيت لأن حكسر رجليه قبلها ..شلون يتجرئ ويتعدى على اختي
ودفعني عنه حيل
وكفت وصحت: اخوي بريئ وما مسوي اي شيء انته ضلمته بالأول وسجنته وتعرف هو مو حرامي وهسة تريد تعيدها واختك جذابة ..هي جذبت عليك واتهمت اخوي بشيء مستحيل يفكر بيه اصلآ لأن هيـ....
ماكملت كلامي بسبب الراشدي الي صفرلي ذاني وطيحني بالگاع
وصاح: اسكتي مريد اسمع منج ولا كلمة.. لج انتي شلون تتجرئين تتهمين اختي وتگولين عنها كذابة
وهذا اخوج الكو... الا ابجيه على زمانه واخليه يمشي ويتلفت من گد الخوف
بس خل يطلع الصبح واحصل عنوانه ..واذا سمعتج حجيتي بأخوج لو دافعتي عنه متلومين الا روحج وحتشوفي
عافني وراح خذه ملابسه ودخل للحمام
خليت ايدي على خدي وبجيت بحرگة وانه ادعي بگلبي ليث ما يلگه هيثم ولا يشوفه لأن مبين ناويله على شيء كلش جبير ..الله لا يوفقج لبنى ليش هيج جذبتي مثل هالجذبة عليه ..وهو ما مأذيج بشيء ..حسبي الله ونعم الوكيل بيج يا حقيرة
شوية وطلع هو لابس تراك رياضي
باوع الي وانه خليت عيوني بالگاع وبجيت اقوة عافني هو وطلع
ضليت بمكاني خايفة واندعي ما ادري شنو راح يصير باجر وهيثم شراح يصيرله
وما حسيت على روحي من خذتني النومة ونمت بدون فراش ولا اي شيء
ليث: جانت اصعب ليلة عليه من جهة هيثم الي معرفت مكانة ومن جهة اختي الي خايف ليكون ما گايلتلي كولشي وبعد عدها كلام؟
والي محيرني اكثر ماما ليش متريد بابا يعرف ..
معرفت شنو المغزى من هالشيء؟ !
وهنادي ضوجتني اكثر من ادافع لأخوها وتگول لبنى وحدة كذابة ..مصدك هالشيء لأن اني اعرف لبنى وهي متسويها
طلعت من الغرفة حتى مطلع اعصابي عليها شربت شكم جكارة ورجعت جانت الساعة ب2 لگيت الضوة مشتعل وهي نايمة عالأرض بدون لا غطى ولا مخده
حاولت ما اهتم ورحت گعدت وباوع الها مجان لازم اضربها ..بس هي استفزتني
مگدرت ارتاح رحت الها شلتها وخليتها يمي على الفراش
مسحت على خدها وبسته : اني اسف هنودة ..بس انتي عصبتيني ..يلا بعد متنعاد
حظنتها ونمت
هنادي : گعدت الصبح لگيت روحي عالجرباية وابحدي ..اتذكرت البارحة انه نمت بالگاع شلون اجيت هنا؟ !..معقولة گعدت تالي الليل ونمت هنا؟
اتذكرت تهديد ليث البارحة وخفت
كمت عالسريع دخلت الحمام غسلت وغيرت ملابسي ونزلت بسرعة وانه اندعي لهيثم
ولگيتهم گاعدين عالريوگ كلهم حتى لبنى صح مبين وجها مصفر وعيونها مورمة بس الواضح ما تريد عمو يحس على شيء
اجيت وگلت: صباح الخير
ردوا عليه عمو وخالة وليث ولبنى جنهم ما سمعوني
گعدت يم ليث وانه خايفة وبالي مشوش حتى الأكل ما اشتهي وهمة ياگلون بسكتة ولا جنه صاير شيء
گال عمو: عمو هنادي ليش مجاي تاكلين؟ !
گلت: هاا..لا عمو ..جاي أكل..بس شوية مجاي اشتهي
هو باوع على خالة وابتسم
وهي ابتسمتله وگالت: اي ليش لا حبيبي ..ياريت
رفع ليث تك حاجب وأشرلهم بمعنى شنو
ضحك عمو وگال: اي ليوثي هيج وتجيبلنه ننو صغير يملي علينا البيت ..هالشيء صدوك حلم يتحقق
هو شرگ بالعصير وگال: شنووو
عمو: شنو هو الشنو ليث اي غير نريد نشوف جهالك ليمته بعد؟ !
گال: بعد وقت بابا مو وقته هالكلام
خالة: لا ابني ليش هيج تگول شمنتضرين لعد ليوثي راح يصرلكم اكثر من ستة اشهر
گال: تركوا هالموضوع هسة ..لبنى بعد الريوگ اريد احجي وياج مفهووم
أشرت هي براسها وما گالت شيء
شوية وندك الباب
راحت ام وسام فتحته ..شوية ودخلت وهي تگول: استاذ سامر ..اكو ولد شاب بالباب ووياه اربعة من الشرطة رايدين الأستاذ ليث
انصدمنه كلنا وگاموا عمو وليث عالسريع واحنة وگفنا وراهم وحسيت بگلبي راد يوگف من شفت اخوي هيثم ...
