رواية حكاية ترف الفصل الثالث عشر 13

تَسْأَلُنِي ما الأَصْعَبْ؟

الأَصعَـب أَنْ نُصْبِحَ غُرَبَاءَ 

بَعْدَ سِنِينَ  مِنَ اللقاءات والحب والعشق 

شهم 

بقيت ايام وآني ماطايق لا نفسي ولا اي احد وضلو اهلي بالبيت يتجنبوني لأن دائما عصبي وروحي بخشمي ، وشكم مره أثناء الدوام اتعارك على ابسط شي وحتى الويايه بالدوام رغم همه مايعرفون السبب بحالتي هاي بس نصحوني آخذ اجازه كم يوم بلكي ارتاح واهدأ شويه وفعلا أخذت إجازة يومين وگضيتها نايم بغرفتي وافكر شلون اخلص من هالمشكله الحطيت نفسي بيها ..وبقيت مثل التايه ، امي يوميه تصعد يمي بالغرفه هي هم خطيه ضال بالها على حالتي وهم تريد تعرف على شنو راح استقر بس تسوي نفسها تعزل بالغرفه وتصفط بهدومي وتسألني شلونك وشراح تسوي..بس كل الي گدرت اگوله ما تخابرهم ولا تتصل بيهم وحتى اذا شافت واحد منهم تتحاشا وماتخلي يشوفها يعني مانريد لا نقابل ولا نتصل بأحد منهم ونشوف شلون راح تفض.. وبقينا كل ساعة من هاي الايام تمر علينا وأحنا على نار

امي تگول والله كل ما يدگ التليفون الزم گلبي بيدي لاتكون منى لو مرت أخوها تتصل بيَّ وتريد جواب على الخطبه..وآني هم من يدگ تليفوني اخاف لايكون ثامر المتصل لان احنا آني وياه تبادلنا الارقام بآخر زياره الهم

ومن مرت ثلاث واربع وخمس وست أيام بدون إتصال منهم شويه بدأ الامل يرجعلي وراح أتخلص من هالمشكله لان اگيد أيسو من عدنا لأن ماخابرناهم ولا اعطينا جواب الهم

وصار عندي أمل ارجع حبيبتي وروحي وگلبي ترف وچنت كلش مشتاقلها واريد  أعرف اخبارها  واسمع صوتها  وكلساع الزم الموبايل واطلع رقمها اريد ادگ عليه بس أتراجع بآخر لحظه وأكول هانت هانت شهم ما بقه غير هاليومين تلاثه وتروح الها للبيت وتعتذر الها وتفهمها حقيقة موضوع الخطبة المزيفه واكيد راح تسامح  لان حبنا اقوى من كل شي..

بس الي صار غير كلشي

بعد تقريباً عشر ايام من الرؤية الشرعية وبما أن احنا ماخابر على أهل منى ولا اطينا جواب إذن راح يعتبر الموضوع مرفوض من طرفنا 

لكن بعاشر يوم دگ تليفوني رقم بدون أسم وچنت اعتقد واحد من الدوام أو الأصدقاء ومغير رقمه... بس المفاجأة چانت صوت رجل و

- الو

- الو السلام عليكم 

- وعليكم السلام والرحمة ، تفضل

- العفو شهم مو؟؟؟ 

- اي نعم منو حضرتك 

(بس بديت احس هذا صوت ثامر اخو منى بس گلت يارب يطلع إحساسي غلط)

- وياك ثامر

- العفو يا ثامر

- ثامر عبدالله صديقك بالمنطقة 

هنا آني بعد مابيها مجال لازم أرحب بي وأجر وياه سوالف 

- ها ثامر شلونك صحتك أحوالك.. هذا رقمك ؟؟ مو نفس الرقم المسجل يمي

- الحمدلله احنا زينين ونسأل عنك ... هذا رقمي الثاني وخابرت منه لأن بي رصيد.. اي شلونك العائلة الوالد الوالده شلونهم؟.

- الحمد لله بخير . الوالد شلونه ٠؟؟؟

- والله يا شهم آني كلش محرج ... 

(آني گلت بگلبي اي يا الله بلكي يجي الرفض منهم) بس كمل وگال : 

انت هم مثل اخويه 

(بگلبي يمعود هسه عوف الاخوه على صفحه واحچي الزبدة) 

وهم كمل وگال

انت تعرف الوالد كلش مريض ويريد يطمن على منى قبل مايودع ، وانتو خوش ناس وواحد يطمن على بنته يمكم فأذا عندك نيه تتقدم لخطبة منى ياريت  تستعجل وتقرب الموعد وتكون شاكرين الك وفضلك نشيله على راسنا طول العمر.. 

هنا آني صرت لاأكدر اوافقه بهذا الرأي لان آني اساسا رافض الموضوع ولا اگدر أبلغه برفضي وهمه بهذا الوضع وابوهم موّات وأيامه معدودة... وكل الي گدرت اگوله

- احنا النا الشرف بيكم .. أبلغ العائلة وأشوف شنو رأيهم (يعني ردت اذبها برأس العائلة)..وبلغ سلامي وتحياتي للوالد وان شاءالله صحه وسلامه

مع السلامه 

مع السلامه 

بقيت دقايق أفكر..آني هسه جاي أأملهم بالموافقة ليش مارفضت رأسا اول ما چاب طاري الخطبه وضليت الوم بنفسي على سوء تصرفي وكلساع اگول أو ناهي الموضوع احسن مما يبقى شويه معلق...

حچيت كلشي الصار بالمكالمه لأمي وأبويه وهم چان ردهم مثل ماگلت لو ناهي الموضوع احسن ما يبقى معلق واتفقنا محد يتصل بيهم وحتى اذا اتصلوا بينا ما نفتح الخط بلكي يملون ويكنسلون الموضوع 

مرت يوم ويومين وماكو شي 

بس هذا  الي صار بعدها...

الحجي المريض المّوات ابو ثامر رايح لمكان شغل ابويه   وهناك سائل ومندل  المعرض ومتعرف على ابويه وجدي وعمي لان هو بالحقيقة لاشايفهم ولا يعرفهم سابقا معرف عن نفسه وضال يحچي بتوسل ويه ابويه على الخطبه لان هو أيامه معدودة ويريد يشوف بنته متزوجة ومستقرة حتى يرتاح بگبره مثل ماگال لهم (وللأمانه الرجل چان صحيح مريض وصحيح أيامه معدودة)

وجدي ضال مثل الأطرش بالزفه يريد يعرف شنو الموضوع وعلى ياخطبه واحنا شنو دخلنا 

وابويه حاول يتدارك الموضوع رأساً گال لأبو منى أن شاءالله اليوم نخابركم ونحدد الموعد

طلع الرجال من يمهم بس گوه يمشي وحتى عرض عليه ابويه يوصله لبيتهم بس الرجل رفض وگال يريد يروح يزور ويصلي بالكاظم وبعدين يرجع لبيتهم

جدو طلب توضيح للموضوع ومن ابويه گاله شهم ورط روحه اول شي راد بت هذا الرجال وراحن نسوانه شافنها وهو هم راح شافها النوب گلب وغير رأيه ويگول ماريدها

- جدو ضل متفاجئ وكلساع يگول شهم يريد يخطب بنيه غريبه مو ترف..شنو هذا الحچي.. آني الاعرفه شهم يريد ترف

-  ولأن ابويه ماچان يعرف آني رايد وأحب ترف رأسا گال: 

لا يابه يا ترف اصلا شهم رايد بنيه ثانيه هم غريبه بس مو ترف

جدو ضال مثل المتحير من الجاي يسمعه شنو شهم هيچ متغير وصاير يسوي علاقات ويه البنات

بعدين گال لأبويه خابر شهم وإذا يگدر خلي يجي هنا وافتهم منه الموضوع 

خابرني ابويه وچنت بالدوام 

- الو

- هلا يابه شلونك

- الحمدلله..انت بالدوام 

- اي يابه .. خير..رايد شي

- جدك يريد يشوفك هسه إذا تگدر تجي للمعرض 

- صاير شي..جدي بي شي

- لا كلشي ماصاير وجدك بخير وحتى لايروح بالك لبعيد..ابو منى خطيبتك چان يمنا وحچه ويانه وهسه جدك يريد يفتهم منك شكم شغله 

تمام هسه جاي

عرفت شنو الموضوع الي راح يفتحوه ويايه.. وحضرت اجوبه مناسبة لكل سؤال يواجهوني بي وهم قررت ماافتح موضوع ترف الا اخلص ١٠٠٪ من هاي السالفه

وصلت يمهم ورغم الطريق شويه طول وازدحامات بس چنت كلساع اخابر ابويه وأبلغه وين وصلت...

وصلت للمعرض وسلمت وچانت الوجوه ماتبشر بخير وحتى جدي أصلا مارد السلام بس آني حولت عليه وشبگته وبسته من رأسه وأيده.. گعدنا كلنا آني وجدي وابويه وعمي 

- جدي گال احچيلي شهم شنو موضوع هاي البنيه.. شنو علاقتك بيها.. 

- ما عندي كل علاقة بيها 

- شلون مالك علاقة مو تعرفها وداز امك تشوفها حتى تخطبها 

لا اعرفها ولا داز امي

ضل جدي يتلفت علينا كلنا والظاهر ماجاي يفهم وگال بس بصوت عالي : شنو الموضوع فارس انتو جاي تضحكون عليَّ لو اكو عدكم شي چبير وتريدون تلغمطوه

- ابويه حشاك يابه شنو نضحك عليك ولا اكو شي جاي نلغمط عليه.. ورجع كرر ابويه : كل ما هنالك شهم راد هاي البنيه هي تصير اخت صديقه وشايفها من چانت زغيره وگال الأمه عليها وسعاد ماچذبت خبر رأساً بلا ماتگول النا احنا اهل بيتها راحت شافتها والنوب هو هم راح شافها بس العينتين ( يقصدني) ما عجبتك وتعرف على غير بنيه وبطل من الأولى ويريد الثانية... وجه كلامه الي وأكولها گدام جدك وگدام عمك منى خوش بنيه وأهلها ناس مستورين وسمعتهم طيبه ومن منطقتنا وأكيد راح تطلع حچايه عليها  رادوها بيت ابو شهم ومن وصلت للخطبه راح خطب غيرها

جدو اي اكيد الناس الها الظاهر وراح تعم على سمعتك وسمعت البنيه..الناس راح تگول هو يوميه متعرف على بنيه ويعوفها ويروح الغيرها وهم راح يگولون على البنية وسأل شنو اسمها؟؟ والكل جاوبه منى منى 

وكمل كلامه راح يگولون على منى اكيد شافوا عليها شي وعافوها وماخذوها لأبنهم وانت خومو تبقى  يوميه تنط من وحده الوحدة 

آني طول هذا الوقت مدنگ ورغم ادري بهذا حچيهم كله غلط وماله أساس من الصحه بس چنت ساكت.. ساكت

ابويه يسأل جدو وهسه يابه شنو رايك شنو نسوي

طبعا لابسيني ولا احد سألني آني ابو الآنه شنو رأيك أو شنو راح تسوي لو شنو تريد 

جدو هاي هي اليوم تخابروهم وتبلغوهم على يوم الخميس الجاي تصير الخطبه ومشية الزلم

ويله گوم روح ويه ابوك (يعني شبه طرده) وطول الطريق ويه ابويه آني ساكت وماعرف ليش هاي السلبية الي آني جاي اعيشها.. ليش سكتت ليش ما دافعت عن نفسي ليش ماحچيت عن حقيقة حبي لترف ليش ليش

وصلنا البيتنا وصعدت رأسا الغرفتي وگلت الأمي ماريد احد يگعدني اريد انام

والظاهر أبويه حاچي الأمي الي خابرت أهل منى وبلغتهم على الخميس الجاي تكون الخطبه 

وسوت أخبار عاجلة وبلغت وعزمت الأهل والأصدقاء وبدت تحضر وتشتري مستلزمات الخطبه بمساعدة ام ترف ويوميه نازلات للسوگ ويشترن غراض وحاجات للخطبه وللمهر وبس طلبت مني مره وحده اكون وياها حتى نشتري الحلقات

يوم الاربعاء قبل الخطبة بيوم اتفقت امي ومنى نروح نشتري حلقات حتى نلبسها بالخطبه ورغم رفضي بس چان لازم اروح علمود القياس

رحنا آني وأمي وام ترف بسيارة ابويه ومرينا على بيت منى طلعت هي ومرت أخوها..صعدن بالسيارة وهم طلع ابوها وثامر بالباب تسالمنا وچان الاب كلش مريض وگوه يحچي أو يوگف..الله يشافيه

ولمحت منى وجهها كلش كئيب وملابسها بسيطة بس كلش محتشمه..جبه وربطه ومحنكه.. 

اشترينا حلقات ومرينا على كم محل اشترينا بدله وحذاء وجنطه ومكياج الها طبعا بمساعدة ام ترف لأن هي  ذواقه بهاي الأمور 

وآني اخذت قاط ورباط

ورجعنا بسرعه لان منى ظال بالها على ابوها وآني مالي خلگ لهالسوالف رغم امي سوت نفسها عود تعزمهن نروح نتعشى بمطعم الفلاني لو نروح ناكل كيك وعصير يم حلويات علاني بس چان الجواب الرفض مني ومن منى

ومن وصلناهم لبيتهم امي شالت فلوس مادري شگد واطتها لمرت ثامر عود للصالون وهم فلوس للضيافة مال باچر

يعني چانت امي هي تگضي هاي الشغلات بدون ماأدري اوحتى بدون ما تاخذ رأيي أو تسألني 

واجه يوم الخميس آني لان عسكري دائماً اكون حالق ومزين . لبست ورتبت نفسي ونزلت لگيت الكل متحضر وكلها گامت تهلهل وتصلي على محمد 

بس عيني چانت تدور على ترفه...موجوده لو لا .. اكيد ما موجوده..  متگدر تحضر خطوبتي آني الخسيس النذل الجبان الي ما دافعت عن حبنا..

التمينا كومه سيارات ورحنه لبيت ابو ثامر همه بنفس منطقتنا بس لان الصبات چانت منتشره وسادة أكثر الشوارع والافرع وچان الطريق كله فوت منا واطلع منا 

وصلنا ودخلنا وچان ويانه شيخ حتى يعقد النا بعد اتمام الخطبة 

تمت الخطبه والعقد وگالو هسه لازم تدخل تلبس خطيبتك والي صارت زوجتك تلبسها الحلقة 

طبيت يم النسوان وآني مدنگ وچان المكان هوسه وكل الموجدات لابسات ربطات ومحتشمات بس بنيه گاعده گدامي لابسه بدله گصيره ومطلعه شعرها الاشگر الگصير لمحتها ودرت وجهي عنها بس رأساً رجعت باوعت عليها هاي هاي تـ  ر  ف اي ترف عيونها العسليه مليانه دموع وهذا الثوب اللابسته چانت توصفه الي من چانت بالشمال اشترته وقررنا تلبسه بيوم خطوبتنا..بس ليش گاصه شعرها..آني محلفها ماتگصه .. بسوايتها هاي تريد تحرگ گلبي المجروح وگصت شعرها لو جاي تگلي انت بعد مالك عليّ لا كلمة ولا عهد ولا وعد ..اي حقها كل شي تسوي حقها آني جبان ما استحقها..ضلينا واحد يباوع على الثاني هي بعيونها دموع الالم و آني بعيوني نظرة ندم .امي دغتني بس حتى ارجع انتباهي والبس منى الحلقه 

النوب طلبوا من ابوس منى مع هوسة حبها ولك حبها..بس لا آني ولا منى قبلنا ورفضنا رفض قاطع 

ولكن منظر ترف من بدت تتمايل وتتراقص على جروحي خلاني أصير عصبي وتحلفت بيها الا أطيح حظها هم جايه ترگص بهذا ثوبها وهم گاصه شعرها الي حسيت بسوايتها هاي كأنما  گصت وصله من گلبي 💔❤️‍🩹

الفصل الرابع عشر من هنا