رواية تحت ظل السعف الفصل الثالث عشر بقلم ميار
يلوموني واحسك تكبر بروحي
ويلوموني
وانا بلا شوفتك شينفعن عيوني
يا شوكَي وفرحتي ودنياتي ولوني
وعذابي ولوعتي وشكواي وظنوني
يا خيعونك علي وبيك خيعوني
__♕___
جهاد:: اني رايدج على سنة الله ورسوله تقبلين تتزوجيني
ريام
-انصدمت ورجفه مشت بكل جسمي ما اعرف شحجي
تفاجئت منه احس وجهي بخ نار من المستحاه التفتت
اريد ارجع للبيت وهو مشى وكف گبالي حط ايده كدامي
جهاد:: اصبري ريام افهمج لا ترحين شوفي وراية ابو الحسنين ما قصدج احطج بهيج موقف وردت اطلبج
من خالي محمد بس ما ردت احطج تحت الامر الواقع
وتنحرجين من خالي اسمعيني والله وغلاة خالي خالد
يا نيتي وياج بيضه وصافيه يشهد الله علي من يوم الي
شفتج اهناي واني كل الي اريده اساعدج ريام انتي عزيزه
عليّ و اخاف عليج لان انتي تخصيني وما اريد اشوفج متأذيه
انا حاسبج وحده من اهلي
ريام:: لعد ليش تريد تتزوجني اذا حاسبني اختك؟
-اختي شنو يعني هذا الي الله كدرج عليه من اهلي حاسبج
من اهلي مو اختي ولا يوم شفتج اخت اني الي بداخلي
الج اكبر من هاي الامور اكبر من صداقه اكبر من گرابه
لا انا شايفج دنيا وسعاده وحياة ريام انا من شفت نفسي
ما اكدر على مشاعري جيت وكفت گبالج والله مو قصدي
استغلج لا والله بس كل الي اريده احجي وياج عن الي بگلبي الج وانا مو دربي التمعشك وشوفتج بالختلات لا
انا اريد اتقدملج وجدام الاوادم كلها بس الي وكفني اليوم
جدامج خوفي من رفضج ولا اريدج تنجبرين على شي اذا
احاجي خالي توافقين ونعقد وره رمضان نسوي العرس
ريام:: احس دكات گلبي سمعها ما اعرف شحجي ولا
اعرف مشاعري شنو احس اريد ابجي رفعت راسي وصارت
عيني بعينه وضوه البلاجكتور علينه توتر وارتباك كتله
-جهاد اريد اروح عفية
جهاد:: براحتج يابه روحي
-درت وجهي وتوه امشي وصاحني التفتت عليه ابتسم وتقرب بسدي وحتى هو متوتر بس مسيطر على نفسه
دنكت وخلي ايده بشعر ورجع يفرك ايد بيد يلا رفع عينه و ورفع ايد دحكت ورقه اشرلي اخذها ردت امشي جان يگول
جهاد:: احبج احمم انا عاشكج ريام
ريام:: فتحت عيوني يمه گلبي عفته وركضت للبيت ما اعرف
شلون وصلت وجاعصه الورقه بيدي دخلت للحمام وحيلي
يرجف كعدت على التخته ايدي يرجفن وما اعرف ليش دموعي تنزل حطيتها بحضني ومسحت عيوني وفتحتها
كاتب
ما اعرف اكتب سوالف حب وغزل ولا عرفت اكتب
رساله اعتراف الي يومين اكتب وارجع اشكها ريام
گبل سته اسنين يوم جيت ولكيتج تلعبين باب الحوش
بوقتها عمرج ما يتجاوز 12لو 13سنه من تلگيتيني فرحتج وابتسامتج ما تروح من بالي جنت احب اتعارك وياج بس حتى احجي وياج جنت اسولف لحارث وعرفني وجان يضحك عليه يگول تنتظرها تكبر
واني اتحاده انتظرج ويوم عن يوم تدخلين لگلبي اكثر
بس مشاعري وحبي الج نظيفه ما يوم دحك عليج بنضره مو زينه وره وفاة خالي صرت افتر من ديره
لديره حتى الگاج فرات والكل جان مصدكين موتج الا
گلبي بارد گلبي يكول عايشه وفعلاً الحمدلله رجعتي
ورجعتي حساسي وحبي وياج صرت ادور عذر حتى المح
طيفج واتعذر بشغلة وسالفه حتى تجين واحجي وياج
الكلام جثير اذا تكرمتي ولطفتي بگلبي ووافقتي جدامنه
العمر كله احجيلج عن حبي الج بس كل الي اريد اكلج عنه احبج واعشكج ورايد اكمل نص ديني وياج عاشكج
-حضنت الورقه واضحك ويا روحي ما اعرف شوكت
صارت هل مشاعر وشوكت حبيته غسلت وجهي
ورجعت لفراشي غطيت راسي واني احير شسوي
ساعه ادفر البطانيه ساعه اضم وجهي بأيده لو احضن
المخده غمضت عيوني وكلامه يرن براسي نمت اول مره
فرحانه بهذا الشكل فرحه ما انطيها لاحد نمت على أمل جديد
فاطمه
-واكفه اسوي بالريوك الجو توه صبح بين ما التمو اهلي
وكعدنه نتريك عيني على جهاد وجهه مرتاح وماكو جگاره
من الصبح دحك على ابوي حتى ابوي عيني على جهاد
وانرسمت الضحكه على وجه ابوي كملنه الريوك بعدنه
ما شلنه الصينيه وجهاد اشرلي اكعد كعدت والكل عينه
عليه ننتظر نعرف شيريد يحجي جهاد وصدمنه من كال
جهاد:: يابه اني اريد اتزوج
-تفاجئنه والكل فرح ومعاذ عبالك جان يدري لان اكثر
واحد فرح احنه بين المصدومين ما مصدكين وامي
ما مصدكه تحبب بي وابوي حط ايده على جفته وگاله
أحمد:: انت بس اشر وامك تخطبلك خيرة البنات
يا فرحتي بيك يا بويه ما انطيها لاحد واشوفك عريس
هذا يوم المنى عجل شريد من الدنيا غير اشوفكم مستقرين وفرحانين كول بويه من يابيت امك تروح
تشوفلك ابنيه تناسبك وتناسبنه شنو رائيك بنات عمك.......
جهاد:: يابه ما يحتاج انا حاط بالي بنت وگلبي هاويها
ابتسام: اي خير يمه بس كون من عدنه مو غريبه
-لا يمه مو غريبه انا اريد بنت خالي خالد ريام
احمد:: شنوووووو
فاطمه: لا جهاد اليوم ناوي علينه صدمت ابوي وامي
من كال على ريام وكف ابوي و ملامحه الي جانت فرح
انگلبت عصبيه وكف گبال جهاد ورفع ايده وگاله
احمد:: شوف تشيل هاي السالفة من بالك تريد زواج
امك تروح وتخطبلك مين ما تريد بس هاي البنت ممنوع
جهاد:: اني رايدها يابه ولو هي لو ما اتزوج وحطو
ابالكم تخطبوها الي خيراً على خير ما تخطبوها احلمو
اتزوج غيرها ويا هو الي يمشي عليها اني چتاله لو يصير
واحد من ولد عمامها هذا مو فرات الي ماكو بغلاته هم
اذا حط باله يمها اني جتاله وبكيفك بعد كتلك رايدها
احمد:: جهاااااد تعال ولك شعندك ويا البنيه شنو البينك
وبينها شني قصتك واكف وتهدد ابوك من وره حررمه
جهاد:: لا حشا اهددك يابه بس انا تعرفني صريح وكتلك
البنيه انا رايدها والي بيني وبينها بس اني اعرفه ولا تسوولي
قصه ما قصه يابه كتلك البنت انا احبها ورايدها حالي حالكم
يوم حبيتو وكفتو بوجه الكل واخذتو الي تردونه من وصلت
يمي صار الحب حرام يابه انت مريت بالي جاي امر بي ومثل
ما وكف ابوك وما يحتاج اذكره لان ما تحب طاريه وياك أريدك تكف وياي هاي اول مره افكر بنفسي اول مره اختار
سعادتي ليش تصيرون ضدي ما اكسر كلمتك بس لا انت
تكسر گلبي وخاطري يابه وغلاتك رايدها نفسي بيها
احمد:: بنت خالد جهاد بنت خالد ادري وين شفتها وردتها
ما ظل بناات ما ظل انت ليش تحب المشاكل هاي وراها
مشاكل وابن عمها رايدها يعني لو اطخ نخله براسك جاسم
ما ينطيها
جهاد:: ههههه واني خايف من جاسم بكيفكم بعد بس وحك
راية قالع باب خيبر اذا ما اسويها مگصبه ما اتسمى جهاد
-جهاااااد
فاطمه:: ابوي اعصابه نار وامي تهدي بي جان اكو كلاص
على الميز وابوي من عصبيته شال راد يضربه بالحايط
جيه براس جهاد صرخنه كلنه وابوي بذيج العصبيه انتبه
وركض على جهاد يريد بس يشوفون راسه ما يخليها
معاذ:: هاي شبيك بس خلي اشوف راسك ولك
احمد:: شو يابه بس اشوف راسك عمت عيني عليك وليدي
ولك معاذ راسه مفتوح تعال يابه خلي اخذك للطبيب
-جهاد يريدهم بس يحلونه تالي دفع الولد وسحب شماغه
من الكاع ولف راسه وابوي بس يريد يلزمه بس عناد جهاد بعد دار عليهم وجهه صار كله دم وهو يمسح الدم ويضحك
جهاد:: ههههه هاي كلها بس لان ردت اتزوج عمي ما اريد
اني غير عن البقيه هاي مو تردون انسى واعيش عمي بعدني
ما حجيت وكتلكم احب سويتها هلـ هوسه هاي هي بطلت
-وكف گبال ابوي واول مره اشوف جهاد هيج مهضوم من ابوي
جهاد:: لا تزعل يابه ردت انسى واعيش وطلعت عيشتي ما تناسبكم يابه اني روحي تعلقت بيها رايدها بس مو اني
الي امشي كلمتي واكسر كلمتك هاي هي سالفتها تنسد
وخليها تروح بفالها بس لابن حمدان على جثتي بس لا لغيره
ما اكف بقسمتها من رخصتكم اروح اغسل وجهي واطلع
فاطمه:: طلع جهاد ادحك عليه من الشباك غسل من
الحوض وطلع والولد وراه وهو بعده دمه يجري جديتي
ظلت تحجي على ابوي عكس امي الي وكفت وتقنع ابوي ما يوافق وتالي جديتي صاحت بيهم وسكتتهم وبدت تحجي
فرحه:: عمت عينكم ولك احمد ادمي ابنك بس لان راد
بنت خاله نسيتت نسيت ولك شلون ابوها وكف بوجه الكل
وانطاك اخته مو كتلت روحك على ابتسام وعمك دك رجله
والله لو ما خالد فلا ينطيك اسنين عمره جابها يشتغل ويصرف عليج يا ناكرة الجميل ولج مو دللج دلال والله بالوصف يشتغل ويذب بحلكج وحلك جهالج ويوم خلف
سلام ما تسلمين على بنته كافي غرور كافي ولج الي مثلج
هسه تشيل بنته بالصلاوات حسافه هذا خالد يبتسام خالد
ولج والله الي راحلها هيج اخ اخخ شحجي بس عمت عين الدنيا عليك يا خالد يايمه وانت ظل ظل لحد ما تخسر ابنك اه من امده هيج
اعقول شايلينه شوف وتكولون ليش متعلق بخالد من وراكم
-بقى ابوي ساكت وامي ما عجبها الحجي عافتنه وطبت للغرفه وجديتي استغلت الموقف وتقنع بابوي ودخل معاذ
وظلو يقنعون بابوي وابوي واضح اقتنع خاصه من معاذ كاله
معاذ:: يابه بنت اخوك وشالت اغراض البيت كله واني ابيع بيتي
لجهاد وهو يأثثه منا للعيد دخلي نخطبها لا تكسر خاطره
احمد: وينه هسه
معاذ:: كوه قنعه فرات وخالي محمد راحو لبيت فرات
حتى يخيط راسه لا يظل بالك جرحه مو حيل غميج
احمد: هاي هي بيتك لجهاد اني اليوم احاجي محمد
جاسم مالي حجي ويا اذا البنيه رضت بجهاد الخميس
نخطبله خوش واذا وافقو اليوم نگطعلهم مهر والخميس
سوو حفله هذا اخوكم الجبير اني هسه أذيته لا انوب انتو
معاذ:: بعد روحي يا يابه انت تأمر جيب راسك احبه
فاطمه:: كلنه فرحنه بعد ذيج الهوسه جديتي هلهلت
وعلى صوتها طلعت امي صفنت تريد تعرف شنو بس
ابوي اشرلها تسكت اخذها وطبو لغرفتهم كمنا نشتغل
وطب زياد يهز جتف ويصفك وحروث ابن معاذ يصفگله
زياد:: هلا بسورها ونورها هلا بوجه الخير هلا بتؤم الزين
ولججج تباررك تعالي انتي ومروى گابلني عدنه عرررس
-هذول ما صدكو طلع ابوي وشافهم يتمركصون ضحك
جان امبدل ولابس عگال عرفته راح لبيت خالي محمد
تبارك:: زياد عليك الله روح ويا ابوي حتى تسولفنه شيصير
زياد:: مو اني نسرين اموت على السوالف هاي طاعنه بيج
مروى:: اووو زياد يلا الحك ابوي راح وخلاك اركض
فاطمه:: طلع يركض واحنه نضحك عليه وبداخلي ادعي
ما يتفشلون وتوافق ريام وتكمل فرحة جهاد بيها
ريتاج
واكف يم امي جاي تطبخ الغده وعيني على ريام شو وجهه
يضحك اول مره اشوفه صدك مرتاحه هي واكفه تسولف
لامي على ايام ابوها ويمكن هذا السبب تضحك وفرحانه
اندك الباب واني طلعت وامي ظلت تحجي عليه اريد اشوف
منو صار بوجهي حسين حط ايده على وجهي ودفعني
حسين:: وينن موليه اني افتح امشي انطمي
-غميته من راح فتح باب مضيفنا الخارجي وسد الباب الي على بيت ظلت اغلط عليه وكفت من الشباك شفت خالي
احمد وابن الغثيث زياد وياه اسمعه يسأل على ابوي
حسين: توه جيه من يم الولد هسه اصيحه الك خالي
-طلع حسين شافني واكفه يم الشباك سحبني من ثوبي
للبيت وراح صاح ابوي وطلع ابوي مستعجل وحسين
وراه غير نفتهم وامي ولا اهتمت ورباب هاي ما عدها
فضول وريام تثرم بالزلاطه غافلتهن وركضت وتوه حامد
يريد يطب جلبت بي احلفه يفتح شويه من الباب اسمعهم
حامد:: ما تنجبين والله اذا شافج ابوي كسر راسج
ريتاج:: رفعتله حجابي وكتله واذا حلفتك بداعج مروى
وهو فتح عيونه متفاجئ وسحلني من ثوبي بس اريده يحلني
حامد:: ولج شنو هلحجي شو صايره فد نوب سخيفه
-عوفني بداعتهم ما احجي بعد بس عوفني حل ثوبي
وضربني راشدي خفيف جلبت بيده اتوسل بي
عليك الله خلي الباب بي فتحه اسمع شيحجون
حامد: ولج راح يكتلج فضولج يوم نلگاج فاطسه من الفضول
-اي اي ميخالف بس روح خلصو سوالف واني ما افتهمت
شحجو غمني وراح كعدت بسد الباب ما اشوفهم بس اسمعهم وما افتهمت ابو ليش يعاتب بخالي الا من گاله
محمد؛؛ يعني فاتح راسه من وره هيج سالفه اي خما
جهاد جاهل تره جهاد راح يدخل الـ٣٠ وهسه جاي تريدني
انطيها الكم لا يابه ابنيتي غاليه عليه ما تردوها عليش تطلوبنها وهذا ابنك وفاتح راسه باجر بنتي شتسوون بيها
احمد:: محمد لا تخبط اسأل البنيه ان رضت بجهاد خلي
نعقدلهم ابني رايدها وشاريها ولا تخاف تكعد بيت وحدها
وييوم تجي تشكي منا حكك تاخذه من هل رگبه هاا شكلت
محمد:: وجاسم ما يصير ما ناخذ رأيه نلتم بالليل واندز على
حاتم اذا وافقت البنيه يعقدلهم ونحدد المهر والعرس
احمد:: هاي هي يابه الله يقدم الي بي خير مرخصتكم
محمد:: لا والله ما تكوم تغده وراها اخذ راحتك
-لا تعذرني والله گلبي نار اروح اشوف جهاد غير مره ان شاء الله وغداكم واصل يا الله من رخصتكم نتلاگه بالليل
حامد:: تنورنا خالي البيت بيتكم كل الهلا بيكم بأي وكت
ريتاج:: عزااا ما افتهمت خالي جيه علمود منو منه ركضت
للبيت گبل ما يطلع ابوي وبس طب ابوي واني غير كعدت على
جكجاكه اريد بس اعرف السالفه تغدينه وعيني على حلك
ابوي بس اريده يحجي شلنه الغده وابوي صاح على ريام
محمد:: بابا ريام جيبي الجاي والحكينه بغرفتنا
ريام:: اي عموو جايه
ريتاج:: العببب يعني ريام اخذت الجاي واني بس سدت
الباب ركضت اتسمع ورباب تحجي عليه ما اهتميت
حطيت راسه على الباب اتسمع عليهم سمعته يكوللها
محمد:: بابا ريام الزواج سنة الحياة والله يا بنتي لو بيدي
ما انطي وحده منجن بس بعد هاي حياتكم ريام عمج
احمد اليوم جيه وحاجاني رايدج لابنه جهاد وجهاد خوش
رجال وموظف وصاحب اخلاق والناس تحلف براسه ما عايزه شي وعمج جاسم هم گالي على ابن حمدان وبكيفج بابا يا هو تقتنعين بي اني وياج وترفضينهم اثنينهم هذا بيتج
وشحد الي يحاجيج بس بابا ريام كل اب يريد يشوف بناته
و ولده مستقرين واني وعمتج ما دايمين الكم واريد أمن
عليج وعلى خواتج شوفي وفكري زين والي تختارينه اني وياج منا لوره العشا يجي عمج احمد وعمج جاسم لان
عمج جاسم ناوي ينطيج لفراس وبعد ما گايليله على جهاد
امنه:: يااا دخلوها تفكر يا ابو وسام شتلحك تفكر زين
محمد:: شسوي هذا جاسم ما ينطي مجال وتعرفينه
ما ياخذ راي بنت واني هاي جدامج بابا والله اني مقتنع بجهاد خوش ولد وأمن عليج يمه فراس شعرف عنه وتره
احمد كال بيتها وحدها جهاد ماخذ بيت اخو معاذ مشتري
- شو سكتو اريد اسمع صوتهم شويه يلا حجت ريام
ريام:: ما يحتاج افكر عمو اني فراس لو اموت ما اخذه
وجهاد مازالك مقتنع بي اني مقتنعه شتفصل اني البس
محمد:: ههههه هاي ابنية خالد تعالي يبعد عمج والله والنعم منج وغلاتج عبالج اطلعج هيج والله اذا ما اخلي
يسويلج عرس تسولف بي القريه ما انطيج يلا بابا روحي يم خواتج
ريتاج:: انهزمت گبل لا تفتح الباب ظلت افتر. بالغرفة
ما جتي طلعت لكيت امي لازمته بهلسوالف والنصايح
وكفت يمهن سويت نفسي كل شي ما ادري سألتهن شكوو
امنه:؛ يمه خالج احمد مشى على ريام لجهاد وابوج انطاه
-صدكك الله خوش اخبار الف مبررروك يروح روحي
ريام:: الله يباركلج يوم نخلص منج حبيبتي
رباب: امين
ريتاج:: عوجت حلكي وعفتهن ورحت اكل ما شبعت
نفسي من وره الفضول بس والله فرحت لريام ولجهاد
خاب بس يخوف هاي ما شايفته من يتعصب يلا يجوز
يكوم هو يخاف على مشاعرها ما يتعصب العبب راح
يصيرن عرسين يعني اربع فساتين وركص للصبح
تبارك
للمغرب وجهاد ماكو ابوي دز زياد عليه لگاه رايح للمدينه
ويا فرات وگبل العشه يلا طب جنه بالمطبخ وفاطمه بس
شافته ركضت شبكتها وتبجي وهو يضحك عليها حب راسها
وطب واني سلمت عليه وانطيته راسي ضربني وفات ما يحترمني مشيت وراه ابوي جان كاعد على القنفه دنك جهاد
وباس جديتي ادحك ابوي عينه عليه وجهه مختنك وكف يمه
جهاد وحب راس ابوي جره ابوي لحضنه وما كدر يحجي كلنه ندري ابوي شكد يحب جهاد ومتعلق بي وجهاد يحبب بيد ابوي
جهاد:: عذرني يابه اني اليوم قللت الادب وياك وانت
تدري عندي خيط خبال من اتعصب ما قصدي اعذرني
احمد:: ولك الضربه بگلبي والله مو براسك وليدي
والله من خوفي عليك ما ردتها الك اموت وراك اني
لو صار عليك شي وانت تدري خالك حمدان شكد شراني
جهاد:؛ هاي هي يابه شتكول تم وتأمر احسبها انتهت
-ابتسم ابوي وطبطب على جتف جهاد وگاله
احمد:: هي انتهت والبنت صارت الك وهسه
وره ما نتعشه اريدك تكشخ ورانه طلعه حضر روحك
-جهاد ما مفتهم شي ظل يدحك بالوجوه وابوي
ضحك على رد فعله وجره شبكه وحبه براسه
جهاد:: شسالفه يابه ما افتهمتك تره صطرتني
معاذ:: اني افهمك ابوك وره ما طلعت راح وحاجه
خالي محمد وطلب ريام الك وهسه گبل ما تجي
ردولنه خبر وره العشه يعقدلكم الف مبروك عريسنا
زياد: كللللوووووووش عريسنا جلكيته حامض حلو باكيته
تبارك:: سوده علي صدمو صدمه كوه انتبه لروحه وحب ايد ابوي والولد ما انطو مجال معاذ يصفك ويغني وزياد يهلهل وجديتي من يمها كل شويه تهلهل انحرج منهم
عافهم وكام لغرفته وابوي يضحك عليه فرحته امبين بوجه
صبينه العشه وبس تعشو ابوي راح يبدل واحنه كلنه هجمنه على غرفة جهاد لكيناه لابس دشداشه لون كحلي
معاذ:: كل عقلك البس دشداشه بيضه فاطمة من يمج
انطيني ذيج الدشداشة البيضه والشماغ انت عريس اليوم
- جهاد كضاها بس يوزع ابتساماات حتى ما حجه لبس
دشداشته البيضه وشماغه الاحمر وعقاله ولبس الساعه
هو بدون كل شي ملامحه تخبل انوب كشخ طلع امير والله
رش العطر واحنه فوك راسه نهلهل هاي اول فرحه حقيقه
تدخل بيتنا لان اثنيهم غالين سبحان الله گبل يومين تمنيت
ريام تصير جنتنه والله حققلي وراح تصير عروسة جهاد
فاطمه: احمم اكول احنه ما نروح لبيت خالي هم عيب
ما يكولون هسه اهل العريس ماكو واخاف تاخذ على نفسها
عبالها ما راضين بزواجكم وهم نفرح بيكم هاا شتكول جهاد
جهاد:: لا اكفي هسه خلي يمشي كل شي على خير وراها
سوون الي تردنه اني اذا ما اعقد عليها ما ارتاح من حمدان
معاذ:: تتوقع يسوي شي؟
جهاد:: كل شي توقع غدار وجلب اول خطوه خلي ابنه ينهي
هسه گبل شويه اتصل فرات كال ابوي مو حيل مقتنع وهذا خبيث
معاذ:: خوش لا تهم يا اخوي خليك فرحان مادام البنت رضت عليش نهتم يلا امشو تره تأخرنه وانتن بنات عود
بخير وسلامه خلي يعقدون والخميس ابوي كال سوو حفله
تبارك:: اي والله نسوي ونگلب الدنيا هذا عرس جهاد مو حي الله فرحه ما بعدها فرحه بعد روحي هل طول
جهاد:: حبيبات گلبي انتن الله لا يحرمني منكم
مروى:: ولا يحرمنه منك شايف الخير بجاه النبي
جهاد:: بعد روحي خير يصيبكم يلا شباب
تبارك:: طلعو واحنه وكفنا انظف المطبخ وبالنه يمهم
كملنه وكعدنه بالاستقبال فوك الساعتين وما عرفنه
رهمت وعقدو لو لا كاعدين وفجئه صار رمي قوي
وسام
كاعدين بمضيفنا ابوي وخالي احمد وخالي حاتم وابن عمهم سالم هو جبير اخوته واني واخوتي ولد عمي
وننتظر العريس ينور حتى يعقدلهم خالي حاتم لان
هو مُلا دارس شريعه ولل8 ونص يلا نورنا ويا طبته
دخل عمي جاسم فر عباته وسلم عليهم وبقى جهاد
يدحك عليه كامش ضحكته كوه سلمو هو واخوته
وكعد بسد فرات وبدا خالي حاتم بكلامه الطيب
حاتم: اي ابو وسام ولا يهونون الربع اليوم اني واخوي
جيناكم على ابنيتكم ابنية خالد لابنه جهاد وابنه هو ابنكم
مو غريب عليكم والنه العز والفخر ناخذ من عدكم لابنه واحنه ولد عم ما بينه حواجز ان شاء الله والي تأمرون بي
حاضرين
محمد:: كل الهلا بيكم والنه الشرف يا ابو عبدالله والبنيه
بنيتكم كبع واخذ جهاد خوش جهاد ويستاهل مره مثل بنت خالد اني بعد اذن اخونا جاسم بس البنت ابيتي اني ولي امرها وبعد مشاورتها وموافقته اني انطيتكم اذا الله انطاكم
احمد:: والله والنعم منك ابو وسام اخوي الي اعتز بي
وسام:: ادحك الكعده كلها عمي جاسم ذابها على الصامت
ما جنه ندري حايكها من جوه ليجوه ويا ما جاي يتباركون
وابوي راد يكوم ياخذ وكالة البنت دخل عمي حمدان و ولده
سلم من بعيد وكعد بس ابنه غسان افتره على الزلم وسلم
بأدب وهذا حمدان واضح على وجه الشر دحك على جهاد
وعرفناها راح تعلك وجهاد فر السبحه على ايده من حجه وعيون صارت دم من بدا يتشرط حمدان ويدور احگوك
حمدان:: شوف حاتم انت دارس علم وصاحب اخلاق وتدري بأمور الدين اني البنت ربيتها بيتي ويا عيالي
شلون يصير ينطونها بدون علمي وبعدين البنت عدها
ولد عم ادري ماخفتو الله تنطوها بدون علم ولد عمهااا
حاتم:: حمدان سوالفك لا اطگطگهن عليه سالفة الدين لا
تربطها بالعمومه لان لا بالدين مذكور البنت لابن عمها ولا
سالفة النهوه مذكوره ولعلمك النهوه شررعاً حࢪام اذا البنت
ما رضت بأبن عمها دامكم انطيتونه خلو الامور تمشي على خير
وسام:: امور وتمشي على خير وجاسم وحمدان بيها هيهات
الي معجبنه جاسم ما حجه وحمدان يجيبها منا ويلطشها منا وجهاد كوه مصبرينه لا يكوم و ينطي لحمدان فد بوكس بمرتب ظل حمدان يجادل بخالي حاتم و وكف عقلونه من كال
حمدان:: صيحو البنت اهناي گبالي وانا اسألها يجوز تطلع
جابرينها البنت كبرت وانا ادري بيها تريد ابني فراس والله
ما انطيها الا اشوف بنت اخوي اهناي وجدامكم توافق يلا اني ارضى
-نهض فرات هو وعمر واحدهم غادي نار من سوالف حمدان
فرات:: شوف عمي حمدان خليني محترمك شنو تجيب
البنيه بنص المضيف ادخل النسوان ويا الزلم وين صايره
حمدان:: والله اني هذا كلامي يعجبكم خيراً على خير
ما يعجبكم والله اگلبها على روسكم وما خليها تصير
أحمد:: ابو فراس تچفي الشر البنت راضيه لا عبالك
ولدنا قليل شر تره مصبرينهم گوه وعيب عليك هذا الحجي
جاسم:: لا ابو جهاد كلام حمدان بمچانه انا هم وياه
البنت ابنية اخونا والنه حق نشوفها ترضي لا ما مجبوره
واذا ابن عمها رايدها فهو اولى بيها من الغريب
حاتم:: لا يا ابو فرات والله ما هگيتها منك هسه صرنه
غربه وسفه والله عمي انتو ما تردون تنطون وناوي على الخراب بس احنه البنت شارينها اذا ماكو اشكال يصيحوها
نسمع منها ان رادت ابنها وافقت بعد محد اله حگ علينه
ولا شتكولون ابو جهاد و الولد قابل احنه ما نكدر نكاون لو راد حمدان يكاون
جهاد:: نكاون وننعل خير حمدان على خير ولده جاي يريد
ينهي شوف حمدان احمد ربك اليوم فرحان ورايه ابو الحسنين اجي ادفنك انت وابنك الي جاي تزومط بي تجفي شري
حمدان:: وانت وشنوو لا ادب لا اخلاق خالك اني وتنعل بيه
وشني هاي وتحلف شنو طالع عن طريق اهلك
جهاد:؛ هههههههه وليش منو كالك اهلي ما يحلفون بأهل بيت الرسول وبأبن عم الرسول وزوج البتول ما تسوه التراب الي جان يمشي عليه ولا تگلبها انت جاي تريد تعرف
رأي البنت لو تحضر مهر ابن اختك على بنت اخوك
سالم:: جهاااد كافي اكعد خلي نفتهم وانت حمدان ليش
تخليها تصير مو زينه اذا على البنت عمي صيحوها نسمع
منها واذا رضت حلكك ما تفتحه ونعقد وعيونك ادحك
محمد:: وسااام
-أمرني يابه
محمد: امشي انت جيب اخيتك وتعال
وسام: حاضر
ريتاج
كاعدين احنه وامي وننتظر ابوي يجي يكولنه علمود العقد
ريام خجلانه ومتوتره وامي تنصح بيهم وكل شويه تبوسها
جاي نسولف ودخل وسام العصبيه فول تلگته امي تسأل بي
امنه:: هاا يمه خيرك صاير شي
وسام:: كومي خويا ريام البسي عباتج يردونج عمامج
- ادحك ريام رجليها ما شالتها وما افتهمنا وسام على شنو
يحجي وامي ضربته على جتفه حتى يحجي ويفهمها شريدون من ريام وهو صارت عينه على ريام الي ظلت ترجف
صاح عليه فرات طلع وسام واسمعه يكول يريد يشوف ريام
اشرلنه ندخل جوه طبينه لغرفة امي واني فتحت الباب
شويه حتى اسمعهم واشوفهم غير لو نفتهم شصاير وشيردون من ريام كعد فرات مسافه وبدا يحجي ويا ريام
فرات: اسمعيني خويه ريام عمج حمدان وابوي يردون
يسمعون موافقتج وطلبو جدام الكل خيتي انتي خلي
ابالج غير الي انتي ترضين عليه لو على گطع ارگبتي
ما يصير كومي لبسي عبايتج وتعالي ولا تخافين كلنه
وراج اي كلام او اي شي يبدر من حمدان او ولده ما يلوم
الا نفسه احنه وياج بالصح بالغلط وياج اخيتنا رواحنه فدوه
الج يلا يابه كومي لا انطولها شتقررين بكيفج وكلنه وياج
ريتاج:: كامت ريام بدون ما تجاوبه راحت للغرفه ودموعها
تصب دار فرات على امي وكاللها حتى هي هم تروح وياهم
طلعت ريام لابسه العبايه ومتلثمه بشالها وكفت بسد امي
وامي جرت عبايتها وطلعو الولد وهنه وراهم واني ورباب
ظلينه مثل اطرش بالزفه لا بينه نطلع للحوش حتى نسمع
ولا أحد جيه وفهمنه شصاير ظلينه كاعدات وننتظر ريام
ريام
:: دخلنا للمضيف واني عيوني ما رفعتها مستحيه
وخايفه بنفس الوقت حتى جهاد ما لحكت استوعب حبه
وخطوبتنا وافقت بدون نفكير وحتى مشاعري متلخبطه كل الي اريده اخلص من فراس وابوه رفعت عيني من وكف بسدي عمي محمد
حط ايده على جتفي ودرت وجهي الولد وراي واكفين
محمد:: يابه ريام ابنيتي عمامج يردون يسمعون منج
اذا احد جابرج على جهاد كولي بابا انت موافقه على ابن
عمج احمد ولا تخافين ما يصير غير الي تردينه والي يرضيج وهاي اني واخوتج كلنه وياج شتكولين بابا سولفي
سالم:: كولي بويا انتي موافقه راضينه بجهاد لو بأبن عمج
ريام:: درت عيوني على الموجودين ابو جهاد الي ما حط
عينه بعيني وبسده جهاد وزلمه ما عرفته وعلى الجهه الثانيه
حمدان وولده وعمي جاسم ارتباك وخوف درت على ولد
عمامي وكافين بظهري صارت عيني بعين فرات ابتسم يطمني لزمت ايد عمي وسحبت نفس متوتره رفعت راسي وعيني صارت بعين عمي حمدان وهو يخزر بيه درت على عمي محمد وگلتله
-عمو اني موافقه على جهاد......
