رواية تحت ظل السعف الفصل الرابع عشر 14 بقلم ميار

توصيني يا واهس تضحك الدنيا على شفافك

يابو الليل الحلو ليلعب على اجتافك

يابو الشعر الحلو ليلعب على اجتافك

احس روحي تأمن بيك وتخافك

واحسك لغز شنهو انت وشنو اوصافك 

ولا غيرك نبع بالشوكَـ يرويني

___♕__

ريام

-لزمت ايد عمي وسحبت نفس متوتره رفعت راسي وعيني صارت بعين عمي حمدان وهو يخزر بيه ما اجذب خفت بس درت على عمي محمد وگلتله 

-عمو اني موافقه على جهاد

محمد: هههه هذا هو بنيتي ونعم الاختيار 

وهاي سمعتو منها بعد محد اله حگ علينه 

-دحكت على فرات اشرلي اطلع عفت عمي وطلعت 

واني ارجف لكيت عمتي تنتظرني بالباب واصواتهم صارت

عاليه وكفنه على صفحه والبنات جن يمنه نسمع بتهدد عمي حمدان وصوت جهاد وفراس خفنه من صار صوت ضرب تقربت اكثر حتى اسمع زين صرخ بيهم خالي محمد 

اسمع فراس يگوله

فراس:: والله ما ياخذها اني رايدها من زمان هي الي

جهاد:: حلكك اتسده البنت ما تريدك صارت حلالي 

انعل خيرك تجيب طاريها على السانك الزفر يلا ولي

فراس: موو بكيفك مو بكيفكم البنت الي والله ما تاخذها على جثتي وينها صيحووهااا اني اررريدهاا

فرات:: امشي ولكك مو اطيح حظك وين تريد تفوت

عمي اخذ ولدك وتچفي الشر البنت وسمعتو منها

بلا حجي زايد ما الكم حگ بعد يمنه القرار قرارها

حمدان:: يصير خير وانت جهاد ان ما كسرت ظهرك عاتبني يلا امشو مالنه كعده اهناي بس ما انتهت السالفه يصير خير اني وياكم والزمن طويل سهله يجهاد سهله 

-اختفى صوت عمي حمدان وعمتي سحبتني ودخلنه للبيت

كعدت ادحك ايديه يرجفن شويه ودخل عمي محمد صاحني

كمت وكفت بسده وعمتي واكفه تريد تعرف شصار دار عليه

وگال.. 

محمد:: تعالي ريام يابه حتى يعقدلكم امشي وراي وانتي امنه هم تعالي اكفن بسد باب للمضيف بين ما ياخذ موافقتها

ريام:: بعدني بعبايتي وجرتني من ايدي عمتي وطلعنه وره

عمي وكفنه بسد الباب واسمعه بدأ يقره ايات قرانيه

بدأ يسألني چلبت بيد عمتي مستحيه عاد السؤال وعمتي 

تندس بيه حتى اجاوب گوه طلعت مني كلمة موافقه 

وراها سمعت صوت جهاد ينطي موافقته كمل العقد

وصرت حلاله حضنتني عمتي والبنات واني احس بطني تمغصني ركضت للبيت من سمعت صوت عمي محمد 

اجن البنات يمي يضحكن عليه وجفلنا على صوت الطلق

رباب

فرحنه لريام ولجهاد تستاهل ريام شخص يعوضها وان شاء الله جهاد يسعدها ادحك عليه الخدود حمر مستحيه وكاعده عاقله اليوم جنه كاعدين يمها نسولف وره ما عقدو

سمعنا صوت الطلق خفنا كمنا طلعنا نركض عبالنه عمي 

حمدان سوه مشكله بس من اصواتهم عرفه ولدنا واكفين

بابنه وهمه الي رمو الطلق وامي من خوفها ظلت تحجي عليهم لل11كلها راحت وريام من المستحاه لفت راسها ونامت واني وكفت اغسل الستكاين لان اعرف ريتاج تعوفهن للصبح كملت وطلعت سمعت ابوي يسولف هو وامي وكفت اتصنت عليهم واسمعه يسولفون بجهاد وريام

امنه:: الحمدلله أمنت عليها بيد رجال يصونها والله 

مو لان ابن اخوي بس جهاد خوش زلمه راح يسعدها

محمد:: لا امنه مو خايف من جهاد بس خوفي من امه ابتسام شلون رضت بريام وهي سلام ما تسلم عليها انوب احمد حرجني وحدد العرس ثاني يوم العيد

والخميس يريد يعزم اخوته ولد عمامنه ويسون حفله

-دخليهم فرحانين وهم لخاطر بنت اخوك واحسن 

ما اطول اخوتك ما يكعدون راحه يرحون يسوون مشكله خلي ننطيها وبعد ما يكدرون يحجون انت لا تشيل هم وخلي وره عرس جهاد انزف لحسين 

-يصير خير خلي نشوف تالي عرس جهاد والله كريم 

رباب:: رجعت للغرفه لكيت البنات نايمات اخذت موبايل 

امي تطلعت رقم عماد وظليت صافنه بي متردده وادزله

رساله لو لا دزيتله رساله فارغه حتى يعرف اني الي اراسله

سويت الموبايل صامت جفلت من اتصل رفعت راسي

اتأكد من البنات نايمات وكمت لكيت غرفة حسين گبالي

دخلت وسديت الباب وجسمي يرجف فصل ورجع اتصل 

دست على الرد وحطيته على اذني واني احس حتى اختنگت

عماد:: ليش ما تردين؟ 

- ظليت ساكته والعبره خنكتني ادري بي انقهر لان رفضناه

بس مو بيدي شلون افهمه امه ما تريدني ظليت ساكت وبس

صوته من يجر حسره لا اني حجيت ولا هو تالي هو گال

عماد:: رباب اذا اسألج تجاوبيني بصدق 

-امم

-امي هي السبب رفضتيني لو اكو سبب ثاني 

-عماد لا تزعل بس امك ما تريدني وابوي ما يقبل ينطيني

-يعني اذا اقتنع ابوج انتي ترضين رباب اني ما اريد احاجيج

بدون علم اهلج ولا نيتي اضحك عليج اني رايدج اذا على

امي انتظريني ابني بيت بسد فرات ونكعد بي بس لا ترفضيني

من تصدين عينج مني تزرفين گلبي والله اني رايدج واحبج

-ظليت ساكته واحس گلبي دكاته حتى امي سمعته 

عماد:: روحي يروحه وگلبه لعماد والله ما اخليج تصيرين

لغيري انتي بس اصبري عليه بين ما ينتهي عرس جهاد وارجع احاجي فرات وجهاد يقنعون ابوج خوش تسمعيني

-امم 

عماد:: هههههههه خوش لا تحجين هسه يلا يابه الولد

ملتمين خاف ينتبهون عليه شيخلصني احبج في امان الله

رباب:: سديته منه وكمت اكمز فرحانه وما ادري الي

بگلبي حب بس كل الي اريده اعيش وياه احب اشوفه

واحجي وياه طلعت من غرفتة حسين رجعت لفراشي

واني فرحانه دحكت على ريام شو هاي بلا احساس والله 

گلت فلا تنام اليوم توها مخطوبه وصارت امالخ علمودها

وهي بس مشو الزلم لفت راسها ونامت حطيت راسي 

على المخده ونمت وكعدت على صوت امي تحجي علينه

كمت كوه مفتحه تاخرت بنومتي البارحه لكيت ريام تسوي

ريوك وامي تفتر ترزل بينه وبيدها الموبايل تحاجي فاطمه

♡♕

فاطمه:: خابرت عمتي امنه حتى نتفق على حفلة الخطوبه

والتجهيزات اتفقنا العصر نروح للسوك نشتري النيشان

سديته من عمتي ودحكت على امي كاعده ولا يمها ولا تدخلت لا انطت رائيها ولا كالت اروح وياكم انجهز وحتى

جهاد انتبه الصبح عليه انقهرت منها لا باركتله ولا اهتمت

عفت البنات ينظف ويطبخن واني رحت لبيت معاذ بينه 

باب داخلي ما يحتاج اطلع طبيت للبيت لكيت اخوتي

كاعدين زياد بيده ورقه وقلم ويسجل نواقص البيت 

-ياا شباب منو بيكم ياخذنه العصر علمود نشتري نيشان

العروس وهم نشتري غراض للحفلة تره ما بقى غير يومين 

زياد:: اني مشغول 

معاذ:: اني ملتهي اريد اساعد زياد بشغله

-دحكت ما ظل غير جهاد وهو عرفهم ينهزمون منه ما يردون يودونه حط رجل على رجل والجكاره بيده وگال

جهاد:: روحي فطوم زياد يوديكم ما عنده شي معاذ يكمل 

بداله ونتظريني انطيج فلوس شوفي شكد تحتاجين وكوليلي وانتن هم اشترن الي تريدنه لا تتهمين للصرف

-بعد گلبي ما تقصر وان شاء الله الله يتمملكم على خير 

زياد:: اي ليش لا عمي شوراه راح يعرس واحنه نظل بالضيم

معاذ:: توكل خويا جهاد لا تهنيتو مازال زياد حط عينه عليكم

-لا ما اقبلها منكم الا زياد شحلاة عيونه هو اكو احسن منه

زياد:: والله فطوم انتي الوحيده الي تستاهلين الزينه اوديج

واني الممنونه واديج و اودي جنتنا الجديده شعندي غيرج

فاطمه:: فدوة اروحلك ديلا عجل اروح اكمل حتى نطلع من وكت وبعد عندي كومه شغل ومعاذ جهالك يمك البنات مشغولات اليوم ديري بالك عليهم مو تنساهم ويتوصخون

-خوش خوش اني ادير بالي عليهم غير ابوهم روحي انتي

فاطمه:: عفتهم ورجعت للبيت ومخبوصين وللغده 

واحنه نركض بس تغدينا رحت تحظرت خابرت عمتي

رحت حتى اخذ الفلوس من جهاد لكيته بغرفته كاعده وبيده قراصه مال طفله ومشط تعجبت شنو هاي بس 

كلت يجوز مالات فطومه بنت معاذ دخلت وهو بس شافني حطهن جوه المخده جيت يمنه دحكت عليه والله وراه سالفه گتله

-يلا عريسنا وررق ورانه روحه للسوك حتى نزهب عروستك

جهاد:: احم اي ادللو هسه اني اجيبلج روحي انتي اريد ابدل

-هزيت راسي وعفته وطلعت انتظره ربع ساعه اني وزياد واكفين ننتظره وزياد كل شويه يتحجج يريد يفلت واخيرا

طلع لابس ملابس الشغل وكف يمنه انطاني ضرف بيدي

جهاد:فطوم خويا هذا بي الفلوس شكد ما تحتاجين اخذي

لا تهتمين خوش اذا راحت وياجن ريام لا تخلين شي بنفسها

فاطمه:: ههههه من عيوني تدللون انت وريام يلا زياد 

توه نريد نطلع ودخلت عمتي امنه وحدها واستلمها زياد 

زياد:: هاا عمتي شو وحدج بعد تره صارت بنيتنا لا 

ليش ما جبتيها وياج وخطيه اخوي هم يشوف حرمته

امنه: ياا ولكك وين بعد ما صايره حرمته وما عليك 

انت البنيه اني اشتريلها هي تحب ذوقي يلا يمه امشو

زياد:: الله يعينك هسه يطلعون ضيم جاسم بيك ورايتهم

جهاد:: امشيي لكك لا اجي اطيح حظك وديري بالك عليهن

زياد:: لا تخاف عمتي حافظه السوك اكثر من بيتها وداعتهم

فاطمه:: طلعنا وزياد غير جلط عمتي يداهر بيها وصلنا السوك وصدك عمتي اطب من محل وطلع من محل اخذنه الذهب

والنفانيف اختاريت نفوف الخطوبه والباقي على ذوق عمتي

ولچريب المغرب واحنه بالسوك وزياد بس يفتر ورانه وشايل العلاليگ ويدردم ما عولنه نصل السياره هلكنه

صعدنا اني وعمتي وادحك عليها اكو سالفه دارت عليَّ كالت

امنه:: يمه فاطمه اني حازه بخاطري شو امج لا خابرت

لا باركت للبنيه وحتى توقعت هي تجي تشتري النيشان 

فاطمه:: عمه انتي مو تدرين بأمي وضعها ما يعجب لا تهتمين ماكو فرق اني ولا امي وتدلل ريام شنو تريده 

يجي اليمها ولا يظل بالج عمه هي بيتها وحدها وجهاد 

رايدها وداعتج حالها حال خواتي ما اقصر ان شاء الله وياها

امنه:: بعد روحي ادري بيج ما تقصرين وجهاد واعرفه بس

البنيه عبنها يتيمه اخاف عليها ريومه حساسه وبنيه متعوبه

زياد:: لا تهتمين عمه بعيونه ريام صارت وحده من ابنياتنه

فاطمه:: سكتت عمتي ولحد ما وصلنه للبيت نزلناها وزياد

نزل غراضها بس حطهم باب البيت ورجعنه لبيتنه تلگنه

البنات اخذن العلاليك وجديتي تحجن عليهن تريد تشوف

تبارك:: جده هسه اني البسهن وشوفيهن حلوات لولا

فرحه: اموتج تلبسيهن ما يصير يمه تلبسن ملابس العروس تجبسنها وتنجبسن شو فطيم جيبي اشوف

تبارك: انوب علينه ننجبس ادري طرشي يا جده والله 

عليجن سوالف امهات گبل لا صايره ولا دايره انجبس

فرحه: يمه فطوم ما تكومين تجيبيلي هلـ مگروده 

جيبيها اعضها اتوبها من هلـ السان تگول مگص

تبارك:: احبج جده غير اشاقيج شدعوه ما تتحملون

- كعدت اشوفهن. الذهب والملابس اخذتلها محبس وتراجي وفساتين اثنين وباقي الغراض من مكياج

وعطور جديتي تفچهن وادحك عيونه مغوركه وادري بيها شكد فرحانه لجهاد وهي تحب وتعزه لخالي خالد جثير 

مروى: عجل فاطمه شو ما جايبه حلقه شلون يصير 

فاطمه: -جهاد كال هو يشتري الحلقه على ذوقه يلا بنات عوفجن هسه خلي نلم الغراض ونشغل المبي ثري وندبج

مروى:: يلا اني اكوم اجيبه واشغل وانتن لمن الغراض

- رتبنه جنطة النيشان وشغلنا دبجه وكما ندبج فرحانين

دخل ابوي وراه الولد وجهاد وكف يضحك علينه لحد ما

معاذ وزياد جرو وكفنا كلنه نبدج ايدي بيد جهاد ومعاذ

زياد:: يا جماعة الخير اني اسمعكم اغنيه تخليكم ترقصون

معاذ:: اذا اهفك بوكس يخليك تمشي وتهز جتف شتكول

زياد:: لا تقتل المتعه يا عزيزي اسمعن بنات يا خبلات 

فاطمه:: محد خبل غيرك ويلا عاد غير يشغللنه ويفضها

زياد:: اسمعو 

-آخ.. آخ.. آخ..

شكد عزيزة الروح.. بس للزين ما تنعز

اجيتك والگلب بي نار.. لو جاسه الجبل چا فز

أخوك وطبعي طبع دلال.. مو فنجان حتى أنهز" 

شايل غداره واني ابن عماره

كبل الطياره لجفت كدامه

شايل روسيه وام العلويه مرجف هل دنيا

جدي اسمه محمد صيح بالملعب هوس وتكلب

وعونك من تخرب سيف اني مجرب

خليني بجتفك بالخوه محلفك لتعب جفك

اني اتكضاها بالدم اتوضه يتفين حظه

ليعيش اللحظه خل يتلكاها

سمعو بينه وشالو .. شالو شالو شلو

سمعو بينه وشالو .. شالو شالو شلو

جهاد:: تسلم تسلم ابو الزين رحم الله والديك كفيت وفيت

زياد:: مو جاي اغنيلك شبيك عود شوفوني متدين ما اسمع 

اغاني هسه بس تتزوج عاتبني اذا ما خلتك تسمع سويحلي

-هههههههه 

فاطمه:: ادري شمعنى سويحلي والله عليك سوالف زياد 

زياد:: اعجبج ام زياد بالخدمه اني من هل ايد لهلـ يد

فاطمه:: رفعت حاجبي من صاحني ام زياد لا واثق الاخ

اسمي عليه من كعد جهاد وهو وابوي يسولفون ويا 

جديتي بعد ما يقبل نشغل اغاني وره العشه كل وحده راحت على فراشها تمددت وافكر بريام وجهاد وريام والسر البينهم

♕♡♕

ريتاج:-

اليوم خطوبة ريام وامي من الفجر كعدتنه مخبوصه تكول

راح يزفونها مو خطوبه وبس العمام ولو بس لمتنه عشيرة

كملنه شغل وره الغده كل وحده راحت ترتب نفسها وفاطمه جت رتبت ريام وهي حلوه بس مكياج خفيف حطتلها تطلع تخبل وكفت ادحك البيت انترس نسوان الا عماتي ماكو هسه عمتي بلقيس نعرفها ما تجي للقريه

بس عمتي سهام هم ما جت وكفن بسدي مهى ورحاب وگضبناها گصابه بهل ناس

مهى:: شفتي صابرين الوجه يلطم ولا بنات حاكم ياستار منهن ولا احبهن دشوفن شلون يعلجن لعب نفسي 

ريتاج:: وداعتج غير هسه ماتن قهر اكول عوفنه هسه 

شو هذن بنات خالي فاهيات لا اغنيه لا هلهوله لا ساجده عبيد ادري انظل نتصفن بالوجوه لو ما اخاف من امي الا 

اروح اني اشغل بس وصتني اني اخت العروس الا يصيحني يلا اركص ادحك رحاب ما عاحبها كلامنه وجهه مغضب 

رحاب:: اكول ريتاج هم كالو شوكت ياخذونها وشكد مهرها

- وره رمضان عرسهم بس المهر ما ادري والله بس حالها

حالج وحال ابنياتنه ما تعبر 3 ملايين بس انتي شبيج ضايجه

رحاب:: مو ضايجه بس هيج حبيت اسأل بيها شي 

-لا مرت اخوي ما بيها شي يلا امشن يم البنات نكف عفتهن ورحت يم تبارك لازمه المبي ثري تريد تشغله ندستها بقوه

تبارك:: وسم شبيج 

-شغلي اغنيه هبز طبز شغلي اغنيه ساجده فدوة 

-ولي مو عيب عليج انييي اشغل ساجده ابد احنه ناس نشغل اغاني جميله هسه اشغللكم خاله ويت خاله اخلي حتى جديتي تركص بس اصبرو عليه والله الا العب چوله ارگصلج الناس

-كفوعليج عفتها تشغل وكف ويا البنات وصدك شغلت

خاله ويا خاله وكفن هي ومروى يرگص واني اتحرمص اريد

يصيحني تالي جت فاطمه سحبتني رحمت بحالي حلفت الا

احب راسها وكفت وياهن وذبينه لحم هزيت هز الا رجليه

بعد ما احس بيهن وكفت يم ريام ذابتها على الصامت بس 

توزع ابتسامات ردت اكعد شفت عمتي سهام دخلت هي

وعمتي ابتسام فرحت بيهن دخلن سلمن وكعدن يم جديتي

رحت ويا البنات اندير الضيافه وعفت مروى بسد ريام... 

ريام 

مشاعر متلخبطه توتر وخوف فرحه كاعده وادحك على البنات والنسوان واغلبيتهن ما اعرفهن يجن يباركن ويكعدن البنات ذبن لحم هزن هزن ما صاير يسون واهس

وكفت مروى قريب مني تصفك ملتهيه بالاغاني وياها بنت

ما عرفتها درت عيني شفت عمتي ابتسام وبسدها مره ما عرفتها صارت عيني بعينها كامت وجت بتجاهي وكفت يمي

سهام:: الف مبروك يمه شايفين كل الخير 

-الله يباركلج خاله تسلمين ضحكت عليه ما اعرف ليش

سهام:: هههههههه اني عمتج سهام

-عذريني عنه ما عرفتج 

سهام:: لا يمه حگج وين شايفتني يلا حبيبه اروح يم امي

-راحت يم جديتي عيني صارت هلى عمتي ابتسام وياها

مره ما عرفته عافتها عمتي وكامت جت عليه ردت اكوم

عليها بس هي لزمت اچتفاي وكعدتني ادحك عيونها دم

جنت فرحانه بشوفتها خف لا ما راضيه بزواجي وتوقعتها

جت تباركلي بس صار العكس زرفت گلبي بحجيها نزلت

نفسها وصارت قريبه من وجهي وايدها تعصر اچتافي بقوه

ابتسام: عبالج جيت برضاتي لا والله ما راضيه على

زواجج من ابني بس انجبرت ولخاطر ابني وابوه جيت

بس عساج لا تهنيتي ان شاء الله ما تشوفين الخير

ولا تتهنين بجاه كلمن عنده جاه عند الله يا بنت استبرق وعساج بلوعه اكبر من لوعت گلبي الله يحرك

گلبج ضعف حرگت گلبي شوفي اني رضيت بس خليها

ابالج تبقين مثل الخدامه جوه رجلين ابني يتونس بيج

ومثل ما ابوج ذب امج يجي يوم الي ابني يذبج ذبت الچلب وافكري زين هاي دعوة ام گلبها محترك على ابنها

ريام:: كلامها مثل السجينه ونبتته بنص گلبي وما اعرف

وجعي من لزمت ايدها لو من كلامها احس حتى نفسي

ضاق راحت وصارت مروى بوجهي مدري سمعت كلام 

امها لو لا ما لحكت تحاجيني دخلت فاطمه وصاحت للبنات

فاطمه:: يا بنات راح يدخل العريس يلبس عروسته 

-شويه ودخل واني ما اكدر احجي احس الغصه شگت 

زردومي وايدي ترجف بس اريد تخلص الحفله واكوم

فاطمه 

فرحتنه بجهاد ما تنوصف جنت واكف اساعد البنات بالدير

وصاحني معاذ واكف ويا وسام ذبيت الصينيه ورحت يمه

معاذ:: خويا سوو طريق خلي عريسنا يفوت يشوف مرته

-صدك والله جهاد يفوت وشلون وخالي جاسم 

وسام: لا تشيلين هم خويا سوو طريق ابوي رضى

-فرحت ركضت للبيت بس نبهت البنات ورجعت انطيتهم

خبر فدوه لطوله جيه يمشي ادحك عليه لابس الدشداشة 

والعبايه (البشت) الاسود وعگاله والله طالع يخبل سلمت

عليه وباركتله واستلمنه العمات وخالتي وهو من المستحاه

يمسح بوجهه معرگ وجهه والابتسامه على وجهه بس من

دخل وصارت عينه على ريام الي وجهه قطعه حمره وعيونها

مغورگه وصل يمها وهي ولا كامت الا ريتاج كومتها باس راسها وكفت يمه ادحك على ريام كعدت گبله هو استحى

كعد بسدها على القنفه وعينه ما شالها من ريام افتريت 

من جهتها وسحبت ريتاج حتى احجي وياها قبل شوي ما بيها شي ادحك البنيه مختنگه دنكت عليها وحجيت وياها

-شبيج ريام يوجعج شي ليش تبچين 

ريام:: ما بيه شي 

-يا ما بيج شي عيونج وجهج الاحمر احد غثج شبيج 

مو النسوان كلها صارت عينها عليج ابتسمي ريام

هزت راسها وتنشف دموعها كوه من وره المكياج

وابتسمت مجامله اشرلي جهاد رحت جبت الحلقات 

وانطيتهم لبسها الحلقه والاسوار راد يكوم وسحبته

-شبيك جهاد اصبر تلبسك حلقتك 

دحك على ريام وابتسم وهي اخذت الحلقه وايدها ترجف

لبسته كوه وهمستله وبحكم واكفه بسدهم سمعت من

همست

ريام: -اني خايفه

-رفعت جهاد عيونه متفاجئ منها ولزم ايدها يطمنها

وگاللها

جهاد:: عليش يابه اني وياج للموت لا تخافين محد يكدر يمسج اطمئني ريومتي لا تشغلين بالي عليج خلينه فرحانين

فاطمه:: ابتسمت وهو باس راسها وكام طلع من وسط

الهلاهل والتصفگ التمن البنات يم ريام وسحبنها يرگصن

بس هي بقت امبين ما مرتاحه للمغرب ويلا فضت الناس

ودعنه اخر شي بيت عمي حاكم ردت اشوف ريام بس دزو علينه لان اكو ناس راح تبقى على العشه يمنه وجهاد جايب

طباخ يطبخ للعشه لبسنه عبينه وطلعنه بس دخلنا البيت

وركضت مروى لغرفتنا ما لحكت اشوفها شبيها وبس شگلت ارداناتني واستلمنا الشغل وهمزين بس زلم ماكو نسوان تبارك صاحت لمروى جاي نثرد ودخلن رباب وريتاج

ومهى وكفت يساعدنه عمتي باقيه يم ريام ما لحكنه نسولف

والتهينه بالشغل انطيناهن صياني الثريد والزلاطه وكعدنه

ننتظر يكملون حتى نغسل مواعين رحت اسوي جاي وشفت

تبارك راحت وره مروى الي من رجعنا مو طبيعيه كلش

♡♕♡

تبارك 

مدري شبيها مروى من رجعنا للبيت وهي وضعها مايعجب

عفت البنات ورحت وراها لكيته بالغرفه اطلع ملابس وتمسح بوجهه وكفت يمها اريد اعرف شبيها گبل شويه جانت فرحانه لزمتها وسحبتها نكعد... شبيج مروى صاير شي 

مروى:: لا وعوفيني بس راسي فجئه صار يوجعني موتني

-هسه تبجين لان راسج يوجعج صدك جذب عبالي بيج شي 

-لا ما بيه بس خلي اسبح بلجي يفك عليه وارجع انام 

-تنامين عجل والمواعين هاي شبيج والله اكو شي 

مروى: لا تحلفين يمعوده بس عوفيني تره طاگه روحي 

تبارك:: عافتني وراحت واني رجعت يم البنات التهينه

بغسل المواعين انكسر ظهورنا بس همزين البنات ويانه

للعشره ونص كملنا وبنات خالي محمد راحن بس مهى

بقت بالحوش تنتظر اخوتها جنت بالمطبخ طلعت أشوفها 

لكيت معاذ وفاطمه يمها وهاي غاديه نار عرفت متكاونين

هي ومعاذ ما يتراهمون هذول مثل الديج والواويه... 

♡♕♡

مهى

واكفه وانتظر اخوتي متت تعب وخطيه فاطمه ما قبلت

تفوت تنام الا اروح رادت مني ابات بس اني ما قبلت حتى

امي تذبحني جاي نسولف علـ حفله رفعت عيني على الباب

من دخل معاذ تجاهلته ورجعت اسولف على ريام والحفله

وهو عبر من يمنه ما عاجبه العجب سلم ما رديت السلام

وهو تخبل يريد بس يعارك ضجت من گال

معاذ:: اهلج ما علموج رد السلام واجب لو بس علموج

تراددين 

-مالك شغل بشنو علموني حير بروحك 

معاذ:: شنو رائيج افركه لحلكج شو صايره فدنوب 

-اهووو شتريد يلا وعليكم السلام بس عوفني 

فاطمه:: اششش كافي شبيكم مناي الناس والدنيا لليل

مهى:: طلعت تبارك واندك الباب سلمت عليهن وطلعت

لكيت عمر واكف من شافي اشرلي امشي رجعت للبيت

بس دخلت لكيت عماد بالمطبخ سلمت وهو استلمني

معاذ:: مهاوي اگلج چني شفت بيت عمي محمد 

شنوو جانو وياج بيت عمي احمد شسولفتو منا منا

عمر:: استلم العاشق الولهان بعدنه ما خلصانين من مجنون ليلى جانه روميوو هاا امداكم على هيج حب

-بعدني ما حجيت ودخل فرات ضرب عمر على راسه 

وكعد واني كعدت گباله وهو استلم عمر بالرزايل

فرات: شبيه ولك كلب ما عاجبك يجيك يوم الدنيا دواره

معاذ:: الله لا يگولها عمي بس اخلص منكم اخلي امي تلگيلي مره لا حب ولا بطيخ احنه مو وجوه حب

-ضحك فرات وشغل جگارته انقهرت عليه ادري بي شكد

يريد فاطمه بس كامت رحاب عدلت گعدتي وگلت لفرات

-فرات والله ان شاء الله بس يخلص عرس جهاد انت

هم تاخذ البنت الي تتمناها بجاه الحبيب المصطفى 

فرات: صلى الله عليه وسلم فدوه لوجهج يبعد روحه لفرات انتي حبيبة گلبي اني اهم شي سعادتكم ما اريد شي

مهى:: سعادتنه وبوجودكم اني هم اريد افرح بيكم 

مثل البنات من فرحن بأخوهن على الاقل واحد منكم

عماد:: هاي هي امر لله اني راح اتزوج حتى تفرحين

تره علمودج راح اضحي واتزوج ولا اني ولا اريد ابد

عمر:: لا يابه وين تريد وداعت بنت عمي محمد 

فرات:: لا وين عمر خطيه عماد ما اباله بس يريد

يخطف ويسود وجهنه اذا ما اخذناله بنت عمي محمد 

عماد:: منو يخطف هاي شبيهم اخوتج كومي نامي

انت تعبانه واني اروح انام وراي شغل اخوتج فارغين

-كام طلع وهذول بقو يضحكون عليه وفرات يصيح وراه

فرات:: تعاللل بس لا رحت تنتحر من وره بنت عمكك

عمر:: هههههه طاح حظه اي والله الحب مخرب عقله

مهى:: ضلو يصنفون على عماد واني عفتهم ورحت ارتاح

طبيت لكيت رحاب بيدها موبايله من شافتني غطت راسها

واني عفته ما حاجيتها عرفتها لان اجلو عرسهم ضاجت

اخذت ملابس وطبيت للحمام سبحت ورجعت للغرفه

وبس حطيت راسي على مخده نمت حتى ما نشفت راسي 

♡♕♡

مروى

تمددت اريد انام ما اكدر كلام امي مو اذى ريام لا والله 

عبالك داعيه عليه احس شگت گلبي كل ما اغمض يصير

وجهه ريام گبال عيني وكلام امي يتردد براسي الخوف

دعاء امي يرجع علينه شنو ذنب ريام وامي تدعي عليها

خربت فرحتها غمضت عيوني من دخلت فاطمه مدري شأخذت وطلعت ردت انام حتى بلچي انسى سمعت صوت

جهاد يخابر نعصر گلبي گمت ركض طلعت من الغرفه 

لكيته وهو وفاطمه بالهول جهاد يخابر وفاطمه تريد تفهم منه وبس سد تلفون ركض لغرفته واحنه وراه تالي سألته

فاطمه 

فاطمه: شبيك جهاد فهمني وين رايح صاير شي ساعه وحده 

جهاد:: ماكو شي بس وخرن خلي اروح بعدين اگولج

مروى: طلع جهاد واحنه بقينه نلوب ما مفتهمين شي تالي

فاطمه خابرت على موبايل عمتي امنه ونص ساعه اريدها

بس تحجي شكو ادحك عليها وجهه صار احمر وعيونه غورگن بس گالت لرباب اتروح وياهم بس تلبس عبايتها

سدته وراحت للغرفه واني وراها گتله شكوو شصاير

-ريام بالمستشفى