رواية ثأر الشيخ مهران الفصل الثالث عشر 13 بقلم حوراء

يقول الشاعر محمود درويش في قصيدة أجمل حب: كما ينبت العشب بين مفاصل صخرة وجدنا غريبين يوما وكانت سماء الربيع تؤلف نجما... ونجما وكنت أؤلف فقرة حب.. لعينيك.. غنيتها! أتعلم عيناك أني انتظرت طويلا كما انتظر الصيف طائر ونمت.. كنوم المهاجر فعين تنام لتصحو عين.. طويلا وتبكي على أختها،

__________________ 

ادم:- اجاني اتصال من رقم نزار اكيد يريد شي لان دائما من يطلع ويه صحبانه يخابرني اذا احتاج فلوس او اذا يريد يتأخر برة رديت عليه بس الي صدمني انو مو نزار الي رد عليه رد عليه زلمه غريب كال 

:-انته اخو صاحب الموبايل 

:-اي اني 

:-اخوك مسوي حادث على جسر *** وبلگوة طلعوه الشباب من السيارة 

:-وين انتم هسة 

:-نقلناه لمستشفى **** القريبه 

:-يلا يلا هسة جاي ماراح اتأخر 

اخذت سويجي وطلعت اصيح على مهران حته نروح للمستشفى نشوف اخونه  

الشيخ مهران:-شبيك تصيح 

ادم:-بسرعه امشي نزار مسوي حادث وناقلينه على المستشفى ****

رياحين:-نزلنه على صوت ادم وهو يصيح على مهران انصدمت صدمه حياتي من سمعت نزار مسوي حادث اجه بسرعه ابالي كلامه من يكول "اذا غبت انتو تموتون" صدكك كلامه امي كامت تدگ وتلطم ومهران اخذ ادم وخابرو على فهد ومهيمن يرحون وياهم للمستشفى امي شكد توسلت بيهم تروح وياهم بس ماقبلو كالو المستشفى متروسه زلم وماندري بيه وين ترحين تتبهذلين ويانه هم طلعو من البيت وهي فتحت مناحه والزيد الطين بلة كلام نور 

نور:- اني اكول شبيه اليوم نزار كلساع ذاكر الموت وشنو يصير بينه من يموت مو يكولون الي يريد يموت يدري بروحه وويوصي اهلة نزار هم هيج  

رياحين:-امي سمعت هيج لو موتت روحهة واني من حلات روحي عطت بنور اريدهة بس تسكت خبلت المرة 

:-انتي شبيج ماعندج كلمه بيه خير ليش ماتسدين حلگج وتسكتين راح تخبلين المرة علينه بهذا حجيج 

:-اويي شبيج هسة الي يحجي الحق ماينراد 

:-امشي ولي صعدي لغرفتج وخلصيني من وجهج يلاا 

:-راح اسكت لان انتي عندج مصاب بس والله اردهة الج 

:-ردت اكوم اطلع كل ضيم كلبي بيهة بس لزمتني نارة 

:-بنات صلن على محمد صدكك كذب هسة احنا بياحال وانتن تتعاركن 

:-لج نارة متشوفينهة شلون تفاول على نزار 

                                  

              

                    

:-معليج بيهة منو يكول كلامها صحيح احنه الي علينه نقرة قرأن ونصلي الله يطلعه سلامات وانتي نور رجاءأ بس اليوم بطلي هذا الحجي مالتج 

:-والله يالله صارت الهديه تجي تحجي وتعلمني شنو لازم اسوي 

الحجيه ترفه:-لجج نويرة تمشين تصعدين فوكك لغرفتج لو اكوم اكسر ظهرج بعصاتي هااا 

رياحين:-من صاحت عليهة ماما صعدت فوك وهي تدردم واني رحت اتصلت بأدم مارد واتصلت بمهران هم مارد واتصلت بمهيمن هم نفس حالتهم وماضل غير فهد اتصلت عليه اتأخر واجيت اسد الخط بس فتح خط هو 

فهد:-الو ها يابه 

رياحين:-هلاوو فهد عليك الله طمني على نزار ولاتكذب عليه 

فهد:-اهدي بويه هستوني وصلت 

رياحين:-ليش الولد من زمان طلعو ووياهم مهيمن عبالي انته وياهم هم 

فهد:-جانت عندي شغله وخلصته وهسة توجهت للمستشفى مااعرف شي 

رياحين:-عليك الله من تعرف اي شي خابري لا تخليني على نار حباب  

فهد:-بعيوني يابه لايظل بالج 

رياحين:-سالمه عيونك اني هسة راح اروح لاتنسى حباب 

فهد:-إن شاءلله ماانساج 

رياحين:-سديته من فهد مااستفاديت شي 

نارة:-ها بشري شكالج فهد 

رياحين:-هسة رايحه للمستشفى جان عنده شغل

نارة:-كومي نتوضه ونقراله قرأن ميفيد البجي ترة 

رياحين:-مااكدر لج نارة احس نار بكلبي شلون حجيت هيج وياه يجوز يطلع حجي نور صحيح ولاسامح الله صار عليه شي اني شسوي بروحي لج نزار اكثر من اخ هذا روحي 

نارة:-حبيبتي ريحانه لاتبجين ان شاء الله مابيه شي كومي واتكلي على الله واتوسلي بأهل البيت (عليهم السلام) وإن شاءلله ميردوج 

رياحين:-حشاهم يلا كومي 

:-كمنه اني ونارة وتوضينه وفرشنه المصلايات وصلينه ركعتين وهديناها لأم البنين (عليها السلام) وقرينه قرأن وزرياره عاشوراء بنيه شفاء العاجل لنزار 

:-لثاني يوم واحنه منتظرين ومحد منهم خابر وطمنه امي كلساع يصعد ضغطها وتتخربط علينه ونارة كضتهة بس تقرة قرأن ونور المسمومه تمشي وتبث بسمهة علينه لو ما المصيبه الي احنه بيهة وخوفي على نزار جانن لزمتهة من شعفتها ومسحت بيهة البيت 

صارت الساعه 9 الصبح وصار هجوم على البيت اجت خالتي وبتهة نرجس وجهالهة وجناينهة واحفادهة والبيت صار عبالك روضه هسة لو جايه وكاعدة وساكته منكول شي بس اجت من الباب تدگ وتلطم وتنعي عبالك جابو نزار ميت لاسامح الله  

            

              

                    

نوب خلصت المناحه مالتهة وصاحت 

:-شني خيه ماكو مي شربت ابرد كلبي لكمه اسند جسمي بيهة  

رديت عليها 

:-خاله رحمه لوالديج هسة احنه بحال اكل لو شرب متشوفين وضعنه شلون صاير اخوي بالمستشفى ماندري بيه عايش ميت وانتي هنا تصيحين على اكل وين صايرة هايي 

:-يمههه يمهه اكلتيني وشربتيني شكلت اني شردت منج هو مي صايرة فرد نوب انتي 

نرجس:-من دخلت للكليه هيج صارت يمه ماتذكرين قبل شلون ماجانت تكدر تفتح حلگه هسة حته على نور تغلط وتصيح ومامحترمتج 

:-اي والله هم اني لاحظت خلي يجي مهران ان شاء الله واني اكله حته يبطلج من الكليه الي كبرت راسج علينه 

ترفه:-خيه رحمه الله على والديج كافي عوفي الابنيه شتردين منهة انتي وبناتج ترة والله مالي خلك لامشاكلج انتي وبناتج تردين اكعدي واسكتي بدون مشاكل لا والله تردين مشاكل وصياح امشي اطلعي مني اني روحي رايحه على وليدي 

:-هاا هيج صارت خيه بس والله مااطلع منه لحد مايجي الشيخ واشوفه بلا يرضاهة عليه 

رياحين:-طبعا شكد شايفه ناس بلا كرامه واحساس بس مثل خالتي ماشفت لازكه لمهران فرد لزكه وتريد تزوجه نرجس 

نرجس مطلقه وعدهة ولد وزوجهة السابق طلگهة من ورة سوالفهة هي وامهة وجانت حيل مأذيه امه وحته اكثر من مرة غالطه على المرة الجبيرة وهي الغلطانه اكثر من مرة حاول مهران يرجعها لزوجهة بس الزلمه ميقبل يكله حيل مأذيتني مااريدهة وهسة هو متزوج  

:- عفتهن يسولفن ورحت كعدت بالصاله يم نارة اخذت قرأن زغير وكعدت اقرة بيه  

نارةصدقت:-محد اتصل بيج؟ 

رياحين:-لاا محد حته فهد ادكك عليه مايرد 

نارة:-شنو هذا الصوت البرة 

رياحين:-خالتي الشفيه اجت هي وبتهة وجناينهة 

نارة:-اهاا تمام 

_______

ادم:- ورة ما اخذت مهران واجه ويانه مهيمن هم بس فهد مكدرت اوصله لان طالع بشغله وصلنه بسرعه للمستشفى لان اي سيطرة اوكف بيه اطلع الباج مالتي ويمشيني بسرعه دخلنه للمستشفى ورحت للاستعلامات انطيته الاسم 

الممرض:-اي جابو واحد بهذا الاسم قبل شويه هذني اغراضه مو؟ 

:-طلعلي الاغراض جانن الساعه مالته والموبايل والمحفظه مالته والهويه وكلهم متروسات دم حجيت واني صوتي بلكوة يطلع 

:-اي هذني ملات اخوي وينه هسه هو؟؟ 

الممرض:- بس انته جاي لو هاي الزلم وياك 

ادم:-اي وياي اخوي وولد عمي هم

الممرض:-تفضلو وياي 

اخذنه الممرض ورحنه للمصعد بس طلع مايشتغل ونزلنه على الدرج تقريبا اربع طوابق ووصلنه للمشرحه 

            

              

                    

ادم:-ليش جبتنه هنا؟؟ 

الممرض:-البقيه بحياتكم من جابوه للمستشفى جان ميت 

كعدت بلكاع حطيت راسي بين رجليه وحاضن روحي واصرخ من كل كلبي 

:-لااا خويهه نزاررر لااااا 

حسيت واحد كعد يمي رفعت راسي وشفته مهران حالته مو احسن من حالتي يبجي معقوله مهرانن يبجي كمت وحجيت

:-كوم خويه كوم اذا تطيح انته كلنه نطيح وياك كوم ابويه انته 

:-كومته واتجهنه للثلاجه الي اشر عليهة الممرض وفتحهة مديت ايدي الي ترجف على الجرجف وقبل لا اوخره اجانه صوت 

:-شجاي تسون هنا 

التفتنه لمصدر الصوت وجان واكف دكتور يجي بعمري تقريبا وياه مرة ورجال كبار بالعمر 

الممرض:-اهلا دكتور علي اجيت وجبت عائله المتوفي حته يتعرفون عليه 

دكتور علي:-غلطان انته هاي عائله المتوفي اني جبتهم وياي 

مجرد حجه هيج رفعت الغطه من وجه الزلمه المتمدد بس ماطلع نزار بسرعه  وخرت من يمه 

دكتور علي:-انته شلون تغلط هيج غلط 

الممرض:-دكتور نفس المعلومات انطاني ياها تنطبق عليه 

دكتور علي:-شنو اسم اخوك؟؟ 

ادم:-اسمه نزار چاسب ** 

دكتور علي:-افتهمت والزلمه الي جابو اسمه هم نزار چاسب **يعني الاختلاف بس بأسم الجد ولهذا السبب خربط الممرض بينهم جدا اعتذر منكم اخ حضرتك قبل شويه دخلوه للعمليات ولازم توقعون على بعض الاوراق حته تستمر العمليه بسلاسه 

ادم:-بس خلص الدكتور حجيه رحت للممرض ولزمته من ياخته وضربته بوكسي على وجهة ووكع للكاع ردت اهد عليه بس لزمني فهد 

:-احمد ربك لزموني عنك جان هسة انته بهاي الثلاجه وحق علي اله اشتكي عليك واطيح حضك اصبرلي 

:-طلعنه من المشرحه ورحنه لغرفه العمليات الي كال عليهة الدكتور علي واخذنه الاوراق الي لازم نوقع عليهة وكملتهن ورجعت يم باب غرفه العمليات وهنا الصدمه الدكتور المسؤول على عمليه نزار الدكتور علي 

الدكتور علي:-السلام عليكم 

ادم:-وعليكم السلام 

الدكتور علي:-اسف بنيابه عن الممرض وحبيت اسألك كملت الاوراق؟ 

ادم:-لاتعتذر انته مالك دخل والاوراق خلصتهم وانطيتهم للستعلامات 

الدكتور علي:-عاشت ايدك كلهة ساعتين ويطلع اخوكم لاتخافون 

ادم:-الله يسمع منك دكتور 

دخل الدكتور علي والساعه تجر الثانيه راحت ارواحنه واحنه منتظرين وبهاي المدة مضل واحد مااجه حته اصدقائنه الضباط اني وفهد هم اجو وانكلبت المستشفى كلاب زلم معكله وضباط واصدقاء نزار هم خلصت الساعتين وطلع الدكتور علي ووياه دكاترة وممرضين وجهة بشوش كال بضحكه 

            

              

                    

:-الحمدلله على سلامته جان بطل مااخفي عنكم بس جان من المحتمل ان نخسر المريض بس هو جانن قوي وتحمل الضغط وطلع منهة بسلامه 

:-من كال هيج تعالت اصوت الصلاه على محمد وال محمد والناس كامت تتحمدلنه بسلامته تشكرنه من الدكتور والكادر كلهم على جهد الي بذلوه وياه شويه وطلعوه لغرفه خاصه 

:-دكتور سؤال شوكت يكعد؟؟ 

:- بحدود ال6 ساعات إن شاء الله راح يكعد بس لازم راحه وميتعب نفسه هاي الفترة وهاا صح ماراح يكدر يمشي هاي الفترة لان عنده كسر برجله اليسرى 

:-لاتوصي حريص دكتور نحطه بعيونه 

:-متأكد من هذا الشي هسة من رخصتكم اخليكم ترتاحون 

:-مرخوص دكتور رحم الله والديك 

:-طلع الدكتور واحنه حاوطنه نزار وكعدنه شويه وكال مهران 

:-خابرو على الاهل طمنوهم على وضعه وارجع انته وفهد جيبو ذبايح جريان دم واعزمو الناس عيب منهم الكل اجه للمستشفى 

:-فهد انته روح جيبهن اني اضل هنا 

:-شعندك ضال هنا اني موجود ومهيمن موجود هم 

:-شعدنه مسوين غدة ونزار بعده ماكاعد؟؟ 

:-منو كالك راح اسوي غدة اليوم  ابويه انته باجر الغدة بس اريدك تروح اليوم انته وفهد وتحضرون كلشي لليل وتجيب وياك ملابس لاخوك يلا بعد اخوك سوي الي كتلك عليه 

:-تأمر شيخ 

:-طلعنه اني وفهد والزلم الموجودين بالمستشفى بدو يرحون مضل احد غير الكرايب رحنه وصينه على ذبيحتين باجر يوصلوهم للبيت وهم عزمنه الناس على الغدة وصلنه للبيت فهد ضل منتظرني بالسيارة واني دخلت وصارت بوجهي خالتي وهي تنعي 

:-اخخخ ياابو الطول الحلو يبوييي عليك ياابو الضحكه الحلوة رحت وانته بعدك بشبابك 

صحت بيهة 

:-شبيج خاله على منو تنعين؟؟ 

:-غير نزار ماتت 

:-ماتت روحج ان شاء الله شبيج تفاولين على اخوي وبعدين تعاي منو كلج نزار مات لاسامح الله 

:-هاا شني ما مات 

:-لا الحمدلله مامات هذاك بالمستشفى كلشي مابيه 

رياحين:-بس سمعت ادم هيج حجه طكيتهة بهلهوله ولاول مرة اهلهل بحياتي 

ادم:-وسم شبيج فضحتينه 

رياحين:-اويي ادم فرحانه تعال ابوسك على هذا الخبر الحلو 

ادم:-تعاي حبيبتي 

رياحين:-رحت بسته بخدة وكتله شلون صار وليش محد منكم طمنه عليه تدري شصار بينه 

ادم:-اني لو اسولفلج شصار بينه جانن ماعاتبتيني 

            

              

                    

رياحين:-شصار؟؟ 

ادم:-قبل لا اسولف نارة وين؟؟ 

نور:-ترة اخوك بالمستشفى بين الحياة والموت وانته جاي تسأل على نارة 

ادم:-انتي شعليج سألت عليج اني؟؟ 

رياحين:-حبيبي كاعدة بالصاله تقرة قرأن من طلعتو لحد هسة تقرة قرأن وتصلي وتدعي علمود سلامه نزار مو مثل بعض الناس سونه ميت وكامن يلطمن عليه 

ادم:-امي وين 

رياحين:-كاعده يم نارة هم 

ادم:-يلا تعالي هناك اسولفلج 

رياحين:-يلا 

اخذت ادم ودخلنه للصاله ولازم خالتي وبناتهة يجن شلون مايجن يموتن اذا مايعرفن شصار وياهم 

طب ادم وكامت امي على حيلهة ونارة صدقت وسدت القران 

الحجيه ترفه:-بشرني يمه شصار على اخيك برد كلبي يابعد امك 

ادم:-بخير الحمدلله يمه مابيه شي باجر الصبح تلكيه يمج وتكحلين عينج بيه 

رياحين:-بس كال ادم هيج سجدت سجدة شكر وكلامتهة خلت جسمي يكزبر 

الحجيه ترفه:-الحمدلله والشكر ماقصرتي ياام البنين اجيتج بكلب مكسور على ضناي وماخيبتي ضني بيج حاشاج يااصيله 

كومهة ادم وباسهة من راسهة وهي حضنته وتبجي وتحلفه اذا يحجي صدكك لو يكذب عليهة 

ادم:-وداعه ابوي الي ماشبعت منه شوف مابيه شي بس رجله مكسورة 

الحجيه ترفه:-يمه وليدي مكسورة رجله وانته تكلي كلشي مابيه 

ادم:-يمه مو زين بس رجله مكسورة انتي شايفه السيارة شصاير بيهة مستحيل واحد يشوفهة ويكول الي جواها طلع سالم مابيه شي 

الحجيه ترفه:-صدكك يمه 

ادم:-وداعتج يمه 

رياحين:-ادم انته مو كلت اسولف شصار وياك هناك يلا احجي نسمعك 

ادم:-باعي احنه وصلنه هناك وجان نشوف ممرض................ وهاي السالفه كلهة 

رياحين:-عزهه بعينه ان شاء الله ليش سوة هيج 

ادم:-اثول المطي وكع كلبي ولج من كال البقيه بحياتكم رجلي مكدرت اوكف عليهن 

رياحين:-اويي الله يساعدك حبيبي إن شاء الله متسمع هيج شي مرة ثانيه  

ادم:-إن شاءلله 

نارة:-الحمدلله على سلامته وان شاءلله تنذكر وماتنعاد 

رياحين:-إن شاءلله اصلا اني متأكد بسبب دعائج طلع من عدهة نزار 

نارة:-لا استغفر الله اني شعليه بس هو خبزته بعدهي بهاي الدنيه  

ادم:-رياحين بابا كومي حضري جنطه حطي بيهة ملابس للشيخ ولنزار هم اني بس اسبح وارجع للمستشفى تمام 

رياحين:-تمام حبيبي 

نارة:-صعد ادم فوك وندستني رياحين 

رياحين:-كومي وراه شوفي خاف يحتاج شي 

نارة:-تمام رايحه 

فتت من يم نور وسمعته تكول 

نور:-لازم تركض وراه متعوفه دقيقه بوحدة 

نرجس:-حقهة لج هي وين لاكتهة ادم وصار زوجهة وانتي ضلي طاح حضج 

:-تجاهلتهن مابيه حيل ارد عليهن ولا الوقت مناسب حته اسوي مشاكل صعدت لكيته بالحمام حضرتله ملابس وشوي وصاح عليهم رحت انطيتهن اله ورجعت كعدت على الجربايه طلع على السريع مشط شعرة ورش عطر وقبل لا يطلع كال 

:- لا عبالج طفرتي مني ونسيت السالفه تهدأ الاوضاع ونتحاسب خوش ناري 

حجاها وغمز وطلع ضليت صافنه هذا مو صاحي اكيدد 

الفصل الرابع عشر من هنا