رواية عشكت جنوبية الفصل الرابع بقلم نسرين الاسدي
هلو بنات انا جنت اريد انزل التكملة باجر بس لخاطرج حبيبتي استعجلت بكتابته ونزلته هسة
وراح يصير موعد البارتات ليلية الساعة بالعشرة ان شاء الله
😘😍
"
"
"
"
ليث: گعدت الصبح جانت الساعة ب8 زين ما تأخرت دخلت الحمام سبحت وطلعت لبست ملابسي ومشطت شعري باوعت للمراية ماعرف ليش بس اذكرت ذيج البنية واجت على بالي بنفس،وگفتها ونضرتها
صفنت شوية وفزيت على صوت تلفوني جان بابا واضح يريد يطمن عليه
فتحت التلفون: الو
سامر: هلو ابني شخبارك ..شنو لو احنه نتصل لو ما تسأل؟ !...لهلدرجة مرتاح منا
ابتسمت وگتله: لا بابا انته شجاي تگول مو هيج الموضوع بس شوية انشغلت وماخابرتلكم امس والقبلها جان عندي اجتماع عالمود شريكنا الجديد
سامر: ماشي ابني المهم انته بخير والشغل شلونه بس كون ماجاي تتعب؟
ليث: لا بابا لا تخاف اعرف شلون اتعب وشوكت ارتاح
سامر: عفية وليدي يلا حبيبي اني راح اعوفك تشوف شغلك الله يوفقك ليوثي
ليث: شكرآ بابا هاي احلى دعوات من الصبح
سديت التلفون ولبست ساعتي خذيت سويج السيارة وطلعت اليوم مروان طلع من الفجر لأن عنده هواي شغل ومن راح اوصل الگه كلشي جاهز
بس شنو قصة هاي البنية ليش ماجاي تطلع من راسي معقولة هيج وحدة صغيرونة وريفية تخليني افكر بيها
ضحكت على نفسي وزودت السرعة حتى مااهتم رفعت صوت الأغاني وانطلقت
**
هنادي: گعدت الصبح لملمت الفراش ونزلت جوة غسلت واتريگت ونوب گمت على شغل البيت
لأن امي اليوم جيرانه عدها عزيمة ورايده هواي خبز وراح تخبزلهم ابيتهم وابوي واخواني طلعوا على شغلهم والبنات بالمدرسة يعني اليوم البيت فارغ بس
انا بي
انا ماحب هذا الهدوء يخليني اخاف لأن متعودة على عائلتنا الجبيرة والحجي التارس البيت
خلصت الكنس والتنضيف وسويت الغدة وطلعت حتى اجيب خضرة انضفها قبل لا يرجعون لأن خطية يجون ميتين جوع
وانا اكص الخضرة تذكرت موقف امس وذاك الرجال الي جان يباوع عليه ..گعدت افكر بيه هو صدك جان شكلة حلو ومرتب بس عيونه تخوف ماعرف ليش ونضراته جانت غريبة تريد تاكلني
وهاي السيارة مالته شكد حلوة الله نفسي اركب بيها مرة ..انا عمري ما مجربتها واصلآ ماراكبة بأي سيارة من قبل لأن ما اطلع من البيت بس لجيرانة مرات وبالمناسبات
وعمامنه وخوالنه لا شايفينهم ولا نعرف عنهم شيء كل ما نسأل ابوي لو امي ما يقبلون يجاوبونة واصلآ يضوجون من نذكرهم لهلسبب احنه سدينه الموضوع
اصلآ انا حتى السوگ ما شايفته غير جم مرة لأن بابا يخاف عليه ومايردني اطلع بدون امي لو خواني وخواتي هم ما يطلعن بس للمدرسة
وانا جاي افكر انتبهت لنفسي على صوت أذان الضهر
اوف ياربي هاي انا شسويت ضاع الوگت كله وانا گاعدة هنا وبابا والبقية راح يوصلون لازم استعجل
خذيت الخضرة ودخلت للبيت اركاض
وشوية وندگ الباب
ضربت گصتي ..هاي انا شلون ضيعت الوگت هيج اليوم كله من ورا ذاك الرجال وسيارته
**
ليث: گعدت اخلص اوراقي وشغلي شوية اندگ الباب ودخل مروان گال: صباح الخير سيادت المدير
ابتسمت وگلت: صباح النور مروان
ودخل وياه شاب مبين بحدود العشرين شايل الگهوة عرفته هذا هيثم الي حجالي وائل عليه
تقرب من المكتب وگال: تفضل استاذ
أول ما باوعت لعيونه انصدمت گبل اجت ابالي اعيونها هي لأن نفس اللون والحجم معقولة هالشيء لو اني جاي اتخيل؟ !..شنو صارلي اني هيثم شايف وعايف مصاحب ومرافگ بنات بگد شعر راسي شلون هيج وحدة ماخذه تفكيري استغربت من نفسي بس يمكن لأنها مختلفة عن البقية مو مثلهم
بس طردت افكاري كلها ورديت عليه: شكرا ..
هو خله الكوب وطلع التفتت لمروان عالسريع وگلت: مروان ..شنو عرفت عنه شيء لو هيج جبته؟ !
مروان: عفى عليك يا ليوثي طبعآ جبتلك كل المعلومات عنه عمره ودراسته شنو جان يشتغل وعائلته وعنوان بيته هم
بس بصراحة يا صاحبي هو سمعته كلش حلوة والكل يمدح بي
تنهدت وگلت: اي الحمدلله وهذا الي نريده احنه
سكت مروان شوية ونوب گال: اه اذكرت ليوثي شلون راحت عن بالي هاي السالفة ..
سألته: يا سالفة هاي؟ !
مروان: غير طلع بيتهم هو نفس البيت الي عطلت سيارتنه يمة هذا البيت الصغير والي بيه حديقة برة
اني مباشرتآ راح بالي يمها وشلون واگفه يم الحديقة وبيدها المنجل وبيدها الثانية خضرة توها مگطوعة
ابتسمت لا إيراديآ
بس لحضة اذا هذا عنوان بيته يعني لازم اكو قرابة تربطهم ..هو شنو يقربلها؟ !
نسيت كلشي وركزت بس على هذا السؤال والي لازم احصل جوابه
ألتفتت لمروان الي جان يلعب بموبايله وگتله: مروان عائلته جم نفر؟ !
مروان: امه وابوه وعنده اخ اصغر منه بسنتين وثلث خوات
خوات ..اي هاي الكلمة الي جاي ادور عليها معناها هي اخته اي اخته
**
هنادي: رجع الكل وگعدنه نتغدة ونسولف عن هواي امور ومنها هيثم وسوالفه عن الشركة الي جاي يشتغل بيها وعن مديرة بيها الغريبة مواصفات مديرة نفس شكل ذاك الرجال بس مو معقولة هو نفسه انا اتوقع مجرد تشابه لا اكثر
وكافي لازم ما افكر بيه هالشيء حرام اي انا لازم انساه
انتبهلي بابا صافنة وگال: هنادي ..بنيتي هنودة وين سرحتي؟ !
گلت متلبكة: ها بابا ..لا وياكم ما سرحانه
گالت امي: يا ويانه يا حبيبتي اشو احنه من أول ما گعدنا وانتي صافنة شبيج يمة مريضة ؟!
گلت: لا يمة مابيه شيء صدگيني ..بس شوية راسي يأذيني
باوعتلي امي وابتسمت وانا عرفت شنو دار براسها هسة هي حسبالها اجتلي الدورة وانا استحي لأن بابا بس تگله امي هي مريضة يعرف عالسريع وانا طبعآ اغرگ بهدومي من المستحة
فهد: لا يمة شبيها مريضة اشو مثل الصل كلشي مابيها بس تدلع عليكم
صاح ابوي عليه: ولگ فهد ليش تحجي على اختك شرايد منها خليها بصحتها وهاي بدل ما تدعيلها شلون اخو انته ..هي هنودة تعبانة لأن هاليام شغل البيت كله عليها خطية
هنادي: ياربي هنا تمنيت الگاع تنشگ وتبلعين بابا فهم على ماما وهم فكر نفس تفكيرها هسة شلون اباوعله ..شوازاني وصفنت ..اخ منك ياابو السيارة السودة كله من وراك ..كون تتعطل سيارتك وتخرب كشختك
باوعلي هيثم وگال: شبيج هنودة ليش تباوعين للسمه جاي تدعين على احد شنو وضحك وضحكوا البقية
انا ما رديت عليه وضحكت وياهم
بس بگلبي بعدني ادعي عليه ذاك ابو القاط اي لازم اسميه لو ابو القاط لو ابو السيارة
ضحكت على تفكيري بيني وبين نفسي
واسمع حياة تگل ليلى: شوفي انوب تخبلت وضلت تحجي ويه نفسها
ليلى: لا هنودة اليوم صدك مو طبيعيه
وضلن يضحكن وهيثم وفهد هم يضحكون وياهن
انا طلعت روحي گمت وصحت: اوه ..انتم صدك ما ينگعد وياكم ..وحتى الغدة ماريدة يلا گايمة
صاحولي ماما وبابا بس ما رجعت
واسمع فهد يگول: زعلت الجاهلة
گال هيثم: اكيد راح تبجي ام دميعه
وحياة وليلى يضحكن
صاحت ماما عليهم: كافي فهود هيثم يلا حرمتوها من الأكل عوفوها هسة
**
شخص مجهول: اسمعني عدل هو كلها اسبوع وراجع لبغداد احنه لازم نلحگ نبوگه قبل لا يرجع
الطرف الثاني: اي صحيح لأن اذا رجع بعد ما نگدر نسوي شيء ..بس،انته تعرف الرمز مال القاصة؟
جاوبة: لا ما اعرفها بس عندي فكرة تخلينا نعرفه وبسهولة بعد وبدون ما احد يعرفنه
الثاني: زين وشنو هاي الفكرة واحنه شلون نطلع منها؟
ضحك وگال: راح نطلع لأن اصلآ راح اطيح براس واحد ثاني وهو غبي وماراح يفتهم هو نايم ورجليه بالشمس واحنه راح ناخذ الفلوس ونطلع منها مثل الشعرة من العجين
رد عليه: حلووو متشوق لهلشيء
گال: بس خل يصير الصبح
