رواية بينا معاد الفصل الرابع عشر
قربت منها لابسه فستان قصير لتحت الركبه بشوي وضيق على الجسم
ناره لفت بجسمها :ها ايه رايك في فستاني
هاله:قمر اللون الاصفر عليكي لايق ،مع لون صبفه شعرك
ناره: ده انا دوخت ،ع ما لقيت مقاسي، اصله الاستيل عجبني المهم ناقص حاجه ولا كله تمام
هاله: مش كان الاحسن نتصل بمتعهد حفلات
ناره: ملوش لزوم ،انا حابه اعمل كل حاجه بنفسي ,وبأيدي في يوم زي ده
هاله: هتصل اعرف لو داليا طلعت من الشركه ولا لسه
ناره: ماما الامور هتمشي زي ما رسمنالها طمنيني
هاله ابتسمتلها: احنا قررنا تبقي الامور كدا, ولازم تمشي كدا, اطمني , وسيبي الي في ايدك وروحي انتي اتصلي بحماتك ‘يله اليوم لازم نهتم بأمه مش بهشام فهماني
ناره: فهماكي
….
مخلص فضل واقف مستني العربيه توصل واول ما لمحها جري عليها زي المجنون ‘وفتح الباب وشدها تحت نظرات هشام الي بدء يشك من تصرفاته انه فيه حاجه مستخبيه!
مخلص بيسحبها: خلينا نمشي يله
جنه بتشد ايدها منه: سيب ايدي يا عمرو مش كدا
مخلص بستماته: مش هسيبك ‘واحنا هنسيب البلد خالص
هشام تدخل: استاذ عمرو ,لو كنت قلقان عليها ادخل معانا عايز اسألك كام سؤال مهمين
مخلص مسك فيه: ابعد عنها
جنه بتحاول تمنعه : عمرو مفيش داعي للعنف
هشام بصله وسابقها وراح ناحيه باب الفيلا
جنه: عمرو هرجعلك صدقني
مخلص برجاء: بلاش تدخلي ,انتي قولتي هتتخلي عن الماضي
جنه: عشان كدا لازم ادخل مع الشاب ده, انا بحبك اكتر من نفسي ,اظن انت فاكر انا قولتلك قبل كدا المره دي وخلاص
مخلص ضمها لحضنه تحت نظرات هشام الي كتله من نار!
مخلص مسك ايدها: انا هستناكي هنا, وبعد ما تدخلي لو كنتي لسه مش متأكده من مشاعرك ناحيتي’ لما تخرجي متبصليش ،وكملي طريقك
جنه بستغراب: انت بتقول ايه؟!
مخلص: بقولك لو رجعتيلي وعندك لسه شويه شك فأنا مش هتخلي عنك ,حتي لو بموت حتي لو كرهتيني مش هتخلي عنك يله ادخلي
جنه بصت لهشام ورجعت بصت لمخلص واتحركت ناحيه هشام’ لان فيه حاجه جواها بتقولها يمكن تكون هي جنه
ناره طالعه تستقبله ببتسامه لكن الابتسامه اختفت فجأه لما شافت جنه واقفه جنبه وهشام ماسك كفها
جنه ببتسامه: اهلا يا ناره هانم
ناره بصت لـ ايدهم وانخطف لونها وسألته : ايه الي بيحصل
هشام ببرود: انا جبتها معايا يله ندخل
جنه مشت وري هشام وناره زقتها وهي بتجري وزقت هشام في سكتها ودخلت تجري ع جوه
هاله بتعجب: ناره فيه ايه؟ ناره
هشام دخل ومعاه جنه وهاله خافت ووقفت بسرعه وحست وكأن جبل اتهدم على راسها
داليا وقفت بصدمه: لاء انتي معقول
هاله مثلت بحترافيه: جنه( واغمي عليها)
داليا صرخت: مرااد( راحوا يفوقوها)
جنه كانت هتمشي وهشام اتك ع ايدها الي كلبشت في ايده
مراد بيضرب خدها برفق: هاله ارجعي لوعيك
داليا بتمسح وشها بالميه: هاله فوقي يا حبيبتي
هاله فتحت عنيها وبتشاور علي جنه: جنه
داليا: اتمالكي نفسك
هاله بكت: معقول انتي جنه كنتي فين؟!
هشام بصلهم كلهم : حبيت تشوفوها عشان اشوف هو انا الوحيد الي شايفها جنه قدامي
هاله بكت ببراعه: وانا الي فكرت ان جنه رجعت ,بس هو فيه ميت بيرجع ,بس لو هي تقبل وتوافق تبقي بيننا بدل جنه خليها ,وارجوكي يا بنتي اقبلي واحنا هنعاملك احسن معامله
جنه: آسفه انا جيت هنا عشان اشوف المكان الي عاشت فيه الانسانه الي تشبهني كتير, مجتش عشان احل محلها واخد مكانها
داليا بنفعال: مجيك هنا قرار غلط وغير مقبول لـ اب وام فقدوا بنتهم, قلبتي عليهم المواجع وجرحتوا مشاعر ناره الي شافت ده
هشام: امي, انتي كمان كنتي بتحبي جنه
داليا: بس جنه ماتت ودفناها
هشام بعصبيه: ايوه بس من غير حتي ما نتأكد انها جثتها, لمجرد ان الانسيال وتوكتها قررنا انها جنه ,وانا هتمسك بأي امل حتي لو كان ضعيف ,لو هيوصلني لجنه بنت عمي وصديقه طفولتي
ناره بصتله بعين قويه وصرخت فيه : بطل جنان ,وانتي ياجنات قومي امشي من هنا حالا
هشام بتحذير صارم: ناره
ناره : متقولش ولا كلمه مفكر ان محدش فينا مش عارف انت بتحس بأيه ,انت جايبها لحد هنا رغم هي بنفسها بتقولك انها مش جنه كل ده عشان رافض ترتبط بيا
هشام بنرفزه للوضع كله : الموضوع مش كدا
ناره بنظرات حاقده: ولما هو مش كدا ليه جبتها في اليوم ده بالذات, اسمع انا استنيت خمس سنين عشان افوز بيك وبحبك ,وانت مش قادر تنسي لهفتك ع جنه ليوم واحد ,فيه اكتر من كدا ظلم
جنه: ارجوكي متسأيش فهمي , مستر هشام قالي لو اكدتم اني مش هي الامر كله هينتهي ,وهو وعدني مش كدا يا مستر هشام
هشام بصلها وسكت لانه مش هيقدر يسيبها وناره بصتلها باحتقار
جنه : انا كمان هتخطب قريب. ومش هيكون فيه سبب اننا نتقابل بسبب جنه, انا همشي
هشام مسكها بسرعه: عشان أكدلك انا كل تصرفاتي مكنتش هزار ولا لعب ناره فين متعلقات جنه الشخصيه
جنه محروجه من نظراتهم عليها : ارجوك كفايه لحد هنا
هشام ملامحه جامده وجاده: انا مش بعمل ده عشانك
وبالفعل اخدها لحد غرفه المخزن ومعاهم ناره الي مش طايقه نفسها ولا طايقاهم , ودخلت قبلهم وولعت النور وبقت ترمي قدامهم كل حاجه خاصه بجنه حتي لوحه مخلص القديمه
جنه مسكت اللوحه ودققت فيها وبتحاول تفتكر : اللوحه دي
ناره خافت لتفتكر وراحت شدتها منها بحقد: اخويا رسمها
هشام بغيظ منها: ناره سبينا دقيقه سوي
ناره نفخت بضجر: بجد الوضوع زاد عن حده
جنه مسكت اللبوم صور كبير وفتحته كلها صور ليها ولهشام وهما صغيرين وهو قرب منها ولزق فيها وهي بتفر فيهم ويبتسم ويرجع يبصلها بحب كبير ,واتمني تتعرف ع نفسها لكن لما لقاه مفيش رد فعل منها
هشام بصلها وبكل يأس: انتي فعلا مش جنتي الي بدور عليها
جنه منزله راسها تخفي دموعها : انا بجد اسفه
هشام عيونه واضح عليها القهر والالم : لازم دلوقت اسيبك تمشي رغم مش عايزك تمشي
جنه طلقائي قربت منه وهو كان هيقرب من شفايفها لكنه رجع بسرعه وباس جبينها وقالها: بوسه الفراق
بعد وقت مش طويل هشام خرج معاها وناره واقفه مربعه ايديها عند الباب وبصت لجنه نظرات قاتله سامه واتمنت تزقها من ع السلم تقتلها في الحال
جنه نزلت لتحت: مع السلامه كنت متطفله عليكم
داليا: لا ابدا احنا الي آسفين عشان عمايل ابني
مراد دمعت عينه : خدي بالك من نفسك
جنه هزت له دماغها واتحركت وكلهم طالعين وراها للباب
جنه: مفيش داعي انا هخرج لوحدي
داليا: تمام
هاله بكت بحرقه وداليا طبطبت عليها هي ومراد وهشام طلع وري جنه كأنه بيودعها لـ اخر مره وهي مشت خطوه وترجع تبص عليه ومره واحده جريت طلعت تدور ع مخلص لقته قاعد ع عتبه فيلا بعيده شويه راحتله وضمته وفضلت تعيط
……….
جنه بتاكل طبق كشري: الله مشطشط
مخلص بسخريه وألش: انتي مكلتيش حاجه معاهم بالمره ليه؟!
جنه كشرت: بتحبني ولا لاء
مخلص: ده سؤال تسأليه
جنه: بتحبني ولا لاء
مخلص ضحك: وبتسألي ليه؟؟!
جنه: عشان ده مكاني الحقيقي اني اكون حبيبتك
مخلص حط في ايدها محبس: عشان متسأليش هو مش غالي
جنه: بس انا مش هشتريلك دبلتك غير لما تخلص اللوحه وقتها هشتريلك الدبله مكأفاه والبسهالك
جنه قامت تجري وتصرخ: عمرو
مخلص صرخ: ايه
جنه صرخت اكتر: هبدء من جديد ودي البدايه خلاص
مخلص: بحبك يا جنات بحبك اوي
جنه جريت فاتحه دراعتها للهواء الطلق وصرخت بأعلى صوتها: وانا بحبك خالص
مخلص جري عليها وضمها وفضل يلف بيها وفضلوا يضحكوا زي المجانين وجنه خلعت السلسله وعدت من واحد لحد ثلاثه وطوحتها بطول دراعها
…………..قصص منه محمد كاتب…………..
تاني يوم جنه داخله المصنع تقدم التصاميم شافت هشام بياخد جوله مع الفريق اتخبت منه وهو لمحها لكنه كمل جولته وراح يحضر الاجتماع
جنه بدئت تشرح وهو لمحً في ايديها دبله ركبه ستين عفريت وكانها اخدته بستين قلم ع وشه
هشام طقطق بالقلم :بس التصميمات دي مش هي الي الشركه عايزها -قام ناحيه الباب- عيدي التصميمات كلها اليوم
جنه بأحباط : قبل ما تمشي قولي فين المشكله بالتحديد
هشام تجاهل كل الموظفين واتكلم بقهرته: مكنتيش ع علاقه قبل كدا،موقعتيش في الحب ابدا
جنه بصتله واتحرجت وناره فرحانه بالحرب الي يوميا بتحصل بينهم
آيه قامت تشجعها: والله التصميمات حلوه ,ولا ايه انتم ايه رايكم
رؤف: انا عن نفسي عجبتني جدا
آيه: يظهر مستر هشام محبش قبل كدا ولا ايه ؟ شوف السوسته بتجري زي السكينه في الحلاوه
رؤف ضحك: حلاوه بس مش عاجبه الملك
جنه لمت ملف التصميم وخارجه شايطه ع اخرها لقت الي مسكها من ايدها وبص للدبله
هشام بسخريه :مشفتهاش يعني قبل كدا
جنه بضيق:انت عايز مني ايه
هشام اخد نفس طويل وخرجه ع مهل:ولا حاجه قلت لازم اهنيكي
تلفونها رن وجايه تشد ايدها منه مسكها وسحب الموبيل من جيبها وبص للاسم واتغاظ وحطه ع ودنها بعنف كآنه ناوي يطرشها
جنه اتألمت شويه لحد ما حررت ايدها منه وردت: الو ياعمرو ,,اه وماله الغداء في المطعم الي جنب الملاهي,,طبعا عرفاه,خلاص ساعه كدا واكون عندك ,سلام
جنه اتحركت بعد ما ضربت هشام نظره كلها غيظ وغل ,وهو اتحرك وراها جنه وقفت وبصتله وهو ابتسم لانه حاول يبعد عنها بس مش قادر ورجع لما مشت قابل ناره
هشام: ناره تحبي نتغدي سوي
ناره بفرحه: موافقه
………قصص منه محمد كاتب…………
في المطعم جنه طلبت عصير الاول هي ومخلص
هشام قرب منهم واتكلم بجديه : مبروك ع الخطوبه
وراح ساحب كرسي ع تربيزه وراهم بالظبط وبقت ناره ضهرها لمخلص وهشام وشه لجنه
مخلص مشبك ايديه في بعض وحطهم تحت دقنه وبصلها : تحبي نطلب الاكل
جنه: ياريت لحسن جعانه ( مسكت المانيو) اممم ياتري نطلب ايه؟!
مخلص: ناكل استيك
هشام عيونه ع جنه وهي بصتلوا اوي وهو حرك عيونه الناحيه التانيه وقال لناره: ايه رايك نعمل بلكونه هنا
ناره: الله هتبقي حلوه
هشام عيونه راحت تاني ع جنه , وهي بصتله ومخلص اخد باله ولف بطرف عينه هشام عمل نفسه بيمسح حاجه من ع بلوزه ناره ورجع عيونه تاني ع جنته وناره اخدت بالها ولفت بصتلها بغل وجنه بسرعه غرست دماغها في المانيو ورجعت بصت لهشام بخبث وهو ابتسم واخد كاس الميه شربه,, شويه الاكل وصل وبدؤا ياكلوا ومخلص لقاه الويتر جايب تورته كبيره
مخلص: ايه ده احنا مطلبناش تورته
الويتر:دي هديه الخطوبه من هشام بيه
هشام رفعلها كاس العصير ومعاه اجمل ابتسامه
جنه كشرت فيه وبصت للويتر: شكرا احنا ملناش في الحلويات
مخلص بضيق: لا حطها ,دي ببلاش وهناكلها
جنه: عمرو بلاش
مخلص: ولو سمحت نزل واحده نفسها ع تربيزته
هشام ابتسم وقام واخد ناره وراحلهم: وليه تورتتين ده اسمه تبزير ,ليه مناكلش تورته واحده كلنا
جنه بصت لمخلص الي اضايق جدا وقال: وماله نتشارك في واحده
هشام أأعد وسأله: ياتري رسمك في اللوحه بيتقدم بشكل كويس
مخلص: هتندهش لما انتهي منها الحاجه متظهرش غير لما تخلص ونظره العين بتختلف كليا
هشام: حاسس بالراحه لثقتك بنفسك بس ليه مش لابس دبله
جنه: انا قولته اني هشتريها بنفسي لما يفنش الرسمه للملاهي وهو بيرسمها هديه عشاني
هشام: بس ده يخالف القانون الرسمه دي بهديها لجنتي , وانا مش عايز مخلوق يشاركني فيها
مخلص بتهكم: مش عيب اوي لما تتكلم عن جنتك وخطيبتك قاعده
هشام ضم ناره من كتفها لحضنه: هي متفهمه ومش بتسئ الظن مش كدا يا ناره
ناره اغتصبت ابتسامه صغيره بدون رد
مخلص : انت بتختار الستات ع الفرازه
هشام: دي مهاره مني ,نجمه الحفله كملي التورته
جنه بصتله بضيق ودورت وشها عنه: مش بحب الحلويات
مخلص: جنات هناكلها سوي
جنه: حاضر يا حبيبي
ناره بستفزاز: سمعت من عمرو انكم عايشين سوي في بيت واحد بصحيح
هشام اتغيرت ملامح وشه وعقد حواجبه ,اما جنه اتحرجت وسكتت ومبقتش عارف ترد تقول ايه ,ومخلص بلع ريقه
ناره: مفيش مشكله رغم ده منافي للعادات والتقاليد وغريب ع مجتمعنا مش كدا يا هشام
هشام قام متعصب: هقوم اشغل اغنيه ع شرف الخطوبه
جنه قامت وقام معاها مخلص وخرجوا تحت نظرات هشام, الي واثق ومتأكد ان فيه سر عند جنه وعمرو عارفه عنها ,,ومن حرقته راح اخد بنت وبدء يرقص معاها بجنون قدام ناره الي من جواها نار لكن بكل برود بتبتسم وهو مدلها ايده ترقص معاه ع اغنيه هاديه كلاسكيه ولف ايده ع وسطها, وسند جبينه ع جبينها
ناره: انا بقلق واخاف لما بتكون لطيف كدا معايا فجأه
هشام: مش عايزني اكون لطيف
ناره لفت ايدها حوالين رقبته : لا بس اثبت ع كدا
هشام: غيرتي ريحه برفانك
ناره: اشتريت نوع تاني لما كنا في باريس هو قوي
هشام: لاء هادي ويناسبك جدا
ناره لفت ايدها ع وسطه وقربت شفايفها من شفايفه وهو هزله دماغها بـ لا وابتسم لانه محرم شفايفه ع حد غير جنته,, وكملوا رقص واخدها بعد كدا عشان يوصلها
ناره قبل ما تنزل قربت وباسته من خده: دي عشان تفكرك للي هتعمله عشاني
هشام: نامي كويس
ناره: لو اتأجلت التصميمات السنه دي اكتر من كدا الامور هتتعقد زياده ايه رايك نجيب مصممه من برا
هشام: لو الامور متظبطتش لحد بكره ابقي اعملي الي انت عيزاه
ناره : سوق ع مهلك
….
جنه في الشركه أأعدت ترسم تصاميم جديده ومن كتر التعب نامت ع روحها, وشويه وقامت لما حست بحركه غريبه راحت تبص تشوف في ايه ….. لقت هشام نايم ع الكنبه الجلد ومتكوم ع نفسه …..وسعت عيونها ومسكت جاكت بدلته وغطته بيه ووقفت تتأمله شويه وسامته شعره لبسه ثقته في نفسه بتدل انه راجل جريئ ….بتلف تمشي لقت الي مسك ايدها جامد وهي شهقت بخوف
هشام مغمض عيونه وبيتكلم بصوت رخيم : انسه جنات لو مش عامله رجيم ناكل سوي اي حاجه ونرجع نشتغل
جنه ابتسمت ع اسلوبه الطفولي وهشام قام وطلب اتنين بيتزا واخدها وراحوا قعدوا في الملاهي وقطع وناولها وهي اخدت تاكل
هشام: هو انتي ليه معجبه بالي اسمه عمرو ده
جنه: وهو فيه سبب عشان تعجب بشخص
هشام بصلها ورئكشنات وشه كلها قرفه
جنه بتاكل: بيرسم حلوه ,ومؤدب وشخص تحب تكون معاه ,وفوق كل ده ملوش في الكدب واللوع ومش بيتعصب غير لما حد ينرفزه
هشام من غيظه رفسها برجله: اسكتي ومتتكلميش وبقك كله اكل ,عماله تتفتي في وشي
جنه مسحت وشها لان هو الي مالي بقه كله اكل وبيتفتف: ده الي هو انا ,, انا نفسي اسالك سؤال هو انت بتبسط لما بتسخر وتتريق عليا
هشام من كتر كميه الاكل شرق وبدء يكح جامد ,وجنه ناولته علبه عصير وفضلت تضحك ع منظره
هشام بغيظ : متضحكيش كدا سامعه
جنه كشرت
هشام بحزن: لانها نفس ضحكه جنه بالظبط قومي معايا
جنه: هنروح فين.
هشام: هنروح نتزحلق
وصلوا الصاله وهشام بدء يتزحلق من غير كوتش لان الارض مجهزه لكدا وجنه ابتسمت اوي وهو جري شدها تلعب معاه
هشام: كنت ناوي ارقص مع جنه قدام اللوحه لما تخلص بس لو لعبت معاكي انتي دلوقت ده اكتر متعه
جنه قلدته واتزحلقت لحد ما وصلتله وهو اتزحلق ونام ع ضهره وجنه راحت تقومه
هشام: شكرا ( وبمكر ) راح زقها وقعها ع دماغها اتألمت جدا
جنه : انت بجد رخم
هشام ضحك: اني اسف
هشام مدلها ايده وقامت وراح مزحلقها وقعها تاني وهي صرخت واتألمت
هشام: انتي كويسه بجد انا اسف
جنه مثلت انها بتتألم وع غفله زقته وقع ع ضهره جامد واتألم ,وهي فضلت تضحك عليه هو قام وجري ورها وهي شدته وقعته وهربت منه وهي تصرخ لانه بيجري وراها ووقع تاني وجاي يقوم جنه كعبلته ووقع ع وشه وطلعت تجري وهو راح حضنها ووقعوا الاتنين وهو حضنها
هشام: عارفه ريحتك نفس جنه
جنه اتعدلت بسرعه: لازم اروح
هشام مسكها: ياتري فكرتي تصممي كوفيه بالطقيه
جنه: بصراحه لا
هشام طلع الطقيه الي عملتهاله ولبسها: شكلي عامل ازي ,حلوه عليا جنه عطتهالي ,وهي في اعدادي ( غمزها) اخدتي هديه زي دي قبل كدا ,فكري كدا وخدي الاحساس في عقلك
جنه ركزت اوي وزي ما يكون بدئت تفتكر ان فيه حاجه حصلت اما هو سابها ورجع رقد ع الكنبه واخد وضع الجنين وبدء يعيط بقهر ونزل الطاقيه ع عيونه وكمل بكاء
اصعب احساس ممكن تحس بيه وانت بتبعد عن حد كان نفسك يفضل جمبك ,,وكنت بتعمل مجهود كبير اوي عشان يفضل موجود في حياتك ,,صعب اوي تقفل باب بايدك كان نفسك يكون مفتوح علطول
………….
جنه فضلت تفكر في كلامه وقررت انها تصمم حاجه بروفشنال وتكون ملفته وبالفعل صمتت شال وكاب باللوان تخطف الانظار و تمشي رجالي وحريمي كمان يعني ضربت عصفورين بحجر واحد ,,وبعد كام يوم راحت غرفه الاجتماع وطلبت من آيه تطفي النور وتسلط الضوء ع التصميم وهشام انبهر بشغلها وبصلها بنظرة اعجاب
آيه: بجد جميل اوي يا جنات
جنه: مستر هشام دي افكار هديه حبك الحقيقي
هشام بسعاده: آوكيه موافق عليه
الموظفين اعجبوا بالتصميم وناره ميته غيظ وقهره… وهي بتسمع كلامات المدح والاعجاب بجنه متعوده انها دايما في القمه والاضواء بتتسلط عليها.,والكل خرج من غرفه الاجتماع
جنه لمساعدتها: انا واثقه ان الموديل ده هيتباع ويطلب منه تاني
هشام ظهر هو وناره في وشهم
جنه ارتبكت: آيه انا هروح اشوف عمرو
آيه: ارجعلي بسرعه
هشام بعجاله: انا هقدم التقرير لداليا هانم ( غمز لجميل)
جنه وهي بتركب الاسانسير هشام لحقها وركب معاها تحت نظرات ناره الي زقت جميل وجريت عشان تحصلهم لكن هشام داس بسرعه ع الدور الارضي ونزل الاسانسير وهي اتغاظت ونزلت ع السلم جري زي المهبوله
جنه بصتله: طاقيه المرحومه جنه ساعدتني كتير وطبعا الفضل والشكر ليك
هشام مسك ايده بخبث بين ايديه وبصلها ببتسامه: حاولي تصممي جوانتيات لان ايدك بارده زي قلبك
جنه اتغاظت وحاولت تسحب ايدها وهو رفض وتبت فيها ,, لكن ليه هي مبسوطه وراضيه بكل حركه بيعملها معاها ,ليه مش بتضايق او تنفر من الاسلوب الي بيمارسه عليها وبصتله وهو بصلها لحد ما الاسانسير وقف وفجأه سابت ايده بسرعه وكانت ناره الي عيونها بتشع حقد وغيره وغضب
هشام سحبها بعد خروج جنه وقالها: ادخلي مش كنتي طالعه لفوق
وهو خرج وضغط ع الزرار واتقفل الاسانسير وهو بيشاورلها باي
……….
جنه راحت اتجاه مخلص الي واقف وشارد بعالم تاني ولا حس بيها وهي وقفت تبصله ,حاسه انها بتخونه كونها بدئت تميل ناحيه هشام , لكن نفضت الفكره وراحت هزته بالسقاله وهو اهتز واتخض واتخبط ع الحيطه وهي بتضحك
مخلص: عارفه انك عبيطه
جنه: والعبيطه جاتلك
مخلص نزلها ومعاه علبه الالوان بالفرشاه
جنه: ليه واقف سرحان ومش بترسم
مخلص: قولت اريح شويه
جنه ولفت تطلع : تحب اكملهالك كدا هتطلع اروع وننجز بشكل اسرع
مخلص ضربها ع ايدها: بطلي لعب بالالوان هدومك هتتبهدل وتبوظيلي شغلي
جنه: شكلك مش عايز تلبس الدبله
مخلص: اه يا لئيمه تسابقي معايا
جنه ابتسمت بشقاوه وطلعت ع السقاله وهو طلع قصادها من الناحيه الثانيه وعدوا سوي من واحد لحد ثلاثه وطلعوا في مسابقه
جنه بلؤم مثلت ان رجلها اتلوت وصرخت: اه
مخلص وقف بخوف وسألها: مالك؟!
جنه جريت وطلعت اسرع منه
مخلص: اه يا غشاشه يا مكاره
جنه صقفت: وفوزت عليك لانك غبي
مخلص: يعني ازقك تنزلي تحت ورجلك تتكسر بجد
جنه خافت وضربته في كتفه: بطل غلاسه
مخلص شدها تقعد: طب اقعدي لتقعي
جنه: بجد خوفتني منك وياتري هفضل اسيب شغلي والف وراك وانت بترسم
مخلص قرر يقولها كل الحقيقه: جنات لما اخلص الرسمه فيه حاجه كنت عايز اقولك عليها ….وبعد ما تسمعي الكلام الي هقوله …بناء عليه هتعرفي لو لسه هتديني دبلتي ولا لاء
جنه: انت خفت وياتري غيرت رايك لان اللوحه ع الحيطه ممكن تنجح وتكسب فلوس كتير وبالتالي تدورلك ع بنت احسن مني مش بصحيح كلامي
مخلص ابتسم: لاء مش بصحيح
جنه: اصلك بتتكلم بأسلوب فيه شك مين هي قولي ( رسمت بالفرشاه ع خده)
مخلص ضحك: انتي عارفه مفيش حد مالي قلبي غيرك انتي الوحيده الي قلبي شيفاها قبل عيوني
جنه كشرت: امال فيه ايه قولي( رسمت الخد التاني) قول يله قول
مخلص: هقولك لما اخلص اللوحه
جنه: متهزرش معايا لانه مش بيضحك( مسكت اللون الاحمر ) رسمت ع وشك علم مصر
مخلص بلؤم شاورلها: بصي مين هناك
جنه لفت بوشها: مين
مخلص شخبط ع وشها: علم افريقيا ع وشك
جنه: ليه عملت كدا تعال بقي قرب
وفضلوا يغلسوا ع بعض بالالوان وهشام متابعهم من بعيد وعيونه وواضح ان النار طالعه منها
…………..
هشام رجع المكتب مخنوق قابلها طالعه في وشه
ناره : هشام لو عندك وقت فاضي يله عشان نشتري دبل الخطوبه
هشام من غير ما يبصلها اتحرك لمكتبه وقالها: اوك
ناره داخله وراه لف وقفل الباب في وشها وطوح الجرافته ع الكرسي ,, من كتر الانفعال والغيره حدف كل الي ع المكتب قدامه
في نفس اللحظه جنه راجعه لشغلها ناره ندهت عليها: جنات
جنه: افندم
ناره: قررتي اي تصميم هنبعته للمصنع عشان يفصله
جنه: انا اخترت حوالي عشر موديلات وبعت الطلبات واحتمال يبعتوها ع هنا الساعه اربعه
ناره بكيد: اصل عندي معاد مهم ومش هقدر اكون موجوده قبل انصرافك وعشان الامر مستعجل ابقي جبهوملي ع المكان الي هقولك عليه
جنه: حاضر
