رواية عشكت جنوبية الفصل الخامس عشر بقلم نسرين الاسدي
مرحبآ طبعآ اعتذر لأن البارت قصير ..بس تلفوني عطل وهذا توني مشتريته وبعده لا تطبيقات ولا شيء بس ما حبيت اكسر ثقتكم وما أنزل
وان شاء الله باجر راح أنزل واحد كتعويض
متابعة ممتعه 😍😍
*
*
*
*
هنادي :شفته هيثم وانصدمت بيه .. تالي وصلت شكد مشتاقتلك خوية ما حسيت الا عيوني دمعن من الفرحة
تقدم عليه ليث وصاح :هيثممم ما تتصور شكد فرحت بشوفتك لك اني جنت ادور عليك وهسة انته اجيتلي برجلك ...يا اهلا وسهلا بيك ...لك انته تتعرض لختي كو... ساقط
وهاجمه وضربة بوكس على وجها
شهكت بخوف وصحت : هيثم ...
خله ايده على خده وهجم عليه وضلوا يتعاركون ركض عمو ولزم ليث واتدخلت الشرطة ورفعوا سلاحهم
كاموا وهمة واحد مدمي الثاني
صاح ليث :أتركني عليه بابا هذا الكلب لازم يتأدب اني حالف الا اكسرله عضامه
صاح هيثم :ولك انته هم الك عين وتحجي لو تعرف اختك شسوت جان ما حجيت هيج
ألتفت عمو اله وللبنى وكال :انته شجاي تكول؟!..شديصير هنا ؟!
هيثم :راح تعرف كلشي بعدين عمي ..بس انه هنا مو علمود هالموضوع عندي اهم منه ...
ألتفت لليث وكال :
انه هنا حتى اخذ أختي منك وهاي فلوسك الي اتهمتني بيهن ..وانته حتى مهر ما نطيتها بحجة الفلوس عدنه بس هذا كله مو مهم ..المهم اخلص أختي منك
ضحك ليث وكال : ومتأكد من نفسك ..حلوو..لا حبيبي هاي اختك زوجتي على سنة الله ورسوله واني عاقد عليها بالمحكمة ومستحيل اسمحلها تروح وياك ولا حتى بحلامك
عدل هيثم قميصه وكال:انته اصلا ماراح تكدر تمنعني لأن راح تروح وياهم
فتح الشرطي الورقة وكال: انته مطلوب و هاي ورقة الأمر حتى نقبض عليك
وكف عمو متعجب وكال : حضرتك بس فهمني شنو الي مسوي ابني لحتى ينسجن ممكن افتهم الموضوع ؟
الشرطي: ابنك متهم بتمويل المخدرات وتسهيل تسويقها واحنة عدنه كل الأدله على هالشيء وهسة يلا ما عدنه وقت اتحرك ويانه
لطمت خالة على خدودها وعمو ما صدك ضل صافن شهكت انه وخليت ايدي على حلكي ما جاي اصدك مخدرات؟! كلشي توقعت منه الا هالشيء
ألتفتله ابوه ولزمه من قميصه وصاح:ليييث لك صدوك هالشيء ؟..احجي ..مخدرات يا ليث ..اني هيج تسوي بيه تالي عمري ..لك شلوون...وانته شمحتاج حتى تشتغل بيها ؟؟
لك جاوبني ؟!
ليث :لتصدكهم بابا كولشي ماكو ..مجرد سوء تفاهم واني حروح وياهم انحل الموضوع وارجع لتخاف اني ممسوي شيء
الشرطة :يلا اتحرك احنه معدنه النهار بطوله الك
كال :بابا اني مراح اتأخر بس انتم بالكم تخلونه ياخذ هنادي وياه ..لأن اذا سواها والله والي اسمه الله اراويه شيء عمره كله مشايفة
ألتفتلي بعصبية وعيونه حمر كال : وانتي اذا خطت رجلك باب البيت ما تلومين الا نفسج ..مفهوووم ..اني راجع
هو طلع ويه الشرطة وأمه كعدت بالأرض وضلت ادك على وجها
اجه عمو ولزمها من ايدها كومها وكال : اهدي اسراء هو كال ممسوي شيء وحيرجع واني محسكت وهسة الحكه واتأكد من كولشي
لبنى بقت بمكانها حاطة ايدها على حلكها وتبجي
وانه تركت كلشي وركضت لهيثم حضنته حيييل وابجي شكد مشتاقتله ياربي
حضني هو وضل يمسح على ضهري ويكول:لا تبجين حبيبتي ..لا تبجين يبعد اخوج انه هسة هنة وياج وما راح ارجع بلياج
رفع وجهي يمسح دموعي وكال :يلا حبيبتي جيبي غراضج وخن نمشي
هزيتله براسي وركضت للدرج صاح عمو :هنادي
شفت بعيونه حزن وخالة بس تبجي ما سكتت دقيقة ولبنى تباوع الي بحقد
نزل دموعي ما كدرت اشوف العتب الي بعيونهم كملت صعدتي وخليت بس ملابسي الي جبتهن وياي ما خذيت من الي اشتراهن ولا اي شيء
طلعت عبايتي لبستها وانتبهت لديه نزعت المحبس والحلقة وسحبت التراجي من ذاني
ماريده يكول خذيت شيء منه وراح اطلع من البيت مثل ما دخلتله أول مرة
نزلت بسرعة ورحت يم هيثم
كالت خالة وعيونها مغوركة بالدموع :هاي هيه هنادي هيج جنتي انتي متضايقة منه وتتمنين تخلصين من عدنه
لويش احنة قصرنا وياج بشيء ..ضغطنا عليج بشيء
ليث محبج واهتم بيج ؟!
نزلت راسي وبجيت..خله هيثم ايده على ضهري وكال :هنودة يلا
كال عمو :احنة ندري طريقة زواج ليث منج غلط ومو صحيحة ..بس الي اني وانتي وكل احنة متأكدين منه ليث يحبج وهذا السبب الي خلاه ميفرط بيج وحتى لو جان يبين غير هالشيء ..بس انتي تعنيله هواي
واذا جنتي ممقتنعه أو ممهتمة بهالحجي مثل متردين الله وياج
خذه هيثم الجنطة وطلع وانه باوعت الهم صح جانو كلش زينين وياي بس انه ما اكدر اضل ويه ليث لازم ارجع لهلي
مسحت دموعي وطلعت ورا
ركبنا بسيارة تفاجأت هيثم منيله حتى يشتريها بس كلي سيارة أستاذ وائل وسمحله نرجع بيها للبصرة جنت اباوع للشوارع وانه ابتعد عن البيت
جانت دموعي تنزل وما توكف ما عرفت شنو السبب نص مني فرحانة لأن راح ارجع لهلي
ونص ثاني ما اعرف شنو خايفة لو ضايجة بس من راح اوصل لهلي اكيد راح ارتاح
جان هيثم يحجيلي عن كلشي صار بذيج الأشهر وشلون الله رزقهم وحالتهم صارت زينة وشكد مشتاقيلي امي وابوي وفهد والبنات
وانه فرحت ونسيت على شنو جنت ضايجة اصلآ
بس بنص الطريق حسيت بدوخة ولعبت نفسي
انتبهلي هيثم ووكف السيارة
فتحلي الجام وكال :شبيج هنودة ..
كلت بتعب : ما ادري دايخة ولعبانة نفسي
نزل وكال :يمكن جا ما ماكله شيء وسيارة صار هيج بيج راح اجيبلج اكل وماي
أشرتله بأي ونزل هو بسرعة راح لمطعم بنهاية الطريق
جابلي ماي وعصاير ولفات فلافل وهمبركر وكباب
كال :نوعتهن الج خاف مشتهية وحدة منهن
كلت : شكرآ خوية حبيبي
كال بالعافيه هنودتي...يلا اكلي لا تضلين جوعانة
خذيت الهمبركر لأن ماحب الكباب بس دنيتها على حلكي وشميت ريحتها وهي كلبت نفسي كلاب
فتحت الباب وركضت اتقيئت حسيت روحي تريد تطلع أول مرة تصير وياي
اجه هيثم وراي بسرعة وكال : سلامات هنودة شبيج
جاب الماي وغسلي وجهي
كلت :لا تخاف خوية يمكن اليوم معدتي تعبانة شوية
صبلي الماي غسلت وكملت ورجعنه للسيارة
**
وصل سامر للمركز وسأل عن ليث كالوا هو بغرفة التحقيق هسة ومراح يكدر يشوفه
كعد وانتضره وهو يندعي كون هالشيء يطلع جذب
شوية ووصل مروان لأن هو اتصل بيه
مروان : السلام عليكم..ها عمو بشر
سامر :وعليكم السلام..بعده بالتحقيق ..مروان انته اقرب اصدقائه كولي هم شكيت بيوم من الأيام هو عنده ولو شيء بسيط يثبت هو متورط بهيج بلاوي ؟
مروان : لا عمو ولا مرة شفت عنه شيء يثبت عنده علاقة بهالأمور دايمآ اشوفه بمكتبه وحتى ميطلع منه الا بالأوقات الضرورية
خله ايده على رأسه وكال :لعد شلون صار هيج و شنو هي الأدلة الي عد الشرطة ضده ؟
كعد مروان يمه خله ايده على جتفه وكال :لا تخاف عمو كال يا الله ان شاء الله يحلون الغلط ويطلع ليث منها لأن هو معنده هيج شيء
رفع ايديه للسمه وكال :يارب..يارب
ليث : دخلت عالضابط حتى يحقق وياي أول ما دخلت كلي اكعد كدامي واني كل أفكاري يم هنادي بس لا تروح ويه هيثم وكل كلامي تشمره ورا ضهرها؟ بس مراح اسكتلها هي واخوها ..الا اربيهم من جديد
كعدت لزم الفايل وضل يكلب بيه جان يضربه عالميز ويعيط:لك شنو هاي كل هالشغل والثروة ما شاء الله ومشابعتك جاي عالمخدرات الي بيها أذية وخساير بأرواح الشباب ؟!
انته شنو من بشر فهمني؟!
كتله: سيادة الضابط اني ما الي اي علاقة بهالتجارة ومثل مكلت انته اني عندي خير ونعمة ميحتاج اشتغل هيج شغله
صاح :لك انته جاي تستهزئ بيه شنو اني زعطوط كدامك ؟!
لعد هاي الأوراق والأدلة شنو منين اجت وكلها بيها توقيعك انته ؟! تعترف لو ادزك لغرفة التعذيب حتى تغرد براحة ؟!
تنهدت وكلت: حضرتك بس اسمعني اني مالي اي دخل بهالمخدرات هاي ؟
وحنطيك اسم الي لعب عليه هالعبة هاي وورطني لأن رفضت هو راد يوكعني بيها ..
الضابط :اني اسمع..بس خليها بعلمك انته حتنسجن على ذمة التحقيق لحدما نتأكد من كلامك وهالفترة احتمال أطول حتى شهر
ضجت هواي لا مستحيل اضل كل هالمدة لازم اطلع واتأكد وياريت هي بعدها بالبيت ساعتها حخليها تعيش مثل الملكات بس يا ويلها لو عايفتني..محيخلصها مني أحد
الضابط :يلا احجي
ليث :....
**
هنادي : وصلت للبيت ونزل هيثم فتحلي الباب وشال جنطتي
بس اجت عيني على الحديقة كبرانة وزارع بابا بيها شغلات جديدة بس شفتها وشفت الباب دمعت عيوني وضحكت بفرحة ممصدكة رجعت الهم أكثر من نص سنة انا ما شايفتهم
ركضت قبل هيثم وكفت بالباب دكيته وكلبي دكاته صارت سريعة من الفرحة اضحك وابجي فتح بابا الباب ومن شافني ما صدك كال بفرح :هنودة
ذبيت روحي بحضنه وحضنته حيل وانا ابجي وهو يمسح على راسي وبجى وياي وهو يكول :اه يا هنودة شكد مشتاقلج يابنيتي
اجن امي والبنات على الصوت شافني وهنة ركضن الي بسرعة
ضلينا بالربع ساعة احنة بس نبجي وفرحانين حسيت روحي توها يلا رجعت ..حسيت هسة تنفست براحة وكل شيء شفته راح
ورا ما كعدنا وارتاحيت شوية باوعلي امي وابوي وكالوا: هنودة شبيه وجهج هيج مصوفر احجي بس لا أذاج لو ضربج ذاك الحقير
رادت احجي
وكال هيثم : هي جانت زينة بس بالطريق لعبت روحها وضلت تتقيئ هذا هو السبب
كال بابا :يمكن تعبت من الطريق الحمد لله اذا هيج
بس امي ضلت تباوع عليه نضرات غريبة وكالت: اي الحمد لله
تمددت وخليت راسي بحضنها وكلت :مشتاقة انام بحضنج واشم ريحتج
باستني براسي وكالت :حضني كله الج حبيبتي
تقدمن حياة وليلى عليه وكالن: هنودة هذا التراك كلش حلو عندج مثله
ألتفتت عليهن وكلت :لا آسفة بس اني مجبت شيء منه جبت بس ملابسي القديمة واجيت
باوعلي وفتحهن عيونهن عليه
استغربت نضراتهن وكلتلهن :هاي شبيجن تباوعن عليه هيج ؟!
كالن: هنادي حجيج مختلف وضحكن
ضربتهن ماما على كيف وكالت : بسجن ولجن يلا روحي يوم شيء لأختجن خل تاكل ما سمعتن هيثم كال ما ماكله شيء
كامن بسرعة وكالن :صار احلى طبخة لهنودة شنو مشتهية ؟
صفنت شوية وكلت :مشتهية دولمة حلوة
باوعن الي وضحكن وامي ضلت صافنة عليه
كعدت من حضنها وكلت :شنووو..غير انتن سألتني شمشتهية؟!
حياة :اي حبيبتي بس انتي ما تحبين الدولمة الحلوة مو تكولين تلعب روحي منها
ليلى :ما مصدكة هاي أختي هنادي الي تحب الحامض وبس
صاحت ماما:كافي يلا روحن جهزن الدولمة الها
كالن :بس ماما غير نعرف شنو غيير اختنه؟
كالت:ليلى ..حياة
هنة راحن وهي لزمتني و كالت : يمة هنودة انتي حامل شنو ؟!
استغربت وباوعت عليها كلت : لا ماما
كالت :يعني حللتي ؟!..زين من يمته ما اجتلج الدورة ؟
كلت :لا ما حللت..بس ما حاسبة من يمته يمكن شهر لو أكثر
كالت :معناتها لازم نروح للدكتورة ونحلل باجر جهزي روحج
كلت :لا ماما اني مو حامل ..قصدي يمكن هيج معدتي اذتني بالسيارة واشتهيت الحلا مو معناها حامل
لزمت جفي وكالت :حبيبتي كولي يا الله شكو بيها اذا حامل بالعكس الأطفال همة حلات الدنيا
كلت : والطلاك ماما ؟!
رادت تحجي واندك الباب ...
