رواية حكاية ترف الفصل الخامس عشر 15

لا تمسح دموعك 

بل امسح من حياتك

من تسبب فيها  💔❤️‍🩹

ترف 

ركضنا كلنا عالباب ومن فتحنا چان عمو فارس وعمه سعاد وشهم وخطيبته منى 

... احنا كلنا صحنا شكو شكو..

- عمو احنا شكو ؟؟ لو انتو شكو ...

- عمه سعاد : وين ام سيف؟؟؟ شبيها البارحه ...

- شهم : من تخربطت ليش ماجيتو علينا...

هاااا هسه افتهمنا شنو  الموضوع ...  الظاهر دروا بأمي متخربطه والبارحه گضيناها بالمستشفى وجاي يستفسرون..

دخلناهم جوه ورحبنا بخطيبة شهم لان البنيه أول مرة نتلاگه وياها بعد حفلة خطوبتها وهم أول مرة تدخل بيتنا..

- عمه:  وين امچ اريد اشوفها  (چانت كلش خايفه على امي لان هن صدگ مثل الخوات) 

- هسه نايمه لان اخذت علاج وبي منوم 

- عمو احچيلنا شنو الصار

- كل الصار امي  بالليل گالت راسي يوجعني..وخشمها بدأ ينزف دم ، خفت عليها وديتها للمستشفى 

- عمو ليش رحتي لابو محمد  وماجيتي علينا ...

- دگيت الباب عليكم وما سمعتوني ركضت لبيت ابو محمد 

- شهم ليش ما خابرتيني ؟؟

تجاهلت سؤاله ومارديت عليه واصلا ما باوعت بوجهه.. 

وكملت كلامي ويه عمو وعمه سعاد وشرحت الهم تشخيص حالة أمي وتعرضها للجلطة الدماغية وارتفاع ضغط الدم 

وكلساع يلومون بينا ليش ما گلنالهم ساعتها وهمه ياخذوها للمستشفى 

دخلت للمطبخ وعلى السريع سويت عصير وحضرت قطع كيك وطلبت من سيف ورهف يقدمون الضيافة..لان آني ماريد اتقابل ويه شهم .. رحت على ماما لغرفتها وگعدتها على كيف وگلت الها بيت عمو يمنا وحچيت الها على الصار  ومن گلت الها أدخلهم يمچ لان يردون يشوفوچ گالت لا آني اطلع الهم..

لبستها ربطه وبشت ..طلعتها وچانت گوه تمشي ووجها اصفر ومبين عليها المرض .. من شافتها عمه حضنتها قوي وگامت تبچي بس آني راسا گلت عمه عمه مايصير حالتها ماتسمح بالبچي والتوتر والحچي الهواي..همه تفهمو الوضع ورأسا تحول البچي الى ابتسامات والحمدلله على السلامه...  وهم ماما رحبت بخطيبة شهم لان اول مره تدخل بيتنا أما شهم ضل ساكت لان كلنا لا حچينا وياه مثل كل مره ولا اصلا باوعنا عليه ويمكن افتهم وحس بنفسه ملبوس من جانبنا وظل مدنگ.. آني ما گعدت يمهم بقيت بالمطبخ تنفيذا لتوصيات امي 

بس سمعت عمو من چان يحچيلهم شلون عرف بمرض امي

يگول عمو... قبل شويه چانت عصريه وطلعت بالباب وبيدي صونده ارش الزرع والأشجار واستغربت بيتكم طافيه كل الاضويه بس گلت يجوز طالعين للسوگ لو لبيت خالهم..المهم طلع جارنا ابو محمد صار مده ماشايفه تسالمنا وصحتك واحوالك .النوب سألني 

- شلون صارت ام سيف ؟؟؟

- آني ستغربت سؤاله : ليش شبيها ام سيف زينه؟؟؟

- هاا يعني بعدكم ماتدرون... البارحه بالليل اتخربطت ووديناها آني وأم محمد للمستشفى وچان عدها جلطه دماغية وضغطها كلش صاعد... وبقينا اربع ساعات ياله استقر وضعها وگدرنا نطلعها... 

- آني اتخبلت شلون تروحون لأبو محمد وماجيتو علينا ..بيت بي اربع زلم تعوفو وترحون لأبو محمد..

- امي خويه دگينا عليكم الباب ومحد سمعه ..ماصار شي انت اخويه وأبو محمد هم مثل اخويه 

- زين ليش ماتصلتو علينا بالتليفون 

- امي تليفوناتنا مابيها رصيد...

- كمل عمو..دخلت للبيت وصحت على سعاد وحچيتلها وخابرت على شهم لان چان ماخذ سيارتي وطالع هو ومنى يردون يشترون غرفة نوم.. حچيتله وگتله هسه ترجع بسرعه لان اريد السيارة حتى ناخذ ام سيف هسه لطبيب اختصاص.. وشهم من سمع اجه طاير على السريع وحتى كم مره راد يسوي حادث...وتره  دگينا هواي عالباب يمكن چنتو نايمين والنوب سعاد تخابر عليج يطلع مقفول وشهم يدگ على ترف يطلع مقفول..شالقضيه ليش قافلين تليفوناتكم ...

وهسه ياأم سيف حضري روحچ حتى ناخذچ آني وسعاد للحارثيه اعرف طبيب اختصاص هناك

- امي تشكرت منهم وگالت اليوم ماگدر اروح خلوها على الاسبوع الجاي أحضر نفسي وان شاءالله نروح 

- ضحك عمو كال خوش يعني آني وسعاد ناخذچ مو ترحين لأبو وأم محمد 

- امي لا وعد انت وسعاد تاخذوني هههه

استأذنو حتى يطلعون بس عمه سعاد اجتني للمطبخ وگالت هي راح تسوي النا عشا وهم تسوي شوربه صحيه لأمي لان تدري بيه ماعرف كلشي اسوي وأمي مريضه مو مال توگف بالمطبخ وهم بذاك الوكت ماكو دلڤري حتى نطلب عشا غدا أكل

وخلال ساعه اجتنا صينية العشاء وكاسة الشوربه.. وخطيه عمه هي الي طبت يم أمي توكلها

خالو بهذا الوقت چان بالشمال ورغم هو يوميه يخابرنا بس امي ماگالت له على مرضها حتى لا تشغل باله وگالت من يرجع لبغداد اكيد راح يجي يشوفني وعود احچيله

وبيت جدو هم من سمعو بالخبر أجونا وعاتبونا ليش ماخابرنا عمو ليث يجي يأخذنا للمستشفى وصدك الي گال لمة الاحباب وسؤالهم عليك تسوه الدنيا

والله كلشي مانريد بس كون  امي تعدي هاي الأزمة وترجع بصحتها مثل الأول ...

استمرت أيامنا عاديه..امي تاخذ علاجها بعد تشخيص الطبيب الاختصاص الي عمو فارس وعمه سعاد أخذوها اله وهم چان اهم توصياته اكل صحي وتبتعد عن التوتر والعصبية  

وچانت عمه سعاد يوميه من تطبخ لبيتها غدا وعشا تعزل النا وهم تسوي شوربة لأمي.. شهم ابد ما شفنا وحتى ما نسأل عليه بس چانت مرات عمه تطينا اخباره هو وخطيبته من تسولف هي وأمي وشلون جاي يطلعون تقريبا كل يوم حتى هم يتعرفون واحد على الثاني (حسب كلام عمه سعاد) وهم يجهزون ملابس وغراض لعرسهم .. وطبعاً عمه هواي تمدح بمنى وبأخلاقها وبندارتها ...

وبدت ايام العطلة تخلص والاسبوع الجاي راح يبدي الدوام مال المدارس لرهف وسيف وهمه چانو تقريباً محضرين كلشي من ملابس وجنط وقرطاسيه وجلادات 

بهاي الفترة ضليت افكر 

وقررت لازم اتغير ولازم  اتكفل بكل شي وبعد نقلل اعتمادنا على بيت عمو وهم اخفف شويه عن امي لان صحتها مو مثل الأول

اول شي لازم اتعلم اطبخ حتى ما ابقى يوميه انتظر صينية الأكل تجيبها عمه سعاد..

لازم نقسم شغل البيت بيني وبين رهف حتى نقلل شويه من تعب ماما الي چان كل شغل البيت عليها

وهم من راح يبدي دوام المدارس آني راح اكون المسؤوله لمتابعة وتدريس سيف وحتى لرهف إذا طلبت مساعده... 

خالو رجع من الشمال واجه لزيارتنا ومن عرف بمرض امي اتخبل وضل يحچي علينا شلون ماگلتولي وشلون ما خبرتوني وحاسبيني حسبة الغريب .. وهم گال يأخذها لطبيب اختصاص حتى تسوي فحوصات كامله بس امي گالت مايستوجب لان بيت أبو شهم ودوني لطبيب اختصاص وجاي آخذ العلاج وما حچتله عن السبب الحقيقي لجلطتها وخلتها سر بيناتنا .. بعدين خالو وجه كلامه لسيف ورهف وگال

- الاسبوع الجاي راح يبدي دوامكم .. گولو شنو محتاجين حتى احظره الكم

- لا خالو كلشي اشترينه ما محتاجين شي ..

- وأنتي ترف بعد تقريباً شهر تطلع قبول الجامعات ويبدي الدوام حضرتي شي لو بعدچ

- بعدني خالو مامحضره هسه اهم شي ماما تصير زينه والباقي كله سهل

من راد يطلع ضل كلساع يوصي لاتعبون امكم وأكلها لازم يكون صحي واي شي يصير رأساً خابروني...

من بدأ دوام المدارس ونبقى بس آني وأمي بالبيت چنت اطلب منها تگعد بالمطبخ وآني أشتغل وأحضر الغده وهي بس توجهني وتعلمني على الطبخات وعلى نوع البهار والكميات المطلوبة.. ومن اخلص تجي تشوف النتيجة وتضوگ الأكل چانت تتعجب لان كلش مضبوط ..ومن اسمع كلام المدح والاطراء على طبخاتي المتواضعة چنت احضنها وأكولها شكرا لان انتي الجاي تعلميني وهم دائما احضنها واتأسف الها على اغلاطي السابقه الي سببت الها مشاكلها الصحية 

وخلال هاي الفترة صرنا آني وماما قريبات كلش من بعض صرت كلشي احچيلها واحسبها مثل الصديقه الي وهي هم صارت تحسبني مثل اختها وصديقتها

من يجون سيف ورهف من المدرسة وأثناء الغده آني وامي نسألهم عن دروسهم وواجباتهم وتحضيراتهم حتى من يرتاحون شويه نبدي نحضر الواجبات

وبيوم چنت بغرفتي وچان الوقت العصر سمعت من الغرفه المجاوره لغرفتي (غرفة شهم ) اصوات زلم وطخ وطاخ..باوعت من شباك غرفتي على شارعنا.. وشفت اباب بيت عمو فارس اكو لوري وجاي ينزلون أخشاب غرفة نوم... غرفة زواج شهم

نزلت دمعه مني بس رأساً مسحتها .. لا ترف هذا ما يستحق هاي الدمعه الغاليه 

نزلت جوه وظليت اشتغل واغسل هدوم وامسح بغراض الكاونتر واجلف بگاع المطبخ...بس اريد اخلص وكت واشغل نفسي بأي شي

فكرت وقررت لازم اتخلص من اي شي يربطني بشهم ..  وابسط دليل هسه من عرفته جاي ينصب أخشاب غرفة النوم ضجت ونقهرت. يعني بعدني افكر بيه ... لازم اتخلص من شعوري هذا. 

رحت لأمي بغرفتها..گعدت يمها.. 

- كلت الها ماما ممكن اطلب منج طلب 

- اي ماما گولي

- اريد اغير مكان غرفتي

- شلون يعني 

- اريد أنزل بالغرفه الجوه ونصير آني ورهف بيها والغرفة الفوگ تصير لسيوفي

امي ضلت شويه تفكر:

- بس سيف بعده زغير مومال وحده بغرفه والنوب فوگ

- لا ماما أولا سيف جاي يكبر عمره ١١ سنه وسادس ابتدائي يراد يستقل وحده

وثانيا مثل ما اتفقنا وحتى اكون صريحة وياج آني ماريد ابقى فوگ واسمع صوت وحركات بغرفة ابن عمي (ماگلت اسمه)

امي تفهمت الوضع حضنتني وگالت

-  تمام من باچر نبدي بالتغيير

ثاني يوم وبأتفاقنا احنا العائلة قررنا..نبيع غراض غرفنا آني ورهف وسيف..ونجيب غراض جديده و شبابيه مو مثل ماچانت مال اطفال وكلها رسوم شخصيات كرتونيه 

اجه ابو الدوار يشتري غراض مستعمله واخذها كلها شلع قلع.. وهم عمه سعاد من شافت العمال ينگلون بالغراض اجت واستفسرت وامي گالت الها نريد نجدد لان صارت غراضنا عتيگه 

من فرغن الغرف قررت امي تجيب عمال يصبغون حيطان الغرف والشبابيك والأبواب وطلبت من عمو ليث إذا يعرف احد وهم يتعامل وياه وخلال ثلاث ايام تجددت الغرف وبدينا نشتري أثاث جديد وچان بوكتها الأثاث التركي هو الدارج.. غرفة ام النفر شبابيه لسيف.. وغرفة  بسريرين الي والرهف وبردات ومستلزمات جديده لكل غرفه .

وحتى من جتي عمه سعاد وشافت غراضنا اتعجبت على جمالهن وگالت لعد شبي شهم  ماجاب من هاي الموديلات وركضلي على غرفة موديلها قديم مال زمن العصملي (تقصد العثماني هههههه)