رواية روح أيوب الفصل السادس عشر
-ماتش!
غريبة بس ماشي
قولت كدا لنفسي وأنا واقفة قدام الدولاب بختار اللبس اللي هنزل بيه مع أيوب
فجأة قال هننزل نتفرج على الماتش سوا واحنا متجوزين اهوه بقالنا سنة عمري م شوفته بيسمع ماتش
اه ساعات بتيجي سيرة الكورة ،ينزل حجز مع اصحابه لكن ماتش!
اخترت دريس لونه نبيتي وخمار رصاصي وشنطة نفس اللون وعملنا ماتشينج سوا
مينفعش نروح ناكل وخلاص؟!
-حلو الكافية دا
-اه ،ومش زحمة
قعدنا وكل شويه أبص عليه
فين الحماس؟
فين التشجيع ؟
فين الكورة؟!
-أيوب!
-ايوا يا حبيبي
-هو احنا هنا ليه؟!
بصلي بانتباه
-أقولك حاجة؟
-قول
-أنا مبحبش الماتشات ومليش في الكورة
ضحكت على شكله وهو بيقول كدا
-طب م كان من الاول
-باين عليا؟
-قعدتك قعدة واحد ملوش في الكورة ،بصتك للشاشة بصت واحد ملوش في الكورة
-قولت نجرب حاجه سوا
-بصراحة أحسن حاجة إنك مش بتتفرج على ماتشات ،مش بتشوف الناس بتعمل اي؟!
-حاجة غريبة فعلا
ليه أتعب أعصابي وأعرض نفسي للتوتر دا والشدة دي عشان لعبة ،آه لو فريق بحبه كسب هفرح بس عادي ولو خسر هزعل شويه بس برده عادي ،ندي كل حاجه حجمها الطبيعي
نفرح ونزعل في المعقول اللي ميأثرش علينا ولا يشغلنا عن حياتنا
يبقى مثلا ماتش وقت الصلاة وفيه ناس على القهوة سايبه صلاة الجماعة
و فيه بنات كمان بتسمع ماتشات ممكن تأخر الصلاة
واللي بيشتموا اللاعيبة !
يعني تخيلي ١١ لاعب في الملعب لو حد شتم كل واحد فيهم شتيمة يبقى خد كام ذنب بإذن الله؟!
وشتيمة بالأهل وخوض في أعراض ربنا يعافينا ويهدينا جميعا يا رب
يعني يبقى اللاعيب مضايقك وكمان تديله من حسناتك!
-فعلا عندك حق ، كل حاجة لما تزيد عن حدها بتتقلب ضدها
-عشان كدا أنا بلعب بس مع صحابي لكن مليش في الماتشات أوي الحمدلله
-طب هنعمل اي دلوقت؟
ابتسم
-كنت مجهز خطة بديلة
-تحفة!
كنا جايبين أكل -شاورما وكريب-وكنا قاعدين في زي حديقة عامة كدا ومعانا المشاريب بتاعتنا والجو كان دافي أوي!
-أي خدمة عشان تعرفي إني مش حارمك من حاجة
-متشكرين يا سيدي
قعدنا والقمر كان منور في السما
كان بدر!
كنت مركزة معاه ،سبحان الله!
-يشبهِك
-ايه؟!
القمر،الدنيا ضلمة لكنه بيفكرك إن النور موجود ،ولو لوحدك في الطريق هيفكرك إنه وَنَسِك ،وتحسيه ماشي معاكي مش سايبك لوحدك ،ممكن تفضلي بصاله طول الليل من غير ملل ،ولما النهار يطلع مش هيبان لكنك عارفة إنه دايما موجود
كنت بصاله وأنا مبتسمة من قلبي !
بالله أرد أقول اي بس ؟!
-حلو
ضحك
-هو اي؟!
بصيت في الأرض
-كلامك يعني
ضحك بصوته كله
-يا ربي !
متجوزين بقالنا سنة ولسه بتتكسفي
-خلاص بقا الله!
غمزلي
-طب اي مش عايزة تقولي حاجه؟
أنا مبعرفش أعبر بالكلام زيه !
بصيتله شويه عشان أستجمع شجاعتي منه ولقيت نفسي بقول
-لو أنا القمر فأنت شمسي يا أيوب ،ربنا رزقني بيك عشان نوري يبان !
معرفش قولت كدا ازاي
لكن اتبسطت لما شوفت الضحكة على وشه !
كملنا اليوم برا وروحنا مبسوطين الحمدلله ومعرفناش نتيجة الماتش !
لكن الأكيد إننا اتبسطنا 🤎
