رواية روح أيوب الفصل السابع عشر
-اسكتي بقا!
اي،مبتزهقيش؟!
أنا مش عارف أقعد في البيت منك ،زهقت من البيت ومنك
أنا سايبهالك وماشي!
قعدت مكاني ومش قادرة أنطق! ولا حتى أعيط!
دا أيوب ؟!
زهق مني أنا!
كل دا عشان بقوله بقالك فترة متغير وبسأله لو فيه حاجه شاغلاه ،أنا غلطانة ؟!
قعدت أفكر أعمل اي وفي نفس الوقت بعيط
أنا لو كنت شاكه إن فيه حاجه ورا تغيره يبقى دلوقت اتأكدت
دا مش أيوب زوجي !
بس مش معنى كدا إني هعديها
فكرت وقررت هعمل اي
شويه والباب فتح
بيبص في كل حته إلا عنيا
قبل م يتكلم سبته ودخلت الأوضة وقفلت عليا ،وغصب عني عيطت تاني
-افتحي يا روح
حقك عليا ،أنا مش عارف قولت كدا ازاي
صدقيني دا أنا ماليش غيرك ،أنا أيوب حبيبك
-أنا معرفكش !
وطالما زهقت مني ومش عارف تقعد في البيت بسببي يبقى هريحك مني يا أيوب !
اتكلم بخضة بانت في صوته
-يعني اي؟!
-يعني مش هخليك تلمح طيفي يا أيوب ،مش دا اللي هيريحك ؟مش دا اللي يخليك تحس إنك مرتاح؟أنا هعمل اللي يريحك مش كدا يا حبيبي؟!
قولت كدا وفضلت أعيط
فكرت أروح بيت أهلى لكن كدا الموضوع هيكبر ،كدا كدا مكنتش هحكي حاجه ،لكن كدا هنبعد أكتر
صحيت تاني يوم بدري جهزت الفطار وحطيته على السفرة ودخلت الأوضة تاني
حبيبي كان نايم على الكنبة بهدومه !
بعد شويه صحي عشان شغله ،خبط عليا
-طب مش هتطلعي تفطري؟
-لأ
-مش هعرف آكل من غيرك
-بجد؟
غريبة م انت بقالك يجي شهر بتتغدى وتتعشى لوحدك مجاتش على الفطار
اتكلم بعصبية
-ماشي يا روح !
دا بيتعصب كمان!
ولما معملش غدا دلوقت؟!
فضلنا على الحال دا اسبوع ،مفتكرش إنه شافني فيهم
كنت واخده أجازة من شغلى،وبعمل شغل البيت وهو برا وكل اللي بيحتاجه بيكون جاهز ،لكن لسه مش قادرة أكلمه
لحد في يوم رجع بدري و..
-استني متهربيش!
أنا جاي مخصوص بدري عشان نتكلم
كفاية بُعد بقا!هنتعاتب زي عوايدنا
بصيت في الأرض كعادتي لما أزعل من حد معرفش أبص في عينه وصوتي اتخنق من كتمان العياط
-وهو مين اللي بِعِد الأول يا ابن الناس؟
قعدني على الكنبة وقعد قدامي
-أنا
وغلطان ومعترف كمان
كان المفروض أشركك معايا في مشاكل الشغل وأعرفك إني مضغوط الفترة دي عشان كدا بتأخر برا وببقى مش مستحمل أي كلام بدل م أطلع الضغطة دي عليكي بكلام ميصحش ومش حقيقي
-مش حقيقي؟مش في العصبية بتبان الحقيقة والا اي ؟!
-إلا دي !
أحلفلك بايه إني مش عارف قولت كدا ازاي
إنتِ أدرى بيا مني !
تفتكري ممكن يكون دا اللي جوايا من ناحيتك
وديت وشي الناحية التانيه
-الله أعلم!
انت قولت اللي في قلبك وخلاص
-يا روح!
أنا عمري م ازهق منك ،والبيت دا انتِ روحه
كانت كلمة ملهاش معني وراحت لحالها بقا
بصيتله
-يعني مش هتشيل همومك لوحدك تاني ؟
-أبدا ان شاء الله
-ولا تتعصب عليا من غير سبب ؟
-عُمري
-ولا بسبب ؟
-ان شاء الله
نبرتي لانت
-وهتحبني على طول ؟
ابتسم
-هحبك على طول
-اذا كان كدا ماشي
-ماشي اي؟!
-موافقة أسامحك وانت تحبني! 🤎
