رواية عشكت جنوبية الفصل الثامن عشر بقلم نسرين الاسدي
هنادي : نفتح الباب ومصدكت الي شفته ..طلع جايب امه وابوه وحتى لبنى جاية وياهم ومروان
وشباب معرفتهم يمكن اصدقائه لو يشتغلون وياه
دخل وكال : ها شرايكم بالمفاجئة ؟!
دخلوا عمو وخالة وسلموا على اهلي واعتذروا عن كل شيء سوا ليث ذيج الفترة
وبعدين داروا عليه وهمة فرحانين
كال عمو : مبروك على الحمل بنيتي هنودة متتصورين شكد فرحنة من كال ليث ..هيج هنودة تبعدين عنه مو احنه تعودنه عليج واشتاقينالج
اتقدمت عليهم سلمت وحضنت خالة هي بوستني وكالت : الج وحشة حبيبتي ..ولو احنة زعلانين منج لأن تركتينه ورجعتي ..بس يلا منلومج لأن ليث يستاهل حتى يتأدب وضحكت
كال هو بعصبية شوية : ماما ..شنو هاي انتي شجاي تكولين ؟!
كلتله : اسكت انته ولا صوت كل الي صار بسببك ..جان صار شيء لحفيدنه واحنة مندري
التفتت على لبنى لابسة ملابس طوال ومستورات وشال هم بس طالعة كذلتها استغربت من هذا التغيير المفاجئ بس فرحت بنفس الوقت بلكي الي صار خلاها تتغير
اجت عليه سلمت وحضنتني واني مستغربة
كالت : مبروك هنادي
: الله يبارك بيج لبنى ان شاء اليوم الج الي تزوجين ونشوف اطفالج
هي رفعت عيونها لهيثم ورجعت نزلتهن بسرعة وكالت : شكرا
كعدوا بعدها وقدمنالهم المي والعصاير واني بعدني ما فاهمة شنو غايت ليث بالظبط
لحد ما كال هو : عمو اني اليوم جايب اهلي حتى نخطب بتكم الحلوة هنودة والعرس هسة ..شتكولون ؟
كال بابا : واذا كتلك انه ما موافق ؟!
ليث : هاي شلك بيها عمو ؟!..لايكون صدكت نفسك ترا هنودة زوجتي ..بس اني ردت الشغلة تصير رسمية ولا اكثر
ضحكوا كلهم واني اباوع اله مستغربة معقولة هذا ليث ؟
مجنت متوقعه حيغيره خبر الحمل لهلدرجة هاي
ليث : يلا هنودة خن نروح للصالون ونمر بالأستوديو وناخذ كم صورة
كمت وطلعنا بسيارته وسوتلي ام الصالون تسريحة وطكينا صور عد وحدة مصورة جنت فرحانة كلش اخيرآ اني صارلي عرس نفس بقية البنات ولبست البدلة البيضة مثل مجنت احلم
وحسيت بهاي اللحضات هو يحبني من صدك وراد يحققلي كل شيء حرمني منه بالبداية
**
هيثم : ماتوقعت ليث راح يحكم ضميره ويسوي كل هالشيء ورغم بعدني ما ناسي الي سواه بس من شفت الفرحة بعيون هنودة نسيت كلشي وفرحت لفرحتها جان مبين عليها فرحانة كلش
بعد ما رجعوا من الصالون طلع هو مأجر قاعة ومجان بيها احد غريب جانت حبيبتي هنادي طالعة جنها كمر
وشغلوا موسيقى وركصوا عليها
وحتى فساتين حياة وليلى اعتبرهن هو هدية وجانن كلش فرحانات بيهن
هذا كله وانه ملاحظ نضرات لبنى المكسورة الي جنها تحاول تكلي شيء من خلال عيونها بس انه مجنت مهتم واضاهر ما شايفها
بس شفت ملابسها والي اتعمدت تلبس اللبس الي اني طلبت منها تلبسه ذيج المرة ورغم جانت حفلة اخوها وتوقعت راح تلبس مكصر ومكياجها طاك بس هي سوت عكس الي توقعته ..وملابسها ومكياجها جانن كلش عادية ..بصراحة كبرت بعيني
**
ليث : جنه جاي نتمايل عالموسيقى واني اتأمل ملامحها ..شكد احبها وهسة حبي الها صار مضاعف نص الها ونص لطفلنا
رفعت عيونها الي وابتسمت متعرف هاي ابتسامتها شلون تخطفلي كلبي حضنتها الي اكثر وانتبهت على البدي كلت : هنودة هاي ليش لابسة هيج ؟!
كالت : وشلون تريدني اضل بالفستان هيج وانته ما شاء الله محولي ركبتي وصدري خارطة غير اشتهر
ضحكت وكلت : وشكو بيها حبيبي ..انتي مرتي تعرفين شنو يعني مرتي ..يعني محد يحقله يعترض شما نسوي
كالت : هاي انته عندك كلش عادي اني استحي اطلع هيج كدام ابوي وخواني
تقربت على ذانها وهمستلها : عادي حبيبتي اليوم حنسوي غيرهن ..وهلمرة حيصيرن بأماكن ثانية وغمزتلها
انصبغن خدودها حمر وضربتني على صدري كالت : انته صدك متستحي ليث
حضنتها اقوى وكلت : وليش استحي عيني ..مرتي وحلالي ..هههه
**
لبنى : سويت كولشي اليوم حتى احصل شوية اهتمام منه وهو ولا كأنه يشوفني بس يحط عينه عليه يبعدها بسرعة وكلبي الحقير يريدة ومشتاقله
شكد كرهت نفسي وكرهت حبي اله ..شنو لازم اسوي اكثر حتى تعرف يا هيثم اني هنا بس عالمودك انته كلبك حجر شنو ؟!
فهد : اكول هيثم ..انه جاي يتهيئلي لو هاي البنية من دخلت لبيتنه ولحد الأن وهي عينها ما طاحت منكك ؟!
هيثم : اسكت فهد شنو هالحجي مو عيب
فهد : وليش اسكتي عمي انته شوف بعينك تريد تاكلك بعيونها ..والله لو انه منك الا اروح اضبط وياها واخذ رقمها هم ..ولو انه ماعندي تلفون بس اشتري
صاح هيثم: فهد تسكت لو شلون ..ترا مو وكت تسربتك
فهد : هاي شبيك هيثم هو انه شكايل ؟..شفت البنية تباوع عليك كتلك روحلها ..كفرت خاب ما كفرت ..بس مو صوجك.. صوجي انه الي احجي ويه واحد معقد مثلك
هيثم : اي صوجك ..يلا ولي منا ..
ألتفت وصارن عيونه بعيونها نزلهن عالسريع ودار لمكان ثاني
**
هنادي : بعد ما خلصت الحفلة كعدنه وجابوا العشة اني مشتهيت آكل لأن حسيت لعبانة نفسي اتكترت عنهم هو من شافني هيج هم متعشى عاف العشى واجه كعد يمي
"☆ملاحضة ترى انا مجاي اغلط بالكتابة ..بس هي هنادي بعدها حجيها مو كلش نص بصراوي ونص بغدادي ..😁..يلا نكمل ☆"
كرب عليه وكال : حبيبي هنودة تردين غير شيء اجيبلج كولي ..
آشرتله براسي وكلت : لا ممشتهية شيء روح انته اكل
راد يحجي واندك باب القاعة اني ردت اغطي شعري هو لزم ايدي وكال : لا ماكو داعي ..اني حروح اشوف منو واجي
فتح الباب وكف دقايق ومبين من الصوت مروان الي يحجي وياه
شوية ودخل وهو شايل بأيده كارتونه صغيرة معرفت شنو بيها
باوعوا اهله ابتسملهم واجه عليه خلاها بحضني باوعت عليه مفهمت
فتحها وكال : هاي هدية اجتني من لندن
كلت مستغربة : لندن ؟!
ليث : اي حبيبي ..من حبيبتي القديمة
كلت بدون ما انتبه : لارا ؟!
ضحك وشال جفي وباسها وكال : لا حبيبي هاي حبيبتي اجنبية مو عراقية ..اني من نوع الي اسافر هواي ومرة من المرات التقيت بيها هناك وهي حبتني واني هم عبالي احبها ..ضلينا سوى تقريبآ شهرين ..بس من كتلها لازم نزوج وتجي وياي للعراق هي مقبلت لهلسبب تركتها ورجعت ..واستمرت هي تتصل وادزلي رسائل اعتذار بس اني قفلت ومرديت عليها او تواصلت وياها
واليوم من عرفت اني ازوجت دزت هالهدية يمكن تريد تذكرني بيها
ما اعرف ليش بلحضتها حسيت كلبي انعصر واختنكت كلت : يعني انته جنت تحبها ؟!
ابتسم وكال : شنو هاي هنودة معرفتج ..جني اشم ريحة غيرة هنا ؟!
كلت واني متوترة وماعرف شنو صارلي بوقتها : لا مو غيرة ..بس هيج اسأل ..قصدي اريد اعرف
خله ايده وره شعري وقربني عليه باسني بكصتي وكال : لا ..اطمني ..جان مجرد اعجاب ..لأن لو جنت احبها مجان تركتها بسهولة ..وهي تتوسلني ارجع
بس الحب هو انتي ..لأن خلال ذاك الشهر الي مشفتج بيه انجنيت ..وكول شيء بيه اشتاقلج
فرحت ابتسمت وكلت وماعرف شلون كلتها : انه احبك ليث
شفته فرح كلش من سمعها وحضني حيل وكال : اموت عليج هنودتي
شوية وتحمحم عمو وكال : بابا ليث ترا لا تنسون نفسكم احنة بعدنا كاعدين
ضحكت امه وكالت : اتركهم براحتهم يا سامر غير عرسان جدد ..هههه
كال : يا عرسان حبيبتي ..اشو صارلهم اكثر من نص سنة وحامل ..عرسانيش متكليلي
كام ليث وكومني وياه كال : اني وهنادي حنضل طول عمرنا عرسان ..شنو تكولين حبيبتي
ضحكت ونزلت راسي
هو خله ايد جوة رجليه والثانية ورا ضهري وشالني كدامهم كلهم اني متت من المستحة واكله نزلني وهو ولا هامة
نزل بوسطهم وكال : يلا عذرونه اني وحبيبتي لازم انام هسة تعبانين كولش ..
ومشى للباب ..كتله : ليث اوكف ..الشارع بيه ناس واني ملابسه حجابي
غمزلي وكال : ولا يهمج حبي مروان تكفل بكولشي والسيارة مضللة محيشوفج اي احد ..
وصدك طلعنه من باب القاعة المدخل فارغ كله ولا اي احد وهو منتضر حتى نوصل السيارة ضل يبوس بي لحد ما دخلني بيها
شغل غنية رومانسية وساق بهدوء وكل دقيقة يلتفتلي لو ياخذ جفي يبوسه
**
بعد ما طلعوا ليث وهنادي اهلهم ما طولوا وطلعوا وراهم وكفوا شوية يسولفون قاسم وسامر ويتعرفون اكثر
حياة : ليلى ..ليلى ..شوفي
ليلى : شكو شبيج ؟!
حياة : ولج شوفي هذا صاحب ليث يجنن ..
ضربتها على جتفها وكالت : ولج سكتي عيب ..لا يسمعج واحد ونوب شيفكنه من هيثم وفهد غير يطلعون الفرحة من عيونه
حياة : وهسة انه شكايلة بس هو مبين عليه حلو ..
وشخصية ..حتى عيونه مايرفعهن من الكاع شكد مؤدب
ليلى : ولج كافي شنو انتي اليوم ناوية علينا ننكتل شوفي امي تحجي ويه ام ليث وابوي ويه ابوه احنة شعدنه هنا ..خلينه نروح لأخته ونتعرف عليها
باوعن مالكنها ..ليلى : هي اخته وين ؟!
حياة : اي دونت نو ..ضربتها على راسها وكالت احجي عدل لا تسوين روحج كلش شاطرة بالنكليزي
لبنى : جنه حنطلع واني احتاجت احجي وياه ضروري لأن كلبي بعد ميتحمل ومن اشوفه يضحك ويه الكل واني متجاهلني انجن اكثر
شفته واكف يم الشارع ومخلي اديه بجيوبة
تقدمت عليه وكلت : هيثم ؟!
ألتفت عليه وكال : لبنى انتي شجابج هنا ..ما يصير خاف يشوفج احد
: اريد احجي وياك هيثم ..حباب ..اسمعني
هيثم : لبنى ..الدنيا ليل والناس رايحة رادة وانا وانتي اجانب ما يصح نحجي هنا ..روحي الله يخليج ما اريد اسويلج مشاكل
تقربت عليه اكثر ولزمت ايده كلت : هيثم اسمعني اترجاك ..
سحب ايده مني عالسريع وكال : لبنى ..روحي .. انسيني يابت الناس ..انتي بطريق وانه بطريق
دمعن عيوني وكلت : هيثم ليش هيج تسوي بيه ..ليش لك اني احبك ومجاي اكدر انساك ..يعني انته عبالك اني محاولت انساك لو مفكر بيك ؟
اي حاولت بس مكدرت ..صعب ..والنبي مجاي اكدر اشيلك من كلبي ..ارحمني هيثم ..اعرف اني هسة صرت رخيصة بنضرك لأن جاي اذب نفسي عليك بس مو بيدي ..والله مو بيدي
كال : حاولي لبنى ..ومسحيني من ذاكرتج لا انه اناسبج ولا انتي تناسبيني انتي تستاهلين احسن مني
وتركني ومشى واني ضليت ابجي كل قوتي واحسة كسر كلبي للمرة الثانية ..بس هالمرة الكسر اقوى
**
هنادي : دخلنه الفندق الي جنه بيه البارحة نفسه بس هالمرة مختلف جانت الغرفة متروسة ورد ونفاخ وكيكة محطوطة على الطبلة والجرباية عليها كلب من ورد
انبهرت بيها ومصدكت هيج ليلة عرسي جانت احلى مما جنت متخيلة ليث كله مفاجئات
اجالي شبكني من وره باسني بركبتي وكال : شرايج حبيبي ..عجبتج ؟!
كلت : تخبل ..هاي يمته سويتها
كال : مو اني لأن جنت وياج بس كلفت مروان وهو اشترا كولشي وخله عمال الفندق يسووها
المهم هسة ..انتي فرحانة حبيبتي صار كولشي ردتيه لو بعد اكو شيء ناسيه اني ..
سكتت ..كال هو : اي صح اذكرت ..تعاي وياي
سحبني من ايدي ووكفني كدام الشباك حضني لصدره وكال شوفي ..
باوعت شوية واشتغلت الصعاديات والألعاب النارية
خليت ايدي على حلكي وكلت : الله كلش حلوة
سد الشباك ورد البردات وكال : اذا بعد اكو شيء ابالج بس اشري وحيصيرلج
خليت ايدي على صدره وكلت : لا ..انته سويت كلشي وانه كلش فرحانة ..
كال : محتشكريني عالمود كل هذا لأن تعبت ترى مو تشوفيني كاعد
ضحكت رفعت نفسي اله خليت ايدي على خده وبسته بشفايفة بوسة سريعة وبعدت
ضحك حيل وكال : حبيبتي بعدها مبتدئة تعالي خن اعلمج
وسحبني وباسني بس جانت بوسه هادية ودون عصبية هالمرة مديت ايدي لشعره وبادلته ..ثواني وفتح البدلة عالسريع نزع السترة والقميص وشالني للجرباية
همسلي : محتنسي هاليلة حبي
وصدك جانت مختلفة هادية ورومانسية اول مرة من ازوجته لليوم يكون رقيق هيج ويخليني احب كولشي يسوية
**
بعد مرور سنة
ليث : مرت سنة على عرسنه وسنة ونص على زواجنه الفعلي واجانه ولد ابيض ومدنفش يجنن ماخذ اغلب صفات هنودة حبيبتي وبس العيون مني سميناه "مهيمن "
والكل بالبيت طاروا بهيموني وانجنوه بيه صار الروح للبيت ..اني صح غرت منه بالبداية لأن اخذ هنودة مني وصارت تهتم بيه اكثر مني ..ومن يرضع صدرها يقهرني بس المهم اني هسة اموت عليه صار روحي من الدنيا هو وامه
وجاي نفكر نجيبله اخت حليوة مثله بس مو مثل عمتها لبنى صار شكد متقدميلها وهي رافضة معرف شنو قصتها بالضبط بس افكر ازوجها لمروان بس يطلبها مني
ومرة ويه ما جنه كاعدين عالغدة ونحجي بسوالف هيموني ونضحك عليها
كال بابا : والله هذا هيموني صدك صار النفس مالنه تصدكون على ما اطلع نص ساعة وارجع الكه نفسي مشتاقله موت
ماما : مو بس انته والله يا حبيبي حتى اني مرات من اطلع للسوك وارجع والكاه مموجود بالصالة انجن
كلت : اي اكيد غير ابني لعد شعبالكم انتم ؟!
ضحكت لبنى وكالت : لتنغر ليوثي ترا احنة انحبه لأن هو ينكرط مو بس ينحب مو لأن ابنك
شوية واندك الباب راحت ام وسام فتحته ..وجان يطلعون اهل هنادي كلهم حتى خواتها
كمنا عالسريع حتى نستقبلهم واحنة متفاجأين بجيتهم
هنادي : من دخلوا اهلي تفاجأت صح اني فرحانة بجيتهم بس متوقعتها
واحنة قبل سنة من رجعت هنا جابلي ليث موبايل وضليت اتواصل وياهم يومية وكل اخبارهم عندي صح الفلوس مقبلوا ياخذونهن بس هو قسمهن بيناتهم وكللهم يعتبرونها هدية اعتذار عن اتهامه لهيثم وشلعة كلبهم ذيج
والمبلغ ساعدهم غيروا حالتهم وهيثم صار شغله اقوة وهواي تحسنت احوالهم وهسة اني امس مخابرتهم مكالوا حيجون ..
اجيت عليهم رحبت بيهم وحضنتهم واحد واحد وحياة وليلى كبرانات ..كعدوا ضيفناهم واعتذروا عن طبتهم بهالوقت بس عمو وخالة مقبلوا وكالوا اهلا بيكم بكل وقت ..جان هيثم لابس قاط اني تفاجأت بس محجيت
شوية وكال بابا : ابو ليث ..انتم صارلنه سنة ونص مناسبينكم والحمدلله ما شفنه منكم غير الخير والسمعة الطيبة وبتنه الحمدلله معاملينها مثل بتكم وهي دايمآ تمدحكم الله شاهد
وانه علمود كل هالأمور ..جاي اقوي العلاقة بيناتنه اكثر واطلب ايد بنيتكم لبنى لأبنه هيثم ..واذا ماتوافقون مراح يتغير اي شيء بيناتنا ..يشهد الله
سكتوا عمو وخالة شوية وليث هماتين مكال شيء اني خفت ..يمكن حيرفضون بس ليش ؟!
شوية وابتسموا وكال عمو سامر : والله يا ابو هيثم هالشيء يسعدنه ونتشرف بيكم بأي وقت ..واذا حابين يكون العرس بهالسبوع محنعارض ..لأن انتم ناس خيرين وابنكم هيثم ما شاء الله عليه وردة مال الله اكيد احنة موافقين مشفنه منكم شيء..بس يضل الجواب عد بنتي ..لأن القرار الها بالنهاية
شفت لبنى فرحت وبالكوة لزمت ابتسامتها نزلت راسها بخجل وكامت بسرعة راح للمطبخ
ضحكوا وكال عمو : معناها هي موافقة ..مبروك علينا تفضلوا اقروا الفاتحة
انتبهت عليها من بعيد طايرة من الفرحة وحتى نزلن دموع الفرح من عينها ما جنت اعرف هي تحب اخوي لهلدرجة
بس هي مبينة لأن هواي تغيرت عن قبل وصارت معاملتها زينة وياي وقل تكبرها وضلت تلبس حجاب بالطلعة وطبعآ كل هالأمور اني جنت اوصلهن لحياة وليلى واكيد هنة كايلات لهيثم وغير نضرته عليها لأن هنة قناة الشرقية ميضمن شيء
وصدك صارت الخطبة وخلال اسبوع ازوجوا هيثم ولبنى كظوا اول ليلة هنا بفندق واهلي مخليناهم يطلعون وبيتناهم عدنه ..وجني شفت حياة تباوع لمروان من بعيد وهو يبادلها النضرات بس سويت نفسي مدري
صار عرس هيثم كولش حلو وخليت مهيمن بيناتهم وطكيتله صور
**
هيثم : من سمعت اخر اخبار لبنى والتغير الي صار بيها ورفضت اكثر من واحد تقدمولها عرفت هي تحبني صدك ومراح تزوج غيري والحجي بيناتنه انه هم ضليت احس بشيء اتجاهها لهلسبب كلت لهلي اريد اخطبها وهمة ما كالوا شيء لأن ما يعرفون شنو الي صار بيناتنه قبل سنتين تقريبا ولا واحد يعرف غير هنادي واهلها
دخلنه الفندق وهي جانت فرحانة كلش اول ما دخلنه اجت عليه وحضنتني حيل دمعن عيونها وكالت : مداصدك انته صرت زوجي ..واني الك للأبد ..مدصدك ..اه هيثم لو تعرف شكد احبك ..اني ..
حضنتها لصدري بستها بكصتها وكلت : وانه احبج لبنى
لا تبجين ..
بعدتها مسحت دموعها وبستها على خدها لزمت ايدي الي على خدها ورفعت نفسها وباستني بشفايفي بعدت وكالت : لا تستغرب من اول يوم حبيتك واني اريد ابوسك وضحكت
لزمت ايدها وصرنه بوسط الغرفة وكلت : يلا حبيبتي خن نصلي صلاة اول ليلة ..انه اصلي وانتي آمني وراي حتى الله يوفقنه
صلينا وتعشينه وحجينه بهواي امور تقربت عليه وكالت : حبيبي ..محتنزعني البدلة ..لأن مختنكة منها
فتحت السحاب نزلت وباوعت عليها
لزمتها هي من صدرها وراحت للحمام
شوية وطلعت لابسة روب احمر فوك ركبها وسيورة كلش ضعاف
جانت كلش حلوة ..كلت : ما شاء الله تخبلين
اجت عليه كعدت بحضني مررت صابيعها بشعري وكالت : انته الي خبلتني هيثم
ضحكت مديت ايدي لشعرها والثانية على ضهرها وسحبتها بستها
