رواية حكاية ترف الفصل الثامن عشر 18

مثل مرجوحه ‎روحي 

تصير تالي ‎الليل 

تهز گلبي لحد ما يغفن ‎جروحه،💔❤️‍🩹

ترف

داومت بعد انتهاء إجازتي المرضية وكل طلاب شعبتي وأساتذة موادنا الدراسيه چانو يتحمدولي بالسلامه وصارت علاقتي بفاطمه ووليد تقوى أكثر يعني  چانت علاقة زماله وصداقة اخويه.. والي عرفته عنهم 

فاطمه تعتبر شبه مخطوبه لأخو چنتهم يعني حاجزيها..

الولد عايش بالخارج وصار الاتفاق من تخلص كليه تتم الخطوبه والزواج وتسافر تعيش يمه.. وبيناتهم بس اتصالات بالموبايل 

أما وليد عايش بين حانه ومانه ههههه طبعا حسب ما يگول..لان أبو وأمه منفصلين وكل واحد منهم متزوج وعنده عائلة وهو عايش يگضيها ايام يم ابوه وايام يم أمه وايام ابيت جده لأمه وهاي السيارة العنده هي بالأساس مالت جده بس الرجال مخليها يم وليد ويگضي بيها حاجاتهم ...

مرت ابوه تريده يتزوج اختها الزغيره وتضل تمدح بيها وبجماها وتربيتها وندارتها ووليد يگولها باجي (يسميها باجي) موضوع الزواج مهم جدآ ويرادله تفكير عميق وان شاءالله ادرس الموضوع بجد واردلچ خبر بس مو قبل  التخرج... 

وامه تريده يتزوج اي وحده بس تريد تفرح بي وتشوفه عريس وهم مرات تختارله فلانه وعلانه من البنات التعرفهن من أهل زوجها.. وحتى بيوم الي تخربطت واخذوني للمستشفى. .من راجع للبيت يم أمه وسائلته ليش متأخر ..وعرفت شنو الصار رأسا گايله خليني احچي ويه البنيه واخطبها الك..ههههه

والمضحك من يروح يم بيت جده ..بيبيته هم محضره عروس اله تصير بت مره جيرانهم وهم أكولها خلي ادرس الموضوع وأردلچ خبر..

وللضحگ گال آني بصراحه ماريد اي طرف يزعل مني إذا ماخذت اختاره لذلك راح اخذ التلاث بنات حفاظا على علاقاتي العائلية 

- هاا يعني هسه نسميك ابو تلاثه

- لا نسميه مثلث برمودا

- والله خوش اسم بس لو شويه تغيرون بي وتسموني مثلث ولودا (على اسم وليد)..

- بس خاف النوب تفكر تجيب الرابعه

- باوع عليَّ وگال والله ياريت بلكي من بختچ بخت اهلچ...

ومن يسألوني وأنتِ ياترف شكو ماكو

- لحد الان ماكو شي 

-  معقولة محد شاف هالجمال والادب والأخلاق...

- شسوي عميان ومحد يشوف هههههه 

بهاي الايام عمه سعاد اجت بشرت امي راح يصير عدهم حفيد والكل بالبيت فرح ومن هسه بدو يحضرون اسماء للمولود الجديد.. وامي هم اجتي يمي للغرفه وبشرتني بحچايتها مبروك منى حامل

بدت السنه الدراسيه تخلص

وأمجد بدأ يحضر لحفلة التخرج وطلب مني ومن ماما نرافقه للحفله ويه أهله خالو ومرت خالو

يستاهل امجد نكون وياه بهيچ يوم وحضرنا الملابس المناسبة واكسسوارات مميزه 

وچانت يوميه تقريبا خاله ام امجد تزورنا بالبيت وتروح هي وماما للسوگ حتى تحضر مستلزمات وتوزيعات التخرج 

وكلساع وگالتلي وان شاءالله  بعد حفلة التخرج نستعد لحفلة خطوبتكم أنتِ وأمجد

آني چنت اسكت من اشوف الفرحة بوجه ماما بس الصدگ الصدگ آني ماعندي اي شعور لأمجد غير مثل اخويه 

وماضل غير يومين للحفله ...شو مرت خالو خابرت على ماما وبلغتها أن الحفله اتأجلت واحنا راح نسافر للشمال

- شكو خوما صاير شي

- لا كلشي ماكو لإ يضل بالچ..

يعني چان موقف غريب منهم ...

لكن ماما وره كم يوم وأثناء اتصالها ويه وحده من خالاتي گالت الها السر وحلفتها لاتجيب طاري لأي أحد وهم ماتگول فلانه گالته

السر الكارثي چان

أثناء تحضيرات التخرج چانت ماما وخاله ام امجد هواي يطلعون سوا...وچان أغلب حديثهن امجد وترف ولازم يخطبون ومن تتخرج يتزوجون..

- يعني هسه بس خطوبة وبعد خمس سنين ياله يصير الزواج 

- اي لان أمجد من يتخرج يروح يشتغل بمكتب الحزب بالشمال..وترف عدها دراسة هنا خو ما تعوفها

- بس الخطبه اذا طولت تصير بيها مشاكل 

- لا أن شاءالله ماكو مشاكل ...امجد يحب ترف من چانو زغار...بس هي فاهيه ، وما چنت اشوف عدها إحساس اله 

- اي صحيح غير چان شهم ماكل عقلها ويوهمها بالحب ويچذب عليها ويگولها بس تخلصين سادس اخطبچ. تالي عافها وراح تزوج غيرها

- ياااا يعني ترف چانت تحب شهم وعافها

- اي چانت تحبه وتمرضت من عافها وخطب غيرها... عفيه ام امجد هذا الحچي ماريد احد يعرفه..

لان شي راح وانتهى 

- إذا يحبها وهم بت عمه ليش عافها

- والله ماعرف بس من نجحت من السادس وصار أمام الأمر الواقع حسب وعده الها..گام يتحجج ماريد تكملين دراسة واريدچ تگعدين بالبيت وتساعدين امي بالشغل... هي رفضت وأصرت على الدراسه.. تالي عافها وخطب غيرها

- خوما تماده وياها من چانو سوا

- لا هي بس شكم حضنه بوسه

- يااااا....

- وداعتچ كتلتها وموتتها تموت..

بقت خاله صافنه شويه بعدين گالت يله هسه آني اروح وهم نتخابر ونشوف شلون نتلاگه ...راحت ومر كم يوم لاخابرت ولاشي 

بس قبل موعد الحفله بيومين خابرت ام أمجد وبلغت امي بالغاء الحفله.. وهم بلغتها راح نروح للشمال لان أمجد وأبوه عدهم شغل مهم هناك 

امي خمنت أن هذا الشغل يخص المكتب والحزب

بس الاتصال ويه خالتي قلب كل الحقائق وزادتها من گالت لأمي اصلا ام امجد هي السبب .. من رجعت منكم حچت كلشي لابنها عن العلاقة بين ترف وشهم وشلون چانو مگضيها بالاحضان والقبلات والله اعلم بعد شنو صار بينهم... وأمجد من سمع هالحچي تخبل وگال آني هم بعد ماريدها آني ماآخذ فضلات غيري 

وأصلا الحفله ما نلغت وهمه راحوا حضرو الحفله بس ما رادو ترف تحضرها لان ميريد بعد يشوفها...كل هذا الحچي والصار و دلير ما يدري بي هي صح بثته لنسوان العشيرة بس دلير بالذات ماگالت له لأن إذا عرف راح تعم على نفسها ويطيح حظها

امي تخبلت من سمعت هذا الحچي وهم كررت خالتي على امي وحلفتها ماتجيب طاريها بالموضوع 

چنت اشوف أمي ذبلانه ومنعزله وبس تتصفن ولازمه سبحتها

- شبيج ماما مريضه تحسين بشي

- لا ماما ماكو شي بس جاي افكر بيكم والامتحان جاي تقرب

- ماما يا امتحانات خاطر الله ، صحتچ اهم

- الله كريم...انتو نجحوا وتفوقو وآني أصير زينه

وفعلا بدت امتحاناتنا.. ورغم انشغالنا وتعبنا بس چان نجاحنا هو أكبر واحلى هديه نقدمها الماما

صاحتني امي لغرفتها وگالت - سدي الباب اريد احچي وياج

- خير ماما شكو؟؟؟

وبدت ماما تحچيلي كلشي عن امجد وأمه وحفلة التخرج ودموعها ودموعي تنزل

- يعني شلون ماأخلص من هاي اللعنه..لعنه حب شهم ..اموّت نفسي ياله اخلص؟؟ چنت ابچي واصيح بصوت عالي

- رهف سمعتيني أصبح وابچي طبت عالسريع يمنا وافتهمت الموضوع ورأساً گالت هسه اروح على شهم واهشمه تهشم واكتله خلاص 

- ماما رادت شويه تهدأنا گالت

- لا آني صوچي طلعت هذا السر ، چنت احسبها مثل اختي بس الظاهر حتى للأخت لاتنطين سرچ

- رهف : ماما لا تعممين على كل الأخوات 

- صحيح انتي وترف مو بس اخوات انتن روح وحده

تحاضنا آني وأختي.. فعلاً إحنا روح وحده...

بقيت ابچي ومكوره نفسي يم امي على چربايتها وهي خطيه تمسد على شعري وتقره آيات قرآنية 

بعد كم يوم خالو خابر على امي وبلغها بفلان يوم من الشهر الجاي راح تكون خطوبة امجد على بنت خاله الي عايشين هناك بالشمال.. ومعزومين انتي والبنات وسيف 

امي باركت له وگالت الله يتمم بخير

يعني من تكنسلت الخطبه من ترف قدمتله بنت أخوها..

بدت ايام الخطوبه تقترب وچنه مقررين لاآني ولا امي نروح خصوصاً من أمي گالت

شو ام امجد لا خابرتني و  عبرَّتني ولا هم عزمتني وخلتها مثل الدعوة العامه.. اخويه دلير يعزمني مثل مايعزم أصدقاءه والزلم اليشتغلون عنده..

بس الصار قبل الخطوبه بكم يوم اتصلت ام امجد بأمي وعزمتها وبررت بانشغالها بالتحضيرات وماعدها وكت تتصل بينا وهم ابنها اوميد جاي هو وعائلته من الخارج حتى يحضر خطوبة اخوه.. النوب گامت تحچيلنا فلم عن الحب الكبير بين امجد وبنت اخوها تاليا وشلون انعجب بجمالها وأخلاقها وكلساع تكرر كلمة الاخلاق وتركز عليها

بعد الإتصال هم بقت امي مصره ماتحضر الخطوبه كنوع من رد الإعتبار النا ولو بسيط..

بس خالو هم خابر وأكد على أمي لازم تحضر ويزعل عليها إذا ماجت...امي تحججت ماعدنا سياره ومانعرف واحد ثقة نأجره ويوصلنا للشمال.. گالها تره آني ماناسي هذا الموضوع و آني متفق ويه واحد سايق عدنا بالمكتب هو يجيبچ ويرجعچ بالوقت الي تحددي

ماضلت بعد عدها كل حجه وبلغته بفلان يوم وبفلان ساعه يمر علينا بالبيت ونكون متحضرين 

چانت مقرره بس هي وسيف يرحون وآني ورهف نروح لبيت جدو نبقى يمهم لحين عودة ماما

بس بالساعات الأخيره رهف غيرت رأيها وگالت لماما تروح وياهم لحضور الحدث الكبير خطوبة امجد وچانت تگولها بضحك..بيني وبين نفسي گلت يارب استر هاي يمكن تريد تسوي شي مو عالبال...

ماما لمت غراضهم بجنطه سفر وآني هم سويتلي جنطه زغيره وبتنا الليل حتى الصبح من غبشه يجي السائق..وتذكرنا هم هيچ سوينا قبل ١٢ سنه من ماما ورهف وسيف راحو للشمال بعد وفاة بابا الله يرحمه و آني بقيت بغرفة بيبي 

ويه الفجر ماما گعدتنا وتحضرنا على السريع ويه جيت السايق..قفلت ماما البيت واطتني المفاتيح وصعدنا كلنا بالسيارة ، واستأذنت من السايق يوصلني لبيت جدو القريب علينا وبعدين ينطلقون بطريقهم