رواية حكاية ترف الفصل التاسع عشر
الألم علّمني
أن أعيد ترتيب الناس
في حياتي،
ليس بناءً على
ما يقولون،
بل على
ما يفعلون…
رهف
طلعنا من الغبشه وصّلنا ترف ابيت جدو وچان عمو ليث ينتظرها بالباب. سلمنا وتوكلنا برحلتنا للشمال.. قبل سنه بالصيف هم اجينا كلنا وويانا ترف وچان سايقنا امجد لان بوقتها چان عنده نيه يجذب انتباهها للحب الي عايش بگلبه
سبحان الله هي سنه وحده وگلبت كل الموازين...شهم أتخلى عن ترف وتزوج وهسه امجد هم أتخلى عن حبه لترف واختار غير وحده
وآني جيتي هاي مو حبآ بالحفلات ولاحبآ بأمجد وأمه بس آني جيت حتى احاول احاول ارجع ولو جزء بسيط من كرامة اختي..الي ياهو الجاي يهين بيها ويتخلى عنها
الطريق متعب ومزعج وكله تفتيش وسيطرات رغم عند كل سيطرة السايق يطلع باج خاص ويمشوه بسرعه... وصلنا قريب العصر لبيت العائلة الچبير والي دائما تنجمع بي الخوال والخالات
بعد الترحيب دخلنا شويه نرتاح وچان سؤالهم وين ترف ؟؟ليش ماجت ترف؟؟؟ طبعا الكلام بالكوردي وماما هم تجاوب بالكوردي: ترف عدها تدريب عملي بأحد المستشفيات وماتگدر تلغيه أو تأجله...
النسوان الكبار صارن بجهه وخلصن وكتهن يگرگرن بالكوردي واحنا البنات بجهه ثانيه بس بقينا ساكتين
- سألتهم تعرفون عربي
- وحده جاوبت آني اعرف
- وثانيه گالت اعرف بس قليل
- اي زين احسن من الماكو
- شنو اسمچ
- شميران
- أڤين
- روشنا
أهلا وسهلا أهلا وسهلا
وبدينا شويه شويه نسولف وقسم نفتهمه وقسم مانفتهمه
وهم گمت اسوي صداقات ويه قسم من بناتنا
- گلت الـ أڤين احب البس زي كوردي أكدر أحصل على قياسي من أحد الأسواق
- اي موجود في بازار (سوق)
وطلبت منها نروح سوا للسوق حتى اشتري
واتفقنا على باچر الصبح نروح...
وخلصنا المساء وقسم من الليل بس سوالف عامه .. بعدني ما بديت بخطتي..
گعدنا الصبح وبعد الريوگ استعدينا نروح للسوك آني وأڤين وروشنا وشميران وهم بعد كم بنيه بس ماعرفت أسماءهم وهم مايعرفن كلام عربي
البازار كلش حلو ومرتب وكل شي موجود بي..عكس أسواقنا في ذلك الوقت المليان صبات وتفتيشات
الله لايعود ذيچ الايام
شفت كم موديل بالالوان الزاهية وعجبوني
أخذت واحد ألي وواحد الـ ماما و واحد الـ ترف
وهم عجبني آخذ زي كوردي شبابي لسيوفي.. طبعاً إذا قبل يلبسه
وكان أڤين وروشنا همه المترجمات بيني وبين البائع
تعبنا من الفرفره وقررنا ندخل محل بيع عصاير وكيك لان هم عطشنا وهم نگعد ونرتاح شويه
وأثناء الحديث بديت بالخطه مالتي
- رهف : وجهت كلامي لـ أڤين انتي شابه وجميله لكن ليش رفضتي الخطوبه من أمجد
- أڤين: امجد ما خطبني.. منين لك هذا الكلام
- رهف: هو گال ..وطلب من أمه تاخذ رأيچ لأن امجد قرر يتقدم الچ للخطبه.. وعلى أساس انتي بلغتيها ما مفكره بالخطوبه والزواج حالياً وبالذات من أمجد
- أڤين : وبدت عيونها تدمع لا والله لااجت سألتني ولا آني عندي هيچ فكره..اصلا چنت اتمنى أمجد يباوع عليّ
- رهف : وهم گالت خاله ام امجد على أساس وحده من عدكم گايله أڤين تريد تنخطب لواحد وياها بالكليه واذا تردون هي مستعده وتتمنى تصير من نصيب أمجد
- روشنا: احنا كلنا بالعائلة چنا نتسابق على أمجد حتى يهتم بوحدة من عدنا.. فشلون أفين ترفض.. بس ما گلتي منو الحچت على أڤين؟؟؟
- رهف : ماگالت اسمها واصلا ادري بيها تچذب وتلفق
- شميران : اصلا احنا چنا نغار من نشوف أمجد يهتم بس بأختك ترف وتعجّبنا من عرفنا ترف كانت تحب واحد من گرابتكم وعافها وتزوج غيرها
- رهف: صعدت الحماوه عندي وصارت مفوله وگلت خلي أألف افلام من عندي : گلت وآني عود مستغربه هذا الكلام الجاي أسمعه..ترف تحب واحد گرايبنا؟؟؟ ماكو هيچ حچي..اصلا هي ملتهيه بس بدراستها والناس وحتى انتو تفسر التصرفات بكيفكم !!!
مثلاً من چان يجي كرايبنا يمنا تره هو ابن عمنا واخونه ومتربين بنفس البيت وهو چبير بالعمر وچان يجي كل يوم وبأمر من جدو حتى يدرسنا كلنا وترف من ضمنا... وهذا فسروو صار حب بينهم..ابن عمنا صح تزوج واصلا زوجته صارت صديقه النا وكل يوم تجي البيتنا وهسه حامل وحتى طلبت من ترف هي تختار اسم للطفل... وأمجد يجوز چان يهتم بترف وهو الي چان يوديها ويرجعها لمعهد التقوية وهم هو الي كمل أوراقها وسجلها بالكلية ومن گال الـ أمه يريد يخطبها سوت فلم ترف تحب غيرك
حتى تجبره يأخذ وحده من بنات أخوها
والا چان اخذت وحده منكم شو انتو كلكم حلوات.. ورجعت گلت ها صحيح البنيه الختارها امجد حلوه لولا
- كلهن گالن وبصوت واحد : أصلا كل ذرة حلى وجمال ماعدها..
- رهف : هسه عرفتو منو الجاي يچذب ويلفق علينا وعليكم
- كلهن: هي خاله ام أمجد ماكو غيرها تكرهنا وتكره اهلنا
- رهف: وحتى سمعت كل هاذ الجاي تسويه بدون علم خالوو
- اي صحيح هم سمعنا هيچ لان اذا عرف بهاي البلاوي الجاي تصير يتعارك وياها
- رهف ارتاحيت شويه من زرعت ولو شي بسيط من الشك والكره بگلوبهن..يله بنات خلي نرجع للبيت راح نتأخر على الغده ويا العائلة
بس امانه هذا الحچي الصار بينا هسه مايطلع وما ينحچي لان إذا طلع راح تصير مشاكل وبالأخير كله ينذب براسنه ونصير احنا السبب ومانريدهم يفرحون
- لا اكيد ما نحچي اي شي
- يله حبيباتي خلي نروح للبيت
بيوم الحفله اقترحت على البنات نروح للصالون حتى نطلع كلنا احلى واجمل من العروس وأهلها
وفعلاً طلعنا كلنا واااو وبصراحه هن البنات جميلات بالشكل والمظهر حتى لو بدون مكياج وصالون بس ردت يحسون آني مهتمه بيهن واريد مصلحتهن
لبسنا ازياءنا الزاهية الألوان مع الاكسسوارات واستعدينا حتى ننطلق لبيت الخطيبه
وبعدنا گاعدين ننتظر بالصالة طبو علينا أمجد وأخو اوميد وزوجته وتتقدمهم خاله ام امجد وبدو بالسلام واحنا نرد عليهم بس ابرود وخاصة امي من ردت السلام
- هله عمه مبارك الله يتمم بخير...دارت وجهه ورجعت تحچي ويه البصفها.. هو استغرب ودنگ يمكن استحى لان مو مثل كل مره من يتلاگون وتبقى حاضنته لان امي كلش تحب ابن أخوها أمجد ..وحتى أمه هم استغربت حالة الجميع لان عبالها من نشوفهم راح ندگ السلام الجمهوري
صعدنا بالسيارات ونطلقنا لبيت الخطيبه
چانت تاليا گاعده على كوشة مخصصة للعرسان وتزيين فاخر جدا.. لابسه بدله غاية الروعة.. هي شكلها عادي بس مبين عليها الفلوس والزنگنه.. وحتى بيتهم وأثاثهم فاخر جدا ومبين عليهم الثراء
تمت الخطبه وبعد الايجاب والقبول تم عقد الشيخ وبدت الهلاهل والرقص
دخل أمجد حتى يلبس زوجته كيلو الذهب المحضرته خاله ام امجد..طبعا من وگف يمها شتان مابينه وبينها هو اجمل منها يمكن بعشرات المرات وچنت اشوفه يرسم على وجهه وحركاته الفرحة المزيفه .
ولاحظت كل البنات من گرايب العروسه يباوعن عليها بنظرة غيره وحسد..اي اكيد وين هي ووين هو
شفت وحده گاعده على صفحه رغم چانت بدون مكياج وبملابس عاديه لكن مبين عليها حلوه وچانت نظرتها للعروسه غريبه.. والله اشوف حواجبها تتحرك وخشمها ومناخرها تتحرك وشفايفها تتحرك... ههههه شبيها .. بس هاي أكيد أقصى مراحل الغيره... يله شسوي خلي اشوف هاي المسكينه شبيها
صوت الدي جي عالي كلش بس گدرت احچي وياها بعد أن استغليت الكرسي اليمها فرغ وأجيت اركض وگعدت يمها وسويت نفسي تعبانه من الوگفه وصارت عندي دوخه من الصوت العالي
- رهف: بلا زحمه تعرفين عربي
باوعت عليّ وگالت
- أي اعرف..آني عربيه..
- رهف اي زين ممكن اطلب منچ
- تفضلي
- اريد كلينس
- طلعت من جنطتها وگالت تفضلي
- أخذته وسويت نفسي امسح وجهي من العرق
- رهف انت أقرباء العروس لو أقرباء العريس
- أقرباء الاثنين
- سويت نفسي مستغربه يعني شلون
- بنت عم العروس وبنت خال العريس
- رهف يعني ابوچ وابو العروس يصيرون إخوة ام امجد
- اي وانتي من كرايب منو
- رهف آني بنت عمة امجد ...
دلير ابو أمجد يصير خالوو
- أهلا وسهلا
- أهلا وسهلا
- شنو اسمچ
- رهف وانتي
- دنيا
- تصافحنا.. عاشت الاسامي
بس عجب ما اختارتچ عمتچ لأمجد..انتي أحلى منها
- دنيا: قسمه ونصيب ..ثم امجد هو الي اختارها
- رهف لا غلطانه امجد ماچان رايدها بس هي جبرته عليها
- ليش جبرته
- رهف.. چان رايد وحده هم من گرايبكم بس لأن حالت أهلها ضعيفة اختارتله هاي وأشرت عليها لأن أهلها حلتهم زينه وواصلين
- دنگت وبچت ..اي صحيح الماعنده محد يريده
الصدگ انقهرت عليها وأتذكرت أختي ترف من چانت تبچي بيوم خطوبة شهم ...لزمت چف أيدها وگلت الها لاتبچين محد يسوه دموعچ..
- ياريت لو وحده تسوه شو مخلت واحد ما مشت وياه
- هااااااا
- اي والله ولد الكلية تصادق واحد وتعوف واحد..وهمه اصلا كلهم يصادقوها لان تشبعهم هدايا وارصده موبايل ...هو دائما حظ القبايح بالسما لايح وحظ الملايح بالگاع طايح
- رغم مافهمت شنو جاي تگول هذا مثل لو شعر هههه اول مره اسمعه بس رأساً جاوبتها
- اي والله صدگ
- حظ العدايل مايل وحظ العفنه بالحفنه
- اي اي والله صدگ
يله ياأختي شتسوين هي قسمه وان شاءالله تجيچ الأحسن منها
گمت من يمها ورحت لجماعتي وحچيت الهم كلشي على تاليا وطلاب الكلية
- خلي تصبر النا الانفضحها
اووي شسويلهن راح يبدن يحوكن مؤامرات ويثيرن المشاكل..خلي اروح اگعد يم ماما آني هاي الشغلات مالي دخل بيها
ثاني يوم كان مقرر نرجع لبغداد گعدنا من الصبح وتريگنا وهم اجه نفس السايق الجابنه حتى نرجع وياه
والطريق كله چنت نايمه وقريب وصولنا ياله گعدت شنوو عبالك الطريق نص ساعه هههه...وماما خطيه گاعده وكلساع تتخابر ويه ترف وهم ويه خواتها حتى يطمنون عليها من الطريق
وصلنا لبيت جدو أخذنا ترف
وتوجهنا لبيتنا
ماما وسيف أول ما وصلو ولأن تعبانين رأساً نامو بس آني لان گضيت الطريق نوم بقيت گاعده وحچيت كلشي لـ ترف
وللاسف ماقبلت على تصرفي
وگالت شلون تچذبين وتگولين حچي ماصاير...
شسوي بعد الصار صار
