رواية لأني عاقر الفصل الثامن عشر بقلم مريم خفاجة
كعدت ؏ درج ولزمت راسي بقوة
شسويتي ملااااك شسويت بروحي
امي التعبت وتحملت
مانكر سبب دمارنة هي لو شخصيتها قوية؟
لو عدها كرامة وتطلگت منه
جان هسه اني مكملة دراستي
واحقق احلامي
بس ليش حجيت هيج
تخيلت امي تموت بسببي
صارت دموعي تجري عليها
رحت لغرفة نجلاء دكيتها
طلعتلي ودخان وراها مال نرگيلة
وهي لابسة ثوب نوم
ليش مرتاحين؟ ليش اني وامي وخواتي ماعدنة
حظ؟
ملاك:-انطيني تلفونج خلي اخابر جاسر
كلبت وجهها بانزعاج ونطتني موبايلها
لان اني نسيتة هناك
دخلت ؏ رقم جاسر واتصلت
طولت الرنة قريب ماتخلص شالة:-ها يمة
ملاك:-شلون صارت امي
جاسر:-زينة بس بعدها فاقدة
ملاك:-تضل بالمستشفى؟
جاسر:-اي كالو كم يوم ؏ ما تصير زينة
ملاك:-تكدر تجي تاخذني
جاسر:-لا ضلي بمكانج وين انتي مو رجليج
داخل بيهن كزاز ماتكدرين تمشين
ملاك:-جاسر تعال معليك برجلية
ذب نفس وكال:-جايج
طبك التلفون واني صعدت
؏ كيفي بدلت ملابسي ولبست عباية
ربع ساعة وانفتح باب غرفتي طب جاسر
نزلت راسي خجلانة منهم
گمت بهدوء واخذت جنطتي
حط ايدة ورا ضهري وضل يمشيني ببطئ
كعدني ؏ تخم وطب جوة لغرفة امي
مادري شجان يسوي يس من طلع شفت
بأيدة جنطة مال ملابس
گمت ومشيت ويا للسيارة وهو لازمني
طول الطريق اني صافنة وهو هم ما حجة وياي
لحد مانزلنة ورحنة لغرفتها
جانو مدخليها مستشفى ؏ حسابنة مو المستشفى
العام
فتحت باب غرفتها
صارت كبالي ريم حاطة راسها ؏ رجليها ودموعها
تجري
وملك تقرة قران بصوت ناصي
وعيونها حمر
مستمرة اني بدماركم؟
باوعتلي ريم ودارت وجهه
باوعت لأمي شفايفها بيض والاوكسجين
والاجهزة محاوطتها
غمضت عيوني
وگعدت ؏ جهه
ريم:-حتى ما كلفتي روحج تبوسيها لو تعتذريلها؟
خزرها جاسر وصاح:-ريم!!!!
لاتخليني ارجعج للبيت
ملاك:-عوفها حقها
جاسر:-ماكو حقها وحقها هو الصارلج مو شوية اكيد مو قاصدة وامي شوية وتصير زينة بلا حجي سخيف
سكتنة كلنة واني ضليت اباوعلها
واتذكر الصار واغمض عيوني ودمعتي
تنزل ؏ خدي وامسحها كل شوية
يعني كمال وراح يعوفني؟
لاتعوفيني يمة
اگعدي....
للصبح و ونت أمي طفرو كلهم
واستحسفت ؏ رجلية الماگدرت تفز مثلهم
مشيت ؏ كيف و وگفت بصف الجرباية
همس جاسر يم اذنها:-يمة هاي ملاك يمج واحنة يمج يلا اكعدي
همست:-ملاك
دموعي تسارعت وفلتت شهگة مني
امج هاي يا ملاك امج شلون طلعت ذنيج الكلمات
من حلگي؟ شلون؟
لزمت ايدها وبجيت:-ها ها يمة اني هنا
ضلت دموعها تنزل وتشهك
ملاك:-اسفة يمة بس صيري زينة والله اسفة
فتحت ايدها نمت عليها ضليت اشهك
بعدني عنها جاسر ومسح دموعي
وهو عيونة حمر
مدت ايدها وخرت الاوكسجين وحجت متقطع:-ان.. اني... اس اسفة
هزيت راسي بـ لا اكثر من مرة وضليت ابجي
وهي تبجي
ضليت كاعدة ما غمضت عيني ابد
ملك وريم نامن
حتى الاكل اكلو همه واني ماحطيت لگمة
بحلگي وهي كل ساعه
فاتحة عينها تباوعلي وتبتسم وترجع تغمض
وايدي لازمتها بكل قوة
واني نايمة ؏ ايدها
ومغمضة عيوني بس مانايمة
انفتح الباب كل ضني جاسر
بس سمعت صوت خالي عصام گمزت باوعتله
طبو بالسرة خالاتي ثنينهن وخوالي وجدي
درت وجهي همزين ماجاي
بعدني اريد اتنفس سمعت صوتة سلم
درت وجهي وما باوعتلة
خالي عصام:-شنو شصار؟
ملاك:-ذبحة
عثمان:-هيج وحدها صارت؟ لو تعاركتي وياها
سكتت ودنگت راسي
حسيتة صار بصفي
ابتعدت شوية
جدي يمها يبوس براسها وهي تباوعلة
وخالاتي وكلنه محاوطيها
مد ايدة ؏ عكسي
نترتها بسرعة وخزرتة
كمال:-شبيها رجلج
ملاك:-ميخصك وخر عن خلقتي ماريد اباوعلك
جرني ؏ صفحة وخالي انتبهه:-تؤ كمال مو وكتك
كمال:-ماسوي شي
باوعلي واني مغمضة همس بصوت ناصي:-فتحي عيونج
ملاك:-وخر عني ترة روحي ما طايقتها
كمال:-وحق مكة هسه الزك راسج بالحايط باوعيلي
رفعت حاجبي وباوعتلة:-مد ايدك وشوف شسوي
واني اباوع بعيونة معقولة سواها؟ ويتزوج علية؟
كمال:-لاتضلين تحجين حجي فارغ خلي افهمج
كتفت ادية:-اي واني استمعلك بكل رحابة صدر ومن تخلص اصفگلك واگلك عفية حبيبي شتكول؟
دار وجهه واستغفر
ورجع باوعلي:-امشي وياي للبيت افهمج
ملاك:-لو تموت بيتك ذاك النگس ما اوصلة
غمض عيونة وضل يتلفت
كمال:-والتااالي؟
ملاك:-مسدود الطريق وخر عني
اباوعلة ابتسم:-مخبل واعوفج بحالج؟
ملاك:-صارت عندك مرة
ضحك بأستهزاء وكال:-وهي شون مرة
عگدت حاجبي وسألتة:-منية؟ نعرفها
سكت ودار وجهه رجعت لزمتة من عكسة
ودرتة علية:-منو الخطبتها؟
كمال:-خلي اشوف امج
راد يمشي رجعت جريتة من عكسة
وجاسر يباوعلنة هو وملك همست بحدة:-منية؟؟؟
بلع ريگة ودنك
وغمض عيونة:-نفذ صبري ترةةةة احححجي
كمال:-لاتصيحين
ملاك:-انتَ دتلعب بأعصابي لو شنو بضبط؟ احجي منو هيه؟
سكت ثواني وكال:-ولاء
دفعت ايدة ودموعي نزلت مسحتهن بسرعة
وگلت:-تلوگلك اصلاً
دفعت عني ورحت ورا جاسر حطيت
راسي ؏ ضهرة وبجيت ماردت
يشوف دموعي واني ليش ابجي علي؟
ولاء؟ وذنيج المسرحيات السويناها
گبالها حتى نقهرها؟ جنه
نضحك عليها اني وياك؟ شوداك الها؟ خلصت النسوان؟
راح تجي هي تقهرني؟
راح تجي تقسم الأيام بيني وبينها؟
راح تجي واشوفها بحضنة؟ والأدهى من هذا كلة
راح اشوف الطفل الي تمنيتة
والردت فرحتي تكمل بي
وردت اكمل أسرتي حالي حال العالم
راح اشوفها محققة حلمي؟
واني؟
ابقة متكتفة اباوعلهم
ودموعي تسندني
اكيد راح يميل الها ملاك شمتوقعة؟
يباوعلج؟
يدور وجهه عليج ويكلج ها حبيبتي زينة؟
لو يكلي محتاجة شي؟
بعد ما الانسان يكون أسرتة وعائلته
من يصير عندة اطفال ويصيحولة بابا راح ينسى
حياتة القديمة
هو راح ينسى اهلة
متوقعة يتذكرج؟ وتضلين ويا؟
حسيت بأدين جاسر تمسح دموعي
باس راسي وخلاني جوة جناحة
دارت وجهه خالتي وباوعتلي وذبت نفس
وامي تباوعلي هم
جاسر:-اكعدي رجليج تضل تأذيج
كمال:-تعاي خلي يضمدوهن ماتشوفهن يجرن دم
باوعلهن جاسر وشاف الشاش
كلة دم:-جاي تتأذين اشيلج؟
ملاك:-لا مابية شي
كمال:-تعاي
جاسر:-عوفها اني اخذها
كمال:-ضل انتَ ويا امك
ملاك:-ماريد عوفني
انهار:-روحي خالة رجلج تجري دم لاتلتهب
سكتت وهو لزمني ومشاني وياه
ايدة ورا ضهري واحس بأنفاسة القريبة
رحنة للمضمد هو داخل المستشفى
گعدت ؏ سدية وهو بدة ينضفها
العجيب ثنينهم يباوعولي؟ منتضرين اكول اخ
لو اتأذى
بس جرحك يا كمال اكبر!
ما تأذيت ولا صحت جنت اباوعلة واني ساكتة
كمل المضمد وباوع لكمال وابتسم:-بطلة والله
ابتسملة كمال وانطاه فلوس وطلعنة
ضل يمشي بية هواي لحد ما طلعنة من المستشفى
ملاك:-رجعنننني رجعننني كمال والنبي هسه اصيح والم الدنيا كلها عليك
كمال:-ما وديج لمكان هنا نكعد بالحديقة امشي
ملاك:-لاتضل تنتر بوجهي فاهم لو لا
فوكاها شكد صلف
ضحك وكال:-يلا
وخرت ايدة وحجيت:-شو انت مخليني مضحك؟؟
كمال:-بابا امشي ماضاحك الله واكبر اسف والله اسف امشي
مشيت واني روحي تحترك
گعدت بعصبية ؏ المصطبة وهو كعد بصفي يدخن
ملاك:-شكو جايبني لهنا؟؟؟؟؟
كمال:-اريد احجيلج
ملاك:-تبرر تقصد؟
كمال:-اي ابررلج شتردين تعتبريها اعتبريها
سكتت منتضرتة يحجي
كمال:-بيوم الرحت لأمي لبغداد
بيوم راحت لرندة وماعرفنة لحد مادكيت ؏ زوجها
وگال يمنة
الطريق كلة اسب بروحي واسب الدنيا
كلها بالحر والدنيا جهنم
وفوكاهن امي!
الماعرف نواياها شنو؟
دگيت باب عيال رندة
هم ناس مثقفين و واصلين استحيت منهم وتمنيت
ماموجود
شگول عليج يمة
فتحلي الباب ابو علي رجل
وقور ومحترم سلمت علي واني خجلان منه
دخلت لجوة وسلمت عليهم
وباوعت لأمي گاعدة بكل هدوء وحتى
من سلمت ماردت
استغفرت وگعدت
متنرفز منها
كمال:-ها يمة يلا نروح؟
بيداء:-ماروح
ضحكت مستحي وكلت:-ليش؟
بيداء:-تسوي الگتلك علي
طلعو عيال رندة وبقت بس امي ورندة
كمت من مكاني وحجيت بعصبية بصوت
ناصي:-ييييممممة أذاااا ماگمممممتي وحق محمممممد
هسه اگلب بيت الوادم جحيييم
بيداء:-مارووح والله وشتريد تسوي سوي
غمضت عيوني بصبر وباوعت
لرندة:-قنعي امج تروح ترة صبري بدة يخلص
رندة:-حقها ترة وماراح اتدخل اصلاً لان شي
مينسكت عنة
كمال:-راح ارگعج راسج بالحايط وحق مكة
شعلييييجنننن بحيييييااااتي اننننتتتتتنننن
العالم هنا لاتخلني اصيح كومي يمة
بيداء:-ماگوم
وضليت احاول اصيح واريدها تمشي
ماترضى:-شتردين بضبط؟
بيداء:-تتزوج
ضحكت وكتلها:-اي؟ وبعدين؟
بيداء:-تتزوج ولاء
رفعت حاجبي وحجيت بعصبية:-وتتامرين وتختارين بكيفج
رندة:- جا شبيها ولاء
كمال:-تااااكليييين تتتتببببن انتتتتتيي وماتددددخلين فاهمة لووو لااا طلععععي بررررة
زعلت وطلعت
كمال:-وحق هو علي واني حالفلج قبل
غييير ملاك ماتنام مرة إعلة جتافي نعلي الشيطان
يمة وگومي
بيداء:-روح خلييي تفففيدك ملاك روح وما اوصل لذاك البيت لحد ما توافق تتزوج
كمت وكتلها:-بكيفج وماتزوج لو تنطبك السمة ؏ ارض
عفتها وطلعت واني احس
روحي طلعت من الدنيا كلها
وكل يوم صرت اروحلها ولاترضى ترجع ولاتقتنع
وبيوم خابرتني رندة امي متخربطة
عفت البيت وطلعت
ورحت لبغداد وصلت للبيت
دخلت لأمي لكيتها متمددة وكانونتها والمغذيات
ورندة وام علي و ولاء يمها
ابو علي:-يابة كمال اكعد خلي نتفاهم
كمال:-يعني انتَ راضي بالجاي يصير؟؟
ابو علي:-مرتك عاقر يا أبني وامك من حقها تشوف اطفالك
كمال:-بس اني ما مجبور اتزوج والله امي تريد تشوف اطفالي هذا مو منطق عمي
ابو علي:-لا ليش مو منطق اكو هواي زلم اخذو فوك نسوانهم بس اكو عدل ومساواة يعني انت من راح تتزوج مراح تعرف مرتك ذيج راح تعدل بينهم
صارت نقاشات هواية وامي تطفر
وتحرجني گبالهم
ضليت احاول اضبط اعصابي ماكدرت
كل ساعة وزمخت بيها واستغفر
واني مالي عين بوجهه العالم بعد
وبتهم كاعدة فوكاها
خجلت حيل واستحيت منهم
ضليت ماعرف شاخذ وشنطي
صار الضغط علية من كل مكان
امها وامي وابوها ورندة
واني وحدي
وملاك بين عيوني ماكدر افرط بيها
كتلهم الله كريم وطلعت
حاير وخجلان كبال گلبي شلون اخذلها
هاي روحي؟
شلون؟
رجعت للبيت ابتسامتها
وحُبها
روحها الحلوة
عيونها
لمساتها
كلشي بيها ماگدر افرط بي
وثاني يوم
رحت لأمي وهمست مخنوك:-التردي يصير
بس ارجعي لخاطر مكة مو فشلتيني وطيحتي حظي
بيداء:-تكول كدامهم اني اتزوجها وراح اجي وياكم
فركت وجهي عود كلت اقشمرها
بس هي امي تتقشمر؟
كمال:-امشي يلا
بيداء:-تحجي وتكللهم اني راح اخذ ولاء والاسبوع الجاي المشية
كمال:-كم شهر بس ؏ ما اقنع ملاك
بيداء:-لا ماتكللها لمن يصير كلشي ويخلص يلا لان ادري ييها تحطلك سحر وتسحرك وماتكمل كلشي
كمال:-جا ما تسحرج وتخليج تبطلين عن هذا التفكير
بيداء:-رنودة روحي صيحي عمج وعمتج وزوجج و ولاء
كمال:-ادري هو حلفاااان انعل هسه حتى من الدين اطلع هسه شهالاكلان *** هذا كلنالج اي ليش تلحين
بيداء:-ما أمن بيك انت
سكتت
ودنگت راسي ولزمت شعري حيل
تاليها شنو مادري
دخلو اهلها
وگفت كتلهم اخذ بتكم كم شهر بس
؏ ما اقنع زوجتي ومن هذا الحجي
تقبلوا الكلام برحابة صدر
وابوها كال:-ليش هو احنة نلگة احسن منك
ولو ماردناها بهاي الضروف بس هذا نصيبكم ان شاءلله خير
هزيتلة راسي وامي كيفت
وضلت تهلهل
عفتها وطلعت مختنك
حبج يبقة بگلبي لو مية مرة تصير الي
اخذتها وطلعت
بقيت طول الطريق اصيح وافشر
وهي ولا همها شي
كمال:-اذا جبتي طاري لملاك الدنيا احرگها
لو شفت دمعة منها نازلة
حتى لو مو انتي ابطل من الخطبة واخذ مرتي
واشرد وانعل ابو اليضل هنانه
بيداء:-لا لا ما احجي هذا هو بس شوكت نخطبها؟
ضربت الستيرن بقوة:-يممممممة لاتكفررررييييننننني ولاتلحيييييينننن فووووك راسسسي كلنالج كممم شهههر كااافي
بيداء:-اي اي
سكتت عني وصلنة للبيت
واباوعلها تتمايل وتشتغل بهدوء وشعرها
اليلعب ؏ اجتافها يلعب بگلبي
ابتسمتلها
احبها هواي...
من نزلت رحت بوجهي لجدي بلكي
يگدر يقنعها وتسد الموضوع ونروح نعتذر من ذولاك
الورطت روحي وياهم
بس طلع هو انگس من امي
وگال:-من حقها امك تشوف احفادها منك
وبتنة ملاك مايصير عدها وانتوا كلتوا
نسبتها ضئيلة بعد ؏ شنو منتضر
تتقبل الموضوع لان ماكو حل آخر
كمال:-بس جدي ماريدها البنية اني احب ملاك
ماريد اتزوج خلي اضل انتضر خمسين سنة
ماگدر بدونها والله
جدي:-لا هذا مو حجي بابا
تحبها كلنة وياك بس مو معناها انو من تتزوج
ماراح تحبها او يختفي حبك الها
ساوي بيناتهن وان شاءلله خير
وبعدين ابو علي ونعم الزلم فـ اكيد تربايته
خوش ليش بعد ماتريدها؟
ضليت صافن بعيونة شارد شحاجيك بلا؟
كمال:-ملاك ماتحبها
جدي:-دكوم يابة توكل وقنع مرتك بهدوء
واذا تريد احنة نجي ونقنعها
كمال:-خليها لمن تخلص السالفة بس نمشي وبعدها
اكللها
جدي:-هذا هو
عفتة وطلعت
وعيونها ببالي شلون راح اكدر اقنعها ياللهي
ومرت الاشهر ورحنة مشينة
واني بكل خطوة اكول سامحيني ادري
ماراح تتحملين وادري ماتگدرين بس مو بيدي...
رجعنة لبيت جدي ولكينة عمتي إيمان هناك
والوجهه احمر وعصبية
اذا انتي هاي ردة فعلج
بتج شلون؟
ضلت تصيح وتغلط
وحتى جدي تعاركت وياه
ورادت تروح تگللها بس منعها جدي وكال
كم يوم ونروح احنة كلنة نقنعها
وضلت السالفة تاكل بگلبي اكل
كل ما اباوعلها وهي تنتبهلي وتبتسم
....
ملاك:-وتريدني هسه اقنع؟ واكول عادي؟ راح يعدل بيناتنه؟
كمال:-مو بيدي والله ملاك افهمي
ملاك:-هذا هو
ردت اكوم لزم ايدي ورجعت كعدت
وهمس:-ضلي شوية
سكتت وضليت اباوع لكدام
مسحت وجهي بايدي وضليت استغفر
واهدي بالي
باوعتلة يباوع لكدام
حطيت راسي ؏ جتفة ماگدر اكرهه
ماگدر ابتعد عنة ثواني شلون ياللهي صبرني
رفعت راسي علي وهو نضراتة
مثبتة لگدام دنك علية وابتسملي
رجعت لنفس وضعيتي وهو ضل يتلمس خدي
وزخات المطر الخفيفة
وريحة الحديقة ترد الروح
بس گلبي المتعوب مايهدى بريحة حديقة
كم يوم وطلعو امي من المستشفى وهي
عيونها ملاحگتني
من رجعنة جدي وخوالي تعاركوا
ويا ابوية لان ما أجة وما وصل
ورادو ياخذوها وياهم بس كالعادة امي ماقبلت
واني ضليت يمها
يومين واجاني كمال:-يلا ماترجعين
ملاك:-خلي تصير امي زينة
كمال:-باجر اجي اخذج خوش؟
ذبيت نفس بقلة صبر وهزيت راسي بـ اي
وثاني يوم اجاني بملابس
الدوام
رجعنة للبيت الساعة ب9 الصبح
دخلت للغرفة نزعت الشال ونزعت ملابسي
وبدلت
گعدت ؏ جرباية مغمضة عيوني
واصابعي غارستها بين خصلات شعري
حسيت بشواربة المنگعة
صارن ؏ جتفي
نزلت دموعي وشهكت
باس رگبتي ؏ طولها وهمس:-احبج والله لاتتوقعين بيوم اعوفج لو اتنازل عنج والله ماكدر بدونج
سكتت ومسحت دموعي
لزمني من ايدي ودخلنة بالبطانية
واخذني لعالم ثاني
جان عالمنة حلو
يختلف عن الواقع اتمنى طول عمري
اضل بي وماطلع لعالمي المُقرف حرفياً
ولل1 اندك باب الغرفة واسمع خالتي
تصيح:-كمااال ادري شنو ميت ماتفتح الباب
سمعت صوتها وانقبض گلبي
كمت لبست وطلعت فتحتلها الباب
باوعتي من فوك لجوة وكالت:-هاي انتي هنا
ملاك:-تردين شي؟
بيداء:-هاي بدال متكولين سلام عليكم
ملاك:-المطلوب؟
بيداء:-يلا نزلووا تغدوا
هزيت راسي وسديت الباب قبل لاتحجي
فتح عيونة كمال وكال:-شبيها امي
ملاك:-انزل تغدة
حجيتها وصعدت ؏ الجرباية جريت
البطانية وحطيت راسي ؏ مخدة
حط ايدة ؏ خصري وجرنة الة
وباس رگبتي:-وانتي؟
ملاك:-ماشتهي
ضل يحاول يقنع بية واني مطنشتة
للعصر دخلت سبحت ولبست دشداشة قصيرة
من اليوم ماكو شي يضل بمكانة
ونزلت لكيتة كاعد ؏ اخبار
وبيدة كوب جاي
وخالتي بصفة تسبح
هه تستغفر
بيدي المشط ورحت لجهة كمال:-تمشطلي؟
ضحك وذب الكوب وكال:-تعاي
گعدت بين رجلي وهو يسحب بشعري
على كيف اخذت كلاصة وشربت منه
واني ادري بعيونها علينه
لحد ماخلص وباسة رحت ؏ جهه ثانية
وخليت راسي ؏ جتفة
وبقيت اطلع سوالف من جوة الكاع
حتى يضل منتبهلي
شوية واندك الباب ودخل
علاوي ابن وردة يركض ودخلت هية وراه
اجت سلمت
سلمت عليها من ورا خشمي
وعلاوي كاعد بحضني يضحك
وهي كاعدة بصفي
حسيتها اخذت ايدي وحضنتها حيل
باوعتلها دموعها تجري وتشهك:-بعدج زعلانة مني؟
باوعت لخالتي طبت لغرفتها
وكمال راح يم أمير
ملاك:-لو جاية كايلتلي مو جان منعت هذا كلة الديصير؟؟
وردة:-والله مادري بيوم المشية لمن
راحوا يلا دريت ملاك وداعة علاوي ابني
مادري
ضلت تحاول تحجي وتعتذر
مانطيتها وجهه
ما كرهتها ولا شلت حقد عليها
بس شايلة عتب ليش اتفقت وياهم؟
سكتت اباوع للتلفيزون وعلاوي يراويني
بغراضة والعابة
همست بصوت ناصي:-اروح؟
باوعتلها وعكدت حاجبي:-ليش؟
مسحت دموعها وكالت:-خاف متضايقة مني
هزيت راسي بـ لا:-عادي بس شنو ترديني
اسوي وزوجي يجهزون لخطوبتة البعد كم يوم؟
رجعن دموعها ينزلن!
ملاك:-لاتبجييين مو ناقصة اني
ذبت روحها بحضني وضلت شابكتني
وتبوس بية وتعتذر
لحد الليل من راحت هي كل ساعة وتكلي
مسامحتني؟
مسامحتج يوردة مو ذنبج ادري
ذنب كلبي الماعرف...
ومرت ايام ورجعت زرت امي صارت زينة
ولسة بعيونها حجي واني ادري بيها
ماتگدر تسولف
تحكمها عاطفتها ، خجلها ، خوفها
عذرتها وضليت انطي اعذار للكُل
وانتي يا ملاك؟
منو ينطيج العذر؟
واجة يوم وتمنيتة مايجي
تمنيت روحي ميتة ولا يجي واني اباوعلة
يلبس بقاطة الجوزي مخطط بخطوط
طولية خفيفة بلون البيجي
واگف گبال المرايا يتجهز!
الج؟ لا!
لمرتة الجديدة
لحياتة القادمة
البعيدة عني
دموعي دموعي ليش ماكدرلهن ليش صلفات
هيج؟ ولجن اثبتن صيرن وياي
لاتفضحني
اذكِر مَرة گتلي
الليّل ويَّ غيّرك ذنِب
ومَرة گتلي الليّل وحّشة
بَعين كُل واحد مُحب
ومَرة گتلي ، ومِرة گتلي
وهِواي گتلي
وطُلع كُل حّچيك چذِب .
باوعتلة يفر بالحلقة ناوي ينزعها؟
طفرت من مكاني
ورحت يمة
جريت ايدة ونزعتة الحلقة
ورجعت دخلتها بكل قوتي لدرجة انجرح
رفعت عيوني وهنه يصبن دم مو
دمع:-دير بالك بيوم الي تفكر تنزعها لبسني الجفن
فلت ايدة من ايدي وحضني حييل
كمال:-لو بيدي احرك روحي وماروح
ملاك:-احرگها نحترك اني وياك عادي مستعدة اروح
لجهنم ولا اشوف الجهنم هاي
ذب نفس وباسني بگصتي:-كتلج وارجع
اعيدها لو مية مرة تصير الي ماكو غيرج ماخذ مكان بگلبي
ملاك:-لاتبوسها ولاتحجي وياها ولا تضحك
اموووتك والله اعتبرني كاعدة بيناتهم ودموعي تصب
ترضى؟ دموعي مو تكول ماحب اشوفهن
ابوس ايدك لاتحرك كلبي
كمال:-هذا هو اعقد واجيج لاتخافين ماتأخر
هزيت راسي ورجعت حضنته
حيييل وشميت عطرة يكول راح يختفي مني
رجعت باوعت لعيونة وهمست:-احبك هواي
كمال:-اني هم
رجع باسني واخذ غراضة وراد
يطلع صحت بصوت يرجف:-كمال
دار وجهه علية بثگل:-لاتروح
غمض عيونة ورجعلي ضل يبوس
بية ويحاول يوكف دموعي
بس شيوگفهن
لحد ما صاحولة من جوة جلبت
بايدة مثل الطفل اليريد يروح ويا امة وهي
ماترضى:-ابوس ايدك لاتروح كمال حباب
ضلت شهكاتي تعلى
عافني وراح وهو يمسح عيونة
گعدت بالگاع ابجي والطم اخ يگلبي
شتتحمل بعد
وضلت نار بگلبي مشتعلة
لا بية واطلع واروح وراهم شنو اسوي حتى امنع
كلشي جاي يصير
يكولون الدعاء يغير الاقدار
وما وگع بأيدي غير الدعاء عسى ولعل
يصير شي ويمنع هذا العقد
انفتح الباب ودخلت وردة
اجت تركض شمرت روحي بحضنها:-لج راااااح امووووت
واللله راااااح امووووت مو حمممل هذا الشي افهموووني ماكدررر اتحمللل والله لج رووووحي جاااي تطلع راح راح يتزوج راح يعقد عليها
وردة:-شدعي عليج يمة شگووووول لج كاااافي راح تموتتتتين كااافي
ملاك:-خلي اموووت خلي
اااااااخ ياللهي
تبجي واني ابجي وياها وثنينه ننوح
لحد ماحسيت روحي غفيت بحضنها
حسيت بيها كومتني جنت ماشوف
عيوني مغوشة
نمت وغطتني وضلت فوك راسي
تقرة ايات لحد ما نمت...
ويا حلات روحي من سمعت
صوتة يهمس ؏ كيف:-شبيها ملاك
فز گلبي وانفتح قبل لاتنفتح عيوني
گمت واني گلبي يدك بسرعة
كمال:-؏ كيفج بابا
طفرت وحضنته حيل:-تأخررررت شوف شوف الساعة بثمانية وانتوا رحتوا ب3 كلت بس اعقد واجي ليش تأخرت
كمال:-اطلعي وردة شوية
طلعت وهو كعد و جرني وكعدني بحضنة:-ما باستك مو؟
كمال:-لا والله
مسحت دموعي:-ولا سويتلها مثل ماسويتلي
بالعقد مو؟
كمال:-لا ماسويت
ملاك:-احلف بداعتي؟
كمال:-وداعتج
ملاك:-جاي اشوف غواش
كمال:-من البجي كافي مردتي عيونج مرد مو دمرتيني
ملاك:-اني احبك هواي افهمني جاي اموت
كمال:-گوة نطقتها والله و وافقت
اخذت ايدة الي يخلون بيها حلقة الخطوبة
وباوعتلها نزعته وشمرتها لبعيد
ملاك:-ماتلبسها فاههههم لو لا؟؟؟
ضحك وكال:-دللي
ميلت راسي ؏ كتفة
كمال:-ناخذلنة فرة سريعة؟
ملاك:-وين؟
كمال:-؏ جرباية بالقطار
جنت اريد اسوي كلشي حتى ارضي وماخلي
يفكر بغير شي بسرعة وافقت
واخذني بجولة ؏ كولتة
وضلت الايام تمشي ويمشي حزني وياها
خالتي ماتجيب طاري زواجة
ابددد
ولاتفتح الموضوع كبالي ابد
واكيد كمال مايقبل ينذكر كدامي هالموضوع
كمال ماراحلها من العقد ولا يخابرها
وهذا الشي مريحني
مامهتم للموضوع
وبيوم نايمة ؏ صدر كمال
وهو يلعب بشعري ونسولف ونضحك
دك تلفونة شالة
باوعت للجهاز مكتوب ابو علي
عرفتة ابو ولاء ضليت اتنفس سريع
وهو رد وضلو يحجون ويسلمون بعدها سمعتة
گال:-شوكت دوامك بابا؟
كمال:-باجر التحق عمي يومين وانزل
ابو علي:-الجمعة موجود؟
كمال:-اي موجود خيرك اكو شي؟
ابو علي:-لا والله بس اعتبرها الجمعة معزومين انتوا والجماعة يمنه ؏ غدة
كمال:-الله كريم ان شاءلله اشوف اذا ماعندي شي
ابو علي:-حاول تتفرغ وتعالو مشتاقيلكم
تشكر منة كمال وطبگة
باوعتلة وكلت:-تروح
كمال:-فشلة خابرني بعد
ملاك:-اني اروح
باوعلي تك عين:-اكعدي ماتروحين
ملاك:-والله اروح واذا مارحت حتى انتَ ماتروح
هز راسة وصار فوگاي...
وانتضرت الجمعة ؏ احر من الجمر
لبست جبة نيلي وبيها خطوط
جوزية
وشال جوزي وساعة ولبست كعب
ومكياج بُني
باوعلي كمال من فوك لجوة:-البسي عباية
ملاك:-مالبس اني اروح هيج مستورة مابية شي
كمال:-ملاك لاتخليني اصيح لبسي عباية
ملاك:-اذا لبست عباية ماروح واذا ماروح تعرف شيصير مو؟
استغفر وطلع عصبي
لبست كعب يصير كابوي وهم بي جوزي
ونزلت وبيدي جنطتي باوعتلي خالتي
ودارت وجهه
ضايجة
نزل كمال لابس قميص جوزي
وبنطرون كابوي كييفت شكد يحبني ويعرف افكاري
ضحكت ولزمتة من ايدة:-هاي شووون هيج نسقت وياية
باوعلي تك عين
وسكت همست بأذنة:-ايدك تضل بيدي افلتها وشوف شسوي
كمال:-راح تطيحين حضي امشي
مشيت لگدام وصعدت بالصدر باوعتلي
خالتي ورفعت حاجبها وصعدت ورا وطبگت الباب
حيل ماهتميت
صعد كمال وشغل السيارة وطلعنة
شغل اغاني ضليت اصفك وارگص وبداخلي احترك
بس مضطرة امثل
سيارة وردة وأمير ويانة وكل ماتمر
سيارتنه وردة تضل تباوعلي مقهورة
وصلنة للبيت نزلنه وتشابكت اصابعي
باصابع كمال باوعلي وابتسم
دك الباب وطلع ابو علي
سلم ؏ كمال وعلينة ودخلنة ردنه
ندخل للاستقبال
ابو علي كال:-لا لا للصالة كلنة نتجمع
دخلنة من المطبخ واتجهنة للصالة
وخالتي تهمس:-مجلبة بالرجال عوفي راح تفضحنة
درت وجهي عليها:-ترة زوجي عليمن افضحج كلمن علي بروحة خالة معليج بية
كامت تنافخ
طلعت رندة بوست كمال
ونزلت عيونها ؏ ادينة وباوعتلي
بوستني من ورا خشمها
وعيني اجت بعين ولاء اللابسة
تشيرت قصير وبنطرون بوري ضيك
مابينت اني غيرانة منها خليها هي تغار وتحترك
راح كمل لأمها باسها براسها
واني مجلبة بي
بوستها واشوف ولاء تقدمت
شابكة ايدها عود مستحية:-شلونك كمال
كمال:-هلا بخير الحمدلله
وباسها براسها
كلبي اشتعل بوستها واني ادعي الله ياخذج
كعدت واجة كعد بصفي
ويباوع لعيوني خايف
بينت ماكو شي بالعكس فرحانة
وزعو كاسات مي حطيت كاستي ؏ الطبلة
وكمال فتح مالتة وشرب شوية منها
اخذتها منة وشربت
ضحكلي ضليت اباوع وماشارك بالحديث
وكمال يحجي ويا علي زوج رندة وابو
وخالتي تحجي ويا رندة وام ولاء
و ولاء ساكتة بس تباوع علينة
و وردة بصفي ونلعب ويا علاوي
ونضحك وياه
اذن اذان الضهر راحوا بالمضيف يصلون ارتاحيت
كمنة صلينة
ونوب فرشن السفرة ماگمت ساعدتهن
لان هنه من يجن مايساعدني
اني ليش اساعد؟
واني وردة نضحك ونسولف
وخالتي ترزلنة نكوم وياهن واحنة مامهتمين
صاحوا للزلم ضل كلبي يدك خاف هي تكعد يمة
بحيث خالتي جرتني وكعدتني بينها
وبين رندة وتباوع لولاء
اجو وضلت عيني وراه
ارتاحيت من شفتة كعد بصف التخم
وامير بصفة
ذبيت نفس و ولاء كعدت يم امها
ضليت اكل بهدوء وكل ساعة اباوعلة وهو يبتسملي
ومن يشوفهم مدنكين يدزلي بوسة بالهوة
واني اضحك
بسكتة
كمت شلت الاماعين وياي
ورحت غسلت ورجعت بسرعة كعدت بصفة
لشوية وجابو الجاي
ابو علي طلع مادري وين يجيب جكاير
مدري شنو
وزوج رندة خابرو من الدوام
وبقة بس كمال وامير
طفرت خالتي كالت:-كومي ملاك يمة لمي الاستكانات وغسليهن
ولاء:-لا اني اغسلهن ميحتاج
بيداء:-لا لا انتوا تعبتوا
ولاء:-بس انتوا خطار
اباوعلها تأشر بعيونها
گمت وگلبي اشتعلت بي نار باوعت لكمال
مدنك ؏ تليفون
جان المطبخ بي لوفة يعني
ماكدر اشوف الصالة مدري شلون غسلتهن
؏ سريع بعدها انتبهت لنفسي ولوضعيتي
ليش هيج مستقتلة ؏ كمال؟
شدا اسوي اني؟
بس أحبة
رتبتهن وگلبي علم بالصار وراية
اباوع كمال ماهو ولا ولاء وينهم؟
عيوني دمعت وباوعت لوردة اشرتلي
كعدت وجسمي يرجف:-وينة؟
وردة:-صعدوا فوك ؏ كيفج لاترجفين راح تموتين
ملاك:-ياريت
باوعت لجهة الدرج شينزلك
راح تبوسة؟
اكيد لعد مصعدتة لفوك شتريد منه يلعبون مكعبات؟
ضلت انفاسي مو مستقرة
بس مابينت وسويت روحي ما مهتمة للموضوع
ورندة تباوعلي حتى تشوف ردة فعلي
شتحس؟
ماكو دقايق ونزل كمال
وحهه عصبي وعاكد حواجبة وذيج ضايجة
بس شافتني ضلت تسوي روحها تضحك
كمال:-احححمم يلا من رخصتكم الطريق طويل ولازم ارجع عندي شغل
ام علي:-يا يمة بعدكم والله ستوكم اجيتوا
كمال:-لا والله عذروني ماكدرر اضل اكثر
دزولنة لازم نداوم هسه جاية لجنة واني اخذت منهم
كم ساعة كتلهم ما موجود
ام علي:-هذا هو جا براحتكم
سلمنة وردنة نطلع
درت وجهي لخالتي لزمت ولاء واباوع
لشفايفها كالت:-ها؟
هزت راسها ولاء بـ لا وسكتت مدنكة
وخالتي رجعت همستلها:-ميخالف لاتخافين
شكو؟
ظل كلبي يلعب رجعت صعدت بالصدر
وحرك السيارة كمال بعصبية
ويسوق سريع
بيداء:-على كيييفك راح نندعم
كمال:-بعد احسن واخلص من هاي الحياة الما رتاحيت بيها
لزمت ايدة وهمست:-شبيك حبيبي
بيداء:-هاااي كلة لان كتلك اصعد يم مرتكك
كمال:-واااااانننننتتتتتتيييي شعلللللليييييججج يممممم نعااااليييي اصععععد مااااصعددددد
بيداء:-غيرررر مرتككك
كمال:-انعل ابووووي لاااابوووو حتى مرررررتي
بيداء:-جااا ملاااااك مو جنت ساااكن بييتها حتى لغرررفتها تصعد وتنام يمهاااا
دك ؏ ستيرن اكثر من مرة وصاح:-لاتقارررررنننننييييهااااا بملاااااك
لاتقاررررننينننن
بيداء:-وليش يمة ملاك وحد؟ غير مرتك هم
كمال:-هم كالت مرتك هم كالت مرتك يالعباااس اخذ عمري لاتجيييبيييين ملااااك ؏ ولاااااء
بيداء:-طبك مرض
سكت واني اشوف دمارات ايدة
الي بحضني برزت سكتت اني هم ماحجيت
ومن رجعنة وردة سولفتلي
بنصهن وكايلتلة خالتي كوموا اصعدوا
انت و ولاء احجوا واتفقوا شوكت العرس
وهو استحى وكال لا عيب
بس ولاء مجلبة وكايلتلة اريد اكلك ؏ شغلة
وهو صاعد وياها
ومرت الأيام ببطئ وصارت ولاء
كل ساعة جاية ويا رندة من كد حرگتي وغيرتي
كمت اكول لكمال ضل برة لا تجي واني
اشوفة حتى هو يضوج
منها مايطيقها
وين جنة بالخطوبة يخاف يرمش خاف مايشوفني
عدل و؏ كولة خالتي ساكن ببيتنا جان
وعقدوا محكمة وصارت مرتة بالشرع
والقانون
وعفتة يروح وحدة للمحكمة؟ اكيد لا
رغم غيرتي وحرگتي وشوغتي
بس ماكدرت اعوفة لحظة
واجة يوم العرس
الي هو اسوء أيامي...
