رواية حكاية ترف الفصل العشرون
الصّدمة من النّاس
لا تعني أن تَتوقف عن الطّيبة،
بل أن تَتعلم وضع حُدود ..
فالنُّضج لا يعني
أن تَفقِد نَقاءك،
بل أن تَحمِيه.‟ 👌🏻✖️ 💢
ترف
٢٠١٢
السنه الدراسيه الثانية بدت وأجمل ما بيها هي صداقتنا الثلاثية (فاطمه ترف وليد )
وبما أن أول أيام الدوام يصير خربطه بوقت المحاضرات وسايق الخط وقته ثمين جدا ومايقبل ينتظر فلانه وعلانه .. ويوم يجي ويوم يصير عنده عطل لو يتأخر بالازدحام والكثير من هاي المشاكل.. فاطمه اقترحت علينا أن وليد يصير سايق خط النا وبنفس مبلغ الخط القديم
- ترف : والله خوش فكره واحسن ماتجي للكليه وترجع فارغ راح تطلع فلوس البانزين
- وليد : شنو هالحچي .. آخذكم وارجعكم ابلاش شنو موعيب آخذ فلوس منچن
- فاطمه: إذا ما تاخذ فلوس ما نشكل وياك
- ترف : شوف وليد احنا اول وتالي دافعين المبلغ إذا مو ألك راح يرحن لو تكسيات لو للخط الجديد وثانيا من راح تاخذ فلوس من عدنا هم تطلع فلوس البانزين وهم حتى تلتزم ويانه مو يوم آخذكم ويوم ماگدر آخذكم
- فاطمه: شوف ترف شلون حلتها..وهم اضيف عليها إذا متاخذ فلوس شيگولون أهلنا علينا..
وبعد عدة محاولات وافق وليد يصير الخط الي ولفاطمه وبنفس المبلغ الي چنه نطيه للسايق السابق بلغت ماما ورحبت بالموضوع..وليد انسان شريف وملتزم أخلاقيا....
ومن أهم أحداث هاي السنه منى جابت بنوته حلوه وحسب ما حچت النا عمه سعاد تگول كلش فرحنا بالمولوده لان تعتبر اول بنيه تصير ابيتنا واحتارينا بالاسم وقرر شهم يسميها روح بس أبوه گاله لا يابه عيب النوب بالدوام يصيحولك ابو روح وابوتعال ... بالاخير سميناها آيه اسم حلو ومن القرآن الكريم ... شهم كلش يحبها واول ما يرجع من الدوام يگابلها ويگعد.. زشويه هم نفسيته تغيرت وقلل من عصبيته واصلا حتى علينا أذا نحچي بصوت شويه عالي يگول قللو صوتكم البنوته نايمه.. هذا كله توصله عمه سعاد لماما يعني نوع من التقرير اليومي
وهسه صار شهم اسمه ابو ايه
رهف صارت بالخامس علمي وهم كل اهتمامها بالمواد الدراسيه وتحضير الواجبات
ومن صار عدها موبايل بدت تجيها مرات اتصالات من تميم ابن عمي وچان حديثه وياها محدود جداً وهم گدامنا تحچي يعني مو بالختله هههه يسألها شلونچ بالدراسة أو محتاجه مساعده وهي چانت صريحة وصادقة يعني اذا تحتاج شي تگول وإذا ما تحتاج تگول لا شكرا مامحتاجه شي يعني مو مثلي من چنت أحتاج أو مايحتاج اگول اي تعال ساعدني... وأتصور الي جاي يسوي تميم هم بتوصيه من جدو..شوف بيت عمك اذا محتاجين شي..هو تميم خلص كليه وينتظر التعيين.. بس حاليا جاي يشتغل ويه عمامي بدال جدو لان بعد كبر ومايگدر يوميه يطلع للشغل
خالو مرات يتصل بأمي أو يجي يزورنا وبآخر اتصال اله عزمنا على زواج امجد بس امي أعتذرت منه بسبب الدوام ومانگدر كلنا نغيب وگالت له أن شاء الله بالعطله انزوركم ونقدم التهاني والتبريكات للعرسان
خلصت السنة الدراسية والحمد لله نجحنا
٢٠١٣
هاي السنه صار بيها ثورة في عالم التواصل الاجتماعي وهي ظهور وانتشار هاي الوسائل من الفيسبوك والڤايبر والماسنجر والانستكرام
ووياها لازم تكون عدنا موبايلات حديثه مو صرصور وطابوگه ودمعه وفراشة ههههه
وكل واحد من عدنا سوا صفحه بأسمه بالفيسبوك بس ماما سمت صفحتها بـ ام سيف
وبدينا كل واحد من عدنا باليوم ينشر أكثر من عشرين منشور وبيناتنا واحد يجاوب على منشور الثاني مع أن احنا كلنا گاعدين على نفس القنفه بالصالة ههههه
آني اغلب منشوراتي تكون علمية او نصائح طبيه وچان شهم يحطلي لايك 👍 على كل منشور
أما هو ينشر لو ابيات شعريه لو عن بنته والي يسميها حبيبة أبوها
وطول الوقت احنا الثلاثي على اتصال دائم (فاطمه ترف وليد) وصداقتنا صارت اقوى وحتى بدينا شويه نحچي عن اسرارنا الشخصية مثلا فاطمه بدت تحچيلنا عن خطيبها ومو مثل ماچنا نتصورهم الاميره سندريلا والأمير العاشق.. طلع بالخارج عنده هواي علاقات ويوميه تتعارك وياه ويحلف الها هاي آخر مره وبعد ماكررها...
- ترف زين ليش ماتفصخين الخطوبه
- فاطمه: ماأكدر ..اولا أحبه ثانيا أخته مرت اخويه وراح تصير بينهم مشاكل ..ثالثا آني أحسب يوم يوم حتّى اطلع للخارج ورابعا هو يگول لان عايش وحيد وبالخارج لازم تصير هيچ علاقات يعني عدهم عاديه ، بس من تجين يمي ونعلن زواجنا كلشي راح يتغير...
وليد هم حچى بعض اسراره
- من انفصلوا امي وأبوي عشت ويه امي أبيت جدو وهم ويانه كم واحد من الخوال أمي عدها هواي من الإخوة والأخوات وكلهم متزوجين..بيت جدو بمنطقة متوسطة لا شعبيه ولا راقيه . چان جدي وبيبيتي يكلش يحبوني ..وره فترة من الانفصال، اجت قسمة زواج لأمي صح هي چانت ترفض خصوصاً من چان جدي يشترط آني ابقى أعيش وياهم بالبيت ماروح ويه أمي وهي تريدني وياها ، بس بالاخير وافقت وچان هيچ أمر صعب عليّ لأن زغير وتفكيري مو مثل الچبير ... ابويه من سمع امي تزوجت طالب تكون الحضانه اله .جدي هم رفض وحچه وياه بحكمه وعقلانية
جدي گال الابويه
شوف خالد (ابو وليد)انت مثل ابني واسمع نصيحتي: انت الافضل الك تتزوج وتكون عائلة وتعيش حياة طبيعية ولاتضل كلما تشوف وليد تحچي على أمه وعلينه وتزرع الكُره والحقد بگلبه ..شما يكون هي أمه.. أمه ...سمعتني هي أمه .. وتره آني هم حچيت ويه احلام (ام وليد) من طلبت منها يبقى وليد يمي بعد زواجها.. وگلت الها روحي عيشي حياة طبيعية ولاتضلين تجيببين سيرت أبو وليد والمشاكل الچانت بينكم الي راح هم تزرع الكره بگلب وليد
وفعلا وره فترة اتزوج ابويه وكون عائلة واني بقيت عند جدي وبيبي وكل فتره اروح لواحد منهم وابات يمهم كم يوم يعني زياره فقط وهم اتعايش ويه إخوتي من أمي ومن ابويه
و چان شرط من جدو وبيبي إذا اروح لبيت ابويه ممنوع يسألوني عن أمي وعائلتها ولا يجيبون سيرتها
ونفس الشي من اروح لبيت امي ممنوع عليها تسألني عن أبويه ومرته وشلون عايش
أما الخوال والخالات كلهم طلعوا للخارج عندي بتركيا والأردن والإمارات وسوريا وراح نسويلهم مقعد خاص بالجامعة العربية هههه ... وقبل مايسافر اي واحد منهم يوقعه جدي على التنازل عن المطالبة بالورث (هو بس البيت البسيط ماعنده غير شي)
وهسه بس آني وجدي وبيبي بالبيت الي ناوي يكتبه بأسمي وحتى السيارة هي بالأساس سياره جدي ..
- الله يحفظهم الك
- آمين يارب العالمين
- وانت ياترف احچيلنا شويه عن حياتچ
- ترف.. من چنت زغيره توفى ابويه بس والله ض١ما عشنا آني وإخوتي حياة اليتيم لان جدي وعمامي ماخلو هذا الشعور يدخل حياتنا.. والله دللونا ولحد الان .. وعلاقتنا ويه العمام والخوال علاقة زينه وماعدنا تقريباً اي مشاكل واحنا كلنا ملتهين بالدراسة وبس..
(ماجبت لاطاري علاقتي بشهم ولا علاقة امجد بيّ ..لان هذا السر مايصير بعد يطلع)
- فاطمه : بس اريد اسألچ عن الولد الاشيگر الچان يجي عليج من چنا بالمرحله الاولى
- ترف اي هذا ابن خالي إسمه امجد
- فاطمه: وين صار ، بعد ما شفنا
- ترف: تخرج وراح للشمال يشتغل واتزوج
- فاطمه ياا تزوج..شبيچ ياغبره ليش ماخذتي انتي
- ترف: شلون آخذه ، وهو مثل اخويه
شو من گلت مثل اخويه وليد رفع أيديه مثل اليدعي وگال الحمدلله
وبهذا صرنا احنا التلاثه مثل الكتاب المفتوح واحد يعرف كلشي عن الاخر..بس السر الي عندي ماردت اطلعه وأحد يعرف بي
امجد وزوجته على خلاف دائم ودائماً زعلانه وعند أهلها وبدون مايذكرون الأسباب الحقيقية بس مرات خاله ام أمجد تگول لان اتأخرت بالحمل تصير مشاكل بينهم
منى هم صارت حامل مره ثانيه وخطيه هواي جاي تتعب بالبيت والشغل والطبخ وهم البنوته آيه ومسؤوليتها
ومن وصلت بشهرها السابع صار عدهم حادث وفاة أبوها الله يرحمه... چانت كلش متعلقه بي وتداري والنوب قهر وحزن وفاتحه وشغل صار عدها نزيف ومن نقلوها للمستشفى كان التشخيص لازم ولادة لان الحمل معرض الاسقاط
وبعمليه قيصرية جابت بنيه ثانيه ولأن جسمها غير مكتمل بقت بالخدج
منى خطيه حالتها حاله..امي وعمه سعاد چانن يوميه يتبادلن عليها بالمستشفى حتى يدارنها ويعتنن بيها..
طلعت من المستشفى رأساً لبيت عمو..ويمها عمه سعاد
وامي يوميه تروح للمستشفى حتى تسأل وتشوف شنو يحتاجون لان الطفلة بالخدج واحتمال تبقى أكثر من شهر
شهم هم يروح يوميه للخدج ومن يشوف امي يتشكر منها وتعبها وياهم وأمي ترد عليه..منى تستاهل التعب (بمعنى هذا لمنى مو ألك)
البنوته الثانية سموها سما
