رواية ذيب الشامخ الفصل التاسع عشر بقلم توتة
يگول ذيب :
قسمه وقدر مكتوب انه هويتك
بعت العمر بتراب لمن شريتك.
>>>>>>>>>>>>>>>>>
طلعت من المركز واني ضايج اتذكر كلام ام رباب افور ماعرف شنوو سوو وياها وليش هيه ماتحچي وياي
اكيد ماتگدر اني اعرفها زين هيه خوافه وماتكدر تسوي شي
بقيت افتر بسيارتي واني ادخن وافكر بحل شلون اقنع ابوها اذا هوه رافض ماگدر اخذها غصب
اخطفها ??
لا لا هل فكره موزينه واكيد رباب مراح تسويها وترضه تجي وياي هيه هم بنيه وتحلم بعرس وفرحه كدام الكل.
زين شلون بهل سالفه شلون اقنعهم اخذ شيوخ وارجع عليهم اي هاذه احسن حل لآزٍمٍ احاول مره ثانيه يمكن يقتنع
طلعت رقم ابوي واتصلت بيه رن مره ومرتين و3 وماكوو.
استغفرلله هوه اني صوجي واخابرك يايوم فكرت بيه وگلت عندي ولد ولازم اسال عنه
رجعت اتصلت علئ امي من اول اتصال فتحت خط
ام ذيب : الوو هلا يمه شلونك
_زين انتي شلونج شلون صرتي
ام ذيب : ؏ لله
_شلتي الخياطات لو بعدج
ام ذيب : اي يمه من لبارحه اخذتني تبارك وشلتهن
_وهسه شلونها خما تأذيج
ام ذيب : لا تخاف يمه زينه انتي بشرني شلونك يمته تجي واشوفك
_يمكن باجر اجي عليكم اريد اخذ اعمامي وارجع علئ اهل رباب
ام ذيب : صدك همه شو سكتو حچو وياك مارضو شنوو
_اي تذكرين قبل فترا من گتلج مختفيه طلعو اهلها عارفين بكلشي وليوم حچيت ويه امها گالت انساها ومالك مره يمنه
ام ذيب : خطيه خاف مسويلها شي لبنيه
_ولله مادري يمه حاير ماعرف شسوي اروحلهم للبيت خاف تتعقد السالفه اكثرر احسن شي اجي اخذ اعمامي وارجع اخطبها بلكي يقتنع هوه ابوها الرافض.
ام ذيب : اي زين تسوي يمه لاتنسه البنيه عدها أهل وهمه الي يقررون
_طبعا وهوه هاذه الي مسكتني لحد هسه ولاه اخذها غصبن علئ كل واحد بس ماريد اكبر السالفه واخرب الاول والتالي احسن شي امشي وياهم بسياسه بلكي يقتنعون.
ام ذيب : لله كريم
_اي ..وابوي وين شو اتصل عليه مايجاوب
ام ذيب : ولله يمه هل فترا حته ماگاعد ويانه كله بالشغل
_ليش شكو
ام ذيب : مادري ولله مايحچي شي بس سالفه بيها مخدرات ويشتغلون علئ هاذه الموضوع يريدون يلزمونه
_انتي هم رجعتي داومتي
ام ذيب : لبارحه قررت اروح ومارضه ابوك گال من تصير صحتج زينه داومي
_اي صح كلامه لاتضغطين علئ نفسج ارتاحي
ام ذيب : ولله يمه مخنوكه بالبيت هم اريد اطلع اتنفس واني صرت زينه مابيه شي
_لا ممنوع مو شفتي نفسج صرتي شويه زينه وتمشين گلتي هاهيه طبت بعد حاولي ترتاحين شويه الشغل مو أهم من صحتج
ام ذيب : انشالله يمه.
_يلا حبيبتي عندي شغل هسه بعدين احچي وياج.
ام ذيب : دير بالك يمه لاتخلي بالي يمك
_انشالله
سديت منهاا فريت سيارتي گعدت مطعم تغديت وبقيت اكلب بجهازي بصور رباب شكدد مشتاق الهاا مشتاق لسوالفها الفاهيه
حته من تحچي صوتها فاهي وخوافه بشكل
اتذكر سوالفها واتبسم لوحدي اتصل جهازي جانت رقم غريب
_الوو
هيثم : سلام عليكم
_وعليكم السلام ورحمه
هيثم : شلونك يابه
_بعد روحي بخير انته شلونك ولاصغران بيك بس ماعرفتك منو ?
هيثم : عم رباب
_اهلا وسهلا بيك
هيثم : بيك اكثرر شلونه الشغل
_ولله ماشيه انته شلونك
هيثم : الحمدلله .. عندك مجال نحچي عندي حچي وياك ولازم تسمعني الاخر
_ماعندي شي تفضل واذا تريد انه حالين طالع ادزلك العنوان وتجي او اني اجيك ماعندي اشكال
هيثم : لا شغله مو كلش ضروريه نحجي علئ الجهاز بس صيرلي علئ صفحه حته تسمعني زين
_ماشي .. خليك وياي
طلعت محفضتي خليت الحساب وطلعت من المطعم رحت كعدت بسيارتي
_بعدك وياي
هيثم : اي
_تفضل اسمعك
هيثم : اسمعني بويه اني ليوم حچيت ويه رباب وعرفتك انته منين وشنو تشتغل وادري بينك وبينها علاقه اخذت رقمك حته افهمك شي واحد
ابوها شخص ميتفاهم ومن يحچي شي مايتراجع عنه اني احچي لمصلحتك ماريد يصيرلك شي وانته بعدك شاب وبأول حياتك صدكني اني حچيت وياه وحاولت اقنعه بس هوه قافل ومايرضه خصوصا من عرف اكو علاقه بينك وبينها
_كلامك ؏ راسي بس اريد اعرف شي واحد هوه ليش رافض الموضوع تعرف عليه شافني شاف شي عليه اشو لله مكني والحمدلله ماعايز شي رجال وناس كلها تعرفني. زائد الحب لاحرام ولاهو غلط
انه حبيت بتكم ولله يشهد علئ كلامي عمري ماتخطيط حدودي وياها وطلبتها منكم علئ سنه لله ورسوله ومستعد انتضرها ليوم وباجر وسنين عمري كلها ومستعد هسه اجيب كل شيوخنه واجي اخطبها
هيثم : ادري انته رجال ونعم منك بس بويه گتلك ابوها رافض الفكره نهائيا ليش تجي وتتفشل كدام اهلك وناسك انه احچي لمصلحتك
_مايهمني حته لو نفشل باجر بحيل الله انه رايح وراح اجيب شيوخنا وجايين عليكم واكيد انتو ماطردون خطاركم.
هيثم : تعال ويصير خير
_حاول وياه انته انته مو أخو ماتاثر عليه
هيثم : ولله لو يترادد جان ساعدكم ليش نوكف بقسمتكم
_زين منو اكثرر شخص يسمع منه ابوها احچي وياه اني واخلي يساعدني
هيثم : اكثر شي ابوي هوه ياخذ بحچيه
_ماشي باجر نجي عليكم خلي يصير معلوم عنده حته مايتفاجأه
هيثم : ماشي ..
سديت منه واني مقرر باجر اخذ شيوخنا ونروح عليهم شغلت سيارتي ورجعت للمركز اريد اخذ اجازه يوم واحد.
وصلت بوجهي للمسؤل اخذت منه اجازه بصعوبه وطلعت لصلاح الدين
بالطريق واني اسوق اتصل جهازي رفعته شفته ابوي فتحته بالسياره
_الوو
ابو ذيب : داك عليه مادري بيك جنت بشغل
_اي جايك عدي شغل وياك
ابو ذيب : خير شكو صاير شي
_اوصل وتعرف كلشي جايكم انه
ابو ذيب : ماشي ..انه هسه راجع للبيت انتضرك
سديت منه وكفيت سياقه بعد ساعات من السياقه والتعب وصلت للبيت تقريبا بـ 1 بليل
دكيت الباب فتحته اختي تبارك حضنت عليه وهيه فرحانه
تبارك : يمه تعاي هاذه ذيب وصل
_شلونج ولج
تبارك : الحمدلله زينه انتي شخبارك
_بخير
طلعت امي من الصاله وشافتني وضحكت واجت يمي
رحت عليها بستها من راسها وحضنتها علئ صدري
_شلونج يعافيتي
ام ذيب : يمه هلا بعزيز گلبي زينه انته شلونك يبعد حيلي
_؏ لله
تبارك : شعجب اجيت خويه
_لگيتلج رجل اجيت ازوجج ورتاح منج
تبارك : يااا ولله ماتزوج شنوو بكيفكم
_شلون بلا تضلين نايمه ؏ گلوبنه
تبارك : يمه احچي ويه ذيب.
ام ذيب : ههه يشتاقه وياج يلخبله .. تعال يمه ادخل ادري بيك تعبان
_اي وعلي هلكان مو بس تعبان.
دخلت وامي واختي حاضنهم كل وحده بصفحه لكيت ابوي وخواني كاعدين
_سلام عليكم
الكل : عليكم السلام
سلمت وگعدت راحت تبارك جابت ماي شربت
ام ذيب : اسويلك عشه يمه خاف ممتعشي
_تسلم ايدج متعشي
ام ذيب : ياا يمه شوكت اكلت حته مطاعم ماكوو بهيج وكت
_لا يابه وداعتج مفتحه المطاعم تعشيت واجيت
ابو ذيب : شلونك شلون الشغل
_بخير انته شلون الوضع يمك سمعت من امي عندك قضيه صعبه وملتهي بيها هل جم يوم
ابو ذيب : اي القضيه الكبل فترا شرحتلك عليها وصلت النه معلومات وجاي نحقق بالموضوع
_خير انشالله
ابو ذيب : اي ماگتلي شنهي الموضوع الرايديني بيه
_اي ضح نسيت انه جايك بشغل اريد اخطب بنيه بغداد واريد اخذك انته وشيوخنه عليهم
ابو ذيب : مو هذاك اليوم راحت امك شنهي مارضو لو خطبه رسميه
_لا مارضو واريد ارجع مره ثانيه عليهم
ابو ذيب : وانته عليش منزل نفسك الهم شنهي ماكوو نسوان غيرها يرفضونه مايعرفونه حنه منو
_همه ماتهمهم منو احنه وشنو السلطه العدنه
ابو ذيب : واذا هيج مايهتمون النه شكوو رايحين عليهم
_اني رايد البنيه معليه بأهلها ماميت عليهم
ابو ذيب : خاف مسوي شي وياها وتريد تستر عليها
_استغفرلله يابه لله بالخير عليك البنيه شريفه واني علاقتي وياها نضيفه ورايدها علئ سنه لله ورسوله شنهي كل واحد يحب بنيه لازم مسوي وياها سوالف مكسره
رياض : كلام ذيب منطقي مابي شي خلونه نروح عليهم ونشوف شنو تاليتها وياهم يمكن هذاك اليوم امي مَآعِرَفتّ شلون تقنعهم.
ام ذيب : لا ولله حچيت وياهم وهمه جانو خوش ناس وگالو نحجي ويه ابوها ونردلكم خبر
_ادري يمه ادري همه كلهم راضين بس ابوها رافض الموضوع حته ليوم خابرني عمها كال حاولت وياه قافل حته خوانه مأيسين منه
ابو ذيب : اذا هيج زلمه قافل شلون نروح باجر وناخذ شيوخنه شلون اذا رفض وفشلنه كدامهم
_ميخالف المهم احاول وماسكت عنه احب البنيه افتهمو اريدها لو ادري بروحي انكتل واتكطع اخذها واذا ماينطونها اخطفها وابليكم وهاي كدامكم احچي
ابو ذيب : هاذه موو حچي ذييييب شنهي تخطفها تاايهه الشغله تريد تورطنه وياهم
ام ذيب : يمه صلي علئ محمد انشالله يرضون
_حچيت العندي ولباقي عليكم
ابو ذيب : شغله مو زماط خوش اذا اهلها مايرضون تعوفها وماتدخل بحياتها بعد
_اخذ عمامي ويصير خير
رياض : واذا رفضو تتنازل عنها.
_مستحيل اتنازل احاول مره ومرتين والف
ابو ذيب : تذل نفسك علئ مره ?
_الحب مابي مذله
ابو ذيب : شوف اكلك شي واحد وخلي بالك باجر راح اروح وياك وناخذ عمامك ونروح عليهم اذا رفضو الموضوع بعد لو تنگلب الدنيه مارجع وهاي لحجايه خليها بالك
_لو ماكدام الناس فلا اطلب مساعده منك
ابو ذيب : ولكككك هاي جزاتي فوك ماريد مصلحتك
_هيه تسميها مصلحه ??
ابو ذيب : طبك مرض شتريد جااا
حچه هيج لو احس دخان طلع من عيوني دفرت الطاوله وكمت علئ حلي
_كلشي ماااريد منك خليك مكانك انه اعرف شلوون اتصرف وانه جلب وحيوان اذا رجعت للبيت بعد
درت وجهي اريد اطلع جلبت امي بيه وهيه تبچي
ام ذيب : يمه بداعتي عليك اذا تعزني اگعد ولله نروح وياك بس لاتطلع
ابو ذيب : خلي يروووح نشتغل عنده احنه هاي العايزه واحد مثله يعلي صوته عليه
_وخري يمه خليني اطلع
ام ذيب : ابو ذيب عليك لله لاتسوي هيج جاي ومتعني عليك لاتخلي يطلع مكسور الخاطر بداعتي عندك لاتسوي هيج
_لاتتوسسسسسلين بيه وخررري خليني اطلع
رياض : يمعود صلي علئ محمد اكعد وانشالله كلشي ينحل لاتضوج من كلام ابوي تدري بيه يريد مصلحتك
_تسمون هاي مصلحه ا**** لهيج مصلحه.
ام ذيب : تعال وياي ارتاح بغرفتك شويه ولصباح رباح
_ماضل دقيقه هنا خليني اروح علئ بيت عمي ولصبح اخذهم واروح
ام ذيب : شلون يمه تروح بدون ابوك شتگول لعمامك
_اكلهم منصبه عنده اهم من حياه ابنه
ام ذيب : تعال يمه امشي وياي
سحبتني گوه اخذتني صعدنه فوك لغرفتي كعدت واني احس روحي علئ لحضه انفجر
_يمه لخاطر لله خليني اروح وامسحي دموعج علئ شنوو تبچين اريد افهم
ام ذيب : الئ متئ تضلون هيج انته وابوك ثنينكم ماگدر افاركم ليش ماتحسون بيه
_انتي شفتي بعينج شلون يحچي مسوي منيه عليه لان نزلت روحي واجيت اخذه اني كلب ابن كلب شلون اجي شنو نسيت سوالفه السواهن بيه بس ااااخ زله بعد
ام ذيب : لا حبيبي لاتحچي هيج ابوك يحبك ولله ويريد مصلحتك وكلامه منطقي يعني اذا اهل البنيه ماينطونها خلي البنيه تشوف حياتها لاتصير سبب بتدمير حياتها وحياتك
_اذا اعرف بيوم رباب رافضتني وتريد تكمل حياتها مستحيل اتقرب صوبها بعد واخليها براحتها بس انه ادري بيها تريديني واهلها جابرينها تسكت وماخذين جهاز منهاا متاكد ولاه هيه ماتتحمل اذا ماتحچي وياي.
ام ذيب : لله كريم يمه كلشي قسمه ونصيب واذا لله كاتب الكم تصيرون لبعض لو يوكف الكل بوجهكم تصيرون بس اهدئ واخذ الموضوع بتفاهم اذا انته تصيح وابوك يصيح شراح تستفاد بس گلي ولاتنسه اذا ماتاخذ ابوك وياك كدام اعمامك مراح يصير الحچي وانته رايح خطاب لازم ابوك وياك كدام الناس
_ادري لازم يكون موجود وهايني اجيت عليه حته اخذه بس شفتي بعينج شلون يحچي وياي
ام ذيب : ميخالف يمه يضل ابوك واكبرر منك حاول تكون هادئ وتحجي وياه بتفاهم انته ماتعرفه شنو هوه من زمان هيج عصبي ومايتحاجه
_؏ نفسه خوووش مايهمني انه
ام ذيب : بداعتي عليك يمه اذا الي خاطر يمك كافي نام ورتاح ولاتفكر بشي وانه هسه اروح واحچي ويه ابوك واقنعه باجر يروح الاعمامك وياك
_ابوس ايدج كافي تتوسلين بيه
ام ذيب : ماتوسل بيه بس اذا ماگعد وياه واحجي مراح يصير الحچي
هزيت راسي وسكتت راحت للكنتور طلعتلي ملابس واجت يمي
ام ذيب : كوم يمه اسبح ورتاح شويه والصباح رباح
اخذت الملابس من ايدها وبست ايدها ابتسمت وطلعت من الغرفه دخلت سبحت وطلعت تمددت علئ جربايه واني افكرر شلون اقنع ابو رباب شلون اخلي مايرفض كدام اعمامي.
اذا أبوي عصبي وصعب يتفاهم فأ ابوها طلع مثله وماكوو فرق بينهم انه ويه ابوي ماگدر اتفاهم واسيطر علئ اعصابي شيصير بيه اذا يرفضني كدام الكل شلون اسيطر علئ اعصابي اااخ رباب شسويتي بيه.
نمت وانه افكاري متخربطه وماعرف شلون اتصرف
صباح ثاني يوم "
گعدت صبح علئ صوت امي تگعد بيه فتحت عيوني تعبان واحس راسي صاير طبله
ام ذيب : كوم يمه صار الظهر جا شوكت تروحون لعمامك
_اي كاعد هسه
كمت غسلت ونزلت وياها تريكنه وطلعنه كل واحد بسيارته ماكعد وياه واحد كالب وجهه علئ الثاني
خابر ابوي علئ اعمامي وعلئ شيخ عشيرتنه راح ابوي للشيخ يجيبه واني رحت علئ اعمامي مريت عليهم واحد واحد
الكل فرح. الي لان رايح اخطب.
طلعنه تقريبا 10 سيارات كل واحد طلع بسيارته اني اخذت وياي عمي وابن عمي وابوي الشيخ وياه صاحبه
وباقي عمامي ولدهم اجو بسياراتهم
طلعنه من صلاح الدين بعد صلاه الظهر متوجهين لبغداد.
وصلنه لمنطقتهم اتصلت بأعمهه گال تعال علئ بيت ابوها خابرتهم گتلهم راح اطلع كدامكم حته يعرفون المكان
طلعت كدامهم لبيت اهل رباب وصلنه الهم نزلنه كلنه سويه سدينه الشارع عليه كله
طلعت شيوخنه وناسنه الكبار بالمقدمه دكينه الباب فتحه ابوها ...
