رواية حكاية ترف الفصل الواحد والعشرون 21

ترف 

چان لنجاح رهف فرحه چبيره النا وخصوصاً ماما الي دموعها تجري وهي حاضنة رهف...

- شالقضيه ماما اطي مجال خلي آني هم أحضنها ... زين انتي فرحانه هاي الدموع شنو موقعها

- اسكتي اسكتي ما تدرين شنو احساسي هسه.  من اشوف ثمرة التعب والقلق والصبر والدعاء بكل صلاة .. وهاي الدموع اكبر شاهد على فرحتي بهذا النجاح 

نجحت رهف وكالعاده بتفوق وهم چان معدلها قريب للـ 100 وراح تكون المجموعة الطبيه من نصيبها أن شاءالله 

وبدت التهاني والتبريكات من الأهل والأقرباء والأصدقاء توصلنا عن طريق الموبايلات 

هاي الايام بدت عمه سعاد تلمح لأمي وتحچي على چنتها ..

- عمه سعاد : منى صايره مو مثل گبل شغل البيت بالگوه تكمله ، طبخ يوم اي ويوم لا ..صح هي مهتمة بشهم وبناتها وبنظافة الغرفة والملابس غسل وكوي بس احنا هم النا حگ عليها

- ماما: انتي هم شويه ساعديها خطيه بتها الزغيره دوم مريضه 

- عمه سعاد: والله ياأم سيف دوم أيدي وياها بس آني هم كبرت ومو صاحيه ودوم مريضه وبالگوه اتحرك

- ماما : الله يساعدچ ويعينچ

وبقت بين فترة وفترة وذبتلها حچايه. على بو نريد نبني بالحديقة مشتمل لشهم ... الولد كبرو ونريد انزوجهم ..

وأمي تجاوبها اي شكو بيها شهم هم صار عده عائلة ولازم يستقل والولد اول وتالي هم لازم يتزوجون 

وامي چانت تحچيلنا الي  ولرهف كلشي تگوله أو تسمعه من عمه سعاد وماتضم علينا اي شي .. بس چنت الاحظ اهتمام من رهف بالموضوع أثناء حديث ماما يعني تسأل اي وبعد شگالت عمه وشنو تقصد بفلان شي وانت شنو جاوبتيها وبالأخير تگول زين شنو رأيكم بكلام عمه

ومن مره نزل علينا سيف يركض گال سمعت شهم يتعارك ويكسر بغراض غرفته ويفشر وصوته عالي جاي أسمعه وهم صوت زوجته تبچي وتصيح (چان يسمعهم من غرفته الملاصقة لغرفة شهم)

احنا استغربنا وهم چنا نريد نعرف شكو بس امي گالت عيب تتصنطون ، شي مالنا دخل بي .. وعلى العموم باچر تجي ام شهم وتكت الأول والتالي 

والصدگ آني ماهتميت بس على منى خطيه من گال سيف تبچي وتصيح.. بس رهف لا چانت بمُدها تلبس عبايتها وتروح لبيت عمو وتشوف شنو الموضوع 

وفعلا ثاني يوم اجانه الخبر اليقين 

بثاني يوم وقريب الظهر اجتنا منى وشايله بتها الزغيره سما لأن بس تبچي وماتعرف شنو بيها ...گعدت يم ماما وچانت كلش متضايقه لأن مبين عليها ..

ماما اخذت منها الطفلة وگلبتها على بطنها وضلت تفرك بمتونها وضهرها يمكن عدها غازات لو ممتونه.. ومن ارتاحت شويه بدت تلاعب بيها ...احنا سوينا عصير ليمون النا كلنا وجبرنا منى  تشرب حتى شويه تهدأ

وبدت تسولف 

اول شي بدتها بالمشاكل ويه عمه سعاد وگالت 

- والله خاله هلكت من الشغل يوميه لازم البيت كله كنس ومسح والحمام جلف وهدوم العائلة كلها غسل وكوي والنوب تريد طبخ غده وعشا وآني كله هذا اسوي وبطيب خاطر وبدون ملل شمايكون همه عائلتي ويشهد الله عليَّ خالتي دائما تمدح بشغلي وبنظافتي وبطبخي بس ياويلي لو يوم واحد قللت من شغلي ينگلب كل هذا السويته واصير الفاهيه الكسلانه التنام للظهر ..خاله آني مو حديد آني هم عندي طاقه ..وهم اتعب وهم اريد ارتاح وبس بناتي يرادالهن وحده متحزمه من الصبح وخصوصاً سما وأشرت على بتها الي بحضن ماما..سما دوم مريضه لان ولادتها چانت مو بوكتها..

- ماما : الله يساعدچ يابنتي .. والله عليچ شتحتاجين تعالي عليّ وآني اساعدچ حتى إذا تردين يوميه جيبي بناتچ يمي من الصبح بين ماتكملين شغل البيت

- منى: تسلمين خاله والله انتي احسبچ مثل امي

وكملت كلامها وبدت تحچيلنا على الصار البارحه...تگول سويت الغده وآني ايد بالطباخ وايد شايله سماوي .. وبين ما التمينه كلنا عمو والولد وابو آيه صبيت الغده ومن كملو اكل لميت المواعين وجاي نشرب بالچاي خالتي گالت ووجهت كلامها لتميم وأيمن 

- انتو كبرتو ولازم تتزوجون واحنا هنا هم نريد احد يساعدنا بالبيت وشوفت عينكم منى من الصبح لليل لازمه الشغل وهم نريدها شويه ترتاح خو مويبقى كله عليها

- الله كريم 

- شتگولون لوتاخذون بنات عمكم انت (على تميم) تاخذ رهف ( شو شهم رأسا فز وانتفض من سمع إسم ترف) وانت (على ايمن) تاخذ رهف

بقو الكل ساكتين وواحد يباوع على الثاني

- بس تميم تشجع وگال آني بصراحه اريد رهف ..

- خالتي:  شلون يصير يعني انت تاخذ الزغيره وأيمن ياخذ الچبيره

- أيمن : ومنو گال آني اريد آخذ من بنات عمي آني اريد وحده غريبه ويايه بالكلية 

- خالتي شنو هالحچي..يعني رهف تتزوج قبل اختها لا مايصير

- تميم: ومنو گالچ هسه أخطبها واتزوجها

- خالتي هااا شو حچيكم ما جاي افتهمه ...شوكت تريد تخطبها 

- عمو والظاهر عنده علم بكلشي گاله تميم : شوفي سعاد بالمختصر تميم طلب من الحجي (يقصد الجد) يحچي ويه ام سيف يحجزله رهف سمعتي يحجزله ومن تكمل البنيه دراستها مال الكلية يتزوجها ...

خالتي ظلت صافنه والظاهر الكلام ماعجبها وبقت لاتگدر تعترض لان الحچي صار بعد يم الزلم ولا تگدر توافق لان تريد هسه خلال هاي الايام يتزوج ويجيبها تساعد بشغل البيت

- خالتي : وانت أيمن منين البنيه الرايدها.

- ايمن : بعدين أگولكم منو لان الموضوع بعدله هواي ومن يصير وكته نحچي بي

منى :  آني تشجعت وگلت زين شنو رأيكم أخطب ترف لأخويه حسن 

شو هذا شهم رأساً گال وبصوت عالي وبعصبيه 

- شهم : اسكتي.. اسكتي.. شنو ترف تاخذ اخوچ

- منى : ليش شبي اخويه هم شاب مكمل دراسة ولأن ماكو تعيين جاي يشتغل بمحل تليفونات ...

شو هذا شمر كوب الچاي وصعد للغرفه .. خالتي جبرتني أصعد وراه رغم گلت الها خلي يهدأ ياله أصعد بس ما قبلت وأصرت الا هسه اروح اشوفه شبي 

وبعدني هستوني طبيت للغرفه شو هذا انگلب طنطل عليّ أنتي شلون تگولين ترف تاخذ اخوچ شلون تساوين ترف بأخوچ حسن شجاب الثرى للثريا 

- آني وبصوت عالي: ليش شبي حسن اصل وفصل واخلاق ودين ويشتغل شنو النقص البي ...

وظل يسب ويفشر ويكسر بالتحفيات والعطور بالغرفه وچنت اعيط ويه كل صوت تكسير..

ولو مو عمو والولد يطبون علينا للغرفه چان يمكن ضربني أو شمر شي على راسي

احنا بقينا كلنا ساكتين لان تفاجأنا بهاي الأحداث ومانعرف شنو نجاوبها

بس رهف بقت مدنگه 

وأول ما طلعت منى من بيتنا أمي استلمت رهف تحقيق 

رهف 

ماما حتى ليروح بالچ بعيد 

من صار عندي تليفون چان تميم يخابرني عادي ويسألني إذا احتاج مساعده واصلا چنت اجاوبه گدامكم

بعدين قبل تقريبا شهر وبالذات بيوم الي خلصت الامتحانات هم خابرني وسأل شلون چانت اسئلة المواد وشلون چانت اجوبتي 

وبعدها گالي 

- تميم : أريد احچي وياچ بموضوع..

- رهف اي تفضل

- تميم : آني معجب بيچ ومن زمان ورغم انتي بت عمي ومني وبيه بس هم درست اخلاقچ وتصرفاتچ وشفت انتي المناسبة الي أتمنى أكمل العمر وياها.. كل الاريده منچ تفكرين زين بالموضوع إذا قبلتي اكون أسعد واحد بهاي الدنيا 

وإذا رفضتي وهذا حقچ اعتبري ماسمعتي مني شي وانسي الموضوع 

رهف (رأساً تذكرت ترف من شهم طلب منها الزواج مقابل ترك الدراسة)

زين ودراستي 

- تميم آني ما راح أطلب منچ خطوبة وزواچ الا تكملين دراسة وأكون فخور بيچ.. آني الرايده منچ هسه الجواب فقط اي اولا 

وإذا اي حتى اجي آني وأبويه وجدو نحچي الموضوع لخاله ام سيف حتى يكون عدها علم بكلشي وإذا تردين هسه خطوبة هم ماكو مانع بس الزواج الأفضل بعد التخرج 

وانهت كلامها هذا كل الصار

- ماما ماطلعتو اوتلاگيتو

- لا ابد بس قبل يمكن سنتين چنه نتلاگه بعد الدوام ونرجع سوا للبيت وبدون ما نحچي حرف واحد هو يمشي وآني امشي وياه وبيناتنا مترتين... وآني حاچيه هذا الترف 

- ماما باوعت عليَّ وگالت ليش ما حچيتولي

- لان مو شي مهم 

بقت امي بحيرة بس اشويه ارتاحت من گالت تميم وأبوه وجدو يردون يجون عليچ ويفتحون الموضوع ..

وفعلا وره أقل من أسبوع عمه سعاد گالت لأمي اليوم العصر نريد نجي عليكم عدنا موضوع وياكم

احنا جنا حاسبين حساب كم نفر بس الصار كل العائلة التمو عدنا... جدو وبيبي وعمو ليث وزوجته وجهاله زينب ومحمد وبيت عمو فارس كلهم وحتى شهم ومنى وبناته

امي وسيف استقبلوهم وآني ورهف بعدنا بالدشاديش وبقينا بالمطبخ.. طلبت من رهف تروح تبدل ملابسها على السريع لأن يجوز يصيحوها اويردون يسألوها وآني بقيت أحضر الضيافة...

وهم اجت يمي منى ساعدتني بهاي المهمه

بدأ جدو يحچي لأمي عن امنيته من زمان بناتنا لولدنا وهسه يتمنى إذا وافقت رهف تكون من نصيب تميم 

- ماما: جيتكم انت وابو شهم وابو زينب على الرأس بس الجواب الأول والأخير عد رهف..

- تمام إذا تردين هسه تسأليها حتى نعرف الجواب وإذا تحبين نأجلها على غير يوم احنا حاضرين لكشي ولكن خير البر عاجله 

- ماما : من رخصتكم اسألها وأرد الجواب 

طلعت ماما وراحت لرهف بالغرفه تسألها 

رهف رأساً اطت الجواب موافقة...

بشرتهم امي بالموافقه وبيبي ومرت عمو ليث بدن يهلهلن 

- جدو هسه نريد نعرف طلباتكم تردون خطبه ونيشان ومهر سيد لو بس نبقى على هالحچايه وقبل ماتتخرج نسوي الخطبه وبعد التخرج يصير الزواج 

- امي گالت اني افضل نبقى على حچاية رهف لتميم وبعدين تصير الخطبه والزواج ... حتى نطيهم مجال يتأكدون من مشاعرهم .. بس عندي شرط

- أأمري بنتي ام سيف 

- ماما : لانريد طبه وطلعه ولا تليفونات وسهر للصبح وباوعت على شهم الي دنگ راسه 

- جدو : حقچ يابه وهسه اني أكول وآخذ عهد منك يا تميم موافق تنفذ هذا الشرط.

- تميم: أعتبره تم جدو

- جدو : خوش .. هسه خلي نقرأ الفاتحة بنيه رهف صارت من نصيب تميم ونطلب من رب العالمين يسهل أمورهم وبعد عنهم السؤ وأصحاب السؤ

سيف وأيمن قدموا الضيافة وقبل ما يستأذنون طلب جدو يشوفنا آني ورهف ويسلم علينا

ركضت للغرفة ورأسا لبست بشت فوگ الدشداشه بس  رهف چانت مبدله وكاشخه 

طبينا سلمنا على الحضور آني طلعت بس رهف كعدت يمهم

شويه واستأذنو للخروج وهم جدو بلغ ماما تتصل بي إذا رادت أو احتاجت شي

ومن بقينا وحدنا بدينا نحلل الأحداث 

- امي گالت يمكن أم شهم ماقابله على هاي الموضوع لان ابد ما فتحت حلگها بحچايه وحده وحتى چان مبين على وجهها جايه غصب عنها 

ومن هلهلن الحجيه وإيمان هي ماشاركت 

- رهف : اي وحتى من رادو يطلعون ، الكل باركولي وقسم بوسوني وهي گوه طلعت منها كلمة مبروك وبس خلت خدها على خدي بلا ماتبوسني 

- ماما : الله يهديها ماعدنا وياها شي..هي گلبها طيب والبگلبها على لسانها يعني ماتضم شي... وإذا ردتي تكسبيها يارهف دائماً شوفي منها الوجه الابيض وحاولي تغطين على الشي المعجبچ منها ولا تفكرين بي

هيچ ياله تسير السفينه