رواية الوجه الاخر للرحمة الفصل الواحد والعشرون بقلم عبير إدريس
صوت الأغاني عالي والناس كلها فرحانة اللي تركص واللي تطش جكليت واللي تهني امي وتنطيها الواجب ....
لهناك وفرح صاحت بصوت عالي بعدما رفل دارت المي عليها ، رحتلها بس خفت اتقرب لا تفشلني كدام الناس ، امها عاينتلي وكالت
_واضح انتم ناس ما تفرحون لغيركم ، الحقد والكره عامي گلوبگم ، مبينين شنو سبحان الله من وجوهكم
التفتت لبنتها وصاحت بيها
_ لا تبجين خل نشوف عريس الغفلة شنو يسوي من يشوف عروسته خرب مكياجها وفستانها تبلل وفرحتها خربت...
اختها ردت
_ هاي اهانة النا مستحيل نسكت عليها ونتقبلها
طفوا الأغاني والنسوان التمت تتفرج ، امي تقربت مني تسألني شصاير
زهرة : شكو منو طش الماي على البنية ؟
طيبة : يمة هاي رفل
زهرة : يا مكموعة اليوم اطيح حظها
عافتني وراحت للعروس وامها تعتذر عن تصرف رفل
زهرة : يا عيني بنيتي امسحيها بوجهنا هاي طايشة ما تمثلنا
امها عاينت لأمي بحقارة وكالت
_ عذرج شيفيدنا بعدما انكسرت فرحة بنتي؟
زهرة : يا هو انه الطشيت عليها الماي ؟ هاي بنت عمه جاهلة ما تفهم
_ جاهلة ؟ ليش هو منو المثقف والمرتب بيكم؟
سمر : ولج هديني عليها خليني أأدبها
طيبة : اكعدي سمر لا تخلينا علج بحلك النسوان
سمر : امج جاي تنهان ما تسمعيها شتكول ؟
طيبة : كلمن يعمل بأصلة خلي الكبار يتصرفون ورفل تتأدب على سوايتها انتِ لا تتدخلين بينهم
امها صاحت صوت سكتتنا كلنا
_ وين ابوكم ؟ اريد جبيركم ، ماعندي حجاية وياكم اريد اشوفه يرضى بالسويتوه ببنتي هاي اولها هيج تاليها شلون ؟ والله ما أأمن اخليه عندكم لحظة وحدة بعد الصار
زهرة : لا تكبريها مي انذب عليها مو نار
_ هي هاي تربيتكم لبناتكم ؟ هاي أخلاقكم ؟ تجيبون بناتكم يشمرون المي على العروس بيوم عرسها وتخربون فرحتها ؟ واذا مي ؟ ما خرب شعرها ومكياجها ؟
زهرة : انتِ عليش تشملين الكل ؟ هي بنية وغلطت وما نعوفها نأدبها ونرجع حك بنتج
_ بعديش ؟ والله لو ادري بيكم هيج همج ما زوجت بنتي ﻷبنكم
فرح تمسح بشعرها وتبجي عاينت لأمها وحجت
فرح : واضح الغيرة عاميتهم مني ، تلكيها حاطة عينها على يوسف ، بس كلولها مو كلشي تريده يصيرلها ، هذا مو حب قلة قيمة بس هي شيفهمها همجية ..
سمر هجمت عليهم لزمتها فلتت ايدي وهدت
سمر : ياقليلة الأدب انتِ و امج اثنينكم بلا تربية ، المرة صارلها ساعة تعتذر وتكول راح نحاسب البنية وانتن نازلات دك غلط واهاين بيها وبينا كلنا ، اذا ما عاجبتكم عيشتنا شكو نطيتونا مرة ؟ لو حيت الحطت رجلها تفرعنت
_ لج انتِ منو ؟ وشنو لسانج هذا ؟
سمر : انه زوجة اخو يوسف ، شهم اذا سامعة بيه
_ اي ماخذله وحدة بيئة اوع
سمر : انتِ وبنتج اوع مو احنا ، ما ألوم بنتج من تتعالى علينا وتستصغرنا اثاريها تربيتج ، وقليلة أدب مثلج
زهرة : يمة ضبي لسانج مو هيج الحجي
سمر : عوفيني عمة ، جايبيلنا وحدة تتعالى علينا وتهين وتغلط بنص بيتنا الماتستحي
زهرة : ما عليج احنا نحلها ، طيبة اخذي مرت اخوج وطبن جوة
سمر : لا والله ما اتحرك من مكاني كاعدتلهن هالكدة
امها حجت
_ اي وشنو تسوين بلة ؟
سمر : اعلمكم الأدب والتصرف الصحيح اذا استوجب
_ لا والله ما ضلت غير بنت الريف تعلمنا الأدب
سمر : مو بس بنت ريف ، انه بنت عرب ، واذا شفتينا مؤدبين احب اكولج أدبنا وياج مو ضعف ولا قليلات لسان ، فد اهلنا ربونا نحترم الجبير وما نهينه وانتِ وبنتج هنتوا عمتي وهي جاية تعتذر منكم عن ذنب هي ما سوته ، واذا الحق جان وياكم بأسلوبكم هذا انكلب ضدكم
اندارت لبنتها وكالت
_ لج يمة شلون راح تعيشين وية ذني هاي اني يمج وخواتج وهيج سون لو نعوفج شلون ؟
سمر : عليمن خالة شنو شفتينا ناكل وجوه ، اللي يدك الباب يسمع الجواب ، والماعنده جبير نشتريله جبير يربيه ويأدبه
_ ولج انتِ من يا بيئة جاية شنو هاللعبان نفس شنو هالمستوى راح اتخبل .
سمر : والله عاد مستوانا معروف بين الناس ، قرية وطلعنا منها دكاترة كلنا شهايد الحمد لله لا عبالج فد بنتج دكتورة
_ انتِ مو مؤدبة وبنت شارع
سمر : وامي غجرية اذا ما تدرين ، وهسه اردحلج اذا حبيتي
_ لج فرح هاي شنو راح اتخبل امشي نرجع انتِ ماعرفتي اهله صارلج سنين وياه وشمرتي روحج هالشمرة هاي ؟ شنو ناقصج ما تكوليلي ؟
سمر : الزمي حدج واحجي عدل واعرفي الأصول لا اعلمج عليها
_ منو يعلمني الأصول خاف انتِ ؟
سمر : اي اعلمج ، اللي ما يعرف الأصول نعلمه ويتعلم ما بيها شي
فرح باوعت لأمها وكالت
فرح : واضح اني مكاني مو هنا ماما ارجع وياج ما ابقى لحظة وحدة
شالت بدلتها ومشت ، شافت يوسف واكف مكتف ايده ويعاين اتوقع حضر الموقف من اوله لأن جان ضايج وملامح وجهه مغضبة
شافته عيونها انترست دموع ركضت حضنته وبجت
فرح : ترضى هيج اهلك سووا بية ؟ هانوني وهانوا امي ، كلتلك ما اسوي العرس هنا عاندتني
هو على وكفته حتى ما حرك ايده وحضنها ويعاين لأمها خازرها
الكل واكف منتظر ردة فعله وشنو راح يصير ، امي مشتله وكالت
زهرة : يمة تنحل سالفة بسيطة وتصير بكل مكان ورفل غلطت واكيد نحاسبها ، آخذ مريتك وروحوا لبيتكم
يوسف صاح صوت أول مرة اشوفه هيج عصبي ، الكل سكت ويستمع
يوسف : رفل اطك ركبتها هاي منتهين منها ، بس الحجي اللي سمعته عن اهلي ما ينسكت عليه لو شتكولين عمة ؟
_ يمة اني ماحجيت شي هاي مرة اخوك وحدة عرمة وعراكة ومبينة تغار من سلفتها
يوسف : على اي اساس تهينين اهلي وبنص بيتنا ؟ اذا ما عاجبج الله وياج الباب يوسع جمل
_ اي ما عاجبني و بنتي آخذها مستحيل اخليها تعيش بينكم واذا تريدها ؟ تعيشها بنفس مستواها وابغداد هذا شرطنا الوحيد يلة ابقيها على ذمتك
يوسف : انه هذا مستواية
واشر على المكان والناس الموجودين بيه وكمل
يوسف : هذول اهلي ناس بسطاء وعلى كد حالنا ، قروين وبابة عرب نكرم الظيف ونرحب بيه واذا طلعت العايلة منا وما تصرفنا ساعتها الج حق بالتسويه ، بس الظاهر بعدج ما تعرفيني زين حتى تتجرأين و تهينين اهلي بهاي الطريقة ، وبالنسبة لشروطكم انه ما امشي بيها ، حق مرتي محفوظ وانه ارده بس حجيكم تتحاسبون عليه
_ شلون تحاسبنا بلة ؟
يوسف : والله لو جنتي زلمة وسمعت منج هذا الحجي ما اخليج تاخذين نفس واحد وراه
تركهم ومشى عاف الكل ملتمين على فرح ، جاب رفل جرها من ملابسها وهي تبجي ، عاينلها وكال
يوسف : اعتذري عن السويتيه
رفعت عينها عليه عاينتله وتشهك
رفل : انه مو متقصدة جنت اغسل السطح وانكب الماي عليها
يوسف : كلت اعتذري وحسابج بعدين ما يفض بأعتذار وهذا هو
رفل عاينت لفرح وكالت
رفل : خية هو ماي قابل خيسة
يوسف : كلت اعتذري رفل لا تكسرين كلمتي
رفل : وانت ما كسرت گلبي وبعتني ؟
يوسف : حسابج بعدين انه اعلمج
جانوا يتهامسون بينهاتهم بعدها عاين عليها و رفع صوته
يوسف : يلة شنو حجيت ؟
رفل : انه اعتذر حسبيها علية وان شاءالله تنعاد
فرح : شنو ؟ يوسف سمعتها شتكول ؟
رفل : ماتنعاد فد الما انبلعت عذريني خية
يوسف : رفل اعتذري عدل وارجعي لبيتكم
هزت راسها وكالت صار ، راحت لفرح لزمت وجهها وطاحتلها بوس وهذيج واكفة على اعصابها تخزر بيها ، لابيها توخرها يوسف واكف ولا متقبلتها ، وراها التفت لفرح وامها وكال
يوسف : دوركم تعتذرون من اهلي
امها كالت
_ ما غلطنا حتى نعتذر الأعتذار واجب عليك وعلى اهلك
يوسف : الما تعتذر مالها مكان بينا ، صح رفل غلطت بس اهلي ما غلطوا وياكم لحد آخر لحظة
امها عاينت لفرح خزرتها وكالت
_ امشي ويانا نرجع بلا هالعرس الماله داعي من الأساس
لحت عليها بالحجي فرح عاينتلها عافتها وراحت لأمي باست راسها واعتذرت منها
فرح : خالة آسفة نيابة عن امي واني هم اعتذر اذا بدر مني كلام مو بمحله ، بس شفتي الصار ورفل خربت فرحتي وفرحة اهلي
زهرة : يمة معذورة الحق وياج احنا لازم نعتذر منكم
رجعت امي باستها ، امها تخبلت شلون تعتذر ، سمر التفتت على يوسف وهمست بأذنه
سمر : لا تحاول وياي ترة ما اعتذر
التفت عليها عاكد حاجبه
يوسف : انتِ ياهو يمج عمي اكعدي واسكتي وجفينا شر لسانج
ضحكت ورجعت وكفت يمي ، التفت للمعازيم وكال
يوسف : احنا اهل وصار بينا سوء تفاهم وانحل ان شاءالله ، آخذوا راحتكم البيت بيتكم
آخذ فرح من ايدها وراحوا لبيتهم ، الولد زفوهم ، وطشوا كلمن لبيته ...
بالليل ابوي سمع بالسالفة ما رضى على رفل دز عليها وعلى اهلها وكعدهم حاجاهم حجي ثكيل يدك بالعظم ، اتعذروا منه وآخذوا رفل وراحوا ...
شهم وسمر راحوا لبيتهم وانه والبنات صعدنا لغرفنا ، غرفة شهم صارت الفارس واحنا البنات انجمعنا بغرفة وحدة ، دخلت انام حطيت راسي على المخدة اريد اغفى ما اكدر ، بالي يم فارس كمت من فراشي و رحتله لغرفته ماهو ما لكيته ، نزلت جوا ادور عليه ماكو ، آخذت نقالي خابرته مايرد ، طلعت للحوش ادوره لكيت امي تلملم بالفرش عاينتلي وكالت
زهرة : اذا ماعندج شي عاونيني
رحت وياها نشيل بالفرش وندخله جوا لهناك ونسمع نعاوي زلمة ، شكو منو ماندري مشيت ورا الصوت والكى فارس حاط ايده على خده وينعى من نعاوي جدتي
فارس : ونيت ونة هضم حتى الله درة بحالي
طيبة : يمة ياخوي شبيك ؟ شصاير وياك ؟
عاينلي وكال
فارس : بالضيم ياحالي
طيبة : شبيك شكو ؟ منو وياك ؟ منو ميتلك ؟
عبالي صديقه صاير بيه شي لو احد من اهلنا ، عاينلي وكال
فارس : ولج طيبة وليدي مصيول ماكو فض العرس رحتله ما لكيته ما ادري وينه
طيبة : يا وتبجي عليه ؟
فارس : شلون ما ابجي ولج هذا بمعزة ابني ، وين راح وين ؟
دخلنا انذار الكل كعد على صوتنا واحنا ندوره ، شهم نزل ويوسف طلع من بيته كلها تصيح شكو وشصاير
فارس : مصيول ضايع ما لاكيه
يوسف : شنو ؟ منو مصيول
طيبة : القرد ماله
ضحك وضم ضحكته وكام يدور على مصيول ويانا ، ما خلينا مكان ما دورناه بيه ، ماهو ،
آخر شي اقترحت عليه يشوفه يم سهر خاف رايح يمها ، المكان الوحيد المادورناه بيه مكانها
راحلها فارس وانه رحت وراه ، دك الباب عليها وصاح
فارس : سهر سهر مصيول يمج ؟
فتحت الباب الداخلي وحاجته من ورا الباب الخارجي
سهر : ها شكو ؟
فارس : مصيول اجاج ؟
سهر : مصيول منو ؟
فارس : القرد مالي
ضحكت
فارس : شبيج تضحكين جاوبي اي لو لا ؟
سهر : هذا القرد مالتك ؟
فارس : اي مالتي
سهر : اكول مرتب ولابس تراك وانيق باقيله بس تعطره ، طلع قرد بيت وتايه
فارس : احجي يمعودة يمج لو لا ؟
سهر : اي هيانه بالطرمة ، كاعد صارله مدة وخطية خايف ما ادري شبيه
فارس : عبريه تكدرين ؟
سهر : شلون الزمه اخاف
فارس : ما يعض لا تخافين
سهر : ما معلية فوت انت آخذه
فارس : زين عينج عليه اجيب المفتاح واجي
سهر : فارس
فارس : نعم
سهر : جيبلي وياك آكل ترة اليوم نسيتوني
فارس : لا بالله محد جابلج شي ؟
سهر : لا والله من الصبح لحد الآن اني بدون آكل
فارس : هسه اجيبلج
التفتلي وكال
فارس : شنو ما موديلها آكل للبنية؟
طيبة : امي توديلها بالعادة يمكن نستها اليوم وي هوسة العرس
فارس : ادري أسيرة وناسينها بدون آكل ؟
طيبة : غير امي ما ترضى نوديلها تكول لا تختلطن بيها ما نعرف اخلاقها شنو ماشنو
فارس : ودولها آكل لا تصاحبوها عجيب آمركم
طيبة : امك وتعرف بنحاستها محد يكدر يحاجيها
فارس : امشي سويلها صينينة بين ما اجيب المفتاح واجي
طيبة : اي صار
دخلنا للبيت هو راح يجيب المفتاح واني طلعتلها لفات من العرس ، حميتهن وحطيتلها عصير بالصينية ، اجه آخذه مني ورحنا انه وياه ، دك الباب وصاح عليها
فارس : راح افتح الباب لابسة ؟
سهر : اي تعال
دخلنا انه وياه آخذت الصينية منه وابتسمت
سهر : والله ميتة جوع عاشت ايدك
طيبة : عذرينا دادة عرس والتهينا عنج امي نست تجيبلج
سهر : يلة ما صار شي ، عرس منو ؟
طيبة : اخوي يوسف عرس
سهر : ها مبارك عليكم
طيبة : الله يبارك بيج
سهر : سمعت صوت هوسة واغاني تمنيت احضر بس يلة ماكو نصيب
طيبة : ها اي شكو بيها فد نسينا والله
سهر : على الجايات بعرس فارس تعزموني ، مو فارس ؟
شايل مصيول ويعاينلها هز راسه وكال
فارس : اول المعزومين انتِ بس خل اعرس مابقي واحد ما اعزمه
سهر : اذا العروس موجودة عرسك قريب معناها
فارس : الله يسمع منج ، هي موجودة بس الظروف معرقلتنا
سهر : الله يسهلك ، المهم هذا ابنك ربيه عدل لا تخليه يفتر بكيفه
فارس : التوبة اعوفه بعد الصار اليوم ، يلة آخذي راحتج زاحمناج
سهر : لو ما مصيول اني ما آكل اليوم
فارس : شوفي ابني صار سبب
ضحكت وكالت اي ، آخذنا مصيول وطلعنا قفلنا الباب ورجعنا للبيت جان شهم كاعد بالصالة شافنا وكال
شهم : ها لكيتوه ؟
طيبة : اي
حجيتها وضحكت
شهم : وين رايح المسربت ؟
طيبة : يم سهر
شهم : يابه والله ناسيها ، شلونها زينة ؟ تودولها آكل احتياجاتها توصلها ؟
طيبة : اي ودينالها عشا وزينة الحمد لله
شهم : لا تقصرون وياها خطية
طيبة : ان شاءالله ، شو هنا متمدد ؟ ليش مو ابيتك ؟
شهم : تعاركنا هاي بنت عمج ناويتها على شر
طيبة : سمر ؟
شهم : قهر مو سمر ، ما ادري بيها هيج راسها يابس وعنودية
طيبة : هاي وربيتوا سوة وماتعرفها
شهم : اي والله عبالك توني اتعرف عليها
طيبة : تريد احاجيها ؟
شهم : لا عوفيها بس والله إلا اربيها من جديد خل تصبر
طيبة : خوية شوكت تخلص حربكم هاي ؟
شهم : هي معاندة ماتريد صلح انه ماعندي شي وياها
طيبة : الله يصفي النفوس ، محتاج شي ؟ لو اروحن انام ، كاعدة من وجه الصبح
شهم : لا روحي ماعندي شي ، تصبحين على خير
طيبة : تلاكي الخير
ثاني يوم نزل لبغداد غاب يومين واجى بس المفاجأة مو وحده جايب ضحى وياه وكل اغراضهم محملها بلوري جبير ، اهلي تلكوهم خصوصاً امي فرحت بجيتهم ، آخذت جكليت وطشته عليهم عبالك عرس ثاني صار عندنا ، خصوصاً من بشرنا بحمل ضحى ..
فارس ما صدك يسمع هيج خبر ، روح وجيب جماعتك ودكوا مزايق بالحوش ، نزل يوسف من بيته لابس دشداشة بيضة طالع يخبل وصارت الفرحة فرحتين
بعدها طشوا جماعة فارس والولد ساعدوا شهم نقلوا الاغراض الجابها لبيته بالطابق الأرضي ، عاينت لسمر واكفة فوك بالبالكون تعاين مصدومة
خلصوا نقل الاغراض وهو اصلاً مأثث البيت يعني جاهز فد شغلات ضرورية جايبها وياه ، رحنا انه والبنات رتبنا البيت وساعدناهم بالتنظيف ، لليل خلصنا كلشي ورجعنا للبيت ، لكينا سمر كاعدة بالهول حاطه ايدها على خدها وتبجي
طيبة : شبيج ؟ شصاير ؟
سمر : تدرون بيه راح يجيبها مو ؟ ومحد كالي ؟
طيبة : لا والله ماندري اتفاجأنا بجيتهم حالنا حالج
سمر : وشنو مرته حامل ؟
طيبة : اي الحمد لله من صار عندهم صارلهم سنين ينتظرون هاي الفرحة
سمر : وعليش جابها وحطتها كبالي شنو معناها ؟
طيبة : مرته قبل لا تصيرين انتِ وبعدين تعاي عليش زعلانة انتِ مو ما رايدته لرجلج ؟ مو متعززة عليه صارلج اشهر ؟ يركض وراج وتجرين بظهرج
سمر : على الأقل يكولي قبل لا يجيبها مو انصدم بجيتهم
طيبة : من بنا طابقين وعزلهن معروف تاليها يجيب ضحى تعيش هنا عليش مصدومة ؟
سمر : موجانت ما ترضى تعيش هنا ودوامها شنو عافته ؟
طيبة : اللي عرفته ماخذة اجازة طويلة علمود يثبت حملها تدرين صارلهم سنين يراجعون وما يصير عندهم
سمر : وهي شلون رضت تكعد وياي بنفس البيت ؟
طيبة : بابها وحد وبابج وحد شعليها منج وبعدين حياتكم هاي صارت واقع حال ، والكل مجبور يتقبلها اذا مو اليوم باجر وعيشن على حب الله ورسوله ولا تسوين وياها حرب الضراير حسبيها اختج
سمر : صح البيت مفصول فد الباب الخارجي واحد يعني اشوفها وتشوفني
طيبة : لا انتِ تاكليها ولا هي تاكلج واذا تصادفتوا يعني ؟
سمر : شهم ما خلاني اختار حطني كدام امر واقع وغصب علية اتقبله ، مثل كل مرة يفاجئني بتصرفاته
طيبة : ترة هو ما نزل فوك راسج ضرة انتِ نزلتي عليها ورضيتي تكونين الثانية ماكو داعي تتحسسين منهم
سمر : قصدج انه الزايدة بحياتهم مو ؟
طيبة : سمر كافي عوفي الأمور تمشي مثل ما شهم خططلها لا تسوين مشاكل ولا تحجين كلمة وياه ولا تعاتبيه مو حلوة بحقج تنهانين كدام ضحى ، عرايكم كلنا شاهدين عليها وشفنا اللي صار بينكم مو حلوة البنية تتفرج ، وباجر عكبة تكوم تتصرف وي شهم مثل تصرفاتج
سكتت ماحجت
طيبة : كومي آخذي بنيتج وارجعي لبيتج ، ما الج مكان يمنا
سمر : تطرديني طيوب ؟
طيبة : لا ما اطردج تعاي خطار هله بيج فد تباتين لا مو مكانج هذا
هزت راسها وآخذت بنيتها وطلعت ، وصلتها للباب صحت عليها اندارت تعاينلي وعيونها مليانة دموع
طيبة : لا تزعلين مني حجيت لمصلحتج ، وروحيلهم باركي جيتهم تجي حلوة على خاطرهم
سمر : واحضنها فد نوب شنو رأيج ؟
طيبة : بعد احسن من الزينات هاي
عافنتي ورجعت لبيتها ، ثاني يوم سوينا عزيمة جبيرة ، ابوي دز على عمامي كلهم وعوائل اخواني ، كعدنا من الصبح نجهز بالأكل ، عمي قادر من اجى كال لأبوي
قادر : شنو مناسبة العزيمة ؟
عبد الملك : فرحان بزواج يوسف ، وحمل زوجة شهم
قادر : ياهي حامل سمر ؟
عبد الملك : لا ضحى ، البارحة جابها وراح تسكن يمنا شنو ما سمعت ؟
قادر : تسولف صدك ؟
عبد الملك : اي وعليش مصدوم ؟
قادر : وشهم ناوي يكعدهن ابيت واحد ؟
عبد الملك : كلمن وبيتها ان شاءالله ناوي تعترض ؟
قادر : وسمر شلون بيها ؟
عبد الملك : كاعدة ابيتها معززة مكرمة وكلشي واصلها لا تصعب الأمور وتحجي براسها دير بالك
ابوي سكته عاد رجع كعد يم عمامي ..
ورا شوية اجوا يوسف وفرح فد وجوههم مكلوبة جنهم متزاعلين ، كل شوية يأشرلها تلبس حجابها عدل وهي تعانده تنزله بالأكثر آخذها من ايدها وحاجاها على صفحة
يوسف : فرح تحترمين عاداتنا وتقاليدنا وحجابج تلتزمين بيه افتهمتي
فرح : بس اني مو محجبة وانت تدري بية
يوسف : وجان شرطي اذا تزوجنا تلبسين الحجاب وقبلتي عليش تعانديني ؟
فرح : لابسته بعد شتريد ؟
يوسف : شعرج وركبتج طالعة هذا هم حجاب تعتبرينه ؟
فرح : على ما اتعود عليه
لزم حجابها ولفة على راسها
فرح : شبيك خنكتني مو هيج
يوسف : لفيه عدل واحترمي المكان الانتِ بيه
فرح : من تحترمون وجودي اني احترم المكان
يوسف : وياهو ما محترمج ؟ تونا اجينا محد لحك يحجي وياج
فرح : هاي بنت عمك شكو جاية ؟
يوسف : منو ؟
فرح : رفل
يوسف : جاية وي اهلها وابيت ابوي مالنا حق نحجي وياهم من تجي لبيتج عود احجي
فرح : انت شبيك تنتر بالحجي
يوسف : ما منتر بس انتِ تريدين تسوين مشكلة من لا شيء
فرح : طلعت اني الادور مشاكل مو ؟ كلتلك نعيش ابيتك اللي بغداد شكو جبتني هنا ؟
يوسف : ماعندي شي ابغداد عليش باقي هناك ؟
فرح : بس تخلص اجازتك نرجع معلية
يوسف : انه اقرر اذا نبقى لو نرجع محد يملي علية
عافها ورجع عند الزلم وهي اجت يمنا تباوع بطرف عينها ، شافتها امي صاحتها
زهرة : عليش واكفة ما تكعدين
فرح : وين اكعد ؟
زهرة : كل هالوسع وتسألين وين اكعد ؟ اكعدي هنا هناك تعاي يمي
صدمة: تعاي جدة هين
فرح : لا هنا اكعد
كعدت وعيونها بنقالها لا رفعت راسها لا حاجتنا ، فد اللي يسألها تجاوب على كد السؤال وتسكت
وراها فات شهم سلم وراح عند الزلم جاي وحده لا سمر ولا ضحى وياه ، امي ضاجت
زهرة : شنو معناها نسوانه ما اجن ؟ جاي وحده ؟ ابوج ألمن مسوي العزيمة غير لمرته
طيبة : يمة شمدريني بأبنج ونسوانه هم ابتلي بيهم ؟
زهرة : ومنو كالج ابتلي بيهم يغبرة انه جاي اسأل
طيبة : عايشة وياهم شمدريني
دفعتني من متني وكالت
زهرة : وخري غاد
عافتني ومشت لشهم تسأله كاملها وطلع من يم الزلم
شهم : ها حجية أمريني
زهرة : نسوانك وين ؟
شهم : ضحى ما رضت تجي تعرفين بوضعها تستحي وسمر ماحاجيها دزيلها وحدة من البنات تصيحها
زهرة : شنو هاللغوة هاي ؟ شنو مايجن عيب من نسوان عمامك شكوللهن وحدة تستحي والثانية حردانة ؟
شهم : يمة انتِ وياهن انه مليت مالي خلك روحي بخشمي
زهرة : روح ارجع انه رايحتلهن فد ضبهن منا وجاي هواي مرخيلهن الحبل ...
وصدك لبست عباتها وراحتلهن ، ماكو ربع ساعة جابتهن واجت ، اعاينلهن وجوهن مكلوبة ما راضيات ويمكن امي دايسة بيهن بالحجي اعرفها ما تسكت
فاتت امي وكالت
زهرة : اجن نسوان شهم ، يمه ضحى هاي مرت حماج يوسف هم دكتورة مثلج ، فرح هاي ضحى زوجة شهم وهاي سمر تعرفيها
فرح هزت راسها مبتسمة وسكتت
زهرة : ما تكومين تباوسيهن
ضاجت مبينة ما ترضى تكوم بس امي حرجتها وكامت سلمت على سمر وتباوسن بوسة عداوة ، وتقربت من ضحى دنت وجهها عليها بعدين رجعت ظهرها ليورا ما باستها ، صفنت عليها وحجت بصوت كلنا سمعنا ...
فرح : يا هذا شبيه وجهج ؟ ليش هيج ؟
زهرة : ماتبوسيها شبيج ؟
فرح : ها لا سلمت عليها بعد شكو ؟
صدمة : حبيها زوجة حماج وباركي حملها
فرح : على الخير
حجتها ومشمئزة منها
ضحى : خير اللي يصيبج ، بس شبيج لعبانة روحج مني ؟ ترة حرك بوجهي مو جرب
فرح : يا الله يشافيج
ضحى : شافاني وبية كل العافية شكراً تسلمين
راحت كعدت على صفحة بس مبين عليها مقهورة ، رحت يمها كعدت
طيبة : شلونه النونو ؟ مبارك عليكم حبيبتي
ضحى : الله يبارك بيج ، الحمد لله وضعه زين
طيبة : شكد عليج هسه ؟
ضحى : اسبوعين
طيبة : ياعيوني بعده صغير ديري بالج على نفسج واي شي تحتاجين انه موجودة
ضحى : تسلمين ما تقصرين
طيبة : مكانج ترتب مابية شي ناقص ؟
ضحى : لا اكو بعد هواي عندنا نواقص بس شهم كال نشتريهن بعدين
طيبة : المهم الأساسيات عندج
ضحى : اي
طيبة : اهلج شلونهم زينين ؟
ضحى : بخير
طيبة : اي الحمدلله
قاطعتنا رفل من نترت بفرح وهي تكول
رفل : خاف عبالج انتِ حلوة وكاعدة تستنقصين من الناس
فرح : انتِ منو يمج ؟
رفل : هو انتِ جنج مصيول ابن فارس ، مكيفة بروحها عبالها حلوة
فرح : انتِ كلش ما تستحين ومبينة الغيرة بعيونج
رفل : من منو أغار ؟ منج ؟ والله شايفة روحج شوفة
كمت جريت رفل طلعتها برا
طيبة : شكو شبيج كبيتي على البنية ؟ مو كاعدين ليش المشاكل ؟
رفل : خل تولي رعنة تحجي على ضحى على اساس هي حلوة
طيبة : وانتِ شنو منصبيج محامية على ضحى وبعدين شوكت حجت ما سمعنا ؟
رفل : هسه امج اجت يمها تكولها ليش ما بستيها حزت بخاطرها تكولها لعبت روحي عمة ، عمة العماها كون
طيبة : هي هيج كالت ؟
رفل : اي والله واسألي امج وبتول هم جانت كاعدة
طيبة : وانتِ ليش تحاجيها ما كفى السويتيه بعرسها تريدين تصير مكافش والزلم تسمعنا ؟
رفل : والله ما يهمني خليهم يسمعون ويعرفوها على حقيقتها اخوج جايب حية ابيتكم مو مرة
طيبة : ها رفل شديتي وياها ؟
رفل : وعلى شنو اشد اخوج وتزوجها فد هي حقيرة والله لا عبالج انه درت الماي عليها من غيرتي منها لا سمعتها تحجي علينا
طيبة : شوكت سمعتيها وشنو حجت ؟
رفل : هي وامها من وزعتوا الأكل تكولها شوفي حتى بالتوزيع فكريات ، وين اكو ناس ضلت توزع لفات بجياس نايلون وامها تكولها هذا اختيارج اخذتي ابن عرب معيدي ، هذا اصله على شنو مستغربة ، ما تحملت رحت ترست سطل مي وكبيته عليها
طيبة : رفل تصرفج غلط وانعكس على تربيتج ، حتى لو حجوا هيج المفروض منج تحجين لأمي لواحد اكبر منج يتصرف مو هيج تسوين ؟
رفل : وعلى اساس امج تصدكني وتتصرف ؟ والله واكفتلها مثل الغصة ابلعومها فنها تتنفس اعلمها العربيات التحجي عليهن شلون يربنها
طيبة : اذا يوسف سمع حجيج هذا يمنعج توصلين لهنا ، شعجب يرضى تعاركين مرته ويسكت ؟
رفل : يمة فدوة ويمنعني على اساس مانعني من دخول الجنة والله ياالله
طيبة : الحجي وياج ضايع افوت جوا احسن
انداريت واشوف ضحى واكفة تسمع ، عاينت لرفل وكالت
ضحى : شنو حجت من خالة كالتلها ليش ما بستيها ؟
رفل نطت تريد تحجي سكتتها
طيبة : ما حجت شي رفل متوهمة
ضحى : لا حجت ومن آخذتي رفل وطلعتوا كالت اني ماحجيت شي غلط وما اعتذر
طيبة : صدكيني ماكو شي ياحبيبتي لا تحطين ابالج
كومي رفل وروحي لشهم احجيله الصار ، اجى متسودن علينا صاح امي يريد يفهم منها الصار
زهرة : يمة ماكو شي صلي على النبي
شهم : عليه وعلى آله افضل الصلاة والسلام ، امي احجي منو ضوج ضحى ؟
زهرة : محد يا ابني منو كالك انت ؟
شهم : وينها ضحى صيحيها
زهرة : يمة لا تكبر الموضوع وتسويه مشكلة ، هاي مرتك وذيج مرت اخوك مو حلوة من اولها يصير مكافش بينكم
شهم : بعرسها هانت سمر وسكتت كلت عيب وعروس ما اتدخل بس توصل تنتقص من ضحى كدامكم علمود وضعها لا والله اطيح حظها وحتى يوسف ما يوكف بعيني
زهرة : يمة تعوذ من ابليس وروح يم عمامك سوالف نسوان لا تتدخل بيها
شهم : ما متدخل بس ضحى ما ناقصها ضيم حتى تجي تكمل عليها
زهرة : دروح روح انه احلها ، مو حلوة بحقي تتدخل وانه موجودة
شهم : وكفيها عند حدها وكوليلها نسواني خط احمر اذا عالت بوحدة تلكاني بوجهها
زهرة : صار هسه احاجيها فد روح منا
وبألف ياالله فضت العزيمة وكلمن طش لبيته ، نمت جفي على وجهي مو من التعب لا من المشاكل افازع بهاي وارجع لهاي متت لو ما لاميهن يمنا هواي احسن صدك لو كال ابو المثل السفينة التكثر ملاليحها تغرك..
___________
ريحانة
جنت كاعدة والباب انفتح ببطء ، صوت احتكاك الحديد بالأرض كافي يخلي اعصابي تنشد وگلبي تتغير دكاته ..
دخل قسور انفاسه متقطعة ملابسه مليانة دم ، وعيونه وحدة منهن مربوطة بشاش وسخ ، ايده لافها على صدره كأنها مكسورة ومجبسيها ، واكف يتألم وبنفس الوقت يخفي ألمه بصمت مخيف ، جمدت بمكاني من شكله همست
ريحانة : شنو صاير وياك ؟
سد الباب ومشى اتجاهي باوعلي بعيونه الثانية فاتحها كلها
ريحانة : وين جنت ؟ وليش هيج وضعك ؟
حجى كلمتين بس
قسور : جبت مخدر
ريحانة : والمطلوب ؟
قسور : اريدج تساعديني
ريحانة : بشنو اساعدك ؟
سحبني من ايدي وآخذني لغرفة بسرداب جوا البيت بيها سرير وعليها شخص مربوط من ايده ورجله ، باوعتله ورجعت باوعت لقسور
ريحانة : منو هذا ؟
قسور : خدريه محتاج عملية
ريحانة : انت صدك تحجي ؟ ما اخدره
تمتم من بين اسنانه وحجى بصيغة أمر
قسور : اذا مات تنذب براسج
ريحانة : منو هو ؟ وليش جايبة هنا ؟ فهمني
قسور : العليج تسوين الأكوله بدون كلام زايد
ريحانة : وشنو راح تسويله بعد ما اخدره ؟ ممكن اتفهمني ؟
قسور : مو شغلج نفذي وبس
ريحانة : واذا ما نفذت شنو تسوي ؟
قسور : امحيج من الوجود وادفنج بكاعج
گلبي دك بقوة لدرجة حسيته راح ينكسر بين ضلوعي ، خطيت خطوتين اتجاه المصاب ، صرت قريبة منه لدرجة ميزت ملامحه ، هذا الوجه شايفته مو غريب علية ، ركزت اكثر تعرفت عليه شهكت وحطيت ايدي على حلكي ، التفتت على قسور بخوف
ريحانة : هذا دكتور نادر شجابه هنا ؟ شمسوين بيه ؟ داينزف راح يموت
قسور : لهذا السبب جبتج ، تساعديني لو نعوفه يموت ؟
ريحانة : ولك شمسوين بيه ؟ شمسوين ؟ الله لا ينطيكم..
قسور : خدريه وخليني اشتغل
ريحانة : وشلون تشتغل وايدك مكسورة ؟ شلون فهمني ؟ اكيد يموت اكيد اي شلون يعيش شلون تعالجه وايدك مكسورة اي مكسورة
احجي بسرعة وارجف خوف ورعب على الدكتور
قسور : ما الج شغل اكو اللي يساعدني بس خدريه و ولي منا
الدكتور بدأ يطلع صوته يون من الألم ويحرك براسه ، الدم ناشف على قميصه ، ايده مربوطة بحبل خشن بحيث الجلد متشقق
قسور: راح تبقين صافنة لحدما يموت ؟
ريحانة : شنو الضمان اذا خدرته تنقذه ما تسوي بيه غير شي ؟
قسور : من اكمل عمليته تعالي شوفيه وتطمني عليه
ريحانة : لالا مستحيل اشاركك بهيج شي انت تريد تموته
لزمني من فكي بقوة وكال
قسور : غبية اذا اريد اموته ليش جبته هنا وجبتج تخدريه ، الاسهل اتخلص منه برا
ريحانة : يمكن يفيدك اتاجر بيه شمدريني تريد تنقذ حياته ؟
عيوني دمعت ، جسمي تشنج ، راسي احسه نار
مد ايده حط اﻹبرة بيدي واشرلي على باقي الادوات
قسور : اذا ما خدرتيه ؟
تقرب مني اكثر ، وصوته يهمس يم أذني
قسور : اخليه يتمنى الموت وانتِ تشوفيه كدامج
ريحانة : تسويها ادري بيك تسويها
احجي وارجف لا كادرة اطاوعه اخاف يكذب علية ولا بية اعاند وصدك يخليه يتمنى الموت وما يحصله
اﻹبرة بيدي صارت بثكل الجبل ، راسي داخ حسيت للحظة راح افقد توازني
قسور : يلة التأخير مو بصالحه
تقربت اباوعله الرجال متصوب بأكثر من مكان برجله وبطنه ، التفتت عليه وصرخت
ريحانة : منو ضاربة انت ؟
قسور : بلة اسألة زايدة سوي شغلج واطلعي
قربت ايدي من وريده ، فتح عينه باوعلي وهمس
نادر : ساعديني اترجاج ساعديني راح اموت من الألم
تجمدت بمكاني ، ايدي ترجف ، ركبي ضعفت ، لعنت الساعة اللي دخلت بيها هذا الأختصاص ، يوم اسود جان ، تقرب لزمني من كتفي وضحك ضحكة خفيفة بس مليانة شر
قسور : ساعديه مو دايتوسل بيج ؟
لزمت ايده ، لحظة وحدة كفيلة تغير كلشي ، من بعد ارادة ربي ، حياة هذا اﻹنسان بيدي وموته هم بيدي اذا ما ساعدته ، عيوني تتنقل بين وريده وبين وجهه
قسور : ديلة فضيها
مشيت للميز العليه الأدوات ، سرنجة وقنينة دوا ، قفازات ، قطن ومعقم
تقرب وكف فوك راسي ويصيح يلة ، ابجي متوترة واصرخ
ريحانة : شلون شلون ناسية كلشي ناسية
فسور : جذابة ما ناسية شي حاولي
ريحانة : ناسية داكولك مداركز والله والله
سحبني من شعري ورفع وجهي كبال وجهه
قسور : الاسهل من كل هذا تضربيه طلقة براسه وتريحيه من العذاب شتكولين ؟
ريحانة : لك انت احقر ما شافت عيني واسوء انسان على وجه الأرض
قسور : تخدريه ؟ لو تموتيه ؟ يلة اختاري
لبست القفاز بإيد ترجف وهو واكف فوك راسي يصيح علية حتى استعجل
قسور : ركزي لا تلتفتين منا ومنا
بلعت ريكي آخذت السرنجة ، عقمت غطا القنينة بقطنة نظيفة ، كل حركة اسويها مصحوبة بخوف خايفة يموت بسببي مو بسبب اصابته او يسوون بيه شي ...
اخ اخ انت هم باعك عدنان النذل ، غرزت اﻹبرة داخل القنينة وقلبتها السائل بدأ يدخل ببطء
ايدي ترجف والخط الأسود على السرنجة يصعد بشكل تدريجي ، نفسي بدأ يثكل اختنكت وهذا واكف فوك راسي يلح علية استعجل ، السائل كمل ، قبل لا اسحب اﻹبرة ضغطت بإيدي على المكبس ، فقاعة هوى صغيرة طلعتها ، سحبت اﻹبرة ببطء اخذتها ورحتله وكفت كباله ، جسمه يرجف ، انفاسه متقطعة ، دموعي نزلت بخوف ورعب عليه وعلى مصيره خايفة اخطأ بالجرعة ويموت بسببي
قربت اﻹبرة من وريده غمضت عيوني ادعي ربي يسهلها علية وما يصيرله شي بسببي ، كمت ما اشوف المكان بوضوح من ورا دموعي ، تقرب وكف وراية ويمسح عيوني حتى اشوف زين وما اغلط
قسور : يلة سويها تكدرين انتِ بطلة
ذكرني بـأول يوم دخلت وياه صالة العمليات الكبرى ، شلون جان يشجعني بحب ومبتسم ، من جنت ساذجة واجهل حقيقته
اسناني صكت بقوة دمعتي نزلت مني غرزت اﻹبرة بوريده ، صوته طلع بس تعبان آخر كلمة سمعتها قبل لا يتخدر وهو يكول
نادر : اترجاج
بعدها انفاسه بدات تتغير غمض جفن عيونه ، مشيت تحسست حرارته ، التفتت لقسور
ريحانة : حرارته عالية خاف يموت ؟
قسور : طبيعي مصوب شتريديه يعني ؟ يلة اطلعي برا شغلج خلص وخليج قريبة في حال احتاجيتج
طلعت ، دخلوا جماعته اثنين واحد اعرفه جراح جان يشتغل بنفس المستشفى ويانا والثاني وجهه جديد ما عرفته
امشي ورجلي احس بيها ثكل ، رفعت ايدي كدام عيوني اباوعلها وابجي
ريحانة : شكد ناس ماتوا على ايديج الحقيرة هاي وانتِ ما كدرتي تسويلهم شي ، لو بيدي اكطعج واخلص منج حتى ما تساعديهم
سندت ظهري على الحايط منهارة ابجي واضرب براسي بقوة ، دخلت بحالة هستيرية ، رجع المشهد تكرر كدام عيوني ، صوته وهو يتوسلني رجفته كلمة اترجاج ترن براسي ..
مسحت عيوني ، حطيت ايدي على راسي واضغط بقوة اريد اخفي المشاهد والصور منه ما كادرة ...
فكرت شنو ممكن اسوي شلون اكدر اساعده ما اريد ابقى جبانة لازم اتصرف لازم ...
اجت ابالي فكرة اصورهم بس شلون موبايلي عنده ما رجعه الية ، ركضت لغرفة رانيا ، اتذكر عندها كاميرا سامسونك ، يارب الكاها ..
دخلت وقفلت الباب شغلت الضوا ادورها ما خليت مكان ما دورته ، آخر شي دورت بالكومدي بصف جربايتها فتحته ، طلعت الأغراض لكيتها آخذتها مابيها شحن ، شاحنتها وين ، ياربي اني مداشوف زين لو هي فعلاً ماكو
استمريت ادور الى ان لكيتها آخذتها حطيتها على الشحن ونزلت وكفت قريب من الباب واسمعهم يتهامسون بينهم ، الرعب الحقيقي مو الموت لا الرعب من يخلوك تتمنى الموت كل يوم وما تحصله ..
اعماله القذرة ما يسويها غير بالليل ، كل جريمة يرتكبها الها اسلوبها الخاص ، ما يكرر الشيء نفسه وية باقي الضحايا
يستخدم اساليب مجنونة ، اكثر شخص مريض نفسي قابلته بحياتي هو قسور ...
مختل عقلي ، عنده اضطرابات نفسية وصار جراح شاطر يلعب بأعمار الناس بلا رحمة ..
انتظرت الكاميرا تشحن واني واكفة على اعصابي ، افتر بالغرفة ما اعرف شنو اسوي ؟ شلون انقذ الدكتور وبأي طريقة ابلغ عنهم وشلون ، وامي واني وحياتنا ؟ يارب يارب رحمتك ..
رحت للكاميرا شاحنة بس قليل ، آخذتها شغلتها ونزلت على اطراف رجلي الدرج اظلم مابيه ضوا ، والبيت هم اظلم ضوء خفيف ييجي من الغرفة اللي هم بيها ...
گلبي يدك بسرعة جنونية ، جسمي يرجف من الخوف لو من المهدئات لو من شنو ما ادري ..
لزمت الحايط وامشي وكفت اريد استعيد توازني بعدها مشيت بخطوات بطيئة وصلت للباب جانوا ساديها ..
فتحتها وبداخلي اقرأ آيات من القران الكريم اطمن بيها نفسي ..
باوعت من الفتحة قسور واكف منطيني ظهره والأثنين اللي وياه فوك راس الدكتور وبيدهم ادوات العملية ، رفعت الكاميرا ببطء ثبتتها عليهم وزومت على ملامحهم وعلى ملامح الدكتور وبلشت اصورهم ..
گلبي يدك بقوة الكاميرا ترجف بإيدي كل شوية تنزل وارجع اثبتها بأتجاههم ..
انفاس متقطعة لاهثة
جسم يرتجف
عقل تعبان
الجو متوتر
صورتهم وتسجل كلامهم سحبت الكاميرا ، طفيتها والتفتت حتى ارجع لغرفتي وما اسمع غير صوت يكولي
_شدتسوين هنا ؟
