رواية عيون المها الفصل الثالث والعشرون بقلم ظل الياسمين
حاول تبتسم عيش بحياتك صح
وابد لا تلتفت عالوادم التجرح
حلوة الدنية بس الناس اخ الناس
ياكلهة القهر لو شافتك تنجح
🌷🌷🌷🌷🌷🌷
رجعت للبيت منهاره امسح دموعي وتنزل وحدهن كعدت بلكاع وغطيت وجهي بديه شهكت جان بودي اصرخ
الا ان ارتاحيت وهاي ادموع الندم حسيتهه كمت غسلت وفرشت مصلايه وكعدت اناجي واقره دعاء
دك التليفون رفعت السماعه طلعت امي
_عيوني يمه مهاوي اشلونج
بس كالت هيج انفجرت بلبجي
_اسم الله يمه اشبيج ليش تبجين بحرگه گلب❤️ شنو يوجعج يا بعد روحي
_ما بيه بس مختنكه وذكرت بيبي الله يرحمهه
_يا بعد اهلي لا تبجين الخميس امر عليج نروح لزياره
_انشالله
بقيت اصلي الا ان غفيت على المصلاه
كعدت دنيا ليل وضلمه حسيت بجوع
رحت لجدر الخبز فارغ
لبست وطلعت اروح لبيت عمو اكل وارجع بطريق لكيت علاوي ابن ام عبد كاعد يمشي ويه صديقه
هو بعد ظهور السيد الصدر كلش صارو ملتزميين والناس تحترمهم
فكرت اني لازم اخلي حد لماجد والا راح يشوه سمعتي علبو انتي بلامن
وكفت ودرت وجهي للحايط مرو من يمي صحت خويه علي
_ها منو انتي تفضلي رايده شي
اني مخليه العبايه على خشمي واحجي
_اني مها وانته ابن حموله ورايده منك خدمة وجايه احشمك بستر خواتك
بهضمه بجيت
_مها ليش تبجين انتي اخيتي والميسج احرك الدنيه على راسه وراس الخلفوه
_اكدر احجي وياك وحدنه
_تعالي وراي
مشيت وراه وراسي يريد ينفجر كد ما بجيت وما ماكله حسيت روحي خاويه
دخل بيتهم كتله
_خويه تعذرني ما اكدر ادخل
_ليش اني ما اكدر احجي وياج بشارع
_اترجاك بلباب نحجي
بهاي الاثناء طلعو امجد وزوجتهه اني بسرعه مشيت وعلي وراي وكفت على صفحه واجه امجد وكف التفت عليه علي كاله من رخصتك البنيه تريد نحجي وحدنه
_كولي خويه اشبيج ليش مهضومه
_هذا ماجد الي بلفرع الورانه مره رايحه اقدم على تعيين واجه اعترضلي ولزمه اخو رجل عمتي عماد انته تعرفه اضن بسطه مدري زنكه ومن يومهه ما فك مني كلساع مسويلي اطلابه يمشي ويصيح انتي بلامن راح عمو سالم لاهله وما فاد راحت ام صلاح وهم ما فاد تدري اسوه بيه بلكليه خله صديقه يرش ملابسي ببسي من فوك لجوه واليوم متفق ويه واحد ومتراهن عليه
كمت ابجي واحجي اخر شي كتله اريدك تواجهني بيه اريد اكله اكثر واحد تاذه من عماد اني وانتم شهود
_كافي مها لا تبجين واعتبري ماجد ما يمر بيج والله الا اني بلگبر هذا الخنيث يمسج ويبجيج
_رحملله والديك
رفعت راسي لكيت امجد واكف قريب علينه واكيد سامع الحجي كله
صاح مها لا تهتمين وداعتج ما يمر عليج بس الهوه
درت وجهي عليه كتله مشكور
ومشيت بسرعه لبيت عمو اول ما شافني كال
_ها بويه ليش وجهج احمر باجيه
_لا استوني كعدت من النوم ما لكيت خبز 🍞
صاح مرته _هدى صبي الاكل خل نتعشه سوه
كعدنه ناكل واني مخليه زيودي بحضني واوكل بيه وكل شويه عمو يكلي اكلي
_مها اسويتي علبيت نضفتيه غسلتيه
_لا والله عمو كلشي ما سويت ملتهيه بالامتحانات والدوام وتدري هاي اخر سنه
صعبه ويردون بحث وما جاي الحكك
_ها باجر اخلي هدى تجيج الصبح وتشتغل وياج
_لا خليهه الجمعه انشالله اني افرغ نفسي
جاي نحجي وما نحس الا الباب اندك قوي
طلع عمو واسمع صايح بلباب
_خل تطلع وتحلف اذ اني داز واحد الهه اني لا يمهه ولا كرباهه
عمو سالم/ماجد شتريد ولك جايني بنص الليل ترعد
_جاي اكلك مها يووووميه متهمتني واليوم موديه ولد ام عبد يهددووووون بيه عباله اخاف
_ولك انته شتكول لا اجيب اسمهه على لسانك ابد منا وادم زنكه ودخله بطارمه
هو يصيح وعمو يصيح
لبست عباتي وطلعت بطارمه واول مرة اشوف عمو هيج عصبي دار عليه وصاح دخلي جووووه
كمت افرك بديه وعمو صاير 🔥
اجه كعد كبالي صاح
_ليش بويه مها ما اجيتي وكلتلي ليش ترحين لولد ام عبد بيش احسن مني
ويردون العايل منج.
_والله عمو مو قصدي بس انته رحت لابوه وما اردع.......
_كافي كافي ما اريد اسمع
خله وكام دخل جوه اني راسا كمت طلعت اركض لبيتي فتحت الباب ودخلت
جسمي كله يرجف معقولة اني مذنبه
شنو سويت حتى هيج يصير بيه
خليت راسي على المخده وكمت ابجي بنحيب ليش محد يرحمني حتى من اشتكي
كلت لازم اواجهه العالم بقوه هاي وصيه بيبي ما اكعد بس ابجي من باجر اطلع واصير اقوه من قبل
اريد املي الفراغ لبداخلي واشتغل لازم ارجع لدوامي
كعدت الصبح توضيت وصليت وبدلت مريت على عمو ابو حازم
_صباح الخير عمو
_صباح الورد بويه مها اشلونج
_الحمد لله عمو اريد ارجع لدائرتي اداوم
_اي عفيه عليج تعالي خلي اكمل شغلي واروح وياج
بقيت كاعده ساعتين واجه ابنه وطلعنه
رحب بينه المعاون وكال قدمي طلب ومن يجي الجواب ابلغ عمج
قدمنه وخليت رقم الارضي يمهم وطلعنه
مريت بسوك اشتريت مسواك
رجعت بس كلش تعبانه
بسرعه بدلت واخذت كتبي ورحت للكلبه
لكيت باسم واكف بلباب اول مشافني اجه يركض عليه اني تعديته وطلعت كبل رحت للقاعه هو سد الطريق عليه كال
_مها اوكفي اريد احجي وياج
ما جاوبته ولا اهتميت اله راد يلزم ايدي دفعته بلفكس بصدره بقوه وكتله
_وخر من طريقي لا اشتكي عليك
الطلاب كلهم انتبهو.
رحت كعدت بلقاعه وكلي ارجف بقيت امدنكه ومقهوره
مشت الايام وكم مره باسم حاول يحجي وصديته بقوه وبعد اسبوعين خابروني كالو اجت الموافقه تعالي باشري
كل هاي الفتره واني ما رحت لبيت عمو سالم وكلش اشتاقيت لجهال مره وحده رحت لمدرسه نرجوسه بوستهه وانطيته مصرف وجبت لحمودي وزيودي ملابس انطيته لنرجوسه
وكمت اداوم ومناك اروح للكليه ومره سمعت البنات يكولن ليش ما ترحين دوره حتى يتغير عنوانج وانتي جاي ادرسين
دخلت للمدير وكتله ورحب بلفكره
وصلنه لسنه 2002وصار الوضع يخوف الناس تحجي بلحرب وتخزن مواد غذائيه
اندكت الباب صحت منو
_فتحي الباب عمو اني
فرحت من سمعت صوت عمو سالم طلعت وكتله هله بيك عمو كال اريد اتصل
_تفضل هله بيك
_الوو اشلونك سيد اخبارك الاهل اشلونهم
سيد اريد تشحنلي البضاعه هذا الاسبوع ادزلك الفلوس
من سمعت اتصاله بسيد گلبي وجعني درت وجهي رحت سويت جاي جبته وبوست الجهال وخليت كيك وكليجه فرحت بجيتهم
_عمو اني اسفه والله ما ادري راح اصير مشكلة من وراي
_عمو مها انتي ابنيتي واليغثج تجين الي مو ترحين لغيري انتي مسؤؤله مني
وامج وبيبتج موصايتني بيج ولا تصورين اكو احد احرص مني عليج
_الله يطيك الصحه والعافيه
يلله بويه اخذي راحتج
صحت وراهه عمو البيت جاهز للايجار
_انشالله باجر امر بدلال
_عمو مشكور على كل شي
_لا تكولين هيج ما بينه شكر احنه اهل
مرت الايام ومره دك التليفون رفعت السماعه
_اشلونج مها
_منو السيد
_اي سيد احسان وياج
كمت ارجف ما عرفت اجاوب كوه كتله
هله بيك تفضل
_مها روحي لسالم كليله وصلت البضاعه وكليله لا يخزن اكل تره كلشي منتهي
_شنو تقصد
_مالج علاقه وصلي رسالتي وبعدين افهمج
_صار هسه اروح واكله مع السلامه
رحت العمو كتله السيد خابر ويكول هيج
ضحك وكال هذا حجي التجار
اجه شهر شعبان واني صايمه وعمو صايم
كال تعالي فطري يمنه
رجعت من الدوام هلكانه نمت للعصر رحت لبيت عمو
لكيت هدى تخبز خطيه وهيه حامل درت وسرفنت كتله روحي كملي فطورج اني اخبز تنورهم وره البراني والبرده ما مغطيه الشباك شفت خطار عدهم اخذني الفضول اشوفه وانصدم السيد عدهم
كملت الخبز ورحت احضر ويه هداوي الاكل كالت اليوم صاحب عمج خطار من بغداد
انتابني شعور الفرح كملنه الاكل ودزينه اكلهم للبراني واحنه اكلنه بلمطبخ
كملو واني بقيت ادرس بحمودي ونرجوسه عمو طلع هو والسيد رجع عمو بس فرحان كال تعالي مها وراي
_مها انتي تعرفين السيد صديقي واني كلش اعزه واحترمه وانتي بنيتي الله شاهد عليه معزتج من معزه صفيه الله يرحمهه
_ههه عمو شكو اليوم كله مديح ورانه سحور
_ولج صبري مو ما اعرف اشلون ابدي
انتي شنو رايج بسيد
_هههه ما فهمت بشنو
_السيد خطبج واني اكول اخذي وقتج فكري تره هذا زواج صح هو خوش ادامي بس مو يوم يومين
كمت على حيلي مرتبكه ومستحيه
_عمو هو كلك اريد مها
_هههه اي كلي ليش انتي شويه ولج تسوين ساده وشيوخ
_مشكور عمو بس لازم ابلغ امي وسالفتك يحتاجله تفكير
طلعت من بيتهم وگلبي فرحان ومستحيه والابتسامه ما فاركتني
تفكيري مشوش كلت خلي باجر اخابر امي
ثاني يوم داومت والفرحه ما سايعتني
غيرو مكان عملي خلوني على الحاسبه و
رفعت راسي وتفاجئت السيد واكف فوك راسي بس شكله مبهذل ومتعوب سالني بدون ميسلم
_بلا زحمه اشلون اكدر اسوي هاي المعاملة
_حصرتني الضحكه كتله اول شي تاخذ
موافقه المدير واجيب مستمسكات
اشو هذا رجع كعد وضل مركز بيه
خلص الدوام ورحت لسيارات اني وبنيه ولمحت السيد واكف بلفورت
رجعت للبيت فرحانه ودكيت على امي وحجيت الهه الكاله عمو كالت
_يمه مها هاي حياة ولازم تسالون على الولد شنو يشتغل ويكدر يعيشج
_يمه.جاي اكلج صاحب عمو سالم
_شوفي اليوم اروح لام الخيره واشوف شتكلي
_هههه والله عدج سوالف تامنين بهيج شغلات
ثاني يوم بليل دك التليفون
_اشلونج مها
_هله سيد انته اشلونك
_مها اني كلش معجب بيج وبشخصيتج وانتي اول امراءه تدخل كلبي ❤️
واتمنه اسمع منج الموافقه واذ عدج سؤال كولي
_سيد انته ليش اجيت لدوامي بملابس مبهذله
_حتى اشوفيني على حقيقتي وما تكولين غشني بعد الارتباط
_هههه ليش انته متاكد من الارتباط
_مها اني اول ما شفتج دعيت الله اصيرين من نصيبي
_شوف سيد انته لازم تعرف عني كلشي وتتعرف بامي وزوجهه
اكيد عمو حجالك الضروف المريت بيهه
_اي كالي امج عافتج من انتي زغيره واخت سالم ربتج وهواي حجه عنج
ما يهمني ماضيج اني كلي قناعه بيج
عليج الله مها انتي موافقه حتلو موافقه مبدائيه
_هههه سيد اني اشرف بيك وموافقه بس لازم اكو خطوات انسويهه
_مثل شنو
_تروح لامي وتطلبني منهه واني راح اروح قبلك
_صار الترديه ايصير وكله لخاطر عيونج الحلوات
