رواية ثأر الشيخ مهران الفصل الرابع والعشرون بقلم حوراء
أعظم الشعراء هم اولئك الذين كتبوا بيت شعر واحدا وماتو بعد كتابته مباشرة
نزار قباني
__________________
رياحين:- كعدنه اليوم من الصبح علمود مهران وايليا لان اليوم يرجعون من السفر
خلصنه كل شغلنه وحضرنه اكل الهم وضلينه ننتظرهم سمعنه صوت سيارة مهران وطلع ادم وفهد ونزار حته يستقبلونهم من الباب بس المفاجئه ان مهران دخل لوحدة بدون ايليا
الحجيه ترفه :- وين مريتك يمه
الشيخ مهران :-رجعيتها لأهلها
الحجيه ترفه :-صخام بوجهج ترفه ليش يمه شصاير وياكم ؟؟
الشيخ مهران :-ماصاير شي بس المرة شفتها ماتناسبني ورجعتها لأهلها
الحجيه ترفه :-هي لعبه ماناسبتك جا المن خطوبتكم ضلت 3 اشهر ومن اسألك عليها تكولي يمه الابنيه عاجبتني واريدها مرة الي شنو الي تأخر
نرجس:-خاله هذا هم سؤال شوفي شنو شاف بيها ليله الدخله وهيج رفضها يجوز طلعت مو بنيه !!!!
الحجيه ترفه :-صدك هذا الحجي يمه ؟؟
الشيخ مهران:-نرجس انتي منو سمحلج تحجين هااا وثاني شي ايليا مابيها شي وهي بت بيوت بس شفتها ماتناسبني ورجعتها لأهلها
ادم:-هاي خطتك من البدايه مو ؟؟
الشيخ مهران :-شنو تقصد
ادم:-تعرف كلش زين شنو اقصد ازوجتها علمود تأخذ الي تريده منها ونوب تذبها على بيت اهلها وهيج تاخذ انتقامك من الشيخ جابر لمن تكسر حفيدته موو
ضل الشيخ ساكت اتقدم عليه ادم وضربه بوكس وكعه بالكاع وصاح بوجهة
:-هااااا شو سكتتت حجيي صحيح مووو لكك شلونن تسويي هيجج حيوان
وكف مهران وصاح بيه
:-تماديت هواي ادم هواي
رجع ادم ضربه بوكس ووكع بالكاع وادم كعد على صدرة يضرب بيه بوكسيات انترس البيت بصوت صريخ النسوان وصوت امه
الحجيه ترفه :-تكاتلو الاخوان من ورة ثار ابوهم
سحبو فهد ونزار ادم من فوك مهران
ادم:-عوفونيي خليني اصحيهه على زمانه لكك وين عايشين شلون تسوي هيج لك انته مو شيخ وتحجي بالشرف والاخلاق واكثر من مرة مدخل علمود تطلك مرة رجلها معنفها وتصيح مااقبل احد يأذي المرة ومو زلمه الي يضرب مرةة وين راحح حجيكك هااا
:- جدها كتال ابوناا نسيت لو لاااا
:-تروح تنتقم منها بهاي الطريقه القذرة هااا
:-لكك مااعنده نقطه ضعف غيرها مايهتم لولده مثل مايهتملها
:- مااعرف شنوو احجي وياكك وعلي لك وكفت عقلي لكك احنه عدنه اخت مافكرت ماكلت لاسامح الله تطلع حوبه هاي الابنيه المسكينه بأختنا هاا
:- احنه ما كاتلين احد احنه مايتمنه اربع جهال احنه ماطردنه مرة ارمله واربع جهال بليله ظلمه وخليناها ياخذون الشوارع لكك ماضلت شغله مااشتغلت بيها بس علمود احصل ايجار الخرابه الي كعدنه بيهاا لك تذكر شلون رياحين تحسست من الجو والتراب وجسمها انترس حب لان المكان الي جنه كاعدين بيه كل وصخ لك كمت اوصل سكرانين وشرابين عرك بس علمود احصل فلوس لعلاجهاا يجوز انته نسيت بس اني لاا والي سويته شي قليل بالنسبه للاشياء الي عشناها بسبب الشيخ جابر
:-لكك مانسيتت ولاا راح انسه ابدد بس هذا مينطيك الحق حته تسوي هيج بالابنيه
نرجس :-كلللللووووووشششش زلمههه وابن زلمه ماخليت دم ابوكك يضل بالكاع
ادم:-وحق هو علي يانرجس اذا مااطلعين من كدامي هسة اشك حلكج على هذا الحجي مالتج اطلعيييي برةةةةة
طلعت نرجس بسرعه لان تخاف من ادم وخاصه وهو عصبي لان بعد مايكوم يشوف احد كدامه
ادم:-طلكيتها ؟؟؟
الشيخ مهران :-لااا
ادم:-حته سيد مطلكتها ؟
الشيخ مهران:-اي حته سيد ماطلكتها
ادم:-ليشش ؟
الشيخ مهران:- شنو ليش ؟
ادم:-ليش لحد هسة مامطلكتها انته مو اخذت ثأرك منها بعد ليش مخليها معلكه ليش ماتخلصها منك ومن حقدك عليهاا
الشيخ مهران:-لكك شو انته ماتعرف تحجي
ادم:-عفت الحجي الك شيخ
حجاها مستهزء بامهران عافنه ادم وطلع من البيت كله اما مهران مسح على وجهة بعصبيه وهو ماعاجبه تصرفات ادم وياه حس انه خسر اخوه
رياحين :-كلشي صار كدامي واحس روحي صرت بمتاهة شنو الي سواه هسة مهران رحت لماما وسألتها
:-شنو الي صار هسة هنا اريد افتهم انتو مو كلتو بابا مات بحادث هسة شنو ثار شنو قصده من كال الشيخ جابر هو السبب بأنتقالنه ليش احنه وين جنه عايشين ؟؟
الحجيه ترفه :- الشيخ جابر هو السبب بكلشي صار ويانه بالماضي والي جاي يصير ويه حفيدته بالحاضر الشيخ جابر هو وجدج جانو صحبان بس ولد الحرام دخلو بيناتهم وخربو الصداقه الي بيناتهم ابوج قبل جان يصيحله عمي هلكد ما علاقته هو وجدج قويه
رياحين :-يعني انتي تعرفيه للشيخ جابر
الحجيه ترفه:-شلون مااعرفه وهو الي خطبني لأبوج
رياحين :-شلون ؟
الحجيه ترفه :- قبل اني من جنت اداوم جان طريقي يصير على بيت ابوج جان كل ماافوت من يم بيتهم الكاه كاعد بالباب ومرة رحت للدوام بس جنت ناسيه دفتر العلوم ومعلمه العلوم طردتني من الصف كالت الج ربع ساعه روحي جيبه وتعاي واذا اتأخرتي دقيقه وحدة بعد مااصححه الج طلعت من المدرسه ركض مااحسلج اله انضرب بواحد وخرت وشفته ابوج كال بصوت حاد وجان مبين عليه عصبي
:-شبيج تركضين بالشوارع راكض وراج جلب
حجيت واني الهث
:-بس وخر اريد اروح بسرعه اجيب دفتري مال العلوم المعلمه تكتلني اذا تأخرت
:-شحدها اطيحلج حضها ،تعاي وياي
:-وين ؟
:-للمعلمه مالتج امشي
مشيت وياه واني خايفه من المعلمه واحجي بكلبي
:-منين طلعتلي انته هسة لو مكمله طريقي جان وصلت للبيت
دخلنه للمدرسه ودخل للادارة وحجه ويه المديرة يصيح وعرق بجبينه واضحه دلاله على عصبيته
:-انتو شلون اطلعون بنيه من المدرسه قبل موعد الحله مالتهم هااا
:-اهدء استاذ وفهمني شنو الي صاير
:-وين معلمه العلوم روحي صيحيها
:-قصدك ست صباح
:-لا ست مساء اندري مني تاخذهم روحي صيحيها خلينه نشوف شلون تتصرف هيج تصرف
:-صاحت المديرة على وحدة من الطالبات وكالت
:-امشي صيحي ست صباح كولي الها المديرة تريدج بسرعه
:-حاضر ست
:-شوي واجت المعلمه ونزلج بيها رزايل على ابو الابنيه اهلها امنوها يمكم شلون تخلوها تطلع بهيج وكت والدنيه ضهريه والشارع فارغ
رياحين :-اي وشصار بعدين
:-كملت سادس واهلي رادو يبطلوني بس اني جنت احب الدراسه وتوسلت بأبوي حته يقبل اخليني اكمل داومت الاول متوسط وابوج جان يكعد بنفس المكان ويضل ينتظرني من احل من الدوام يضل يمشي وراي نوصل للفرع مالتنه وهو يوكف بالركن مالته من يشوفني دخلت للبيت يلا يروح وهيج استمر لحد ما دخلت للثالث متوسط
رياحين:-حيل كل هذا الوكت وهو بس يراقب بيج ؟
الحجيه ترفه :-اي كل هذا الوكت ضل يباوع من بعيد عليه تدرين ليش
رياحين:-ليش ؟
الحجيه ترفه:-من سألته ليش ضليت اربع سنين بس تراقبني بدون ماتجي وتحجي وياي اوتخطبني كال لو اجيتج بهذاك الوكت جان لا انتي وافقتي ولا اهلج لان انتي تحبين الدراسه وتردين تكملين واهلج ماجانو راح ينطوج لان انتي الكعدة والمدللهة مالتهم مراح يزوجوج بعمر صغير
رياحين:-شكد عمرج من تزوجتي بابا
الحجيه ترفه :-19
رياحين :- حيلل كل هذا الوكت وبابا ظل منتظرج
حجيه ترفه :- من دخلت بعمر 17سنه دز ابوج اهلة حته يخطبوني بس ابوي ماوافق وابوج مااستسلم ضل يدز بأهلة واهل عشيرته وهواي ناس خيره حته ابوي يوافق بس ابوي معند وميقبل
رياحين:-ليش؟
:-ابوي جان حيل يحبني ومايكدر على فراكي وهم يكول بعدج صغيرة على الزواج والمسؤوليه
:- زين شلون وافق بعدين
:- اووو من بعد كومه مشاكل وعرك وناس رايحه وناس جايه
:-سولفيلي حبابه
:- من صار عمري 18 سنه جنت سادس ذبيت كل حيلي عليه اريد انجح وادخل كليه على عناد بنات عمي الي جانن من يشوفني اقرة يتسهزءا بيه مشت الايام بين الدراسه والضغط والبيت داخل انذار علمودي ابوي يطلع ويطب ها يابه شنو محتاجه ومن يسمع صوت جهال اخواني يكول لأخوي ودي مرتك لأهلها بحجه خليها تشوف اهلها وهيج اجت العطله الي قبل الامتحانات النهائيه جنت اقرة ومندمجه وابوج ابدد ولا ابالي ولا افكر بيه جان اهم شي عندي دراستي مااحسلج اله اخوي عمار دخل عليه ويصيح ويغلط
:-خيرر خويه شبيك صاير شي ؟
:-انتي شعندج ويه جاسب
:-منو جاسب ؟
:-الزلمه الي خطبج اكثر من مرة
:-ماعندي شي وياه والله اصلا ولا اعرفه
ماسمع مني ونزل عليه ضرب كسرني تكسر وشكك الكتب مالاتي وهو جان يضرب بيه امي كامت تصرخ وتستنجد بالجيران مانحس اله ابوي دخل علينه سحب عمار مني واني وكعت بالكاع منتهية من الضرب وامي فوك راسي تبجي عليه
:-انته شلون تمد ايدك على اختك هااا
:-بنتك هاي راح تسود وجهنا كل من وراك انته كبرت راسها وخليها تكمل دراسه وشوف اذا ماطلعت عدها علاقه ويه جاسب ليش يلح ويريدها هاا اكو شي اكيدد
كمل كلامه وابوي نزع عكاله ونزل عليه ضرب عمار جبير ومو زغير شلع العكال عليه وهو ماتزحزح من مكانه ويباوع على ابوي بنظرات صدمه حته اني انصدمت ابوي عمرة بحياته ماضارب احد من عدنه واحنه صغار مو نوب يضرب عمار الي هو اكبر ولده
:-هاي المرة اجيت وحجيت هيج على اختك مشيتها الك بس ضربه بعكالي مرة الثانيه وعلي اذبحك خوشش لو لاا امشي اطلع برة
طلع عمار دنك ابوي علي ومسح على شعري بحنيه وكال
:-دامني بيه نفس محد يكدر يوصلج ويأذيج ترفتي
:-الله يخليك الي يابه ويطول بعمرك وتضل خيمه فوك راسي
هز راسه وطلع ثاني يوم جابلي كتب جديدة ورجعت اقرة من جديد وبشغف اكبر لان ابوي وياي وفخور بيه لان وصلت لهاي المرحله اجت الامتحانات وامتحنت وخلصتهن على خير وجاوبت بيهن كلهن ورة فترة طلعت النتائج صاحني ابوي وكال
:-وينها شمعه البيت وينها فخر ابوها وينها الي رفعت راسي بين اخواني وولد عشيرتي
اني بوكتها نقطه دم ماضلت بيه من سمعت هذا الكلام بالكوه طلعت مني هاي الكلمه
:-ناجحه؟؟؟
:-اي بويه ناجحه ومعدلج 90
امي خطيه بوكتها من الفرحه كامت بس تهلهل وهو يصفك وجهال اخواني يركصون ونسوانهم تباركلي اجواء فرحه الحد هذا اليوم مطبوعه براسي ثاني يوم اجه ابوج وجدج ووياها الشيخ جابر ابوي وافث من بعد ما اصر عليه الشيخ جابر لان هو يصير ابن عمه الجبير وشيخ عشيرتهم
:-يعني انتي تصيرين لعشيرتهم؟؟
:-اي اني غريبه عن اهل ابوج والشيخ جابر هو شيخنا
:-زين شلون صارت العدواة ؟
:- معليج بهاي السوالف انتي امشي وخري مني فتحتي عليه جروح قديمه
سكتت منها لان شفتها حيل اتأذت تاخذلها ربع ساعه تبجي ونوب ترجع تحجي صعدت فوك وشفت +20 اتصال من يزن هاي من غير الرسائل الي يكول بيها
-ريحانه وينج
-ريحانتي جاوبي اريد احجي وياج بموضوع مهم
-ردي حبيبتي لاتتجاهليني ترة اموت ،وغيرها هواي
غلقت الموبايل ونمت على الجربايه افكر بمستقبلي اني وياه شلون راح نكدر نجتمع سوة وكل هاي العداوات بيناتنه
____________________________
نارة :-من بعد الي صار كدامي من حجي مهران وادم ونوب حجي الحجيه ورياحين حيل خفت صعدت الغرفتي وضليت لليل افكر معقوله يجي يوم وادم يسوي بيه هيج وكل شوي اكول هسة ايليا ندمانه لان قبلت بيه وجاي تلعن اليوم الي وافقت بيه على مهران اجتي رياحين حته انزل اتعشى بس رفضت لان احس نفسي مسدودة عن الاكل ضليت واكفه على شباك غرفتي واباوع على الناس عندي محاضرات بس مااريد اداوم باجر احس مالي خلك للدوام واني واكفه على الشباك شفت سيارة ادم وهي تدخل للكراج سديت البردة ورحت نمت على الجربايه وتصنعت النوم ماتأخر شوي ودخل نزع ملابسه وبدلها بتراك اكدر اشوفه لان ضوة الغرفه خفيف وهو ميكدر يشوفني اله يركز اجه بأتجاهي رفع الغطه ونام يمي سبحني لحظنه وكال
:-ادري بيج كاعدة ترة
ماحجيت ضليت ساكته وهو كال
:- تفكرين بأيليا صح
:- اهمم حيل مقهورة عليها محد يستحق تسوي بيه هيج خاصه اذا جان هذا الشخص يحبك
:-يعني اذا مايحبني عادي اسوي بيه هيج شي ؟
:- اكيد لا مو هذا قصدي الي اقصده ان الشخص الي يحبني ميصير اأذيه لان هذا مختلف عن كل الناس هذا حبني بعيوبي وبمميزاتي
:- صح زين شنو الي جاي تفكرين بيه هسة غير ايليا
:-بس سؤال شلون تعرف اني جاي افكر بشي معين ؟
:-من تعتزلين الناس وماتاكلين معناها انتي عندي شي مهم جاي تفكرين بيه
:- صح هو سؤال ابالي من طلعت لحد هسة افكر بيه
:-اسمعج
:-هم يجي يوم وتسوي بيه مثل ماسوه مهران بأيليا
:-مستحيل بيوم من الايام أاذيج عن قصد ابدد انتي مخلوطه بروحي مااكدر ادخل للغرفه اذا انتي ماموجودة بيها من ترحين للدوام واني نايمه بسرعه افز من مااشتم ريحتج اكثر من مرة سويتها بس اطلعين انتي اطلع اي قميص من قمصانج واحط عليه عطر واحطه على مخدتج حته اكدر انام
سحبني لحظنه اكثر ونمت بس التفكير بهذا الموضوع بعده براسي
مر شهر كامل على الحادثه الي صارت بهاي الفترة تغيرات تصرفات الشيخ 180 درجه كام ابدد ميدخل للبيت كاضيها بالديوان وكليوم بمحافظه علمود الفصول والاعراس والفواتح قبل فترة رجع مهيمن من السفر خطيه هو ماجان يعرف بالي سواه مهران وجان جايب وياه هدايا لأيليا حته من دخل ركض لمهران وشبكه وكال
:-اعذرني خويه ماكدرت احضر عرسك بس اعوضك والله من يصير عدك ولد اله اسوي حفله واركص بيها للصبح
ادم:-اسأله وينها مرتك
:-اي صدك ماشفنه العروس
ادم:-اي صح شيخ وينها مرتك صارلنا شكد ماشايفينها ؟
:- شنو هذا الحجي ادم غير عايشه وياكم هية شنو ماشايفينها
:-خلي اخوي الجبير والشيخ وعضيدك هو يكولك وينها مرته
:-شصاير هنا غير تفهموني
:-يبدو اخوي الشيخ ماراح يحجي اني احجيلك الشيخ مهران رجعت مرته على اهلها بيوم السابع واتهمها بشرفها
مهيمن :- هذا الحجي صدك مهران
الشيخ مهران :- تعال ارتاح بعدين اني اسولفلك
مهيمن :- لكك شرتاحح اني مو حجيت وياج بهذا الموضوع وكلت خلاص انتهى وماكو بعد ثأر لو جنت تضحك عليه بهذا الحجي
ادم:- مو بس عليك جان يضحك علينه كلنه
الشيخ مهران :- ادمم
ادم:- هاا شيخ كلت شي غلط لاسامح الله
مهيمن تقدم على مهران وضربه بوكس وصاح بيه
:-لكك انته شنو الانتقام خبلك انته مو مهران صاحبي واخوي ابو كلب الطيب لك شلون تسوي بيها هيج خرب يومك اي والله لكك هناك وافكر بيك اكول واخيرا نسه كلشي وبدة يعيش حياته لكك لحد هسة مامستوعب الي سويته مااكول بس الله يجيرنه من حوبتها وماتطلع بينه
طلع مهيمن من البيت وراح كعد بفندق يومين ورجع لدبي ماطول
وخلال هاي الفترة دائما اسمع الشيخ من يريد يصيح على رياحين يكللها ايليأ تعاي اول مرة كلت يجوز لان تعود عليها يومين وينسا بس طول هذا الشهر هو هيج نوب مو بس من يريد يصيح على رياحين حته اني اكثر من مرة كال تعالي ايلي ومن ينتبه على نفسه يعتذر ويروح لغرفته مدري ليش حسيته يحبها ومرات اكول لا لان تعود عليها كام يصيح بأسمه ونوب ارجع اضحك على تفكيري اكيدد يحبها اله وين اكو واحد جان هدفه الانتقام وبس وماعندة مشاعر اتجاهة يضل شهر كامل يصيح بأسمها لاشخاص عايش وياهم عمر مرة دخل وكال
:-اكو طرشي لو لا لان ايليا ماتاكل السمج اذا مو وياه طرشي
من انتبه على نفسه شنو كال عدل حجيه وتحمحم وكال
:-قصدي رياحين ماتاكل السمج اذا مو طرشي
:-عدنه طرشي ميحتاج تجيب
:-خوش حجي
عافني وطلع ظليت اباوع وراه شبيه هذا اصلا رياحين عدها حساسيه من الطرشي ماتاكله ابدد
بسبب هذا الموقف خاف جان عندي شك قليل بحبه الها انحمه كله صرت متأكدة مليون بالميه ان الشيخ وكع بحبها لأيليا بس ياترى شنو فائدة الحب وهو هيج مأذيها او ممكن بيوم من الايام يجتمعون سوة ؟؟
_________________________
:-تحليل حمل ؟
:-اي تحليل حمل خاف نوب اطلعين حامل منه
:-ماما ترة كل الي عشته وياه سبعه ايام وين لحكت احبل منه ؟
:-امشي نروح نتأكد
:-ماما الله يخليج عوفي هاي السالفه منين اجيت حامل اصلا العادة الشهرية الاسبوع الجاي تجي
:-اذا مااجتج حاجيني خوش
:-حاضر يمه
مرت الايام واني على حالتي اكلي قليل واكثر وكتي بالغرفه مالتي حابسه روحي مااريد اشوف احد انفال تكعد تحجي وياي ومن تشوفني مااجاوبها تخلي وتروح هذا الاسبوع لازم تجيني العادة ضليت طول الاسبوع عايشه بقلق كل يوم اكول باجر تجي وهيج خلص الاسبوع وهي ماكو كلت يجوز اتخربط موعدها بسبب الزواج وهذا الشي عادي ضليت انتظر بالاسبوع الجاي وهم ماكو مرن ثلاث اسابيع وهي ماكو صار شهر كامل على زواجي من مهران والعاده بعدهي ماجايتني شجعت نفسي ورحت حاجيت ماما
:-ماما اريد اكلج شي
:-كولي حبيبتي
:- ماما العادة مااجتني ابدد
:-صخام بوجهي لج من شوكت مااجت هاا
:-هذا الشهر كله مر وهيه مااجتني
:-امشي البسي وراح اخابر على ابوج نروح لهاي الدكتورة حته تفحصج يلا استعجلي
صعدت فوك بدلت وخابرت انفال شرحتلها المختصر وهي كالت انتظرج رادت تجي وياي بس اني منعتها نزلت لكيت ماما واكفه فوك راس بابا وبابا حاط راسه بين ايدة
:-اني جاهزة ،بس كلت هيج رفع راسه وكال بأبتسامه
:-اخخخ صارلي شكد ماسامع هذا الصوت الحلو شلونج حبيبتي
:-زينه بابا يلا نروح
:-اي يلا
صعدنه بالسيارة ومشينه نص ساعه ووصلنه للدكتورة بابا حاجزلي وقبلي ٣ نسوان ضليت منتظرة لحد ما اجه دوري دخلت للغرفه وسلمت عليه الدكتورة
:-شبيها الحلوة من شنو تشكي
:-شاكين بيها حامل واجينه نريد نتأكد
:- تمام اصعدي على السديه خليني اسحب منج دم ونسوي تحليل ونشوف اذا حامل لو لا ونوب اسويلج سونار ونتأكد من عمر البيبي وحجمه وطبعا هذا اذا اكو حمل
كعدت على السديه واجت سحبت مني دم دخلت بنيه زغيرة وكالتها
:-ودي للمختبر تحليل حمل خليه يخلصه بسرعه مفهوم
:-تمام دكتورة
راحت الابنيه وضلينه يم الدكتورة وكل شوي وسألت
انتي امها ، زوجها موجود وياكم ،صارلج شكد متزوجه ،الخ من الاسئله دخلت الممرضه وبيدها ضرف انطته للدكتورة فتحت الدكتورة الضرف وابتسمت شويه وخفتها وبين على ملامحها الخوف
:- الف مبروك حبيبتي انتي حامل
ماما بس سمعت هيج شهكت وضربت صدرها واني احس رجليه بادن واديه يرجفن
:-بس اكو خطورة كبيرة عليج
:- خوش لعد نزليه مانريد هذا الطفل
:-العفو منج بس اني ماكملت كلامي وبعدين انتي مايحقلج تحجين هيج هذا روح شلون ترديني اكتله
:-لعد تموت بنتي احسن من يفيدني اذا صار ببنتي شي
:-ترة حته لو ردنه نطيحه راح تموت بنتج بسبب النزيف الي راح يصير وياها بالعمليه
:-شنو قصدج دكتورة يعني وهو موجود يأذيها وهو ماموجود هم يأذيها
:-لازم ترتاح هذا الشهر ولاتتوتر ولاتشيل شي ثكيل ولازم تبتعد عن زوجها منا لحد ماتستقر حالتها
هزت راسها ماما بالموافقه اخذنه ورقه العلاج الي وصفته الي ونزلنه صعدنه بالسيارة محد حجه منهم وصلنه للبيت واني بسرعه صعدت فوك ضليت ساعتين فوك عطشت اريد مي مالكيت بالغرفه نزلت للمطبخ حته اخذ بس قبل لا ادخل سمعتهم يحجون بيه
احلام:- وهي هاي الدكتورة شنو تفتهم لج عيني اخذيها لأم ستار القابله وهي تنزل الطفل قبل لايثبت وتصيرلنه فضيحه ثانيه
ام ايليا :-لج عيني غير تكول تموت اذا سوت الاجهاض
احلام:-اويي عيني من شوكت يموتن النسوان اذا طيحن الطفل لج اني كم طفل طرحت شفتيني متت لاا هاي جذابه عوفج منها اني هسة اجيبلج رقم ام ستار وخابريها واتفقو على موعد وبعد احسن اذا رحتولها اليوم حته تخلصون منه ومن ابوه ****الي لعب بيها لعب وشمرها علينه
:-الله كريم انتي جيبي الرقم خلينه نتصل لج وعلي من سمعتها لحد هسة جسمي يرجف شنو من مصيبه طاحت على راسي شوكت اخلص اني من مشاكل ايليا
:-متخلصين هم البنات للممات
:-اي والله
حسيت بأحلام تريد تطلع بسرعه طفرت على الدرج ركضت ودخلت للغرفه صدكك تحجي امي معقوله لهاي الدرجه كاهتني لدرجه توديني للموت بأديها ؟؟
خابرت على انفال وكتلها كلشي وحته على ام ستار حجيتلها
انفال:- ديري بالج توافقين ايليا اطيح حضج وعلي لج تموتين والله اذا سويتيها لج مو هاي جيرانه هم سوتها وماتت
ايليا:-ادري واني راح اسويها تدرين ليش حته اموت اني وابني ونخلص من ابوه واهلة الي مايردونه ولا يردون امه
انفال :-لج ايليا لاتتخبلين شنو تموتين روحج لعد اني وين رحت ليش هيج حبيبتي فكري شويه بيه
ايليا:-باي انفال وشكرا الج على كلشي سويتيه وياي جنتي نعم الصديقه الي دائما جنت استند عليها
سديت الخط منها وضليت انتظر مصيري ومصير ابني
انفال :-من بعد ما سدت الخط بوجهي اتصلت عليها مرة ثانيه لكيتها حاضرتني بسرعه رحت طلعت رقمه واتصلت عليه اول مادك رد عليه وكال
:-اليوم الشمس منورة حياتي هلا والله واخيرا فقدتيني وحبيتي تسألين عليه
:-والله من انعل ابوك لابو هذا الشيخ الكلب الحقير لكك
:-ولو اقاطعج حبيبتي بس اني وهذا الشيخ الكلب نصير اخوان
:-امداك وامده اخوك وياك شله مال حيوانات اسمع لك
:-سمعت لج
:- هسة تروح وتحاجي هذا الشيخ العفطي مالتكم وتكله وحق علي اذا صار على ايليا شي من ورة العمليه الي راح تسويها هو حصتي وعلي اذبحه بيدي اذا صاحبتي صار بيها شي
:-اوكفي اوكفي بس فهميني عمليه شنو واخوي شعليه ؟
:-عمليه اجهاض ايليا حامل من مهران واهلها مايردون الطفل وراح ينزلوه عد وحدة قابله واكو خطورة على حياه ايليا يكولون يصير وياها نزيف بالعمليه وتموت وهاي الثوله موافقه بس علمود تموت هي وابنها وتخلص من حجي الناس واهلها والك عين وتكول اخوي شعليه
:-وين صايرة هاي المرة هااا
:-مااعرف اسألك ماما واردلك خبر
:-اوكي اني راح ابشر الجماعه ونطلع بسرعه حته نلحك عليهم
:-يعني راح تمنعوهم متخلوهم يسون العمليه الها
:-شحدهم هذا ابن اخوي منتظرة صارلي قرن وهم يردون يموتنه بكل دم بارد اني اعلمهم
:- كله من ورة اخوك ترة
:-هسة عوفج من هذا الحجي وروحي شوفيلي هاي ام ستار وين صايره يلا بسرعه
:-اي خوش باي
:-باي
نزلت اصيح :-شيخخخ مهرانننن
وينكككك الحكككك
الشيخ مهران :-شبيك ولكك ليش تصيح شصاير
نزار:-الحك راح يكتلون مرتك وابنكك
الشيخ مهران :-شجاي تكول انته
:-مرتك ايليا حامل واهلها مايردون الطفل لان منك وراح يخلوها تجهضه واكو خطورة على حياتها يعني ممكن تموت بالعمليه
:-حضر السيارة خلينه نطلع بسرعه نلحكهم قبل لايسون بيها شي
:-حاضر شيخ
