رواية عيون المها الفصل السادس والعشرون بقلم ظل الياسمين
من اعتاد ان يوزع الورد سيبقى شي من العطر بيده ..ما دمت تفعل الخير سيصلك اثره
انكطعت كل وسائل التواصل ويه السيد وامي والخوف والرعب والموت بشوارع والاخبار ما تبشر بخير عمو كال
_بدلو لجهال نطلع من المنطقه
_وين اروح اشو كل المحافظه قصف
-خل نطلع نروح لبيت اخو هدى مرت عمو بلقضاء
لمينه ملابسنه وطلعنه مشي ماكو سيارات وصلنه للولايه يلله لكينه تكسي واخذنه لبيته
رحبو بينه وضلينه هناك يومين عدهم طابق فوك متروك نضفناه اني وهداوي وكعدنه فعلا المنطقه هادئه
مو مثل المركز
عمو رجع جاب جوله ونفط ولاله وتمن وحليب وباقي المستلزمات
اكلني الخوف على امي كالو البصره تقاوم الامريكان
وره اسبوع كالو دخلو الامريكان والعالم استقبلتهم صارت فوضى
رجعنه لبيوتنه وصارت النهب بدوائر الدوله حتى المدارس ما سلمت
مره اجه عمو كال
_عمو مها تعالي يم الجهال راح اروح الزم حراسه على المستشفى
كل ولد المنطقه مقسمينهم الى مجموعات ولازم نتكاتف ونحافظ على المال العام
_اي عمو عفيه شوفلي دائرتنه هم بيهه حراس منكم
الي همه الاغلبيه الصدريين ولد المنطقه
الحمد لله بعض الدوائر ما متعرضه لتخريب والنهب
حاولت اتواصل ويه امي والسيد ماكو كل خبر كالو بغداد سقطت والبصره والناصريه تقاوم
محافظتنه وسط دخلو الامريكان وقوات متعدده الجنسيات
الوضع تغير وصار العده ثار من البعثيه ياخذه سمعت اكو سجون جوه الكاع وتاملت خير كلت العمو
_عمو فدوه اريد انخاك
_كولي عمو
_كالو اكو سجون بلكي جدو بيهه
عمو دنك وبجه كال حجي فلاح ما اضن عايش بس نروح نسال ونشوف
عمو بقه يومين يدور تالي رجع كال
_عمو مها جدج بلمقابر الجماعيه 😭
گلبي وكف من البجي عليه الله يرحمه برحمته الواسعه 😭
_فدوه عمو خل نسويله فاتحه
ونسويله ثواب هو كل هاي السنين محد ذاكره عبالنه عدل واذ الله مكنه نسويله قبر
ثاني يوم عمو حشم ربعه وسووله استخلاف وسوو مجلس وثواب عشه
بثواب روحه الطاهره
مر شهر على السقوط واجانه السيد اللحيه عاليه والوجه متغير كال
_سالم اني اريد اخذ بثار اخوي
_سيد انته من عقلك منين تاخذ ثاره كلهم البعثيه شردو
_شوف سالم اني حصلت مستندات وتقارير مال امن العامه مال بغداد وضميته عدي
_ادري انته شسوي بيهه روح سلمهه ابردك راس لا تحاول ادخل نفسك ويه ناس اجو على دبابات امريكيه
_والله لو اعرف انكتل ما اسلمهه الا بيد امينه
_خلص نروح لنجف ونشوف السيد ونحجيله
ثاني يوم راحو وقابلو السيد وكال ضموهه عدكم من تشكل حكومه سلموهه
اجه السيد وعمو تعبانين والجو حار فتحتلهم المبرده
صبيت غده تغدو ونامو للعصر اجت ام صلاح رحبت بيهه
_كل الهله بيج حجيه تفضلي
رحت سويت جاي كالت
_والله گلبي يوجعني على الولد من يطلعون لحد ما يرجعون مية حسبه تاخذني واجيبني
_لا توهسين ماكو شي الوضع احسن والهوسه خلصت
_ولج يا خلصت غير البارحه گتلو المختار يكولون هو الي يبلغ جان عن الشباب وكل الي انعدمو وتعذبو بسببه وحتى ابو رائد الحزبي شرد ولحكوه وكتلوه
_دخيلك يا علي
_يمه ماكو اخبار عن امج
_لا والله حجيه گلبي ماكلني عليهه وما اعرف شسوي
_ذاك اليوم اهلنه بناصريه مودين سايق بلكراج والحمدلله عرفنه همه بخير خلي عمج يروح للكراج بلكي يلكي طارش من اهل البصره
_اي والله خوش فكره وين جنتي
لليل كلت لعمو والسيد أيد الفكره والصبح راحو للكراج بس رجعو كالو كل اخبار من البصره ماكو الجسور مفلشه والوضع ماسأؤي
كمت من يمهم ومديت المصلايه وكمت ادعي من خاطري كون همه بخير وبسلامه ونذرت بس اسمع اخبارهم اسوي ثواب للامام الحسين عليه السلام
السيد كال
_مها اني اجرت بيت بمنطقه قبل السقوط بس اجاره غالي والعلويات هناك خليتهن خل نزوج ونستقر
_سيد مو وكتهه اولا الوضع مو تمام وامي ما اعرف اي شيء عنهم
ودوامي لسه ما مستقرين وما دازين علينه
_خلص اني اروح واشوف الوضع واذ رجع الاتصال اخابرج
_ههه وين ترجع سيد تره الوضع من سئ الى اسؤء
_لا انشالله الامور تنحل وتستقر
راح السيد ودزو علينه اخذنه رواتب بدولار وتعامل اهل السوك كله صار بدولار الامريكي
الدينار العراقي يساوي الدولار استلم منا واجهز لزواجي منا
اشتريت اجهزه كهربائيه وفراشات وذهب وملابس والسيد هم انطاني فلوس المهر ههه 400الف
اجه عمو كال
_ اكو ولد يشتغل سايق علبصره عرفت عنوانه كتبي رساله لامج بلكي الله يهديه
ركضت بسرعه كتبت وانطيته كتله فدوه عمو اروح وياك واتوسل بيه صدك خذانه اني والجهال رحنه دكينه الباب وطلع
عمو سلم عليه وانطاه الرساله والعنوان واني كتله
_خويه الله يطيك الصحه والعافيه بس كلي سالمين وما بيهم شي كلشي ما اريد
_انشالله خويه
بعد اسبوع اجانه الولد وجايب رساله منهم والحمد لله ما بيهم شي
رجع السيد يلح على موضوع الزواج وصرنه بشهر الثامن وقررنه نزوج ودزيت على امي والبنات
وكال ما اريد هوسه انروح للفندق ومناك نروح لبغداد امي وخواتي كالن نبقه بلامام وسويت حنه عزمنه الحبايب والجيران واجت العلويه ميسون والملالي اثنين وياهه وصارت الحنه تخبل الكل فرحان وعلى نياتكم ترزقون
اجه السيد بسياره مزخرفه ولابس قاط وطالع حلو
وصحبانه وياه يهوسون وكال لامي غطيهه من فوك لجوه
وفعلا فوك البدله البيضه عبايه وكامت الوادم ترمي وعمو سالم كام يرمي لان طلعت من بيته ورحنه لكربله واني فرحانه وخايفه بنفس الوقت
وصلنه اول ما صلينه وتعشينه كال راح اروح اشكر من سيدي ومولاي ابا الفضل العباس عليه السلام
كتله خل اروح وياك
_ولج انتي عروس ما يصير اطلعين
_فدوه سيد اروح
_كال بدلي وغسلي المكياج وخل نطلع نزور
هههه كمت اريد انزع البدله ما اكدر
صحت يمعود ساعدني
رحنه زرنه وصلينه ورجعنه ثاني يوم اجت امي للفندق وجايبه ريوك ودعتني وراحت
واحنه بقينه يومين ورجعنه لبغداد اول ما دخلنه اشو محد استقبلنه
_سيد وين العلويات ما يدرن بيك ازوجت
_لا يدرن بس هنه ما قابلات
_صدك تحجي
_هاي شبيج ما يكفي اني وياج تعالي سلمي على امي وصيحيه يمه
دخلت كلت السلام عليكم
اشو محد رد بس العلويه الجبيره كالت هله يمه
رحت بوستهه وكامت تمسح على ضهري
_يمه ديربالج على احسان تره هذا قطعه من روحي وانتي صرتي منه وبينه
كمت من يمهه وسلمت عليهن اشو من وره خشمهن سلمن
هو راح بدل وطلع يجيب مسواك واني دخلت الغرفه اشو كلشي ما بيهه لا كنتور ولا جربايه
بقيت صافنه وين اخلي الملابس وين نكعد بس فراش مال نفر وجودليه وتعلاكه مخلي ملابسه بيهن
فتحت الجنط وطلعت الخاولي ورحت للحمام اسبح
اعترضتلي اخته كالت
_مو تخلصين المي تره الليل كله سهرانين نترس
بلله هاي شجاوبهه كتله صار
وره نص ساعه اجه جايب مسواك لكاني امشط شبكني وباسني
كتله سيد وين غرفتي
_ها تدرين الوضع ما لحكت اجيب غرفه اخشاب بس خل احصل جم فلس اجيبلج احله غرفه
_وين اخلي الملابس
_وياي بتعلاكه تره جبيره وتكفي
والفراش سيد اثنينه بنفر
كام من مكانه وراح لامه واسمعه يتوسل بيهن ينطنه فراش
جاب جودليه ومخده وبطانيه خفيفه
كال ذني مؤقت بس يستدعل الوضع اجيبلج بوفيه واترسه فراشات
_انشالله
_كومي مها سويلنه اكل
_تره اني عروس والمفروض خواتك يكومن يعزلن المسواك ويسون غده
_فدوه مها اتحملي الخاطري هنه مشنجات تدرين كبار وما مزوجات وعمامي ضلموهن
كمت عزلت وضميت المسواك وكلشي ما اندل بلغراض كمت اربد كوه كليت بتيته وطمامه واجت العلويه الجبيره يمنه اكلنه ونمنه من التعب
ثاني يوم راح السيد لشغل واني كمت خدرت جاي وطكيت بيضه ما لكيت خبز
لبست عباتي وسالت كالو اكو فرن صمون رحت جبت واجيت اشو اخته امل كالت
_وين جنتي
_جبت صمون ما لكيت خبز عدكم
_اي غير اسالين تكولين لو عاجبج الخواره
_عيب علويه هذا الحجي ما مقبول انتم نايميين وبس العلويه كتله كالت ماكو وسويت ريوك الي والهه فماكو داعي لهذا الحجي تعديتهه ورحت
خليت الصينيه كدام ام السيد اخذت الجاي ولفه زغيره ورحت للغرفه كمت اسفط بلملابس الهي نفسي ونضفت الغرفة وغسلت ملابس السيد وسالت العلويه اذ عدهه ملابس وسخات اشو اخته كامت تهز بيدهه كالت
_لا تسوين روحج حنينه احنه موجودين وانداري امنه
استغفرت وضجت كلش
من رجع السيد بليل خطيه تعبان كتله الله يساعدك رحت جبتله لكمه اكل وغسل وكمنه نسولف ونضحك اجت امل للغرفه بدون مدك الباب صاحت احسان تعال اريد احجي وياك
كام وكالهه ما تعرفين ادكين الباب
_شبيج ما تكليلي
اليوم مرتك طلعت من الصبح علبو اجيب صمون وعايفه الباب مردود
بلله دخل حرامي ارهابي شنو وضعنه احنه ناس مستوره
طلعت على صوتهه متعجبه
_اولا اني لكيت العلويه الجبيره بدون ريوك وسويت بيض وجاي وما لكيت خبز وسالتهه كالت ما ادري
ثانيا بربج هيه هاي تسوه تحجيهه لخوج وتسوين مشكله
_كافي كافي مها دخلي بلغرفه يلله دخلت وطبكت الباب وكمت ابجي بعدني بلبدايه وشادات حيلهن اشلون تخلص
اكو مثل مصري ذكرته ،گت الحزبنه تفرح مالتلهاش مطرح .
هو هذا حضي واعرفه
رجع ضايج وينافخ دار وجهه وكال طفي الضوه
_سيد تره ما تسوه اختك هيج اسوي
_مها سدي الموضوع بعد لا اطلعين وحدج ولا تخلين الباب مفتوح بغداد اتخوف مو مثل المحافظات
دار وجهه ونام
كلش ضجت وكوه نمت من كد التفكير والقهر 😓
