رواية عيون المها الفصل السابع والعشرون بقلم ظل الياسمين
افهمني كما تشاء لكن..... اياك ان تحملني مشكلة سوء فهمك.
بقيت ابغداد اربع ايام كل يوم مشكله شكل حصره علينه نضحك تهجم علينه امل بدون مقدمات
خامس يوم كتله
_سيد فدوه اريد اروح للامام الكاظم عليه السلام
_ها باجر اجي من وكت واخذكم
_تاخذ منو غير احنه بعدنه عرسان بس اني وياك
_مها هاي شبيج انتي والعلويات
_ها بكيفك
ثاني يوم اجه الضهر ولبسنه وطلعنه
لبست عبايه وحجاب وادري بسيد ما يقبل اخلي مكياج بس خليت كحل
وطلعنه اخذنه تكسي للامام
بعدنه بلباب وصاحو وراه ولد اثنين قريب علينه كالوله قبل ما يطبون اهلك للامام خل يمسحون المكياج
اشو هذا اجه عليه وجرني نتر كال
_كم مره حذرتج ما تخلين مكياج
_هاي شبيك سيد والله ما مخليه
طلعت اكلنس من الجنطه ومسحت ولا قطره
رجع عليهم كالهم ما مخلين اهلي
جابو بنيه وهم اخذتني تمسح بوجهي رجعت كالتهم ما مخليه هيه وجهه هيج كالو لسيد زوجتك وجهه يجذب النضر لبسهه بوشيه
امل كالت
_بس اريد اعرف من يا زباله جبتهه
بقيت مصدومه وهو ولا نطق بحرف
درت وجهي الهه
_احترمي نفسج اني زباله
وجهت كلامي اله سيد عاجبك لتكوله
_كافي مها امشي زوري
مشيت وعفتهم والدموع عشره عشره
شبكت الامام وكمت اناشغ سيدي مولاي انته تعرف بحالي اشوكت ارتاح هاي عود اجمل ايام عمري وهيج كاعد يصير بيه
رجعت ميته قهر لكيت العلويه الجبيره كاعده اصلي اجيت يمهه اصلي واتعبد واقره قران
اجه السيد كال ترحين لسوك تشترين
كتله لا ما اريد شي
عرفني زعلانه وباجيه هواي كعد يمي وكال
_مها ليش انتي حساسه عبري تره الدنيه ما تمشي اذ نتحاسب على كل كلمه
_يعني اختك تكلك منين جبتهه من يا زباله وتسكت وما ادافعلي
_يعني تردين اتعارك وياهه بشارع خل تولي ولا تهتمين يا بعد عمري
_سيد لخاطرك هواي جاي اتحمل بس لصبر احدود ليش بس اشوفني اضحك اتموت مدري شيصير بيهه
_يلله كومي اوكلج موطه واشتريلج ملابس والترديه
رحنه بس اني كلش حزينه ومقهوره
جابلي كلبيه وشحاطه واشترالي موطه وكال يلله نصلي ونرجع لان الوضع مو زين .
رجعنه يمهن كال امه وين رحتو
كال اشترينه اشو امل كامت تنافخ وكامت اصيح يلله امشونه
السيد صار عصبي كال بعد ما اطلعجن وحدتجن جنهه رجال تنافخ وتزاكط ما ادري شبيجن
بقيت عشر ايام وكتله لازم اجيب نقلي واداوم هنا وانقل غراضي كال ميخالف خل ارتب وضعي واروح
صدك رجعنه ومن دخلنه ولايتي كانه رجع الهوه بصدري
وصلنه لبيت عمو وجنت ميته على جهال عمو بوستهم وخصوصا زنوبه حبيبتي صايره تخبل وتزحف
تغدينه واجه عمو رحب بينه واستاذنه ورحنه للبيت
_سيدفدوه خواتك ما رايداتني وما طايقات وجودي وبغداد هوسه وازدحامات خليني هنا وانته كل اسبوع تعال
_مها احنه متفقين وما اقبل اشلون اني احتاجج واحتاج وجودج لكمتي ملابسي اشلون
_باجر اقدم نقل وانته روح شوفلنه سياره ننقل الغراض
للعصر اجن ام صلاح وام علي تباركن وجايبات واجب واني كلش مقهوره ما اريد افارك ولايتي بس شسوي لازم اتحمل لخاطر السيد
جبت نقلي واستقرينه ابغداد
الوضع هناك من سئ الى اسؤء
كهرباء ماكو مي ماكو والدوام بعيد عن البيت سيارتين ويوميه من ارجع من الدوام لازم امل تنغص عيشتي
صرت اخبز واغسل الطارمه وانضف المطبخ واصلا الدوام تعب
طبعا السيد لا جاب غرفه ولا جاب حتى بوفيه اغراضي بكراتين كبار والغرفه ما تنقفل ابد ما يقبلن
يوميه ايكلي اتحملي 😓
مره كعدت تعبانه ولعبانه نفسي ودايخه
كتله اليوم اني مريضه كلش
_خلص امر على المديره اخذلج اجازه ارتاحي واذ كدرتي روحي للمستوصف
كمت دايخه سويت جاي وجبن اشو كلبت روحي كمت اتقئ
بقيت نايمه واحس بصخونه وجسمي يوجعني اجت امل ادك بلباب قوي
_اليوم عيوني نايمه المسعده اتريد نخدمهه
امهه تكله عوفيهه ما هي طيبه خطيه كامت تتقيئ
_كومي كومي يلله وراج خبز وطبخ
كمت الوجه اصفر وروحي رايحه
عجنت وكوه طبخت ساده خشمي
سالتني العلويه الجبيره
_اشوكت اخر مره غسلتي من العاده
حجيت بفرح ما ادري ههه تلمست بطني وضحكت صدك اصير ام رحمتك ربي
قطعت افكاري بصياح امل
كومي عيوني اليوم لا شغل ولا عمل علبو مريضه عبالج هاي كلاواتج تعبر عليه تقشمرين احسان وامي بيهن
عفتهه وكمت رحت للغرفه واني اتلمس بطني واتخيل شايله طفل
لبست ملابس وكلت للعلويه اريد اروح للمستوصف وراحت وياي اخت السيد الثانيه
من شافتني الدكتوره سوتلي تحليل حمل وطلع موجب
الف الحمد لله والشكر
رجعت فرحانه وحتى المرض نسيته
رجع السيد وبشرتهه امه
وصار يضحك وكام فرش مصلايه وسجد لله شكر
مرت الايام ومره اجه السيد من وكت وجايب عمو وياه تفاجئت
كال عمو مها اريد احجي وياج
كول عمو اكو شي
_مها اجه عمج حسون من الخارج ويطالب بيت جدج وشافه اماجر كام يريد الاجار مال سنوات
كناله ما صارله ست اشهر من اجرناه ومها الهه حصه وجانت خيريه كاعده بيه قرر يفلش بيتج وياخذه كله اله
كلش ضجت وانقهرت اذ ذبني الوكت وين اولي كتله
_اتفقو انطلع قسام شرعي وكلمن ياخذ حصته واني رحبت بلفكره وعدي كم فلس جامعتهن واخذلي عقار
امي انكطعت اخبارهه من زواجي وماكو تليفونات
اخذت اجازه شهر ورحت لبيت عمو ورحنه لسايق دزينه رساله لامي واجت هيه ورجلهه وبشرتهه بحملي كامت تهلهل والكل فرحان بيه
بس شغلة عمي طلعت لا على البال ولا على الخاطر
صارت كعده واجه هو ولده
التقيت بيه وحجيت وياه انسان مادي ومتعصب مثل خيريه
_اشلونج عمو مها انتي بت العزيز
_هله بيك عمو الحمدلله
_شوفي اني خيريه كالتلي عليج وحجتلي على اخلاقج بس اني هذا البيت اريده اسويه عماره والغرفه الي انتي مسويتهه لازم تتفلش
حجه عمو سالم وكاله هيه الهه حصه بيت جدهه
_هيه حفيده مو بته مالهه حصه واذ تريد حصه خل تاخذهه بلقانون وغير هذا الحجي ما عدي وخله وكام وثاني يوم طلع الموجرين وفلش الغرفه مالتي وبده يخطط
من سمعت انهاريت واني ما عدي ظهر وكلمن ملتهي بضيمه رجعت ويه السيد لبغداد بس منهاره ومنا حامل تمرضت وكعت بلفراش
بقيت اشهر مريضه ومالي خلك روحي الفلوس الجنت جامعتهن خليتهن بجنط ضميتهن ومن لكاهن السيد كال منين ذني كتله جمعتهن من راتبي كال
_خلي اشتغل بيهن بصيرفه وهنه مضمومات عدي اطلبيني
وفعلا اخذهن وضليت حسره عليه الفلس وكلما اكله يكول ما عدي ادفع ايجار ومسواك وفلوسي سيد
_ما عدي شتردين اسوين سوي
بقيت اكل بروحي ضميت الذهب بعيد عنه كلت كلشي ايصير
والمشاكل ما تخلص يوميه اطلابه هو مل منهه من كد ما يتعارك عبالك شريجتي مو حماتي
مره جاي اخبز واجت امل كالت
_مها عمج سالم ليش بسرعه ازوج من عمامي رفضوه
تعجبت منهه كتله
_غير ابن عمج هدده يسحله بلكرين والعلويه ما تاخذ الا سيد
_يعني ما عرف يوديلهم مشيه وناس اجاويد لو ما استاهل
_شوفي امل عمو سالم خوش ادمي لا مال مشاكل ولا طلايب وعمامج ايدورون طلايب وهو جان يريد يستقر وكلمن ياخذ قسمته ونصيبه
وانشالله تجيج احسن قسمه
كامت تعيط وتصيح تعيريني انتي ام الكذا والكذا
سكتت وعذرتهه وما كمت احجي لسيد لان ما بيده شي مل منهه وكلما احجي يكول اتحملي 😓 💔
بطني صارت جبيره ودخلنه 2004
والوضع الامني يخوف
كامو بليل ينطون حضر تجوال
صحتي بنازل والاكل قليل من اروح لبيت عمو اكل واتنفس وترد روحي
وصلنه لشهر التاسع وكلشي بيه امرم وكوه اكوم وبس ابجي اريد امي
اخذت اجازه وضع
ودزيت عمو ينطي خبر لامي بنهايه الشهر اجيب وفعلا اجت
وبقيت الليل كله اطلك وبس امي وياي السيد ما قبلو يدخلونه
وجه الصبح جبت ابني الجبير مصطفى
وكلش تعبت وصلت الموت والحمد لله طلعت بسلامه
ورادت امي اطلعني من المستشفى بس ردت اكوم انغمى عليه واحتارت بيه
