رواية سداد وبنت العرب الفصل السادس والعشرون بقلم الزهيريه
في هذه الحياة تجد الاعوج مرتاح
بينما المستقيم يأكل الضربات
الق/ طبعًا كارثه من تعيش ويه ناس لغتهم غير لغتك يعني التفاهم بينهم يصير شبه مستحيل هاي اذا چان الاختلاف فقط باللغه اما اذا چانت حتى القوميه هم والطامه الكبرى من يكون المقابيلك طائفي هاي چانت تقابلني بعائلة سداد طبعًا طائفيين بشكل وحتى سداد مثلهم على الرغم إنه يحاول يظهر غير واقعه
ومن اجتي ام سداد وضربتني على راسي في وقتها كلهم ماتوا من الضحك وأولهم سداد طبعًا من شفت سداد الى ذيچ الليله آني أبد ما شايفه سداد يضحك أبد بوقتها حسيت بروحي مضحكه گدامهم وانسحبت من الصاله ورحت للمطبخ گعدت ابچي من كل گلبي شلون صرت بموقف وهمه أسمعهم يحچون بس شنو يحچون ما أفهم ابد بس اسم آريا وهواي يتكرر ويمكن مر ساعه أو اكثر من أجى سداد للمطبخ
بوقتها صديت وجهي على ناحية الحايط حتى لا يشوفني ابچي وهو فتح الثلاجة ويگلي ورده ليش ما جبتي مي وهو رجع صد عليه
سداد/ شبيچ ورده شو صديتي وجهچ عني شنو زعلانه
الق/ بس اني أبد ما جاوبته على أساس ماخذه منه موقف لكون ضحك عليه وهو جر كرسي واجى گعد يمي بحيث صار كلش قريب عليه حتى عطره اشمه بقوه وأشعر بأنفاسه قريبه من إذني وصوته اويلي يا صوته احس كل شي بداخلي يجذبني لسداد اما دگات گلبي يمكن إذا يخلوني على جهاز مال يقيسون نبضات القلب والله الجهاز ما يقيس نبضات گلبي من يصير سداد قريب عليه
سداد/ شبيچ ورده اني زعلتي مني ترى والله انتي ضحكين يعني اذا شي ما فهمتي اسأليني واني اجاوبچ
ألق/صديت بوجهي عليه وجاوبته إنتوا لغتكم غير لغتي ما أفهم عليكم وكله تحچون كردي وأحس هاي ام دايه تكرهني
سداد مات من الضحك حتى عيونه گامت دمع وضربني بيده على چتفي وهو يگلي/ خرب عقلچ ولچ بابا أنتي شنو عيني كلمة دايه يعني بالعربي امي
وهاي كلمة أمي بالكردي اگلها دايه وأنتي من گلتي ست دايه يعني ست أمي فهمتي لهذا كلنه ضحكنه
والله هاي آول مره أضحك بعد وفاة ابني لو سألتني چان اني ترجمة كلمة دايه الچ ويله گومي ما أريد اشوفچ زعلانه وتبچين أبد فهمتي
ألق/ اني في وقتها من ضرب چتفي بيده لو احس برجفه بكل جسمي وبعدها گتله بالأخير گالت بنت لا سام ولا سلى شنو معناها
سداد/ معناها بنت لا صامت ولا صلت فهمتي هسه يا بنت الناس تحملي شويه امي كلها أيام وتروح يله گومي اخذي مي لصالة
ألق/ عافني سداد وگام راح لصاله وأني احس أطرافي كلها ترجف من لمسة ايده لچتفي واحس اريد أدخل سداد بگلبي وهاي المره من رحت لصاله خليت المي على الطبله ويطبهم مرض إلي يريد هو ياخذ بس نظرات ام سداد إلي مو طبيعيه أحسها تكرهني كره مو طبيعي بس غلست عليها
وبعد هاي الجلسه إلي فهمته من سردار من إجى عليه للمطبخ وبلغني انه هو وأمه مبلغين ام سداد بكل الصار ويه سداد مني ومن آريا وهو گلي احذري من خالتي ترى لسانها مو إلها لا تروح تگول لسداد عليچ وبنفس اللحظه انتي نلگاچ بالطب العدلي وهو بالسجن اني حذرتچ بعد وانتي بكيفچ شنو سوي وياچ خالتي دلفين اسكتي
الق/ ليش أستاذ سردار خالتك ام سداد اسمها دولفين
سردار مات من الضحك / دلفين مو دولفين انتي مثل عمچ نزار من سردار إلى بسمار اذا يسمعچ سداد او دولفين على قولچ تندمين
وبعد ما راحوا الضيوف بقت دولفين يمنه وهي صارت مسؤوله على الطبخ واني التنظيف وبعدها متت قهر من سداد ما اعرف وين واخذ يبرق وبعد ما رجعها وبعدها وقبل ما يروح للدوام من دى يطلع شفته لابس أسود وعلى زنده علم كردستان طالع يجنن وعطره ملأ جو البيت بس تحسه شلون المكسور نفسيته بس يداري على هذا الشي
وبعد ما راح ب 4 ايام اجتي وحده دگ بالباب وصيح اني طلعت فتحت الباب شو هاي دفعتني ودخلت بس شنو تجنن شنو من جمال ومن جسم وبيدها يبرق وظلت صيح وبعدها كسرت الجام بس العجيبه انه دولفين ما طلعت إلها وهاي گد ما حچت وعيطت والناس كلها التمت علينه تباوع عبالك عنده فلم بس من طلعت اكو واحد چان واگف وگال ان شاء الله كون يصير بيچ أكثر من هذا بس هي ما اهتمت لحچي الرجال وراحت
وأتصل دولفين على سردار وبلغته بكل شي وهو إجى شاف حالة البيت وتعاونه اني ويا ونظفنه الگراج والمطبخ من الحجار والجام المكسر وهو بلغني انه هاي تكون زوجة سداد انوب خلاني أموت بقهري يعني شنو زوجته ما ميته مثل گال سردار وبقيت أموت شلون لو رجعت زوجته زين وآني حتى ما إلي حق احچي
وبعدها إجى سداد يومين وراح هاي يومين أكثر الوقت ما موجود بالبيت وهو وعدني انه زوجة سردار جيبلي ملابس وهو ما كذب قبل يوم من دى يروح لدوامه بالليل من إجى جاب إلي ملابس صدگ حلوات وذوق زوجة سردار يجنن وراح سداد لدوامه
هنا ظهرت دولفين على حقيقتها وطلعتلي وجهه الثاني شوفتني نجوم الظهر لا اگدر أنام ولا آكل حتى الثلاجة تقفلها بمفتاح والمفتاح يمها حمدلله كل تغيير بحياتي ماكو خلصت من نزار ونضال وهاي اجتني دولفين وكله تگلي بنت لا سامت ولا سلت
على اساس همه الي يصلون شلون ملتزمين ومو بس هذا هي تصيحلي بنت المناهيل وهاي الكلمة ما فهمت شنو معناها وأنتظر سداد يجي يترجمها الي
وآني بالاوقات إلي متفرغه ودولفين ما صخرني وتخليني جوعانه أذكر أبويه واخويه هسه وين صفى بيهم الدهر أريد أحد يطمني عليهم بس ما معقوله أطلب هيچ طلب من سداد فكرت بسردار وطبعًا من تريد شخص أبد ما يجيك ومن ما تريده يجي هسه أريد سردار بس صار ما يجي أبد ومر تقريبًا 5 أيام على سداد من راح لدوامه ندگ ألباب وطبعًا اني في بيت سداد اني البواب مالتهم لان كل ما يندگ ألباب إطلع اني أفتحها
صار بوجهي واحد بيده دفتر ويا آريا زوجة سداد وهي ما حچت شي بس هذا الي بيده دفتر گال / بلا زحمه اني طالع كشف من المحكمه على البيت ممكن أدخل أجرد البيت
الق/ استأذنت منه أنه ابلغ ام البيت
واني سديت الباب بوجهم ودخلت على دولفين وبلغتها انه أكو كشف على البيت وهي بعد طلعت إلهم ودخلوا للبيت ودولفين كله تنام بغرفة سداد فوگ وآني أنام بغرفة الأطفال جوه وهذا آبو الكشف ما بقى شي من أثاث البيت ما سجله من أثاث الى فراش الى اجهزة كهربائية كلها وبعدها طلعوا هو وآريا ودولفين إتصلت على سداد وبلغته بكل شي
وبعد 3 أيام من الكشف بالليل چنت نايمه وحسيت على شخص نايم ورايه ويتحسس بجسمي
سداد/ طبعًا اي موقف يمر بي الأنسان يزيده وعي حتى ما يوگع بأخطاء الماضي واني بعد ضربتين براسي اجتني وحده من آريا وحده من بنيه بنت ليل خلت عقلي يكبر وينضج أكثر وصرت أكثر شي اكرها بحياتي النسوان وحلفت بعد ما أزوج ولا اتقرب على اي بنيه كعلاقه جنسيه أبد وصرت أكثر وحده اكرها بحياتي هي آريا ولا عبالك چنت بيوم أعشقها
وألي خبلني بيها انه گدام القاضي قبلت ترجع لبيت الطاعه وألي يضحك تگول للقاضي أريد أرجع لبيتي ولزوجي يعني هاي شلون واحد يتعامل وياها بيومها صدگت أعصابي إنهارت ورحت على فرقد للمركز بدون سابق انذار وهناك بلغوني إنه اليوم الضابط فرقد ما داوم
ومن رجعت للبيت اتصلت بي وهو اول ما جاوب عليه
گتله / سيدي تدري اليوم آريا قبلت ترجع لبيت الطاعه
بس هو خجلني بسلامه
فرقد/ عليكم السلام كاكا سداد هذا آول شي ثاني شي كاكا سداد اني من ورا قضيتك راح أستقيل من الداخليه كلها وأطلب لجوء خارج العراق كاكا سداد ترى هاي چانت مرتك وما أذكر أني زوجتها آلك ولا هي من طرفي بعد ليش تجي تشكي منها إلي شنو أني أمك وتجي تحچي يمي
سداد/ سيدي من اجي احچي يمك لإن اعرف راح تنصحني وأني اريد نصيحتك
فرقد/ كاكا ترى الموضوع واضح ما اعرف انت تحب تغطي الشمس بغربال زوجة حضرتك تركض وره الفلوس وهي عدها محامي نصحها آنه ترجع حتى لا تخسر حقها وتصير ناشز بابا هاي چلبه مال فلوس إياك وبالك من تجي تضربها لان اذا صار بيها آثر تگدر تجيب تقرير من المستشفى وتتهمك بشروع قتلها لا تنطيها هاي الفرصه أبد اكو مثل هواي يعجبني وآني نفسي مطبقه على هواي ناس زلم ونسوان وجاب إلي أفضل نتيجة ( والمثل يگول اذا تريد تعله أسكت وخله)
يعني من ترجع يمك شبعها تجاهل فلس أحمر لا تخلي بيدها وهي اذا طولت وياك شهر تعال عاتبني هذا الوضع ما يصرف إلها هي تريد فلوس لا اكثر وانت صرف طبيعي آكل البس اكشخ روح لدوامك يعني عيش حياتك وهاي فرصه تكون بنتك رجعت الك آني نصحتك بعد وانت حر
سداد/ قررت آخذ بنصيحة فرقد وأني أحاول بكل جهدي اتمالك أعصابي وبعدين اذكرت إني چنت وعدت ورده بملابس للعصر مريت على بيت خالتي مومه وانطيت لهلات زوجة سردار فلوس وتجيب ملابس لورده وظليت اني گاعد يم سردار بين ما راحت هي وخالتي يشترون ملابس لورده
وطبعًا النسوان بشراء الملابس مستحيل يرجعن بساعه وساعتين بقيت إلى تسعه بالليل يله اجن وسردار يضحك عليهن ويگلهن لو باقيات هناك وتعالن باچر ليش جايات من وكت
اني اخذت الغراض وطلعت وعفتهم يجادلون بينهم ورجعت للبيت ومن انطيت الملابس الها خطيه شلون الأطفال گبل راحت لبست منهن
ألق/ هاااا أستاذ سداد حلوات عليه
سداد/ يخبلن عليچ بالعافيه
وعفتها وضليت اگلب بالموبايل وانتبهت على ورده انه كل شويه تجي توگف گدام المرايه الموجوده بالحولي وتباوع على نفسها اخير شي سألتها
سداد/ اگلچ ورده شبيچ كل شويه تباوعين على نفسچ بالمرايه شنو آول مره تلبسين ملابس جديده
الق/ إي صح استاذ سداد هاي آول مره بحياتي أشوف ملابس جديده وألبسها
سداد/ ضحكت وشلون چنتي تلبسين ملابس قبل
ردت عليه بس بانكسار وقهر
الق/ عمري كله چنت ألبس من الناس الله يذكر جيرانه كونه چانت خطيه اسمها تفتر على الجوارين وتلم فضالة الناس من آكل ملابس
سداد/ هاي جوارينكم سفيرة النوايا هسه أنسي الماضي وعيشي حياتچ وافرحي بملابسچ ترى لحضات الفرح مو هوايه يا ريت يكون همنه من هاي الدنيا الملابس چان حياتنه صارت هينه
بوقتها صدگ انقهرت عليها خطيه الله اليعلم شلون چانت عايشه ورحت على دوامي وطبعًا اني من صارت مشكلة هاي بنت الليل إلي جبتها ويايه من أربيل شگد إتصل عليه اوزجان بس أبد ما رديت عليه وشگد وسط بيني وبينه من اصدقائنه ومن ضمنهم كوجر بس اني ما قبلت وقررت بعد ما احچي ويه اوزجان ومن أني بدوامي دخلوا عليه اصدقائي وچان وياهم أساس البله كوجر
كوجر/ سداد اليوم خميس يا ابن الناس وانت لا تقبل تسهر بملهى ليلي ولا تقبل تشرب هسه احنه عازميك على عشه وبعدها ناخذ نفسين نرگيله وفضت راحت ولا تحچي أبد وما نقبل منك آي عذر
سداد/ كوجر بداعة عيونك هاي الگعده ما بيها لا مشروب ونسوان
كوجر/ احلف بصحتي وعافيتي ماكو بس عشه ونرگيله
سداد/ وبالفعل رحت وياهم ودخلنه لبيت واحد من اصدقائنه وهو عازمنه ولأن زوجته في بيت اهلها هي واطفالهم وصح گعدنه سوالف هواي وصديقنه إلي احنه في بيته طلب من مطعم عشه وجابوا دليفري
واني چنت مدنگ وعيني بموبايلي وما حسيت غير واحد باسني من راسي وبس رفعت راسي صار بوجهي اوزجان وتخبلت ردت اضربه بس كوجر واصدقائنه صاروا بنصنه وكلها ظلت تحچي عليه على الشي صار وراح وتبقون تحچون بي وزعلان من صديقك وهو ما چان يدري بالغيب حتى يعرف شنو راح يصير ولا تخلي گلبك اسود على صاحبك
وبعد ما كلهم وظلوا يحچون يصالحنه آني واوزجان وگعدنه نتعشى وبعد العشه أتصلت بيه المحاميه سحر وبلغتني آنه الكشف طلع على بيتي وانه بقى نروح بعد على جلسة الباحثه الاجتماعيه وحتى بعدها يحكم القاضي ونسقط نفقة يبرق بكونها رجعت يمك وانطتني موعد الجلسة يم الباحثه بعد أسبوع تشكرت منها ونهيت الاتصال وياها وبعدها بقينه سهرانين على السوالف وصديقنه جاب النه نراگيل معمره بالعلچ والنعناع واني ما أدخن بس أحب النوگيله اخذت وحده وأول نفس سحبته گمت اگح وبقوه احس معدتي راح تطلع من حلگي
غير كون أتوب واعوفها لا بقيت آجر نفس وره نفس بس شنو أحس راسي صار يفتر وأحس الغرفه آلي اني بيها تفتر بيه وبعدها ما أعرف شنو الصار ما أعرف چنت نايم چنت مخدر ماكو تفسير للحاله ألي أني بيها
وما وعيت على نفسي غير اني في بيتي نايم على قنفه بالصاله نايم چفي على وجهي ومن حسيت على روحي أحس راسي ثگيل أريد أرفعه من المخده ما اگدر گوه أفتح عيوني
وبس رفعت راسي من المخده چانت امي موجوده قريب عليه گاعده وهي شافتني صحيت وظلت تحچي عليه على شبيك نايم ونگعد بيك ما تگعد هنا اخذني العجب اني چنت في بيت صديقي شنو جابني هنا ومنو جابني وليش كل شي ما جاي أذكر والعجبني أكثر من عرفت آنه الساعة حاليًا 8 بالليل يعني من الساعه ب 1 بالليل الى ثاني يوم الساعه 8 بالليل كل هذا الوقت چنت نايم معقوله ما اصدگ أبد گمت بس أحس جسمي مكسر گوه سحلت روحي ودخلت للحمام ونزعت ملابسي ووگفت جوه الدوش أريد بس اصحصح واجيب وافرك براسي وبوجهي
يله شويه صحصحت وغلقت الحنفيه ونشفت نفسي واذكرت أنه اني ما جايب ملابس إلي گلت ويه نفسي أرجع ألبس ملابسي نفسها وأصعد أبدل ملابسي فوگ
واخذت اللباس الداخلي وچنت أريد ألبسه بس نصدمت صدمه صحتني اكثر وهي اللباس بي بقع دم
