رواية عيون المها الفصل الثامن والعشرون بقلم ظل الياسمين
اعلى مراتب التوازن النفسي ...
هو عدم السعي لتصحيح سوء الضن بك
وضعي بلولاده جان كلش صعب صابني نزيف حاد ودخلت غيبوبه وره اسبوع كعدت لكيت اجهزه بكل مكان والضاهر طلعت بمعجزه
الحمد لله والشكر
التمو الاطباء والطبيبات تحمدولي بسلامه واجت امي تبجي كال
_يمه مها فدوه اروحلج 😭 اسويتي بيه ردت اموت عليج
_ههه اني وين وليش كل هاي الاجهزه
_ولج صار اسبوع انتي والميت سوه وحولوج للعنايه المركزه كلما يديرون بطل الدم تنزفيه كوه وقفو النزف
من الله وابو الجوادين عليه السلام
رحتله شايطه وطلبتج منه
للعصر اجه السيد وكعد يمي وكال
_حمد لله على السلامه اسويتي بينه دخلينه انذار والطفل طلع عنون وخلوه بلخدج
_فدوه سيد اريد اشوفه
_بس اصيرين زينه اخذج الاطباء كالو اليوم تحت المراقبه وباجر يحولوج ردهه ولج متت خوف عليج كمت اصلي وادعي ليل نهار وامج اكلت گلبي ههه تهددني بس تموتين اذبني سجن.... بس لا اني مغتصبج
_هههه گلب♥️والده اعذرهه تحجي مو من خاطرهه
_يلله مها كومي خل ناخذ ابنه ونروح للبيت كلش مشتاقلج والعلويه الجبيره كلساع تسال عليج
اجت الدكتوره وكتبتلي تحاليل كالت سووهن وكالت لازم تتغذين اهواي نزفتي وانتي مرضع خل يكون اكلج كله كبده وكرفس ولحوم ودجاج
وفاكهه .
ثاني يوم حولوني لردهه واجت نفس الدكتوره وشافت التحاليل كالت
_ما شاء الله هواي متحسنه الكل راهن على موتج بس الله اله بيهه حكمه وحمد لله على سلامتج باجر اطلعين خل يجيبون طفلج رضعيه
_فرحت امي والسيد واكفين يمي وامي تبوس بديه وتبجي
اخذو ورقه من الدكتوره وراحو جابو طفل كلش عنون اضن وزنه كيلوين
ولافينه بحظينه كعدوني وخلوه بحضني واني اضحك وفرحانه امي طلعت صدري وانطته وهو مغمض وكلساع يكرصوه وجهه اصفر جابوله حليب وشربوه مي وشكر
وهو ابد ما يبجي ودوه لطبيب اطفال وكال خامل بسبب ابو صفار رجعو للخدج
ثاني يوم طلعوني وراحت امي وياي للبيت ولكيت السيد فارشلي بلكاع امي مستغربه كالت
_هاي غرفتج مها وين اخشابج ليش يمه بلكاع
_يمه السيد ما عده وهو زين وياي مو مهم هاي الشكليات
_ما طول مرتاحه الله يسعدج قابل شريد منج
اجت العلويه ام السيد باستني وكعدت تسولف ويه امي
والعلويات ابد ما اجن ولا سلمن
كامت امي راحت لسوك وجابت انواع الاكل والفاكهه وكامت تشوي وتخلي كدامي
انحرجت وكلت لسيد يمعود عيب امي خطار فوك ما عايفه بيته وضاله علمودي تسوك وتجيب
_مها تره انتي بتهه يعني عادي
كلش ضجت ثاني يوم امي راحت للمستشفى جابت الطفل رجعت فتحت الثلاجه كلشي ما بيهه
تخبلت البارحه اسوكت وين راح
حاجت العلويه الجبيره
_علويه البارحه اسوكت لبتي والاطباء كالو لازم تتغذه نزفت دم هواي اشو ماكو المسواك
_ها البنات سون لاختهن غموس وراحن للامام للكاظم يشوفنهه واخذن وياهن الاكل
_صدك عود تحجين بتج الجبيره ما عرفت تجي اتشوف مرت اخوهه والبت طلعت من حلك الموت والعلويات ماخذات اكلهه ورايحات بلله هسه شسوي الهه
_شنو السالفه نمونه هسه يجي السيد ويجيب وياه
_والبت نفسه ننتظر السيد
امي كلش انقهرت لا مستحه ولا خجل اني وكفه ما اكدر اوكف والدوخه ملازمتني
امي غسلت الطفل وحضرت الحمام الي وغسلتلي وفرشت فراش نضيف اخذته منهن وكامت اتنزل وتخلي بلغرفه ههه
طلعت لراس الشارع جابت نفر كباب
وكالت اكلي لحد ما اشبعين
وكلت طمامه الهه وصاحت العلويه
للعصر اجه السيد والعلويات
اضن جانو سوه دخلو يضحكون
امي كالت
_يمه سيد مها بعدهي رجيجه واني جبتلهه لحيمه ودجاجات كلت يوميه اسوي شويه لكيتهن ماكو
اذ العلويات ماخذاتهن الف عافيه بس غير المفروض استاذان
_حقج يمه واني لكتلهم ام مها ما تكول شي سوينه ثواب بيهن لان ام عادل اختي الجبيره ورجلهه راحو للامام الكاظم عليه السلام
واخذونه وياهم كلت عيب نروح فارغين خلي نسويلنه ثواب
امي سكتت بس اشوفهه كلش انقهرت
_سيد اشو العلويات لا سلمن على مها ولا اجن شافن الجاهل
_ها مو طلعنه من الصبح ورجعنه تعبانين يجوز باجر يجن
_سيد روح لراس الشارع جيب معلاك ومشاوي خل البت تكوم على حيلهه
راح السيد وما رجع صارت بلعشره وهو ماكو
امي كامت سوت طماطه وبيض وجابته وكامت ادردم عليهم
شنو من ناس لا ذمه ولا ضمير البت جابتلهم ولد المفروض يشيلوهه بصلوات بس منين تلكاهه هاي المكروده اشو حتى الرجل مدري شبيه
مر اسبوع وامي تصرف والعلويات ابد ما اجن للغرفه هاي عود احنه ابيت واحد هههه
صرت اشوية احسن واجه عمو اسماعيل زوج امي
شاف الطفل ووجبني وامي راحت وياه
صدك هلمره بجيت وحسيت اريدهه
كوه اكوم وكوه اكعد
احتاجيت احد يعيني السيد يطلع الصبح يرجع بليل علبو يشتغل واني كلشي ما محصله منه
كمت اقوي نفسي بلاكل الي امي جابته وضمته الي فاكهه وعصاير ونساتل وطبقه بيض مخليتهن بلغرفه ويوميه اوصي السيد يمعود جيب يكول ما عدي
مر شهر واني لا بيه اكوم ولا اكدر ارضع كتلني الجوع وحسره عليه الخبزه ومحد بحالي
تقويت وكمت اعجن واخبز ومن ادوخ اطفي النار
وصيت جاهل بشارع يجيبلي مسواك
وفعلا جاب ومن اجه السيد وشاف عدي اكل تخبل
منيلج ومنو جابه
عفته ودرت وجهي واخذت العلاج ورضعت ابني ونمت
بقه يومين زعلان ما يسال عليه واني كلش مقهوره منه ومن خواته اسمعهن يطبخن ويضحكن واني نفسه ما يكولن هاي خطيه
الحمدلله اشويه اشويه صرت احسن وكمت على حيلي
_اجت ام عادل اخت السيد شافتني اغسل ملابسي وملابس الجاهل كالت
_اشلونج مها انشالله زينه
_الحمد لله
_اشو من وره خشمج تسلمين
_لا عيوني قابل شعدي وياج
خلت وراحت وذنيج ابد ما سلمن ولا الهن علاقه فديوم سويت اكل ودخلت اكلنه اني والسيد وطلعت الصينيه خليته على الكاونتر واسمع الجاهل يبجي ركضت وعفت الصينيه وما نسمع اله امل تصيح
_احسااااااان مرتك الجايفه عايفه اماعينهه تريدنه احنه نغسلهن
وكامت اتشيل وتركع
كام من مكانه وطلع
_اخبال لخبلج ليش تعيطين ابنه بجه
جاي ترضع بيه
_بس كلي شمسويتلك ولك لاطمتك بسحر وهيج ادافعلهه
_دكافي كافي ما تملين من المشاكل المره مريضه براحته تغسل عرفتي
رجع للغرفه كال كومي نضفي هاي المخبله طشرت الغراض
رحت واشوف الماعين مكسره والمطبخ هرج ومرج من وراهه
الم بلكزاز واتحسب
لو من ضلعهه جان ما كسرت ماعون
بدت كلش تتماده وتعيط لاتفه الاسباب
والسيد يكول عوفيهه خطيه مضغوطه نفسيا
مره اجو خطار الهم كرايبهم ردت اسمع هوسه وناس والسيد رجع من الشغل من وقت
الطفل كام يبجي كمت اريد اغسل الممه افتح بليده ما تنفتح مقفوله
احنه اول ما ازوجنه ماكو مفتاح ليش هسه مقفول ومنو قفل عليه الباب كمت ادك بلباب
صاحت امل
_هسه العالم تطلع ونفتحلج الباب
_كمت اصيح سيد افتح ابني جوعان كمت ادك قوي ماكو
راحت الهوسه واسمع القفل انفتح
طلعت اركض اغسل الممه والطفل يضرخ واشوف الكل يضحك
صحت الله اكبر
انتم من يا مله من يا دين اااااالله اكبر
كام السيد ها مها اشبيج
_شبيه قافلين الباب والطفل فرفح گلبه من الجوع بساعتين واني ادك بلباب
_منو قافله صاح ااااامل ليش ولج قافله عليهم
_مو اني وهاي اكبر جذابه محد مدني يمهه ولا احد واصل يمهه
_انتي ما تحافين الله بلله اني تكرهيني الطفل شنو ذنبه
كامت تهد عليه
_انتي حيه ركطه اااااحلفي احنه قافلين عليج الباب ام السحوره الدايحه الي يوم وياج
اشوف السيد يهز بيده ولا يحرك ساكن دخلت للغرفه ارجف من القهر
تحسبت عليه واخذت ابني بحضني وكمت ابجي
اشكد حاول يحجي وياي انطيته الاذن الطرشه
اخذ فراشه وراح يم امه واسمعه يضحك ويسولف
ثاني يوم كعدت من الصبح توضيت وصليت ويدلت لصفاوي واسمعهم يحضرون لطلعه وهو يستعجلهم
_هم يلله نلحك ورانه هواي شغلات
استغفرت وكمت رحت اقره قران ودعاء
وره ساعه البيت فرغ الكل طالع استغليت الفرصه وكمت عجنت وطلعت جبت كم حاجه من المحل القريب علينه ونضفت غرفتي وغسلت ملابس وسبحت كلت خلي اصالح السيد
رجعو العصر والسيد وياهم دخل يبدل شافني ضحك
_شبكته وكتله لا تعوفني
_ولج انتي صرتي مخبله مثلهن هههه
_لا بلعكس عقلي يوزن بلد بس شسوي للمايقدر
دخل سبح واجه يمنه كام يلعب ويه صفاوي كلت خلي استوجبه
_اكلك سيد منو ذول العالم الجانو عدكم قبل يومين
_ها ذول كرايبنه وجايين يفكون النهوه مني لان اني نهيت على بناتهم وخطبو العلويه الزغيره على شرج
وهنه موافقات
_وليش عود ما يردني اسمع
_يخافن من السحر ههه
_اي يجوز اني ميساء الساحره واسوي للوادم سحوره
_هههه هاي شبيج مها ذني اعقولهن فارغه وانتي عاقله ما تشوفين يغارن منج
_لا تقشسمرني بجم احجايه وانته طابك وياهن وين ما يردن تاخذهن والضحك والسوالف
_عمي تردين اقشمرج بشكد واذ على الضحك اليوم لصبح اضحك وياج
اشوف خيال واكف بلباب كمت فتحت الباب لكيت امل تتصنت كامت اصيح اااااحسان هاي مرتك ضربتني
كام على حيله واني ضليت متصنمه بمكاني
درت وجهي وردت ادخل واشوفهه اشلون تمثل وتبجي وتكله ضربتني على راسي وراشدي
دفعني حيل للغرفه وسدهه
_ليش مها اضربيهه
_سيد وداعتك وداعت ابني ما لمستهه تره صارت الحياة وياهه شبه مستحيله
نغصت عيشتنه بسوالفهه يوميه فلم ويوميه طلابه
عرست اخت السيد الزغيره والي اخذهه سيد مزوج وعده جهال بلعرب
وعمو سالم من يسوك من الشورجه يمر علينه كال
_مها ام صلاح مريضه وصتني اكلج تريد اشوفج
_صدك عمو اشبيه شنو اليوجعه
ما نعرف اشبيهه المره جنه ورده بساع ذبلت وكعت بلفراش كله متحسفه عليه
اجه السيد وكتله اروح ويه عمو
بات يمنه عمو وثاني يوم طلعنه من غبشه وي ما وصلنه لكينه جادر منصوب 😓💔
