رواية خطايا واجتثاث الفصل الثامن والعشرون 28 بقلم نور البصري

‏ماتنحجي وتنكال سالفتي زحمة

ذبني الوكت يم ناس ماعدهم رحمة 

ـــــــــــــــــــــــــــღــــــــــــــــــــــــــ

    

        مــــــــــــــ♡ــــــــــــاجدة

باوعت لـماجد.. بخوف وجهه جان يضحك بفرحة واحد راجع لأهله وما يدري بالمصيبة المضمومة ورى ظهره.. 

لزمنا إحنا الاثنين وحضنا بحب ولهفة بس آني جنت أحس بجسمي كله يرجف و رحـمة.. جانت بين إيديه مثل العصفور المذبوح فاقدة كل قوتها

​ثواني وشمرت رحـمة.. نفسها بحضن أخوها بكل ما عدها من حيل وبدت تبچي بنحيب يگطع القلب جان بجيها مو مجرد دموع جان بجيها استنجاد صامت و صرخة مكتومة خايفة.. 

​مـاجد بحنان.. 

: لا تبجين شبيها مدللـة أخوها منو وياج؟

​ورجع باوعلي مرة ومرة باوع لأمه وهو يسأل بحيرة.. 

: شبيها يمة؟

​أمه ردت بجفاء وهي عبالها السالفة لعب بنات.. 

: يعني شبيها لا دراسة ولا فهم فرفرة ولعب هي ومرتك.. 

​هنا بساع حجيت ردت أغطي على رحـمة.. قبل لا تنكشف.. 

لا والله بيدي أخذها لمـريم.. تدرس بس هي متوترة من الأمتحانات..

​أمه قاطعتني بحدة..

: مو سجلناها بمعهد تقوية شهر وتركته.. 

(جان دورات للمكملين مجانية)

​آني رديت بلهفة.. 

: ترجع وقت متأخر وأخاف عليها ما أنسى وصيتني أهتم بيها لذا فضلت تدرسها مـريم.. آمن.. 

أبتسم مـاجد.. وباس رأسي ميدري آني جاي أحاول ألملم شتات رحـمة.. و أغطي لأن أدري بأهلها ذولة ماعدهم تفاهم كبل ذبح 

غمضت عيوني بوجع و أحس الوضع خطير و ما عندي حل بقى بس حـارث يتقبلها مثل ما هي ويسفرها بس هذا أملي.. 

باوعتله وهو يمسح دموع أخته اللي جانت تبرر بجيها بالاشتياق بس هي بالحقيقة جاي تودع روحها.. 

طلع مـاجد.. يم أهله وبقيت بس آني ورحـمة.. هنا هي أنفجرت بوجهي بوجع وحرگة.. 

: أريد حل لوضعي مـاجدة.. تدمرت حياتي بسببج شجابج إلنا شعرفنا بيج؟

​الكلمات جانت مثل السجاجين زين شنو ذنبي.. آني هم ضحية لهالعائلة المشؤومة أستمرت تذب حجيها المسموم بسبب قهرها..

: جنت دوم أطلع وياج و تأخذيني لو ما تأخذيني ما اندليت بيت أبوج ولا رحت ولج من گالج باجر أجي عليج ليش عاندتي.. و آني الصرت مكانج ضحيتج.. 

: أنتِ ما تسمعين كلام ألمن طلعتي ها مو متفقين آني اجيبج وأوديج بس أنتِ الظاهر عاجبج الوضع.. 

هجمت علي ضربتني راشدي وأتهمتني هو آني عايزة تهم يشهد الله حاولت ابعدها بس هي ما سمعت نصايحي ولا أخذت بكلامي.. 

أكيد تطلع تقابل حـارث.. ومناك لكفها لـؤي.. وسوى السواه و زرع بعقلها لو مـاجدة.. طاعتني أنتِ بالسليم بس أنتِ بديل.. 

​طلعت من غرفتها افرك خدي متحملت التهم.. الحقيقة جانت خنكة لـؤي.. اللعين أنتقم مني برحـمة.. 

​خابرت بيت جدي بلغتهم لا يظل بالهم علي لأن مـاجد.. رجع وباجر أجي أخذ أغراضي.. 

رجعنا كعدنا يم أهله وعيني على رحـمة.. اللي كل شوي تحضن أخوها وتبجي جانت تريد تصرخ بوجهي أبوج دمرني بس لـؤي.. هددها بأهلها هددها بدمها.. 

​إنتقام لـؤي.. الساحق وتدميره لنسل هـديل.. راح ضحيته رحـمة.. البريئة ذنبها بس لأن حبت حـارث.. وذنبها آني... 

ياربي حـارث.. شنو موقفه لو عرف يسترها؟ لو يتخلى عنها ويخلي السجين توصل لركبتها؟

​الكل فرحان بمـاجد إلا آني ورحـمة.. حسبات تودينا وحسبات تجيبنا نمثل الفرح وبداخلنا مأتم هي تحضن أخوها وتشهك هو يضحك عباله حب ميعرف جاي تشكيله من ظلم لـؤي..

اللي واكف يبتسم بظلام عقلنا حتى و أحنا بين ناسنا وأهلنا شيطان أستحوذ على أرواحنا ودنسها..

​​صارت الساعة 12 مـاجد.. لزم إيدي بلهفة المشتاق.. 

: يله ننام.. 

​أمه كامت بعتب.. 

: ليش يمة ما ناوي تنام يمنا؟

​ظل محتار بس أبوه حسمها بنظرة غامضة.. 

: عوفي الولد يرتاح ببيته وتعاي أريد أحاجيج عن الشغل الجديد.. 

​طلعت وياه و آني أحس خطواتي ثگيلة أبوه يباوعلي بنظرة أحتقار وكره وحقد كأنه يگولي الله يأخذج وجه النحس.. 

عاد من صعدنا فتح باب مشتملنا وشالني بلهفة عيونة جانت تلمع بشوگ الأشهر اللي غابهن بوسط الوطن.. 

: مشتاقلج هواي مـاجدة.. 

​أول شي انحرجت أحس روحي غريبة الوجع اللي انزرع بصدري بفترة غيابه غير ملامح گلبي بس هو ضحك 

وگال.. 

: ها استحت مجودة.. تستحين مني شنو ههه.. 

ضحك وسحبني لغرفتنا جان يريد يطوي صفحة الفراق و آني جنت أريد بس أنسى.. أنسى لـؤي.. والخوف داخلي من خطوته الجاية بدمار منو؟! وأنسى نار رحـمة.. وأنسى ذنبي اللي ملاحقني بس هيهات أنسى.. 

​

: مو هيج ماجد..

: لعد شلون؟ تردين هيج.. 

وضحك ضحكة ردت بيا الروح بس الفجر جان يطرد كل وهم ويرجعني لواقعي المر ​كعدت الفجر لكيته سابح ويصلي واكف بين إيدين الله يحمد ويشكر على رجعته وسلامته..

خليت إيدي على عيوني و آني أحس بغصة تخنگني ياربي هذول ناس بسطاء گلبهم أبيض وما بيهم أذيةشلون راح يكون موقفهم من بتهم؟

​غمضت عيوني بحرگه الله يشهد حاولت أنقذها بس فشلت أمام نذالة أبوي لـؤي..

أحس بخطيتها برگبتي كأنو كل دمعة تنزل من عينها هي حوبة راح تلاحقني 

دخولي لحياتهم جان السبب بس والله ما أكدر أعوف مـاجد.. هو النفس البقالي بهالدنيا.. 

​شلون تنحل ياربي وصلت المواصيل بيه أفكر أدورلي رمز من رموز البلد شخص واصل أروح وأشتكيله 

بس هو منو راح يسمعني يعاقب واحد من رجال الأمن عنده لخاطر بنية مكسورة ضحكت على روحي بقهر منو يوصلني لكبارية البلد إذا كل الأجهزة المحيطة بيهم فاسدة وشلون أتحرك ومـاجد ما يحس؟

​سكتت وتركتها لرب العالمين بس شلون أسكت وحياة بنت تدمرت وعلى أي ساعة تنكشف وتروح بالرجلين.. 

​مر الشهر الأخير من العطلة ثگيل أثگل من جبل الأيام تمر ببطئ والقلق أستحوذ على قلوبنا والخوف تجانس حتى وي طكطكة العظام توتر رحـمة.. و ذبولها ومرضها اللي ميفارقها خلى مـاجد.. ياكله القلق.. 

: مـاجدة.. من رجعت رحـمة البشوشة بس تبجي متعرفين شبيها أختي أنتِ مقربة منها وأكيد ما تظم عليج شي.. 

​انعقد لساني شگوله أگوله لـؤي.. دمر أختك بالـ 3 أشهر اللي عفتنا بيها خفت يتهور و ذول حكومة ميرحمون.. 

مـاجد.. رجع يشتغل بالسوگ بملابس البالات لأن المزارع ما بيها وارد وكل الحصله ضمه مصاريفنا للدوام 

جان يحلم يلملم كم فلس يفتح محل مستقل للملابس بس مصارت.. 

قبل جانت أمي تجهزني هسة لازم أتأقلم على كد مـاجد وعيشته ​قبل لا يرجع الظهر نزلت لرحـمة.. جانت بالغرفة متكومة على روحها وتبجي بكسرة أول ما شافتني انفجرت وصاحت بوجع.. 

: الله ينتقم منج شجابج علينا شوفي مـاجدة.. تركينا إذا ما تتركينا أبوج يدمر هاي العائلة و مـاجد.. يروح بالرجلين و أنتِ ما تقبلينها.. 

​جنت أسمع اغلاطها و آني ساكتة عاذرتها حقها بسببي تأذت وبسبب نذالة أبوي خسرت كلشي بس شسوي وأبوي شيطان.. 

خليت أيدي على عيوني أبجي أكول رحـمة.. خطيئة من خطاياي لو ما دخولي بيتهم ما عرفهم لـؤي.. ولا دمرها.. 

الغصة داخلي صارت اسمها رحـمة.. يارب شلون أحلها يارب ساعدني

ظليت واكفة وآني أحاول اهدأها  

الصياح ما راح يجيب نتيجة بس هي غدرتني كامت فجأة هدت علي ولزمت شعري حيل عيونها جانت تجدح نار وقهر.. 

: شسوي بيج دمرني أبوج.. ما يلام حـارث.. من گال من صغرج أنتِ گصة فكر و نحس والله أخوج يكول فطنت على الحياة وهاي فاكرتنا.. أنتِ وأبوج دمرتوا عائلة حـارث.. وراح تدمرون عائلتي.. 

​بجت وهي تدگ على وجهها وراسها بهستيريا:

: والله أحرك روحي أحسن وذنبي بركبتج أنتِ وعشيرتج كلها مو بس أبوج عوفينا طلبي الطلاق بس هذا الحل حتى أبوج يعوفنا بحالنا.. 

​رديت عليها وصوتي يرجف

ما راح يعوفج رحـمة.. والا جان عاف رنا.. وجهالها جدي خابر وگال عاركة وصاير يهدد ياخذهم بالقوة عبالج إذا رحت يمه يعوفج لا.. 

أصلاً راح يستغل وضعج ويهددج وتلبين الهم شيريدون المدرسة جاية وراح يخلوج جاسوسة على الطالبات وراح تنكسر رگابي من وراج راح تتحمل روحج خطايا إجتثاث زميلاتج 

من غير متحسين تلكين نفسج تنفذين غايتهم راح روحج تتلوث وتصيرين عمرج كله تكولين ياريت ماطلعت وبقيت بالبيت.. 

ثقي قبلج استغل حنيني اله كأب قبلج انخدعت وصرت أداة إنتقامه وراحت بيها ناس وحتى خوال صاحبتي ما سلموا.. 

​مسحت دموعي وكملت بحرگه گلب :

: ما أخذتي نصيحتي لا تطلعين جنت ناوية أبلغ حـارث.. يستعجل يخطبج وتطلعين ما سمعتي كلامي وبقيتي بالبيت لمن أدبر وضعج لا لـؤي.. غشيم وأتحايل عليه وأكسب وقت جان أسرع منا ملحكت.. 

​باوعتلي بكسرة وقهر.. 

: و حـارث.. يقبل يحاجيج يأم طلايب أنتِ.. 

: يحاجيني لأجل إنقاذج وراها خلي يرجع يقاطعني عود المهم تخلصين.. 

​غمضت رحـمة.. عيونها وحجت بصوت ميت.. 

: آخر مرة رحت و انطيته التسجيلات واحد وياهم بس الظاهر يردون يوكعوه علموني شلون أوكعه بالكلام وأسجله..

خلت إيديها على وجهها ورجفت..

: أكيد عدموه..

​بسرعة گلتلها و آني أحاول أقويها.. 

: وحاسة بذنب؟ ولج جلب مثلهم ناس تصفي ناس هم شايفة مظلوم يحظر جلسه شرب ونسوان بس إحنا اللي مظلومين صرنا بنصهم إحنا اللي جاي ندفع الثمن من صيتنا وسترنا.. 

رفعت راسها وباوعتلي بعيون غاركة بالعتب والكسرة جانت نظراتها مثل السجاجين تگطع بگلبي گالت بصوت مخنوگ وكلمات طالعة بطلوع الروح:

: أنتِ منين مظلومة ولج أنتِ ساس البلا و أصل المشاكل لو ما وجودج بحياتنا جان عشنا بستر الله وهسة؟ 

يهددني بمـاجد ولج هو شبقالنا غيره؟ كافي اخواني اللي راحوا بغياهب السجون ببدايات التسعينات وما شمينا ريحتهم بعد.. 

​سكتت لحظة ونفسها صار عالي ومضطرب كملت وهي تلوح بإيدها ببيأس.. 

​

: زواجكم هذا أكبر غلط سويتي يا مـاجدة.. صار من ورى ظهره وبدون علمه أنتِ من عائلة واصلة و احنا ناس بسطاء نصنا معدومين ونص مطاردين جمر وثلج يا مـاجدة.. شلون ردتيهن ينجمعن؟​نزلت رأسي والدموع بدت تحفر بخدي همست بصوت يرجف.. 

​

: ماكو حل لازم نهرب نطلع من هالبلد من هالظلم بس منو يهربنا بابا سـهيل ومات أكيد جدي بس منو يقنع مـاجد.. وشنو الاسباب.. 

​ردت عليه بحدة وصوت رج المكان من القهر.. 

: شنو نهرب ليش ما يلكونه وننقتل كلنا.. 

: ماكو حل الا هذا او اطلع من حياتكم.. 

هنا ردت بعنف وبقوة

: اي طلعي من حياتنا طلعي هو غايته أنتِ بيوم الجنت يمهم سكران هو و صاحبه لوثوني بفسادهم وصل لمركزه وسوى المستحيل حتى ينتقم من امج

زين ليش دينتقم منج وهو جان دوم يتمناج مثل ما سولفتيلي مرة يبجي دم بس حتى يشوفج وهم مانعيه..

دنكت : ما اعرف الا هو إنسان مريض كلامه ما موزون..  

تركت رحـمة تتخبط بمصيبتها و آني انقطعت الحلول كلها عندي وما أعرف شنو أسوي من شهر هدوء ومختفي 

كل العرفته بسفر للشمال بس الى متى باجر يرجع باجر ترجع الأذيه وراه

داومنا و التهيت عن التفكير بلؤي و خطواته الجايه اما مـاجد.. التهى وي شلته ظليت أداوم وسط معمعة حياة مهددة و مصير مجهول و آني أقاوم وأحاول أحصل لقاء وي حـارث.. بس رفض يشوفني حتى بلغت رحـمة.. لازم التقي بي.. 

وكالعادة صايرة متحترم وتحملني مسؤولية رغم حذرتها ومنعتها تطلع

و بيوم أجت من المدرسة جنت أنظف درج الصاعد للمشتمل باوعتلي نزلتني جرتني وراها كلت خير يا ستار دخلنا غرفتها..

رحـمة : آني صرت آداة وجاسوس الهم و الفضل إلج يا مـاجدة.. تدرين اليوم آني شسويت..؟

بخوف كتلها 

: شسويتي..؟! 

سكتت من الباب انفتح ومـاجد..دخل 

: وينج شبيكم فزيتم؟ 

رديت بتوتر وصوت يرجف 

: الله تجفت جفت غير تدك الباب

ردت رحـمة.. ببرود هادئ عبالك مدربة على السيطرة على مشاعرها

: خوية بله دابدل استحي ترى تجفت دك الباب.. 

استحى واعتذر 

اي فعلا صح آسف بس أستغربت من جريتي مـاجدة.. وركضتن كلت صاير شي.. 

رديت : لا ماكو شي بس تريد اقنعك نروح للسوك نريد أغراض..

انحرج : أجلنها لمن يحاسبني صاحب الشغل..

: اكول لبابا.. 

: قابل يصرف على مرتي الله ليعوزها لأبوج يصير عندي وانطيجن طلعة اليوم ماكو وأنتِ تطلعين تشترين أبوي ينطيج بس هاي خوما تباوعلج لا خوية خلي يصير عندي تدللن.. 

خلا وطلع لزمتها من زندها 

: يله أحجي شمفينة.. 

ضغطت حيل على زندها نترت أيدي وطلعت عافتني وحدي بالغرفة تعلن التمرد متحجي يا خوفي خلوج تعلسين ربيعاتج وتدمريهن وياج.. 

تبعتها للمطبخ مموجود أحد بس فضائل.. طلعت منه وكالعادة غمتني تعودت عمي ستر الله عالغم بس هاي الزغيرة شلون أركع مصايبها..

: أسمعج؟! 

باوعتلي وكالت.. 

كل شي أسويه بذمتج وبحظج وبختج من وراج تورطت بطريق ما منه رجعه 

من فترة تصير حالة بالمدرسة نلكى على رحلات الصف كل رحلة جكليته نفتحها ملفوف داخلها على الحلوة مالتها ورقة صغيرة وبيها دعاء ونذر ولازم أنذر النذر هذا وأوزعه على ثلاثين شخص محد يعرف منو وهنا دوري اجيبلهم منو اللي دتنشر منشورات بواسطة الجكليت اليوم عرفتها فاطمة صديقتي انطيت أسمها محسيت الا مفرزة أخذو فاطمة.. 

وسعت عيني ولزمتها أكتل بيها.. 

: شسويتي ضيعتي بنية دمرتيها وتجين ببرود تكولين شتسوين من مهمات يكلفنج ياها تكسير بخت بنات العالم بذمتي ولج آني؟ كايلتلج موديتج؟

لزمتني هي من شعري و آني لازمتها هم وتعاركنا بس شفت أمها بالممر همست

: أمج حتجي وخري..

وخرت عني وهي تعدل بملابسها شوي ركضت تقيأت بالسنك أمها او مرت أبوها.. 

: صخام وين زوعتي شني لعبان نفس بالسنك.. 

وجرتها توخرها وهي ترزل لأن تقيأت بالسنك حسب منطوقها ولهجتها تكول زوعت أول مفهمت دتغلط لو تحجي الحالة الصارت.. 

عفتهم وصعدت فوك محتارة بزماني

وهاي الأيام مستمرة ويوم على يوم أفقد سيطرتي على رحـمة.. وعلى إنقاذ رحـمة.. 

بيوم رحت للجامعة وحدي لأن مـاجد كال لازم أستلم اكياس البالات وافرزها هذا رزقنا شسوي أنتِ روحي حضري أول محاضرتين عود أنقلهن منج.. 

هزيت رأسي بـ أي.. وطلعت صرت أي سيارة برازيلي زركه انز واظل اتراجف رجع لـؤي.. رجعت المصايب بس آجر نفس من يطلع مو هو مجرد سيارة نفس سيارته ومرت.. 

بوسط هالمعمعة تبين عندي حمل هذا الطفل اللي ببطني صار قيد جديد وأزمة فوگ كل أزماتي جنت أمشي بالجامعة وعقلي مو وياي أفكر.. 

معقولة الدولة متدري بربعها شيسوون بالناس معقولة ماكو كبير أشتكيله؟

رجعت افكر أنو التجأ لكبار الدولة أدبر لقاء رمز من رموزها بلكت يخلصني ويشكيني ويرأف بحالتي و يأخذلي حق رحـمة.. 

بس ​فجأة گطعت حبل أفكاري مـريم.. وهي توگف گبالي:

​

: شلونج مـاجدة.. تدرين سـؤدد.. أختفت كلش قلقة عليها ناس تكول أعتقلوهم ومرجعو الله يعلم شحالها وناس كالو هربوا... 

حيل أنقهرت وزاد همي منو غيره وراى الديصير ​ظلت تحوس و بوجهه حجي آخر شي حجت بفضول:

: مـاجدة.. صدك الحجي اللي سمعته من مـاجد أنتِ حامل.. 

نزلت إيدي على بطني وحسيت برجفة

: أي حامل.. 

: ​يارب يتمملج على خير وتولدين بالسلامة..

            مــــــــღـــــــريم

أنتشر خبر سـؤدد.. و أمها اختفوا

إشاعة تكول اعتقلوهم وراحو ورى الشمس و إشاعة تكول هربن للهور و إشاعة عافن الوطن..

كعدنا نتناقش أني و صديقاتي بسؤدد و مٓاجدة.. ساكتة بس بين الخوف بعيونها خايفة لا سؤدد.. وأمها خطفوهن الحزب تباركنا ألها ع حملها 

: كون طلعت هي وأمها راح أشتاقلها بس عندي بعيدة تشم الهوا بشرف ولا ماخذينها بنات متعرفون الياخذوهن شيصير بيهن..

صاحت رحابـ.. 

: سدي الموضوع رجاءا أحنا راحولنا شباب وما أريد أسبب لأهلي مصيبة لو أعتقلوني لذا راح أتركم أذا تحجون بالسياسة.. 

: تعاي ولج سدينا موضوع.. 

ظليت أفتر وي البنات وفرحتي بحمل مـاجدة جانت واضحة بس الغصة اللي بگلبي على فراق سـؤدد.. حقها سـؤدد.. الصارلها مو شوية.. 

ومهددين شتبقى تسوي بوطن حتى الكلمة بي صارت تهمة تركت دراستها وطلعت تدور أمان لأمها وبگلبي گلت يجوز الله كاتبلها هناك حياة أشرف من عيشة الذل يجوز هسة عرست هي وحسن أكيد تمموا زواجهم بوطن آخر بعيد عن أشواك بلدنا

​بعد الدوام أجه نصيرـ.. كالعادة وبصفه مكعد ياسر.. نصير اللي ما يقبل يعوف ياسر لحظة حتى للمكتب يأخذه وياه 

شگد تمنيت طفل ثاني يملي علينا البيت بس نـصير.. قافل يكول ما بيه حيل خلفة وتعب وأنتِ تداومين و آني أصير المربية! 

نضحك ونتشاقه لزمت إيده بحنية وهمست : ​اشتاقيتلي؟

ضحك وهو يباوعلي بطرف عينه.. 

: هو صار لنا كم ساعة من تفارقنا؟

​بس حسيته مو على بعضه وجهه مغيم ​تغير طريقنا توجست ليش مو طريق البيت وليش الجو صار خنكة حسيت گلبي انقبض.. 

ملامح نـصير.. جانت متوترة مشدودة وإيده على الستيرن ترجف كل شوية يباوعلي ويرجع يسوق كأنه عنده كلام بس ميكدر يحجي ​زاد الجو خنكه مو لأن شبابيك السيارة مسدودة لا لأن الهوا فجأة صار ثكيل بصدري 

: نـصير.. احنا وين رايحين ليش غيرت طريق البيت.. 

​ركز عيونه على الطريق تهرب مني وهمس بصوت مكتوم.. 

: رايحين للمستشفى..

​خليت إيدي على گلبي يا ستار ليش هنا ذاتياً خفت على أمي همست بصوت مخنوك وبحة بجي ترجف.. 

: أمي؟ لا تگولها فدوة نـصير.. لا تگول أمي ماتت؟ حاجيني لا تسكت ولك

گلبي مكدر يوجعني الغصة هنا غصة تخنكني.. 

الطريق للمستشفى جان يمر كبال عيني مثل شريط سريع و آني كاعدة بصف نـصير.. عيني على الطريق بس بالي بغير عالم وهنا نطق أبو الهول نطق وجلدني بخبر أمي.. 

: مـريم.. أمج تخربطت ورى الجرعة وهسة بالعناية المركزة حالتها حرجة بس ها راح تبجين مو؟ ذكري الله ولج لا تظلين تدكين وتلطمين.. 

​وگف السيارة ولزم إيديه حيل.. 

: صيري قوية مـريم.. إذا شافتج هيج بدل ما تقوينها راح تهبطين معنوياتها صاحب هذا المرض يحتاج تفاؤل وقوة لأن هي بحرب وية السرطان مو ترحين هيج وربج إذا شافتج هيج تموت قبل لا تنطق كلمة.. 

​حسيت الدنيا وگفت مو بس وگفت انمحت صوته جان يجي من بعيد ديحجي بنص عاصفة الكيماوي هذا السم اللي المفروض يشفيها هو اللي ذبها بهالـحفرة.. 

بذيج اللحظة حسيت ببرودة جمدت الدم بشراييني العناية المركزة يعني موت.. 

​رجع نـصير.. يسوق بسرعة و آني ردت أملخ الستيرن من إيده ردت أطير أريد أوصل قبل لا تروح مني دموعي ما نزلت بالبداية جان اكو غصة ببلعومي مثل السكينة تذبحني و آني أحاول اجر النفس لا يا ربي مو هسة دخيلك مو هسة

جنت أباوع على نـصير.. وأريد أصيح بوجهه استعجل بس صوتي ما طلع ردت أعيط ردت أكسر جامة السيارة وكون جناحات عندي وأطير لحضن أمي..

ياربي بس خلي أوصل وأشوف وجهها بس خلي تفتح عينها وتكولي ها يمة مريومة.. 

مكدرت اضم دموعي ولا أضم نحيبي غطيت وجهي ورجعت طفلة تبجي تريد أمها أي يمة بلياج آني أضيع يمة الزمن لعبني لعب ترحين أنتِ وأتيتم بلياج جنتي الي الأم والأب.. 

ربي أمي سلمتها أمانة بين أيديك أمي أمانتي يمك كومها و خلصها من هذا المرض وهيج هسة اوصل ويكولون أمج طيبة افيش نذر علي والله ربي أريد أمي بصحتها ترجع وما أريد أي شي ثاني من هاي الدنيا.. 

وصلنا ونزلت أركض مثل الحمامة المذبوحه حتى لأبني ما أهتميت نزلت أركض و أنهت اريد بس أوصل لأمي

نـصير.. يصيح وراي.. 

: يمعودة أوكفي مو منا شسوين رايحة للطوارئ تعاي منا اهدئي.. 

لحكني ولزم أيدي 

: تعالي منا مخليها بإنعاش القلب لأن شوي قلبها تعب من الجرعة.. 

​مشيت وإيدي على حلگي دموعي تصب وحدها مكدرت اسيطر على روحي وصلنا لباب العناية هذا الباب اللي يفصلني عن أغلى شي بحياتي.. 

وگفت لحظة خفت أفتحه وأواجه المنظر سحبت نفس وفتحته بإيد ترجف ​ريحة المعقمات خنگتني

وبنص الأجهزة والشاشات اللي تطلع أصوات شفتها شاحبة شحوب يخوف شفايفها بيض وعيونها غايرة بنگرة 

: يـمة..؟

​صوتي طلع مكسور خافت وخايف حسيت روحي طفلة ضايعة بغابة جانت نايمة وجهها شاحب مثل الورقة هدوء عجيب بوجهها آلاف الوايرات والأنابيب الكيمياوي اللي جان المفروض يرجعلها عافيتها هسة هو اللي هاد حيلها ومخليها بين الحياة والموت​تقربت منها وخطواتي جانت ثكيلة كأن الكاع سحبتني لجوه لزمت إيدها جانت باردة برودة خلتني أفز بست إيدها وبجيت مو بجي عادي لا جانت شهكات تطلع من أعماق روحي 

يمة فدوة لتعوفيني آني منو الي غيرج منو يضحك بوجهي منو يدعيلي ​جنت أباوع على الشاشة على الخطوط اللي تروح وتجي كل ما يرتفع الخط أحس روحي ترجعلي ومن ينزل ينقبض گلبي.. 

ردت أهزها ردت أكعدها ردت أصيح بيهم اكلهم شسويتوا بيها ليش هيج وضعها بس عيونها بدت تنفتح بخمول عجيب وصوت ضعيف نطقت اي يا الله جنها وعت وبصوت ضعيف نطقت.. 

: مريومة يمة هاي أنتِ؟

​ذبيت روحي على إيدها.. 

: إي يمة آني بنيتج كون المرض بية ولا بيج يمة بلياج أضيع محد عندي غيرج.. 

حاولت ترفع إيدها تسكتني بس ما كدرت ورجعت سبلتهن على اوي يمة سودة علي عظامج الكيمياوي متعبهم  

: مـريم.. اسم الله على شبابج يمة بعدج بعمر الورد وعندج وليد يحتاجج لا تتمنين المرض الله يبعده عنج.. 

​سكتت من التعب ودموعها نزلت.. 

: يمة أموت منو الج بنيتي كون الله يمدني بالعمر ربي إلك حكمة.. 

: يمة لا تبجين مو زين عليج فدوة.. 

​بذيج اللحظة العناية صارت أضيق مكان بالعالم جدرانها تضغط على صدري وتخنگني وما بقى بيدي غير الدموع والدعاء. 

طلعت من العناية مهدودة الحيل الدنيا تفتر بيه نـصير.. جان واگف برة شايل ياسر لأن ممنوع دخول الاطفال أول مشافني لزم إيدي بقوة يحاول يسندني.. 

: أمر الله يا مـريم.. تكدرين تعترضين؟ هذا طريقنا كلنا.. 

​صيحت بوجهه والوجع فايض مني

: أدري أمر الله نـصير.. بس هاي أمي اللي ما شافت راحة بحياتها شلون تمشي وتعوفني وحدي بحرگة گلبي شلون.. 

​هز رأسه وعيونه دمعت أدري ذكرته بأعزازه اللي راحوا وغص بالوجع مثلي مسحت دموعي وكلت بصوت مخنوك 

: نـصير.. روح أخذ ياسر وروح ما أكدر أعوف أمي ماكو غيري ألها.. 

: حبيبتي خالتج شوي وتوصل تبقى يمها أنتِ لا لأن عندج طفل صعب تباتين مستشفى كمرافقة.. 

​بالكراج شفنا نوري.. وخالتي وياهم و عـون.. هذا شوكت رجع نصير.. بس شافه وجهه انگلب وصار نار جرني بقوة.. 

: أمشي.. 

​

: نـصير.. عيب هاي خالتي خلي أسلم عليها.. 

فلتت إيدي ورحت لحضنها أبجي.. 

: خالة أمي راح تموت.. 

​

: گولي يا الله بنتي شدة وتزول.. 

​عـون.. جان واگف بعيد بصوته المستفز گال.. 

: شلونج مريم؟

جاوبته بكلمة وحدة وعيني على نصير بقلق لا تصير طلابة.. 

: هلا.. 

نوري جان يمثل الدور لابس وجه الحزن وهو اللي شبع أمي ضيم..

: يله أم شيلان.. نحتاج تبرع دم.. 

​عـون.. ما راح بقه واگف يذب بسمار لنصير.. 

: شخبار الشرب والسهرات؟ يگولون بطلت وتبت الله يهدي الجميع.. 

وضحك ضحكة استهزاء نصير فقد نزل ياسر.. من إيده وهجم على عون.. بوكسات وتزانگوا وهذا الخفت منه صار.. 

​

: ولك حقير أنت اللي دزيتلي سامر حتى يجرني للشرب مو؟

عـون.. ضحك وهو يمسح دم حلكه

: إي ردت أكسر خشمك دومك تعيرني وتبيع مثاليات و أنت غاط للرأس بأعمالك القديمه نسيت الربا وشهادات الزور اللي راحوا بسببك يستاهلون؟

​

: يستاهلون لأنهم غشاشين!

​

: وأنت عاد ما تغش اثنينا جنا نشرب فلا تسوي روحك نبي على الأقل آني مو مزور ولا نصاب.. 

​تداخلت بينهم تجيني ضربات منا ومنا نـصير.. يصيح.. 

: والله لأمحيك من الوجود.. 

وعـون .. يرد ببرود.. 

: تهددني؟ ثق بالله موتك على إيدي وهاي اللي يمك حسابها لسه ما مدفوع مؤجل حتى أجل مسمى.. 

​ركبنا السيارة ونـصير.. ينتر بيه 

: ارتاحيت هسه لو ردتي توكفين تتأملين وجهه؟

باوعت له بقوة.. 

: احترم نفسك نصير.. لو ردت عـون.. جان أخذته بس آني تزوجتك بإرادتي نضجنا بالتجارب وكافي هالحجي..

      

  ســـــــــــــ♡ـــــــــــــــؤدد

​هي هاي فرصتنا الوحيدة حسيت لـؤي.. راح يخرب شغلة طلعتنا فقررنا ما ننتظر لملمنا مستمسكاتنا وكل شي ضروري وشردنا للهور هناك بالريف أمان نبتعد عن العين لمن تفرج..

بالهور ​هنا بصعوبة أي أحد يعتقلوا الأمن الا مواجهات وعلى ما تنتهي المواجهة ممكن الهرب منهم بسهولة 

بين الكصب.. 

طبعاً ولد خوالي كلهم مختفين شاردين لعمق الهور عالحدود وهناك صعب يوصل الهم الجيش والأمن..

والبيوت بس نسوان وجهال بس بيوم دخل بدشداشته السودة و متوزر حزام وعلى ضهرة بندقية كلاشنكوف نص أخمس ومتحزم بشريط رصاص.. 

أمي من شافته هيچ ملخت روحها دگ ولطم و آني وجهي ورم من كد ما لطمت على خدودي يمة ذول دزيناهم يكملون دراسة تالي يتوزرون سلاح 

وممكن بأي وقت ينعدمون.. 

وضعه نبأني خلاص إنتمى للمعارضة أو معرف بس مو نفس الأعرفه عنه 

لطافته بعيونه أختفت وحتى المرح والبشاشة وصار مكانها نظرة ثأر و غضب و عناد ومباديء ضد النظام..

لزمته أمي وهي ترجف وكفت كباله من شافته مسلح ومو نفس النعرفة وينه طالب العلم وينه؟ الكدامنا رجل يدور ثارات و أنقلابات..

: ها ولك تريد تنعدم شوداك ولك ليش هيج أنت و المعارضة شكو.. 

​

وگف كبالنا وعيونه تحجي قبل لسانه

: اجيت أودعكم عمة أنة رايح دربي هذا ما بي رجعة لو أگدر أعبر وأنهزم لو نهايتي الموت ابروني الذمة.. 

​راد يطلع ركضت وراه ولزمته من إيده حيل حسيت برجفته تحت أصابعي عاتبته من كل گلبي.. 

: أوگف لا تروح ليش سويت بينا هيچ ليش ؟! 

التفت علي وخر اللثام وجرني لحضنه بكل قوته وهمس بأذني بصوت يرجف

: أنة أحبنج سـؤدد..

ظل يعبي ريته بعطري ويصيح أفيششس جثير أحبنج.. 

نزلت دموعي ووخرته عني دفعته بقوة هو هم أنتبه لأمي أستحى وخر بسرعة 

وأخذت جانب و الكلمات ضاعت بحنجرتي

بس ​صوت ضوضاء طفل من أقاربنا يركض و چفت علينا اشردوا مفارز الحكومة انتشرت بالنهر يريدون يفتشون القرية.. 

​أمي جرته حيل لحضنها و طل خالي جلال.. ووراه ولد خوالي كلهم مسلحين و منگبين.. 

جلال : يلا لازم نروح من الجهة الغربية بين البردي والگصب يله داكولكم.. 

محمد وحسين ولد خالي سحبوه حيل ونفس الوقت ذبلة محمد تصنيفة ما هامه الخطر .. 

محمد : خاف على روحك يبزر العاصمة يا أبو صدوك وداكولك لا تخاف علينا وأحنا شاربين ماي الهور..

لحظات انقطعت بيها الأنفاس لحظات نبضاتنا غطت سمعنا ​ودعناهم بالآيات والدعاء وهو باوعلي وهمس... 

: أودعناكم سؤدد.. 

بس ترك كلمته معلكة و عدل لثامه وركض طلع وراهم نظرة أخيرة بيها وعود بس يا وعود هاي والبارود يترس الجو اااخ.. 

ردته أمي.. 

: الله وياكم يمة.. 

وراها تفاجأت بعمي جاي علينا للهور.. 

: لازم تتركن الوطن ما دام برؤوكم من تهمة التستر بس منعرف باجر شيصير لذا لازم نستعجل.. 

: راح يبدي الدوام عمو.. 

: يا دوام يا جامعة؟ بنتي تركي الدوام ذولة ميعوفوكم بعد إذا هسه عافوكم و عدت سلامات ترى راجعين عليكم لا محالة والمرة الجاية ماكو سلامة و الي يوكع عدهم يروح وما يرجع.. 

الوضع تأزم وكدر عمي يقنع أمي عبرنا تهريب لبلد الجانب الأخر أما عمي راح يطلع اصولي ما عليه شي أحنا خفنا لا نقدم طلب موافقة سفر وننرفض وهنا ننبهم وهالمرة نعتقل دون رجعة..

ورى ما عبرنا هناك و أستلمنا شخص 

شايفين من تخلي عمرك وثقتك بيد غريب وما تعرف شنو الحال إلي ممكن يصيرلك كمبات خاصة للي مثلنا هارب 

فترة و إجانه عمي و طلعنا من هاي المخيمات الى عاصمة البلد طبعاً كوه قنع أمي يعقدون حتى يسوي لم شمل بصفتها زوجته..

بقينا بهالبلد فترة ظل يسافر ويرجع علينا ميكدر يأخذنا لأن الظاهر منفصل بس ممطلق وعدهم يعتبر تعدد زواج

طلعت أمي تحجي وياه.. 

​

: كلت نعقد حتى تلمنا الشمل وياك ببلدك شو لا أبو علي ولا مسحاته لساني انعوج و آني أريد أتعلم لغة ذول

: راح أسفركم لبلد عربي أفضل و كل فترة اجدد أقامتكم افضل من هنا لأن قوانينهم هنا متلائم سـؤدد.. 

يحجي ويباوع لشعثة شعري وظحك.. 

: أم كوشة المنكوشة هنا ترى ممنوع بدون حجاب يلزمج هيئة آداب الحجاب لويش ما تتحجبين.. 

: عمي فدوة شوفلنا غير بلد ثاني.. 

كرصتني أمي.. 

: الحجاب ستر بس تعال اللي يقنعها هسة لو شعرج سبل جان كلت خليها المن مطلعة كوشتج عالعالم.. 

ما حجيت ولا جاوبت 

وهم سافرنا لبلد ثاني ورتبلنا الوضع بس أمي بعدنا تونا نزلنا بالمطار التفتت لعمي گلتله 

: طلكني مثل ما اتفقنا شو هجولتنا من بلد لبلد وين لم الشمل.. 

عمي ظحك وهو يغني غزال وما يصيدونه ما صاده سهم صياد 

: سؤود هذا شيقصد يمة.. 

: يگولج ما أطلق عجبه الوضع

فكمل امورنه بهذا البلد وسافر لبلده الاوربي حتى يكمل هناك إجراءات انفصالة من من زوجته كلياً لأن يعتبر تعدد زوجات 

وظل دائماً يروح ويرجع علينا ويتصل دوم و بيوم ​خابرنه عمي و باوع النا مبين ضايج.. 

جان الاتصال يمكن بانتيوم ثري او فور وقتها جهاز كبير ونربط كامرة وننزل أتصال طبعاً بوطني انوجد بقلة بس دون أنترنيت ولا هيج تواصل عكس هاي البلدان هنا عرفت أكو قنوات فضائية وهواي أمور ببلدي نجهل وجودها لأن الريس جان حاصر بلده بقوقعه

أمي و تباوعلة بشاشة الكمبيوتر.. 

: راح تبقون بمكانكم وأجدد إقامتكم كل فترة حسب قانون هذا البلد كل أربع أشهر ادفع فلوس أقامه عمل وهم دبرت شغل الكم حتى تستوفون شرط الأقامة.. 

: ليش عمو مو لجوء سياسي.. 

: اللجوء أريده بعدين ببلدي هناك حتى أسحبكم يمي هم لم شمل وهم لجوء بس هسة نرتب وضعنه هيج لأن.. 

سكت وسالته : ليش عمو؟

: زوجتي الأجنبية اللي بالخارج رافضة تطلق مدنياً إلا أتنازل عن أملاكي آني مطلقها بالجامع بس بقوانينهم ميصير أتزوج اثنين يعني أمج هناك تعتبر عشيقة مو زوجة فوزية تعرفين شنو عشيقة.. 

حجاها وضحك دومه يحب يشاكسها يضوجها و هي ردته 

: يعني عشك بس تحلم مو عشكك آني.. 

أبتسم لأمي اللي تكابر رجع يداهرها 

: فوزية شدلعج أنتِ مو بس العشك أنتِ الروح والرية أدلعج فوفو..

ضحكت كتله : فرفورة هههههه

بس تجاهلني وظل يتغزل وأمي مستحية..

: مو عيب على شيباتك تتحارش بنات العالم.. 

ضحك عمي.. 

: مرتي وبالنسبة للبلد اللي آني بي العشيقة.. 

: ليش ببلدك ماكو زلم تعشك نسوان حتى تمنع وتسمي المرة عشيقة..

: عشيقة يعني صاحبتي عدهم مو مرتي لأن هم ما عدهم تعدد زوجات عقدنا آني وياج بس شيخ لمن اطلك هاي نعقد مدني.. 

لطمت أمي.. 

: آني صاحبتك؟ هو يا يوم صاحبت شو أنت ما تستحي وروح كللهم فوزية.. مو عشيقة ولا صاحبتي هاي مرتي على سنة الله ورسوله.. 

صفن بيها وأبتسم.. 

: أكول لمنو؟ للبلد البي آني ههههههه فوزية.. هنا على كولة سـؤدد.. أنتِ صدوك فرفورة بس أطلق تسهل الأمور هسة المحامي بشرني خير نسوي تسوية آني وديفانة.. 

أمي لطمت على خدها 

: أنت كم وحدة متزوج النوب ديفانة شني شني منو دافنها هاي.. 

رديت أفهم أمي حيل خبطت عدها كتلها 

: يمة عمي متزوج ثلاثة الأولى الله يرحمها ماتت العام ولأن عنده منها أولاد اضطر يتزوج الثانية حتى تداريهم و أنتِ يمة صرتي الثالثة بس بالقانون الأوروبي ما يعترفون بالتعدد فـ لهسة السالفة محصورة بين طلاق ديفانة وبين جيتج أنتِ.. 

رد عمي..

: الثانية غلطة عمري وأنتِ عشقي وأمنيتي..

و آني دأشاقى وي عمي عتيت گلادتي حيل دون قصد وكعت بالگاع انفتحت على صورة سورة الكرسي الداخلها بيت ينحط بي صورة أنفتحت على صورة حـسن.. 

ظليت أباوع للصورة بغصة هنا فكرت بخالي جلال.. و أللي وياه من أولاد خوالي باوعت لصورة حسن.. وبستها و آني اتنفسها إشتياق بشارة خير وجهك يا حـسن.. كون ما صار عليهم شي والله يحميهم ذولي البقولي... 

عمي: ضميها من أجيكم أخذها ألحمها إلج..

​أستمر عمي يضحك ببرود وأمي خطية على گد فهمها تباوع له بحيرة وتندس بيه.. 

: يمة هذا شيحجي كل شوي ذبلة حجاية ما تنفهم النوب عشقي مدري صاحبتي هسة أنتِ عدهم حبيبتي السرية يع شنو بالسر..

عمي ما قصر ذبها بوجهها وهو يضحك بخبث

: يعني أنتٍ صاحبتي دون علم الناس وزوجتي وآني هسة عدهم خاينها بيج هههه وساكنة وياي بالحرام هاي عدهم بقانونهم بس بدينا أنتِ الحلال المربرب أنتِ الگوجة الريانه أنتِ كيمر عرب...

بس أمي عافت كل الغزل و لزكت بكلمة وهي مصدومة لطمت صدرها وشهكت.. 

: شنهو ولك تحجي صدگ أنه وياك بالحرام..؟ 

بجت وهي ترجف.. 

: طلكني موش أرضى يحجون علي بهالديرة ويظنون بيه الظنون.. 

رد عليها بكهكهة ضحك.. 

: والله خلي يظنون علساس محصل شي منج شو ناشفة وتيبست الروح.. 

هنا ​تدخلت 

: يمة ناشفة يكولج يعني ديدور أحضان و رومانس ما تجي تسافرلنا حتى تأكل گوجتك.. 

ضحك عمي ورزلني بشقة.. 

: أنجبي ولج شفهمج بهاي السوالف النوب خدود أمج گوجة حمرة هم خوش فكرة أجي وآكلهن هم هم يم.. يم .. 

       

       شــــــــــــــ♡ـــــــــــــــلان

وكف بـروان.. وحسيته مقهور لأنه صار موضع شك.. 

: بابا آني مستحيل أأذيك أنت أبوية اللي رباني ما أنسى ابد فضلك عليه 

أنتشلتني من قريتي المنكوبة وربيتني شلون أخون الأمانة.. 

خلا عمي أيده على زند بـروان.. 

: أشك بكل الموجودين الا أنت..

هنا مرت عمي بحقارة كالت..

: بس المفتاح يم بـروان.. مستحيل أحد غيره هو غريب دخلته بيتك وهاي نتائجها خان الأمانة.. 

ضرب عمي منضده كدامه

: أنتِ تسكتين فاهمة.. 

(عدل كمر المرادخانى قماش الخصر الملفوف بدقة المردخانى زي رجالي كوردي) وجر نفس وهو يطمأن بروان. 

: أهدأ أبني وفنه الي يحجي وياك ويتهمك الحرامي أعرفة منو.. 

حجاها وصار أحمر مستحي متفشل.. 

رد بـروان.. 

: بس كول منو اللي يسرقك بيدي أسلمه للشرطة..

هز رأسه : 

: أبني أترك الموضوع راح يبدي دوام الجامعات وشغلك يمي راح بس بوقت العطل.. 

: تتخرج شيلان.. وأستقر بالأقليم و تدلل اطور الشغل بس تدري لو نحول هاي الأراضي لشقق و أماكن سكنية وشاليهات إيجار أفضل من الزراعة.. 

أبتسم : هاي أحلام أبني آني رجال ما أعرف ألا بمحاصيل القمح و الكرزات و مناحل العسل وأمور الالبان اباً عن جد

وبعدين الحكومة تفرض علينا هواي مضايقات..

: بفضل البشمركة منو يكدر يتعدى على أراضينا حجي..

أنتهى هذا الموضوع وأنسدت شغلة السرقة بس بقى بابا ما مقتنع ببرائة بـروان.. رغم دفاعي عنه وياريت ما دافعت ولا صدقته اول شي بـروان.. سافر قبلي لأن المؤجر مطلعه وديدور بيت إيجار لمن حصل اجه يأخذني

حزمنا جنطنا ورجعنا للجنوب جبت صوغات وياي من الشمال لصديقاتي..

        مــــــــــــ♡ــــــــــــــاجدة

من شفت رحـمة.. طلعت بحجة عيد ميلاد صديقتها وقنعت أهلها و مـاجد.. عاد تدخلت 

: المن تطلع وحدها صدك كذب بنية حديثة وحدها تخور زين مـاجد.. وصلها لصديقتها وبعدين ارجع عليها.. 

تباوعلي هي بتوتر وكره بس والله ولا أخليج ترحيله تعلمت على الأنحراف الادبسز مدري شمخوفها وهيج تنقادله

ماجد : عندي شغل مـاجدة.. وهي وين رايحه ترى لصديقتها حفل عيد ميلاد هسة أنتِ مو دتطلعين لصديقاتج آني أثق بيكم لذا منطيكم مساحة حرية أعرف متخونون تقتي بس للسوك ما أقبل وحدكم هناك ازدحام وشباب تدحس.. 

سكتت و فضائل ذبت كلامها السم

: حبوبة شعليج بتنا وكيفنا تطلع ما تطلع شنو سجن اول لزمي روحج عود تعاي حاسبيها روحي خية و تونسي بعيد ميلاد صاحبتج..

خزرتها وصعدت لمشتملي قررت أحتال واتبعها أتحجج بمرض جدي.. 

باوعت لمـاجد.. 

: مـاجد.. اليوم اوف أريد اروح أشوف جدي مريض.. 

مـاجد بحنيته المعتادة راد يجي وياي بس تهربت منه بحجة لـؤي ومشاكله.. 

: لا لـؤي.. يطيقك ولا أنت ترتاحلة واكيد هناك يم أبوه مريض سمعت رجع من سفره..

: هالأيام بأسمه تصيحيه..

سكتت وهو ما حرجني ولح علي بدلت وكملت وجاي أطلع لزمني من جتفي و بحزن كال كلمات حفرت بگلبي.. 

: سامحيني خاف مقصر وياج وأنتِ بنت عز ودلال هاي إمكانيتي.. 

: انطاني مبلغ بسيط وباس رأسي وهو يوصيني على اللي ببطني طلعت ودموعي على خدي أحس بذنب الدنيا كلها فوگ راسي ​رحت لبيت لؤي.. 

فتحلي الباب واحد من إخواني التوأم وجهه مجلد ومورم يرجف ويناشغ.. 

: ليش أجيتي مـاجدة.. روحي لا تتأذي بابا حابس رحـمة.. بغرفته و ضرب ماما ذبها بالسرداب.. 

ركضت لغرفته للبيت كله فارغ سألت أخوي بدموع.. 

: وين أمك؟ وين رحمة؟

أشرلي لبرة لجهة المشتمل الزغير المعزول غرفة العقاب وبيها سرداب أشبه بالسجن بلا شبابيك بس فتحات حديد زغيرة صرخت بكل صوتي.. 

: رنااا رحمة.. 

بس ماكو جواب السكوت جان يرعب أكثر من الصياح ​دكيت على باب المكان أسمع أنين رنا...قهرني..

رجعت لداخل البيت أريد أتصل ببيت جدي أطلب أنقاذ بس سبقني التلفون رن رفعته وإذا لـؤي.. 

​

: تؤ تؤ.. اهدئي بنتي ثواني وأكون يمج.. 

وفعلاً ثواني ودخل شمر السويج بصلافه وصاح بأبنه..

: أنت أبو البلاوي حجيتلها؟

​

: ما حجيت بابا والله.. 

الولد جان يرجف كدامي ​التفتت عليه ونار بصدري.. 

: وين رحمة وين رنا طلعهم يا مجرم

تقرب مني و عيونه تنضح شر وحقد.. 

: انطيتج وقت هواي تراجعين قرارج أنتِ من عائلة مرموقة ما يصير تبقين وي هالغوغائيين ولج أخوته معدومين بالتسعينات وأخته..

(فشر حجاية مو حلوة على شرفها) وضحك صحت بقهر: 

: أنت دمرتها تهددها وتستغلها وتضيع شرفها لجل غاياتك القذرة شتريد مني لـؤي؟

​

: أريدج أنتِ أريد استلذ بإنتقامي منج نكاية بـ هديل.. زواجج من مـاجد.. ركبني العار والكل يسألني عنج لازم أصلح الوضع لو أتبرى منج وأخسر منصبي بالحزب..

ي​باوع لبطني المرتفعة بغضب مكتوم.. 

: أگدر أحبسج وأكدر أمحيج بس أريدج تجين بإرادتج أريد استلذ بمعاناتج و آني أشوفج تتوسلين بيه 

لزم شعري حيل وقرب وجهه يشم ريحتي بتقزز كأنه جاي يشم هديل بيه 

: تشبهينها نفس العيون اللي داست على گلبي ومشاعري..

دفعته بقرف

: أصلاً عيوني تشبه عيونك يا مجرم يا عار..

​لزم ركبتي وعصرهه.. 

لا تگولين تشبهيني أنتِ تشبهينها تشبهين كل فعلها تشبهين..

سكت أدري حيكول صفاتها گلتله وآني ألهث من الخنگة.. 

: رجع البنية أستر عليها واذبحني آني هي شنو ذنبها.. 

​أبتسم ابتسامة شيطانية وگال ببرود

​

: بحالة وحدة أنفذ اللي تريدي وهم أبقيج زوجة للتافه مـاجد.. بس عندي شرط تقبلين؟

باوعتله بخوف وضياع.. 

شنو الشرط كول..

الفصل التاسع والعشرون من هنا