رواية خطايا واجتثاث الفصل التاسع والعشرون 29 بقلم نور البصري

‏من كد ما هويت الموت 

أدور لروحي جتاله 

وعلي كل مايمر تابوت 

أكول بگلبي هنياله.. 

ــــــــــــــــــــــــــــღـــــــــــــــــــــــــــ

: الشرط واضح تشتغلين وياي تصيرين موظفة بمكتبي إحنا بوسط دوائرنا الأمنية أكو خونة ولازم نصفي البلد من شرهم آني شاك بواحد رغم يحضر ويانا كل الجلسات والسمر.. 

بس ولا وحدة كدرت توكعه بفخها حتى رحـمة.. من دزيتها رجعت تكول هذا ثعلب وذكي وما أكدر أقرره و كالتلي شوف غيري وهي اللي رشحتج

بذيج اللحظة الدنيا دارت بيه غمضت عيني وغصيت بوجعي بس فجأة ضحكت بمرارة وصوتي يرجف بسخرية هزت كياني وكتله.. 

: رحـمة؟ ههههه رشحتني حتى تخلص من وجهك وتذب بلواك براسي!

​ما أهتم إلي وكمل كلامه وهو يتقرب مني أكثر وعيونه تلمع بنذالة.. 

: هذا هو الشرط وبالنسبة لزوجج لا تشيلين همة أشوفله شغل ليلي بعيد عنج حتى تأخذين راحتج وتجين يمي أنتِ بيج كاريزما وجمال يدوخ.. بس جرة عينج كافية توكع أكبر رجل بالدولة.. 

تقززت من كلامه شلون جنت أحبه درت وجهي عنه و أحس بنار شابة بصدري وحرورة بگلبي معقولة؟ هذا الأب اللي جنت أسميه بابا ؟ هذا اللي جنت أحن لشوفتة وأكلب الدنيا بس حتى التقي بي؟ 

​غمضت عيني و تذكرت سـؤود.. شلون صرت سبب دون ذنب بخراب قسمتها وخسرت حـسن.. وتهجولت هي وأمها مدري وين صفى بيها الدهر هذا كله علمود منو؟ علمود هذا الوجه القذر.. 

​تذكرت بابا سـهيل.. شكد جان يشوف اللي ما أشوفه وشكد حذرني وشكد وكفت بوجهه وعاندته وكسرت كلمته وهو اللي ما يوم كسرلي خاطر شلون جنت عمية لهالدرجة؟ شلون ما شميت ريحة الغدر والوضاعة بـ لؤي.. اللي يتختل ورا كلامه المعسول ووعوده الجذابة شكد جنت رخيصة بعينه وهو يساومني بكل صلافة على شرفي وبيتي؟ 

طلعت من يمه والدنيا تفتر بيه رجليه ما شايلتني والصدمة لچمة بوسط گلبي يا ربي شمسوية بدنيتي وهيج جازيتني؟ من دون الخلائق أطلع من ظهر إنسان فاسد وعار مابي ذرة غيرة يبيع عرضه لأجل رتب وماديات دنيوية رخيصة.. 

صفنت ودموعي حركت خدي شحجي شأكول؟ شلون راح أحط عيني بعين مـاجد.. وأبوي هو الإيد القذرة إلي لطخت شرفه؟

​مشيت بخطوات تيهت البيت كد ما دايخة تعديت مسافة بيت جـدي.. 

بس رجعت وبالي يم رحـمة.. معقولة لهالدرجة لؤي سيطر عليها؟ ولج يا رحـمة.. مو ردت أحلها الج تروحين تزيدين الطين بلة وتمشين وياه؟ بيمن هددج؟ بأهلج؟ بأخوج؟ لو بحارث؟

​وصلت لبيت جدي مديت إيدي من فوك الباب سحبت القفل وفتحت باب السلايت بقهر دخلت للحديقة والمنظر جان هدوء جدي كاعد وجهال عمتي بصفة عمتي أول ما شافتني دارت وجهها وحجت بنبرة مسمومة.. 

: ​بنت هديل أجت..

حجتها بطرف خشمها كالعادة تباوعلي باستصغار ما سلمت عليها ولا رديت صفاقتها سكتت وباوعت لجدي بقهر أريد حل حياتي تدمرت قبل ما أدخل بصلب الموضوع صحت بصوت يرجف من القهر.. 

: جــدو.. 

وكف وحضني يشم بيه.. 

: يا روح جدج من فترة ما تجينا يبعد جدج ليش كاطعة بينا.. 

جان لابس تراكسود أخضر رياضي مال منتخبنا العراقي جدو رغم أوقات يلبس زي العربي بس هو رجل متعلم جان مدرس فيزياء بشبابه و تقاعد جان لازم جريدة وديقرا من شافني كام يهلي بيه بجيت و آني أحضنه و أشكيله همي.. 

رفعت راسي من صدره باوعت بوجهه مصدوم و خايف علي  حجيت بصوت مخنوگ.. 

: أبنك يا جدو أبنك وصلت بي النذالة يطلب مني أشتغل وياه جاسوسة الهم يريدني أصير أداة بيدهم أنام وية الرايح والجاي وأسجل أعترافات

وأوكع العالم بفخه حتى يبتزهم و يصعد منصب  حضرة (**رتبته) لـؤي..يريد يترقى على حساب شرفنا وعلى حساب الفقرة أمثال زوجي شنو ذنبه شرفه تلطخ رحـمة.. ضاعت جدو..

​صوتي علا والكل صفن ​كملت وآني أشهك.. 

: ورحمة؟ شنو ذنبها يدخلونها بوسط هذا الوصخ؟ البنية أنتهت وتدمرت شنو ذنبي عندي أب حطني بالواجهة ودمر حياتي؟ جدو اليوم أريد حل ما أطلع منا إلا تشوفلي صرفة بستر رحـمة..

قبل لا أهلها يدرون شلون أخلص من هذا العار ويبتعد عني وعن بيت عيالي لا والله أقسم بالله يجي يوم أقتله و أخلص العالم من شره.. 

​هنا فزت بيبي مثل اللبوة هجمت عليه وصاحت:

: ​ولج بنت هديل! تتبلين على أبني؟ تريدين تسوين بي مثل ما سوت أمج؟ هو آني شعندي غيره هو وعمتج لـؤي ميسوي هيج! مستحيل.. 

​كامت تبجي بقهر بيبي بالنسبة إلها لـؤي.. ملاك معصوم والناس هي اللي تتبلى عليه مسحت دموعي بعصبية ميهمني بعد شي الوجع جان أكبر من السكوت كلتلها بصوت يرجف من القهر:

: ترى أبنج مريض نفسي لا ذمة ولا ضمير ولا شرف مو مثل ما واهمة نفسج بس جدي يعرف الحقيقة مو تمام جدو؟ يله كوللها أبنكم شنو كوللها أبنكم شنو راد يسوي بعرضه وشرفه.. 

جدي جان صافن بعيد هز راسه بتأييد مكسور وذب حسرة يمكن أطول من سنين عمري وعيونه غارقة بذكريات قديمه ووجع مدفون عمتي ما سكتت وصاحت بي..

: تردين تموتين أمي حتى ترتاحين؟ لا تلعبين بالنار يا بت هديل.. ترى تهمج أكبر من راسج! الله أكبر عليج وعلى الخلفتج هو إحنا شحصلنا من أمج حتى نحصل منج؟

​بوسط هذا الصياح كام جدي وعيونه مغوركة بالدموع.. دمع المكسور من ضناه باوع لعمتي وكال بصوت يرجف! 

: ذكرتيني باللي راح وخسرته جان صدك ملاك هذا البيت مو لـؤي.. الي... 

سكت يستغفر الله جدتي زعلت.. 

: حرام عليك ليش شاد هيج وياه؟ والله كل كلمة تحچيها عليه الله ما يرضى بيها دومك هيج وي لـؤي.. بله شاكر.. مات الله يرحمه ما كافي تفرقة ها كافي ترى بسوالفك هاي الله يمحي زيناتك.. 

شهگ شهگة مكسورة متأثر بهجوم جدتي عليه.. غص بكلامه وبده يذكر زينات شاكر باوعلنا بنظرات تايهة.. 

: شاكر.. جان مثل نسمة صبح جان  هواي يحلم أحلام راحت أحلامك جوة الكاع يوليدي أوووف.. 

 ورد شهگ شهگة طلعت من وسط ضلوعه وهو يبجي.. 

​: إلك بيها إرادة ربي تأخذ الزين حشاشة گليبي وتخلي العار عايش يذلنا بفعاله يا ربي الصبر.. 

جدتي : أي ظل نوح يا شاكر ويا شاكر اللي أخذ كل عقلك كد ما حبيت أمه تشوفه بيها بس الله أخذه منك حتى تبطل تفرقة وما بطلت.. 

بس جدو كام معصب جرها من زندها حيل 

: عجوز البين آني اللي مسكتني أمور  أقوى مني و الا ولله أشحته الج 

و أفضحه وادولبه.. 

تقرب منها مدري شهمس بكلمات خلتها ترجف هزت راسها بالموافقة وسكتت ووجها صار أصفر كامت تمسح بدموعها وتعاتبه بخوف وصوتها يرجف من الإرتباك خايفة تعصبه متريده يحجي.. 

: ​ها أبو شاكر.. سالفة قديمة وراحت الله يخليك لا تفتح الدفاتر العتيكة و تنبش بالماضي وهم مو من صالحك تحجي... 

​رد عليها جدي بحدة ومرارة:

​: ساكت ومنجب ومشترِي خاطرج طول السنين لمن راح مني شاكر وهم سكتت لأجل قضية ما أريد ضرر بيها  بس بعد  لا تطلبين مني أكثر لـؤي.. طغى وتجبر.. 

دار وجهه عليها وكال بلهجة آمر:

: تعاي وراي أريد أحاجيج.. 

​عفت عمتي واكفة بوسط الحديقة وجهها أنخطف لونة وهي تدردم:

​: لو أعرف شنو ضامين دوم أحس عدهم سر الله يستر من تاليها.. 

هزت راسها بعصبية وكامت تنفض  تنورتها وتصيح بجهالها 

​: نروح لبيتنا يله ماما أمشو كدامي.. 

دارت وجهها علي وشمرت كلامها مثل السم قبل لا تطلع.. 

: نصيحة الج لا خير باللي ماله خير بأهله وأبوج لا تحاربي وتظلميه بتهم باطله عيب عليج.. 

​عافتني وراحت بقيت واكفة بمكاني ما أدري أدخل لجدي لو أروح لبيتي بالي يم رحـمة.. و الوقت ديمشي ومـاجد.. أكيد ينتظرني بالبيت توني ردت أفتح الباب وأطلع جان يصيحني جدي بصوت مهدود:

​: تعالي بوية.. عندي حجي وياج.. 

: جدو.. تأخرت والله.. 

بس فجأة دخل لـؤي.. ووجهه مغيم 

: هاي أنتِ هنا؟!  

درت وجهي ما رديت باوع لجدي وهمس من ورى خشمة

: كوة يابة.. 

بس جدي ما رد عليه دار ظهره اله و دخل البيت وهو يدردم.. 

: مـاجدة.. تأخرتي روحي بوية لبيتج

تسائلت بداخلي لويش جدي غير رأيه مو رادني بسالفة أكيد ما كدر من أجه لـؤي.. اللي كعد على كرسي بالحديقة

وهو يغني أغنية أجنبية وقتها مشهورة.. 

بينما جدي دخل للبيت متجاهله أجت جدتي وحضنته 

: ها يمة خو ما ضايج؟ ولك يمة يمتى أنت َ وأبوك تتصالحون وتتصافى الگلوب مو كافي.. 

باوعلها وكال بحقد.. 

: أصالح؟ وياه وشيفيد الصلح يمة هو ما يوم عاملني معاملة حلوة دومة كارهني.. 

: بعد هو طبعه يضوج و أنت َ تضوجه.. 

خليت وطلعت رجعت للبيت همزين مـاجد.. بعده مراجع و رحـمة.. نايمة أستغفر الله يا رب شلون تنام بهدوء لو مكانها آني آكل بروحي أكل جاي أطلع من غرفتها همست.. 

: شفت حـارث.. وحجيتله وقنعته يقبل المساعدة.. 

: وتقبلج؟! 

: ليش لا أني شنو ذنبي  بنت مسكينه وكعت مصيدتكم.. 

: لا تجمعين رجاءأً مكتلج روحي ولا ضربتج.. 

كعدت وهي كاصة شعرها تسريحة جديدة راحت الضفاير الحلوة وراحن وياها براءة الوجه.. 

: كاصة شعرج؟ 

دمعت  : أي هديت ضفيرتي لحـارث الشعر يطول.. 

حجتها بقهر.. 

: راح يخطبج حـارث..؟ ولويش هاي الدراما أكو شي خاف مهدديج بالتصفية وتدزين ضفائر وداعية؟ 

سكتت وهمست:

:خيالج واسع عموما حاجيت حارث وتفهم موقفي  كل اليعرفه أعتدوا علية راح يسترني أنتِ مشفتي شلون بجى أنتِ أكبر نحس بحياتنا يا مـاجدة.. ضاعوا أهله و تشتتوا من ورى أبوج وهسة آني صرت كبش ترى مرايحة بأرادتي آني مجبرة أنفذ مجبرة أشتغللهم وإلا الثمن هذا البيت ينهجم و مـاجد.. ينعدم.. 

نزلت دموعها وهي تلملم رجليها و تبچي شفت أثر بكرشة رجلها چوية جكاير لا والله چويات صخام تقربت منها وأني المس الچويات ونزلت دموعي.. 

: ولج شنو هذا..؟! 

ضحكت بقهر.. 

: هذا؟! هههه ااوف هذا و أكو بجسمي بعد واحد من كبارية البلد عجبة يسويني مطفاية جكاير..

توترت وكتلها

: تكدرين تأخذين الحجي و مترحيلهم بعد شوفي تركي المدرسة عفية و أبقي بالبيت آني اليوم رحت بيت جدي بس عمتي هناك وبيبي لزكت ومكدرت أكوله أريد أهربج أنتِ و حـارث..باوعتلي بأنتباه: ليش جدج شنو وتكوليلة خاف هو يعرف أزلام تهرب المطلوبين.. 

عضيت لساني هاي مو ثقة بس شلون يا رب لازم أرتب كلشي وبيوم الهروب أخذها كبل هي وحـارث..

: لا يمعودة وينه وين هاي السوالف  رجال كبير ومريض مو مال هيج..

: أوكي 

: خابري حـارث.. أريد أشوفه أنطيه ذهب يبيعه و فلوس عندي يله مدام أهلج طالعين والبيت فارغ و مـاجد.. لسة بالشغل. 

خابرت ورى ربع ساعة حـارث.. أجه

أباوعله من الشباك تعبان ضعفان سودة علي خيي شحالك ولك أُوف ربي

دخلته رحـمة.. بالحديقة وهي تسولف وياه وتبجي تركت إلهم مجال يحجون لمن أجت 

: ميريد يحاجيج أنطيني الذهب أوديه هو والفلوس.. 

: بكل الأحوال يشوفني لأن الغراض فوك ببيتي.. 

طلعت وكفت كدامه حسيت آني المذنب و هو صاحب الحق نظرات كره و أنتقام رد و داير وجهه.. 

: بس نطلع للخارج أدزلج فلوسج الله لا يعوزنا.. 

: لا هنه إلك هذا خير بابا سهيل الذهب جان يجيبة الي هسة أجه وقته.. 

: أبوي الغدرتيه عموماً مو مال أطول هنا لازم أروح قبل ليجون عيالج.. 

: أنت أخوي جاي لأختك وكل الأطلبه منك تثق بيه راح أطلعك أنت َ و رحـمة آذا تبقى هنا هذا ما يعوفك ترى.. لازم نستعجل بس أدبر أمركم أدزلك خبر.. 

مكدر أذكر أسماء التفتت لرحـمة.. الي تخزرني هو كال

: ماكو حل ألا أتعامل وي اللي تسبب بأعدام أبوي والله زمن لازم أثق بيج هههه مكدر أثق.. 

: المهم بيع الذهب وضم الفلوس يمك بيوم الي أدز عليك تجيبهن ترى ذن ثمن حياتكم أثنينكم مفهوم.. 

غمتني رحـمة.. ودخلت.. 

: هم ورطتني وهم تنطي أوامر أم وجه اليابس.. 

سكتت أما حـارث.. باوعلي وكال

: أمي مو زينة خابرت أنتصار.. مبتلين بيها من طبيب لطبيب تهلوس وضعها النفسي تعبان ليش مـاجدة.. غدرتي البيت اللي رباج ولج دمرتي أمج وهجولتي أختج أبوي الراح ذنبه هو شريف نزيه أنقذ وادم هواي هيج تجازيه؟

سكتت كدام عتابه مكدر أدافع عن نفسي لأني فعلا ذنبي وثقت بلـؤي.. وراحت بيها وادم دار ضهره الي وكال

: الله لا يوفقج للأسف حياتي صارت بين أيديج وستر رحـمة.. يمج.. 

خلا وطلع كعدت على درج الرايح لمشتملي أبجي بقهر يارب شسوي يارب وفقني أطلعهم دخل مـاجد.. أنخطف لونه.. 

: ليش تبجين؟! هذا حـارث.. شفته براس الشارع والله خمنت أجاج قهرج وراح.. 

: لا بس هيج.. 

مكدر أحجي شكوله أبلعها وانجب

صعدت و آني أحميله العشا كم أكله تعلمتهم من كتاب طبخ جابه الي بس بعدني ضعيفة بالطبخ و أستمرت حياتنا نفس الروتين 

مر شهر رتبت طلعتهم وي جدي خلال هالشهر رحـمة.. تركت المدرسة آمنت بيها هنا سمعت الكلام.. 

وحـارث.. خطبها بس العقبة هسة أبوها رفض حـارث.. والله ما أنطيه محجوزة لبيت عمها هنا رحـمة.. دك لطم.. 

: شلون أبوي يجبرني على أبن عمي معناها أنذبح كله منج والنبي ما أموت وحدي أجرج وياي أورطج مو بس دمرتيني.. 

: كافي لغوة خلاص ولو هذا حل غلط بس بوضعج ماكو حل ألا الهرب وأكيد أبوج يسكت هنا و يكول أنطيتها ما يكول هربت يخاف من الفضيحة راح يتعذر لعمامج آحسن ما تزوجين أبن عمج ويعرف وهنا موتج بليلة سودة.. 

: والله أورطج بس أحس حياتي بخطر ألا أخلي مـاجد.. ينحرج وأشككه بيج لا عبالج أوكع وحدي.. 

: نصحتج  ما سمعتي الكلام أخلاقج تغيرت شلون جنتي بنية بلسم ومؤدبة هسة تردين تدمرين حياتي عبالك آني اللي شمرتج لحضن لـؤي.. وأمثاله.. 

: لو رايحة ومنفذة؟ يجيني؟ 

: أي يجيج وآني أموت وما أخلي أحد يلزمني بالحرام أنتِ بنت ناس مستورة جان لازم هيج تفكرين أعترفي غلطتي ولا تذبينها براسي..

كلت لازم أستعجل جدي أنتهزت فرصة مـاجد.. ما داوم كال عندي  تفريز بالات ولنگات وراح يتأخر رحت للدوام وآني نيتي أضرب المحاضرات وأطلع بسرعة 

بالجامعة التقيت بالبنات مريم وشيلان وشمس ورحاب سلمت عليهن بلهفة من زمان ممجتمعين بسبب ظروفي حجت رحاب 

: شخبارج مـاجدة.. شلونج وي الحمل هالايام مدنشوفج.. 

: الحمد لله حملي زين و تعرفي مـاجد رجع ويشتغل هنا ودوام يادوب الحك بينه وبين البيت والدوام.. 

شيلان.. جانت توها راجعة من الشمال من يوم زواجي ومشايفتها ومريم وضعها يقهر وبالها يم أمها المريضة ماعدها بس أمها غصة بگلبي خلتني أصفن بمكانهن يبقى مكان سـؤدد.. فارغ وما يملي أحد گعدنا نتذكر سوالفنا ومواقفنا القديمة شگد مشتاقين إلها أخبارها أنقطعت و ضاعت منا يارب تكون بخير وين ما تكون.. 

عفت البنات و ترخصت منهن ضربت الدوام وطلعت ركض وصلت للباب و آني أدعي بگلبي.. 

يا ربي كون لسه ماجد ما واصل دخلت أجيك الوضع أستغليت غيابه والحمد لله مموجود أول ما دخلت رحت أدور على رحـمة.. 

هاي البنية أبد متتأمن گلبـي لعب منها وين راحت إجه بالي حـارث.. گلت خاف راحتله بس من خابرته گال ما شافها ولا يدري عنها لأن ملتهي يصفي أموره.. 

كلت أكيد ببيت لـؤي.. أجرت تكسي  توجهت لبيته وصلت لكيت حمايات مدري حرس عبالك داخلة دائرة أمنية مو بيت

بذيج اللحظة شفت شوفة رحـمة.. واكفة وية واحد معروف بالدولة من أنتبهت إلي بساع عفت المكان وطلعت بس لـؤي.. لمحني وطلع وراي.. 

 

: ما كلتيلي وافقتي؟ هواي أنطيتج مجال وصبرت عليج ترى الثمن حياتج وحياة مـاجد.. شغلج راح يكون هنا يمي وتحت إيدي.. 

باوعتله ردت أتقيأ همست 

: أرفض وعوفني أروح رجاءً! وهاي رحـمة.. كوللها مع الأسف عليج آني منتظرتها بره خلي تطلعلي هسة لا وحق الله أروح لأخوها وأخلي يذبحها 

ضحك وجرني من أيدي.. 

: تعاي أعرفج بتيجان راسج.. 

عرفني بضيوفة السكارى والكاوليات تركص على أنغام غناء كاولية ورحـمة تباوعلي بتوتر وكفت و أجتني.. 

: مكدرت ما أجي دزلي تهديد اليوم  مـاجد.. أعتقله وأموته.. 

باوعتلها بحسرة وگلتلها: 

: والله يا رحـمة.. هذا مو عذر! ترى الشرف أغلى من كلشي بهالدنيا بس أگولها الج وسفة حـارث.. يسعى حتى يسترچ وأنتِ تفتكين سترچ بيدچ.. 

خليت وطلعت وهي لحكتني.. 

: شوفي خاف تهديدني.. 

سحبتها من إيدها بقوة وصحت بيها.. 

: تعاي وياي لا والله هسة أروح من بيت جدي وأتصل بمـاجد.. أخليه يجي لهنا ويراويج النجوم بعز الظهر هو ممحتاج تبيعين جسمج حتى يعيش بذل وعار وفضايح.. 

: باوعتلي وكالت.. 

: فدوة بس هاي المرة والله دسايره لمن نهرب لا يحس بيه أبوج ويكرفنا كلنا..

لا إله إلا الله حتى بعز النهار يستغلون البنات ويمرروهن طلعت و آني أركض خفت لا واحد يضرب بعقله ويتحرش بيه خليت وشردت أي عفتها لتلوموني حاولت هواي بس هي ما تريد و آني حججها ما تقنعني 

رحت لبيت جدي.. ردت أشوف شصار بموضوع حارث ورحمة؟ حارث تقدم وخطبها حتى يعقد عليها ويسترها بس أبوها بعده قافل ورافض ينطيها

​وبنفس الوقت جان كل همي جدي  يحجيلي سر لـؤي.. المضموم.. لابد أكو مصيبة مخليته يغلس كلما أفتح الموضوع عيونه تدمع يباوعلي بحسرة ويحبس الكلمة بصدره.. 

توني دخلت لبيت جدي بس دقائق سلمت وكعدت ملحكت توني داريد أتفاهم وي جدي ألا واسمع ضوضاء وصوت شحطة بريك قوية فززت المنطقة 

أصوات رجال وباب البيت أندفع و مفرزة أمنية أقتحمت المكان مثل العاصفة 

ما حسيت إلا جدي هيبة البيت وسنده صار بين إيديهم

بالكلبجات تقيد معاصمه بقسوة جدي أنصدم باوعلهم بذهول وكال بصوت يرجف.. 

​

: يا بوية آني رجال كبير إيديه تملخن ليش تقيدوني بهالطريقة؟

رد عليه واحد من المفرزة بدفعة قوية: 

: أنجب يا غوغائي! 

​جدي صاح بحركة گلب وشهامة مجروحة:

​: آني غوغائي؟ آفااا.. أنا أبوك  يا شاكر! هيج تاليتي؟

​: أي حتى  لسانك نگصه اللي يغلط على الريس!

​: آني؟! يابة خل أتفاهم وياكم يشهد الله ما ناطق بحرف ضد الريس منين جبتم هالحجي؟

​بيبي كامت تصرخ وتلطم 

: عوفوه! لا أخابر أبني لـؤي.. يسحلكم مثل الكلاب! تتهجمون على أبوه؟ليش ما تدرون هذا بيت أبو لـؤي..

راحت تركض تريد تخابر بس جبير الضباط صدها ببرود:

​: حجية الحجي عليه بلاغ وراح يجي ويانا وهو الممنون.. 

سحلوه سحل جدي الرجال السبعيني يجرون بي من زندة بقسوة وهو يعثر ويطيح من بين إيديهم وصياحه يكسر الصخر:

​: آخ يا متني.. بوية آني بكد أبوكم أحترموا شيبتي! 

​ركضت بيبي تسنده و آني رحت وياها آخذت دفعة من واحد منهم وكعتني للكاع حسيت ظهري أنقسم نصين جدي فجأة وكف باوع للسما وكأن الحقيقة نزلت عليه مثل الصاعقة كال بصوت عالي:

​: من تكلكم المرة تبلغ لـؤي.. و ما تهابون يعني لـؤي.. هو اللي دزكم يا حيف يا وسفة والله أنا أبوك يا شاكر.. وصلت بيك تعتقلني وتذلني؟ يا لـؤي نكار الجميل هاي جزاتي.. 

ظلو يدفعون بي وهو يهادد بيهم: 

والله لأفضحك يا لـؤي! وصلت بيك تعتقلني إلي؟ بعد ما أسكت.! ​أخذوه وطلعوا وبقت بيبي وعمتي يلطمن بالحديقة والباب مفتوح عمتي ريم التفتت علي ودفعتني بحقد:

​: بومة! بنت هديل.. فگرتي زلمة هالبيت بعده ما أحتر مكانج وأخذوا الحجي.. 

راحت تركض للتلفون تتصل برجفة.. 

: إلحك لـؤي.. أمي خابرتك ومحصلتك إلحك أبوك راح بيها أمن الدولة أخذوه

​بيبي كامت تبرر لنفسها وهي تدردم 

: أكيد أكو غلط شلون يعتقلون الحجي و أبنه مسؤول؟ لازم أشتباه باوعتلها بقرف وكتلها بدموع محبوسة.. 

: إذا مو لـؤي.. وراها أكص إيدي من الكتف!

ردت عمتي ريم.. بصياح.. 

: ولي وجه البومة! أصلاً لـؤي.. أنصدم وكال هسة رايح للدائرة أطلع أبوي أريد أشوف منو اللي يتجرأ يعتقل أبوي العب بي طوبة.. 

​أنتظرت ساعة ساعتين نسيت نفسي والوقت يمشي جدي ما طلع ولـؤي ما بينله أثر خابرت لبيت عيالي ردت رحـمة..

: ولج رحـمة.. همزين رجعتي صلوات! أسمعيني آني من شفتج بيت لـؤي.. وراها رحت بيت جدي و مكايلة لماجد فدوة بس يرجع كليلة أبات أكو ظرف طاريء عدهم وأنتِ حسابج بس أرجع أعلمج.. آني أحرك بروحي حتى أنقذج وأنتِ تطمسين بالوحل أكثر؟ عموماً بلغي مـاجد.. لا يظل باله..

سدت التلفون بوجهي وما نطقت ولا حرف أمنت أكيد تبلغ مـاجد..  لا يضل باله آني يم بيت جدي.. 

مرت ساعتين إجه مـاجد.. والشرار يتطافر من عيونه وجهه أحمر من العصبية عمتي وصتني..: لا تحجين كدام رجلج اللي صار يبقى غريب لا يضل يعيرج بأهلج.. 

هزيت إيدي باستهزاء:

: جدي مبي شي يتعير بي العار بأخوج لـؤي.. وبس.. 

همستلها كلامي و ​رحت لمـاجد.. أستقبلني بنظرة تخوف

: الله يساعدك.. 

​: اللي يطلع من البيت ينطي خبر!

رديت بكسرة

: رحت للمستوصف صار وجع بظهري ومريت لبيت جدي أرتاح وبلغت رحمة تطمنك.. 

باوعلي بشك وكال.. 

: أي رحـمة.. حجتلي عن المغامرات وشردتج منها لبيت جدج هسة يله كدامي بيتة هنا ماكو يله نرجع للبيت هناك نتحاسب ووراها أخلي النقاط على الحروف.. 

: ما فهمت؟

أشر بيده وطلع.. 

: وراي.. 

جدتي توها دخلت سلمت والوضع متوتر ترخصت منها وطلعت وراه 

​وصلنا للبيت رحت كبل  لرحمة.. شايطة منها.. 

​: ليش مكلتي لمـاجد.. أتصلت بيج؟أنتِ شحاجية عني وهيج أجاني هاد علي بيت جدي.. 

باوعتلي ببرود يكتل وكالت:

: يا إتصال؟ شوكت أتصلتي؟ شوف الكذب لو ما لزمتج لزم الأيد وشردتي لبيت جدج.. 

أستغربت هاي شتحجي؟ وين تريد توصل.. 

​: رحـمة.. شبيج؟ على شنو تلمحي؟ 

ردت بصلف: 

لو متصلة أكوله بس أنتِ كولش متغيرة وهواي صايرة تطلعين بوحدج ومرة أخذتيني وياج لكعدات أبوج أبو العرك لو نسينا ومن كتلج إلا أكول لمـاجد.. عليج صرتي من ما يداوم تضربي الدوام وترحين على باب الله وي الرفاق.. 

​وكفت بمكاني مذهولة الدنيا دارت بيه عزة العزاني! هاي شتخربط؟

: ​أنتِ مخبلة؟

: ​ليش مخبلة؟ لأن اليوم شكيت بيج و تبعتج و سحبتج من يم أبوج والربع والخمور؟ أطلع مخبلة.. والله لو ما آني الله يدري شجان صار بيج هذا إذا ما صاير فعلاً والا ليش خفتي مني من كتلج اليوم أخليلج حد وأبلغ مـاجد.. و شردتي لبيت جدج.. 

​هنا فهمت لـؤي.. غسل عقلها تماماً يريد يطعن بأخلاقي حتى يخلي مـاجد.. يشك بيه ويطلكني لأن رفضت العرضه علي مقابل أبقى زوجة لماجد.. 

دهر صابج يا مصكوعة الچلوة شلون فرتها علي حتى بنفس الوقت تطلع هي السترت علي المنقذة اللي شالت ذنبي لـؤي.. يريدني أرجعله مكسورة وذليلة حتى يبيع ويشتري بيه ​شوية و أجت أختها الما متزوجة كملت الناقصه.. 

: ​شو تتعاركين وية أختي؟ أنتِ دايحة لا تدخلين دياحتج لبيتنا وتعدينا.. 

صاح مـاجد بصوت هز البيت.. 

: كــــافي!

​راح للتلفون يجيك كاشف الرقم ما لكه أي مكالمة واردة مني لرحمة.. باوعلي بنظرة كلها شك خيبة ولوم مر وصعد لمشتملنا بدون ما ينطق كلمة.. 

بقيت واكفة بالصالة والظلم محاوطني من كل جهة رحـمة.. اللي جنت أريد أسترها صارت هي اللي تنهش بلحمي 

صعدت وراه والدرج صار شطوله فتحت باب الغرفة بهدوء جانت الظلمة طاغية بس ضوه الشارع الجاي من الشباك عاكس على وجه مـاجد.. 

​جان كاعد على طرف الجرباية منزل راسه بين إيديه بس حس بيه صعدت صوته جان مثل الرعد المكتوم وهو يحرگني جسمه كله يرجف بس جان يتظاهر بالهدوء والسيطرة.. 

: ​سدي الباب وراج وتعالي.. 

​سديته والرجفة بجتافي تقربت منه وكتله بصوت يادوب يطلع:

: مـاجد.. والله العظيم رحـمة.. كذابة لـؤي.. غسل دماغها وكل الحچته كذب بكذب لأن رفضت العرض القذر العرضه علي.. 

: آني بيمن تورطت أنتم عائلتيش؟ ولج من هيج أمج عافته لأن كرن و** بايع عرضه ولج شلون تردين تخونيني لو ما أختي مهددتج و جرجرتج حتى تعوفي المكان زين قبل اليوم شنو صار و آني يا غافلين الكم الله.. 

أباوع لإيده لام أصابعه بقبضة قوية لدرجة عروكه برزت رجعت خطوة لورى خفت لا تجيني ضربة منه لأن عيونه من كد العصبية صار لونهن أفتح وكأنما نار وشبت بيهن عرفت مـاجد.. واصل لمرحلة من الغضب ما يرجع وراها والكلمة هسة بمثابة طلقة

: زين ليش ما تثق بيه رحـمة.. ذبت بلاويها براسي هي ولـؤي.. متفقين علي يدمروني.. 

صوتي يرجف من الرهبة والخوف

ضرب كفوفة على رجله لطمهن حيل دفعني بيده وصاح بوجهي وهو يرجف من القهر.. 

: يا تآمر شتحجين أنتِ ولج مو رحت بنفسي وشفت أثار الكعدة بعيني.. 

: أي الكعدة موجودة ما أنكرها و أبوية هناك يشرب ويجيب ربعه وعدهم مصايبهم وكاولاياتهم حتى جاسوسات يشتغلن محورين هم ونسة وهم يتجسسن لصالح لؤي وأمثاله.. 

صاح بوجهي وكام راد يضربني  صرخت و ركضت بعيد أبجي 

: بنت الكلب من أنعل أبوج لابو الحظ الأسود العرفني بيج وأنتِ منيلج هيج معلومات إذا ما مشتغلة وياهم من هيج علستي أبوج سهيل الرباج وتعب عليج أثاريج جاسوسة للؤي الكلب..

: لا والله أبد لا تظلم بختك ولا تتهمني أنت َما عندك دليل أنت َ شفتني بعينك هناك؟ لو لاكفني بيدك يالله تصدك مو مراهقة سممت عقلك تغطي على.. 

: بله كملي خلي أفهم.. 

باوعت بحيرة بين أحجيله وبين أتستر بلعت ريكي وأني أتهيأ أنطق أو أسكت سكتت أوف شكوله هسة.. 

: أكيد لـؤي غاسل عقلها تتهمني يجوز هددها يعتقلك وتنعدم فخافت وقررت تضحي بيه وتسبب طلابه حتى تطلكني هذا اليريده لـؤي.. ما نسى تزوجتك غصب عنه دون رضاه..

قاطعني ورفع راسه وعيونه جانت حمر من القهر والشك:: يا لـؤي؟ يا دماغ؟ البنية تگول شفتها بعيني تگول رحت وراها وخلصتها من گعدة مشبوهة

أنتِ شتخرطين وتردين تبررين و أختي منيلها معرفة بأبوج و ميانة هيج وتدمرج وتنفذله غايته خافي الله أختي تربايتي ممعلمها تكذب.. 

: مكلت تعرفه كلت هو الهددها تحجي هيج مرتبين الوضع يجروك تجي تشوف أكو كعدة فعلاً ببيت بابا آني صح رحت لبيته لسبب والله بس عفت المكان ورحت لبيت جدي.. 

: بله السبب شنو.؟!

الفصل الثلاثون من هنا