رواية عيون المها الفصل التاسع والعشرون بقلم ظل الياسمين
تعلمت متاخرا ان اللطف الزائد يعلم
دعوه مفتوحه للاستهانه....كن طيبا
لكن لا تكن سهلا
من شفت الجادر وكع ابني من ايدي ورجليه ما كامن يمشن
عمو كعد اكبالي وكال.
_مها انتي مؤمنه وكلنه لهذا الطريق
صح ام صلاح تحبج وانتي متعلقه بيهه بس هذا امر الله كومي
اخذ ابني وكومني اريد استوعب شنو جاي يصير عود صدك الحجيه ام صلاح راحت وبعد ما اشوفهه
كمت اعيط بهستريا وابجي من گلبي 💔
والتمن عليه بناته وكمنه نلطم واني ملخت نفسي انهاريت امي سمعت واجت للفاتحه لخاطري
انقهرت لان ما شفتهه ولا ودعتهه بسرعه بسرعه هينه لينه مثل ما تكول بصلاه 😭
الفراگ صعب واني عشت بظل هاي المراءه الخيره الي جانت تسندي بضروف قاسيه وصعبه
خلصت الفاتحه ورجعت لبغداد بس گلبي يوجعني ويعصرني من الالم يوميه ابجي واكعد ادعي واصلي واهدي الهه قران وتسبيح ولو هيه اني متاكده بجنه يكفي وكفت وياي
بعد بيبي الله يرحمهن برحمته الواسعه
صار عمر صفاوي سنه واني لازم اداوم خلصت اجازتي كلت لسيد
_سيد باجر اروح لدوام واشوف وضعي اشلون
_ها الوضع مو تمام مها تره بغداد ازدحام والكتل بشوارع مو امان
_سيد لازم اروح استلم رواتبي مال سنه خلصن فلوسي وما عدي اصرف على الجاهل واذ شفت الوضع مو زين اقدم بدون راتب
اشوف السيد مرتبك وكلساع يسالني
_مها راح اكلج شي بس لا اضوجين
_كول سيد
_راتبج اني جنت استلمه اروح للمديره واتحجج انتي مريضه وتحتاجين علاج وداعتج ادفع فوكه للاجار
_صدك سيد ما جنت اتوقع انته هشكل جان كلت واني ما اقصر
_تره هنه تفاليس ماكو داعي تمنين علينه
_خلص اني امن عليك رجعلي فلوسي اني وابني حصره علينه اللكمه وخواتك عدهن راتب ابوهن امهن اشو ما تحجي وياهن
اشو هذا كام يعيط ويكسر بلغراض
النسوان توكف ويه الزلم بلحلوه والمره انتي راتبج 130 الف مانه علللللللليه بت الكذا
اخذ فراشه وراح واسمعه يحجي مظلوميته لامه واخته وهنه يساندنه
فرفح گلبي تعوذت من الشيطان وما عدي غير ربي اشكيله
مديت امصلايه وكمت اناجي ما احس الا امل بلباب تركع وتهوس فز ابني وكام يصرخ
_ولج مسووووويه روحي متدينه وانتي لاعبه لعب همزين ماضيج كله عدنه كومي لج
_اي بلله شنو الماضي مالتي ما ارد عليج حيائن من سيدتي ومولاتي فاطمه الزهراء عليها السلام
_كامت تعيط وتصيح وتشمر بلملابس والغراض
كمت دفعته بره الغرفه وسديت الباب وخليت كرسي وره الباب
حضنت ابني وكمت اسكت بيه
ثاني يوم الصبح كعدت من وكت والحمد لله السيد طالع وهنه نايمات
غسلت وبدلت وصفاوي متنحس كوه كعدته اخذته وياي لبست جبه وحجاب وعبايه
رحت للمديره ورحبت بيه والبنات كم وحده عدي علاقه بيهن
حجيت ويه البنيه ام الرواتب
_اكدر استلم راتبي
_ها زوجج ياخذ الرواتب وهو يوقع
_اي ادري بس منا وجاي اداوم اني استلمه عفيه بعد ما اريد تنطوه اي شي من مستحقاتي تحت اي ضرف
البنيه انحرجت وراحت للمديره
دزت عليه المديره
_مها زوجج كان يستلم رواتبج برضاتج لو غصب
_لا ست ادري بيه بس منا وجاي اني استلم
الكل عرف اني وضعي تعبان
جمعو واجب لابني وانطوني والحمد لله رزق اجه بوكته اخذتهن
رحت لسوك البياع واشتريت حليب لابني وحفاضات واكل اخذت تكسي ورجعت من وصلت لكيت السيد جاي كبلي ونايم بلغرفه عزلت الغراض واني ماكله بدوام كلت اغسل ملابس وامدد اشو هجمت علينه امل بصايح والصريخ فز السيد على صوتهه
_شوف احسان اني باجر اطلع ادور تعين ترضه ما ترضه ليش الدايحات احسن مني
انواع الغلط والسب سمعته منهه ما رديت ولا حجيت اني خاويه من الدوام
دار وجهه عليه كال سويلي سم
كمت سويت اكل كعد ياكل وهو يفور كال
_مها اخذتي اجازه بدون راتب
_وليش اخذ بدون راتب واني حسره عليه اللكمه
_احنه شكللللنه الوضع خطر يا امة الاسلام
_سيد احنه متفقين اني ما اعوف وضيفتي ومن تركت الدوام كطعني الجوع واجماله ماخذ رواتبي
كول اريد اسكت امل اكعدج بلبيت
كام رفس الصينيه واطشر الاكل
طفرت من مكاني اخذ ابني وطلعت بطارمه من كد الخنكه كمت ابجي
يا رب انته ثقتي ورجائي 😓
طلع من البيت واني رجعت لغرفتي وكمت اعزل وانضف واغسل ملابس الا ان اذن سويت لابني اكل ونمنه
مر اسبوع والسيد يم امه ولا يجي يمنه واني يوميه اخذ ابني واطلع وارجع الضهر المديره زينه وياي وتساعدني والبنات ورده مال الله
مره سمعت السيد يتعارك ويه امل ويتصايحون
_امل لا اطلعيني من طوري امج منو الهه اذ انتي وذيج بدوام
_كعد مرتك مو كادر عليه
_علاقل اني اخذتهه موظفه بوظيفه ثابته انتي ترحين شنو بلله
_شوف اني مليت واريد اتعين حالي حال البنات
كام يغلط ويسب ويلعن
اني مثل روتين يومي انضف واسوي اكل والعلويه الجبيره تحب صفاوي تاخذه يمهه وذيج ما تقبل لو تكرصه لو اطرده ويكون يفرفح
خطيه اتمرضت العلويه الجبيره بعد ست اشهر توفت
صدك انقهرت عليهه والسيد تقبل دوامي ومشت الحياة وامل ما بطلت مشاكل دخلنه سنه 2006
مره جاي اغسل فراش بسطح وشفت بلبيتونه كراتين استغربت
شنو بداخلهن فتحت الاول مستندات وتقارير مال امن
احكام صادره بحق ناس كملت شغلي واخذت مجموعه اقره بيهه
واشوف التقارير على طلاب كليه وموظفيين واطباء والمشكله اسباب تافهه سب الرئيس وشتم افلان حاكمينهم اعدام
والاغلب انتمائهم لحزب الدعوه مجموعه كلش جبيره من المستندات
اجه السيد اكل لكمه وصله
_اكول سيد هاي الكراتين شنو بيهه
_يا كراتين قصدج المستندات
_اي
_اني اخذتهن وانشالله اسلمهن بايادي امينه همزين ذكرتيني
ثاني يوم الصبح حسيت بدوخه ولعبان نفس رحت اخذت اجازه ورجعت
نفس اعراض حمل صفاوي بس هلمره ما رحت لطبيب
بقيت مقهوره منين اجيب مصرف والسيد ابد ما ينطي حتى مسواك ما يسوك بس الاجار وكلما يدفعه تصير مشكله واخته تدخل ويصير البيت جحيم رجع السيد تعبان
اكل ونام من كعد كتله
_سيد اني حامل
_هههه صدك هلمره ابنيه واسمهه مسره
كام على حيله وصاح ااااامل مها حامل
_اي واني شعليه مثلا اكلكم علخير
_هههه ولج جنت ابشر امي هسه ابشر منو ها
كام يهوس وصفاوي وياه وفرحانين كتله ما طول الله هاديك خلي نروح نزور باجر ونروح مناك لطبيبه
_اي نروح علحسابج اني ما ادفع شي
_عود ليش يمه فوك ما خليتك تفرح
_مها شغلي قليل والسوك تعبان والاجار كاسر ضهري
_خلص الكروه عليه والغده عليك
رحنه زرنه وصلينه وهو توجهه للمكتب هناك بقه ساعتين رجع ضايج وينافخ كال نرجع
_خل ناكل لكمه متنه جوع
_لا نرجع الوضع مو امان
رجعنه وبطريق كتله خلي نروح لطبيبه تفحصني ما قبل كال غير مره
بس دخلنه للبيت صعد فوك ونزل المستندات وكام يخليهن بلغرف وجوه الملابس
_سيد اكو شي ليش جاي اظم هاي الكراتين شنو السبب
بقه لليل هو قلق وشكله مرعوب
سويت عشه اتعشه كوه ونام وهو حاظن ابنه
مرت اربع اشهر على هاي الحادثه واني راجعت كالت الطبيبه
لازم عمليه لان وضعي مو مال طبيعي وكل يوم اتعب اكثر مره اجه السيد مرعوب
_مها لمي هدومج واخذ صفاوي وروحي لبيت عمج سالم
_ليش سيد ودوامي اشلون
_مها باجر قدمي اجازه تره وضعنه هنا خطر واجاني تهديد
_يا ستار ياربي
كام يحجي ويه امل كامت تعيط وتكله اني ما اروح لاي مكان اني كوه حصلت وضيفه بلامام مفتشه
تريدني ابطل لان هددوك
_ولج اني ما خايف على نفسي بس خايف عليكم
_احسان روح عني احسلك كافيك مني
عافهه واجه كابلني ولزم اديه بنضره حنينه
_مها سامحيني خاف قصرت وياج واذ متت لا تقصرين ويه الجهال وخصوصا مسره
_هههه اشو انته متاكد بنيه واحنه لسه ما مسوين سونار
_اني حلمت وهسه اشوفين صدكي تطلع تشبهج
مها انتي اجمل ما شافته عيني
_سيد اكو شي اليوم انته موطبيعي
سامع شي
_مها فدوه اروحلج اخذي اجازه وروحي ولج لخاطري اخاف توكع بيكم واتصيرون انتم الضحيه
_سيد ليش تشلع كلبي ❤️ احجي منو مهددك
_هاي المستندات يردون يتلفوهه واني صار اسنين محتفظ بيهن واكو غيرهن ضامهن عد صاحبي تدرين اذ ضهرت للاعلام ينكشفون ذول البعثيه النجسين وتطلع كل جرائمهم
