رواية خطايا واجتثاث الفصل الثلاثون 30 بقلم نور البصري

نزلت دمعتي وبجيت من كد ما شلت ذنوب وخطايا ناس راحوا بسببي صرت أرجف من خيالي أخاف أضيف رحـمة.. للقائمة أخاف تنقتل ويصير ذنبها بركبتي.. 

صرت أخاف من هيج أمور وأتجنب أكون سبب بموت شخص أو أذيته حتى لو جان هو الظالمني.. 

​سكتت وما نطقت بحرف وهو رجع كرر سؤاله والحيرة مرسومة بوجهي والقلق أكل روحي شلون أحچي وأخليها بموضع الشك وآني أطلع نفسي منها بس النتيجة وحدة موتها ذبح!

​بلعت ريگي والغصة واكفة ببلعومي حرب بداخلي ما يعلم بيها بس الله أحچي لو أسكت؟ ملامحي أنخطفت وبانت بعيوني نظرة أنكسار بس هو فسرها نظرة ذنب شفت بعيونه إنو حكم علي حكم باطل وصدك كل حرف گالته رحـمة.. 

: أنتِ تكولي رحتي بيت جدج خابرتي مناك أوك أجي وياج وحسب كلامج خابرتي و رحـمة.. الحاجتج وبلغتيها بس التلفون كلبت الكاشف مابي أي رقم منج وين الحقيقة يا مـاجدة؟ 

هنا تهربت من موضوعنا لجدي.. 

​: جدي أخذوه أمن الدولة ولـؤي.. هو اللي دزهم يعتقلون جدو رحت هناك 

ولـؤي.. هددني گلي أكسر خشمج وما أخليج ويه مـاجد.. لأن منفذتي الشرط بس حتى أبقى وياك بس كولي شلون أقبل؟ 

وهو يريدني أشتغل وياه و أنام وي زلم من وراك و الثمن ما يفرقنا آني مستحيل أنطي شرفي مو لأجلك أنت أو خوفاً منك.. 

لا آني تربيت ببيت رجل رباني ملاني مباديء و شرف أموت ولا أفرط بيها لذا تطمن شرفك محفوظ و كتلك لأني مـاجدة.. بنت سهيل بالربى مو لأني زوجتك أو بنت ذاك النذل لأني تربيت صح.. 

 

ظل يلح و يستهزأ بتربيتي هز إيده وصاح بوجهي:

: لو مترباية صح چان مضربتي الدوام من وراي ولج إنتِ شنو؟ تتفرفرين بكيفج متگولين عندي رجال المرأة الصالحة ما تخطي خطوة خارج عتبة الباب دون علم رجلها مو تكذبين و تگولين أداوم ومن وراي تضربي الدوام و تروحي لأبوج مدري لبيت جدج والنعل من هيج تربية.. 

ضجت شنو هذا الأسلوب شنو والنعل ترى عيب هيج آني شسويت صح غلطت من أنتهزت فرصة هو ممداوم ورحت بس غايتي أنقذ أخته.. 

يمكن الله ميريد أتورط أهرب رحـمة وي حـارث.. دون علم أهلها هنا أعتبر شاركت بنهيبتهم مسحت دموعي وقررت خلاص لهنا وبس آني تورطت برحمة وسترت عليها بس مال تخليني بخانة الخاينة وتطلع روحها الشريفة براسي؟ هاي نذالة منها ومن حقي أدافع عن نفسي و أبعد التهمة عني.. 

مـاجد.. أخوها ما يأذيها وهو أكيد راح يحل بلوتها بطريقته ليش أتحمل إثم وذنب بس أنطي تلميح هو و أخته يتصافون بعيد عن دمار حياتي جنت وقتها محتارة ما أعرف شلون أدبر حالي خفت لا يثبتون علي تهمة 

: أسألها لأختك بشنو مهددها لـؤي.. 

ومخوفها حتى تطيعه هيج صور لو شغلات معرف آني طلعوني من هاي الطلايب سويت العلي والنتيجة نكرت معروفي عليها وتريد أروح بالرجلين بتهمة شرف عيب والله عليها وعليك هم تتهمني وما تثق بيه وتصدك أختك وما تصدكني ولا تدور دليل  يثبت آني بريئة أو مذنبة هذا يسموه عدم ثقة و نذالة... 

ضربني راشدي فرني فر لزمت خدي وآني أبجي وصيحت عليه.. 

: أي نذالة من تتهمون أنسان بريء نذالة من تميل لجانب أختك دون دليل قاطع يالمتدين وتصلي وتصوم وين صلاتك وين قراءتك القران الملتزم بيهم مو الله كال ولا تقذفوا المحصنات

هد يريد يكتلتي ركضت بعيد و آني  أبجي بصوت عالي الله لينطيج رحـمة غيروج جنتي خوش بنية وزينة وياي هسة صرتي مو رحمة نقمة..

رجع ماجد يباوعلي بنظرات غريبة و أخذ أسلوب المحقق لو يروح يشتغل ويه لـؤي.. والله أحسن حتى يفضها ويفكني من شرهم أثنينهم صوته صار أخشن وكلماته تطلع مثل الرصاص.. 

​: أنتٍ تخرطين هواي و كلام ممفهوم صور شنو؟ تهديد شنو؟ أنتِ دتألفين فلم هندي حتى تضيعين السالفة؟ 

أما أعتقال جدج أذا صدك يجوز حجه كلمة منا منا وأخذوه أو يجوز شاهد لأن مستحيل لـؤي يخلي أبوه معتقل بس سالفة الشرف والگعدات الحجت بيها رحـمة.. هاي ما ينسكت عنها!

​لزم زندي بقوة بس مو قسوة ضرب جانت قسوة حيرة:

​: مـاجدة.. آني حبيتج وگلت هاي تختلف عن أهلها بس هسة دأشوفج دتضيعين مني رحـمة.. تخاف عليج  تبجي وتگول ساعدوها لا تضيع وأنتِ تجين تذميها؟ وتطعنين بشرفها.. 

أي فهمت لشنو تلمحين؟ يجوز أول كعدة وتلاحكتلج رحـمة.. هاي إذا صدوك أول كعدة لذا حالياً أنتِ تحت الشبهة لمن أتأكد من شرفج وين واصلة متورطة بهيج كعدات وراها أقرر تبقين لو نتطلق لأن مستحيل أبقى وي وحدة باعت شرفها..

​صحت بي ودموعي حركت خدودي 

دكيت على صدري..

: ولك آني مـاجدة.. آني اللي صنتك بغيابك وصنت بيتك وشرفك هسة تعوفني وتصدكها إلها وتكذبني؟ والله العظيم لـؤي.. غايته يفرقنا يريد يكسر ظهري بيك حتى يخليني ضايعة ويجبرني أمشي بطريقة القذر.. 

​بس فاتته شغلة آني لو مو أفترق عنك لو يبترون جسمي لحمة لحمة ماأتنازل عن شرفي ولا أطخ راس لواحد مثل لـؤي.. 

​دفعني وعافني وراح للشباك يباوع للشارع وگال ببرود يذبح:​

: روحي نامي هسة ومن باجر ماكو طلعه من البيت شبر واحد حتى التلفون أنزله جوة لحد ما أشوف و أفتهم الحقيقة شنو وقتها أقرر تبقين لو تطلعين من حياتي وإذا طلع كلام رحـمة.. صح ذيج الساعة لا أنتِ مرتي ولا أعرفج وذباحج آني لا عبالج أعوفج تتنفسين و العار والفضايح تلحكني.. 

: ما أريد أنام نازلة جوه بقت جنطة كتفي جوة أجيبها..

​طلعت من الغرفة و أحس الكاع تهتز بيه سوتها رحـمة.. ونفذت مهمتها رادوا أوكع بالفخ وكدروا يوكعوني آني غبية أعوفها بالوحل يطبها مرض أول تالي تنكشف و تنقتل وحـارث.. غبي يرتبط بهاي أنحرفت خلاص باعتها مرة و تكرر مرات الأثول مكسور خاطرة عليها ويتهمني سبب دمارها ودماره.. 

لـؤي.. نجح بأول خطوة كدر يبعدني عن رجلي وزرع الشك بوسط بيتي ما ألوم نفسي من سميته العنكبوت لأن كدر بخيوطه القذرة يحبك حبكته بكل صبر و تمهل راد ينهيني وبدأ ينهيني فعلاً.. 

جدي معتقل وما أعرف مصيره و آني سجينة ببيت عيالي ومـاجد.. راح ينهي الحب بينا بعدم ثقته بيه..

مسحت دموعي آني وحيدة وسط أعاصيرهم لازم أتقوة وأقاوم أخذت جنطتي ردت أشوف رحمـة.. لكيتها قافلة بابها ما طلعتلي.. 

خليت وصعدت تمددت أتكلب و مـاجد صعد عالسطح ظل كاعد هو و شكه و ظلم بخته من تهمني ظليت أبجي و أبجي شنو مصيري ربي أنتَ كفيلي أبعد عني أولاد الحرام ربي ما عندي غيرك.. 

 

مرت أيام بقيت بالبيت حسب أوامر مـاجد.. حتى جدي ما أعرف أخباره التلفون ممنوع عني مـاجد.. يطب ويطلع وما نتحاجه مدري يروح للشغل مدري يدور دليل يثبت تهمتي 

أي والله مو برائتي لا مبين يدور آني فعلا خنته وألا لو يثق وهو مغمض ما يصدك كلام أخته و الشي الي حيل ضايقني بيوم دخل ورى هاي الأيام من الزعل و الهجران 

: لمي أهم غراضج يله جوة أكعدج بنص أهلي أطلع للشغل شمدريني منو ما منو يصعدلج للمشتمل ويا غافلين الكم الله.. 

شهكت حيل أنجرحت من كلمته حيل تأذيت.. 

: أحترم نفسك آني شريفة غصب عنك وعن الخلفوك.. 

أويلي آني كتله هيج.. وهو أنقض علي رفس بوكسيات على متوني وكتلني كتله ظليت أزحف زخوف ألم ببطني موتني.. 

: صحت بي والوجع شگ صدري.. 

: يمة اااويلي.. ولج يمة لحگي علي ولك مـاجد.. دخيلك عوفني الجامعة وبطلتني وبالبيت وحبستني وهسة تريد أنزل يم أهلك؟ ما أنزل لو على موتي تريدني أكعد يمهم هنا أذا أختك تهمتني تهمة حتى باجر يگولولك شفناها بحضن رجال.. 

دنك وسحلني من شعري.. 

: ولك عوفني حتسقطني آني حامل اااخ يمة ضهري وبطني.. 

: أنهيج والله هو بس خلي الزم دليل ضدج عبالج أبقيج عايشة غير أنحرج نحر.. 

سحلني من شعري يريد ينزلني الدرج سحل لزمت رجليه أتوسل و أترجاه ودموعي غسلت وجهي

: بس شوية هدني ولك والله أنزل بس وخر إيدك عني راح تكسر بيه شي وين أروح بروحي؟ ولك آني حالي حال اليتيم بلا أهل ولا سند بهالدنيا لا تستغل ضعفي يا مـاجد.. لا تكسرني وأنت اللي جنت تكول آني الحايط اللي تسندين ظهرج عليه.. 

عافني كمت وكفت كوة ساندة روحي للحايط وهو وراي يدردم

: أريد أطلع ما أمن وحدج تبقين هنا تنزلين يمهن لمن أرجع بيدي أخذج فوك هذا آخر حل وياج بس والله ولج لو ثبت منطية روحج لغيري ألا أنحرج 

 

دخلت البيت وعمتي تباوع و متعرف شكو ولا هو اللي حجالهم ومنبه على رحـمة.. تسكت ظلت عمتي تصفك وتهوس مبينه من وضعيتي مكتولة 

: جبناها الحمرة محناية.. 

ما فهمت قصدها بس بقت بعقلي كلمتها وتالي من حجاية فضائل وهي تتمضحك.. 

: وين تعرف شنو الحمرة هنا الهايشة ههههه 

أستهضمت أنهان وهو ساكت عود صيح عليهن..

: بس كافي وبلا مشاكل هاي يمكم  تبقى من آني ما موجود ..

آشرلي أدخل للغرفة الفرغها الي بحال غيابة هنا أنجب و أكعد لمن يرجع

رحت للغرفة وهو خابر شريكه بالمحل الي تداين وفتحه اله من فترة لأن مل من شغلة عامل بمحل ملابس مستعمله..

بس طلع أريد الزم هاي ال ••••••  تعجبت من الفشرة الحجيتها بحياتي ما مفشرة على أحد ولا تربيت هيج بس عاشرت ذول وهن لسانهن زفر كل كلمة والفشرة وراها.. 

لكيت رحـمة.. بغرفتها بيدها علبة نيفيا الزركة وهي تدهن أيديها ورجليها و عدها بودر عطر تعطر بجسمها شافتني أبتسمت.. 

: شنو كاتلج ههههه ؟ شعجب؟!

: مو جنتي خوش بنية ولج راح أتخبل هيج لـؤي.. غسل دماغج شغيرج آني محتارة بأمرج؟ شنو حساسج هسة و أنتِ بالهاوية والسقوط.. 

خزرتني بعيونها الواسعة وكملت الومها هانت نفسها عليها يا ربي رغم تهمتني  رغم دخلت شك بعقل رجلي بعدني أفكر بيها..

: رحـمة.. هذا الواقع خلاص البراءة عندج أنتهت صرتي آلة وأداة ونستهم وشغلهم وين ضميرج بس أريد أعرف ما تخافين أبوج يموت لو عرف لو أخوج الي لبستيه العار.. 

الي هسة تاهمني باجر يعرف حقيقتج و يتندم على كل كلمة وكل ضرب أنضربته ظلم و إذا أخوج سكت على فعلتج ترى عمامج ما يسكتون كبل ذبح ما حسبتيهن ذن؟ 

وكفت وهي تمشط وعيونها لمعت بدموع ..: هو لأن أخاف عليهم كلهم ضحيت بنفسي علمودهم كالالي لـؤي.. مراح أستمر وياهم شغلي وقتي هنا أمنت على أهلي.  

: و أنتِ؟ وحـارث يقبل بهيج؟ لو عرف مو مجرد أعتداء صرتي برضاتج ترحين؟ 

: تردين تكوليله مثل ما لفقت عليج يم أخوي ترى هي مو وحدة بوحدة آني مجبرة أبوج جبرني أوكعج بفخ الشك  بشرفج حتى مـاجد.. يطلقج وهنا يسيطر عليج تدرين أمس جنت يم واحد هذا رايدج الج بالذات.. 

عمي عوفي أخوي ولي لمصيرج أنتِ اللي أبوها مثل أبوج وينج وين الشرف روحي عوفينا حتى يتركني أبوج ثمن تركي لشغلهم من يستلمج أبوج هيج كلي تردين الحرية جيبيلي مـاجدة.. للدرب. 

هجمت كتلتها.. 

: لا يا **

و فشرت عليها 

: ولج ما كفاج نفسج ضيعتيها هسة دتسعين لخراب بيتي تدمرين سمعتي آني بشنو مأذيتج حتى تسوين بيه هيج؟ولج آني داسعى أنقذج أنتِ جاي تنحدرين لمنحدر نكس وهاوية سقوط الشرف وفوكها تردين تجريني  وياج.. 

: كوتلج الشغلة وقتية و آني أريد أنقذ أهلي هو أبوج وعدني راح يطلق سبيلي والثمن أنتِ.. 

ضحكت بحزن على سذاجتها وغبائها 

: وصدكتي بي هذا ما يعوفج ألا ميته تبقين هيج تشتغليلهم من تحترق أوراقج ثقي يصفونج بدم بارد أو إذا بيج بخت تعجبين مسؤول ياخذج بس أله إحتكار وهم دون شرف.. 

: لو أنتِ مكاني شسوين تتحاصرين و تتقيدين بأهلج وأعز ناسج شسوين أكيد ترضخيلهم حتى يعيشون وما يتكرر موت أخوتج..

باوعتلها

: صدك المباديء تختلف ليش هسة آني ما متحاصرة مثلاً بس آني أختلف آني أموت ويكطعوني لحم ويودوني مفرمة لو يطعموني لأسد أبن الريس ولا أفقد شرفي.. 

باوعت الي ما مصدكه 

: الحجي مو بفلوس عيني عود من يحطوج بغرفة ويدخلون عليج كبارهم ويطلب منج أمور أنتِ أصلاً تجهليها بس حتى يتونس بيج وتاليها يرفسج ببسطاله من يخلص ذيج الساعة عود أدعي القوة والشرف وي هيج نماذج لا الشرف ينفع ولا أكو بنية تكدر تصمد.. 

: غلطانة.. 

بعيون مدمعه باوعت لرحـمة.. 

: أي غلطانة و تغيرتي حرامات..

دخلت فضائل.. وهي تشك أكو شي.. 

: خير شبيكم..؟! 

: لا هيج نسولف.. 

ردتها رحـمة.. و هي تتلوت على فضائل

: فضيلة حياتي جوعانة جاي وجرك فدوة.. 

: شجاج بس أكل مو حتى سمنتي.. 

:عفية فضيلتي.. 

خلت وراحت وهي تباوعلي بطريقة تشك بيه عمي شكي أنتِ وأخوج  بأختكم و أدبوها مو تذبون الصوج بيه 

وهمست لرحـمة ورى ما راحت أختها 

: جنتي كلج أخلاق و أقرب حمواتي الي جنتي أنسانة نقية جنتي رحـمة.. وهسة انتِ صرتي بلا رحمة ونقمة..

ردت بقسوة

: الفضل لأبوج و الج لعنادج وي أبوج 

 ردت  تمادت علي 

: ططوة طبيتيلنا وكلشي تدمر رجعي منين مجيتي 

متحملت آني أفتر وأتوسل بلـؤي.. يتركها و أرد لبيت جدي أريد حلول وهاي متحس شنو ممكن يصيرلها فوكها دبرتلي تهمة ردت الجميل الي بنكران.. 

رفعت أيدي وضربت رحـمة.. راشدي 

بس فضائل.. دخلت وهجمت علي.. 

: تطكين أختي اليوم اليوم أكطعج تكطع يا كلبة بنت الكلب.. 

 

ردت الضربة ضربات دفعتهن و شردت فوك لكيت مـاجد. مو طالع بعده وجاي يفتش بغراضي 

: شددور تحجي صدوك؟ تشك بيه.! 

: هذا اللي يتزوج بت مسؤول جبير يظل ماكل تبن ويربي گرون مكدر أتحمل نار شابه داخلي شمدريني قبل لا تنقذج رحـمة.. يجوز هم رايحة كعدات وطياح حظ يجوز شرفي ضاع و آني نايم و مدري مأمن بيج وواثق بمـاجدة.. الي حبيتها..

: أصلاً رحـمة.. تغيرت و كارهتني وماسحة المكالمة وضربك الي هم عاذرتك ولو ما أحب هذا الأسلوب همجي بس كلت معصب وقشمروه بكذبة حتى نفترق  بس والله تتهمني بشرفي لا هاي ما أسامح بيها.. 

: أختي متكذب شنو هاي الكعدات مـاجدة.. زين أنتِ حامل بأبن منو؟ راح أتخبل نار الشك والغيرة موتني صرت أشك حتى بحملج مو مني.. 

وگفت بمكاني والدنيا دارت بيه إيديه ترجف رجفة مال واحد روحه جاي تطلع وبحركة لا إرادية رفعت إيدي ولطمت على خدي بقوة و آني ما مصدگة اللي سمعته ظليت ألطم على خدودي وأصرخ بكل قهر: 

: لاااا.. لهنا وبس هنا توكف عند حدك لا وحق الله أوكلك تبن وصلت بيك المواصيل تصدك حجي مراهقة وتشك بشرفي يا قشمر.. 

دفرني وضربني دفعته عني حيل

: مـاجد.. وين الثقة لا تصدك حجيها 

ضرب راسه وهو معصب ودموعه تصب دموع غيرة و إحساسه أنخذل.. 

: اللي تكون سبب بأعدام الرباها ممكن تكون تشتغل بأمور أستغفر الله وآني يا غافلين الكم الله..

: مجاي أفهم ليش هيج وياي ولا مصدكه أبد تشك بأخلاقي أذن حبك كذب شنو دليلك ها يله كلام أختك مو دليل مال الم ملابسي وأروح لبيت جدي.. 

شفته سكت ما منعني يعني مصدك يعني ديكولي روحي مريدج بس ورى سكتتة  حجة مثل المضطر..

: حتى أبوج يمحي أهلي آني الجبتها لروحي شكد مغشوش بيج.! 

: أنت شتحجي..من عقلك؟ عجيب! 

مصدومة شلون ما يثق بيه وبساع صدك أخونة لا ويطعن بالطفل الي ببطني شسوي أروح لو أبقى بعد هاي الإهانات دون دليل..

ظل يضرب براسة بيديه دموعه تصب يحس آني جبتله عار مال أفضح أخته ظليت محتارة النوب تنقتل من وراي وألا أكولة آخذ أختك لقابلة لو مستشفى فحص عذرية وهنا تعرف منو العار بينا ومنو الشريفة بس هو حجى كأنما يسوي فضل سترني..

: شسوي ياربي حيرة أذا أطلقج أخاف لا أبوج يشيل العائلة وخواتي وشرفهن يروح أبقيج أكل تبن ولج مكدر أصدك ماكو غير أسكت و أنجب ورجولتي و كرامتي بالوحل..

: أنطيني دليل آني خنتك والنوب أحجي أنت هسة معصب أرتاح وفكر زين لا تظلم بختك.. 

: طفلة بريئة شعرفها بهيج أمور لوما شايفتج تابعتج شاكة بيج ولج مكدر أتخيل أختي همزين ما لزموهها ذول السفلة.. 

هذا شنو من غباء بساع صدك مدري حقه إذا أمي و أخوي أتهموني أطيع لـؤي.. و أتهموني مخبر و لـؤي.. أيد شهادتي بقضية بابا سـهيل..

شلون يصدك ما أسوي الأكبر منها حرامات والله طلع حبه الي كذب  

 أعوف بيته واهج لو أبقى أتحمل لمن أثبت برائتي و آني ما أعرف شنو يفكر وليش وصل لقناعه يشك بيه..

كالعادة من يطلع ينزلني جوة يم أهلة ويقفل المشتمل ويوصي فضائل والله سمعته شكللها وأنقهرت كولش.. 

: أنتبهي زين هاي مو أمان ممنوع تخابر أحد ألا بوجودي.. 

تمددت بغرفتي الجوة أبجي مقهورة وهناك محاولات من فضائل وأمها أكرب شغل بيتهم لا والله أني عازلة

ما علي وهم ما يستاهلن أساعدهم

دخلت فضائل

: أجن أخواتي من عيالهن يله كومي غسلي هذا أبن خمائل واكع بالسيان من نازلة من السيارة يله فزي ولج ها  شو كاعدة.. 

درت ضهري الها وتغطيت زين طز بيج وبالخلفوكم النوب صرت مثلهم أغلط وين تربية بابا سـهيل بس المثل ذول ناس ما تخاف الله أعاملهم بالمثل 

مـاجدة.. الفقيرة الضعيفة شخصية ماتت تدبغت بالمصايب والخطايا و أجتثت روحها

هدت تريد تضربني عاد كمتلها وصرنا من الروس توليتها دفع وتنمرت عليها متزوجت مو بس هي تجرحني أي آني هم جرحتها بالعمق

: لو بيج حظ جان عرستي بس ربج ما يضرب بني آدم  بعصا..

: ولج تعيريني أم الزلم عبالج ما أتصنت عليج ورجلج الشفية أخوي مبقيلنا بالبيت وحدة ساقطة..

ظلت تهوس وتحجي توليتها كتل وعض هي هم عضتني صرخت

: تعضيني ولج آني الج أعلمج..  

كمت وآني الزم المخاد و أضرب بيها

شو هاي لزمت راسها تكمز وطلعت

: خايبات خواتي أنتن ثمانية وما تفازعلي مرت أخوجن كتلتني فشختني.. 

بساع قفلت الباب قبل لا يصير هجوم يجعصن الطفل الي ببطني وصحت من ورى الباب.. 

: فشختج بالمخدة يالكذابه شنو مخادكم تفشخ أي هم حقج مخاد فگور مو مال بشر مال فگور مثلكم كلة مستعمل..

تعمدت أغثهن وهن ً يغلطن علي من ورى الباب والله كرهتهم من وراهن بطلني مـاجد من الجامعة لو ما رحـمة تكذب تتبلى علي بس سمعت صوت مـاجد.. 

: شكو شبيجن نسيت هويتي ورجعت لا يلزموني عبالهم فراري لأن مواليدي أنسحبت شنو هذا الصوت.. 

ظلن يبجن ويشتكن بس هو دك الباب..

: فتحي الباب 

صوت تلفون و صوته ماكو تصنتت اله جاوب التلفون شوي ورجع

: يله ولج فتحي الباب خابرت عمتج جدج مطلعيه من المعتقل للمستشفى منجلط يلة أخذج تشوفينة طلبج بالاسم.. 

فتحت الباب وآني أبجي حضنته حسيته تفاجأ بفعلي خاصة بينا زعل..

: آني ممسوية شي غلط آني حاسة خسرتك وهسة جايبلي خبر جدي.. 

الدنيا ضاقت علي وما بقالي سند والله أموت ولا جدي يموت وخر عني محتار باوعلي بنظرة شك يارب هيج صارت حتى بحزني وخوفي يشك أمثل. 

: روحي بدلي حتى آخذج يله 

صعدت وبدلت من نزلت آشرلي أحسة ظال محتار بين آني بريئة بين مذنبه

وصلنا المستشفى دخلت شفت جدي وضعه خطر وبعده بالمستشفى مو مثل ما فهمت مطلعيه أثر ضربات براسه ووجهه ياربي شمسوين بي رجال كبير بالعمر حتى للشيبة ما خلو حرمة.. 

شفته عالسريع و طلعت بالممر كعدت يم مـاجد.. الي تحول من تالي لواحد شكوكي دفعني جانب.. 

: سادة الممر و الدكاترة تفوت لو عاجبج مشاهد أفلام جوليا روبنسن الرومانسية.. 

شيخرط هذا بس سكتت والله إذا بقى هيج أعوفه و طز بالحب كافي ذالني يم أخواته يتركني ويطلع ومتحملة لخاطر ما ينهجم بيتي..

شوي دخل لـؤي.. وياه جماعاته وحمايات باوعلي بنظرة تحدي ودخل لجدي.. 

ماجد : أخاف أحجي و هم تعلسيني  والحك سـهيل..

باوعتله و عيبت بحلكي

: هي هي ما تضحك ترى مو حاله تصدك طفله أسألها هي شمفينه؟

متحملت والله جنت أكول الستر حلو بس هاي طعنت شرفي دار معصب.. 

: شتلمحين؟ سبق كوتلج دربالج تألفين فلم هندي على وحدة من أخواتي جزاتها من نقذتج من نفسج ومن الكرن أبوج.. 

جريت نفس قوي ما أريد أتعارك وياه كدام عمتي ورجلها لو بيبي الي ساندة راسها للحايط تندعي وهي مصدومه من فعله أبنها.. 

همست

: ماكو شي ما أقصد وآني ما أتبلى على أحد بس هي الي طعنت بيه الأفضل تتأكد مو تشك بيه وتحول حياتنا جحيم.. 

سكت و أبتعد عني حسيته راد يضربني كدام العالم فقرر يوخر من يمي..

شوي طلع لـؤي.. وكف كبالي..

: شلونج بابا مناضلتنا الصغيرة..

باوع لرجلي وكمل.. 

: إنجازات مرتك مشهودة..

باوعلي مـاجد.. بنظرة بس يخاف من لـؤي.. الي يكدر ورى الشمس هو وأهله يذبهم فـ ظل يبلعم

: سيدي إحنا كلنا فداء للريس..

ضحك لـؤي.. و رجع باوعلي يتجاهل مـاجد.. اليتراجف خايف على أهله و أخواته.. وأبتسم

: جدج جنه مو راعي طويلة الحمد لله على كل حال ياما نصحته لا بالكهاوي تحجي عالريس والدولة ترى حتى منصبي ما يحميك هاي عود توسطتله يطلعوه بس أنجلط رجال جبير ما تحمل الإعتقال والتحقيق..

ظليت ساكته خفت أعاركه و يأكد شكوك مـاجد.. أو يجيب سيرة رحـمة 

وأنقذتني عمتي أجت تستفهم من لـؤي وضع أبوها وشكله الطبيب.. 

يمكن مشيئة الله أقوى من كلامه

يومين و تحسن جدو و كدر يحجي  

ويحرك أيديه وحدة يحركها ببطيء الثانية كدر يحركها طبيعي أما رجليه رجيجات فعمتي جابتله كرسي مقعدين

مـاجد بهاي اليومين يجيبني إلهم لأن بيبي حرجته جان يوم جمعة و معزومين عند بيت جدي ذابحين فدة طلع جدو و تحسنت حالته الصحيه.. 

أباوعله كاعد وعينه علي رحت بست أيديه و دمعت عيني.. 

: جدو تباوعلي؟! 

بصوته المريض و حجاياته الترجف بلسانه الثكيل حاجاني وي تأتأة لأن لسة الجلطه مأثره بي..

: آني متت بس ردت روحي علمودج خفت عليج والله ما قصر آجل موتي بلكت أكدر أحميج لمن الله ينتقم من لـؤي.. وظلمه.. 

مسحت عيوني البجن ردت أشكيله شلون دخل شك بقلب مـاجد.. شلون دمر زواجي بس سكتت خفت يموت ميتحمل تعب جدي حيل من فواين لـؤي.. 

هز راسه و أبتسم.. 

: بوية لـؤي.. اللي أعتقلني.. 

: ونكر يم بيبي وعمتي يكول بسبب تغلط على الريس و الدولة ومو بصلاحيته يمنع أعتقالك بس كدر يتوسطلك ولو متأخر أنقبلت واسطته بعد تعذيبك و أنجلطت.. 

دمعت عيون جدي وكال

: وصدكنه أكيد الهن يوم يعرفنه شنو؟ تدرين يمتى من أموت ويظلن جوة رحمته.. 

جريت نفس وحسرة وآني أحاجي روحي مثل ما آني عرفته بس بعديش بعد فوات الأوان.. 

 

: رجلج يتنوعلنا بوية روحيله لتحجين عن أسرار أهلج الرجال يبقى رجال  أقل طلابه بينكم تتعيرين بالعار أبوج 

شكولة رجلي اللي مفروض سندي يشك بيه هو أصلاً ديعيرني من غير محجي..

شوي صاح عمتي

: ريم.. بوية تعبت تعاي أخذيني لحجرتي.. 

جان صوته يتقطع كوة يلفظ كلامه لسانه ثكيل رجل عمتي ريم مبين على خلاف وي لـؤي وسمعت معاركه وممصدك لعبه أعتقال وأذية جدي مو هو وراها خفت عالرجال.. 

لـؤي.. حاقد والي يوكف بوجهة يدمره مكدرت أسكت رحت بهدوء وهمس 

: عمو فدوة أسكت لا يدمرك دمر أمي وعدم رجلها هواي أمور مكدر أحجيها سواها لتوكف بوجهه معليك لا تدخل جدو قوي و لـؤي.. ميكدرله لتخاف على جدو بس أنت خاف على روحك.. 

باوعلي الرجل ودنك 

: آني محامي ناوي أوصل أفعاله لرموز الدولة خلي يعرفون أزلامهم شتفعل دون علمهم.. 

: أتركه لا بيتك يهجمه والرموز حتصفكله إنجازات وترقيه و انواط شجاعة 

جدي عنده سر وأعتقد سر قوي كم مرة راد يكولي و سكت لذا أعتقد أعتقله و عذبه وهدده إذا حجاه يدمرنا كلنا ويحرك گلب جدي أحس أكو شي بسببه جدي ساكت رغم جدي أنسان متعلم بس رجال من أهل قبل ذولي أكو أمور يغطون عليها ولا تطلع للعلن الله يدري يجدو شضام من مصايب لـؤي وساكت ومتحمل فوك طاقتك عفته و كعدت يم مـاجد.. الي شاورني.. 

: شجنتي تسولفين هذا رجل عمتج ما أرتاحلة يوم على يوم تصدميني وين البراءة الحبيتها..

ردت أهز أيدي بس غلست شوف هذا يغار وصاير شكاك مينجرع والله يا الله العالم وين وهذا وين كاتلته الغيرة والشك بتربيتي بس حقه شمدريه؟!.. 

ورى ما تغدينا رجعنا بيتنا صعدنا لمشتملنا بقيت فوك لمن مـاجد.. نام تعبان وراه طلعه المغرب للشغل هو مدام فوك يعني يمه أبقى يطلع أنزل يم أهله تعجبت فضائل أجت 

: أبوي يريدج.. 

حجيت على كيف لأن مـاجد إذا نايم ما يحب أحد يكعده يعصب يريد كون يكعد وقت محدد لأن يتعب بشغله..

: ومرض لفج نصي صوتج.. 

تهامست وياها وهي غمتني وشاورت مشاور بالحجي  

: لسانج صاير طويل أم الفواين لا تغلطين.. 

وهم همست

: من عاشر قوم صار مثلهم ولي يله بعد الله شيسوي بيج خلاج بحسرة عرس.. 

لزمتني من شعري زين ما أكدر أحجي ولا أصرخ هذا يكعد وصاير دون تفاهم يضرب جلاليق بصوت هامس كتلها.. 

: اأخ ولج هم أعرف أملشج...

مشعهتها هدتني

: نزلي أبوي يريدج..

نزلت للبيت بس ماكو بس كالت رحـمة 

برى بالباب..

: و أخوج وين يقبل أطلع.. 

: شعلي شوفي أبوي شيريد منج هج حجاب يا بلا ستر.. 

غميتها وتمضحكت مو مال أعاملهم بلطف لا والله بالمثل..

: أي هو آني الي بلا ستر؟!

ورفعت تك حاجب وجريت الحجاب لفيته و أخذت على كتفي جبة مال فضائل وطلعت باوعلي عمي. 

: أبوج طلب يأخذج مرته مريضة..

بساع كلت بخوف

: لا ما أروح..

بس عمي لح ودفعني لسيارة لـؤي 

خايف من لـؤي.. 

: فكينا ما بينا طلايب وي الدولة صاحب بنات أخاف عليهن روحي و أنة أكول لرجلج أجه أبوها أخذها.. 

: بس.. 

طلعت و لـؤي.. جرني.. 

: أكيد ميمانعون تساعدين مرتي حامل و مريضة..

رديت : وظف عاملات

: العاملات ميبقن لليل ما أثق وضعي حساس بالدولة وعندي ناس مهمين ونخاف من الجواسيس أنتِ ثقة بنتي 

وأريدج تباتين تدارين أخوانج زغار

أصريت ما أروح بس دخلني السيارة بالقوة حتى عمي ظل مستغرب بس سكت يخاف جان بيته هادئ بي حرس و حمايات من جديد لاحظت تواجدهم و سيارات الهم عبالك داخلة مقر أمني مو بيت. 

: ترى آني حامل..  

ضحك : قابل نغتصبج؟ 

وسعت عيني شلون يحاجيني بهيج أسلوب شلون أب هذا بس هو شخلى للابوة أب بلا ضمير وشرف.. 

كذاب لكيت مو بس عاملات حتى كاوليات مدري حفل مدري شنو أغاني بالحديقه و الشرب عالك لعبت روحي رحت تقيأت بالحمام لازم أهرب.. 

طلعت وآني أموه وأبتسم للضيوف وأحرك بيدي عود أتمركص وياهم لأن ذابيها ركص هم وشلة بنات

و آني أجر برجلي للباب بس درت وجهي للباب أنصدمت مـاجد.. هناك واكف أول ما دخلوه بس شفته بالباب كتلهم.. 

: عوفوه..  

جنت يم الباب أنتظر فرصة أهرب بين ما لـؤي.. ملتهي دخل ماجد يباوع وضع معجبه ركضت..

: همزين أجيت يله نروح.. 

الحمايات تباوع ما منعوا بس موقفه دمر زواجنا و دمر كولشي

: لا أبقي كملي الحفل والهز شفت بعيني خو هسة رحـمة.. مموجوده و ما حجت وتنكرينها هسة هم تنكرين عيوني أبقي بنص الزلم والكاولية هذا مستواج باجر ورقة طلاقج توصلج لو أعرف وراها أنعدم بعد ما تصيريلي مرة و ياريت تفهمين أبوج أنتِ اللي راغبة بالطلاق زواج فاشل ما توفقنا   و برغبتج الطلاق ما أريد أتضرر آني وأهلي مفهوم.. 

يحجي بهدوء وجهة مشدود معصب بس حسيته خايف من نتيجة هيج خطوة. 

: الي بطنج إذا مو أبني مريد تنسبيه الي لا تجبريني بي تنتهزين منصب أبوج دبري حالج..

جان يحجي بخوف لا أصيح لـؤي.. يحس هو بنص عائلة ممكن تجبره يستر زنا وأبن زنا والثمن هو وأهله ما ينسحلون معتقل وأعدامات.. 

: أبنك متأكدة من شرفي.. 

: هة.. 

وطلع أباوع لدماري حقق لـؤي إنتقامه مريض نفسي وماجاي أعرف دمرني لو دمر هـديل بية عقلة شيوحيله ما أعرف بس هـديل هربت وآني تحملت إنتقامه 

الغريب طلعت محد منعني هنا عرفت المخطط كل هذا لطلاقي.. 

أمشي لبيت جدي مريت ببيت بابا سـهيل.. بقاياه لسة بعدها دليل على دمار هذا البيت كمبصت كبال أطلال بيت بابا سـهيل.. وآني أبجي.. 

وينك من بعدك أنذليت و العالم تبيع بيه ظليت أبجي أنوح وأتمشى بين الأطلال هنا غرفتي بقايا منها باقي هنا الصالة بقايا مدمرة هنا تربيت وهنا أجتثيت وهنا خطاياي أول خطيئتي من عاندت أمي وبابا سـهيل وبالبوكات أشوف لـؤي.. 

رجعت للشارع وعيني هنا بحنين لبيت سـؤدد.. بيتهم مهجور والباب مقفول بسنسلة ومكتوب الدار للبيع و الظاهر محد يقبل يشتريه العالم تخاف 

الحسرة بداخلي أكيد تزوجت هسة حـسن بس بقت بخاطري محملتني ذنب خوالها اللي أنقتلوا تشتتنا و تفرقنا لـؤي.. حتى شلتنا دمر وصالها وكلمن حارت بروحها و كلمن بمكان صارت.. 

مشيت لبيت جدي لمحت عمتي بالباب بيدها كيس زبل خلته بالحاوية بقت واكفة بالباب وهي صافنة وكفت يمها 

: مـاجد طلقني بسبب أخوج تدمرت عمة.. 

محجت عافتني ودخلت بصمت دخلت وراها و آني أبجي الخنگة داخلي جبيرة وكعدت منهارة.. 

شوي أجت عمتي بيدها صينية بيها مي وعصير خلتها كدامي على الطاولة وكعدت باوعتلي وهمست وهي تشرد بعيونها عن عيوني بذنب حجت.. 

: ما صدكناج طلعتي ما تكذبين أعتذر كل كلامج عن لـؤي.. كلام صحيح.. 

أباوع وجهها مضروب أكيد لـؤي.. 

رجعت سألتني.. 

: متعاركة وي رجلج شبيج خلي أفهم.. 

: تطلقت بسبب أخوج آني تدمرت بيتي أنهجم بسببه.. 

ظربت خدها.. 

: صخام الصخمني شنو تطلقتي ولج عاشكج وسوى مستحيل يتزوج وحدة مثلج.. 

 

دنكت : ​إذا أكولج أبوي التحفة هو إلي سعى لهذا سنين و هو يخطط و يمهد ويتدرج بإنتقامه من بنت هـديل يستلذ بكل تفاصيل هالأنتقام بكل بطء ودقة الا أن ضربني بالقاضية بس يا عمتي راح يتوقف على هالدمار؟ لو بعد أكو دمار نفسي وجسدي.. 

ظليت أشهك و أبجي كامت كعدت يمي حضنتني.. 

: هو لويش هيج يأذينا لويش شنو الغاية والمبرر من كل هذا..

رديت بغضب

: مريض نفسي واحد يشتغل أمن و استخبارات شتتوقعي.. ملاك؟! 

سكتت لأن رن التلفون ترخصت.. 

: شوي وجايتج.. 

رفعت التلفون وأجاها خبر خلاها تنهار تدك و تلطم وتصرخ على صريخها طلعت جدتي مبين جانت نايمة هم كشفته أكيد صاير شي وياهن و لـؤي يجوز مواجهة الله يدري.. 

: يمة سواها لـؤي.. يمة طلع حجي مـاجدة.. صح يمة راح رجلي تيتمت بناتي.. 

لا خلت وجه ولا شعر ما مشعته جدي بكرسيه طلع ورى بيبي يبجي مهموم  ويلوم بيبي.. 

: هااا ام ريمة.. هااا إبليس هذا بعد وبعد.. 

باوعت لجدي..

: جدي بسبب لـؤي.. عافني رجلي جدو دبرني مـاجد.. ميصدكني عباله أخونه تطلقت جدو خسرت رجلي.. 

ومنا عمتي هم كابلته تلطم على رجلها و تدعي على لـؤي.. حسيت بجدي  يختنك ظلينا نصارخ صار ازرك و كوة يتنفس تراكضنا بي للمستشفى يومين بالإنعاش..

بهاي اليومين لـؤي.. طلع رجل عمتي إللي تهمته تحريض ضد الحكومة و موقعي تعهد ميدخل بأمور السياسة و مزينين حتى شواربه داكيه كتله من كتله طلع مو هو النعرفه المرح اليحب نقاشات طلع شخص خايف منهار مهزوز الله يدري شنو شاف بالمعتقل.. 

: كلولي مرة التجي نكص لسانك أحمد ربك غيرك تصعد أوراقه للأمن العامة بالعاصمة و مصيره أعدام بس السيد لـؤي.. تعهد وكفلك.. 

باوع لعمتي ويحجي 

: هذا ميعوفني لازم نترك الوطن نسافر منبقى بعد هذا مو ثقة.. 

صوت عمتي تبجي وهي محتارة متكدر تعوف أهلها.. 

: وأهلي؟ شلون.. 

: آني أطلع أنتِ أخته ميحاجيج يمتى متقرري تتبعيني أدز عليج..  

وهاي عمتي رجلها عافها و سافر و ترك الوطن يخاف لا ينقتل و حقه وبقت يمنا و آني وصلتني برقية محكمة طلاق غيابي هنا تثبتت رسمياً مطلقة.. 

 

​توفى جدي ورى طلاقي بأسبوع بيومها رادني يحچي وياي و عيونه مليانة سوالف وحسرات ما كملت أنكطع النفس وغادرنا.. 

ومن يومها البيت غص بأزمات حزن وبدا لـؤي.. يتفرعن ويتجبر بينا وبيبي من حزنها على موت جدي أعتكفت بغرفتها وعمتي همها بناتها وأبنها وآني ما أعرف شضاملي إلزمن.. 

ظليت قلقة حـارث طلع لو لا حيل گلبي ندسني على حـارث.. مكدر أخابر لأن لـؤي لغى التلفون و سكن بيت جدي الكل متجنبه ويخاف منه جاب زوجته و جهاله هنا أما بيته ذاك معرف يمكن صار منتجع لكعداته 

جانت رنا.. صفرة و حالها ما يسر الخاطر خاصة بعد ما سقطت طفلها سائت صحتها كولش و لـؤي.. يباوعلي و هو يبسمر.. 

: بس تولدين هذا الـ * ببطنج آني الج.. 

حيل خفت قررت أهرب بس شلون؟ وهو مخلينا كأنما أقامة جبرية خاصة آني ممنوعة من الطلعة بس خلي أهيء جنطة ملابس أحتياط والله كريم..

صعدت احضر غراضي باوعت للحرس من الشباك مااعرف شعور خفي و نغزة بگلبي خلتني التفتت لراس الشارع 

و شفت مـاجد يدخل بشارعنا وكف منتجي على حايط الركن مقابلنا   ورفع راسه لجهة غرفتي وراها راح وهو مدنك حسرة داخلي ولك ليش وصلنا لهيج نهاية وحبنا جان أجمل حب..

أستمرت هاي اللقاءات الصامتة عن بعد ونظراته لجهة غرفتي هالخليط من نظراته المحمله غضب وحزن و خذلان  وقسوة مكتومة دنكت أبجي رفعت راسي مالكيته

حاولت أهرب بس صعب لـؤي.. مأمن البيت كولش جريت نفس شوي دخلت عمتي بعيونها حقد.. 

: أبوج يريدج و جايبلج...... 

من حجايتها لطمت وسعت عيني.. 

: شنوووو؟