رواية حكاية ترف الفصل الثالث بقلم OAS
يَعودُ بِيَ الحَنينُ لِذِكرياتٍ ليسَت بِبَعيدَة....
ذِكرياتٍ استَعصَت عَلَى النِّسيان.....
وَتَختلِط داخِلي المَشاعِر....
لا أدري....
أَأبتَسِمُ عَلَى إرثِ ذِكرياتٍ لَن يَتَكَرَّر؟؟...
أمْ أبْكي عَلَى ماضٍ وَلّى وَلَن يَعود؟؟...
بعد انتهاء أربعينية بابا رجعت ماما واخوتي ويه خالو دلير لأربيل وآني بقيت يم بيبي واستمرت ايامي عادية خصوصا بعد ما بدا دوام المدارس
وچان جدو كلش حريص على دوامي ودروسي ولأن هو مرات يكون ملتهي بشغله كلف اولاد عمي همه الي يتابعون دراستي وچان شهم هو الي يوديني ويرجعني للمدرسة رغم أن اخو ايمن ويايه بنفس المدرسه والمفروض نروح ونرجع سوا بس هذا اقصد ايمن چان كلش وكح مايمشي عدل يضل يتزابگ بين السيارات لو يشمر حجار على الچلاب أو البزازين الي بالشارع لو يرافق ولد ويضلون بس يتراكضون ويتمضحكون يعني بأختصار المسير وياه غير مريح
وتولى المهمه شهم وبأمر من جدو
وحتى من نرجع للبيت واول مانطب يسلمني بيد بيبي ويگولي يله غسلي وتغدي وارتاحي واجيچ المغرب نحضر الواجبات
وچان فعلاً يجي المغرب ويراجعلي كل دروسي درس درس ومن أخذ عشرة بالامتحان چنت اشوفه يفرح ويشجعني حتى احافظ واستمر بهذا التفوق
وكل يوم چنت اسأل بيبي باقي كم يوم وترجع ماما واخوتي ... لأن رغم إهتمام الجميع بيه بس تبقى الام والاب والاخوه الهم أهمية خاصة عند كل واحد.. مرات اسمع بيبي تبچي وتنعي على فراگ ابويه لكن بصوت واطي حتى لا نسمعها آني أو جدو بس چنت اختل وره باب غرفتها واظل ابچي على صوتها رغم آني بوقتها ماچنت افهم هي شجاي تگول
وچانو كل خميس يرحون بيبي وجدو وواحد من عمامي للنجف لزيارة امير المؤمنين وهم زياره قبر بابا الي آني في ذلك الوقت ماچنت شايفته وحتى بيوم الأربعينية ما خذونا وياهم بأعتبار احنا بعدنا أطفال وطريق المقبرة صعب علينا
بهاي الفترة اقترح جدو يشتري قطعه ارض بنفس منطقتنا ويبني بيها بيتين توِن واحد العمو فارس والثاني النا وحتى نكون مستقلين وعين بيت عمو علينا وهم قريب على بيت جدو
وافق الجميع على هذا المقترح وبدأ يسأل ويدور على قطعة أرض او بيت قديم حتى ينفذ هذا المقترح
وبعد أيام اجه عمو ليث وگال شفت مكتوب على بيت ولد اعرفه بمنطقتنا وهم چنه سوه بالمدرسة مكتوب على بيتهم للبيع
من صار العصر عمي وجدو راحوا لمكان هذا البيت والي عرفو أن البيت چبير 600 متر والمشتري لو ياخذه كله لو يتقسم حديقه 300 او بيت بناء 300 وجدو اختار الحديقة حتى يبنيها بيوت اثنين واحد النا وواحد لبيت عمو فارس
وبلشو بالبناء بيتين متساوين بالمساحة والخارطه وكل بيت عبارة عن گراج وحديقة زغيره ومطبخ وحمام وصاله وغرفتين نوم جوه وفوگ غرفة وحده . وچان البناء
ويه عودة امي واخوتي بعد انتهاء العدة وهم چنه على وشك أن تبدي امتحانات آخر السنه ..
من رجعت امي للبيت صارت هي تقريني وتدرسني وحتى مرات هي توديني وترجعني من المدرسة وچان غرضها من هذا العمل اولا لازم نعتمد على نفسنا وما نخلي اي احد يحير بينا وثانيا حتى شهم يدير باله على دراسته لأن هو هم طالب وعنده دراسة وتحضيرات وما يصير انشغله عنها
بس من ابتعد شهم مني حسيت بفراغ وضوجه طول اليوم وگمت اتحجج حتى اروح يمهم ..همه چانو ساكنين ويانه بنفس البيت وهم بالدور الثاني احنا چان عدنا غرفة وحده وهمه غرفتين للنوم وحمام خاص الهم بس المطبخ والصاله والهول مشترك للكل
چنت اروح واگعد يم خاله سعاد وابدي اسألها وين شهم لان اريد يكَتبني هذا الدرس لو أريده يحفظني هذا الموضوع وچانت هي خطيه تركض تصيحه ويعوف دراسته في سبيل يقريني ومن ماما تگولي مو قرينا وكتبنا هذا الدرس بعد ليش تشغلين الولد عن دراسته أگولها ماما آني تعلمت على طريقة شهم بتحضير الواجبات
وبوقتها چنت طفله وچنت احس بشهم گأنه الشخص البديل عن بابا ...
امتحنا ونجحنا كلنا آني وأيمن وتميم وشهم وآني اصلا طلعت الأولى ودرجاتي كلها عشرات واول ما استلمت الشهاده رفعتها للسما وگلت بصوت ناصي بابا نجحت وطلعت الأولى مثل ماچنت تريد
جدو وبيبي وامي وعمامي جابولي هدايا النجاح من لعب وملابس بس چانت هديه شهم مميزه بالنسبة الي چانت عبارة عن دفتر مذكرات وبي قفل وگالي اكتب بي الاشياء الاحبها أو الامنيات الي أتمنى تتحقق أو المشكلات الي تواجهني أو الملاحظات الي اكتشفها
وكل شي راح تكتبيه هنا راح يبقى سر بيبنچ وبين هذا الدفتر ...
وآني خلال اسبوع خلصت نص الدفتر ، بحيث كلشي اكتب بي ... وحاليا من مرات أطلع هذا الدفتر واتصفحه اضحك على هاي الكتابات وعلى هاي المشاكل الصعبه الي چنت اعاني منها واكتبها
ومن هاي الكتابات : بيبي تغصبني كل يوم الا اشرب الحليب لو امي تمنعني آكل النستله بالليل حتى سنوني ما توجعني لو عمو ليث اليوم ماجابلي الچبس الاحبه لو شهم ما حچه وياي من فات للبيت... ومن هالشاكله چانت مشاكلي اليومية
ومرت ايام العطلة الصيفية سريعا والي بيها كمل بناء البيوت واستعدينا احنا وبيت عمو فارس حتى ننتقل بيهم...
جدو اثث بيتنا من غراض مطبخ وتخم قنفات وتلفزيون واثاث لغرفتنا احنا آني وأختي
وبعدين صارت تجينا هدايا من الأقارب والجوارين وهم من خوالي الي اجو قسم منهم حتى يباركولنا على البيت
وصارت النا اني ورهف غرفة مستقلة لان احنا سابقاً چنا كلنا انام بغرفة ماما وبابا
أما سيف بقى ويه امي بغرفتها لان بعده زغير
وچانت فرحتنا چبيره آني وأختي لان صار عدنا كنتور خاص بينا وصار لكل وحده قريوله وكومدي ومكان للقراءة وعلگنا لعاباتنا على الحايط
وخلال العطلة چان شهم يأخذ دروس خصوصيه مال سادس اعدادي وچان نادرآ نشوفه گاعد بالبيت وحتى من بدأ الدوام هم چان ملتهي بدروسه
من صرت بالثاني امي بدت هي تقريني وتتابع دروسي وسجلتني خط يوديني ويرجعني من المدرسة
وچانت تسألني كل يوم شصار مصار وشسويتي وويامن حچيتي ويامن لعبتي... وهذا كله من حرصها عليَّ... وچنت كل شهر اطلع الأولى ومرات بيوم الخميس برفعة العلم يصيحون اسمي ويه الاوائل والمتفوقين وكل طلاب المدرسة يصفگولنا ...
من صرت بصف الرابع تسجلت وياي رهف وچنت آني المسؤوله عليها أثناء الدوام وكل فرصة اروح يمها وناكل ونلعب سوا
وچنا متفقين آني ورهف من نگعد الصبح اول شي نسوي نصبح على بابا بالسما وحتى من ناخذ الشهايد نفرحه ونگول بابا آحنا نجحنا
استمرت حياتنا عاديه وامي هي الي اتابع دراستنا وتحضيراتنا وحتى من سجلنا سيف چنت آني بوقتها بالاول متوسط وچانت رهف هي المسؤولة عليه بالمدرسة
علاقتنا وي بيت عمي قوية جدا وكأننا بيت واحد
چانت عمه سعاد مرت عمي فارس صديقه واخت مقربة لأمي صح هي أكبر منها بأكثر من عشر سنوات بس چان بيناتهن محبه وموده اخويه.. ووحده تستشير وتأخذ رأي الثانية وحتى من يرحن للسوگ چانن يرحن سوه
أما اولاد عمي شهم وتميم وأيمن جنه نعتبرهم اخوتنا وخصوصاً شهم چنت أعتبره ولي أمري.. هو من كمل اعداديه ودخل كلية العلوم بجامعة الموصل لكن من وصل مرحلة ثالثة بسنة ٢٠٠٣ سنة سقوط النظام چانت الأوضاع غير مستقرة وچان السفر من والى الموصل صعب جداً لذلك بطل وترك الدراسة والدوام... وبعدها بسنه يعني بـ ٢٠٠٤ حاول ينقل دراسته لجامعة بغداد لكن هم ماصارت
وبسنة ٢٠٠٥ قدم على الكليه العسكريه وانقبل بتوصيه من خالي دلير
(خالو دلير بعد السقوط اجه سكن هو وعائلته في بغداد لأن هو صار شخصية بارزة في الحزب الديمقراطي الكوردستاني)
وچان جدو يوميه العصر يمر علينا بالبيت ويطينا يومياتنا ويجيب مسواگ وياه وهم قبل مايطلع يسأل امي
- جدو : ها بويه ام سيف محتاجه شي باچر اجيبه وياي
وأمي تضل تتشكر منه ومن فضايله علينا
وهو يگولها : بويه هذا واجبي وهاي فلوسكم من حصة حسام الله يرحمه من المجمع..
عمي ليث تزوج وحده من گرايب بيبي اسمها إيمان وهي هسه الدايره بالها على البيت وعلى بيبي وجدو وصار عدهم ولد وبنيه (محمد وزينب)
ورغم شهم چان طالب بالكلية العسكرية وملتهي بدوامه بس چان من ينزل بإجازته يبقى يوميه العصر يجينا للبيت ويصيح من الباب الخارجي وينها ام سيف وأمي رأساً تلبس حجابها وتدخله للبيت، وچانت تعتبره رجال البيت يعني هو المسؤول عن دفع المي والكهرباء والسحب والنفط والغاز وبعدين عن الانترنيت
وچانت تگول شهم واخوته همه اخوتكم الكبار ولازم تسمعون كلامهم
وبسنة ٢٠٠٨ تخرج شهم وصار ضابط عسكري برتبة ملازم ⭐
وآني بوقتها چنت بالرابع إعدادي ولأن امي شافت هاي المرحلة صعبة وماتگدر تفهمني بعض الدروس وخصوصا الدروس العلمية وحتى درس الانگليزي قررت تسجلني دروس خصوصيه عند مُدرسات بمنطقتنا لكن شهم رفض وگال هو يدرسني ويفهمني كل الدروس وراح يخصص ساعه او ساعتين يوميه نحضر بيها المواد الدراسيه
وكل جمعه نسوي مراجعة كاملة لجميع الدروس
ومن هنا بدأت قصتي مع شهم
