رواية حكاية ترف الفصل الرابع بقلم OAS
حين أحببتك...
أغلقت على قلبي أبواب الحياة...
واكتفيت بنبض عشقك ...
فهو حب عمري وروحي ...
كالنور الذي يضيء دربي...
ليس مجرد شعور...
بحبك :
أجد السلام في الفوضى والقوة في الضعف...
إنه السر الذي يجعل قلبي ينبض بالأمل والحرية...
ترف
چنا تقريباً كل جمعة ننجمع أبيت جدو من يسوون ثواب على الغده نروح احنا وبيت عمو فارس وچانت امي وعمه سعاد يبلشن بالطبخ وآني ورهف ومرت عمو ليث نحضر السفره والتقديم وغسل المواعين وبعدين قبل ما نطلع أنظف البيت وحتى نغسل الگراجات
مع العلم احنا آني وأختي ابيتنا كلشي مانسوي لا شغل ولا عمل
لأن امي ما معلمتنا ولا هم ترضى نسوي اي شي بالبيت همها الوحيد نقره وندرس ونحظر واجباتنا وهي عليها كلشي من طبخ وتنظيف ومسواگ
بس من چنت اساعدهم ابيت جدو واشتغل وياهم امي ما چانت تعترض وچانت عمه سعاد تگلي والله أنتي معدله هنياله الياخذچ ويحطچ ابيته.. هم جمال وهم أدب وهم شغل معدّل .
لومرّه گالت كون تصيرين من نصيب واحد من ولدي (ماحددت منو من ولدها) والله ادللچ دلال
وهنا بدت شرارة بعقلي وهي أصير من نصيب واحد من ولد عمي وماكو غير شهم لان هو أكبر واحد وهم هو لازم يتزوج اول واحد وبديت أسوي بخيالي قصص للحب نعيشها آني وشهم ، لكن الشي الجاي أشوفه أن شهم علاقته بيه علاقة اخ چبير أو ولي أمر يعني مرات ينصح ومرات يعلمني الصح من الخطأ وشلون أتصرف بكل موقف أو مشكلة تواجهني وحتى مرات يعاملني كأني طفله وآني صح چنت زغيره بذلك الوقت چان عمري ١٥ سنه
وهنا بديت أفكر شلون اجذب انتباهه إلى هذا الحب الخفي ، لازم اخلي يعرف بحبي اله ولازم يبادلني هذا الشعور
واجتي الفرصة المناسبة وبالتحديد بسنة ٢٠٠٨ من نجحت للرابع إعدادي وأمي قررت تدخلني دروس خصوصيه لأن صارت ما تگدر تقريني و تفهمني مثل گبل يعني صارت المواد أصعب وخصوصاً مادة الانگليزي والمواد العلمية
بس شهم رفض هذا الاقتراح من أمي وتكفل هو يدرسني كل المواد وگلت ويه نفسي هاي الخطوه الاولى لحبنا آني وشهم خصوصا من
اتفقنا يجينا يوميه وره المغرب حتى يشرح لي ويدرسني ويحل وياي التمارين حسب الجدول الدراسي مال كل يوم
آني بصراحه چنت مسيطرة على المواد لأن آني بطبيعتي درّاخه وذكية وچنت مصره على النجاح بتفوق حتى اگدر أدخل للمجموعة الطبيه أن شاء الله مثل ماچان يريد ويتمنى بابا الله يرحمه
بس هم چنت أسوي نفسي محتاجه لمساعدة شهم بالشرح حتّى يجي يمنا واشوفه واگعد يمه من يشرح لي المواد كل يوم
ومن چان يمتحني أو يسألني واجاوب صح يبتسم ويگرصني من خدي ويگولي عفيه بالشاطره چانت هاي الحركة وهاي الابتسامه تسوى عندي الدنيا كلها
ومن چنت أبشره بالنجاح بعد كل امتحان چان كلش يفرح ويگول الحمدلله هاي ثمرة جهودنا وتعبنا
ومن مرات يراجعلي يگولي تره انتي حافظه ودارخه الدروس بعد ليش اضيع وكتچ بالمراجعة
اگوله لا عفيه تعال سمعلي حتى ابقى مسيطرة على المواد.. ورغم چنت أو احاول ان اجذب انتباه شهم لحبي اله لكن كلها چانت تفشل بسبب آني خجوله ومتردده واستحي وما تطلع مني كلمه او تصرف خارج حدود الأدب وهذا الشي الي ماما ربتني عليها
وبقى هذا الحب ضامته بگلبي وهاي المشاعر مكتومه بروحي ما يعرف بيها لا شهم ولا اي احد
خلي احچيلكم شويه عني
آني وأختي رهف شگرات على ماما يعني بياض بشره وشعر اشگر وعيون عسلي بس آني قصيره على ماما ورهف طويلة على بابا
واثنينا اجسامنا رشيقه وملامحنا وتقاطيع وجهنا عاديه يعني بأختصار نگول متوسطة الجمال لان بعدنا اشكالنا طفولية
بالبيت يصيحولي (توته) ورهف يدلعوها (فوفو)
اما اولاد عمي (شهم وتميم وأيمن) چانت أشكالهم وأجسامهم مثل بابا وعمامي من طول القامة وسمار البشره والشعر والعيون السوده واصواتهم الخشنة
صح همه أشكالهم ما متشابهه يعني كل واحد شكله يختلف عن الاخر بس تبقى لمحة الوسامه الرجوليه تجمعهم
وچنا كلما ننجح آني واخوتي چان الكل يفرح بهذا النجاح وخصوصاً امي وشهم لأن چان هذا النجاح هو ثمرة جهودهم
وچانت الهدايا توصلنا (هدايا النجاح) مع كل واحد من المهنئين.. جدو چان يطينا فلوس لكل واحد 25 الف
وعائلة عمو فارس يجيبون علب حلويات ومرات ملابس
بس هدايا خالو دلير چانت هدايا مميزه وثمينة وهي قطع ذهب إلي والرهف وحتى الـ ماما لان الأكراد بطبيعتهم يحبون ويهتمون بالذهب
ومن نجحت هاي السنه من الخامس علمي جابلي خالو موبايل إسمه فراشه الي چان يعتبر جهاز حديث ودرجة اولى
احنا بذاك الوقت چان بس عند ماما موبايل صرصور وچنا كلنا نستعمله وخصوصاً بالالعاب لان بعدنا زغار
أما شهم من شاف موبايلي الجديد بدأ يطيني تعليمات وتوصيات ونصائح على استعماله ، وأكد عليَّ ما أنطي رقمي لأي أحد غير أفراد عائلتنا بيت جدو وبيت خالو وطبعاً بيت عمو فارس
وگالي في حال صارت عندي صديقه وطلبت الرقم لازم لازم يكون عدها موبايل يعني مو تستعمل موبايل أخوها أو ابوها لأن رقمي راح ينخزن بذاك الموبايل ههههه چنه بعدنا نعتبر هذا التصرف دخيل علينا وبي مساوئ وسلبيات رغم فائدته وايجابياته. طبعأ بذاك الوقت ماچان اكو وسائل أو مواقع للتواصل الاجتماعي مثل هسه يعني لافيس ولا ڤايبر ولا ماسنجر وچان الموبايل بس للاتصال والمسج
ومن نجحت للسادس صار لازم أسجل بأحد المعاهد المختصة بتدريس المواد الدراسيه وباشراف أساتذة أكفاء وعدهم خدمة طويلة بمجال التدريس
وبلشت من بداية العطلة الصيفية آخذ محاضرات وچان كل يومي اگضيه بين دراسة بالمعهد ودراسة بالبيت
وبهاي السنه انتقلت بغرفه وحدي حتى اكرس كل وقتي للدراسه فقط وما التهي بالسوالف ويه رهف وسيف
وصارت غرفتي الجديدة بالطابق الثاني وتكون ملاصقة لغرفة شهم وچنت مرات أسمع صوته أو اتخيل جاي أسمع صوته واتخيل حركاته بالغرفه وحتى مرات اشتم عطره أو ريحة الجگاير مالته وهذا نتيجة الهَوَس الي بداخلي هَوَس إسمه شهم
ورغم هاي الفترة التهيت بالمحاضرات وچنت نادرآ اروح ويه اهلي بيوم الجمعه لبيت جدو بس مره من المرات من چنت يمهم سمعت ايمان مرت عمو ليث تسأل عمه سعاد
- ايمان : ام شهم شعجب الهسه ما چننتي (بمعنى مازوجتي واحد من الولد وصارت عندچ چنه)
- سعاد : ان شاء الله عن قريب نزوج شهم
- ايمان : يعني لگيتو عروس لو هو عنده وحده ورايدها
- سعاد : هو كلفنا إحنا نختارله
- ايمان : عاد لگيتو لو بعدكم تدرون
- سعاد: بنات الحلال هواي بس آني إبالي وحده وان شاءالله تصير من نصيبه
وآني احس الفرحة ملت گلبي لان اكيد هي تقصدني
بس شلون اعرف هو يحبني لولا وشلون أصير من نصيبه
وقررت اول شي لازم اغيّر نفسي يعني اغير شكلي ولبسي وشخصيتي وطريقة كلامي
لازم أصير چبيره واصير الآنسة ترف
وثاني شي لازم اتقرب منه ونقضي وقت سوه وهذا التقرب راح يكون عن طريق الموبايل
وبديت أشتري ملابس وعطور ومكياج
وگمت يوميه اخابره واسأله شلونك واحوالك ومحتاجة مساعدتك بفلان موضوع وبفلان مادة وشلون احل هذا السؤال وچنت اچذب عليه من اشكيله أن المدرسين الخصوصيين مايشرحون المادة بشكل كافي وجاي اشوف صعوبه بفهم المواد وچنت كلش افرح من اشوفه يهتم ويقلق من تواجهني مثل هيچ مشاكل بالدراسة
ورجعنا اتفقنا مره ثانيه أن نلتقي يومياً بالليل أما هو يجي يمنا لو آني اروح يمهم بالبيت ويشرحلي المواد الي جاي اشوف صعوبه في فهمها
چنت البس ملابس تجذب انتباهه مثل بنطرون لازگ لو ثوب قصير ويه حد الركبه او فتحت صدر واسعة وشويه تبين من حمالة الصدر الي لابستها....
وچنت هم احط عطر مثير ومكياج مناسب وخفيف
وغيرت تسريحتي الازليه من ظفيره أو ذيل حصان إلى شعر أشقر طويل منسدل على الأكتاف
ورغم چانت لقاءاتنا واحاديثنا تدور حول الدروس وحل التمارين لكن بديت الاحظ توتر شهم لما اگعد بصفه واحس بأنفاسه القريبة مني لما يستنشق عطري ورجفة أيده العاشقه لما تلامسني ودگات گلبه لما آگوله عفيه شهم عيدلي شرح هذا الموضوع لكن اگولها بنعوَصه مغريه
