رواية لأني عاقر الفصل الثاني والثلاثون بقلم مريم خفاجة
يا ترى. تستمر. مع غيث. ولا. لا
؟؟؟؟؟؟
وأيّ جَمالٍ بَعدَ عيْناك يُذكر؟
#لأني_عاقر
#البارت_الثاني_والثلاثون
#مريم_الخفاجي
صوتوا للبارت+تعليق بين الفقرات+متابعة
لحسابي _mariam_alkhafaji_ لُطفاً..
ــــــــــــــــــــــــــــــــــــــــــــــــــ
...
نمت؟
غمضت عيني؟
لا
بحيث رحت للصالون عيوني حمر
دم
وامي تهدي بية
ايمان:-ولج يمة هسة اليشوفج يگول
جابريج ؏ الزواج
ملاك:-ما نايمة
ايمان:-ليش مانمتي
ملاك:-من السعادة
ايمان:-اوف منج ماينگدرلج والله العظيم
سكتت ومنتضرة دوري
ساعة وصاحتلي وحدة من الموضفات
گعدت ؏ كرسي وفليت شعري
المبلل
وهي گالت:-عفية همزين سابحة حتى
ماتتأخرين
ماجاوبتها وبدت تنشف بشعري
واني مغمضة عيوني حد ما كملت
غافية اني بس احس بيها
شدتسوي
ايمان:-يمة گومي هاي نمتي صدك
ملاك:-تؤ كاعدة بس ارتاح شوية
راحت جابتلي
ماي بارد ثلج شربتة
واحسة تيزاب مو ثلج
ايمان:-اضحكي ابتسمي شبيج
گالبة گصتج
ملاك:-يمة مابية شي وخري
اخذت البدلة ودرت روحي
لأمي نزعتني السيت اللابستة ولبست
البدلة من جوة وهي شدتلي
القيطان
ملاك:-ضبي
ضبتة أكثر
ورجعت شعري رتبتة
جنت مخليتة مفتوح ؏ طولة
بس بف من فوك وتاج
ومكياجي ماروني واسود
ماختاريتهن امي مختارتهن
وگفت گبال المرايا
والموجودات يباوعلي
وامي تعطر بية
اذا تدخلون لداخلي
فـ ما جاي احس بأي شعور
داخلي فارغ تماماً
لبست حتى نطلع
اجانة جاسر صعدت بالسيارة
بدون ما اسلم ولا احجي حرف
وامي بقت تحجي ويا
جاسر واني صافنة ؏ الشباك
وصلنة للقاعة
جان هو مأجرها
قاعة صغيرة دائرية
بس الاقارب
تلگني خواتي
شلت بدلتي ودخلت لغرفة
التبديل وأمي كالت:-هسة يجي غيث
بالطريق ضلن يم اختجن
گعدت وهنه يمي
ريم:-حبيبتي ليش ضايجة
ملاك:-مالي خلك
ملك:-لاتطنگرين ملوكة
ترة هو يوم من العمر
ضحكت:-هذا ثاني يوم
ملك:-استغفرالله يالله هسة يجي
الولد وتطنگر بوجهه
ريم:-عوفيها اسكتي
سكتت وهي تدردم بينها وبين نفسها
واني ساكتة العب بالمسكة
اندك الباب وصوت غيث اجة
غمضت عيوني وبقيت مدنگة طلعن
ملك وريم واني حسيت بي دخل
اختنكت والهوى شح من المكان
وهو تقدم
مد ايدة گبال وجهي
ورفعة
غمضت عيوني بسرعة همس:-افتحي
عينج بابا
فتحت عيوني دنك باسهن
بخفة بدون مايضغط عليهن وحط
ايدة ؏ متوني وگمت صرت گبالة
دنگت اعدل بالبدلة
رجع رفع راسي
وهمس:-فكري بكلشي يضوجج لاتضايقين
اذا تردين الغي العرس هسة اذا مختنگة
ابجي ولاتهتمين للمكياج يخرب
ميخرب ابجي معليج بالدنيا كلها اعرف
ماضيج صعب ومقدر هالشيء
بس اوكفي وياي وتناسي
ماگلج انسي وهي العافية بالتداريج
شوية شوية تگدرين تنسين كلشي
بس حطي ايدج بأيدي
همست مختنگة:-ماگدر
غيث:-تگدرين بس انتي ما منطية لنفسج
مجال ماجاي تباوعين عدل للگبالج
هزيت راسي بـ لا ونزلن دموعي
ملاك:-آسفة
حضني حيل واني احاول
ماخلي المكياج يصير ؏ قاطة
وخرني عنة ومسح دموعي واخذ بطل
مي وشربني وباسني بگصتي
گعدت ؏ التخم وهو واگف ولازم ايدي
وكل ساعة باسها
حد ما اجت رغد وكالت يلا
تعالوا راح تصير الدخولية
اشياء سواها الي حتى انسي الماضي
بس جاي يأذيني اكثر مستقبلي
يأذيني والله
جريت نفس وغمضت عيني
وهو همسلي:-نطلع لو بعد ترتاحين؟
ملاك:-لا خلي نطلع العالم تنتضر
غيث:-انعل ابو العالم
ملاك:-امشي غيث
حط جف ايدة بأيدي وطلعنة
واغنية هادئة مفتوحة
والمصورة گبالنة تمشي
واحنة نتقدم
اباوع كلها مبتسمة
كلها فرحانة
حتى أمي الفرح طاغي ؏ ملامحها
اكثر من ذاك عرسي
جانت كلش فرحانة بشكل مايتوصف
خواتي حتى
الجانن يكرهن كمال
واتذكر قبل لا اروح للصالون
وهنه يگللي لاتروحين لاتتزوجين كمال
وحزنهن مبين انو هنه ماقابلات رغم
صغرهن
بس هسة هسة يختلف
ريم تصفك فرحانة وتسولف ويا البگدها
ملك تباوعلي بحب وفخر
وكأنما ثاقات بهذا الرجال راح
يحافظ علية
وكأنما الكُل يگولي بأبتساماتهم
وفرحتهم هذا الراح يحافظ عليج
بس گلبي گلبي مايقتنع بأي فكرة
عقلي وگلبي بأفكار مختلفة
وكفنة باكثر من وكفة حتى تطگلنة
صور المصورة
وهو يهمس:-هسة نخلص
قبل لا يطلع تبادلنة الحلقات
وكص كيكة وكلني قليل وهو ماراد
بس وجهه مبين الفرح لام ملامحة كلها
حتى واني بهذا الحال يريدني؟
هذا هو اقتنعي اقتنعي شتردين
بعد
كرهت نفسي كرهتها واني اشوف لهفتة
من يسلم ؏ عماتة وأقاربة
وكل ساع داير روحة يباوعلي
لحد ما طلع وهو يباوع لعيوني
خاف مقهورة؟
واني كاعدة العب بالورد الجابة
هو لونة ازرك وابيض
وبيها اسمائنة
والبنات يركصن كبالي
والمصورة تطگلي صور وامي
تروح وترجع
ورغد بثوبها الأسود وشعرها الأحمر
كل ساعة طاگتلها هلهولة تذكرني بوردة
؏ طاري وردة
خالاتي موجودات بيناتهن طفل
ابتسمت من شفتة علاوي هو انتبهلي وضحك
اشرتلة تعال
شاور مرت خالي عصام
وهي ضحكتلي وكالتلة روح
اجاني يركض
تقدم وحضني حيل وهو يگول:-مشتاقلج خالة
ملاك:-اني هم مشتاقتلك هواي
علاوي:-طالعة حلوة
ملاك:-انت هم حلو شوف صاير جنك عريس
ضحك بصوت عالي:-وانتي عروسة
ضحكت:-تتزوجني؟
علاوي:-بس اني زغير انت جبيرة
ملاك:-عادي جا واذا
علاوي:-وذاك الرجال هم عريس
وهو جبير
ابتسمت:-ماما ليش ما اجت؟
علاوي:-خالو كمال مريض
ملاك:-ليش مريض؟
سحبتة وكعدتة ؏ حضني
واني لازمة ايدة وهو يسولفلي:-جان
جاي من الدوام واحنة ناكل و وگع بالگاع ويصيح
بصوت عاااالي
ملاك:-شيكول؟
علاوي:-يكول اريد ملاك بعدين مات
ودوا للدكتور وصار زين بس بعدة يم الدكتور
مايقبل الدكتور يرجعة يمنة
ملاك:-وخالة ولاء
عكمش وجهه وگال:-جانت تغلط وتكول
شي مو حلو وضربت مصطفى واحمد
واياد
سحبتة من أمي وهي تخزرني
ايمان:-روح علاوي يم بيبي
باسني وراح
وامي همستلي:-ماتصيرلج جارة لا والله
ملاك:-يمة ترة ماسويت شي شمسوية
ايمان:-انتي وتالي وياج مو حتى احس
روحي ضلمت الولد وياج كافي تفكرين
بذاك الگـ**** مو انتي ردتي تتطلگين جا اذا
هيج تدورين اخبارة دوارة ماضليتي مثل
المطي وياه ماضليتي مذلولة وعوبة ولا كرامة
ولا احترام وياه
الانسان المحترمج ورايدج ماتردي بس هذا
المدمغ يبقة دومة مدمغ
استغفرت وهي راحت ضايجة
تبدلت فرحتها كلها
واني اباوعلها وادمع
خواتي يركصن
وعمات غيث الفرحة ما سايعتهن
الگاع كلها مالامتهن خذن القاعة
طول بعرض بالرگص
وام عبدالله التصيح ابني هذا
الربيتة وتعبت علي فرحتي هاي فرحتي
والثانية تردها
والثالثة تكفل
وماخلن كفلة وهوسة ماسونها
گومن الگاع وماگعدنها
ورغد ترگص ويا بناتها وريم وياهن
وخالاتي يباوعلي بأبتسامة وعيونهن تدعيلي
كلها شايلة همي وهم سعادتي
جا اني ليش؟
حد ما مرت كم ساعة
بدلت بدلتين وجانن كلهن مشترة مو أيجار
واني شايلة هم وين اوديهن
بس رغد كالت:-لا ولج صديقة عندة
صالون يبيعهن اله وذاك يأجرهن نوب
هزيت راسي واني ساكتة
لحد ما گالو اجت الزفة
خلن كبوس على وجهي
وسمعت صوت الهلاهل دخل و وياه
عمة ابو عبدالله وابوية وجاسر
باسني بگصتي
واني بست عمة براسة وايدة
وابوية هه
بوسني من ورا خشمة
حضني جاسر بكل قوتة وگال:-وهاي احلفلج
بهذا اليوم يا ملاك لو دمعة نزلت منج
من ورا اخفي من الوجود
وعدي هذا گلتة بزواجج من كمال
وخلفتة اعرف بس هالمرة لو ادري
الدمعة معلگة برموشج الغي من الكون وداعت
عيونج
ملاك:-جاسر ادعيلي صدري مقبط
غمض عيونة بهديني:-بس لتبالغين بالأمور
ياعيني خليها ورا الله
هزيت راسي وهو نزل الكبوس ؏
وجهي ودار وجهه لغيث المتوتر
ويفرك بأيدة:-شوف لك انطيتها الك
من ثقتي بيك وحق محمد لو اشوف عيونها
مدمعة افصمك فصم والحسين
غيث:-بنص عيني اخليها لاتخاف أمن
جاسر:-الله يخليكم
لزمني غيث وهمه كبالنة
والبنات شايلات فستاني
واني وياهن
وغيث لازم المسكة
صعدني بالسيارة باوعت
لأمي وهي تغمض عيونها وتستغفر
سلم وصعد
شال عني الكبوس
وهمس:-السيارة مضللة ماتنشافين
شلتة وتنفست بعمق
ودرت وجهي للجامة وهو مد ايدة
؏ المسجل
وطلع اغنية لكاضم الساهر
ماتذكرها شنو
بس اني فاصلة عن الدنيا كلها
لاهو الحچة ولا اني الحچيت
وبادرت
لحد ما وصلنة لبيتة
نزل قبلي وفتحلي باب السيارة
وتلگوني هو ورغد شايلين بدلتي
ودخلوني للبيت والباقين ورانة
يصفگون وهلاهل
وهوسة
اول مادخلت عيني اجت ؏ الساعة
بـ 8 بليل شيخلص هاليوم يالله
كعدوني ؏ التخم جوة
وهنه موجودات
ويكفلن واني ساكتة وامي تكرص بية
لحد ما طلع الكل وحتى اهلي
راحوا واني خوفي من هاليلة شون راح تعبر؟
والموقف ذاك بعيني
كل ماغمض
اسمع صوت صراخي
وصوت صراخ خواتي وأمي
صوتة وهو يتقربلي بوحشيتة وضربة
الي
يكزبر جلدي كلة
صعدتني رغد لفوك
دخلت للغرفة وجريت نفس
وهمست:-اختنگت
رغد:-الله يساعدج البدلة جبيرة كلش
ملاك:-كتلة ماريدها وهو جابها
رغد:-بس تخبل
شالتلي الطرحة
وعدلت شكلي وابتسمت:-يلا راح اروح
اني بعد ما وصيج هلا هلا بأخوي
ترة يموت عليج والنبي
هزيتلها راسي واني ساكتة ومانطقت
ولا حرف
عافتني ونزلت
كعدت مهدود حيلي واني اعصر
بطرف التخم واكز ؏ اسناني
يالله يالله راح اموت
غمضت عيوني
وسمعت باب الغرفة ينسد
انقبض گلبي وقل نفسي
خرمشت ادية بأضافر وطابگة
رجلية وارجف
حسيت بأيدة صارت ؏ زنودي
وگومني وصرنة اني وياه طول بطول
غيث:-الف مبروك
ملاك:-الله يبارك بيك
غيث:-وهاي صرتي ببيتي
دنگت راسي حط گصتة
؏ گصتي وهمس:-احبج
ردت انطق
فتحت حلگي وردت ارد عليّ
وأگلة احبك
ردت اجاملة حتى امشي بهاي المجاملة
لحد مايصير كلشي حقيقي
لحد ما احبة صدك
بس ماگدرت
خاني لساني وسكتت
وهو بقة مغمض عيونة
وانفاسة الحارة تلفح بوجهي
غيث:-تعبانة؟
ملاك:-اي
غيث:-دوري خلي افتح القيطان
ابتعدت ودفعتة
وهمست وشفايفي ترجف:-لا اني افتحة
غيث:-دوري بابا متلوحي
درت وجهي لازمة البدلة بكل قوتي
فتحها وطلع
وكعت للگاع واني
نزلت وياها ولميت رجلية
لصدري وشهگت جاي اتعذب ضميري
يأنبني
ليش ورطت روحك وياي ليش
شوداني الك شجابني لعقلك
وحبيتني
انت ماتستاهلني
مااستاهل حُبك ألي
گلبي مو الك ولا ألي والله ماجاي
اگدر اتحكم بكلشي
اتمنى لو اگدر اتمنى
افكاري هاي اتمنى اگدرلها
واگدر اغير الجاي افكر بي ليش
هيج جاي يصير بية اني وحد عن الناس
يارب ارحمني يارب
كمت اخذت تراك
لونة اسود هو اجة بيدي ودخلت
للحمام والبدلة بقت مشمورة بالگاع
وخرت الماشات عن شعري
ومسحت مكياجي وبقيت جوة الماي
فترة حد ما حسيت التعب راح
وگمت
لبست التراك وطلعت انشف بشعري
مالگيتة مشطت وشلتة
كبة عالية
وشلت البدلة وعزلتها ؏ صفحة
ردت انام بس گلت خلي انزل
جسمي يرجف من الجوع مريت
من يم المرايا اباوع عيوني حُمر والسواد
الجوة عيوني كارثي
نزلت بدون روح
داخلي فارغ مثل وحشة هذا البيت
تماماً
شفتة بالمطبخ كاعد
ويكتب بالتلفون يراسل ماعرف
شجاي يسوي
حس بية باوعلي
ونزلت نضراتة ؏ ملابسي
عگد حاجبة وماحجة
كعدت گبالة وهو انطاني صمون
واشكال الأكل موجود بقيت اكل
بهدوء بدون مارفع راسي
وهو ساعة ياكل وساعة يصفن
رفعت راسي عليّ
شفتة يباوعلي انتبهه ونزل نضراتة مرتبك
مو بيدي ماعندي شعور الك
لحد ما خلصت
وهو ما ماكل شي قليل
كمت شلت الاماعين وهو گال:-عوفيهن
باجر الصبح رغد تغسلهن
ملاك:-لا اني ماعندي شي
غيث:-مو گلتي تعبانة
ملاك:-عادي هنة قليلات
گمت شلتهن
وگفت ؏ السنك اغسل بيهن
وايدة لامست خصري انخفص نفسي
وبلعت ريگي
وهو راسة برگبتي:-مامصدك انتي ببيتي
و واكفة تغسلين الأماعين؟
بعدت راسة عن رگبتي وهمست:-اي
غيث:-اني بالجنة لو وين
ملاك:-لا بالعراق بعدنة ماوصلنة للجنة
ضحك وهو حاط راسة بصف
راسي كلت بصوت ناصي:-غيث وخر
ابتعد عني وگال:-انتضرج فوك
ماجاوبتة
وهو عافني وصعد شون
بية فهموني
اتأخرت بغسلهن اغسل ؏ بطيء
حتى اتأخر
شجاي اسوي اني؟
خلصتهن وخلصت روحي
خلي افض الليلة ؏ خير واخلص لان
بدت اعصابي تنهار
صعدت رجل تصعد ورجل تنزل
اريد اعرف اني شنو منين مخلوقة من يا طين
ليش ماجاي استوعب الجاي يصير
ليش كرهت الدنيا كلها
كافي هو بنة أُسرتة وعايش هسة
احسن عيشة شكو افكر بي بعد؟
لا لا مامفكرة بي
اني افكر بعذابي وخايفة
اني خوفي ملازمني بس
ماحبة والله ماحبة ولا عندي شعور
الة اكرهه كره العمى بس مادري كلشي مخربط
فتحت الباب ؏ كيفي
والقُرآن ختمتة بگلبي دخلت ولكيتة
غافي حمدت ربي
وغمضت عفتك تنتضرني؟
شراح اسوي بيك بعد؟
دخلت بهدوء ونزلت للجرباية
وسحبت غطا واني بعيدة عنة كلش لان
هو السرير اصلا جبير لان ارضي
جسمي ماتوقف عن الرجفة لحظة وحدة
بديت اغفى انسحب لعالم النوم
شايفين من تكونون نص غفوة؟
بس تحسون بالديصير
واني هيج
وحسيت ايدة لامست خصري
وسحبني الة لزمت تشيرتي حيل كورتة
بيدي
وهو يمشي نفسة ؏ طول رگبتي
كلبي من كد ما دگاتة سريعة كسر ضلوعي
بدون شعور وبدون ماعرف شجاي اسوي؟
وخرت ايدة عني
وگمت بسرعة
واني انفاسي صوتها عالي مبينة
وخرت الغطا بدون ماباوعلة وركضت
للحمام
قفلت الباب وگعدت ورا
خليت ايدي ؏ حلگي واشهك ماريد
شهگاتي تنسمع دكيت ؏ ركبي
وهمست:-للللج كاااااافي الله ينتقم مني
يارب اخذ عمري اخذة تعبت من هاي الحياة تعبببببت
سمعت صوت دگة الباب
وهمساتة الخايفة وكلها حُب تحسسني
بالذنب:-ملاك بيج شي؟ افتحي الباب
ملاك:-هسة هسة اوگفلي
غيث:-اذا بيج شي گولي؟
ملاك:-لا مابية
اختفى صوتة
واني كمت غسلت وجهي اكثر
من مرة واهمس ويا روحي:-كافي ملاك كافي
هاي حياتج انتي محد جبرج انتي
وافقتي برضاتج يعني لازم اتقبلة هي
شوية شوية وهو يحبني لو مايحبني ماخذني
واني هذا وضعي
طلعت واني مدنگة عيوني
وهو واگف متوتر شافني وفز واجة
يمي لزمني من متني:-ها زينة؟
ملاك:-اي
غيث:-لاتخافين ما اوصلج
بدة ياكل الذنب اعضاء جسمي
باوعت لعيونة كافي تحبني هواي كافي
غيث:-تعاي لاترجفين اگعدي
گعدت وهو جابلي المي
شربتة وايدي ترجف واباوعلة
غيث:-صدك تحجين جا ماگلتي ما حجيتي
هيج تسوين بية خرعتيني
ملاك:-بس اني تعبانة شوية
گعد ولزم ايدي وباسها:-اذا تعبانة گليلي
ملاك لاتضمين تعبج عني لاتضمين
حزنج ودموعج اذا تخافين من شي
گليلي اني عكازتج اني شفت بيج عيون أمي
مستحيل أذيج
ابتسمت:-من گد ما احسك تحب امك
احس روحي اكرهه امي
ضحك:-لا بس هو حب عن حب يختلف
واذا تجين للحقيقة فـ انا انسان
بحُب أُمة محد يلحگة
مستحيل احس احد يحب أُمة بگدي
ملاك:-لاتبالغ
رجع ضحك وگال:-مثل حُبي المُبالغ الج
ملاك:-انتَ حبيتني لان اشبهه عيون امك؟
غيث:-واكو اكثر من هيج معزة وحب؟
حكيت حاجبي وهو لازم
ايدي:-لا بس يعني مادري
غيث:-باعي انا أمي مانسيتها لحظة من ماتت
لسة فـ لاتتوقعين بيوم انساج او اعوفج
مثل ما حبيت أمي راح احبج ومثل ما متعلق
بصورة عيون أمي راح اتعلق بعيونج
ولاتقنعيني اكو انسان يعز شخص يحبة بمعزة
أمة لان الأم شي مايتوصف بكلمة
ولاتكدرين تحبين شخص مثلها
وهاي حالة نادرة طبعاً
ملاك:-بس مو كل أُم أم
غيث:-أكيد ، وهسة ارتاحي انا راح انام
؏ التخم بعيد عنج حتى تاخذين راحتج
ملاك:-لا هذا مكان جبير
غيث:-ميخالف نامي براحتج
شال الغطا وابتسملي:-يلا نامي
دخلت بالفراش وغطاني
غمضت عيوني بسرعة وهو حسيت
بي طبع بوسة ؏ كصتي وراح
بقيت
اتحسب ؏ روحي شراح اسوي بي بعد؟
والله ميستاهل اضفر مني والله
راح اكدر اتعود راح اكدر
غفيت بتعب لحد الصبح
اسمع همس يم اذني واسمعة
يگول:-عيون أمي
ملاك:-ها
غيث:-يبعد الها گومي يابة
كعدت افرك بعيوني بنعس
وهو يتلمس وجهي بعدت ايدة عني
وكمت
غيث:-صباح العيون الحلوة
ملاك:-صباح النور
غيث:-راح يجن عماتي وأهلج
بلعت ريكي وكلت:-اي هسة ابدل
غيث:-الصار امس لاتگولي حتى لأمج مفهوم؟
اليسألج كوليلة هذا هو تم كلشي
ملاك:-انت مگايل لأحد عن طلاقي؟
غيث:-بس رغد تعرف
ملاك:-تمام
عافني وراح
واني نزلت ردت اسوي ريوك
كال:-لا همه يجون ويجيبون ريوكنة وياهم
ملاك:-ليش خو اسوي اني؟
حك راسة وهمس بخجل:-مو عادات يعني
اهل الولد يجيبون ريوك هيج
ملاك:-اول مرة اسمعها
غيث:-هاي بعد
هزيت راسي وصعدت فوك
فتحت باب كنتور طلعت گلابية بيضة
امي كالتلي لبسيها اول
يوم
لبست وتمكيجت حليت
شعري وهو طلع من الحمام
اتخصر وگال:-هذا شعرج شون متحملتة؟
لعبت بي وگتلة:-ليش؟
غيث:-ماتخلي هذا تگصي والله
ملاك:-لا امي ماتقبل
غيث:-جا هي بكيف امج وعلي اكصة لو ادري بي مصيوغ من ذهب
ملاك:-شعري لو شعرك
تقدم وجرني من ايدي
طبگ اجسامنة سوة وهمس:-انتي كلج مالتي
عرك جسمي وبعدتة عني
ودرت وجهي رجعت اعدل بروحي
واني ايدي ترجف
خلصت ونزلت كعدت بالصالة
وهو نزل مبدل درت وجهي عنة مادري
سمعتة كال شي بس بالي مو يمة
غيث:-وين صافنة؟
ملاك:-ها
غيث:-جاي اسولف وياج
ملاك:-اي احجي
غيث:-راح اطلع هسه اجي الباب اذا يندك
تأكدي اول من الكامرات اذا عماتي
اطلعي اما اذا رجال صوتج مايطلع ولاتكولين
منو سدي الباب وگعدي
هزيت راسي ساكتة
وهو طلع بقيت كاعدة اتصفن بالحيطان
طول عمري اضل هيج متلوع گلبي؟
زين اريد اعرف مصيرنة ثنينه شنو؟
احبة واخلي يتقربلي معقولة؟
زين اريد طريقة تخليني احبة؟
اتذكر القصة الگالها ألي المفروض تتحرك مشاعري بس كرهت الحُب اكثر
بقيت انتضر انتضر ساعة كاملة
واندك الجرس اكو شاشة جبيرة ؏ الكاونتر
هيه للكامرات
شفت نسوان هواي والله مابية حيل
لبست برجلي وطلعتلهن
فتحت الباب وصرت وراهن وصوت الهلاهل
طرم أذني طرم يهلهلن بأذني بحيث
احس انطرمت
كلهن اجن وبناتهن وياهن
اخر وحدة جانت رغد ضحكت:-ها شونها اذانج
ضحكت:-انطرمت يمة ماحس بعد
بوستني وگالت:-الف مبروك يروحي
ملاك:-الله يبارك بيج
طبت واني وراها بعدني اريد
ادخل شفت الباب نفتح دخل غيث وهو
لابس دشداشة بيضة
ابتسملي
واني طبيت قبلة
دخلن هادئات اندارن وشافن غيث وراهن
لو احسهن تخبلن
وگامت الهلاهل تتراگع اليسمعهن
من بعيد يگول صياح مو هلاهل خبصن الجو
خبص
وهو يبتسم ويبوسهن وحدة
وحدة وهنه اخذهن الواهس وبوسني
مرة الثانية ضحكت من حُبهن ألة يمكن هيج
متحمسات
وگف بصفي ولزم
ايدي وباوعلي و؏ وجهه طرف
ابتسامة فرح
ام عبدالله:-مبروك يمة تستاهلون كل الخير
زهرة:-منك المال ومنها العيال يابعد امك
لزمت ايدة حيل وخرمشتهن
وهو ضغط عليهن اكثر وگال:-آمين يارب
الدمة تلالي بعيني ماكو عيال ماكو اطفال
احس بالذنب شنو ذنبة هو
حيبقة بدون اطفال طول عمرة؟
يحبني؟
ويضل وياي؟
كعدني ؏ التخم وعيونة
تصبرني كعد بصفي وايدة ؏ جتفي
ويبتسم ويسولف وياهن ماشاركت بحرف
واحد حتى من يسألني هو يجاوبهن
ويگوللهن تعبانة وهنة يبقن
يذبن كلام جريء ويضحكن
واني ابقة افرك بأدية
شفت رغد كامت للمطبخ
كمزت وراها وهي اندارت وكالت:-ها ولج
ملاك:-خلي اساعدج بالريوك
رغد:-روحي خية اكعدي يم رجلج
اني اجهز هاي بنات وياية هواي
ملاك:-لا حبابة والله استحي
رغد:-ولج والله عماتي مايخجلن بالعكس
اذا حجيتي وياهن اصلا يكول يعرفنج من زمان
ملاك:-مادري استحي فدوة خليني اساعدج
؏ ماتروح المستحة
هزت ايدها واني ساعدتها
خليت الجاي ؏ النار وهي تسوي ريوك
ساكتين ثنينة لحد
ما خلصنة صاحت البنات كامن يجن
ياخذن الاكل
ويرتبنة ؏ السفرة اخير
وحدة اجيت اني لازمة القوري
مكاني بصف غيث كعدت وجريت الكلاصات
ردت اصب ماقبلت رغد وصبت هيّ
ضليت آكل ؏ كيف وهُمة محد حجة ابد
لحد ما خلصنة
شفتة گام گمزت وراه
ابتسم وهز راسة ورحنة للمغسلة
وگفت وراه علمود من يخلص اغسل اندار وجرني
من ايدي
وطبك ادينة سوة وكام يغسل
بقيت ساكتة ما حجيت
شالن هنه الغراض
رحت وراهن للمطبخ
دارت علية بت عمة اسمها زينب
وتخصرت:-ها عيني؟ شكو؟
ملاك:-اساعدكم بشي
زينب:-امشي امشي تساعدنة روحي خية يم رجلج يلعب ويا ميار يلا بالله
رقية:-لا حُبي احنة ننضف روحي انتي
ملاك:-لا والله اني اساعدكم ماعندي شي
عادي
زينب:-غييييييث غيووووثااااان
سمعتة صاح:-هااا
زينب:-تعال لمرتك تعال
انداريت شفتة گام متوجهه للمطبخ
عاگد حاجبة:-شكو؟ شبيج؟
رغد:-مرتك تريد تنضف
غيث:-شكو تنضفين وياهن عوفيهن
مثل المطايا يكربن
زينب:-ياااااا لا والله مو صوووووجك صوجنة احنة
امشن ولجن امشن خلي هو ومرتة ينضفون
يلا
ضحك وگال:-عوفيهن امشي
عفناهن يضحكن ويحششن علينه
وگعدت يمهم هواي يسولفون
ويحجون ويفتحون مواضيع قديمة اني اصلاً
مو يمهم
تلفوني بيدي سمعت رسالة اجت
فتحت الموبايل
لگيتها من الفايبر دخلت
لگيت اول اسم بالأنكليزي تهجيتة
جانت رندة الـ... واسم عشيرتها هاي اخت كمال!
شتريد
باوعت لغيث شفتة بعيد عني ويسولف
يمكن مانتبهه حتى من اجت الرسالة
بلعت ريگي وانسحبت لفوك
صار عندي فضول شعندها معقولة تباركلي؟
هاي الحية لو تموت ماتسويها
دخلت للغرفة وقفلت الباب
وبلعت ريگي وايدي تنكث كعدت ؏ التخم
عصرت دشداشتي وفتحت الرسائل
اول بداية 3 بصمات
ونوب اخر شي ڤيديو
حملت الفيديو وصعدت للبصمات
اول بصمة فتحتها اجاني صوتها
يلعلع:- شفت نذاله وحقارة بس مثلج ماشفت
يا عار يا سـ***
ثاني بصمة گالت:- بت الكلب فكي سحرج عن
اخوي لا اندمج وحق علي ابن ابي طالب
والثالثة:-مو طلكج وافتكينه منج يانذلة
يابت النذل شكو رجعتي علينه وشمعنه اليوم تذكرج بس يملاك وحق لا إله إلا الله اسويج وصل وصل والله واسحلج من بيتج لا عبالج ماكدرلج
اني رنده نفسها الطلگتج وزوجت كمال بأيدها لا عبالج ماگدر اسحلج واشگج شك واشوف
منو اليطلع وراج يا گـ***
خلي رجلج الگـ*** يلزمج لان انتي وحدة ***
اطلعي من حياة اخوي وخلي مرتاح ومتهني ويه ولاء ولاتلعبين بذيلج وسحورتج بطليهن
جسمي ضل ينكث من كلامها
جان بعياط يمكن لو معلية الصوت جان
وصل لجوة بس جنت منصيتة
انقر ؏ شاشة التلفون منتضرة الڤيديو يفتح
متأكدة هذا لكمال
وألا ليش راسلتني وهيج تحجي؟
ونوب اني مسوية سحر والله يالله
انفتح الڤيديو وعيوني رموشها وكفت
كمال هذا!
لا ياربي لا؟؟؟؟؟؟...
