رواية لأني عاقر الفصل الرابع والثلاثون بقلم مريم خفاجة
قال:سـ اُرممك من الداخل
قالت:هل الامر يستحق هذا العناء ؟
فقال لها:عيناك تستحق ..!
...
مختنك؟ انا مختنك بيج...
صفيت السيارة يم بيت اهلها
اريد اعرف سرها شنو
الكلمات الغريبة التگولها بليل شنو هي؟
ماضيها اريد اعرفة حتى اتعامل
؏ هالاساس
جان براسي شي و الواقع شي ثاني
دگيت الباب طلعلي جاسر
سلمت عليّ بدون نفس لزم عكسي:-شبيك ولك؟
غيث:-مابية شي صيحلي عمتي
جاسر:-ملاك بيها شي
غيث:-لا
جاسر:-غيث احجي شبيك ملاك وينها شبيها
غيث:-بابا مابيها شي شبيك روح صيحلي عمتي
ترة لعبت روحي
دخل وهو بوجهه علامات استفهام
دخلت للاستقبال
منتضرها اهز برجلي سريع
طبت مستغربة
وراها جاسر
گمت سلمت عليها
وهي كعدت بصفي باوعتلة وگلت:-جاسر اطلع
شوية
جاسر:-أكلك ترة شگيتني احجي بسرعة
ايمان:-شكو والله گلبي راح يوگع
غيث:-عمي والله ماكو شي اني اريد احجي
شغلة لعمتي عجيب اطلع لاتصير زعطوط
طلع وهو يتلفت
لزمتني عمتي من ايدي وهي خايفة
شفايفها ترجف:-شكو شبيها ملاك احجيلي
شسوت
غيث:-مامسوية شي عمة والله
بس اريدج تسولفيلي
ايمان:-شسولفلك
غيث:-انت تعرفين انا ما واصل لملاك لحد
هالحظة مو؟
بلعت ريك وگالت:-اي والله واني گلتلها....
قاطعتها:-عوفي من سالفة گتلها وگتلج
انا ما جايج علمود هاي الشغلة
ولو ملاك تگلي تضل هيج العمر كلة اضل واني
الممنون هاي السالفة بكبرها ماتهمني
ولا عندي اي تفكير لهيج اشياء
انا تفكيري بيها عمة ملاك ماجاي افهمها
عقليتي تعبت من كد ما افكر بيها
وافكر شلون احاول اكسبها الي
ملاك حتى حجي متحجي وياي احاجيها ترد
؏ كد السؤال او الكلام الأكولة ومرات تغلس
وتسوي روحها ماسمعت
ايمان:-اي
غيث:-الأريدة منج تحجيلي ماضيها فقط
وهالشيء بيني وبينج مايطلع
ايمان:-ماگدر هي محلفتنة مانحجيلك
غيث:-فهمممميييني لييييش ترة زوجها
اني ومن حقي اعرف كلشي عنها
ايمان:-راح اگلك بس لاتحجيلها ابوس ايدك
غيث:-احجي گتلج مايطلع الكلام
ايمان:-ماراح ادخلك بالتفاصيل حياتها
وحُرة بيها هي ومتأكدة يجي يوم وتحجيلك بس
يا أمي ملاك تعذبت هواي والوصلها لهالحالة
هو طليقها النذل الله لايوفقة ولا ينطي الصحة
دمر بنتي دمار الله يشهد ماردت تعذبك
واني من زوجتها الك مو قصدي اذبها عليك
واعذبك
غيث:-عوفج من هذا الكلام انا ردتها بالأساس
كملي شسوالها ليش كرهت القرب مني؟
نزلت راسها وعيونها تجري:-اعتدى عليها
عگدت حاحبي:-شلون يعني؟؟
سحبت نفس وشهگت:-هو اعتدى عليها ومن
بعدها كرهت كلشي ودخلت بقوقعة ولاترضى
تحجي ويا بشر ولاترضى تسوي اي شي
يغير حياتها ملاك ضلت بذاكرتها الموقف هذا
هي سولفتلي
غيث:-؏ كيفج احجي عمة دوختيني
شلون يعني اعتدى عليها؟ قبل الزواج بعد الزواج لو شلون ماجاي افهم
ايمان:-لا ورا الطلاك
دك گلبي وهمست:-معناها...
قاطعتني:-لا لا ماتحل عليّ هو طلگها بالثلاث
يعني مايصير الة تزوج غيرة ونوب تتطلك
وترجعلة
غمضت عيوني ومسحت وجهي:-كملي
ايمان:-هي من ذيج الحادثة وتغيرت تغير
جذري اني امها ما افتهمها گمت حاولت
اخليها تحجي ردت اخليها تدرس وافقت
وقدمنالها وبعدها لغت كلشي وكالت ماريد
ضلت موبايل ونوم ومستشفيات نركض
بيها والله لوعت گلبي
ومن خطبتها ماردتها تصير الخطبة
لان اعرف بتي عقلها مرتبط بالماضي وماراح تتخطى
متأكدة مليون بالمية ملاك
اذا انجرح اصبعها تضل اسبوع نايمة بالفراش
وتتذكرة كل مرة
وهو من اعتدى عليها شهر والله شهر
كامل هي بالمستشفى ومن كعدت كلشي
ماتتذكر اكلها سويتي هيج وسويتي هيج
تگول لا
وتگول صوتي واني اصيح وهو يعتدي
علية يرن بأذني حتى من انام
وانا مغمض عيوني ومدنك
راسي اتمنى تسكت وتگول كلة جذب
ماصار هذا كلة وارجع لملاك والگة عيونها
كلها حُب وسعيدة ماريدها تدمع حزن
ايمان:-اسفة راح تعذبك اني اعتذر لاتفكر
اني ذبيتها عليك والله مو براسي هيج
بس ردت بتي تتغير وتنسى الماضي
بس جان تفكيري غلط و وگعتك انت بهالمصيبة
غيث:-لا لا لتفكرين هيج ولا اني الي افكر
بهاي الخزعبلات كلها بس اريد اعرف
وين الگاه هذا؟؟
انخطف وجهه وبلعت ريگها:-ليش
غيث:-احجي عمة
ايمان:-غيث اني اريدك تنسى الي گلتة كلشي
وتنسي بتي هم عوف هذا الكلب
هو اصلا متعلعل يومية بمستشفى
بس اريدك توعدني
غيث:-شنو
ايمان:-لاتعوف ملاك ولاتأذيها
كلشي تسوي اني اعتذر نيابة عنها والله
ابتسمتلها:-لا عمة ملاك بنص عيني
ولاترجعين وتگولين هيج اذا مو بالعين تنحط
احطها بنص روحي وانا اوعدج
ملاك تتغير وماتضل ؏ هذا حالها وگولي
غيث ما گال
ابتسمت بفرح وحضنتني وهي
تبوس بية وتگلي:-والله اني عرفت المن انطيها
عرفت
سلمت وطلعت وصلت يم
الباب صاحت وراي:-غيث
درت وجهي:-ها عمة
ايمان:-اخذها لدكتور نفسي
غيث:-لاتخافين اني اعالجها بنفسي
ايمان:-ماتگدر والله
رجعت ابتسمت وكتلها:-اگدر
طلعت وجاسر برة يفتر
متوتر ضحكت وضربتة ؏ جتفة وطلعت
صعدت بالسيارة وغمضت عيني
هذا كلة الصاير بيج؟
ليش ماتحجين مو مرمرتيني
وگفت يم محل
ونزلت دخلت اشتريت جگاير
صفنت ؏ حلويات امنيتي من اطلع
وتگلي جيبلي وياك شي
بس ماخليها بنفسي
تمشيت لبرة واخذت تلفوني من السيارة
ودگيت عليها شوية يلا رفعتة
اعرف صوتها من تبجي
همست:-الو
غيث:-هلو ، شنو تبجين؟
شهگت بسرعة وبعدت الموبايل
عنها غمضت وگلت:-بابا ملاك وينج
ملاك:-اسفة والله تعال ارجع
غيث:-اششش امسحي دموعج لاتبجين
ماضايج شبيج
ملاك:-لاتجذب جا ليش ماتجي
غيث:-شنو اشتاقيتلي؟
ملاك:-لا
غيث:-طاحظج اريد اشوف ياهو اليجي اليوم للبيت ضلي وحدج
ملاك:-لا جذب جذب تعال
غيث:-گولي مشتاقتلك وارجع
ملاك:-والله ماگول
غيث:-نذلة مو بيدج
ملاك:-هسة تجي؟
غيث:-اي هو راح اجي مسوية عشة؟ جوعان
ترة
ملاك:-مادري شسوي
غيث:-راح اجيب من برة
ملاك:-تمام
غيث:-اني بالمحل تردين حلويات؟ اي شي
شتردين
ملاك:-لا ماريد
غيث:-راح افتح كامرة وانتي اختاري يلا
ملاك:-والله ماريد
غيث:-افتهمت لج اني اريد اشتري بس
ماعرف ياهنه طيبات
ملاك:-انت تاكل حلويات؟
غيث:-اي جا ليش وحد عن البشر
ملاك:-تمام
غيث:-راح افتح بس اني انتي لاتفتحين
ملاك:-اي
ابتسمت وفتحتلها كامرة
وضليت امشي ؏ حلويات وهي تختار
اخذ هذا واخذ هذا وابو المحل يضحك علية
يگلي:-خبلتنة النسوان وعلي
ضحكت
وهي گالت:-كافي يلا
غيث:-شنو كافي لا عبالج ذني الج؟
ضحكت بصوت خفيف:-هووواي اشتريت
غيث:-يلا هاي لان ضحكتي راح اقسمهن
بالنص
ملاك:-تمام تمام
بس اگلك
غيث:-ها يروحي
ملاك:-عادي تجيب وياك ذرة؟
غيث:-شنو يعني؟
ملاك:-يعني شامية
غيث:-شسوين بيها؟
ملاك:-اكو فلم راح يطلع اريد اباوع واكل
غيث:-يعني بس انتي تباوعين؟
ارتبكت وگالت:-لا لا انت وياي يعني
ضحكت وكلت:-يلا روحي شسويتي بية
طبگتة باوعت للاسم كاتب عليها
"عيون أمي"
واني مبتسم وامشي انطيت فلوس لابو المحل
ومريت ؏ المطعم واخذتلها اكل
ورجعت طبيت ماهي لگيتها بالصالة كاعدة
غيث:-ها هاي جبتلج الاكل
كامت مرتبكة ماخلت عينها بعيني
عبرت من يمي لزمتها من عكسها:-لسة مطنگرة
ملاك:-لا بس انتَ لاتضوج
اباوع لعيونها فعلاً اذيتها
واضحة تخاف تتأذى وتخاف تأذي
غيث:-ماضايج وداعة عيونج
ملاك:-ليش ماتضوج؟
دمغتها:-هاي كتلتج ارتاحي
ملاك:-هي هاي هم تحسبها كتلة؟
غيث:-امداج مال مدگة
ضحكت وراحت
جريت نفس مرتاح لازم اخليها تحجي
غصباً ؏ راسها ماريدها تضل ساكتة
راحت سوت الاكل ورتبتة
رحت كعدت ؏ الكرسي ودنكت اكل
وكل لحظة اباوعلها تصفن ؏ جهه وحدة وتاكل
ضليت اراقب تصرفتها لحد ماشبعت وگمت
صعدت فوك وبدلت
لگيت عمتي دازة:-ها غيث يمة وصلت؟
كتبتلها:-اي عمة وصلت لايضل بالج
دزتلي بصمة:-ملاك زينة؟
غيث:-اي مابيها شي لاتخافين
دزتلي گلب
عفتها ونزلت مرت كم ساعة
گالت:-راح يبدي الفلم راح اسوي شامية
اسويلك عادي تاكلها؟
غيث:-اي عادي شون تسويها؟
ملاك:-هو اخلي الذرة بالگدر وتصير
غيث:-اريد اشوف
ملاك:-اي تعال
رحت وراها اضحك واني اعرفلها
بس اريد اشوفها شون تسوي
وكفت خلت بالگدر دهن وملح وانتضرتة
يحمى كتلها:-وخري هيج لايطفر عليج
ذبت الذرة بالكدر وشردت ضحكت
وسديتة وگتلها:-لعد اذا هيج فاهية شكو تحطيها
وتشردين
ملاك:-اخاف تطفر
غيث:-لا هي لمن تستوي تضل تطفر
ضحكنة ثنينة ؏ كلمة تطفر
وهي گالت:-لعد مو تگول ماعرفلها؟
ضحكت:-اي شايف شلون يسووها ورغد
تسويها دائماً بس ردت اشوف انتي شلون تسويها
ملاك:-اممم شو صارت
ضلت تباوع من الكدر وذني يگمزن
وهي مكيفة تباوع واني اباوعلها
صارت وگلبتها بسلة خشبية
واني صبيت الببسي وهي مرتبة بالاماعين
حلويات
ابتسمت لترتيبها
وشلتهن وخليتهن ؏ الطبلة
عزلت روحها بقنفة وحدها وخلت يمها
التريدة
واني خليت الباقي يمي
فتحت التلفيزون ؏ فلم هندي جان
اسمة Ek Villain
مندمجين نباوع للتلفيزون
وذولة الهنود يضحكون علينة
وكل ما اخطف اباوعلها تبتسم
يرتاح گلبي
سمعت صوتها الناصي يهمس:-هذا
المُمثل يشبهك
عگدت حواجبي وضحكت:-هذا يشبهني؟
ملاك:-اي هذا اليرگص
غيث:-ولج هذا حلو
ملاك:-لعد انت هم حلو
باوعتلها وابتسمت
دارت وجهها وكأنما
ماحست بروحها من حجت
درت وجهي عنها للتلفيزون وكل ما
اتذكر حجايتها تزود ابتسامتي
غير انت مامنتبه ؟
من گتلي انتَ حلو
ليهسة جاي اضحك؟
الفلم جان حزين من كتلوا البطلة
ضليت اسمع شهگاتها ماباوعتلها كلت خاف تخجل
ملاك:-اني صووووجي اباوووع هيج ياربي راح اموت
غيث:-انجبي لج عليمن تموتين
ملاك:-ماتت خطية راح يضل وحدة
غيث:-حُبي هو تمثيل
ملاك:-حتى لو تمثيل يعني همه جاي يسوو
مثل الواقع
اباوعلها تمسح دموعها وتحجي وتشهك
سوة كلهن:-صدك تحجين انتي؟
ملاك:-انتم گلوبكم من صخر كلشي ميهزكم
حطيت ايدي ؏ عيوني وضحكت حيل
جسمي كلة يهتز وهي مستمرة
تبجي:-لج بابا ذولة كلة جذب ماتشوفيهم
شلون يطيرون شيجسدون الواقع بربج تحجين
ملاك:-الاغنية تبجي
نصيت التلفيزون واني اضحك عليها
واداهرها وهي تزود بالبجي ماسكتت ابد
لحد ما خلص الفلم
باوعتلها غافية ودموعها بخدها
شلت الكلاصات والغراض غسلتهن
ورتبت المكان تقربت ردت اشيلها خفت تخاف
وتفز
مسدت ؏ راسها طفرت وحلگها انگلب
صار ابيض وجهها اصفر
رأساً گامت
غيث:-؏ كيفج ماسويت شي
ضلت تحاول تجر نفس
غيث:-اهدي اكعدي خلي اجيب ماي مالزمتج والله
رحت جبت ماي واجيت لگيتها ماهي
رفعت عيني ؏ الدرج شفتها تركض
ميلت شفتي بأسف ورجعت الگلاص لمكانة
وصعدت جانت نايمة وتباوع من جوة البطانية
عفتها ونمت...
تعال احجيلي شيحلها؟
عيونك ماتحبني الفدوة اروحلها
لِـ باهر الجنديل
...
مَرت أيام وشهر ونص احنة ؏ هالحال
وصار 3 اشهر ؏ زواجنة
ايام تجي نحجي ونسولف سوة
مرات انسى روحي واضل اضحك وانطلق
بالكلام
ومرات لا اضل ساكتة وهو يحاول يخليني
احجي بس مانطي مجال
وهو مايكثر كذلك بالكلام
يطلعني وياخذني يونسني حتى انسى
مرات ياخذني لرغد
اضل اسولف واضحك وياها من التفت الگاه يباوعلي
هو يحبني هواي
بس انا مادري اذا اگدر ابادلة او لا
وبيوم عرفت شلون المشاعر تتحول
جانت تموز حارة الدنيا تسمط
حتى الصبة ماطلع اغسلها لليل يلا لو الفجرية
اجاني غيث واني جاي ارتب
بالمطبخ والعرك يصب من جسمي
غيث:-ملاك راح اروح لبيت عمي ابو عبدالله
معزومين
ملاك:-؏ شنو؟
غيث:-سنوية أمي
ملاك:-اها اي روح
غيث:-شنو روح انتي وياي
ملاك:-لا ماگدر حارة متشوفها موت احمر
ماگدر اروح
غيث:-لعد شلون ماعوفج هنا
ملاك:-عادي ماكو مشكلة ترة
ماگدر اني اروح من بغداد للديوانية اموت والله
حارة ومابية حيل
غيث:-افتح تبريد بالسيارة ماتحسين
ملاك:-هي مال تبريد بهالحر هذا وفوك كلشي
جاي انضف
غيث:-ترة البيت نضيف ليش تتعبين روحج
ملاك:-لا لا وصخ هاي باوع دبك
غيث:-وين الدبك شبيج؟؟
ملاك:-والله اكو روح انتَ وتعال بسرعة
غيث:-اويلي بالعناد
سكتت ورجعت انضف جانت الساعة بالعشرة
الصبح
بدل ونزل وهو يباوعلي
راد يحجي بسرعة حجيت:-والله ماروح
ضحك وراد يتقرب ابتعدت
عض شفتة العُليا وگال:-ديري بالج طفي الاجهزة كلهن ولاتفتحين الباب لأي بشر الكامرات
مشتغلة اي شي يصير خابريني
تلفوني مفتوح وتلفونج لاتغلقي اطيح حضج
والسبالت بس سبلت الغرفة خلي الباقي
كلة تسدي والمطبخ تأكدي من الطباخ قبل
لاتطلعين منة مفهوم؟؟
ملاك:-تمام سلملي عليهم گللهم تعبانة
غيث:-اگللهم تموع من الحر
ملاك:-ههه لاعيب بس والله ماتحمل هو اني
بالبيت وكل ساعة تغيب روحي
غيث:-يلا هسة مو مشكلة
سلم وطلع واني بقيت افتر واشتغل
اخذت راحتي اكثر
ماكو ورا بنص ساعة انفتح الباب
گلت معقولة رجع باوعت هاي رغد
طبت بايدها بالمفاتيح
باوعتلي وتخصرت:-شو انتي هنا يمة
ملاك:-اي ماروح
رغد:-دمشي لج ماتروحين روحي بدلي
بسرعة وتعالي
ملاك:-يووو والله مابية حيل رغد لاتسوين
هاي سوالفج حبابة مابية حيل والله
عليج النبي
رغد:-وحق محمد اشيلج وادگج بالگاع بسرعة
بدلي تريد تضل هنا ماعدنة احنة
بنات تضل وحدها بالبيوت يلا يلا
ملاك:-هسة رجلي ومادخل بية انتي شكو
ضحكت:-والله ادبسز دمشي يلا ؏ واهسي
حبابة نضل نسولف بالطريق يضيع الوكت
ملاك:-ولج والله تعبانة كاعدة من الصبح
انضف
رغد:-بوية نضيف البيت ريحة الزاهي
واصلة لبيتي يلا امشي بسرعة ترة ازهر
اذا تأخرتي شوية يلعب فلك
هزيت راسي وغسلت واني ادردم
هسة يطيح حضي اذا شافني جاية ويا رغد وماجيت وياه
لبست جبة ؏ السريع ولفيت شال
وحتى مكياج ماخليت لان اساساً راح يروح
كلة بالحر
نزلت بسرعة فصلت الكهرباء وطلعت
وياهم وبألف ياويل يلا وصلنة
طلعت روحي من الدنيا كلها
الدنيا جمرر ماكو هيج حر والطريق شطولة
كل ساعة واتقيأ
واسب برغد وصلنة
وهي لازمتني من ايدي غسلت وجهي
بالباب وطبينة سوة
هوسة وعماتة كلها عازميهم
ورغد كالت اصلا كل سنة يسوون لأمة ثواب
مستحيل يعبرون سنة اذا مايسوولها
طبينة سلمت ؏ عماتة وبوستهن بالباب
وهنه يضلن يبوسن بية حيل واني
روحي طالعة ونفسي تلعب تضل
دخلن للصالة لازمة بت رغد بيدي
صاح زوج رغد السلام عليكم
رفعوا روسهم وهو كاعد بالبداية
اجت عيني بعينة دنگت راسي بسرعة
يا يمة
شفايفي رجف رجعت باوعتلة
صافن مصدوم يباوعلي بأستغراب شون رفضت
واجيت ويا اختة؟
عيوني انگلبت و وجهه صار احمر
سلمت ؏ باقيين وگعدت لزك بصف رغد
حتى ما باوعتلة طول الگعدة اني احاول التهي
وهو مدنك يهز برجلة حتى من يسألوه
يجاوبهم ؏ گد السؤال ويسكت
بعد ميحجي
خرمشت ايد رغد:-يانذلة
رغد:-شبيج ولج ادبسز
ملاك:-باعي لغيث وراح تعرفين
باوعتلة وضحكت:-يا ضاج لان اجيتي وياي
ملاك:-هسة راح يطيح حضي
رغد:-معليج اخوية حباب
ملاك:-حبابة گليلة انتي حرمصتيلي اني شجابني هسة
ضحكت بصوت أعلى
وهو باوعلنة ضايج:-شوف اخوية شكلة كيوت
من يضوج
صميت حلگي بيدي
وضحكت صدك شكلة حلو متلوگلة
العصبية ابد
صبو الغدة واني عيني منة
ابد ماباوعلي وضل ؏ عصبيتة تالي
عفتة گلت شسويلة
غير رغد راح انكتل من وراها
ضليت اضحك ويا البنات وهاي بتهم زينب
كُلش تضحك وحجيها جررريء حيل
تخليني اغص بالأكل وهي تحجي
؏ كيف تخاف امها تسمعها وتكتلها
ورغد تهددها تگول لأمها
واحنة نضحك عليها جنة گاعدين بنهاية
السفرة
رغم حارة بس جانو مسوين سمج
بهالحر بس طيب
للساعة بالخمسة يلا گمنة
لان الدنيا شوية تبرد مو شمس قوية
من الخوف مشيت بسرعة گبالة ردت اروح
ويا رغد
لزمني من عكسي
وجرني وياه فتح باب السيارة ودخلني
بيها
وهو دار ودخل وساق بسرعة
بدون مايحجي
تمتمت وگتلة:-ترة والله رغد گالتلي اجي
غيث:-اي
حجاها وهو عينة ؏ الطريق
عفتة وسكتت ضليت نايمة طول الدرب
لحد ما وصلنة حسيت بي
فتحت عيوني الدنيا ليل فتحت الباب
ونزلت وهو مشة بسرعة
وگبت الترابة وراه يا شبي
مشيت وحدي فتحت باب البيت
ودخلت شغلت الكهرباء
والدنيا جمر جمر ماكو هيج حر
غضب الله ؏ عراق لو شنو
صعدت اركض بيدي ثلج
دخلت للحمام خليتها بالطشت انتضرت
المي يبرد وسبحت ولبست خفيف
وطلعت
انتضرتة هواي وما اجة لل8 اني انتضر
وين راح؟ ضليت آكل بأضافيري
بعدين سويت لفة جبن وكعدت بالصالة
آكل واباوع تلفيزون سمعت
الباب انفتحت عرفتة اجة بلعت ريگي
بخوف وبعدت نضري عن الباب
حسيت بي دخل و وگف
يباوعلي ضل هيج دقايق باوعتلة
همس:-وتالي وياج؟؟
ملاك:-شنو
غيث:-شنو شنو تسوين روحج غبية لو شنو بضبط؟
انتي اضحكين علية شايفة طفل گبالج وتلعبين علي
ملاك:-ترة ماسويت شي
شمر السويج نزيت و وجهي
انخطف وهو صاح:-جااااا شتفسسسسرررريهاااا
ماتجيييين وياااااي تجيييين ويا رغغغغغد وزووووجهههها؟؟؟؟
ملاك:-والله هي لحت علية واني استحيت منها
غيث:-هو انتي تستحين من الناس كلها
بس غيث ضاربتة بعرض الحايط
عافني وصعد ينزع بملابسة
هم صوجي طبني مرض ضليت گاعدة
لشوية وصعدت
لگيتة نايم
عضيت شفتي بقهر واني هم نمت
مرن كم يوم اسبوع او أقل
وهو بعدة ميحجي وياي
ولا يباوعلي اصلاً حتى اكل قليل ياكل
ويطلع
واني كل ما اريد اروح اصالحة اتراجع
مرة من المرات جان بالغرفة
هاي الكلها ابيض
ضليت محتارة اطب لو لا
تالي طلع وشافني ضل يباوعلي من
الخجل عفتة ورحت
بيوم جانت امسح بالمرايا
دخل باوعتلة من المرايا شفتة
راح للكنتور كلت خاف يريد يسبح
درت وجهي علي من شفتة طلع
جنطة سفر
عگدت حاجبي وگتلة:-وين رايح؟
مارد ثواني وکال:-مسافر
ملاك:-وين؟
غيث:-لأربيل
ملاك:-ليش
غيث:-تحقيق؟
ملاك:-بس گلي ليش
غيث:-عندي شغل
ملاك:-شغل شنو
غيث:-معليج
ملاك:-شنو معلية شغل شنو
غيث:-معليج گتلج
درت وجهي واني نار گابة
امسح المرايا بعصبية وهو يلم بملابسة
بهدوء
خلص وكترها ؏ صفحة وراد
ينزل گتلة:-تضل هواي؟
غيث:-اسبوع
ملاك:-بس گلي شتسوي
هز راسة وضحك:-ليش تردين تعرفين؟
ملاك:-لأن شسمة...
غيث:-شسمة؟
ملاك:-اربيل مو حلوة
غيث:-شبيها مو حلوة تخبل رايحتلها؟
ملاك:-لا
غيث:-لعد؟
ملاك:-ماكو شي روح
غيث:-بليل طيارتي
ملاك:-ترجع بالسلامة
غيث:-هذا هو؟
ملاك:-اي
هز راسة ونزل گعدت
؏ الجرباية ابلع بريگي من الحرگة
ضليت اهز برجلي سريع
خاف يروح يم ذني الي بالملاهي؟
يسووها الزلم قابل شنو همه
يموتون ؏ النسوان
وشسويلة عفت التفكير والهوس
وضل هو ما اجة حتى ؏ عشة
بليل كلش بالعشرة يلا اجة هو مو گال
طيارتي باليل؟ خاف يجذب علية
جنت متمددة اباوع للتلفيزون
وهو طب للغرفة اخذ ملابسة باوعت بنطرون
وتشيرت معناها يروح
ودخل للحمام
ضليت اغفي بس احاول مانام
حتى من يروح اطلع وراه مادري شلون غفيت
بدون مادري
حسيت بي باسني قوي
بگصتي راد يروح همست:-راح تروح؟
غيث:-اي جاسر باجر يجي ياخذج وضلي ببيت اهلج
رجعت غمضت عيوني وهو
طلع وسد الباب وراه ونمت
ثاني يوم گعدت ؏ تليفوني يدك
شفتة جاسر شلتة گالي اني برة
گعدت وتندمت لان ماطلعت ورا اني كعدت
ليش ماضليت گاعدة
كمت لبس ونزلت لجاسر
دخلتة للبيت واني صعدت لميت ملابسي
ورحت وياه
لبيت اهلي طبيت امي ضايجة
مني سلمت من ورا خشمها استغربت بس سكتت
ورا شوية اجت وراية:-هااا ما الله فرجها
ملاك:-شنو يمة
ايمان:-هججتي الرجال خو
ملاك:-يووو اني شعلية
ايمان:-شعليج خلي هسة يروح بأحضان
الگـ**** وضلي انتي هنا امداج
يا فگر
ملاك:-شو انتي متخلية حياتي
؏ هاي السالفة ترة يمة بدت تلعب روحي والنبي
محمد ماكو هيج
ايمان:-لا والله اني العبت روحي منج وبزعت
شحالة هوَ
ضليت ساكتة العب بأضافيري
غمتني وراحت
وملك تضحك:-والله يالله
ملاك:-ترة امج خبلتني
ملك:-والله انتي خبلتيني اريد افتهم انتي شتردين
حيرتي العلماء خرب بليسج
ملاك:-دروحي انتي الثانية لو ضالة ببيتي
احسلي
ملك:-دنجبي لو حاطة رجلج بحضنج احسن
ما يومية تنغمين غمة معدلة
ملاك:-انجبي انجبي انطيني بطانية خلي انطمر
شمرتلي بطانية وتمددت بفراش
أمي سحبت تلفوني ودخلت ؏ الواتساب
شفتة نشط منذ دقائق
راسلتة كتبت:-وصلت؟
بسرعة شافها وكتب:-اي
كتبت:-الحمدلله على سلامتك
دز:-الله يسلمج
ضليت اباوع للمحادثة يگول غريبين
رجع دزلي:-انتي ببيت أهلج؟
ملاك:-اي جابني جاسر
غيث:-خوش هو خابرتة الصبح گتلة روحلها
ما أمن تضل وحدها
ملاك:-ليش ما تأمن؟
غيث:-ضلي بنص أهلج أأمن
ملاك:-بس انتَ رايح؟
غيث:-وياي اصدقائي ثنين
ملاك:-ها يعني رايح سياحة؟
غيث:-اي عيني
ملاك:-لعد ليش تگلي شغل؟
غيث:-بكيفي
ملاك:-خوش
دزلي مصلق يضحك ضحكت
وقفلت وغفيت
شوية وكعدتني ملك ؏ غدة
للعصر وأجت تحمحمت وگعدت
واني اگلب بالتلفون هزيتلها راسي:-شكو؟
ملك:-اريد اگلج شغلة
ملاك:-اي؟
ملك:-يمة استحي
ملاك:-هاي منية التستحي؟
ملك:-مادري والله اني هم مستغربة منو التستحي
ضحكت بصوت عالي:-گولي شكو؟
ملك:-اكو واحد خطبني
ابتسمت ودرت عليها:-اي؟
ملك:-شو كيفتي
ملاك:-احجي احجي
ملك:-باعي هو الولد حباب يعني حسب السمعتة
ملاك:-وين شفتي
ملك:-هو ويانة بالمستشفى بس اكو شي واحد
ملاك:-شنو
ملك:-ماعايش ببغداد
ملاك:-لعد؟
ملك:-بكربلاء
ملاك:-بعيدة
ملك:-باعي هو من جهه حلوة كربلا ويم الامام
الحسين واجواء حلوة اني احبها
بس من جهه ثانية اني ماحب التقييد وتعرفين
لبسي شنو العباية ما حاطتها ؏ راسي
اخاف هناك اروح اتقيد لو شي يعني ماريد
تقيد
ملاك:-حُبي اول شي نشوف ونسأل واذا
القسمة زينة بعد مابيدنة شي
بس انصحج ركزي ؏ الشي الزين عوفي الملابس
والتقييد هاي كلها خزعبلات وانتي أساساً
بس تتزوجين راح يمشي لبسج عدل
سواء هنا او بغير محافضة وشحلاتها كربلاء
اصلاً احلى عيشة تعيشيها هناك
ملك:-اي سمعت هو بيت اهله يم الأمام
ضربتها ؏ راسها:-نوب رايحة تبحوش وراه ادبسز
ملك:-لا ولج باعي هسة شكد بالجامعة
اجو وخطبوا بس ماحس مثلة شو احسة هيج
يمثلني مادري اني احسة رجلي اول ماشفتة
ضحكت بصوت عالي وغميتها:-وهسة شنو؟
ملك:-روحي گلي لأمي
ملاك:-ولج هسة امي تطيح حضي
ملك:-لا حباب استحي منها والله
ملاك:-امري لالله
گمت واني رجل تتقدم ورجل تأخر
وگفت يم باب المطبخ هي جانت تغسل اماعين
باوعتلي بتك عين ورجعت تغسل
ملاك:-اگلج يمة
سكتت ماجاوبتني رجعت كررتها
نترت:-خير؟
ملاك:-اريد احاجيج
ايمان:-شكوو
ملاك:-تعاي اگعدي
غسلت وهي تستغفر واجت كعدت
گبالي ؏ الكرسي گتلها:-شسمة اريد اگلح شغلة
ايمان:-احجي
ملاك:-اكو ولد متقدم لملك
ايمان:-اي؟
ملاك:-شنو أي؟
ايمان:-شتردن بالضبط اني غاسلة ايدي منجن
ملاك:-يعني هو الولد تكول حباب وزين
وهي عدها تواصل ويا اختة وتگول انطونة كلمة
حتى نجي نتقدم يعني تقصد تجي نسوان وهيج
يشوفوها وبعدين يصير رسمي
ايمان:-منين هو؟
بلعت ريگي:-من كربلاء
رفعت حاجبها:-هلو؟
ملاك:-شنو ترة تخبل كربلاء اكو واحد ميحب
يعيش بيها
ايمان:-اي بس مو بعيدة عني هلگد
ملاك:-هسة الله كريم تگلهم يجون؟ لو ترفضين؟
ايمان:-گليلها أي
ضحكت ورحت لملك تخصرت
و وكفتلي:-شو امي وافقت بسرعة؟
ملاك:-جا شتردين
ملك:-هاي هيج تريد تخلص مني
ضحكت وگلت:-لا بس يعني اكيد تريدلج الخير
ملك:-شو اني خايفة
ملاك:-الله كريم توكلي ورا ربج
هزت راسها وكتبت رسالة للبنية
وهي ماصدگت كالت باجر نجي عليكم
وفعلاً ثاني يوم
اجت نسوان هواي امي كالت
طلعي عيب بس اني اضل
ابتسمت اتذكر قبل لا اتزوج جانت تختلني
في سبيل مايعرفون اني مُطلقة ويرفضوها
وحتى هي حست من ذبيت نفس
وضلت مدنگة تشتغل وترتب
دخلت للاستقبال واني لابسة ومبدلة
كامن سلمن علية وهنه يبوسني
وحدة منهن سألتني:- شسمج يمة
رديت عليها وهي حطت
ايدها ؏ حلگها وباوعت للبصفها:-جا ولج
يگول هذا ابنج اسمها ملك
ضحكت:-اي هي اختي ملك اني ملاك
_ياااا يمة صدقة لربج كيفت عبالي انتي
تخبلين مزوجة؟
ملاك:-اي مزوجة صارلي 3 اشهر
الثانية ردت:-يا حبيبي الله يخليكم سوة
ابتسمتلها وذبيت نفس
شوية وطبت مليكان بمكياجها الصاروخ
وثوبها الحصر وكعب
ملك اطول مني وجسمها مقسم تقسم
ومكياجها التخلي يطلعها تجنن
تخلي كلة تُرابي ابد ولا يوم شفتها مخلية
شي ثاني لان سمرة
گامن سلمن عليها وهنه منبهرات بيها
گعدنها بنصهن وهي من يسألنها تجاوبهن بكل
ثقة
واني احرك حواجبي الها
واضحك
وهي ماتضحك تجاوب وتضل تباوعلي
بدون اي حركة
لحد ماطلعن وهنه مقتنعات اقتناع تام بيها
من طلعن امي گالت:-شو مرتاحة اني
ملك:-اني خايفة
ايمان:-خلي اروح لام محمد
ملك:-اقرب نقطة دالة
ضحكنة وهي لبست عبايتها وراحتلها
وملك تمسح بالمكياج سألتها:-ها شرأيج؟
ملك:-شنو قابل قطعة ملابس هو شبيج خية
خنشوف اول يروح يسأل جاسر
اريدة ينفضليا نفض
ملاك:-عمت دارج
ملك:-انجبي جا ماخذ ياهو الجان اني
هزيت ايدي وجاسر راح سأل عنه
ويكول المحافضة فريتها فر
وطلعوا ناس معروفين والكُل يعرفهم وهو
غير شغلة الدكتور يشتغل بشركة عند ابو
ملك تگول ميهمني الفلوس اهم شي هو زين
ورا ايام اختنگت من الحر العدهم
وماگدر البس شي يريحني لان جاسر يفتر
تالي رجعت لبيتي وامي بقت ضايجة مني
وغيث مرات يتعصب مني لان تلفوني
اضل غالقتة ومافتحة من يدك علية انساه
ــــــــــــــــــــــــــــــــــ
نزلت من الطيارة
بيدي الجنط وهوسة
اجرت تكسي ورجعت للبيت
دخلت البيت هدوء ونضيف
ابتسمت مرتاح ياخي ما اكو احلى من شعوري
واني وياها نفس البيت لو افتر
الدنيا كلها
مارتاح الة وياها
صعدت فتحت الباب الملاك نايم
تقربتلها مسحت العرك من گصتها وبست راسها
استنشق عطرها بهدوء بدون ماتحس
ادري بيها تضل تطفر منا ومنا اذا تشوفني يمها
عفتها ودخلت للحمام واني اسبح
وافكر بأساليب جديدة حتى اتعامل وياها
اولهن ابتعد وحتى ايدها مالزمها
طلعت انشف بشعري وهي ؏ نومتها
نمت بصفها هاي عود اني كلت ماوصل يمها
ضليت اتأملها
لحد ماتعبت غطيت بطنها الطالعة من التشيرت
وخليت ايدي ؏ عيوني
رجعت فتحت عيني وگمت من مكاني
حطيت ايدي ؏ بطنها وماكو نفس
رجعت لخشمها اريدها تتنفس ماكو
ضليت اصفك بيها واصيح
بأسمها حتى تفز وماكو مثل الميتة بضبط
اخر شي همست:-راح اموت
غيث:-ماتموتين بابا بس اصحي فتحي عينج
اغسللها واني مخبوص
ضلت تروح منا وتجي منا لحد ما صحت
جريت نفس براحة
رحت للسبلت مايشتغل لزگتة دفرة
وباوعتلها:-هذا من شوكت مايشتغل
حجت وهي روحها غايبة:-صار 3 ايام
غيث:-استغفر الله كومي اسبحي كومي
گومتها دخلتها للحمام
وانطيتها الملابس ونزلت...
ـــــــــــــــــــــــــــــــ
اندك الباب وسمعت صوتة:-ها ملاك؟
ماحجيت
گمت بدلت وطلعت لزمني بسرعة وگعدني
؏ التخم وخر المنشفة وراد يمشط شعري
ضل يجيبة منا ويحطة منا
مايصير
وخرتة عني وشلتة كلة
واني مغمضة همس:-شعر لو بلوة
رجع على صوتة:-راح انزل هسة اجيج ضلي متمددة هنا جوة المروحة
مددت وضليت مغمضة
لحد ما شوية وحسيت روحي انشاليت
فتحت عيوني ولگيتة هوَ همست:-شدتسوي
غيث:-اسكتي
سكتت ورجعت راسي ؏ صدرة
وهو گال:-افتحي الباب ماگدر اني
باوعت باب الأستقبال فتحتها
وهو گال:-تنامين بالگاع كبال المبردة لو ؏ التخم؟
حجيت ؏كيف:-بالگاع
ذبني بالگاع وجابلي جرجف ومخدة
وتمددت الهوى بارد ردلي روحي واني ستوني
سابحة ارتاحيت
باوعتلة وگلت:-هاي منين المبردة
وهو يمسح بگصتة گال:-هي هنا قديمة نامي يلا اجيبلج شي؟ بعدج دايخة؟
ملاك:-لا لا زينة تعال نام
غيث:-هاي راح انام هنا ؏ التخم
هزيت راسي وهو يباوعلي
ولفلفت روحي بالجرجف الخفيف
وهو نام ؏ التخم ضليت اتگلب بالفراش
وكلمات امي وهي ترزلني وتگلي
يحبج وخايف عليج ضلت ترن براسي
رفعت راسي عليّ رايح بسابع نومة
وفاتح ايدة ابتسمت وگمت
؏ كيفي
بلعت ريگي وتمشيت وصلت يمة
اكو مكان گعدت بهدوء بدون ماطلع صوت
وجريت الغطا الخفيف
وتمددت وخليت رجلية ؏ رجلة
حتى ما اوگع حطيت راسي ؏ صدرة باوعتلة
وبستة بخدة بدون ماخجل ولا استحي
ولا اخاف!
واني عاضة شفتي وغمضت
عيوني مبتسمة...
