رواية لأني عاقر الفصل الخامس والثلاثون بقلم مريم خفاجة
انت تدري عيونك
مسويتلي واهس حتى اعيش؟
انت تدري خدودك
اترف من شكو بالدنيا ريش؟
انت تدري بلون شعرك
على لون الليل طاغي؟
انت تدري الاوردة
المتفرعة بيدك كلها متفرعة بدماغي؟
...
شوية وحسيت بي يتحرك
وصوتة بأذني:-ملاك
فتحت عيوني بهدوء وگلت:-ها
غيث:-ليش نايمة هنا؟ بيج شي
ملاك:-لا
غيث:-شنو شبيج مصخنة انتي؟
ملاك:-لا
وهو صافن بوجهي مستغرب:-ملاك شبيج؟
ملاك:-مابية شي نام
ابتسم:-شنو اني اتخيل لو شنو بضبط
ضحكت:-ليش تتخيل؟
غيث:-ليش اجيتي نمتي هنا؟
لزمت عكسة ورجعتة حتى ينام
ورجعت خلبت راسي ؏ صدرة وهمست:-انتَ
زوجي فـ اكيد انام يمك لعد وين انام
غيث:-شنو نزل عليج الوحي اليوم
ملاك:-تريدني اگوم؟
غيث:-لا ضلي يابة ضلي ادري بيج
هسة بس تگعدين تگلبين الكصة
ضحكت ورجعت غفيت
بعد فترة يلا گعدت متكسرة تكسير
والمبردة تشتغل علينة والدنيا باردة
ردت اگوم اطفيها
بس غيث مقيدني تقييد حتى نفس
گوة اتنفس اباوع الدنيا ليل وكلشي ماينشاف
حرفياً
وصوت انفاس غيث القريبة
من اذني فقط تنسمع همست
بصوت نعسان:-غيث
بقة نايم وماگام
وهو بالعادة اذا اتحرك يفز
ابتسمت بخبث
وگرصتة ببطنة گرصة قوية
رأساً گمز واني ردت اطيح لزمني بثنين
ايدة
غيث:-شنو هذا الگرصني
ملاك:-دفتح لايت
غيث:-وين
ملاك:-غيث الدنيا ضلمة افتح
تلفونك وينة
غيث:-هنا جوة
مديت ايدي جوة المخدة
وفتحت اللايت وهو لازم راسة واباوع
لجسمة يرجف ضحكت:-شبيك
غيث:-ملاك مايصير تفززين هيج انعل يومج
ملاك:-هاي هيج رقيق
غيث:-بطلي سوالفج ادبسز
ضحكت بصوت عالي وهو جرني
وصار فوگاي وعض خشمي عطت:-اووووي
ضل يعضعض بية واني اضحك
وابعدة عني
وخر ورجع تمدد وضمني أكثر
ملاك:-شو بيش الساعة
غيث:-شگد تحوصين لخاطر ربج
اخذت تلفونة اباوعلها
بالعشرة بالليل
صارلي يومين ؏ فد نومة ضليت صافنة بالموبايل
غيث:-بيش الساعه؟
ملاك:-بالعشرة بالليل
ضحك وهو يهتز بضحكتة:-خوش نومة
تموت
ملاك:-وخر عني خلي اگوم
غيث:-تؤ تؤ ضلي
ملاك:-تكسسرت تكسير غيث دعوفني
غيث:-اشششش
ملاك:-حباب وخر شوف جسمي يرجف
من الجوع
غيث:-محد گالج تعاي نامي هنا
ملاك:-يعني تورطت
غيث:-بورطة جبيرة
ملاك:-عوفني حباب
غيث:-والله ماعوفج
ملاك:-شسويلك وتعوفني؟
ضوة الموبايل صار ؏ وجهه
ابتسامتة وضحت وهو مغمض گال:-بوسيني
ابتسمت وشلت راسي وبستة بخدة
همس:-بعد بس غيري المكان
ضحكت وبستة بگصتة
غيث:-مو خوش سالفة هاي
ملاك:-لاتطلب اكثر
غيث:-گولي مشتاقتلك
ملاك:-مشتاقتلك
غيث:-شگد؟
ملاك:-هواي
غيث:-تحبيني؟
ملاك:-لا
فتح ايدة واني وگعت من القنفة
للگاع وصرخت لان نلوت رجلي
غيث:-حيل
ملاك:-شكد خبيث
غيث:-بس انتي تخبثين
ملاك:-اريد اشوف منو ينام يمك بعد
غيث:-احسن تزعجيني
غندبت وضربتة بأيدة راد يجرني
شردت
جسمي گوة امشي من النومة المكسرة
هاي شوداني ونمت يمة
وجمال ؏ قنفة وهي زغيرة وهو
لاف ايدة ورجلة علية واني نص جسمي
صاير جواه
ويمكم الحساب
غسلت وجهي ومطيت روحي اكثر
وهو طلع من الاستقبال فاتح
تك عين وبس بالبجامة ضال
غيث:-هاي ليش منزعتني
ملاك:-هم خبيث وهم جذاب يمة شنو انت
ضحك بصوت عالي كلش
غيث:-بعدج ماتعرفيني
ملاك:-الله واعلم شضام من صفات
عافني وهو يضحك ورا للحمام
رحت للمطبخ صفنت بالثلاجة شاكل
دخل هو ينشف بوجهه:-شتردين تسوين
ملاك:-انت جوعان؟
غيث:-صارلي اسبوع ما ماكل
ضيگت عيوني:-جذاب
غمزلي
وراح گعد ؏ ميز الطعام
واني طلعت اكل وحميتة وصبيتة
وخليت يمة واني يمي
ونزلت راسي آكل وكل ساعة اباوعلة
وهو يضحك علية
لمن خلصنة شلت الاماعين
وغسلتهن وصفنت لا صلاة ولا تعلى
سمعت صوتة يصلي
باوعت للساعة بـ 11 واني ماحب
اصلي هيج وقت احس روحي ثگيلة
گلت باجر اگضي
فتحت التلفيزون وگعدت اباوع
اجة يمي جرني من شعري:-آآآي
غيث:-وجعاي ماتصلين
ملاك:-باجر اقضيهن
غيث:-وماتصلين هسة مگرمة
ملاك:-ماحب اصلي هيج وقت
باوعلي تك عين واخذ الريموت
وضل يداور بالقناة
جاي يداور واني انتبهت لفلم بس مر
؏ السريع
صحت:-رجععة رجعععة
رجع شوية وخلاه ؏ قناة
وگال:-شنو
ملاك:-هذا فلم اليشبهك
طلع سيدهارت واني ضحكت
وهو گال:-مايشبهني انجبي
ملاك:-والله يشبهك
غيث:-مايشبهني
ملاك:-يشبهك
غيث:-لزگي بعد وبعدين شكو شاگة حلگج
علي
ملاك:-غير يشبهه زوجي
دمغني:-هاي ليش تدمغني هيج
غيث:-حتى ماتباوعين ؏ الزم شون صلافة
ملاك:-ترة يشبهك هووواي والله
باوع الحواجب نفس الشي بضبط
وعيونك حلوات مثلة بس انت بيهن لون وهو
سود واكيد هو احلى
وحلگة هم مثلك بس انت شواربك
كلش ثخان خففهن تصير نسخة
لزم اذني:-آخ آخ
غيث:-منو الأحلى؟
ملاك:-انت اكيد
غيث:-عيديها شو
ملاك:-شنو هذا الأزرك خلي يولي
انت احلى تخبل
غيث:-يشبهني لو ميشبهني؟
ملاك:-يشبهك
لوة اذني اكثر حجيت بسرعة:-اصلاً
انت مالك شبيه انت انسان منفرد
من نوعك مختلف
غيث:-عفية
وخر عني واني گتلة:-ليش تغار
غيث:-اني محد يشبهني
ملاك:-خبيث وجذاب ومغرور
غيث:-اي
ملاك:-اكوم اصلي احسن
گمت ورجع سحبني وگعت بين
رجلي ضحكت:-كافي
غيث:-اشش ضلي گاعدة لاتگومين
رجعت راسي
؏ صدرة واحنة نباوع ؏ فلم
شوية وسألتة:-تونست بالسفرة؟
غيث:-طلعتيها من خشمي
ضحكت:-ليش؟
غيث:-خليتيني آكل بروحي
ملاك:-ماگتلك اني روح
غيث:-ادك عليج ومتجاوبين وتخليني الوب
ملاك:-والنبي تلفوني مالزمتة من جنت ببيت
اهلي
غيث:-ادري بيج بس نوم
ملاك:-والله مانام
غيث:-صورج تشهد
عگدت حاجبي:-يا صور
غمز:-ملك وجاسر موجودين يوثقولي
ملاك:-ايا ادبسزية
ضحك
واني اباوع لضحكتة
ملاك:-صور حلوة لو لا
سحب تلفونة واشوف صوري
فضيحة شكو شي مفضوح طالع مني
واني اسب والعن بملك
گلبت بالصور جانن صورة
ملاك:-هاي من رحت
غيث:-اي هاي اخر يوم جنة بالشلالات
ملاك:-الله حلو
غيث:-فديوم نروح سفرة اني وياج
هزيت راسي وابتسمت
واني اگلب واباوعلة شكلة حلو
والصور اليطگهن احلى
مطلعاتة جنة ذولة الي بالمجلات
لبسة واناقتة شي ثاني
ماشفتة مكرر لبس معين
وجگارتة بيدة وملامح وجهه صور كلش
حلو بحيث اصفن بالصورة ساعة
وادري بي يباوعلي ومبتسم
ملاك:-طالع حلو
شال گذلتي عن عيني
واني مدنگة
لحد ماخلصت الصور وعدتهن
يلا انطيتهيا:-حفضتي رموشي من كد ماباوعتيلي
ملاك:-الصور حلوات
غيث:-عيونج الحلوة
ملاك:-اسألك سؤال
غيث:-اسألي
ملاك:-من رحتوا هناك....
قاطعني بضحكتة:-ادري بسؤالج
ملاك:-جاوبني لعد
غيث:-يرحون همه بس اني ماروح
ملاك:-وين يرحون
غيث:-خلي اسولفلج هذا الموقف
ملاك:-سولف
...
رجعنة من المطعم نتمشى
واسمهم يصوفرون للمارات ويذبون حجي
واني اصيح بيهم
غيث:-كااافي مصختوها عيب عليكم
مصطفى:-هو هذا المزوج مرتاح
غيث:-شو دكل *** اني هم صوجي اجيت
علي:-دروح مرتك مشبعتك جا شتريد
انطيتة بوكسي
وهو ضحك وشرد عني ولو ضال جا موتتة
وصلت للشقة طبيت
قبلهم دخلت اسبح وهمه ينرگلون
همه حبابين بس هاي سوالفهم اكرهها وما
يبطلوها شگد اگللهم بطلوا
هالطبع
طلعت انشف بشعري
فرشت فراشي وتمددت واخذت
تلفوني دگيت ؏ خانم ماجاوبت ضليت
اگلب بالتلفون
باوعولي وگالوا:-تروح
غيث:-وين؟
ضحك علي وغمز:-تدري وين
غيث:-اذا رحتوا بعد لاتجون لهنا
مصطفى:-دمشي عوفة هذا شابع ومرتاح
ضحك وجرة علي وراحوا وادري
بيهم وين مولين
ملاك:-وين راحوا
غيث:-للملاهي
ملاك:-وانت مارحت وياهم ابد؟
غيث:-لا مارحت غير شابع منج
ضحكت وخليت راسي
؏ جتفة:-هممم عبالي تروح
سكت ومسد ؏ ضهري
ملاك:-زين اسألك سؤال ثاني؟
غيث:-اسألي
ملاك:-هم حبيت قبلي؟
جاوبني سريع بدون تفكير:-تؤ
انتِ اول وحدة ديشنتي گلبي
ابتسمت واني العب بشواربة
واباوعلة وهو عينة ؏ التلفيزون لحد
ماگمنة ونمنة فوك
وبالأساس مانمت ولا هو ضلينة
گاعدسن للصبح لحد الخمسة ونمت
وهو انتضر وقت دوامة وراح
مرت كم يوم وهو عايفني
براحتي مجرد يخليني انام بحضنة
ميبعدني عنة
وبيوم بليل لبست
گلت لازم لان احس انتضرني هواي
دخل للغرفة واني لابسة قصير
بلعت ريگي وايدي رجفت
حط ايدة ؏ زندي وگومني ورفع راسي
بيدة
غمضت عيني ورجفت شفتي
غيث:-فتحي عينج
فتحتهن عيوني مدمعة
غيث:-انتي من كل عقلج؟
ملاك:-شنو
غيث:-ليش تجبرين نفسج ؏ اشياء ماترديها
ملاك:-مو ماريدها بس
غيث:-بس شنو اني طلبت منج؟
ملاك:-لا
غيث:-روحي غيري ملابسج بالترتاحيلة
وتعاي وعوفي هاي السالفة لحد مارجفة شفتج
هاي تروح انا ماريدج وانتي متأذية
ولا اريدج تفكرين بالماضي وياي
ملاك:-انتَ ليش هيج تسوي
ابتسم:-شمسوي؟
ملاك:-جاي تحسسني بالذنب
احس روحي ضلمتك
غيث:-احلى ضلم هذا
ضحكت:-روحي بدلي بابا هاي السوالف
ماتفيدج
ملاك:-بس ميصير حرام
غيث:-بالحالتين هي حرام
من اتقربلج وانتي متأذية حرام
ملاك:-ومن عايفتك هم حرام؟
غيث:-گتلج هي بالحالتين حرام
زين احنة ليش نسوي شي حرام وشي مراضين
علي؟ لمن تحسين نفسج مستعدة
وناسية كلشي وعقلج بي بس غيث
بوقتها اكون مستعد وياج نكون حياة جديدة
وهيج راح تصير السالفة مو حرام
مو لو مو مو؟
ضحكت:-شختار هسة
گرص خدي وباسني:-روحي بدلي وتعاي نامي
شلت رجلية
وبستة بخدة حيل واخذت تراكي وبدلت
شگد حباب
بس هو تجي ايام يصير خبيث
وياي
يضحكني هواي
واتونس وياه مرات اشوفة يصفن
بضحكتي استحي واگوم عنة
بالليل ياخذني ويطلعني
لو لبيت رغد لو لبيت وحدة من عماتة
ومر ؏ جيتة من السفر اسبوع
الضهر هو نايم
عفتة وگمت اخذت ساحبة الشعر
ونزلت
گعدت بالصالة اسحب بشعري
لا ساعة ولا ساعتين ايدية وگعت شعري
طويل ومياخذ بسرعة
يتأخر هواي
تالي شمرت الساحبة واني اغلط ؏ روحي
شورطني
للعصر وطلع غيث
يتسوك صعدت للغرفة لازم اقوي
گلبي هو اني الة ليش افكر بالماضي؟
هو شنو الماضي؟
انسي ملاك انسي الأعتداء
انسي حبج المالة نفع لكمال انسي كلشي
غيث يحبني وهواي هم
اي رجال يتحمل مرتة 3 اشهر؟
بدون مايوصللها؟
وكلنة نعرف الزلم شنو
واكيد هاي الغريزة رب العالمين خلاها
بس هو مسيطر ؏ كلشي احسة في سبيل
ما اتأذة
الله ليش خلة نعمة النسيان؟
اكيد علمود ننسى
الخسر مو اني
الخسر هوَ
والفاز بية غيث
بس لهالحظة ماعرف اذا يكمل
وياي او لا؟
خوفي من البدايات الحلوة
انسي انسي
فتحت كنتوري وگعدت اباوع
شلبس ابتسمت واني بنص الملابس
قبل شهر كارهه الحياة كلها هنا
وهسة اني جاي اخليها حلوة؟
عسى ولعل
اخذت ثوب نوم لونة كحلي
ولبستة باوعت لروحي بالمرايا
جان ستن وطويل فتحاتة صغيرة
من الأصفاح وجان تعلاگة والضهر مفتوح
لبست كلادة ذهب ناعمة
وگعدت اتمكيج مكياج صاروخ لان
الثوب يلوگلة مكياج طوخ مو خفيف
فليت شعري وابتسمت
طگيت صورة ودزيتها لأمي
ورا مدة يلا شافتها
ودزتلي بصمة:-الله يهنيكم يمة ديري بالج ؏
روحج وعليّ غيث ماينعاف
جريت نفس براحة
ودزيتلها گلب احمر ونزلت
للمطبخ
جا بعد هذا الترتيب والعطر
والمكياج اطبخ
باوعت للساعة المغرب همزين
متوضية وغيث لسة ما اجة
طلعت العندي
وكعدت اطبخ لشوية وحسيت
بسيارتة دخلت
بلعت ريكي وهديت نفسي
واني انطق بداخلي كلمات تهديني اكثر
انفتح الباب واني درت وجهي
الة جان عرگان وميشوف من الشمس
همست:-الله يساعدك
رفع عيونة ببطئ لهيئتي
وابتسامتة الخفيفة انرسمت ؏ وجنتة
خليت شعري ورا اذني واجيت
اخذت المسواك من ايدة وهو يباوعلي
ضحكت:-ادخل شبيك
دخل وسد الباب
واتقدم واني گلبي يرگع
همزين مخلية حُمرة طوخ حتى ماتبين
رجفة شفتي
لزم خصري وجرني الة اكثر
غيث:-هاي شمسوية؟
ابتسمت:-شمسوية؟
غيث:-تخبثين وياي؟
ملاك:-لا
غيث:-لعد؟
ملاك:-اني اريدك
حجيتها وگلبي يرجف شجاي احجي اني
غيث:-متأكدة؟
ضحكت:-كلش متأكدة
دنك باس حنچي صعوداً
لوجناتي ابتسمتلة:-يعني هذا كلة الي؟
ملاك:-اي
غيث:-انا احبج
بلعت ريكي واني العب بدگم
قميصة:-اتمنى اگلك اني هم بس احس بعد
مو الوكت المناسب
غيث:-وجهج هذا گبال عيوني اني مرتاح
ملاکي
هزيت راسي سريع:-لاتگول ملاکي لاتعيدها
ابتسم:-ماگولها
غمضت عيوني وخليت راسي ؏ صدرة
غيث:-هذا شنو الأحترك؟
دفعتة عني واشوف البتيتة
صايرة سودة:-يااااا غييييث
غيث:-شگد فاهية ليش حركتيها
ضربتة بصدرة وگلت:-غيرررر انت تدك سوالف وياي
صارلي ساعة اثرم بالحر ليش هيج ليييش
ضحك وراح اخذ الطاوة وشمرها
كلها بالزبالة:-انت كشرها واثرمها يلا عقاب
وهو يضحك گال:-انطيني
شمرت علي البتيتة والسجين
وهو يگشرها ؏ السلة
سوينة العشة اني وياه
وساعة نتداهر وساعة يتغزل بية
كملنة عشة وكمت غسلت
الأماعين وهو. واگف بصفي يغسلهن
وياي وكل سعة منزل نفسة ويشم
برگبتي وانگعة بالماي
گضيناها ضحك
صعدت قبلة لفوك وهو حتى باقي
بالقميص والبنطرون مانزعهن ولا صعد
فتحت شعري ورجعت خليت
عطر ورتبت نفسي
اجة من وراي
حاوط خصري وشم شعري
ابتعد وفتح الجرارات ضل يفتح
بيهن واحد ورا الثاني:-شدتسوي؟
غيث:-وين القراصات
ملاك:-شتسوي بيهن
غيث:-دگليلي وين
ملاك:-بالكنتور
راح جاب العلبة واني ضحكت
اخذ المشط وشال شعري عالي:-هاي ليش
غيث:-اموت منة گصي بروح الحمزة
ملاك:-على كيفك خلبصت شعري شسويت
غيث:-وخري ايددج
وخرت ايدي وهو شالة كبة عالية
وخلة الف قراصة وماشة:-صدك تحجي؟
غيث:-جاي تفهمين شنو يعني اكره الشعر
الطويل؟ وانتي فالتة عود تغريني مثلا
تلعبين نفسي بالزايد
ملاك:-مو صوجك صوجي اني
اشسور بي وايدي وگعت
غيث:-موديج يابة اني وگتلج شسوري
من البداية صارحتج ماحب الشعر الطويل لو اموت
شلت الباقي ورتبتة
وهو ايدة تمشي ؏ خصري
دارني الة وابتسم مخلي گصتة ؏ كصتي
مديت ايدي ؏ ازرار القميص
وفتحت دگمة دگمة واني ابتسم اله
وهو يباوعلي بحُب ماشوف بعيونة نضرات جريئة
ذبيت القميص من ايدي
وذبيتة بالگاع
شال گذلتي عن عيني وگال:-تدرين شنو
ملاك:-شنو
غيث:-حُبي الج مُختلف عن الناس
ابتسمت
وهو كمل:-جنت بحُبج ساكت
وحتىٰ سكوتي گبالچ يختلف
چنت أباوعلچ وأَعيش
و وگع الفستان بالگاع...
ـــــــــــــــــــــــــــــــــــــــــ
الدنيا حارة والكهرباء مطفية
وايدي مسحوبة احس واحد لازمها
جريتها حيل وفتحت عيني طبت الشمس
بنصها غمضتها بسرعة
همست:-غيييث
غيث:-ابو وامة وعمامة وعماتة وخالاتة وخوالة
ضحكت:-شدتسوي ايدي هدها
غيث:-اوكفيلي
ملاك:-غييييث عوووفني
غيث:-جاي اصبغ اثبتي
فتحت تك عين وضحكت:-هاي صدُك جاي تصبغلي؟
وهو يبتسم ويصبغ أضافري
بلون الاسود
لحد ما خلص اني اباوعلة
باوعت لأيدي مصبغهن كلهن بلون الاسود
ملاك:-حلووات ليش هذا اللون
غيث:-هو لگيتة گبالي
واني اباوعلهن تمدد بصفي
وصار وراي وجرني الة وضام راسة برگبتي
ابتسمت من نغزات شواربة:-بيش الساعة
غيث:-بالستة
ملاك:-تداوم اليوم؟
غيث:-اكيد
ملاك:-لعد ما نمت انت
غيث:-معليج بابا نشيط
ضحكت ودرت نفسي علي
سحبني وخلاني فوگاه يبوس بية
واني ابعد شعري عن وجهي واضحكلة
ملاك:-نعسانة شدعي عليك هسة
ضل يمسد ؏ شعري
رجعت غفيت نززني صوتة:-گومي نتريك
ملاك:-يااا والله مابية حيل اسوي تعبااانة
غيث:-عليش تمطين بحجيج مط بابا
اني مسوي گومي
ملاك:-هاي شنو صاير نادر
غيث:-يومية انطيني جرعة واصيرلج
سوبر مان
ضحكت وغطيت نفسي بالملحف:-انطيني ثوبي
شمرة علية لبستة بخجل
وگمت وياه وهو لازمني من خصري
ويمشيني ؏ كيف
باوعت لميز الطعام اشكال والوان
عصاير وريوك مرتب
ابتسمت وگلت:-شنو هاي الترتيبات
غيث:-گتلج بعدج متعرفيني
ملاك:-اممم خلي نضوك بلا
ضكت اكلة شوية مالح
بس جان طيب ما مسوي جاي يكول حارة
بس عصير بارد
ملاك:-زين هسة انتَ مانعسان؟
غيث:-لع
ملاك:-يعني راح تروح للدوام خاف هناك تتخربط
غيث:-شگالولج عني ملاك المايعة
ملاك:-اني مايعة
غيث:-امس تتخرخبين بيدي اجيبج منا
تجين منا هم گولي لا
ضحكت بخجل وتفاصيل امس
مانسيتهن جان كل ثانية يبتعد عني ويمسح
وجهي ويبوسني ويهمس:-متأذية؟
هاي الكلمه سمعتها الليل كلة
جان حنون ولطيف وياي وهادئ لأبعد حد
وكلماتة الرومانسية انطبعت بأذني
وهو يگول:-اخ يعيون أمي شسويتي بية
واني بادلتة بكد ما ينطيني حب انطي
مابتعد عني لحد وجهه الصبح
كملنة عزلت الغراض ؏ السنك
وعفتهن ماغسلتهن الدنيا حارة وماكو كهرباء
صعدت اباوع بالمرايا
تلمست رگبتي ماتنشاف اصلا
ملاك:-هاي شمسوي بية خرب يومك
غيث:-تستاهلين شو هذا اكو فراغ هنا
ضحكت ودفعتة عني:-شنو حالف تصبغ رگبتي
وخررر
غيث:-طلعت حيف ال3 اشهر
ضحكت بصوت عالي وهو گال:-شوفي بطنج
واخترعي
فتحت عيوني بوسعها:-شمسوي؟؟
غيث:-دشوفيها
طلعت لبرة وشلت الثوب
واباوع بطني مصبوغة صبغ ضليت
اسب والعن بي
وهو يضحك علية ويتحارش
خلص وطلع للدوام
اخذت مخدتي ونزلت نمت بالصالة
بالگاع
لوين يلا فزيت ؏ صوت رغد
گعدت مطفية
همست:-هااا
رغد:-ولج گومي شنو ميتة
ملاك:-شتررردددييين تعبانة
رغد:-دگومي انطيني تمن گومي
گمت اروح منا واجي منا
اخذت الطاسة من ايدها وفاتحة تك عين
وامشي
رغد:-بوية الحر عمي متنة
ملاك:-انعل ابو العراق
رغد:-وانتوا بهالحر داخلين حرب شني
رگعتها بأيدها:-ادبسز مثل اخوج انتي
ضلت تشهك وتضحك:-يمة صارلكم شگد
مزوجين واني ادور وراكم اشوفلي اثر
شو شني كلشي ماكو هسة انكشفتوا
ملاك:-اخوج عليّ نذر يصبغ رگبتي
ضلت تضحك
طردتها راحت لبيتها شگول عليك ياغيث
فضحني
رجعت نمت
ورجعت كعدت ؏ صوت غيث:-اررريد
انام شسالفة كل ساع واحد مكعدني
غيث:-كومي يابة ماتشبعين نوم
ملاك:-مانمت والله عوفني
غيث:-گومي راح اصعد ابدل وانزل
اذا ماشفتج كاعدة اكتلج
ملاك:-ما
اختفى صوتة ورجعت غفيت
فزيت ؏ مي بوجهي
فتحت عيني ومطيت جسمي:-كاااافففي
شبيكم كل ساعة واحد جايني
غيث:-منو جايج
ملاك:-رغد اجت اخذت تمن
غيث:-گومي جبت اكل من برة
ملاك:-ماريد والله نعسانة ومابية حيل
شالني واني الة شوية ابجي
جاب الصينية وخلاها بالگاع وخلة بيدي
الخاشوگة
واني تك عين فاتحة
شلت بالخاشوگة التمن واوصلة لحلگي
ويوكع كلة
غيث:-صدك جذب جا شو اني كعدت نشيط
ذبيت الخاشوگة من ايدي
وتمددت ؏ رجلة خلة ايدة ؏ خدي يمشيها
؏ كيف
واني بسرعة البرق انام
يگول مانايمة صارلي شهر
لحد ما كعدت العصر
كمت وهو حاضني ونايمين بغرفتنة
اخذت ملابسي ودخلت للحمام
سبحت وطلعت
وكفت كبال المرايا امشط
وعيني ؏ آثار جانت آثار حُب حتى متأذي
باوعتلة نايم
رحت للجهه مالتة وقطرات المي
الي ؏ شعري عصرتها ؏ وجهه
فز ودفعني
غيث:-خرب يومج
واني اضحك بصوت عالي:-كافي گوم متشبع نوم
جرني بين رجلية
وخنگني بيدة:-يييمة اختنگت
غيث:-منو الميشبع نوم اني لو انتي هنة ساعتين
نمتهن ادبسز
دفعتة عني وگمت گتلة:-گوم يلا
تكسرنة بالنوم
غيث:-گايم حضريلي ملابسي
هزيت راسي وگمت
حضرتلة ملابس واني كملت تمشيط
ونزلت شوي ونزل وراي
ملاك:-والله العشة حيرة شسوي هسة
غيث:-طلعي جبن وجاي عادي
ملاك:-عادي يعني تاكل؟
غيث:-اي جا شبيها
ابتسمت وحضرت الجاي وانتضرتة
يفور ورحت بالصالة
گعدت بحضنة وخليت راسي
بصف راسة
باسني بخدي
دك تلفونة شفناه جاسر
شالة بعد ما سلم عليّ گالة:-يوم الجمعة
مشية ملك تعال عود
غيث:-تدلل
طبگة منة وهو گالي:-شنو ملك انخطبت
ملاك:-اي واحد من كربلاء
غيث:-صدك؟
ملاك:-والله
غيث:-ماتوقعت امج تنطي هيج بعيد
ملاك:-هي ملك مقتنعة متگدر امي بعد
تجبرها
غيث:-جبروج علية؟
ملاك:-لا
غيث:-لعد شون وافقتي عبالي
امج وجاسر مقنعيج
اتذكرت الموقف
وگتلة:-لا بس يعني اني فكرت هواي
هز راسة وسكت
مشيت ايدي ؏ لحيتة:-زين انتَ شون اجيت وخطبتني؟ وين شفتني؟
غيث:-شفتج بالعيادة الجنتي تشتغلين بيها
عگدت حاجبة وگلت:-شوكت
غيث:-من جنتي مخطوبة
بلعت ريگي وهمست:-اي؟
غيث:-جنت اباوعلج من السطح
ملاك:-والله؟
غيث:-والله واسمع اغنية كاضم الساهر
مال هذا اللون واباوعلج لحد ما اختفيتي فترة
وراها خابرني جاسر عزمني ؏ عرسج
وعرفتج متزوجة
ملاك:-زين انت ليش ماتزوجت؟
غيث:-مادري لغيت فكرة الزواج من بالي
خرب يومج والله شگيتيني شك وين
ماروح افكر بيج
ملاك:-شون صدفة
غيث:-احلى الصدف
وبعدها شفتج بالمحكمة بطلاگج وانخلقت من جديد
ضحكت:-و وراها شفتني بالنجف
وبعدها اجيتك برجلية للعيادة
غيث:-شوفي شلون سحلتج
ضربتة بصدرة
وكمنة اكلنة
واجة يوم الجمعة ورحنة لمشية
ملك
وجانت مشية كارثية
جان جايب شيوخ كبار وعشيرتة كلها
بحيث سدو الشارع
الكراسي قبطت بالحديقة
فتحنالهم الاستقبال
و وراها بأسبوع عقدوا عقد القران
جان كلشي بسرعة
بحيث مر شهر واحد وحددو موعد
العرس لان الولد يريدها
واني قبلها بأسبوع فريت
المحلات فر علمود شي الي وماعجبني
اي شي
رغد تاخذني العصر للسوك
وغيث بليل للمولات ماشفت شي يناسبني
ماقتنعت بأي لبسة
لحد ما قبل يوم
كلت ماشتري عندي ملابس هواي
مالابستهن البس اي شي
متمددة انتضر غيث يجي من دوامة
والعب بالتليفون
انفتح باب الغرفة ودخل
ابتسمت وگمت
تقدم حضني وباس شعري:-الله يساعدك
غيث:-هو صدك الله يساعدني
شو انتي يومية تصيرين حلوة
خليت شعري ورا اذني وگلت:-هاي من دلالك
غيث:-ياعَيني ؏ دلالي
ضحكت وشفت علاكة جبيرة
بأيدة:-شنو هذا؟
قدمة الي وگال:-ثوب للعرس
ملاك:-جذاب؟؟؟
غيث:-هاج شوفي
ابتسمت بفرح
وفتحت العلاگة شفت شي يلمع ولونة ازرك
ضحكت وطلعت الفستان من العلاگة
شكلة مامبين گالي:-روحي لبسي
اخذتة بفرح ورحت للحمام
نزعت ملابسي ولبستة
خلي اوصفة الكم
جان لونة ازرك يلمع وحصر
كلش
ومن ورا وشاح طويل حيل يسحل بالگاع
وهاي اللفة من يم الصدر
وجان مابي ردانات صلوخ
بس مو تعلاگة لا جاية ويا اللفة مال الصدر
نفس الثخن
لبستة فرحانة يجنن كلش
مو لمع مو حلو لا جان اللمع زايدة جمال
وفخامة من كد ما حلو ضليت اباوع بالمرايا
فتحت الباب وطلعت
باوعتلة جان نايم وبيدة تلفونة
حس بية وبعد عيونة عن التلفون
وباوعلي وابتسم
ملاك:-ها حلو؟
غيث:-انتي حلوة
باوعت لنفسي بالمرايا
الطويلة فرحانة كلش بي يمكن لو شايفتة
جان ماعجبني
بس لان هو جابة فرحت
رجعت للعلاكة شفت
اكسسوارات فضية
ضليت اني وياه نختار شنو البس
وحسب ذوقة
كال بس كلادة وتراجي
طوال ومحبس ضخم
لحد ما اجة يوم العرس
واني متحمسة كلش لليوم
ماقبل اروح صالون كال محضرلج مفاجأة
ملاك:-غيييث يعني ثوب فخم وحلو
لازم مكياج حلو لازم اروح لصالون
غيث:-غسلي وجهج وتعاي وراي
ملاك: وشراح تسوي
غيث:-دروحي وتعاي
رحت نضفت وجهي بالمقشرات
وغسلت وفرجت وببالي فكرة معقولة يسويها؟
وفعلاً طبيت للغرفة
وشفتة محضر المكياج على الميز
ضحكت:-انت تمكيجني؟ شون تعرف؟
غيث:-تعاي وشوفيني شلون ماعرف
ابتسمت وتقدمت جرني
من ايدي وشالني من خصري وگعدني
؏ ميز:-مايصير تباوعين للمرايا
ملاك:-بس اذا طلع مو حلو ياغيث
بسرعة تجيب ورقة طلاگي
ضحك وعدل شعرة بالمرايا
وبيدة قلم الحمرة
ملاك:-زين يالون راح تمكيجني؟
غيث:-جوزي
غمضت تك عين ادمج بعقلي
الجوزي والازرك حلو؟ مو؟
هزيت راسي وهو تقدم صار
بين رجلية واني كاعدة ؏ ميز
بدة يمكيجني
واشوفة مركز بكلشي
اخر شي خط الحُمرة البُنية
؏ شفتي وابتسم:-مو شفة مرسومة رسم
ضحكت و
همس:-غمضي عيونج
غمضت عيوني وهو شالني
ودارني للمرايا باوعت
لو اگُللكم احلى من مكياج الصالونات متصدگوني؟
صفنت هاي شون يعرف هيج
بس جان متعلم من اليوتيوب
ملاك:-انتَ اول رجال بالكرة الارضية
يسوي مكياج لمرتة يمكن
غيث:-گتلج اني بكلشي اختلف
ضحكت:-صح والله يجنن عاشت ايدك
باس رگبتي ؏ طولها
اني ساحبة شعري گالي شيلي
حتى تصيرين احلى
وصدك شلتة كبة وطلعت نص شعري
برمت خصل ولفيتهن ؏ كبة صارت
تسريحة بسيطة
وكذلتي خصلتين هم برمتهن
والله يمكن اطلع احلى وحدة صدك صرت
شي فخم اول مرة احب روحي هيج
جان كلشي لامساتة ضايفهن
الفستان
الاكسسوارات
المكياج
اختيار التسريحة
كلشي من ذوقة واختيارة
وتأكدت انو ذوق الزلم يختلف عن النسوان
مرات تلگون زلم اذواقهم تخبل
مثل غيث تماماً
طلع من الحمام ولبس قاط
تدرجات الأزرك
عدلتلة رباطة ورشيت عطر الة والي
باس راسي:-احلى نسوان الكون بعيني
ملاك:-تبالغ هواي بوصفي؟
غيث:-تستاهلين المُبالغة
ابتسمتلة وبست ايدة
ونزلت البوشية ؏ وجهي
وانطلقنة للقاعة الحاجزيها همه
شفت زلم هواي بالباب
بس ماهتم هوَ نزلني وهو لازم عبايتي
ويكلي:-ديري بالج لاتوكعين وتفضحينة
ضحكت ولزم ايدي عبرنة الشارع
و وصلني لباب القاعة وراح
دخلت لغرفة التبديل جانت
الحفلة بادية وكلها جاية بس اني ضالة
بدلت وعدلت نفسي
وطلعت اتمشى بوسط
القاعة
ملك شافتني وازدادت ابتسامتها
وامي وريم يمها ضحكت وبوستهن وامي
تصلي ؏ النبي
ملك:-لج طالعة تخبلين
ملاك:-تدرين منو مكيجني؟
ملك:-منو؟
ملاك:-غيث
ملك:-عزززة يجنن يمة حتة احلى من مكياجي
لو ادري كايلتلة
ضحكت وامي گالت:-ثوبج حلو يمة
ملاك:-انتي الحلوة يابعد روحي
الله يخليج النة
شو خلي تطكلنة صور المصورة
ابتسمنة وطكتلنه كم صورة
سلمت ؏ النسوان الأعرفهن منهن عمات
غيث ورغد تباوعلي وتصلي ؏ محمد
وتقرة المعوذتين وتنفخ بوجهي
شفت خالاتي ملتمات بطاولة
ابتسمتلهن ومشيت واني خصري يتمايل
سلمت عليهن وحدة وحدة
و وردة موجودة بيناتهن لابسة ثوب مال
محجبات وحجاب
ابتسمتلي وبوستها وهي حضنتني
حيل وگالت:-مشتاقتلج
ملاك:-اني الاشوق شلونكم
بعدتها وعيني ؏ خالاتي
استحيت اعوفهن جريت كرسي
بصف وردة وعلاوي بحضني
واسولف وياهن واضحك
سمعت صوت وردة گالت:-شلونج زينة؟
ابتسمتلها:-الحمدلله بخير شلونة
امير
وردة:-زين
ملاك:-سلميلي عليّ
وردة:-يوصل انتي شخبارج زوجج شلونة
مرتاحة ويا؟
ملاك:-اي الحمدلله
وردة:-الله يهنيكم
ملاك:-ماصار عندج بعد طفل
وردة:-لا ماريد يمعودة مشلوع گلبي
دراستي بالجامعة وعلاوي
والبيت وفوگاها بيت اهلي لازم اضل وياهم
سكتت ومافتحت
الموضوع كتلها:-الله يساعدج جاي تنجحين؟
بعدلج كم مرحلة؟
وردة:-لا والله كل سنة دور ثاني وتحميل
كتلج مالحك وبعدلي سنتين لان بطلت
سنة ورجعت
ملاك:-هوسة
وردة:-ههه اي والله حياتي هوسة
انتي مارجعتي للدوام
ملاك:-لا اساساً غيث ماعتقد يرضى
وشلي بدوخة الراس مرتاحة ببيتي والنبي
اكعد بالاربعة العصر لاهوسة ولا صخام
ضحكت:-احسلج هو غيث ابو وامة ميتين؟
ملاك:-اي امة ميتة بس ابو لا مسافر
وردة:-اها وماعندة اخوان؟
ملاك:-بس رغد
وردة:-خوش وبيتج وحدج عايشة اميرة ها
هههه
ضحكت:-اي والله اميرة مدللني دلال
ماشفتة بحياتي كلة
وردة:-فدوة الله يخليكم
ابتسمتلها
وسمعت همسة منها مثل المختنگة:-بعد
ما جنة عايشين اني وياج بسگف
واحد صرنة نتشاوف بس بالمناسبات
هزيت راسي وما جاوبتها
اجت رغد باتجاهي وبيدها بناتها
سلمت ؏ خالتي كمت كتلهن:-اخت غيث
وجدان:-اي نعرفها حبيبتي ذني بناتج؟
رغد:-اي ميار ودينا
بوسنهن خالاتي
وخالتي انهار كالت:-شطالعات اليوم
لفت ايدها ؏ خصري وباستني:-والله مرت
اخوي مكسرة القاعة تكسير
ضحكت:-اخوج عيني مكيجني
رغد:-جذاابة؟
ملاك:-ههه والله
رغد:-هو من جان زغير جان مهووس
بالمكياج اذكر يلعبون هو وبنات عمي بمكياج
عمتي وهو يمكيجلهن
انهار:-ها يعني هاي هواية
رغد:-هههه اي باعي شمطلع مرتة تخبل
ابتسمت وهي كالت:-تعالي عماتي يردنج
باوعت لوردة
تكرض باضافيرها وتهز رجليها ؏ السريع
ومدنكة راسها وخالاتي
منتبهاتلها عفتها ورحت ويا رغد
وكل دقيقة عيني تجي بعينها
وهي عيونها حمر اشوفهن وتروح للحمامات
وترجع كل ساعة
لحد ماخلص العرس
لبست وهو طب العريس جان كلش
كاريزما وشخصيتة حلوة مبينة
ورا جاسر وابو
جاسر ماخذ دور الاب بحذافيرة
ومن حضن ملك جانت لحظة مؤلمة
جاسر حيل متعلق بملك اكثر من
عندي علاقتهم حلوة كلش
وكأنما توأم
وهو اسرارة كلها عندها وهي كذلك
مانشوفهم متفارگين ابد ولا هو يرضى تزعل
منة ولا هي
ومسولفتلكم ملك شلون جان وياها بالمدرسة
وبالجامعة مايعوفها لحظة
شحال هسة هية بمحافظة وهو بمحافظة؟
كلش تأذيت ؏ جاسر
من يمسح بدموعة وعيونة دم وهي تباوعلة
وتبجي
اخذها رجلها وطلع واني لبست وطلعت
ويا خالاتي
باوعت لغيث واگف ويسولف
ويا خوالي ابتسمتلة مامنتبهلي جان
ركصوا اصدقاء حسين زوج ملك
وهوسات واهلة كُلش هواي اكثر من عدنة
صعدوا بالسيارة وراحوا
وردة اجت بصفي:-ذاك زوجج مو؟
ملاك:-اي ابو القاط الازرك
وردة:-حلو من جان بالعقد مو هيج صاير احلى
ابتسمت وهو دار وجهه
انتبهلي وغمز ضحكت وهي
كالت:-ليش غمزلج؟
ملاك:-هو هيج عندة عادي مال غمزة
كل مايباوعلي يغمزلي
وردة:-حلوين انتوا كلش
ملاك:-يابعد روحي يلا جاي يأشرلي
اشوفج بخير عُمري وسلميلي
وردة:-يوصل وانتي سلميلي هم
بوستها وعفتها وراي تجر حسرات
ماخسرتكم انتوا خسرتوني
تمشيت لغيث وصعدت
بالسيارة:-عادي اشيل البوشية؟
غيث:-شيليها ابوية
شلتها وابتسمت:-طالع تخبل
كرص خدي:-تدري كلها تعجبت بالمكياج
غيث:-وگتيلهم غيث سواه مو؟
ملاك:-اي اكيد
غيث:-انعل اهلج
ملاك:-ليش
غيث:-فضحتيني خو بين النسوان يابربوك
اني اعلمج
ضحكت وكتلة:-هاي ليش تفشر علية
غيث:-داوكفيلي خلي نوصل
ملاك:-يمة رجعني لبيت اهلي
هز راسة متحلف واني
شحطت من الضحك
وصلنة لبيتنة نزلت قبلة ركض
دخلت للبيت
ونزعت عبايتي وحجابي
صعدت للغرفة شوية وطب وراي
غيث:-اي ملوكة سولفيلي
هو يتقدم واني ارجع لورا مخلية
ايدة گبالة:-شسولفلك لاتسوووي هيييج روووح
غيث:-شگتيلهم
ملاك:-كلشي ماگتلهم والله اصلا كتلهن رحت
صالون
غيث:-هاا هاي عليمن تضحكين
حبيبي
سحبني من خصري وگعنة
ثنينة ؏ الجرباية ضحكت بصوت عالي
مشة شواربة ؏ رگبتي
كزبر جلدي
غيث:-احبج
ملاك:-اكلك شي
غيث:-احجي يابعد ابوية
حاوطت رگبتة وهو وجهه
قريب من وجهي وانفاسنة مسموعة
حجيت بصوت اشبهه بالهمس
صوت طالع من اعماق گلبي:-احبك...
