رواية لأني عاقر الفصل السابع والثلاثون بقلم مريم خفاجة
وبَس عَلى عيّونك تِوديني الأغَاني
...
واكفة ؏ السنك
اغسل اماعين وببالي يروح لبعيد
شجاني وجذبت؟
غسلت وجهي بماي بارد
يثلج الوجه
واخذت نفس وغمضت عيوني
واتذكرت ليلة أمس بحذافيرها واتذكرت
من حجيتلة الماضي المراح
يعوفني للأبد ونهايتي ؏ ايد الماضي
غيث:-هو زواجج عن حُب لو تقليد؟
ملاك:-لا تقليدي
غيث:-اقارب يعني؟
بلعت ريك وحجيت بهمس:-لا مو اقارب
هو صديق ابوية
خوفي خاف يلتقون؟ جنت
خايفة من هالنقطة
غيث:-اتذكر اسمة مالك؟ مو
هزيت راسي بنفي
وارتباك:-لا لا أحمد اسمة
غيث:-اها كملي
ليش صدگتني؟
اكلني الذنب نايمة بحضنك
ومجذبة عليك؟
بلحظة ردت اگلة جذب مو هيج
بس سكتت كأنما لساني
انعگد
فزيت ؏ صوت تلفوني يدك
شفتها امي زفرت نفسي بتعب وجاوبتها
وضلينة نسولف واني اطبخ
الغدة واحجي وياها
طبگتة منها وضليت انتضرة
سمعت صوت سيارتة دخلت للبيت
ابتسمت
وترست مي من البراد بارد
وفتحت باب المطبخ نزل من السيارة
ونزع نضاراتة
وابتسملي
وتقدم للباب واني واكفة
وبيدي الگلاص
ملاك:-الله يساعدك
غيث:-هو اليشوفج مو الله يساعدة؟
ضحكت بخجل قدمتلة
كلاص المي شربة كلة
ودخل جرني من خصري
وهمس بصوتة المبحوح:-اليوم جمعة وشوفة عيونج ثواب
ملاك:-هممم واليوم جمعة مسويتلك
بامية
ضحك و
دخل وهو يبوس بية
ويحضني حيل:-ولج كل ساعة اشتاقلج
شلون بية
ملاك:- بدل وصلي وتعال خلي ناكل
غيث:-هو انتي مال أكل
ملاك:-شنو سالفة
باسني بعمق وراح يبدل
حضرت الاكل وهو اجة اكل وصعدنة
فوك
بليل جنت نايمة ؏ صدرة
وهو يمسد ؏ شعري همستلة:-غيث
غيث:-ها ابوية
باوعتلة وضحكت:-انتَ ليش تحب عماتك
هوواي
غيث:-لان يحبوني
ملاك:-شو اني ماثق انو اكو عمات
لو عمام يحبون ولد اخوانهم
ضحك:-منيلج هاي المعلومة
ملاك:-مادري احس كل العمات حياية
غيث:-لا غلطانة
ملاك:-لا مو غلطانة هو صح مو الكُل
بس نگول الأكثرية هيج العمات
خبيثات وينكطن سم والعمام كذلك
غيث:-والخوال؟
ملاك:-لاااا الخوال حنونيين كلش حتى الخالات
خو خوالي وخالاتي اموت عليهم كلش
احبهم وحبابين حيل
غيث:-مو كُل الخوال هيج هم؟
ملاك:-لا كلهم لحد الان ماشفت اكو احد
گال الخال مو زين
غيث:-زين تدرين العمة او العم
همه نفسهم خالة وخال؟
ملاك:-مافتهمت
غيث:-باعي لنفرض انتي ملاك
وجاسر عندة اطفال وملك عدها اطفال
خوش؟
ملاك:-اي؟
غيث:-انتي شتصيرين لولد جاسر؟
ملاك:-عمتهم
غيث:-ولولد ملك؟
ملاك:-خالتهم
غيث:-راح تحبين ولد ملك اكثر من ولد
جاسر باعتبارج خالة وعمة؟ راح تصيرين
العمة المسمومة والخالة الحنونة؟
ملاك:-لا اكيد شلون احب ولد اخوية
و ولد اختي
غيث:-وهنا انتي انشملتي ويا العمات
المسمومات؟
ملاك:-لا
غيث:-شفتي فـ لاتشملين الكُل گولي
البعض بس هو الخلل مو بمُسمى العمة
لا الخلل بالأنسان يكون ذات وجهين
يفرق بين ولد اخو وبين ولد اختة
هسة اني لو جان عندي اخ
جان حبيت ولدة او بناتة مثل ماحب هسة ميار
ودينا
ملاك:-صح بس تدري ستوني انتبهه انو
انتَ ماراح تصير عم للابد
ضحك ودمغني:-فـ گتلج الخلل بالأنسان
هسة انتي راح تحبين الكُل مافرقتي
وانتي هنا راح تصيرين عمة حنونة وخالة حنونة
والكُل يحبج وتدرين شنو بعد
ملاك:-شنو؟
غيث:-عماتج الي تكرههين وتحسيهن حياية
هنه نفسهن الحنونات الحبابات يم بزر اخواتهن
فـ هنا الانسان الة وجهين
ملاك:-اممم غيرت تفكيري
غيث:-وشي ثاني بعد
ملاك:-شنو
غيث:-تدرين انو انتي مرجعج لعمامج
ملاك:-شلون
غيث:-شگد غبية هاي هيج ماتعرفين تفسرين
بينج وبين نفسج
ضحكت:-لا اريد اسمعك من تحجي
باوعلي بتك عين
غيث:-يعني باعي لو واحد يجي يخطب ريم
من راح تجي مشية زلم راح يسألونكم يابة
عمامكم وين؟ عمام البنية ماراح يسألون
عن خوال البنية هو شي اكيد لازم
يجون الخوال بس العمام الهم الأفضلية
وبعدين دمج نفس دمهم
يعني گتلج المرجع الاول والأخير والأفضلية
للعمام الخوال لا شيء
ملاك:-عزة والله تغير تفكيري
بس اني ماحب عماتي
غيث:-ليش؟
ملاك:-مأذيات أمي حيل وتدري اني
ماشايفتهن من زماااان كلش
غيث:-من شوكت يعني؟
ملاك:-يعني من عرسي الأول هنه اجن
وبعرسي هذا اجت بس الزغيرة الخبيثة كش
اموت منها ذنيج اشوة واجت
اصلاً تتشمت مو حُباً بية
غيث:-حلو الواحد يزوج مرتين
ضحكت بصوت عالي بعدها
سكتت وگمت الملحف لازمتة من جهة صدري
وضيگت عيوني علي:-شتقصد؟؟
غيث:-ماقصد شي
ملاك:-يعني تريد تزوج بعد؟
غيث:- شكو بيها
ضربتة حييل ضل يضحك ورجعنة نفس
السيناريو كل مرة من نتعارك نضل
واحد ينگلب فوك الثاني ونضل نضحك
ونتعارك حتى خراميش اخرمشة
بس بعدها البد بحضنة
ومَرت أيام طويلة
ولقب أسمي فـ هو "عيون أمي"
عيون أمة بالتحديد تخليني أحبة
أكثر من يناديني بهالأسم
سنة؟ سنتين؟ 3 سنين؟
لا!
احنة مستمرين لمدة اربع سنين سوة
ولايوم تعاركت وياه واستمر
زعلي ساعتين؟
هو يجي يراضيني بأقل من الثانية
هو صار حُبي الأول
هو صار دلال الأب
المحرومة منة
هو صار العوض
من بعد الحُرمان
وللأبد...
اصراري عليّ انو اسوي
اطفال انابيب مستمر
لكن هوَ رافض رفض قاطع
كل ما اجيب هالسيرة يضوج
ويتحجج بـ ماريد اطفال ماحبهم
ويسكتني بهالجملة
حتى رغد حاولت تقنعة بس هيهات
غيث يقتنع
مرة من المرات
جنة گاعدين بهاي الغرفة البيضة
التخوف مادري ليش اخاف منها
وهو كل ما اطبلها يضحك
يگولي اتذكر الراشدي
واني اغط بهدومي من الفشلة
جنت گاعة بحضنة
ونسولف
جريت ورقة من الاوراق
وابتسمت:-هاي ليش هيج تكتب؟
غيث:-اكتب الي بداخلي
ملاك:-ليش مو بالعربي؟
غيث:-حتى محد يقراهن بس اني افتهم
ضحكت:-لييش
غيث:-احسن
ضليت احاول الگف فد كلمة ماكو
حروف انگليزية مخربطة يكول مسوي سحر
ضليت اضحك واشاقي
اخذني وشالني لفوك
ومَرت أيام دافية هادئة بدون اي صوت
مُزعج
كالأميرة
مُدللة بالقصر
حُبة ألي مايتوصف هالأربع سنين
احس شي جبير بحياتي صار
لدرجة واصلين مرحلة
حتى من يداوم يفتحلي كامرة ونضل
واحد يباوع للثاني وهو يشتغل
واباوعلة بكل حُب
سُبحان الزرع حُبة بداخلي
شلون وليش اني لسة مامفتهمة
لسة ماعرف سبب هُيامي ألة
حُبي ألة مامعروف بس جان هو السبب
الكافي حتى يخليني أحبة
دلالة وعشقة شي ثاني
وبمرة من المرات سألتة:-شگد تحبني؟
غيث:-الهوى نگدر نحدد كميتة بالجو؟
ملاك:-لا
غيث:-البحر نعرف بدايتة ونهايتة؟
ملاك:-لا
غيث:-نعرف شوكت تجي يوم القيامة؟
ملاك:-اكيد لا
غيث:-نگدر نحسب النجوم ونحدد عددهن؟
ملاك:-لا
غيث:-شكو شي الله خالقة ماينعد
والله من خلق حُبي الج ماخلالة عدد ولا حساب
ملاك:-اموت عليك
غيث:-واني ميت من زمان
هو فعلاً حُبنة مايضمة لاعدد
ولا حساب الانسان يحسد روحة مرات
ومن گد ما افكر بحبي الة
احس روحي راح احسد حبي واضل
استغفر واقرة ايات
احاول اخلي حياتنة داخل غلاف
محد يگدر يدخلة ولا يگدر
يخدش فد شي بي
حبنة صار بعيد عن الناس محد
يدخل بينة ابداً
وبيوم جنت كاعدة اباوع ؏ تلفزيون
وهو حاط راسة ؏ رجلية
خلص المسلسل گمت لتلفوني
اليدك شفتها ريم ابتسمت
وشلتة وضليت اسولف
وياها
ريم:-ليش ما اجيتي لبيت ملك اول امس
فاتتج تونسنة
ملاك:-شعندكم رايحين ليش ماگلتولي
ريم:-يعني ماتدرين؟
ملاك:شدري؟
سكتت ونوب
گالت:-هيج ماكو شي عبالي تدرين
بروحتنة
ملاك:-ليش رحتوا؟
ريم:-هيج
ملاك:-ريم متأكدة؟ ضامين شي انتوا؟
سكتت ماحجت
ملاك:-ريم؟
ريم:-ملك حامـل
ابتسمت بخيبة:-ليش لعد ماگلتولي؟
خاف احسدها لو شنو؟ لو انقهر لان ماصار عندي
طفل وهي صار عندها؟
ريم:-لا والله مو هيج ملاك والله
همه گالوا لاتگلولها خاف تضوج
ضحكت:-صدك تحجون انتو اضوج
لان اختي صارت حامل؟ شهالمنطق العندكم؟
بالعكس افرح الها لان ماراح
تعاني الي اني عانيتة
مُعاناتي ماريد واحد يعيشها تفكيركم
السطحي بطلوا
؏ كُلاً مع الاسف والله عبالي تعرفوني
وتعرفون تفكيري ومو يمي هاي السوالف
ولا اقارن بيني وبين اختي
سلميلي ؏ أمي وجاسر
حجيتها وطبگتة من اكثر الاشياء
الأكرهه انُ يعتقدون
اني ما اتمنى الخير لأحد اذا شفت طفل
اول شفت وحدة حامل راح انقهر؟؟؟
اختي هاي اختي شلون اضوج؟
صعد غيث
رفع راسي باصبعة:-شبيج؟
ملاك:-ملك حامل وأهلي ماگايليلي
عبالها اضوج لو انقهر
غيث:-هسة شبيج راح تبجين؟
ملاك:-مقهورة من تفكيرهم شلون هيج
يفكرون اصلاً اتمنالهم الخير اكثر من روحي
غيث:-حبيبي اكيد همه مو قصدهم
ملاك:-لا قصدهم
سكت باوعتلة وگلت:-انتَ تدري مو؟
ضحك:-لاتطنگرين علينة همه گالوا لاتحجي
نزلن دموعي صدك
عفتة ونزلت اركض للاستقبال
وطبكت الباب وراية وكعدت ؏ التخم ابجي
دخل وراي وهو يتأفأف
كعد بصفي سحب ادية بعدتهن
عني وضليت ابجي:-صدك تحجين بابا مخبلة
انتي؟
ملاك:-انتووووا المخاااابيل
غيث:-رحمة الله والديج
ملاك:-شلووووون هييييج تفكرررون
غيث:-بابا اني گتلهم اگللها امج گالت لا
خاف تنقهر اني عبالي صدك تنقهرين
ملاك:-صدك دتحجي معناها
انتَ اصلاً متعرفني اني شنو
غيث:-كافي تعاي لاتطنگرين هو احنة
امس يلا كالت البت
ملاك:-وخرررر عنييي
غيث:-اششش انجبي لاتزاگطين
ضل حاضني واني ساكتة
ضليت اكرص بي واعضعض بي وهو يضحك
ويصفگني راشديات خفيفة
وصدك ضليت ضايجة منة يومين
بعدين خابرت ملك ورزلتها
بعدين باركتلها وكتلها جهاز الطفل علية
كيفت ورادت ترضيني
كالت بكيفج
وفعلاً بديت اجيب اشياء خفيفة
الها من حماسي للتجهيز
ضليت اروح للسوك واتونس لسوالف
الطفل والملابس واشياء حلوة
من اطب لمحل اضل اباوع وابتسم
و الود ودي اشتري كلشي
بالمحل بس ماعرف اذا الجنس ولد لو بنية
وماچنة نعرف المضموم..
ملاك:-مشتاقة لأمي
غيث:-باجر نروحلها عندي شغلة ويا جاسر
ملاك:-تمام
ثاني يوم الضهر هيج طلعنة
ورحت الهم متحمسة وغراض الطفل
كلها جبتها وياي ششتريت
اخذتة حتى اراوي لأمي
وتشوف شنو جبت
دخلت اضحك
ويا غيث وهو شايل الغراض
دخلت البيت سنطة ماكو اي نفس
نزعت حذائي ودخلت
دگيت الباب وصحت:-وينكم يمعودين ميتين
بعدني اريد ادخل لصالة
انفتح باب غرفة أمي وطلعت ريم
تصيح وتركض:-ملاااااك امممممميييي
رجف جسمي واني اباوع دموعها
تنزل بأستمرار و وجهه مخطوف:-شبيج شكو
شبيها أمي ررريم اگعدي شبيها أمي
وگعت بين ادية صحت بصوت
عالي:-غيييييث
ودموعي مستمرات تنزل خايفة
شصار أمي كلبي ينغزني صار اربعة ايام
واحنة نعرف نغزات گلبي وراها شي مضموم
تحججت أجي لأهلي حتى يرتاح گلبي
بس جانت نغزاتي تدليني بالطريق الأضلم
دخل وهو بيدة الغراض عگد
حاجبة وگال:-هاي شكو
ملاك:-تعال تعال شيلها امي متخربطة ماعرف
كلشي ماعرف
ذب الغراض من ايدي
واجة شال ريم ذبيت عبايتي ورحت اركض
جبتلة ماي
لزمت تلفوني ومن كد ما ارجف
الرمز مايدخل بعد شكد ما ادخلة ماينفتح الموبايل
شمرتة وركضت لتلفون غيث مابي رمز
فتحتة وغيث يحاول يگعد ريم
ضليت ادك ؏ جاسر
ومايرد ادك ادك يرن وماكو جواب
تخبلت اتهسترت معقولة صار بيها شي اموت
والله
جاسر ميرد وريم كوة
گعدت
گعدت گبالها وبجيت وحجيت
بشهگة:-گووولي شبيها أمي شكو شصااار
غيث:-بابا اسكتي ماتشوفين البنية متخربطة
ريمة ابوية تكدرين تحجين لو تخليها بعدين؟
ريم:-امي راح تموت عمووو
غيث:-ماتموت گولي يالله
شصار سولفيلي ؏ كيفج احجي هاج شربي
ماي
شربت ماي وايدها ترجف
واني ؏ اعصابي گاعدة:-جانت تشر
الملابس بالسطح ونوب نزلت وضلت لازمة
گلبها رأساً طبت نامت هاي أمس
وگعدت متخربطة نوب جاسر فحص گلبها
گال تعبان وهي گالت لان بالشمس فوك
ضليت واليوم الصبح اگعد بيها ماتگعد
وجاسر تأخر يلا أجة وامي ماتت ماتت
ملاك:-لا لا ماتموووووت لا يالله
غيث:-ماگلج هو وين راح ياخذها
ريم:-لا وطلع بسرعة مالحگت بي
خايفة اخاف امي تموت اموت وراها
تحجي كلمة كلمة
و ورا كل كلمة منها تشهك
حضنتها وضليت ابجي وياها وغيث
يحاول يتصل بجاسر لحد ما حصلة ومن سمعت
صوت جاسر المبحوح متت بدمي
انطاه
اسم المستشفى
ركضت ريم بدلت وطلعنة واحاول
ادعي دعاء صحيح ماگدر لساني ينعگد
دگت ملك تصرخ وتبجي
وكالت راح اجي بالطريق
ضل نفسي كوة ينوخذ أمي؟
احن انسان بالكون؟
أمي التحملت وتعبت لخاطرنة
يصير بيها شي شلون نتحمل
ريم بحضني هي اكثر انسانة تحبها يمكن
حُبي لأمي مو مثل حب ريم الها
ريم تعشق أمي عشق ماينتهي للأبد
ومتعلقة بيها مثل الطفل
وصلنة واني جسمي يرجف كلة
دخلنة گبل اني و ريم
نركض شفنة جاسر يفتر بالردهه
و وجهه اسمر من الخوف
ريم:-جاسسررررر
التفتتلها وفتح ايدة الها وهي
ركضتلة حضنها حيل وضل يبجي هو وياها
ملاك:-جاسسر گول شبيها شگالولك ليش
لسة ماطلعوها
سكت وضل گوة يتنفس
ويمسح بعيونة:-جلطة قلبية
نزلن دموعي ودرت وجهي
لغيث وهمست:-يعني تموت
سكت ومسح وجهه
رحت يمة ولزمت ايدة واهز
بي حيل:-غيث امي تموووت؟؟؟؟
غيث:-لا يابة گولي يالله ان شاءلله ماكو شي
ملاك:-يصير بيها موت مو گلللي
غيث:-الله كريم تعديها بخير وسلامة يا بابا
ادعيلها
ملاك:-اموت اموت اذا صار بيها شي
استغفر وضم راسي بصدرة
واني اشهك مستمرة
سألت جاسر:-ليش ميطلعوها
جاسر:-الدم ماجاي يوصل لگلبها
ملاك:-يالله
ضليت افتر رايحة رادة وغيث لازمني
باوعت اجت ملك تركض مناك
ولازمة بطنها و وجهه اصفر
قابلتها بدموعي المو راضيات يسكتن
حضنتها وهي تبجي بصوت عالي:-گلولي شصايرر
هسة شبيها وينها هي
ملاك:-انجلطت
ملك:-شلووووون منننييين اجت الجلللطططة
حسين:-اشش نصي صوتج ملك
ملك:-هسة خلي يدخلوني يمها
هذا الباج مالتي حسين خليهم يدخلوني خلي
اشوفها
حسين:-تؤ مايصير انتي متخربطة
ماتشوفين وجهج اصفر وترجفين
ميصير تدخلين
حجة هيج وهي رأساً وگعت
شالها وركض بيها وجاسر وريم راحوا
وراهم اما اني
احس رجلية انشلت
گعدت بالگاع
ودموعي تنزل
گعد غيث ركبة ونص
وگال:-كافي يا عيني ادعيلها بدل هاي الدموع
واني اگلج ماكو شي لو اعرف اجيبلها احسن
دكتور بالعراق وتصير زينة
ملاك:-ليييش هيج صارلها والله هيّ
زينة ومابيها شي غيث امس امس اني خابرتها
وضلينة نحجي بس گالت ايدي توجعني
غيث:-اي حبيبتي هي هاي أعراضها
لو الم بالصدر يصير يعني يصير مثل الضغط
او العصر
لو الم بالكتف لو الذراع حتى الاسنان
ومرات يوصل للبطن
حرقة بالمعدة غثيان دوخة هنة ذني اعراضها
التشوفوهن بسيطات وعبالها امج شي عادي
بس خطر اي الم يصير بالجسم
المفروض الانسان يراجع
ملاك:-نغزات بگلبي صارلهن كم سنة
مارجعت ولا دكتور يروحن ويرجعن
غيث:-گرت عينج
ملاك:-خايفة زين ليش صارت جلطة
يعني امي لا بيها سكر ولا ضغط ولا اي مرض
غيث:-جا هي بالسكر والضغط
هي يا أما الدم مايوصل للگلب او يغير مسارة
او انسداد بشريان او شرايين القلب الشرايين التاجية وبعد هواي اعراض
ماراح تبينلج بس يتكومن وهاي النتيجة
ولاتخافين ياما ناس تعالجت
و واحد منهم عمي ابو عبدالله
رجع الأمل من جديد:-صدك؟
غيث:-والله عالجناه و وديناه لدكاترة وعلي
فر العراق فر يلا صار زين جا الانسان
اذا ميريد صحتة شيريد
ملاك:-امي هاملة نفسها هواي
تاكل وماتبالي شراح يصير شايف الشكر شلون
تخلي بالجاي والملح والدهن
وحتى دكاترة ماتراجع
غيث:-كلة هذا وتگولين ليش يصير
بابا البشر هو يعيل بروحة
ملاك:-ان شاءلله تصير زينة يارب
غيث:-آمين
شوية واجة جاسر وريم وبقت ملك
معليگيلها مغذي
تعبت من الانتضار واحس رجلية وگعن
من الخوف لشوية وطلعوا الدكاترة والممرضين
والدكتور گال:-الحمدلله عدت بسلامة بس للأسف
جاسر:-لاتگول انشلت
الدكتور:-حاولنة هواي وگدرنة نوصل الدم للگلب
بس ماوصل للدماغ وهنا تسبب بالشلل
النصفي الي هوَ عدم التفكير والنطق
والحركة ومرات راح تتعرض المريضة لغيبوبة
ممكن تتعدى اكثر من ساعة بس لاتخافون
بالأدوية الي راح نكتبها والبعض منهن
ماموجودات بالعراق راح تضطرون تجيبوهن
من الخارج اذا تگدرون
جاسر:-اي نجيبهن دكتور اكتب
شوكت تطلع؟
الدكتور:-بعض الأجراءات وراح نطلعها
هز راسة جاسر
وباوعلنة وذب نفس
همست:-لو بس نفسها يصعد وينزل قابلين
سكت الكُل واقل من ساعة وطلعوها
ركضنة وراهم ودخلوها لغرفة خاصة
جاسر من معارفة واصدقائة گادر
يحجز بشكل سريع بالمستشفى الأهلية
ضلينة نباوعلها وهي نايمة وباوعلها
تشخر وامي اساساً نومتها هادئة
بقن دموع الكُل تنزل بهدوء بدون مانفززها
ضلينة لليل گاعدين هيج نباوعلها
گام غيث وگومني ويا
وطلعنة گال:-امشي اجيب اكل وانتي وياي
ماعرف خواتج شياكلن
ملاك:-غيث صدك تحجي احنة بيا حال
منو يشتهي العسل هسة
غيث:-لا انتوا الصدك تحجون لو تضحكون علينة؟
راح تموتون رواحكم يابة
اختج ملك حامل تعاي شوفيها لو ريم
شصاير بحالها وشوفي روحج ميصير تضلون
بلا اكل انتوا حتى قطرة ماي ما مخلين بحلگكم
يعني انتي اذا وگعتي اخواتج اذا وگعن
منو يعين منو؟
امشي ترة احطج وانيمج ببدال أمج
ضحكت ومشيت وياه وهو لازم
ايدي وكل ساعة مدنك بايسها
ويهمسلي بكلمات تصبرني
رحنة جبنالهم أكل وگوة يلا أكلوا
بالتواسيل يلا خو جاسر
حلف ماياكل وضل نايم ؏ رجل أمي
لحد نهاية الليل واجو ممرضين
گالوا ميصير الكُل يبقى
ضل واحد يريد يبقة والثاني هم يريد
تالي ضلينة بس اني وجاسر
وغيث گال اني بايت بس مو بنفس
الغرفة
ضليت يمها امسد ؏ اديها
ودموعي تنزل بهدوء وادعي ؏ كيف بدون
صوت حتى ماتگعد
فرشلي ونمت بقلق
ساعتين وفزيت ؏ صوت جاسر
وهو يضحك:-ها تسمعيني يمة
فزيت بسرعة من مكاني
شفتها گاعدة ضحكت:-يمة
ضلت تباوع لفوك
وحلگها معوج للجهه الثانية
گتلها:-تردين ماي اشربج؟
غمضت عيونها وفتحتهن
گتلة:-انطيني البطل وخلي بي گصبة
وانت شيلها حتى ماتتبلل
وصدك سوينة هيج وهي گوة
تبلع الماي
ملاك:-ها تردين بعد
گوة يلا گدرت تهز راسها بـ لا
معناها استجابت ضحكت ودموعي تنزل
وجاسر يبوس بأديها
شلت الفراش
وعزلتهن ورتبت الغرفة
بدو يجون شوية شوية وملك
طگتها هلهولة ضحكتنة بيها وكلها تبجي
وتضحك محد متوقع راح تستجاب
بهالسرعة
بس جانت هاي البداية مثل ميگولون
صحوة موت
حضنت غيث قوي
وهو يبتسملي:-مو كتلج خلي أملج بربج جبير
ملاك:-احبك
غيث:-مو وكت رومنسيات لج
ضحكت
وجاسر گال:-ملاك تروحين نجيب ملابس؟
وتسوين اكل شو شنو هاي ماتگدر
ملك وريم ماتعرف
ملاك:-اي اروح عادي غيث ابقة هنا وياهن
خاف يصير شي
غيث:-خو اني اروح وياج وجاسر يضل هنا
جاسر:-لا مو عندي شغلات اريد اجيبهن
مناك
غيث:-يلا لعد اني ضال هنا ماعندي شي
ملاك:-يلا ملك ديري بالج لاتتحركين
وريم يمج الحمامات اذا رادت ملك
لاتخليها تمشي وحدها
ابتسمتلي وامي مخليلها صوندات
وتباوع للسگف
لبست عبايتي ورجعت بوستها وطلعت
ويا جاسر
لازمة ايدة وامشي
ملاك:-احس هسة يلا الدنيا ضحكتلي
جاسر:-مادامها استجابت بسرعة يعني راح
تصير زينة ان شاءلله
ملاك:-الحمدلله الحمدلله
دنمشي واسمع صوت واحد صاحلي
رفعت راسي واشوفهم
جدي وخوالي وخالاتي
جدي:-ووولج ااااااااحجي شبييييهاااا
شبييييها بتتتتي وينهااا
جاسر:-گول يالله جدي مابيها شي الحمدلله
هسة يلا گدرت تفتح عيونها
عصام:-جلطة شنو؟
جاسر:-قلبية
ضلو يحجون ويا ويستفسرون عن
الحال درت وجهي لخالاتي
وشبگتهن وهنه يبجن واني دموعي
تنزل واجاوبهن
رفعت عيني ؏ وردة والي وراها
آخر انسان اتوقع ارجع اشوفة واخلي
عيني بعينة بعد هوَ!
شجابك؟
كمال:-الحمدلله ؏ سلامتها
درت وجهي عنة و وردة باستني
وتحمدت لأمي بالسلامة
هزيت راسي وصرت بصف خالتي انهار
امشي بثگل وخوف
طبينة للغرفة وجاسر باوعلة ورفع حاجبة
وذب نفس بعصبية ولزم
ايدي وجرني الة
همست:-غيث
جاسر:-مايعرفة
بلعت ريگي وطبيت ادور بالوجوه
ومالگيتة موجود ذبيت نفس براحة بلكي مايجي
راح لجهة الثانية
ودنك باس راس أمي
وهمسلها:-تطلعين سالمة ان شاءلله عمة
فتحت عيونها
وضلت تفتر تريد تشوفني
قابلتها بنضراتي الخايفة المتوترة
وضلت تباوعلي بخوف
ماكو ثواني
واندك الباب هديت ايد
ريم ورحت فتحتها وجان غيث
عاگد حاجبة فتحت الباب اكثر
وطب
سلم عليهم
باوعتلة يراقب غيث بعيونة
رجع باوعلي ونضراتة الحزينة مبينة
درت وجهي عنة وگعدت بصف غيث
وخواتي يباوعلي
همسلي غيث:-شوكت اجو
ملاك:-هسة
غيث:-جا انتوا مو رحتوا شون رجعتوا
ملاك:-هو احنة بالدرب لاگيناهم
غيث:-ها
سكت ودار وجهه رفعت عيني لوردة
تباوعلنة هي واخوها
ضلينة ساكتين وبس جاسر يحجي
ويشرح الحالة الهم والعلاج
وجدي يبوس بأمي
ويهمسلها:-يابة گومي ريت اني بمكانج
ضلت دموعة تجري وخالاتي
يحومن فوك راسها وحدة تروح و وحدة تجي
أمي المحبوبة بين اهلها
بين جهالها
بين الكُل
لحد هاليوم ماشفت احد
كره أمي لو حاول يضوجها اياً كان
عدى ام كمال بسبب غيرتها
رغم امي الجانت حتى ماتحاجيها
وشكد ماتحجي هي جانت اتذكر
امي تسكت وماتردها
همست لغيث:-گوم نروح؟
غيث:-بكيفج
ملاك:-جاسر اروح اجيب الغراض اني؟
جاسر:-يلا روحي جيبي جنسيتي
وجنسية أمي وگلي لأبوي خلي يجي
عصام:-وهو مايعرف يجي الة واحد يگلة
جاسر:-عندة شغل
عثمان:-شغليش هذا لخاطر ربك انتَ الثاني
مرتة مجلوطة هنا وهو يابة بالشغل گول
غير حجي خالي
انهار:-هاي لو مرتة نجلاء جا ركض
بيها ركض محد سكط اختي غيرة هوَ
رفع جاسر عيونة عليها
وسكت ودار وجهه علينة وگال
مخنوك:-يلا روحي
گمت الملم غراضي
وسلمنة عليهم ولزم ايدي غيث وطلعنة
وقبل لانطلع واني اشوف
نضراتة تلاحك غيث مثل المسوي
كمين
خوفني
رجعنة اني وياه لميت غراض أمي
ورحت لبيت نجلاء دگيت الباب
طلعتلي تعلج:-وين ابوية؟
نجلاء:-گولي السلام عليكم
ملاك:-ابوي وين؟
دفعتها وطبيت لجوة
دخلت للاستقبال شفتة ينرگل وباقي
بالشورت
رأساً باوعلي وعگد
حاجبة:-شكو؟
ملاك:-شكو اكو هواي اشياء تدري بيهن انتَ؟
علاء:-خير
ملاك:-امي متخربطة بالمستشفى ماتگوم
تشوفها
علاء:-طبها مرض شعلية اني
ملاك:-مرض اليلفكم ويكرفكم كرف يارب
عسى حوبتها بيك ماتتعداك
راد يگوملي ركضت وطلعت لبرة
ابجي
شنو السبب الخلاك تكرهه؟؟؟
طلعت لغيث منتضرني بالسيارة
ضلت عيني ؏ الطريق بدون صوت
وصلنة للمستشفى دعيت بلكي
ما الگاهم والحمد لله ماهمه رايحين باقي
بس جدي وخالي عثمان وخالتي انهار
ضلوا همه بايتين واحنة رجعنة
وصار هيج تبادل
يوم همه ويوم احنة
واستمر الحال شهر
ضليت احاول اقنع بريم ترجع للمدرسة
بس معاندة ترجع أمي للبيت يلا ترجع تدرس
رغم هي سادس اعدادي
ومرحلة وزارية
ملاك:-ولج أمي روحي داوميلج كم يوم
ريم:-ماداوم ماريد
ملاك:-استغفر الله يالله ترة ماراح تحصلين شي من هذا عنادج
ريم:-لحد ما تجي امي يلا اداوم
ملك:-يعني هاي سنة ثانية شتردين
تعيدين السنة الثالثة حضرتج
ريم:-معليكم بية عسى ما اضل عمري كلة بالسادس
ملك:-يووو عوفيها خلي تولي طبها مرض
ملاك:-وانتي ماراجعتي دكتورتج
ملك:-هو باجر اروح
ضليت محتارة اشيل هم منو؟
هم أمي هم جاسر هم ريم ملك همي
لو منو؟
غيث التبهذل
واجازاتة كثرت وجاسر كذلك
وحسين رايح رايد من كربلاء لبغداد
حتى يشوف امي وملك
تعبت كلش بهالشهر
بحيث اضل صافنة بمنو احتار؟
ريم كل دقيقة يهبط ضغطها
وشكل عدها الضغط بسبب الخوف والهبطة
واني اضل مداريتها
ملك حامل والجارة متقدمة وهي
بالشهر الثالث بعدها
ويا خوفي يروح الطفل
وجاسر حتى نوم مينام وصار عندة
انهيار عصبي
الوحيد غيث اليطبطب ؏ همومي
الوحيد الي وگف وياي ويحاول
يخليني استقيم واستعدل
واني محتارة بأخواني
كل ماتخلص طاقي
فـ حُضنة الوحيد الي يخليني استعيدها
اضل ابجي بحضنة لحد ماحس روحي
اگدر اقاوم الباقي
جنت گاعدة اقرة قرآن
اجة غيث گعد بصفي
وگال:-باجر نروح للنجف
هزيت راسي سريع:-تعبانة اريد اروح
اريد اجدد طاقتي بالأمام علي اخذني
باس ايدي وهمس:-باجر اخذج الفجر نطلع
حتى نرجع من وكت
غمضت عيوني بصبر
وامي ما زالت بالمستشفى
بسبب اصرار جاسر ميرضى يطلعها
لان گدرت تصير زينة صحتها
رغم تبهذلنة بس ماهتم لكلشي وخلاها
وفعلاً اجواء مريحة
غرفة حرارتها وبرودتها معتدلة
وكل ساعة جاي طبيب لو ممرض
يفحص حالتها عاد نگدر بهالحالة نطمن
وثاني يوم بالاربعة الفجر طلعنة اني
وغيث
نمت بالطريق بسبب سهري ويا أمي
لحد ما وصلنة گعدني
لزم ايدي ومشينة
همس بأذني:-مثل الگمر يتوسط الليل
ملاك:-شنو؟
غيث:-ايدج بوسط العباية
ابتسمت من جوة العباية وضلت ابتسامتي
لحد ما دخلت الضريح
وتحررت الطيور البداخلي وصارت ؏ شباك
الأمام
ماوصلتلة بس
اتلمس الحيطان وبرودتهن احس بالأمان
واكتب اسم امي ؏ كل جدار بأصبعي
عسى ولعل تتغير الاقدار
قريت وصليت لروح وصليتلها صلاة الزيارة
ولأخواني هم
لحد ما حسيت روحي مثل الحمام
فوك القبة
ذبيت نفس وجنت كاتبة بورقة
الشفاء لأيمان جابر
و وياها فلوس اعرف ذني ينطوهن لليتامى
اعتقد او تبرع ماعرف بس جنت اريد
اخليها جوة بالشباك
ماگدرت اوصل انطيتها لوحدة
من الخادمات وهي خلتها گبالي
ابتسمتلها وطلعت
واني گلبي مرتاح مادام سلمت
امري للأمير مرتاحة
طلعت باوعت غيث جان بعيد
لاوي رگبتة من الشمس ويباوع
للباب شافني وعدل رگبتة وابتسملي
مشيت والأبتسامة ماخذة نص وجهي
لزمت ايدة گال:-ها ارتاحيتي
ملاك:-اي
غيث:-تقبل الله ان شاءلله
ابتسمتلة ومشينة سوة
فجأة جانت مرة تمشي گبالنة باوعتلها
ودنگت
من مرت من يمي لزمتني من عكسي
حيل ودارتني عليها گلبي انقبض
همست:-شبيج؟
_عيونج تبجي
عگدت حاحبي وباوعت لغيث
ورجعت باوعتلها وبلعت ريكي
ملاك:-لا ما ابجي
_راح تبجين
باوعت لغيث وهي عيونها
كبار خضر ومكحلة ومعصبة وجفوف
لابسة همستلة:-ليش تبجيها
غيث:-خوية شبيج وخري منا
_راح يبجيج هواي ديري بالج منة
ملاك:-ليش
_ديري بالج عيونج تبجي هو يبجيهن ديري بالج
ضلت تردد بهاي الكلمة
وهي تباوع لعيوني وراحت
ضليت احاول استوعب
صافنة بالفراغ مشينة
درت وجهي باوعتلها وهي كذلك
بنفس اللحظة دارت نفسها عليها
وكأنما عرفت اني درت عليها
رجعت باوعت لغيث همست:-شبيها
غيث:-مخبلة بابا عوفيهن
ملاك:-جانت تحجي بثقة؟
غيث:-وانتي واثقة اني هالعيون الحلوة ابجيهن؟
حجيت بقلق:-مادري
مشيت وكلبي مقبط
وكل ساعة اضغط ؏ ايد غيث
منو هاي المرة؟
ليش هيج حجت؟
معقولة؟
