رواية عشكت جنوبية الفصل الثالث بقلم نسرين الاسدي
هنادي: گعدت الصبح عندي نشاط وواهس لأن مفكرة راح اسوي شيء اليوم
مالگيت احد يمي لميت الفراش ونزلت جوة لگيت بس امي وابوي گاعدين ابوي اليوم ما عندة بنيان والبنات رايحات للمدرسة وخواني طالعين لشغلهم
گتلهم ببتسامة: صباح الخير
ردوا سوة: صباح النور حبيبتي
رحت غسلت واجيت گعدت يمهم اتريگ شوية واشتغل الغزل بيناتهم چنهم طيور حب شحلاتهم صفنت عليهم وضليت بس اسمع الهم
سمية: يابعد بيتي شحلات هالصباح وانته گاعد يمنه
ابتسم قاسم ورد: فديتج يروحي وانا هم مشتاگ للگعدة وياج ونتريگ سوة وعلى راحتنا مو اطلع ويه الأذان قبل لا نلحگ نگعد
تحمحمت انا وگتلهم: بابا ماما شنو السالفة گولوا يمنه بنية خطية ليش كل هالكلام
ضحكوا عليه وگالت امي: باجر عگبه انتي تزوجين وتسمعين هالكلام من زوجج يوميه بس كون انتي تصيرين خوش مرة وتستاهلينه
گلت: وليش هو شنو يريد غير اطبخله واغسله هدومه واكعد وياه الصبح من يروح للشغل وأول ما يجي اتلگاه واكله الله يساعدك ..هذني سهلات
اشو بابا وماما طگوها ضحكة عليه ..انا انصدمت وضليت صافنة ليش،يضحكون انا گلت شيء يضحك؟
سكتوا بعد شوية وبابا خله ايده على جتفي وگال: اي حبيبتي هذا كل شيء بس اكو شيء اهم من هذنِ كلهن
باوعتله وگلت: شنو هو بابا؟ !
گالت امي: الحب والتفاهم حبيبتي هذنِ اهم شيء بالزواج حتى ينجح
ابتسمت وگلت: بسيطة انا راح احبه وهو يحبني ونعيش حياة حلوة تخبل
ابتسمولي وگالوا: ان شاء الله بنيتي
سكتت شوية ونوب گلت: بابا انا اريد اطلب منك طلب بس لا تگول لا عفيه حباب
قاسم: گولي حبيبتي
هنادي: بابا انا اريد اشتغل هم
گال مستغرب: شنو تشتغلين؟ !
هنادي: ماراح اشتغل شغلة چبيرة واتعب بس اخذ خضرة من الحديقة واروح ابيعها عالجيران واذا تقبل اروح للسوگ اطلع ويه اخواني وارجع وياهم
بس ابوي چنه ضاج وگال: لا هنادي انا ما اقبل انتي تردين تساعديني ابقي هنا بالبيت لأن انا ما اگدر اخلي بتي تفتر على البيوت لو تگعد بالسوگ وياريت ما تعيدينها بعد
گلت: بس بابا انت مو تگول الشغل مو عيب شكو بيها
گال ابوي: هنودة لا تضوجيني انا گلت لا يعني لا سدي الموضوع ...وگام وطلع برة
لزمتني امي من زندي وگالت: منو انطاج هاي الفكرة شفتي شلون ضوجتي ابوج ..عوفي السالفة ولا تعودينها
گلت: بس ليش يمة شنو بيها اذا ردت اساعدكم
گالت: حبيبتي مابيها شيء ..بس ابوج يريدجن تضلن مدللات ومايقبل اتعبن بالشغل هو جاي يهلك نفسه بالشغل بس عالمودجن حتى ما تحتاجن شيء شلون تردينه يقبل تشتغلين يا هنودة
نزلت راسي وگلت :صار يمة
طبطبت على ضهري وگالت: عفية بنيتي الشاطرة يلا هسة گومي خن نخلص شغلنا حتى ابدي انا بالعجن واخبزة قبل الغدة
**
ليث: گعدنا من الصبح اني ومراون طلبنا الريوگ بعدين خلصنا وطلعنا لفرع الشركة لگينا كل الموضفين واكفين استعداد والكل رحب بيه بحرارة وعبرولي عن شوقهم وفرحتهم بجيتي لأن صارلي اكثر من سنة ما جاي واتواصل وياهم بس بالتلفون دخلت لمكتبي واتصل زيد المسؤول عن هذا الفرع بالتاجر حتى،يتفق وياه ويجي نخلص الأوراق وسلمني ملف كامل بيه كلشي عن هذا الرجال اسمه وائل بسام صاحب شركات الباسم عمره 45 سنة وهو كلش جدي بشغلة ويحب الشغل مرتب ويمشي بسلاسة
عنده هواي شركاء بس حاب شغلنا ويريد يقوي العلاقة ويانه
عجبتني هاي الأمور وصار عندي فضول اتعرف لهذا الشخص عن قرب اكثر
وصل وائل وگعدنا نحجي بأمور الشغل والشراكة وشلون راح يصير التعامل بيناتنا عجبتني صراحته ودقة تركيزة واتفقنا عالشغل وكل الأمور ضلينا حتى وقت الغدة وبعدين طلعنا لمطعم قريب حتى نتغدة ونرجع للفندق
**
هنادي:
مرت خمس تيام وامي تشتغل بالخبز ومن تخلصه توديه للبيوت ومرات فهد لو هيثم يوصلونه ووحدة من هاي النسوان جانت زوجة وائل وكلش ارتاحت لأمي ومن شافت هيثم هيج عمر وهو ماعنده شغله زينة انكسر خاطرها عليه وگلتلها انا راح اتوسطله عد رجلي وهلبت يلگاله شغلة
فرحت امي كلش وتشكرتها واجت گلت لبوي وهو هم فرح واندعه كون هيثم يحصل شغل صدگ ويرتاح
وصدگ ورة يوم دزت علينه الحارس مالهم واجه گال لازم هيثم يجي لبيتهم اليوم العصر
سبح هيثم ولبس ملابس مرتبه واحنه رتبناله شعره ورشيناله عطر. وطلع فرحان
وكفنا احنه بالباب وذبينه وراه ماي
**
هيثم: وصلت للعنوان وانا مستحي ومتوتر كلش ماعرف ليش انا مو أول مرة اجي لبيتهم بس هالمرة حاسها مختلفة
دعيت بگلبي الله يسهلي وتوكلت عليه ودگيت الباب
شوية وفتحته الخدامة
گلتلي: انته هيثم
جاوبته: اي انا
گالت: تعال السيد وائل منتضرك داخل
مشيت وراها وانا مبهور بهذا القصر هاي أول مرة اشوفه من الداخل جان ليگول قصر مو بيت ضليت اردد ما شاء الله ..واندعيت بداخلي ما تصير نفسي بيه الله يرزق العالم
وصلت لگيت البيك گاعد بالصالة ما شاء الله مرتبه من كل شيء كراسي وطبلات وغير التماثيل الذهبية والتحفيات
گال: اهلآ وسهلآ هيثم تعال
سلمت عليه وگعدت
وائل: انت شم خلص بالدراسة هيثم؟ !
نزلت راسي وگلت :انا ما دارس يا بيك بس اتهجئ شوية
گال: زين هيثم انا ماراح اطول عليك انته تعرف تسوي چاي؟ !
تفاجأت بسؤاله بس نزلت راسي،وگلت : اي
گام هو وگمت وياه
خله ايده على جتفي وگال: اسمعني هيثم انا ماعندي مكان الك بالشركة بس شريك الي جاي اشتغل وياه محتاج شخص جايجي مهمته بس يودي الجاي او الگهوة لمكتبه وهو مو منا جاي بفترة ويرجع لبغداد بس انته من يشوفك خوش تشتغل ويعجبه شغلك منو الي يدري يمكن ينطيك شغله احسن واحتمال حتى ياخذك وياه
وهو شخص كريم كلش يعني بالشهر احتمال يوصل أجرك حتى ميتين ألف انا ادري انته ما اعتقدت الشغلة هيج بس صدگني بيها فايدة الك وانته فكر وانطيني خبر واذا وافقت حتى باجر نطلع سوة ونروح للشركة مالته
شكرته وطلعت وانا مية فكرة ابالي حسبتها شغلة مختلفة ما توقعت راح يگول هيج بس يلا شمتوقع من شغله لواحد مادارس ولا لازم كتاب حتى
**
هنادي: اجه هيثم وحجالنه كلشي صار بينه وبين وائل ذاك ابوي وامي بالبداية ما قبلوا بس بعدين سلموا امرهم لله عزوجل لأن اذا هذا المدير الي حجه عني كريم صدگ منو اليدري هلبت ينطي هيثم راتب زين
صار العصر وطلعت للحديقة حتى أجيب خضرة للعشى وجان محد بالبيت بس خواتي عفتهن يدرسن جوة وطلعت
بس ويه ما جاي اشتغل شفت خيال مال سيارة صار عالحديقة كمت وباوعت بس الشمس جانت بعدها قوية خليت ايدي فوگ عيوني حتى اشوف عدل وشفت راكبين بيها ثنين لبسهم وشكلهم چنهم مو منا
نزلوا واحد فتح السيارة امبينه عطلت والثاني ضل يباوع عليه
انا باوعتله وصفنت بوجهه جان مبين حلو ومرتب وبيده جكارة مخلي ايده الثانية بجيبه وصافن عليه انا بس انتبهت لنفسي عدلت حجابي وركضت للبيت
ليث: اليوم عزمنه وائل عالغدة وسولفلي عن شاب يدور شغل وهو خوش واحد وشغله نضيف وراح يكون ممنون مني اذا قبلته احنه چنه محتاجين واحد لأن الي چان ويانه مريض هالفترة فوافقت وگلت لمروان يشوفه باجر
طلعنه من بيته قريب العصر وعطلت السيارة بنص الطريق اني كولش ضجت وطلعت روحي لأن الجو حار وما ينحمل نزلت من السيارة على ما مروان يشوف العطل وحتى ادخن جكارة
وانتبهت لبيت صار گدامي مبين قديم وبنيانه كولش بسيط ويمه حديقة صغيرة بيها زرع قليل
وشفت يمها بنية لابسة دشداشة وحجاب بدون عباية انتبهت للسيارة من وگفت وگامت تباوع علينا من باوعتلها واجت عيوني بعيونها استغربت من حلاتها رغم بساطة هدومها بس جانت كولش حلوة عيونها عسليات وكبار ورموشها طوال بشرتها حنطية بس مبينة مصبوغة من الشمس خدودها حمر جنهن طماطة وشفايفها منفوخة
طولها حلو لا طويلة ولا قصيرة تجي بحدود 157 ما گدرت ابعد عيوني عنها
وهي جانت نضرتها مستغربة بس لمن انتبهت لنفسها ركضت دخلت لبيتهم عالسريع
وانا جنت مبتسم ماعرف ليش بس هاي البنية دخلت براسي
فزيت على صوت مروان صاعد بالسيارة ويصيحلي حتى اصعد
مروان: ليث شبيك مو حتى صوتي انبح يلا دركب حتى نروح
اشرتله وصعدت وصورتها بعدها ابالي
