رواية لست غجرية الفصل الثالث بقلم روز الحيدر
لستُ غجرية
روز الحيدري
♡ـــــــــــــــــــــــــــــــــــــــــــــ♡
التكملة ♡
بدء بمسيقى خفيفة
جسمي صار يتحرك مو بأرادتي، انما بأرادت النغمة
هي لي تتحكم كأني لعبة مربــوطه بخيط انحنيت
شوي... ولفّيت جسمي نصف لفة
الكركوشة تضرب بخصري وتطن، والوشاح يهتز مثل
جناح طير يريد يطير من قفص بعد ما رتفعت النغمة
لفيت ظهري
نزعت الوشاح طاح بالارض. عيونهم علقت بكل حركة اسويهة،وبدت النغمة تحرك الجزء السفلي بطريقتها وعايقاع
والجــزء العلوي من جسمـي يكـــون ثابت بس ايـدي
تتمايل.. لفيت ألهم وتقدمت بخطوات بسيطة
صرت امام شخص لي عيونه تعلكت بين خلخالي
رجلي وكركوشة خصري نزلت ارجف جسمي ويه
الايقاع
صارت عيني بعين وشكلة مذهول وجهي مامبين
شي متغطي بالنقاب الذهبي لذلك ماعرفني، بس
فتح دكمت قميصه بتوتر..
بعدما ستقاميت ماحس له أيدي نتلت نسحبـت
بقوة، وندفعت بالغرفة، أشوف عيون باهر لهيب
ويعض شفته بعصبيه، سد باب الغرفة واني حرت
شسوي!
جسمي ينطي رد فعل لا اراديا رعب يدب بأطرافي
وينعاد ذات الموقف واكون ورده، الطفلة العاجزة
دافع عن نفسها دخلني للغرفه سد الباب
جسمي صار عبارة عن جليد وأرجف رغم باهر يعرف
بحالتي ليش هيج يسوي سد الباب وبده يقرب بخطوة
واني أجع لحد ما ضربت بالحايط قرب أكثر وكسر
منطقة الامان"
باهر : شجابج لهنا؟
بتوتر
ورده : سـ.. سلطانه، هي كالت باهر ينتظرج هنا.
هز راسه بعدم تصديق
باهر : زين شفتيني ماموجود شكو دخلين؟
ورده : ردت أرجع منعتني، وكالت هسه اصيحه
روحي ماكو احد بالصاله، ودخلت
بعصبيه مكتومه
باهر : وتهزيلهم ولج تهزين ماصدگتي!!
بلعت ريگي بخوف
ورده : لا مو هيَ كالت....
باهر : اششش مو عليه ولج ترباتي واعرفج من سنين
مو يوم ويومين
مرر أدي على خصري سحبني غمضت عيوني بكل قوة ونفسي
صار مخربط رفع النقاب لمس شفتي بطرف أيده عقلي
ماشاف باهر بهاي الساعة شفته هو، هو ذاته
دمعت عيوني، كال
باهر : اشششش وردايتي لاتخافين بس اريدج
تتعودين واكسر السور لي حوطتي نفسج بي
راسي يرعش ماسيطرت عليك نفسي، بسرعة معدتي
گلبت أستفرغت بوجهه بعد عني بسرعة صرت استفرغ
بطريقة مخيفة كأن يطلع من معدتي خوف مكتوم صار
سنوات استفرغ واصيح صياح
باهر طلع معصب عافني اصارع وجعي وهو يعرف
السور ماممكن ينهد بسهوله، صرت اصيح واسب
باهر
على صوتي أجه صديقه لي شافني ركضلي رفعت
أيدي اوقفه لان تعبت ماعندي طاقه احس امعائي
تريد تطلع من قوة الاستفراغ
رد بقلق
: بيج شي؟
مارديت رجع طلع يركض ثواني رجع بأيده بطل ماي
فتحه وقدمة
: غسلي... شبيج؟
خله الماي قريب عليه وعيونه تترقبني بستغراب،
اخذت الماي مضمضت اكثر من مره وهو واكف
: شبيج اخذج للطبيب؟
هزيت راسي بنفي،صحت
ورده : حقير وعد له اندمك واخلي شوفتي
حسرة بگلبج
: شبي؟ سوالج شي؟
بقيت كاعده بمكاني مااكدر اكوم
: وينه؟
: سمعت صوت الباب يمكن طلع
رفعت راسي له واني ابعد شعري عن وجهي
ورده : اريد موبايل باهر تندل وين مخلي؟
عقد حواجبه مستغرب
: اعتقد مانزله بالسيارة
ضفكت أيدي بقهر وكعدت
ورده : فشلتييي جوري فشلتي
كعد مقابيلي
: شبي؟
ورده : هيج شي خاص
: اكدر اساعدج؟
رفعت عيني
ورده : ها؟ شلون؟
: اني اكدر اجيبه ألج
صفنت بوجهه بس لا مااثق شيسوي هنا! ويا باهر!
ورده : هههههههه وليكون تريد مقابل؟
: لا ابد استغفرالله مو مثل ماتفكرين
رفعت حواجبي
ورده : تستغفر وانت صديق باهر وتمشي ويا؟
نهض بسرعة
: بكيفج كتلج اذا تردين اساعد بدون مقابل
بس كولي شنو الي يخصج؟
نهضت
: لا مااريد مساعدتك
طلع وردقة من المحفظه قدمها
: اسمعي هذا رقمي اذا غيرتي رأيج وحتاجيتي
شي اتصلي
اخذت الورقة، كال
: لشي لخاص بمبايل باهر هو صورج؟
فتحت عيوني
: صح غجرية ومااستحي، بس مو لهاي الدرجة عاااد!
رفع أيده يدافع عن نفسه
: لا لاااا فهمتيني غلط يعني فكرت هيج مسوي لان
هواي بنات يروحن ضحية ابتزاز
عقد حواجبي
: هواي بنات؟ شمدريك؟
: ليش ماعندج موبايل متشوفين لي يصير؟
اخذت الوشاح، رديت واني امشي
: لا ماعندي
بدهشة
: هااا معقوله؟ اكو واحد لسه ماعنده موبايل!
: اي اني
طلعت شفت باهر نزل من سيارة هو يبدل قميصه
ويسد الدكم رجعت باوعت للشخص رديت
ورده : اذا تريد تساعدني جيبلي موبايل باهر بأسرع
وقت
هز راسه بأيجابية
عفته ورحت لباهر قربت من السيارة واخذت طابوكه
من الماع وركعتها بالجامه الامامية تفلشت باهر من الصدمة فجه وكع بالكاع دك على راسه
باهر : ولج مخبلةةةةةةةة!!!
قربت مسافه بثقة ونبرة تهديد
ورده : والله ورح امي وابوي ومااحلف بروحهم لو
اموت، يباهر اذا سويت لي سويته قبل شوية الضربة
الثانية افلق بيها راسك اطرك طر واسويك نصين
باهر : سويتييييي ولجججحح جوريييي
رفعت اصبعي اهدد
: تستاهل وجرب تعيدها لوكع مخك بالكاع.
باهر : والله والله اني سويت هيج بس حتى اكسر
السور لي بنيتي حول نفسج من العلاقات اريدج
تتخطين
اجه صديقه
: باهر شكو؟
رفع أيده ستوقفه
باهر : ماكو شي لاتدخل.
ضل واكف يترقبنا قربت لباهر بصوت ناصي
ورده : ولك شكد شفت قذرين بس مثلك ماشفت
جايب حثاله مثلك نوب!
باهر :والله ماجايب احد! سلطانه هي مسويه
سهره هنا واني ماموجود، اصلاً دااجهز كُلشي
لنا بس اني وياج تعاي بعينج وشوفي
: تفووو عليك،.
لفيت اريد اروح صاح
باهر : لحظه خليني اوصلج
سمعت صديقه
: شوف الجام تفلش
ضحك
باهر : فدوة الخلخال رجلها، هاي مو اول مره تسويها
رجعت له
: هااا اسمعني باجر اني رح اروح احجيلهم كلشي
وطلع من القرية واذا زلمه شوف وجهي بعد.
لفيت ومشيت خطوة ركض
باهر : لا والله اسمعي ورده بس لحظه جوررييي
ستوقفني وهو يلزم الوشاح صحت بغضب
: كااااافي عوفنيييي
بتعد
باهر : تمام بس اهدي احجي وياج
باوعت لهذا لسه واكف
: شبيك! تعال اخذ صديقك لا اخلي دمه
بطوله
قرب لزم باهر كال
: باهر كافي عوفها
لفيت امشي صاح
باهر : لاتمشين بالليل وحدج انت وحجولج ترن
بدون مالتفت
ورده : معليكككك
باهر : امشي نوصلها لا تتخبل بهذا الليل هي تخاف
من بالظلمة
: تحبها؟
باهر : النفس الي صعد وينزل
لفيت عليهم يمشون وراي
ورده : كون صعد بعد مانزل معليكم بيـة....
: خوية خلينا نوصلج وتعدي هل الليلة سلامات
مشيت واني ساكته والبرد يكص واني مالابسه
شي ثكيل يدفي بس تحت بدلة لركص بَدي لازك
على جسم، وبنطرون تحت التنوره ضيك كلش،
لليل هدوء بس رنة الخلخال،
باهر نزع ستره وخلاها على متني شمرتها بسرعة
كال
باهر : ولج خبلة الدنيا ثلج خليها دفيج
ورده : ايععع بيها عطرك
باهر : اوويي وشبي عطري يحبل؟
ورده : اي خاف اجيب عارات مثلك
ضحك كيفلها كال
باهر : شنسميهم؟
ورده : طياح حظ
باهر : اويلي ويطلعون هيج يشكون شك مثل امهم
وابوهم شيردون من الله ولد الكلب!
ورده : روح خلف من كـ*** رند
باهر : يامصيبة خراااا ولج غير هي تذب روحه
شسويلها
ورده : اي وانتَ مكبره ماتردها
حجيت حجايه بصوت ناصي، كفخني على راسي
بخفه كال بهمس
باهر : طاح حضج ولج السانج لايسمعج عيب
: طيط بيك وبي
تنهد وكال
باهر : خربت سهرتنا بس هل شي مايمنع اعرض
عليج الزواج
ورده : نجب
ضحك
باهر : خليني انجب وبحضنج لميني
ورده : خلي رند تلمك
صاح
باهر : يبووووو
باهر يمشي قريب عليه وصديقه ورانا وعينه بالموبايل
كاله
: هااا
ضحك
باهر : وجعااا
ورده : امشي وانتَ ساكت لا اطشر مصارينك بالكاع
بملل ينفخ
باهر : سكتنااا
صار هدوء بصوت لخلخال بالليل وظلمة صوته
يصير مرعب..
صديقه كال
: تعرفين رنة الخلخال تثير انتباه الجن الحائر؟
ورده : خطية ليش حائر؟
بضحك
باهر : دوهن من رنة حجلج
ورده: لا هذا باهر الحائر مو الجن
: ههههه عافتها كلها وركزت بحائر!
باهر : هههههههه هي هيج الله خالقها تعوف المهم
وتركز بالمومهم
كال
: لا جديات اكو قصص قبل تكول حتى ركص
الهجع هو طقوس شعوذة
ورده : امممم اعرف
: اي كلها طقوس قربان لما تصير دائرة
ويركصون بالخناجر بس الفرق الموسيقة
باهر : شتحجي يمعودة لا تخوفها.
ورده : اخوف مااخاف
بتسم
باهر : اعرف غير ذيبتي
وصلت للبيت فتحت الباب واني ارجف اريد ادخل
قرب خطوة
باهر : سلطانه حسابها يمي على سوته
رفعت عيني بعينه خايفه يكشف جذبي
ورده : طبعاً تنكر قابل تكلك أي اني، كلتلها افضل
متحجيلها شي وتمشي الموضوع حتى ماتشد
وياي أكثر
هز راسه بأيجابية
أكدت
ورده : باهر مالي خلكها لاتحجي شي
باهر : بس لي صار مااريده يتكرر فهمتي؟
ورده : فتهمت ونص
باهر : احممم نعيدها؟
رفعت حاجبي
: بأحلامك بعد
باهر : يله من نتزوج
: ممم
ضحك دخلت همَ رجعو
تلكتني جدة بقلق
جدة : ولج بالي يمج
حضنتها، حضنها دافي حنين احس بيها حنيه ماتشبه
شي ثاني يمكن حضن الام؟ بس اني مامجربته لان
ماعندي ام
جدة : شبيج حبوبة لاتخوفيني؟
بتعد دخلنا
: ماكو شي بس ماكدرت احصل الموبايل
جدة : كتلج عوفي يولي باهر يحبج ومايأذيج
يخاف عليج لومايخاف عليج مامنع سلطانه
تندك بيج
: لا جدة باهر مايحبني بس... يريد يمتلكني وله
حب؟ لا
اخذت ملابسي غيرتها ورجعت كعدت كدامها وهي
تزيت شعري ودلكه حجيتلها الي صار
جدة :ياااععع ديري ضهرج وردي شعندج تهزين
ولج شو ستفلگتي الوضع وريده! لو على حس
لطبل خفن يرجليه!!
ورده : مدري اول مره عبالي باهر وياهم وهو هيج
مسوي،حتى صديقه كاعد ، بس بعدين من سحلني
يله عرفت
جدة : وليش جذبتي!
ورده : لا لا ترديني أكله الحقيقة! وللصراحه يمكن
أريد اخرب علاقته بسلطانه
وتعرفين اذا الصور صار بايد سلطانه ممكن تاكلني
بدون ملح وهي شلون تحبني!
جدة : حبوبه ابوس راسج بعد لاتفكرين وتخططين
كل خططج تفشل
سكتت،هل مره فشلت ماكدرت احجي شي بعدها
ضفرت شعري وكالعادة نمت بحضنها
احبهاااا حبوبتي روحي من الدنيا لو مااشمها وانام
؏أيدها احس نفسي تعبانه حضنها ينطيني طاقة
حب وحنية ماتنوصف دائماً اكول الله حرمني من
أمي وابوي بس عوضني بحضنها وعطرها مايشبه
شي
فزيت من الكابوس كل وجهي يند عرك ورگبتي
وريكي ناشف، دمعت عيني واني اذكره
ورده : الله يلعنك ضافرر الله يقدرني واخذ روحك
بأيدي
لحد مارح تأثير لكابوس، طلعت يم النـار وجدة
جهزتلي حليب وعسل حتى
ماينزل السكر عندي بعدها الشمس صارت عالية
بدلت وطلعت جدة عدها شكم غنمة اخذهن ارعى
بيهن اخليهن يرعن واكعد احوك ورا البيت وهم
اتسله
كملت أخر قطعة بيدي ورجعتها للجيس رفعت
عيني، شفت وحده من الغنم طلعت عن خواتها
تركت من أيدي وركضت اصيح عليها لحد ما لزمتها
من اذنها اسحل بيها واسبها واسب لخلفها
: حيوانه بنت الحيوان
ماحس له سيارة صفت وينزل منها ذاك الشخص
لي نطاني رقمه البارحة لابس كوت أسود وبنطلون
اسود وحذاء يلمع من السواد بتسم وهو يسد باب
السيارة وفاده عريض السبع ياكل بيها شهر
يبتسم وهو يخطي خطواته بتجاهي رديت
: خير!
سحب نفس قوي كال
: كل خير
بعد يبتسم واني شبعته مسبه بگلبي'' قرقوز''
كال : الامانة لي وصيتيني عليها
عقدت حواجبي
: مافهمت! احجي لي تريده بسرعة لا واحد
يشوفك وانشهر
: محد يحجي لان صديق باهر وما شاءلله باهر
معروف بينكم
: الزبدةة فضها؟
ضحك
: صور نحذفو من مبايل باهر طمني
برود وعدم تصديق
: شلون؟
: البارحة بعد اللي صار كثر بالعسل ونصطر
ستغليت الموقف وحذفتهن حتى فيديو
: شنو الدليل حذفتهن؟ وليش هيج تسوي؟
ضحك هز راسه وطلع المبايل بحث ورفعه بوجهي
مصور مبايل باهر وهو يحذف الصور حتى من سلة
المهملات حتى مايكدر يرجعهن بتسمت، كال
: حتى هذا راح احذفه وليش هيج اسوي؟
ماعرف بس غيرتي ماسمحت أشوف وحده
بهيج وضع
: اذا باهر نتبه شلون؟
: لا تخافين هو يعرف نفسه واساساً مانزلتي من
السانه يلهج بأسمج
: امم
رفع عينه بعيني
: بس ممكن سؤال واذا ميعجبج لا تجاوبين عادي
: كول؟
: ليش حركتي رجال جبير مشلول؟
بستهزاء
: رجال؟ لو شيطان!
: انت شتشوفي؟
تنهدت
: مرآية للشياطين
هز راسه بأيجابية
: زين بعد سؤال؟
بملل واني اعوج حلكي
: كووول بعد شكلك تحقق وياي!
: لا ابد بس ارضي فضولي
هزيت راسي بأيجابية
: انت تحبي؟
: باهر؟
هز راسه
: اي لان شفت صورتج انت ويا بمطعم واضح من
الصورة جنتي فرحانة
: هذا شي خاص ميحقلك تسأل احبه لو لا معليك
: بس هو يحبج صورتج متفاركه
ضحكت رجعت عيني عليه
:برأيك الي يحب يستعرض بالي يحبها؟
ويهددها؟
: لا طبعاً
ورده : اساساً لو ما مهددني بالصور ولا رحت
بس رحت حتى ابين اني خايفه منه وكلت استغلها
واحذفهن، لو اخذ موبايله لمهم اتخلص منهن بأي
طريقة في سبيل مايوصلن بأيد سلطانه او رند
وتعرف علاقة باهر بسلطانه
هز راسه بأيجابية
: سلطانه شتشتغل؟
ضحكت بستهزاء
ورده : البارحه انتَ معزوم عدها وماتعرفها شتشتغل؟
بخجل
: اي قصدي بعد شنو تعرفين عنها؟
ورده : الشيطانه الاكبر بعد زوجها تكدر تكول لكل
يمشي تحت أمرها خاصه البنات الي ماعدهم والي يسندهم، سلطانه تخليهم جواري
: يعني كل شي قذر هي تسوي!
ورده : لي مايخطر بعقل بليس سلطانه تسوي
وبأبشع طريقة
هز راسه بصمت
شفت جدة اجت بتجاهي هو لتفت كال
: اني اروح
ورده : لا وينن خليك خلي تجي حتى تكلها هسه
تكول شعندج تحجين ويه الغريب
وصلت وصاحت
جدة : جوري
ركضتلها اخذت ايدها وكفت مقابيله
جدة : خير حبوبه شعندك؟
: كل خير ان شاءلله
جدة : وشنهو هذا الخير؟
: حجية امانه وصتني عليها جوري وصلتها
لفت عليه
جدة : ولج شنهي من امانه وريدةةة؟
ورده : البارحه سولفتلج كتلج واحد كلي اساعدج
جدة : وشلون تامنين؟
: حجيه شنو القصة يرحم موتاج مجرد مساعدة
لوجهه الله لا غير
جدة : رفيج باهر وتتكاون عليه! شنهي خطتكم؟
ولكم كواو** وين تعرفون وجه الله!
ضحك،وبينت غمازت خده، نزل راسه بخجل
كال
: والله وراس امي وابوي ماعندي خطة مجرد
مساعده لا أكثر ولا أقل مااريد باهر يستغلها
جدة : يله حبوبه فارج
بتسم رد
: صار حجيه صار ،و أي شي تحتاجون اني موجود
: مشكور
بتسم ولف صعد سيارته وراح
جدة : صور حذفهن؟
: اممم ومصور فيديو وهسه حذفه كدامي
جدة : لا تحجين لباهر شي مخبل
مشينه
: لا أصلاً ولا أبين له
نحنت تاخذ اعواد يابسه من الارض ضحكت
: حبوبةةةة مابيه شي!
ماهتمتلي اخذت كم عود ورجعنا بالغنم،صارت
دور اشيا من الكاع تجمعها وتحركها،ع اساس
تبطل السحر والشعوذة تشك بسلطانه تسويلي
اني مابيه شي ومااشكي،لذلك ماعاندها اخليها
على راحتها، وكفت
اطبخ اجت وهي بأيدها الاعواد اخذت صحن
من طين خاص لهذا لفعل بس لان مثلوم تركته
وراحت سوت واحد جـديد خلته ينـشف كـدام
الدفايه.. بعدين سحبتني بخرتني المغرب واني
اصيح
: حبوبه يعني مقتنعه اذا اتبخر بالـخـ****يبطل
السحر!
جدة : اي يله هسا الـخـ*** راح تاكلي
: يععع جدة
عاد بخرتني بأجبار،ريحتها تلعب النفس سابع
جار يشمها،اشم ملابس واريد استفرغ بس كملت
بوجهي حميت ماي و دخلت للحمام
بعد ماطلعت، كعنا نتعشا وغسلت الطاوه اجيت
ارجف
الجو ثلج كعدت ادفي أيدي وهي اخذت الاعواد
خلتهم بالصحن وشعلتهم صار دخان مررته على
وجهي
: هاي الاعواد تمثل الي عشتي قبل.
مرت الصحن حولي، مرة وحدة مو أكثر.
ردت :الدخان ما ينظف الروح، الدخان يطلع اللي
معلگ بالجسد جدة.
دخل الدخان بخشمي
حسيت صدري يثگل مو ضيق ثگل بحسرة
: ياريت يجدة ياريت
همست
جدة :إذا حسيتي بدوخة لا تخافين الخوف أول
شي يطلع.
: ماحس بشي ابد ياريت أحس
هزت راسها بعدها اخذته وطلعت لازم رماد
يلامس الارض..
قربت على دفاية اطرافي بعدها مثلجة شوية
واجت بيدها حجول قماش لونهم احمر دم
جدة : هذني لان لونهن احمر خليج لابستهن
امان مو زينة
بتسمت حضنتها
: اموت على سواليفج جدةةة
لبستهن واني اضحك مو لان بس امان لأنهم
حجول، بعدها بشوية ندك الباب راحت جدة
فتحته سمعت صوته باهر اجه وجدة تولته
ترزل بي
جدة :ماتوقعتها منك ابد تهددها بالصور!
وتعرف شكد ضافر عذبها لا وماكتفيت ولا
ستحيت من خليتها تركص كـدام رفيجك؟
ماجنت متوقعتها منك ابد
باهر : جدة فدوة لعمرج يارفيج! ورده وسمعت
صوت الطرب، ماصدكت هزي رطب ينخلة
ضحكت لان فعلاً هو معلي ولا حتى سلطانه، بس
دخل للصالة بسرعة نطيته ظهري
باهر : جوريتي
جدة : عوفها واحجي وياااي ولك اكول بس
باهر يحبها واكعد اقنها ثاري كلامها صح من
تكول مايحبني
بصوت مكسور
باهر : والله احبها بس ردت اكسر الحاجز اللي
بنتهه حول نفسها.
جدة : ياحيف عليك!
وهيج ينكسر الحاجز؟
تخلي الغريب يتفرج عليها؟
صاح
باهر : ليش تخليني اشك اهدومي واتخبل اني
ماكلتلها تعاي لهناك هي تسرسحت على صوت
الغنه
جدة : لو هل غريب مسويلها شي؟
وتعرف وردة مريضة بس لا.. لازم
اخاف منك لان
انت لي ردت تحبها وتعرفها مريضة
الف مرةةة كتلك مريضةةة
اجه قرب وكعد مقابيل وعيونه كلها
ندم بلع ريكه وبصوت مبحوح
باهر : وردايتي الحلوة والله حذفت
الصور ومااعيدها والله ماعيدها بعد
ولا اتقربلج بس باعي بعيوني وردة!
ولا كاني سمعته منزله راسي واحوك
بصوت قوي ثابت
جدة : أسمع ولك مااريد اشوف ركعت
وجهك وللدار ماتوصل فهمت وله اخليهم
يشحطوك
هز راسه بأيجابيه
باهر : صار جدة صار
نهض وطلع بسرعة وبدون اي زيادة
جدة :غلطت من ضنيت بي خير ألج
عفت من ايدي وحضنتها
: محد بي خير الي غيرج انت وحدج
وبس.
حبت راسي وتمسد بأيدها الحنينة بشعري
فزعت على دك الباب بقووووة مخيييفةةة
جدة بسرعة طلعت تشوف طلعت وراها
للباب وهي مغتاضه
جدة : والله يباهر لكطع...
فتح الباب وجانت اقارب جدة من العشيرة
ردت بقلق : عدها ولادا بسرعاا
اشوف ذيج البنية تخبل رغم حالتها تعبانه ايدها
على بطنها تتوجع، بطنهااا چبيرة كلش ويـاها
عرفت تكون امها لازمتها
جدة : دخلو بسرعةة
باوعتلي
جدة : تعرفين شغلج حبوبة بسرعة
هزيت راسي وركضت للمطبخ حضرت لماي
حار وزيت دفيته وكل شي تحتاجه بين ما
يحمي رجعت جهزت فراشها نيمتها البنية
ترجف خايفه وامها تضرب على خدها وترد
: من نمتي جوا وحبلج ماصحتي؟ ماخفتي
صخمتي وجهناا
عفتها ورحت جبت الماي والزيت جـدة كعـدتها
بطشت الماي الدافي والبنية خطية بس ترجف
جسمها سعفه ماتسيطر على نفسها غير لبجي
وتصيح وتترجا امها بمعنى
:: لا تبعدين بنتي عني ابوس رجلج
امها دغتها بمتنها وتسبها وتغلط
بعد ماجلستها بالماي الدافي رجعتها نامت اخذت
الزيت دلك لمنطقة حتى تسهل عملية الولادة من
دون جرح..
بعد نص ساعة بعد صياح البنية وخوفها،رجفتها
سمعنا صوت البچي طفل
ولدت بنية جدة بساعتها صبت عليها ماي دافي
ولفتها نطتها الأم البنية بس ماخذتها
جدة : مبروك جدة اجت بنيه تشبهج.
البنية صارت تبجي تشهك بشكل موطبيعي امها
ضربتها كالت
: الطفلة مانريدها خلوها، تفقت ويا وحدة تجي تنطيها العائلة تربيها.
بصدمة فتحت عيوني
ورده : شلوووون! بتها شلووون تنطيها!
: نغله بت حرام مانريدها
ردّت البنية بصوت مكسور
: لا والله بالحلال... والله تزوجنا بعقد وشهود.
: لو كان تبقى بعيني بنت حرام دام أني مو راضية.
صحت بغضب
ورده : شلووون؟ فهميني شلووون! شلون
تردين تنطيها؟ العائلة تعرفين شنو يسولها؟
الطفلة بحضن جدة، ملفلفتها، تصرخ كأنها حاسة بالمصيبة. أخذتها من جدة... طفلة شايلة جمال
أمها، بيضة شحمة ومدبدبة، وحمرة خدودها
تجنن قربتها لأمها وكعدتها.
ورده :بعدج تتوجعين؟
هزت راسها بنفي. نطيتها الطفلة الأم تبچي
والطفلة تبچي. أخذتها من إيدي، تباوع لوجهها.
ردت أمها ببرود : ذبيها، لا تتعلقين بيها... مستحيل
أخليج تزوجين واحد فكرَه مو من مستواج.
رفعت عيني عليها، دمي يفور. ودي أكوم أنتف
شعفاتها، بس صبرت.
ساعدت البنية تشرب الطفلة حليبها. أخذت صدر
أمها بلهفة... منظر يجبرك تبتسم. تشرب، ويطلع
صوتها الصغير.
ورده : يعمري... هيج ملاك يريدون يتخلون عنه!
ردت أمها وهي تباوع للطفلة بقرف
: فكر مثل أبوها.
بحدية
ورده : والله ماكو فكر غير عقلج الفارغ...تفووو.
هزت ايدها بستهزاء تمتمت
: نوب عليّ الكاولية! زمن والله
طلعت تتصل بتها بسرعة لزمتني تحجي وتبلل
بشفافها: فدوة لعمرج ساعديني لاتخليها تاخذ بنتي.
لزمت ايدها
ورده : شلون اساعدج شسوي فهميني، ابوها وين؟
: أمي، أمي هي ضمتني عنه وكلتله شردت وشتكت عليه
ومن طلع هو ماصدك بيها يعرفني ماعندي احد اروحله
صار يدور عليّ
ورده : ماحاولتي تتصلين بي؟
: طبعاً مرا اخذتني للدكتورة وتصلت بي كتله اني
يمها لا دور عليّ انتظر لحد ماأولد.
ورده : وهسه يدري بيج؟
هزت راسها
: لا.. لا ميعرف فدوة اروحلج تصلي بي وخلي يجي
جدة بسرعة طلعت مبايلها نطتهيا لكفته من ايدها دك
رقم وايدها ترجف..
جدة : اطلع اشوف خاف تجي حاولي تستعجلين
حبوبه
هزت راسها والموبايل بايدها طول يله رد عليها وبس
سمع صوتها تبجي تخبل عليها وصار يسألها عن المكان موبايل جدة صوته كلش عالي، رفعت عينها الي
: وين احنا؟
وصفتلها المكان بس ماندل لان فعلاً قريتنا بعيدة
صايرة ؏ خط حدودي، كالها دزيلي الموقع.. ماعرف
ولا عندي موبايل يرسل كالت
: موبايلي بجنطة أمي اذا تكدرين تحصلي.
كمت بسرعة وبقت بس هي وبتها طلعت بس جدة بالحوش
ورده : امها وين؟
جدة : بالباب
هزيت راسي وطلعت ألها فتحت الباب شفتها
واكفه يم سيارتها تحجي ومخليه الجنطة على
بنيد، رجعت راسي صحت
: حبوبة تعاي احجي وياها ألهيها دخذ لموبايل
صدك صاحتلها اشرتلها بهسه رحت يمها
ورده : بتج نزفت هواي اذا متسويلها شي
احنا مامسؤولين..
نزل الموبايل من اذنها واني صرت اصيح حتى
ادوخها
: اي عيني من تموت بعدين تصير عزيزة
وتعالو انتو كتلتوو بنتي، وجبتي بنتج حالها
حال الضيم
صار مثل ماردت راحت بسرعة والجنطة ع بنيد
شفتها دخلت ركضت لزمت الجنطة قبل مافتحها
حسيت لي اسوي غلط شلون اتجاسر ؏ شي مو
ألي بس اني مارح ابوك شي!
بسرعة فتحتها اعبث بيها حصلت المبايل اخذته
ضميته بصدري وسحبت الجنطة، رجعت ألها
جدة يمها تكلها : وضعها تعبان راح تموت
وترد عليها بكل صلافة
: لا مابيها شي بس تعرف تحبل هسه اخذلها اكل
تعوض الدم لي فقدته
ورده : شنو راح يجون؟
: اي دزيتلهم الموقع جاين مسافة الطريق
بتها صارت تبجي وحضنت طفلتها تشم بيها
وتشهك، شهكت موت، وترفع راسها تباوع لأمها
تتوسلها
: ماما أبوس رجلج والله شنو تردين اسوي بس
لاتبعديها عن حضني
رجعت تباوع لطفلتها
: والله اموت، شنو ذنبها تعيش يتيمة بس عدها
أم وأب!!
كلامها أثر بيَّ عيوني نملت دموع،خنگتني لعبرة
محد يعرف شنو تعيش بدوم أم،لا شفتها ولا
شميت ريحتها،يكولون حضن الام بي امان يختلف
عن كل حضن حتى عطرها يختلف،اني بعمر هذا
الطفلة والموت اخذ أمي مني..
بس مااخلي هاي الطفلة تعيش بعيد عن حضن أمها
مسحت عيوني رديت
ورده : يمكن سمعت صوت سيارة اتوقع اجو
طلعت وهي دردم وتغلط على بتها، اني بسرعة
نطيتها الموبايل فتحته طلعت ألهيها، جابت جنطة
ودك موبايلها، ردت بقت تحجي رجعت باوعت
للبنية اشرتلي يعني دزت لموقع وامها بعدما كملت
اتصال رجعت يم بتها
وجدة فجها وكع وهي تقنع
بيها ما تفرط بالصغيرة بس أصرت له تنطيها ام البنيه
خايفة يوصلون قبل زوجها وتخسر بتها، سألتها
ورده : وين وصلو؟
ردت وعينها بالموبايل: ساعة ويوصلون.
اني من يمي نقهرت، امها كل شوي تطلع تحجي اتصال
قربت للبنيه
ورده : أبوج اخوانج وين؟
: بابا متوفي، وماعندي بس اخ واحد وعايش بعيد
عنى وبس زوج امي وهو مايرفضلها طلب وياها
: وزوجج ليش ساكت؟
ردت وهي تناشغ
: اني ماخليته يسوي شي مهما يكون تبقى امي عبالي
كم يوم وتهدأ ماتوقعتها تاخذ بنتي مني..
: زين... ليش تزوجتي بدون علمها؟
تباوع لبتها ودموعها تنزل ردت بحسرة
: خطبني اكثر من مرا والله ماخله لاشيوخ ولا اقارب
بس هي رفضت
: سبب؟
: وهو مهندس اني ويا خلصنا سنوات الجامعة ولما تخرجنا كل مايتقدم ترفض بعذر هو مو من مستوانا ميكدر يوفرلج لي عايشته والله اني مااريد غير سكف يلمنا، بس مو هذا لسبب الاساسي
: شنو؟
: رجلها يريدني الأبنه وهي حتى تسيطر عليه اكثر
تضغط عليّ، ولما صارت صدوك جابت شيخ تعقدلنا شردت وكال ماكو غير حل نتزوج، ورحنا يساعتها
عقدنا عقد شيخ وثبتنا محكمة، يعني مو مثل ماتكول
نزلت عينها على بتها تلمس خدها
: بنتي مو بنت حرام والله ابوها ماقبل يلمس ايدي
بالحرام،.... خليني اشرد فدوة
: وين ترحين؟ ليل وشتا ثلج وانتِ نفاس وبنتج
تموت بهذا البرد لا سامح الله ماتتحمل بعدها طين
: ياربي ساعدني
لزمت أيدها
: والله لو اعرف اسوي لمستحيل ولا اخليها تاخذها
رجعت حضنت بتها وتبجي
: لاتبجين موزين عليج..
دخلت جدة بأيدها صحن حلاوة نفاس خاصه قدمتها
جدة: أكلي حبوبه موزين عليج
: ليش اكدر!
ورده : اي تكدرين بهذا التعب تردين تحمين بنتج يله
اكلي وقوي نفسج، وخليني اخذ هل حلوة من أيدج
مديت اريد ماقبلت تنطيها ضامتها لحضنها بقوة
ورده : والله يمج ماتحرك
نطتنيها اخذتها بين اديه
ورده: بسم لله ماشاء لله
اشوف شكلها يجنن گلبي رف عليها ومبتسمه دخيل
الله جمالها ودي أعضها بس خطية حتى مابوستها
اخاف اجعصها او تتحسس بس اشوف ملامها
مرسومة رسم...
اشوف امها بلكوة تاكل ردت
: أمي وين؟
جدة : كتلها خليج برا لا دخلين
: زين تسوين
بسرعة طلعت الموبايل اتصلت: وين صرت؟ ستعجل
كالت ساعة ويوصلون... زينة،ثنينه مابينا شي يله
سدت لخط
: بشري؟
: كال اقل نص ساعة ويوصل
: هو منا؟
: اي
ورده : زين مايتأخر ان شاءلله
... كملي لماعون قوي نفسج شده وتعدي
بصوت مكسور
: ان شاءلله
خليتها تكمل الماعون واخذت بتها تشربها حليب
بعدها شوية سمعنا الباب ندفر دفره يمكن نخلع
وصوت شخص صاح بكل قوته
: وينهاااااااا
